ଭୁବନେଶ୍ବର: ଓଡିଶା ଗସ୍ତରେ ଆସୁଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ କାର୍ଯ୍ୟକ୍ରମରେ ଏକ ବଡ ପରିବର୍ତ୍ତନ କରାଯାଇଛି। ପୂର୍ବରୁ କୁହାଯାଇଥିଲା ଯେ, ସେ ଆସନ୍ତା 27 ତାରିଖରେ ବ୍ରହ୍ମପୁର ଗସ୍ତରେ ଆସିବେ। ସେଠାରେ ସେ ଯୁବ ସେବା ଉତ୍ସବରେ ଯୋଗଦେବେ। ସେଥିପାଇଁ ମୁଖ୍ୟମନ୍ତ୍ରୀ ଏବଂ ମୁଖ୍ୟ ଶାସନ ସଚିବ ବୈଠକ କରି ତାଙ୍କର ସୁରକ୍ଷା ବ୍ୟବସ୍ଥା ତଦାରଖ କରିଥିଲେ। ହେଲେ ବର୍ତ୍ତମାନ ସେଥିରେ ପରିବର୍ତ୍ତନ କରାଯାଇଛି।
ନୂଆ ସୂଚନା ଅନୁସାରେ ପ୍ରଧାନମନ୍ତ୍ରୀ ଆସନ୍ତା 27 ତାରିଖରେ ବ୍ରହ୍ମପୁର ନୁହେଁ ଝାରସୁଗୁଡା ଆସିବେ। ସେଥିପାଇଁ ସେଠାରେ ବ୍ୟାପକ ଆୟୋଜନ କରାଯାଉଛି। ଏ ନେଇ ମୁଖ୍ୟମନ୍ତ୍ରୀ କାର୍ଯ୍ୟାଳୟ ତରଫରୁ ସୂଚନା ପ୍ରଦାନ କରାଯାଇଛି। ଏଥିରେ କୁହାଯାଇଛି ଯେ, ପ୍ରଧାନମନ୍ତ୍ରୀ ଆସନ୍ତା 27 ତାରିଖରେ ଝାରସୁଗୁଡା ଗସ୍ତରେ ଆସିବେ। ପୂର୍ବରୁ ସେ ବ୍ରହ୍ମପୁର ଆସିବେ ବୋଲି ସ୍ଥିର ହୋଇଥିଲା। ହେଲେ ସେଥିରେ ପରିବର୍ତ୍ତନ କରାଯାଇ ଝାରସୁଗୁଡା କରାଯାଇଛି।
ତେବେ ବ୍ରହ୍ମପୁର ଆସିବେ ବୋଲି ରଙ୍ଗେଇଲୁଣ୍ଡାଠାରେ ବ୍ୟାପକ ବ୍ୟବସ୍ଥା କରାଯାଇଥିଲା। ଏପରିକି ଟେଣ୍ଟ ବନ୍ଧା ମଧ୍ୟ ସରିଯାଇଥିଲା। ହେଲେ ସେଥିରେ ପରିବର୍ତ୍ତନ କରାଯାଇଛି।
କାହିଁକି ପ୍ରଧାନମନ୍ତ୍ରୀଙ୍କ ସଭାର କରାଗଲା ସ୍ଥାନ ପରିବର୍ତ୍ତନ
ପ୍ରଥମେ ବ୍ରହ୍ମପୁର ଆସିବେ ବୋଲି କୁହାଯାଇଥିଲା। ହେଲେ ଆଜି ତାହାକୁ ଝାରସୁଗୁଡାରେ କରାଯିବ ବୋଲି ଘୋଷଣା କରାଯାଇଛି। ତେବେ ବ୍ରହ୍ମପୁର ପରିବର୍ତ୍ତନ କରିବାର କାରଣ ହେଲା ଯେ, ଆସନ୍ତା କିଛିଦିନ ମଧ୍ୟରେ ରାଜ୍ୟରେ ଦୁଇଟି ଲଘୁଚାପ ଲାଗିଲାଗି ଆସୁଛି। ଫଳରେ ଉପକୂଳ ଓଡିଶାରେ ପ୍ରବଳ ବର୍ଷା ହେବାର ସମ୍ଭାବନା ରହିଛି। ଏଥିରେ ବ୍ରହ୍ମପୁର ବେଶୀ କ୍ଷତିଗସ୍ତ ହେବାର ସମ୍ଭାବନା ରହିଛି।
ଏ ସଂପର୍କରେ ରାଜ୍ୟ ସରକାର ପାଣିପାଗ ବିଭାଗ ସହିତ ଆଲୋଚନା କରିବା ପରେ ବ୍ରହ୍ମପୁରରେ 27 ତାରିଖରେ ସଭା କରିବା ସମ୍ଭବ ନୁହେଁ ବୋଲି ସ୍ପଷ୍ଟ ହୋଇଥିଲା। ଫଳରେ ତାହାକୁ ଉପକୂଳ ଅଞ୍ଚଳରୁ ହଟାଇ ଝାରସୁଗୁଡା କରାଯିବ ବୋଲି ନିଷ୍ପତି ହେଲା। ସେ ନେଇ ଗତକାଲି ବିଜେପି ସଭାପତି ମନମୋହନ ସାମଲ ଝାରସୁଗୁଡା ଗସ୍ତ କରି ଏ ନେଇ ସ୍ଥାନ ଦେଖିବା ସହିତ ସେଠାରେ କାମ କରିବା ପାଇଁ ମଧ୍ୟ ନିର୍ଦ୍ଦେଶ ଦେଇଥିଲେ। ଆଜି ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ଅନୁମତି ଆସିବା ପରେ ମୁଖ୍ୟମନ୍ତ୍ରୀ କାର୍ଯ୍ୟାଳୟ ତରଫରୁ ସ୍ଥାନ ପରିବର୍ତ୍ତନ ଘୋଷଣା କରାଯାଇଛି।
Festival Gift for Women: Govt Approved 25 Lakh New Ujjwala Connections