ଭୁବନେଶ୍ବର: ବାରବାଟୀ ଷ୍ଟାଡିୟମର ଆଲୁଅ ପ୍ରସଙ୍ଗଟି ମନରୁ ନ ଲିଭୁଣୁ କିଟ୍ କର୍ତ୍ତୃପକ୍ଷଙ୍କର ନେପାଳୀ ଛାତ୍ର ଛାତ୍ରୀଙ୍କ ପ୍ରତି ବର୍ବରୋଚିତ ଆକ୍ରମଣର ଘଟଣା ଓଡ଼ିଶାକୁ ଆନ୍ତର୍ଜାତୀୟ ସ୍ତରରେ ପୁଣି ଥରେ ଅପଯଶ ମୁଣ୍ଡାଇବାକୁ ବାଧ୍ୟ କରିଛି। ରାଜ୍ୟ ସରକାର ଓ କିଟ୍ କର୍ତ୍ତୃପକ୍ଷଙ୍କ ଠାରୁ ଏଭଳି ଅସମ୍ବେଦନଶୀଳ ପ୍ରସଙ୍ଗରୁ କିଛି ସଙ୍ଗୀନ ପ୍ରଶ୍ନର ଉତ୍ତର ଆମ୍ ଆଦମୀ ପାର୍ଟି ଦାବୀ କରିଛି। ତାହା ହେଲା
୧- ଛାତ୍ରୀ ଜଣକ ପୂର୍ବରୁ IROଙ୍କୁ ପୁରୁଷ ବଂଧୁଙ୍କ ଦ୍ବାରା ଅତ୍ୟାଚାରିତ ହେଉଥିବାର ଅଭିଯୋଗ ବାରମ୍ବାର କରିଥିଲେ ସୁଦ୍ଧା ବିଶ୍ୱବିଦ୍ୟାଳୟ କର୍ତ୍ତୃପକ୍ଷ କେଉଁ ବାଧ୍ୟ ବାଧକତା ଯୋଗୁଁ ଆବଶ୍ୟକୀୟ ପଦକ୍ଷପ ଗ୍ରହଣ କରିବାରୁ ବିରତ ରହିଲେ ?
୨- ପୁରୁଷ ବନ୍ଧୁଙ୍କ ସହ କୌଣସି ବିବାଦରୁ ଅନ୍ୟ କୌଣସି ବୃହତ୍ କାରଣରୁ ଛାତ୍ରୀ ଜଣକ ଆତ୍ମହତ୍ୟାକୁ ଶେଷ ରାସ୍ତା ଭାବେ ଚୟନ କରିବାକୁ ବାଧ୍ୟ ହୋଇଥିଲେ ?
୩- ଛାତ୍ରୀଙ୍କ ମର ଶରୀରକୁ ସହପାଠୀଙ୍କୁ ଅନ୍ତତଃ ପକ୍ଷେ ଶେଷ ଦର୍ଶନ ପାଇଁ ଅନୁମତି ଦେବାରେ କେଉଁ ବଡ଼ କାରଣ ବାଧକ ସାଜିଥିଲା ?
୪- ପୋଲିସ୍ ବଦଳରେ ସୁରକ୍ଷା କର୍ମଚାରୀଙ୍କ ଦ୍ବାରା ନେପାଳୀ ଛାତ୍ରଙ୍କୁ ବର୍ବରୋଚିତ ଆକ୍ରମଣ କରି କାହାକୁ ସୁରକ୍ଷା ଦେବାକୁ ଚେଷ୍ଟା କରୁଥିଲେ କିଟ୍ କର୍ତ୍ତୃପକ୍ଷ ?
୫- ଯଦି ପୋଲିସ୍ ଓ କର୍ତ୍ତୃପକ୍ଷଙ୍କ ଅନୁସାରେ ଆଇନ୍ ଶୃଙ୍ଖଳା ପରିସ୍ଥିତି ନିୟନ୍ତ୍ରଣାଧୀନ ଥିଲା ତେବେ କେଉଁ କାରଣରୁ ନିରୀହ ଛାତ୍ର ଛାତ୍ରୀଙ୍କୁ ଜୋର୍ ଜବରଦସ୍ତି କ୍ୟାମ୍ପସ ଖାଲି କରାଇ ସ୍ବଦେଶ ପ୍ରତ୍ୟାବର୍ତ୍ତନ କରିବା ନିମନ୍ତେ ବାଧ୍ୟ କରାଯାଇଥିଲା ?
୬- ଭୁବନେଶ୍ୱର ରେଳ ଷ୍ଟେସନଟି ଅନତିଦୂରରେ ଥିଲେ ସୁଦ୍ଧା କେଉଁ କାରଣରୁ ବିନା ଟିକେଟ, ବିନା ଖାଦ୍ୟ ଓ ବିନା ଆର୍ଥିକ ସହାୟତାରେ ଛାତ୍ର ଛାତ୍ରୀଙ୍କୁ ସୁଦୂର କଟକ ରେଳ ଷ୍ଟେସନକୁ ପଠାଇ ଦିଆଯାଇଥିଲା?
ସରକାରୀ ଶିକ୍ଷାନୁଷ୍ଠାନର ମାନକୁ ଗୌଣ କରି ଘରୋଇ ଶିକ୍ଷାନୁଷ୍ଠାନକୁ ପ୍ରାଧାନ୍ୟ ଦେବା ଓ ସେମାନଙ୍କର ଚାପର ବଶବର୍ତ୍ତୀ ହୋଇ ରାଜ୍ୟ ସରକାର ନିଜ ଦାୟିତ୍ୱ ନିର୍ବାହ କରିବାରେ ଅକ୍ଷମତା ପ୍ରକାଶ କରୁଥିବାର ନଜିର କେବଳ ଏହି ଘଟଣା ନୁହେଁ ଅତୀତରେ ଅନେକ ଘଟଣାକ୍ରମରେ ପ୍ରମାଣିତ ହୋଇ ସାରିଛି।
ଏକ ସଦିଚ୍ଛା ଓ ନିର୍ଭୟ ବାତାବରଣ ମଧ୍ୟରେ ସମସ୍ତ ନେପାଳୀ ଛାତ୍ର ଛାତ୍ରୀଙ୍କୁ ଶିକ୍ଷା ପ୍ରଦାନ କରାଇବାର ସୁବନ୍ଦୋବସ୍ତ କରିବାକୁ ରାଜ୍ୟ ସରକାରଙ୍କ ନିକଟରେ ଆମ୍ ଆଦମୀ ପାର୍ଟି ଦାବୀ କରିଛି।
ଏହି ସାମ୍ବାଦିକ ସମ୍ମିଳନୀରେ ମୁଖ୍ୟ ପ୍ରବକ୍ତା ଶ୍ରୀ ଲଳିତ ମୋହନ ଦାଶ ଅଧିକାରୀ, ରାଜ୍ୟ ସଙ୍ଗଠନ ସଂପାଦକ ଶ୍ରୀ ସନ୍ଦୀପ୍ତ ଦାସ୍, ପ୍ରବକ୍ତା ଶ୍ରୀମତୀ ସସ୍ମିତା ହୋତା,ପ୍ରବକ୍ତା ଶ୍ରୀ ସୁନୀଲ ଷଡ଼ଙ୍ଗୀ ପ୍ରମୁଖ ଉପସ୍ଥିତ ଥିଲେ।
