ଅହମ୍ମଦାବାଦ: ଦିନିକିଆ ସିରିଜର ପ୍ରଥମ ମ୍ୟାଚରେ ଟିମ୍ ଇଣ୍ଡିଆ ୱେଷ୍ଟଇଣ୍ଡିଜକୁ ୬ ୱିକେଟରେ ପରାସ୍ତ କରିଛି। ଅହମ୍ମଦାବାଦରେ ଖେଳାଯାଇଥିବା ଏହି ମ୍ୟାଚ୍ରେ ଭାରତକୁ ଜିତିବା ପାଇଁ ୱେଷ୍ଟଇଣ୍ଡିଜ୍ ୧୭୭ ରନ୍ର ଟାର୍ଗେଟ ଦେଇଥିଲା। ଏହାର ଜବାବରେ ଭାରତ ୪ ୱିକେଟ୍ ହରାଇ ମ୍ୟାଚ୍ ଜିତିଥିଲା। କ୍ୟାପଟେନ ରୋହିତ ଶର୍ମା ଏକ ଅର୍ଦ୍ଧଶତକ ହାସଲ କରିଥିଲେ। ସୁର୍ଯ୍ୟକୁମାର ଯାଦବ ଏବଂ ଦୀପକ ହୁଡା ଉପଯୋଗୀ ଇନିଂସ ଖେଳିଥିଲେ। ୟୁଜଭେନ୍ଦ୍ର ଚହଲ ଏବଂ ୱାଶିଂଟନ୍ ସୁନ୍ଦର ଚମତ୍କାର ବୋଲିଂ ପ୍ରଦର୍ଶନ କରିଥିଲେ।
ରୋହିତ ଶର୍ମାଙ୍କ ଅଧିନାୟକତ୍ୱରେ ଭାରତୀୟ ଦଳ ଏହାର ୧୦୦୦ତମ ଦିନିକିଆ ମ୍ୟାଚ୍ ରେ ଭଲ ପ୍ରଦର୍ଶନ କରିଥିଲା। ୱେଷ୍ଟଇଣ୍ଡିଜ୍ ଦେଇଥିବା ଟାର୍ଗେଟକୁ ପିଛା କରି ରୋହିତ ଏବଂ ଇଶାନ କିଶନ ଭାରତ ପାଇଁ ପାଳି ଆରମ୍ଭ କରିଥିଲେ। ଏହି ଦୁଇଜଣଙ୍କ ମଧ୍ୟରେ ଅର୍ଦ୍ଧ ଶତକର ସହଭାଗୀତା ଥିଲା। ଏହା ପରେ ଇଶାନ ୨୮ ରନର ବ୍ୟକ୍ତିଗତ ସ୍କୋରରେ ଆଉଟ୍ ହୋଇଥିଲେ। ରୋହିତ ଅର୍ଦ୍ଧଶତକ ହାସଲ କରିଥିବାବେଳେ ସେ ୧୦ ଟି ଚୌକା ଓ ଗୋଟିଏ ଛକା ସହାୟତାରେ ୫୧ ବଲରେ ୬୦ ରନ ସ୍କୋର କରିଥିଲେ।
ତିନି ନମ୍ବରରେ ବ୍ୟାଟିଂ କରିବାକୁ ଆସିଥିବା ପୂର୍ବତନ ଅଧିନାୟକ ବିରାଟ କୋହଲି କ୍ରିଜରେ ଅଧିକ ସମୟ ରହିପାରିନଥିଲେ। ଦୁଇଟି ଚୌକା ସାହାଯ୍ୟରେ ୪ ଟି ବଲରେ ୮ ରନ୍ ସ୍କୋର କରିବା ପରେ ସେ ଆଉଟ୍ ହୋଇଥିଲେ। ୱିକେଟ୍ କିପର ବ୍ୟାଟ୍ସମ୍ୟାନ୍ ଋଷଭ ପନ୍ତ ବ୍ୟକ୍ତିଗତ ସ୍କୋର ୧୧ ରନ୍ ସଂଗ୍ରହ କରିଥିଲେ। ଶେଷରେ ସୁର୍ଯ୍ୟକୁମାର ଯାଦବ ଏବଂ ଦୀପକ ହୁଡା ଉପଯୋଗୀ ଇନିଂସ ଖେଳିଥିଲେ। ୩୬ ଟି ବଲରୁ ସୁର୍ଯ୍ୟକୁମାର ଅପରାଜିତ ୩୪ ରନ୍ କରିଥିଲେ। ସେ ଏହି ଇନିଂସରେ ୫ ଟି ଚୌକା ମାରିଥିଲେ। ଦୀପକ ୩୨ ବଲରୁ ଅପରାଜିତ ୨୬ ରନ କରିଥିଲେ। ଏହି ଦ୍ଵାରା ଭାରତ ଏହି ମ୍ୟାଚକୁ ୬ ୱିକେଟରେ ଜିତିଥିଲା।
