ଭୁବନେଶ୍ୱର: ସାଇବର ଠକମାନଙ୍କ ଜାଲ୍ ଦିନକୁ ଦିନ ବଢିବାରେ ଲାଗିଛି। ଫେସବୁକ୍ରେ ଜାଲ୍ ପ୍ରୋଫାଇଲ୍ ତିଆରି କରି ଏବଂ ଅନଲାଇନ୍ ଟ୍ରେଡିଂରେ ମୋଟା ଅଙ୍କର ଲାଭ ଦେଖାଇ ଜଣଙ୍କଠାରୁ ୬୨ ଲକ୍ଷରୁ ଅଧିକ ଟଙ୍କା ଠକିଥିବା ଏକ ରାକେଟର ପର୍ଦ୍ଦାଫାଶ କରିଛି ଭୁବନେଶ୍ୱର ସାଇବର ଥାନା ପୁଲିସ। ଏହି ଘଟଣାରେ ପୁଲିସ ମାଷ୍ଟରମାଇଣ୍ଡ ସର୍ବେଶ୍ୱର ମହାନ୍ତି (୪୬)ଙ୍କ ସମେତ ୩ ଜଣ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଛି। ଗିରଫ ମାଷ୍ଟରମାଇଣ୍ଡ ସର୍ବେଶ୍ୱରଙ୍କ ଘର ବାଲେଶ୍ୱର ଜିଲ୍ଲାରେ ହୋଇଥିବା ବେଳେ ଅନ୍ୟ ଦୁଇ ଅଭିଯୁକ୍ତ ପ୍ରଦୀପ କୁମାର ଷଡ଼ଙ୍ଗୀ (୩୨)ଙ୍କ ଘର କେନ୍ଦ୍ରାପଡ଼ାରେ ଏବଂ ସୁମନ୍ତ ମହାଲିକଙ୍କ ଘର ବାଲେଶ୍ୱରରେ ବୋଲି ଜଣାପଡ଼ିଛି।
ପୁଲିସର ସୂଚନା ଅନୁସାରେ, ଅଭିଯୋଗକାରୀଙ୍କୁ ଫେସବୁକ୍ରେ ‘ପ୍ରିୟା ରେଡ୍ଡୀ’ ନାମକ ଏକ ଫେକ୍ ପ୍ରୋଫାଇଲ୍ରୁ ଯୋଗାଯୋଗ କରାଯାଇଥିଲା। ପରେ ହ୍ୱାଟ୍ସଆପ୍ ଜରିଆରେ ଏକ ଅନଲାଇନ୍ ଟ୍ରେଡିଂ ପ୍ଲାଟଫର୍ମରେ ଟଙ୍କା ନିବେଶ କଲେ ଅଧିକ ଲାଭ ମିଳିବ ବୋଲି ପ୍ରଲୋଭିତ କରାଯାଇଥିଲା। ପ୍ରଥମେ କିଛି ଲାଭ ମିଳିବା ଦେଖି ଅଭିଯୋଗକାରୀ ସେମାନଙ୍କ କଥାକୁ ବିଶ୍ୱାସ କରିଥିଲେ ଏବଂ ନିଜର ତଥା ସମ୍ପର୍କୀୟଙ୍କ ମୋଟ ୮ଟି ବ୍ୟାଙ୍କ୍ ଆକାଉଣ୍ଟରୁ ୬୨ ଲକ୍ଷ ୮୯ ହଜାର ୮୬୫ ଟଙ୍କା ନିବେଶ କରିଥିଲେ। ତେବେ ଟଙ୍କା ଉଠାଇବାକୁ ଉଦ୍ୟମ କରିବାରୁ ଆକାଉଣ୍ଟଗୁଡ଼ିକୁ ବ୍ଲକ୍ କରିଦିଆଯାଇଥିଲା। ଏହାପରେ ନିଜେ ଠକେଇର ଶିକାର ହୋଇଥିବା ଜାଣିବା ପରେ ସେ ପୁଲିସର ଦ୍ୱାରସ୍ଥ ହୋଇଥିଲେ।