ଭୁବନେଶ୍ୱର: ଓଡ଼ିଶାରେ ଆଉ ଏକ ବୃହତ୍ ଶିଳ୍ପ ନିବେଶର ଦ୍ୱାର ଖୋଲିଛି। ଆଦାନୀ ଏଣ୍ଟରପ୍ରାଇଜେସ୍ ଲିମିଟେଡ୍ ଏବଂ ସଂଯୁକ୍ତ ଆରବ ଏମିରେଟ୍ସ (ୟୁଏଇ)ର ଆଇଏଚ୍ସି ଗ୍ରୁପ୍ ମିଳିତ ଭାବେ ରାଜ୍ୟରେ ୧୧.୫ ବିଲିଅନ୍ ଡଲାର, ଅର୍ଥାତ୍ ପ୍ରାୟ ୧.୧୦ ଲକ୍ଷ କୋଟି ଟଙ୍କା ବିନିଯୋଗ କରି ଏକ ମେଗା ସମନ୍ୱିତ ଆଲୁମିନିୟମ ପ୍ରକଳ୍ପ ସ୍ଥାପନ କରିବେ। ଏହି ପ୍ରକଳ୍ପକୁ ରାଜ୍ୟର ଶିଳ୍ପ ବିକାଶରେ ଏକ ବଡ଼ ପଦକ୍ଷେପ ବୋଲି ଦେଖାଯାଉଛି।
ଏହି ପ୍ରକଳ୍ପ ପାଇଁ ଭୁବନେଶ୍ୱରସ୍ଥିତ ଲୋକସେବା ଭବନ କନଭେନ୍ସନ୍ ସେଣ୍ଟରରେ ଓଡ଼ିଶା ସରକାରଙ୍କ ଶିଳ୍ପ ପ୍ରୋତ୍ସାହନ ସଂସ୍ଥା ‘ଇପିକଲ୍’ ଏବଂ ୟୁଏଇର ଇଣ୍ଟରନ୍ୟାସନାଲ୍ ହୋଲ୍ଡିଂ କମ୍ପାନି (ଆଇଏଚ୍ସି) ମଧ୍ୟରେ ବୁଝାମଣାପତ୍ର (ଏମ୍ଓୟୁ) ସ୍ୱାକ୍ଷରିତ ହୋଇଛି।
ପ୍ରକଳ୍ପ ଅଧୀନରେ ବାର୍ଷିକ ୪ ମିଲିୟନ୍ ମେଟ୍ରିକ୍ ଟନ୍ କ୍ଷମତାର ଆଲୁମିନା ରିଫାଇନାରି, ୨ ମିଲିୟନ୍ ଟନ୍ କ୍ଷମତାର ଆଲୁମିନିୟମ ସ୍ମେଲ୍ଟର ଏବଂ ୧ ମିଲିୟନ୍ ମେଟ୍ରିକ୍ ଟନ୍ କ୍ଷମତାର ଡାଉନ୍ଷ୍ଟ୍ରିମ୍ ମ୍ୟାନୁଫାକ୍ଚରିଂ ପାର୍କ ସ୍ଥାପନ କରାଯିବ। ପ୍ରକଳ୍ପଟି ସମ୍ପୂର୍ଣ୍ଣ ହେଲେ ଏହା ଦେଶର ସର୍ବବୃହତ୍ ସମନ୍ୱିତ ଆଲୁମିନିୟମ ପ୍ରକଳ୍ପ ଭାବେ ପରିଚିତ ହେବ।
ଏହି ଗ୍ରିନଫିଲ୍ଡ ପ୍ରକଳ୍ପକୁ ଦୁଇ ପର୍ଯ୍ୟାୟରେ ବିକଶିତ କରାଯିବ। ପ୍ରଥମ ପର୍ଯ୍ୟାୟରେ ୬୬ ହଜାର କୋଟି ଟଙ୍କା ଏବଂ ଦ୍ୱିତୀୟ ପର୍ଯ୍ୟାୟରେ ୪୪ ହଜାର କୋଟି ଟଙ୍କା ବିନିଯୋଗ କରାଯିବ।
ଏମ୍ଓୟୁ ସ୍ୱାକ୍ଷର କାର୍ଯ୍ୟକ୍ରମରେ ଯୋଗଦେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଥିଲେ, ୨୦୩୬ ସୁଦ୍ଧା ଏକ ସମୃଦ୍ଧ, ଆଧୁନିକ ଓ ସମାବେଶୀ ଓଡ଼ିଶା ଗଠନ ଦିଗରେ ସରକାର ଦୃଢ଼ତାର ସହ କାମ କରୁଛନ୍ତି।
