ଜୋହାନ୍ସବର୍ଗ: ଜୋହାନ୍ସବର୍ଗର ୱାନଡର୍ସ ଠାରେ ଖେଳାଯାଇଥିବା ଦ୍ୱିତୀୟ ଟେଷ୍ଟରେ ଦକ୍ଷିଣ ଆଫ୍ରିକା ସାତୋଟି ୱିକେଟ୍ ରେ ଭାରତକୁ ପରାସ୍ତ କରିଛି। ଏହା ସହ ଘରୋଇ ଦଳ ତିନି ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରେ ୧-୧ରେ ବରାବର ରହିଛି। ଦକ୍ଷିଣ ଆଫ୍ରିକାର ଏହି ବିଜୟ ସହିତ ଭାରତକୁ ଏଠାରେ ପ୍ରଥମ ଟେଷ୍ଟ ସିରିଜ୍ ଜିତିବା ପାଇଁ ପରବର୍ତ୍ତୀ ଟେଷ୍ଟରେ ଏକ ବିଜୟ ପଞ୍ଜିକରଣ କରିବାକୁ ପଡିବ।
ଦ୍ୱିତୀୟ ଇନିଂସରେ ଟିମ୍ ଇଣ୍ଡିଆ ଦକ୍ଷିଣ ଆଫ୍ରିକା ସମ୍ମୁଖରେ ୨୪୦ ରନ୍ ଲକ୍ଷ୍ୟ ଧାର୍ଯ୍ୟ କରିଥିଲା। ଯାହାକୁ ସେମାନେ ମାତ୍ର ତିନି ୱିକେଟ୍ ହରାଇ ସହଜରେ ହାସଲ କରିଥିଲେ। ଦକ୍ଷିଣ ଆଫ୍ରିକାର ଏହି ଚମତ୍କାର ବିଜୟର କ୍ୟାପଟେନ ଡିନ ଏଲଗାର ହିରୋ ଥିଲେ।
୧୦ ଟି ଚୌକା ସହାୟତାରେ ୧୮୮ ଟି ବଲରେ ଏଲଗାର ୯୬ ରନର ଅପରାଜିତ ଇନିଂସ ଖେଳିଥିଲେ। ଏଥିସହିତ ଟେମ୍ବା ବାଭୁମା ମଧ୍ୟ ତାଙ୍କ ସହ ୨୩ ରନ୍ରେ ଅପରାଜିତ ଫେରିଥିଲେ। ସେ ୪୫ ବଲରେ ତିନୋଟି ଚୌକା ମାରିଥିଲେ। ଚତୁର୍ଥ ୱିକେଟ୍ ପାଇଁ ଉଭୟେ ଅପରାଜିତ ୬୮ ରନ୍ ର ଭାଗୀଦାରୀ କରିଥିଲେ।
ଜୋହାନ୍ସବର୍ଗରେ ଖେଳାଯାଇଥିବା ଏହି ମ୍ୟାଚରେ ଭାରତ ପ୍ରଥମ ଇନିଂସରେ ମାତ୍ର ୨୦୨ ରନ୍ ସଂଗ୍ରହ କରିଥିଲା। ଏହାର ଜବାବରେ ଦକ୍ଷିଣ ଆଫ୍ରିକା ପ୍ରଥମ ଇନିଂସରେ ୨୨୯ ରନ୍ ସଂଗ୍ରହ କରି ୨୭ ରନ୍ ଅଗ୍ରଣୀ ହାସଲ କରିଥିଲା। ଏହା ପରେ ଟିମ୍ ଇଣ୍ଡିଆ ଦ୍ୱିତୀୟ ଇନିଂସରେ ୨୬୬ ରନ୍ ସଂଗ୍ରହ କରି ଘରୋଇ ଦଳକୁ ୨୪୦ ରନ୍ ଟାର୍ଗେଟ୍ ଦେଇଥିଲା। ଏହାର ଜବାବରେ ଚତୁର୍ଥ ଦିନରେ ଦକ୍ଷିଣ ଆଫ୍ରିକା ତିନି ୱିକେଟ୍ ହରାଇ ଲକ୍ଷ୍ୟକୁ ପୂରଣ କରିଥିଲା।
