ଭୁବନେଶ୍ୱର: ଓଡ଼ିଶାରେ ଶିଳ୍ପାୟନକୁ ବ୍ୟାପକ କରିବା ଏବଂ ବୈଦେଶିକ ପୁଞ୍ଜି ଆକର୍ଷଣ କରିବା ଲକ୍ଷ୍ୟରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସଂଯୁକ୍ତ ଅରବ ଏମିରେଟ୍ସ (ୟୁଏଇ) ଗସ୍ତରେ ଯାଉଛନ୍ତି। ଏହି ପାଞ୍ଚ ଦିନିଆ ଗୁରୁତ୍ୱପୂର୍ଣ୍ଣ ଗସ୍ତ କାଳରେ ମୁଖ୍ୟମନ୍ତ୍ରୀ ବିଶ୍ୱର ପ୍ରମୁଖ ନିବେଶକ, ଶିଳ୍ପପତି, ସଂଯୁକ୍ତ ଅରବ ଏମିରେଟ୍ସର ସରକାରୀ ପ୍ରତିନିଧି ଏବଂ ପ୍ରବାସୀ ଓଡ଼ିଆମାନଙ୍କ ସହ ସାକ୍ଷାତ କରିବେ। ଏହି ସାକ୍ଷାତକାର ମାଧ୍ୟମରେ ଓଡ଼ିଶାର ବିକାଶମୂଳକ ପଦକ୍ଷେପ, ଉଦ୍ୟୋଗ ପାଇଁ ଥିବା ବ୍ୟାପକ ସୁଯୋଗ ଏବଂ ସୁବିଧା ସମ୍ପର୍କରେ ଆଲୋକପାତ କରାଯିବା ସହ ଓଡ଼ିଶା ଏବଂ ସଂଯୁକ୍ତ ଅରବ ଏମିରେଟ୍ସ ମଧ୍ୟରେ ବାଣିଜ୍ୟିକ ତଥା ସାଂସ୍କୃତିକ ସମ୍ପର୍କକୁ ଅଧିକ ସୁଦୃଢ଼ କରିବା ପାଇଁ ଆହ୍ୱାନ ଦିଆଯିବ।
ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ, ମୁଖ୍ୟମନ୍ତ୍ରୀ ପ୍ରଥମେ ନୂଆଦିଲ୍ଲୀ ଗସ୍ତ କରି ସେଠାରୁ ଆବୁଧାବି ଯିବେ। ଗସ୍ତର ପ୍ରଥମ ଦିନ ଅର୍ଥାତ ୯ ତାରିଖରେ ସେ ଆନ୍ତର୍ଜାତୀୟ ହୋଲ୍ଡିଂ କମ୍ପାନୀ, ଭାରତୀୟ ବ୍ୟବସାୟୀ ଓ ପେଷାଦାର ସଂଘ ଏବଂ ପେଟ୍ରୋକେମିକାଲ କ୍ଷେତ୍ରର ପ୍ରସିଦ୍ଧ ବୋରଜ୍ କମ୍ପାନୀ ଭଳି ବିଶ୍ୱସ୍ତରୀୟ ସଂସ୍ଥାର ପ୍ରମୁଖ ନେତୃବୃନ୍ଦ ଓ ବରିଷ୍ଠ ଅଧିକାରୀମାନଙ୍କ ସହ ଆଲୋଚନା କରିବେ। ସେହିଦିନ ସନ୍ଧ୍ୟାରେ ଦୁବାଇରେ ‘ଗୋଟିଏ ଜିଲ୍ଲା ଗୋଟିଏ ଉତ୍ପାଦ’ କାର୍ଯ୍ୟକ୍ରମ ଅଧୀନରେ ଓଡ଼ିଶାର ବିଭିନ୍ନ ସାମଗ୍ରୀର ଏକ ଆକର୍ଷଣୀୟ ପ୍ରଦର୍ଶନୀ ଉଦଘାଟିତ ହେବ। ୧୦ ତାରିଖ ଦିନ ମୁଖ୍ୟମନ୍ତ୍ରୀ ସଂଯୁକ୍ତ ଅରବ ଏମିରେଟ୍ସର ଅର୍ଥନୀତି ତଥା ପର୍ଯ୍ୟଟନ ମନ୍ତ୍ରୀ ଏବଂ ଆନ୍ତର୍ଜାତୀୟ ନିବେଶ ପରିଷଦର ଅଧ୍ୟକ୍ଷ ଅବଦୁଲ୍ଲା ବିନ୍ ତୋକ ଅଲ୍ ମାରୀଙ୍କୁ ଭେଟିବାର କାର୍ଯ୍ୟକ୍ରମ ରହିଛି। ଏହା ସହିତ ଭାରତୀୟ ବ୍ୟବସାୟୀ ଓ ପେଷାଦାର ପରିଷଦ, ଏମିରେଟ୍ସ ଗ୍ଲୋବାଲ ଆଲୁମିନିୟମର ପ୍ରମୁଖ ନେତୃବୃନ୍ଦ, ମଧ୍ୟପ୍ରାଚ୍ୟ ପୁନଃଚକ୍ରଣ ଆସୋସିଏସନ ସହ ଗୋଲଟେବୁଲ ବୈଠକ ଏବଂ ଓଡ଼ିଶା ବ୍ୟବସାୟିକ ପ୍ରତିନିଧିମଣ୍ଡଳୀ ସହ ବିସ୍ତୃତ ଆଲୋଚନା କରାଯିବ। ଗସ୍ତର ପରବର୍ତ୍ତୀ ପର୍ଯ୍ୟାୟରେ ଅର୍ଥାତ ୧୧ ତାରିଖ ଦିନ ଦୁବାଇଠାରେ ‘ଓଡ଼ିଶା ନିବେଶକ ସମ୍ମିଳନୀ’ ଅନୁଷ୍ଠିତ ହେବ। ଏହି ସମ୍ମିଳନୀରେ ମୁଖ୍ୟମନ୍ତ୍ରୀ ବିଶ୍ୱର ବିଭିନ୍ନ ଉଦ୍ୟୋଗପତି ଓ ଶିଳ୍ପପତିମାନଙ୍କୁ ଭେଟି ଓଡ଼ିଶାରେ ପୁଞ୍ଜି ନିବେଶ ପାଇଁ ଥିବା ଅନୁକୂଳ ପରିବେଶ ଓ ସୁଯୋଗ ସମ୍ପର୍କରେ ଅବଗତ କରାଇବେ। ଏହା ସହିତ ସେଠାରେ ରହୁଥିବା ପ୍ରବାସୀ ଓଡ଼ିଆମାନଙ୍କ ସହ ଏକ ବ୍ୟାପକ ମତବିନିମୟ କାର୍ଯ୍ୟକ୍ରମରେ ଯୋଗଦେଇ ରାଜ୍ୟର ବିକାଶରେ ସେମାନଙ୍କ ଭାଗୀଦାରୀ ସମ୍ପର୍କରେ ଆଲୋଚନା କରିବେ। ୧୨ ତାରିଖ ଦିନ ମୁଖ୍ୟମନ୍ତ୍ରୀ ଗସ୍ତ ଶେଷ କରି ଭୁବନେଶ୍ୱର ଫେରିଆସିବେ। ଏହି ଗୁରୁତ୍ୱପୂର୍ଣ୍ଣ ଗସ୍ତରେ ମୁଖ୍ୟମନ୍ତ୍ରୀଙ୍କ ସହିତ ରାଜ୍ୟ ଶିଳ୍ପ ମନ୍ତ୍ରୀ, ମୁଖ୍ୟ ଶାସନ ସଚିବ, ଶିଳ୍ପ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଏବଂ ରାଜ୍ୟ ସରକାରଙ୍କ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଅଂଶଗ୍ରହଣ କରୁଛନ୍ତି।