ଟସ୍ ହାରିବା ପରେ ଶାଇ ହୋପ୍ ଏବଂ ବ୍ରାଣ୍ଡାନ୍ କିଙ୍ଗ ୱେଷ୍ଟଇଣ୍ଡିଜ୍ ପାଇଁ ପାଳି ଆରମ୍ଭ କରିଥିଲେ। ଏହି ସମୟରେ, ହୋପ୍ ୮ ରନ୍ ର ବ୍ୟକ୍ତିଗତ ସ୍କୋରରେ ଆଉଟ୍ ହୋଇଥିଲେ। ସେ ମହମ୍ମଦ ସିରାଜଙ୍କ ବଲର ଶିକାର ହୋଇଥିଲେ। କିଙ୍ଗ ୧୩ ରନ୍ ସ୍କୋର କରିବା ପରେ ୱାଶିଂଟନ୍ ସୁନ୍ଦରଙ୍କ ବଲରେ ଧରାପଡିଥିଲେ। ୩୪ ବଲରେ ୧୮ ରନ୍ ସ୍କୋର କରିବା ପରେ ଡାରେନ୍ ବ୍ରାଭୋ ପାଭିଲିୟନକୁ ଫେରିଥିଲେ। ସେ ମଧ୍ୟ ଏହି ଇନିଂସରେ ୪ ଟି ଚୌକା ମାରିଥିଲେ।
ସ୍ପିନ୍ ବୋଲର ୟୁଜଭେନ୍ଦ୍ର ଚହଲ ଦୁଇଟି ଗୁରୁତ୍ୱପୂର୍ଣ୍ଣ ୱିକେଟ୍ ନେଇଥିଲେ। ସେ ପ୍ରଥମ ବଲରେ ଅଧିନାୟକ କିରନ୍ ପୋଲାର୍ଡଙ୍କୁ ଆଉଟ କରିଥିଲେ। ୨୫ ଟି ବଲରେ ୧୮ ରନ୍ କରିବା ପରେ ପୂରାନ ଆଉଟ ହୋଇଯାଇଥିଲା। ଜେସନ ହୋଲ୍ଡର ଏକ ଭଲ ଇନିଂସ ଖେଳିଥିଲେ। ସେ ୪ ଟି ଚୌକା ସହାୟତାରେ ୭୧ ଟି ବଲରେ ୫୭ ରନ୍ ସଂଗ୍ରହ କରିଥିଲେ। ୪୩ ଟି ବଲରେ ଫାବିଆନ୍ ଆଲେନ୍ ୨୯ ରନ୍ ସଂଗ୍ରହ କରିଥିଲେ। ଏହା ବ୍ୟତୀତ ଅଲଜାରୀ ଜୋସେଫ ୧୩ ରନ ସ୍କୋର କରିଥିଲେ। ଏହିପରି ୱେଷ୍ଟଇଣ୍ଡିଜ୍ ଦଳ ୪୩.୫ ଓଭରରେ ୧୭୬ ରନ୍ ସ୍କୋର କରିବା ପରେ ସମସ୍ତ ୱିକେଟ ହରାଇଥିଲା।
ଏହି ସମୟରେ ୟୁଜବେନ୍ଦ୍ର ଚହଲ ଭାରତ ପାଇଁ ୪ ଟି ୱିକେଟ୍ ନେଇଥିଲେ। ୱାଶିଂଟନ୍ ସୁନ୍ଦର ୩ ଟି ୱିକେଟ୍ ନେଇଥିବା ବେଳେ ପ୍ରସିଦ୍ଧ କୃଷ୍ଣ ଦୁଇଟି ୱିକେଟ୍ ନେଇଥିଲେ ଏବଂ ମହମ୍ମଦ ସିରାଜ ଗୋଟିଏ ୱିକେଟ୍ ନେଇଥିଲେ।
