ମୁମ୍ବାଇ: ଆଇପିଏଲରେ ମୁମ୍ବାଇ ଇଣ୍ଡିଆନ୍ସ ପୁଣି ଥରେ ହାରିଛି। ବୁଧବାର ଅନୁଷ୍ଠିତ ମ୍ୟାଚରେ ପଞ୍ଜାବ କିଙ୍ଗସ ମୁମ୍ବାଇ ଦଳକୁ ୧୨ ରନରେ ପରାସ୍ତ କରିଛି। ଏହି ସିଜିନରେ ମୁମ୍ବାଇର କ୍ରମାଗତ ପଞ୍ଚମ ପରାଜୟ। ଦଳର ଏହି ଫ୍ଲପ୍ ପ୍ରଦର୍ଶନ ପରେ ମୁମ୍ବାଇ କ୍ୟାମ୍ପରେ ନିରାଶାର ବାତାବରଣ ସୃଷ୍ଟି ହୋଇଛି। ପଞ୍ଜାବ ବିପକ୍ଷ ମ୍ୟାଚ ପରେ କ୍ୟାପଟେନ ରୋହିତ ଶର୍ମା ମଧ୍ୟ ନିରାଶ ହୋଇଛନ୍ତି। ରୋହିତ କହିଛନ୍ତି ଯେ, ତାଙ୍କ ଦଳ ବହୁତ ଭଲ ଖେଳିଛି, ଏଭଳି ପରିସ୍ଥିତିରେ ଭୁଲ୍ କେଉଁଠାରେ ଘଟୁଛି ତାହା କହିବା କଷ୍ଟକର।
ରୋହିତ କହିଛନ୍ତି ଯେ, ‘ଏହି ମ୍ୟାଚରେ ଆମର ଅଭାବ ଖୋଜିବା ବହୁତ କଷ୍ଟକର। ମୁଁ ଭାବୁଛି ଆମେ ବହୁତ ଭଲ ଖେଳିଲୁ। ଆମେ ବିଜୟର ଅତି ନିକଟତର ଥିଲୁ। ହଁ, ଦୁଇଟି ରନ୍ ଆଉଟ୍ ଥିଲା, ଯାହା ଅନାବଶ୍ୟକ ଥିଲା। କିନ୍ତୁ ଏହା ଘଟେ। ଏକ ସମୟରେ ଆମେ ମ୍ୟାଚ୍ ଉପରେ ପ୍ରାଧାନ୍ୟ ବିସ୍ତାର କରିଥିଲୁ। ଟାର୍ଗେଟ୍ ଅନୁଯାୟୀ, ଆମର ରନ୍ ହାର ମଧ୍ୟ ଭଲ ଥିଲା କିନ୍ତୁ ଶେଷ ପର୍ଯ୍ୟନ୍ତ ଆମେ ଏହାକୁ ବଜାୟ ରଖି ପାରିଲୁ ନାହିଁ। ପଞ୍ଜାବ କିଙ୍ଗ୍ସର ବୋଲରମାନଙ୍କୁ ଶ୍ରେୟ, ସେମାନେ ପରେ ବହୁତ ଭଲ ବୋଲିଂ କରିଥିଲେ।
ଏହି ମ୍ୟାଚରେ ମୁମ୍ବାଇ ଇଣ୍ଡିଆନ୍ସର ବ୍ୟାଟିଂ କ୍ରମ ସଂପୂର୍ଣ୍ଣ ରୂପେ ବଦଳି ଯାଇଥିଲା। ଏଥିପାଇଁ ରୋହିତ କହିଛନ୍ତି, ‘ଯେତେବେଳେ ଆପଣ ହାରୁଛନ୍ତି, ସେତେବେଳେ ସଫଳ ହେବା ପାଇଁ ଆପଣଙ୍କୁ ପରିବର୍ତ୍ତନ କରିବାକୁ ପଡିବ।
ରୋହିତ ଆହୁରି କହିଛନ୍ତି ଯେ, ‘ଆମେ କିଛି ସମୟ ଧରି ଭଲ କ୍ରିକେଟ୍ ଖେଳିପାରି ନାହୁଁ, ତେଣୁ ଆମେ ହାରିଯାଉଛୁ। ଏହି ମ୍ୟାଚରେ ପଞ୍ଜାବ କିଙ୍ଗ୍ସ ବହୁତ ଭଲ ବ୍ୟାଟିଂ କରି ଆମ ବୋଲରଙ୍କ ଉପରେ ଚାପ ପକାଇଥିଲା। ୯୦ ରୁ ୧୦୦ ରନର ସହଭାଗୀତା ସହିତ ପଞ୍ଜାବ ଖେଳ ଆରମ୍ଭ କରିଥିଲା। ଯଦିଓ ମୁଁ ଭାବୁଛି ଏହି ପିଚରେ ୧୯୦+ ର ଲକ୍ଷ୍ୟ ହାସଲ ହୋଇପାରିଥାନ୍ତା, ଆମେ ମଧ୍ୟ ଭଲ ବ୍ୟାଟିଂ କରିଥିଲୁ କିନ୍ତୁ ସଫଳ ହୋଇପାରିଲୁ ନାହିଁ। ଭୁଲ୍ କୋଉଠି ରହିଲା ଏବଂ ଭବିଷ୍ୟତରେ ଦଳ ପାଇଁ କ’ଣ ଭଲ ହୋଇପାରେ ଆମେ ବିଶ୍ଳେଷଣ କରିବୁ।
ଏହି ମ୍ୟାଚ୍ରେ ଟସ୍ ହରାଇବା ପରେ ପଞ୍ଜାବ କିଙ୍ଗ୍ସ ପ୍ରଥମେ ବ୍ୟାଟିଂ କରି ମୟଙ୍କ ଅଗ୍ରୱାଲ (୫୨) ଏବଂ ଶିଖର ଧାୱନ (୭୦) ଙ୍କ ଇନିଂସ ଯୋଗୁଁ ମୋଟ ୧୯୮ ରନ୍ ସଂଗ୍ରହ କରିଥିଲା। ଏହାର ଜବାବରେ ମୁମ୍ବାଇର ଦଳ ଓପନରଙ୍କୁ ହରାଇବା ପରେ ଡିୱାଲ୍ଡ ବ୍ରେଭିସ୍ (୪୯), ତିଲକ ଭର୍ମା (୩୬) ଏବଂ ସୂର୍ଯ୍ୟକୁମାର ଯାଦବ (୪୩) ବିଜୟର ନିକଟତର ହୋଇଥିଲେ। ତେବେ ମୁମ୍ବାଇ ଟାର୍ଗେଟରୁ ୧୨ ରନ୍ ଦୂରରେ ରହିଥିଲେ।
