ସାଗରିକା
ଭାରତ ଏକ ଧର୍ମନିରପେକ୍ଷ ରାଷ୍ଟ୍ର । ବିଭିନ୍ନତା ଭିତରେ ଭାରତର ଏକତା ଅଭିନ୍ନ । ଏଠାରେ ବିଭିନ୍ନ ଧର୍ମ, ଭାଷା, ଜାତି ଦେଖିବାକୁ ମିଳେ । କିନ୍ତୁ ଆଜିବି ଆମ ଭିତରେ ଜାତିକୁ ନେଇ ସଂକୀର୍ଣ୍ଣତା ଭରି ରହିଛି । ଜାତି, ଧର୍ମରୁ ଉର୍ଦ୍ଧ୍ବରେ ଆମେ ଭାରତୀୟ ବୋଲି କେବଳ କଥାରେ କହୁଛୁ, ବାସ୍ତବରେ ନୁହେଁ । ନିକଟରେ ଏପରି ଏକ ଘଟଣା ଆମ ନଜରକୁ ଆସିଛି ।
ଅନ୍ଲାଇନ୍ ଫୁଡ୍ ଡେଲଭରି ଓ୍ବେବସାଇଟ୍ ଜୋମାଟୋ ପୁଣି ଥରେ ଧର୍ମ ସମ୍ବନ୍ଧୀୟ ଏକ ମାମଲାକୁ ସାମ୍ନାକୁ ଆଣିଛି । ଜଣେ ଗ୍ରାହକ ଜୋମାଟୋରୁ ଖାଦ୍ୟ ଅର୍ଡର କରିଥିଲେ । କିନ୍ତୁ ଗ୍ରାହକ ଜଣକ ଖାଦ୍ୟକୁ ଜୋମାଟୋରୁ ଗ୍ରହଣ କଲେ ନାହିଁ, କାରଣ ଜୋମୋଟା ତରଫରୁ ଜଣେ ମୁସଲମାନ ଯୁବକ ଡେଲିଭରି ବୟ ଭାବରେ ଏହି ଖାଦ୍ୟକୁ ଗ୍ରାହକକୁ ନିକଟକୁ ଆଣିଥିଲେ । ତେବେ ଜୋମାଟୋ ଉକ୍ତ ବ୍ୟକ୍ତିକୁ ମଧ୍ୟ କଡ଼ା ଜବାବ ଦେଇଛନ୍ତି । ପ୍ରଥମେ ଜୋମାଟୋ ନିଜ ଟୁଇଟ୍ର ଆକାଉଣ୍ଟରେ ଉକ୍ତ ବ୍ୟକ୍ତିକୁ କହିଛନ୍ତି ଯେ, ଖାଦ୍ୟର କୌଣସି ଧର୍ମ ନାହିଁ, କାରଣ ଖାଦ୍ୟ ହିଁ ଶରୀର ଧାରଣର ଧର୍ମ ଅଟେ ।
ପୂର୍ବରୁ ଖାଦ୍ୟ ପ୍ରସ୍ତୁତ କରିବା ବ୍ରାହ୍ମଣମାନଙ୍କର ଏକଚାଟିଆ ଅଧିକାର ରହିଥିଲା । ପ୍ରତ୍ୟେକ ଉତ୍ସବ ତଥା ପର୍ବରେ ବ୍ରାହ୍ମଣମାନଙ୍କ ଦ୍ବାରା ପ୍ରସ୍ତୁତ ଖାଦ୍ୟକୁ ଅଗ୍ରାଧିକାର ଦିଆଯାଉଥିଲା । ଖାଦ୍ୟ ସହିତ ଧର୍ମକୁ ନେଇ ଶ୍ରେଣୀ ବିଭାଜନ ଆମ ସମାଜରେ ରହିଆସିଥିଲା । ଉଚ୍ଚ ବର୍ଗଙ୍କ ହାତରେ ଖାଦ୍ୟ ପ୍ରସ୍ତୁତ ତଥା ପରିବେଷଣକୁ ପ୍ରାଧାନ୍ୟ ଦେବାର ଏକମାତ୍ର କାରଣ ଥିଲା ସାମାଜିକ ରୁଚି ଓ ସ୍ଵାଦ ଉପରେ ଉଚ୍ଚ ବର୍ଗର ନିୟନ୍ତ୍ରଣ । ସାମନ୍ତବାଦୀ ବ୍ୟବସ୍ଥାରେ ରାଜା ଓ ବ୍ରାହ୍ମଣଙ୍କ ଖାଦ୍ୟ ରୁଚି ହିଁ ସମ୍ଭ୍ରାନ୍ତ ବୋଲି ବିବେଚନା କରାଯାଉଥିଲା।
