ନୂଆଦିଲ୍ଲୀ: ଭାରତରେ ଆଇପିଏଲର ପରବର୍ତ୍ତୀ ସିଜନ୍ ପାଇଁ ଦୁଇଟି ନୂତନ ଦଳର ଅନ୍ତର୍ଭୁକ୍ତ ହେବା ବିଷୟରେ ବିସିସିଆଇ ଆଲୋଚନା କରିସାରିଛି। ବିସିସିଆଇ ଦୁଇଟି ନୂତନ ଦଳକୁ ଆଇପିଏଲର ସାମିଲ କରିବା ପ୍ରକ୍ରିୟା ମଧ୍ୟ ଆରମ୍ଭ କରିଛି। ଗଣମାଧ୍ୟମ ରିପୋର୍ଟରେ ଦାବି କରାଯାଇଛି ଯେ, ଦଳ କିଣିବାକୁ ଆଗ୍ରହୀ ଦଳମାନଙ୍କୁ ଅକ୍ଟୋବର ୫ ତାରିଖ ପର୍ଯ୍ୟନ୍ତ ବିଡ୍ ଦାଖଲ କରିବାକୁ ବିସିସିଆଇ ସମୟ ଦେଇଛି। ଏଥିରେ ଲକ୍ଷ୍ନୌ ଏବଂ ଅହମ୍ମଦାବାଦ ନାମରେ ଦୁଇଟି ନୂତନ ଦଳର ଯୋଗଦେବାର ସମ୍ଭାବନା ବହୁତ ବୃଦ୍ଧି ପାଇଛି।
ବିସିସିଆଇ ଅଧିକାରୀ ଦାବି କରିଛନ୍ତି ଯେ, ନୂଆ ଦଳ ପାଇଁ ଦୌଡରେ ଲକ୍ଷ୍ନୌ ଏବଂ ଅହମ୍ମଦାବାଦ ଆଗରେ ରହିଛି। ଅଧିକାରୀ ଜଣଙ୍କ କହିଛନ୍ତି ଯେ, ଏହି ଦଳଗୁଡିକ ଆଗରେ ରହିବାର ସବୁଠାରୁ ବଡ କାରଣ ହେଉଛି ଷ୍ଟାଡିୟମରେ ବିଶ୍ୱ ସ୍ତରୀୟ ସୁବିଧା।
ଲକ୍ଷ୍ନୌ ଦଳ ପ୍ରତି ଆଗ୍ରହ ଦେଖାଉଥିବା ଲୋକଙ୍କ ମଧ୍ୟରେ ଗୋଏଙ୍କା ଗ୍ରୁପ୍ ଏବଂ ଆଦିତ୍ୟ ବିର୍ଲା ଗ୍ରୁପ୍ ଆଗରେ ଥିବାବେଳେ ଅଦାନୀ ଗ୍ରୁପ୍ ଅହମ୍ମଦାବାଦ ଦଳ ଉପରେ ଆଗ୍ରହ ପ୍ରକାଶ କରିଛି। ଗତ ବର୍ଷ ଅହମ୍ମଦାବାଦରେ ବିଶ୍ୱର ସର୍ବବୃହତ କ୍ରିକେଟ୍ ଷ୍ଟାଡିୟମର ନିର୍ମାଣ କାର୍ଯ୍ୟ ଶେଷ ହୋଇଥିଲା। ଲକ୍ଷ୍ନୌର ଅଟଳ ବିହାରୀ ଷ୍ଟାଡିୟମରେ ମଧ୍ୟ ଆଧୁନିକ ସୁବିଧା ବୃଦ୍ଧି ପାଇଛି।
ବିସିସିଆଇ ଏହା ସ୍ପଷ୍ଟ କରିସାରିଛି ଯେ, ଗୋଟିଏ ରାଜ୍ୟରୁ କେବଳ ଗୋଟିଏ ଦଳ ଆଇପିଏଲ୍ ଖେଳିବା ପାଇଁ ସ୍ୱୀକୃତି ପାଇବେ। ମହାରାଷ୍ଟ୍ରର ମୁମ୍ବାଇ ଇଣ୍ଡିଆନ୍ସର ଦଳ ପୂର୍ବରୁ ଉପସ୍ଥିତ ଥିବାରୁ ବର୍ତ୍ତମାନ ପର୍ଯ୍ୟନ୍ତ ସେଠାରୁ କୌଣସି ନୂତନ ଦଳ ଗଠନ ହେବ ନାହିଁ।
ଆଇପିଏଲରେ ଦୁଇଟି ନୂତନ ଦଳ ଯୋଗଦେବା ଦ୍ଵାରା ବିସିସିଆଇକୁ ପ୍ରାୟ ୫ ହଜାର କୋଟି ଟଙ୍କା ଲାଭ ହେବ ବୋଲି ଆକଳନ କରାଯାଇଛି। ଏହା ସହିତ ଆସନ୍ତା ବର୍ଷ ଆଇପିଏଲରେ ମ୍ୟାଚ୍ ସଂଖ୍ୟା ମଧ୍ୟ ବୃଦ୍ଧି ପାଇବ। ପ୍ରକାଶିତ ସୂଚନା ଅନୁଯାୟୀ, ଆଇପିଏଲ୍ ୨୦୨୨ ରେ ମୋଟ ୭୪ ଟି ମ୍ୟାଚ୍ ଆୟୋଜିତ ହୋଇପାରେ।