ତାଙ୍କ କହିବା ଅନୁସାରେ, ଏହି ପ୍ରକଳ୍ପ ମାଧ୍ୟମରେ ବକ୍ସାଇଟ୍ ଖଣି, ଆଲୁମିନା ରିଫାଇନିଂ, ଆଲୁମିନିୟମ ସ୍ମେଲ୍ଟିଂ, କ୍ୟାପ୍ଟିଭ୍ ପାୱାର ପ୍ଲାଣ୍ଟ ଏବଂ ଡାଉନ୍ଷ୍ଟ୍ରିମ୍ ଆଲୁମିନିୟମ ଉତ୍ପାଦନର ବିକାଶ ହେବ।
ପ୍ରକଳ୍ପର ନିର୍ମାଣ ପର୍ଯ୍ୟାୟରେ ପ୍ରାୟ ୩୫ ହଜାର ଲୋକଙ୍କୁ ଏବଂ କାର୍ଯ୍ୟକ୍ଷମ ହେବା ପରେ ପ୍ରାୟ ୧୮,୫୦୦ ଲୋକଙ୍କୁ ନିଯୁକ୍ତି ମିଳିବ। ଅର୍ଥାତ୍ ସମୁଦାୟ ୫୩,୫୦୦ରୁ ଅଧିକ ପ୍ରତ୍ୟକ୍ଷ ଓ ପରୋକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବ।
ମୁଖ୍ୟମନ୍ତ୍ରୀ କହିଥିଲେ, ଖଣିଜ ସମ୍ପଦର କେବଳ ରପ୍ତାନି ନୁହେଁ, ବରଂ ମୂଲ୍ୟ ସଂଯୋଜନ ମାଧ୍ୟମରେ ଶିଳ୍ପାୟନ ଏବଂ ଯୁବପିଢ଼ିଙ୍କ ପାଇଁ ରୋଜଗାର ସୃଷ୍ଟି କରିବା ସରକାରଙ୍କ ପ୍ରମୁଖ ଲକ୍ଷ୍ୟ।
ଆଇଏଚ୍ସିର ଚିଫ୍ ଷ୍ଟ୍ରାଟେଜିକ୍ ଅଫିସର ପିଟର ଆବ୍ରାମ କହିଥିଲେ, ଏହି ପ୍ରକଳ୍ପ ଭାରତ ଓ ୟୁଏଇ ମଧ୍ୟରେ ଆର୍ଥିକ ସହଯୋଗକୁ ଆହୁରି ମଜବୁତ କରିବ। ଏହା କେବଳ ଏକ ବ୍ୟବସାୟିକ ନିବେଶ ନୁହେଁ, ବରଂ ଓଡ଼ିଶାର ଦୀର୍ଘମିଆଦି ବିକାଶ ପାଇଁ ଏକ ସ୍ଥାୟୀ ଭାଗୀଦାରିର ଆରମ୍ଭ ବୋଲି ସେ କହିଥିଲେ।
ଆଦାନୀ ପୋର୍ଟସ୍ ଆଣ୍ଡ୍ ଏସଇଜେଡ୍ ଲିମିଟେଡ୍ର ପରିଚାଳନା ନିର୍ଦ୍ଦେଶକ କରଣ ଆଦାନୀ କହିଥିଲେ, ରାଜ୍ୟ ସରକାରଙ୍କ ଶିଳ୍ପବନ୍ଧବ ନୀତି ଯୋଗୁଁ ଓଡ଼ିଶା ଏବେ କେବଳ କଞ୍ଚାମାଲ ଯୋଗାଣକାରୀ ରାଜ୍ୟ ନୁହେଁ, ବରଂ ମୂଲ୍ୟ ସଂଯୋଜିତ ଉତ୍ପାଦନର ଏକ ପ୍ରମୁଖ କେନ୍ଦ୍ରରେ ପରିଣତ ହୋଇଛି। ଏହି ନିବେଶ ରାଜ୍ୟର ସ୍ଥାନୀୟ ଅର୍ଥନୀତି ଏବଂ ଶିଳ୍ପ ବିକାଶକୁ ନୂଆ ଗତି ଦେବ ବୋଲି ସେ ଆଶା ପ୍ରକାଶ କରିଥିଲେ।