ସମୟ ବଦଳିବା ସହିତ ଏହି କ୍ଷେତ୍ରରେ ପରିବର୍ତ୍ତନ ହେଲା। ବିଭିନ୍ନ ଜାତି ତଥା ଶ୍ରେଣୀର ଲୋକମାନେ ଖାଦ୍ୟ ପ୍ରସ୍ତୁତ କଲେ । ଆଜିର ସମୟରେ ଆମେ ଯେତେବେଳେ କ୍ୟାଟରିଂକୁ ପ୍ରାଧାନ୍ୟ ଦେଉଛୁ, ସେତେବେଳେ ଆମ ରୋଷେୟା ବ୍ରାହ୍ମଣ କି ଅନ୍ୟଜାତି ବା ମୁସଲମାନ, ସେକଥା ଆଉ ଦେଖୁନାହୁଁ । କେବଳ ଖାଦ୍ୟର ଗୁଣବତ୍ତାକୁ ଦେଖୁଛୁ । ଏବେ ଆମେ ଭାରତୀୟ ଖାଦ୍ୟ ସହିତ ବିଦେଶୀ ଖାଦ୍ୟକୁ ମଧ୍ୟ ସମ ପରିମାଣରେ ପ୍ରାଧାନ୍ୟ ଦେଉଛୁ। ଚାଇନିଜ୍, କଣ୍ଟିନେଣ୍ଟାଲ୍, ଇଟାଲିଆନ୍, ମେକ୍ସିକାନ୍, ଜାପାନିଜ୍, ଆରବିକ୍, ସିଫୁଡ୍ ପ୍ରତି ଆମମାନଙ୍କର ବେଶ୍ ଦୁର୍ବଳତା ରହୁଛି । ସେହିପରି ଆମେମାନେ ଖାଦ୍ୟ ଚୟନରେ ମଧ୍ୟ ଏବେ ଭିନ୍ନତା ଦେଖୁଛୁ । ବିରିଆନୀ, କବାବ୍, କିମା, ଲଛା ପରି ଖାଦ୍ୟକୁ ବେଶ୍ ଉପଭୋଗ କରୁଛୁ । ଖାଦ୍ୟକୁ ନେଇ ଗୋଟେ ପ୍ରକାରର ଧାର୍ମିକ ପ୍ରତିବନ୍ଧକ ଆଜିର ସମାଜରେ ନଥିବାବେଳେ ନିକଟରେ ଘଟିଥିବା ଏହି ଘଟଣାଟି ଆମ ଅସୁସ୍ଥ ମାନସିକତାର ପ୍ରମାଣ ଦେଉଛି।
ଭାରତରେ ଥିଲାବାଲା ଓ ନଥିଲାବାଲାଙ୍କ ଭିତରେ ଏକ ବିରାଟ ତାରତମ୍ୟ ରହିଛି । ଗୋଟିଏ ପଟରେ ଖାଦ୍ୟକୁ ଅଯଥା ନଷ୍ଟ କରୁଥିବାବେଳେ ଅପରପକ୍ଷରେ ଖଣ୍ଡିଏ ରୁଟି ପାଇଁ କୁକୁର ସହ ଲଢେଇର ଦୃଶ୍ୟ ମଧ୍ୟ ଦେଖିବାକୁ ମିଳେ । ଭାରତରେ ରହିଥିବା ଅର୍ଥନୈତିକ ବୈଷ୍ୟମ କାରଣରୁ ଭାରତରେ ଏକ ତୃତୀୟାଂଶ ଶିଶୁ ଅପପୋଷଣର ଶିକାର ହୋଇଛନ୍ତି । ଯେତେବେଳେ ଏଠାରେ ଖାଇବାକୁ ନ ପାଇ ଲୋକେ ଭୋକ ବିକଳରେ ଅଇଁଠା ପତରରୁ ଖାଦ୍ୟ ଖାଉଛି, ସେତେବେଳେ ମଣିଷ ଖାଦ୍ୟ ପାଇଁ ଜାତି ଦେଖିବା ଏକ ରୁଢିବାଦୀ ମାନସିକତା ଓ ଅମାନବୀୟ ଚିନ୍ତାଧାରାର ସଙ୍କେତ ଦେଉଛି।
