ବେଙ୍ଗାଲୁରୁ: ବେଙ୍ଗାଲୁରୁର ଏମ ଚିନ୍ନାସ୍ଵାମୀ ଷ୍ଟାଡିୟମରେ ଖେଳାଯାଉଥିବା ୨୦୨୨ ରଣଜୀ ଟ୍ରଫିର ଅନ୍ତିମ ମ୍ୟାଚରେ ମଧ୍ୟପ୍ରଦେଶ ଦଳ ଇତିହାସ ସୃଷ୍ଟି କରିବାର ଦ୍ୱାରସ୍ଥ ହୋଇଛି। ବାସ୍ତବରେ, ପ୍ରଥମ ଇନିଂସରେ ୧୬୨ ରନ୍ ପଛରେ ପଡ଼ିଯିବା ପରେ ମୁମ୍ବାଇର ଦଳ ଦ୍ୱିତୀୟ ଇନିଂସରେ ମାତ୍ର ୨୬୯ ରନ୍ ସ୍କୋର କରିପାରିଛି। ଏଭଳି ପରିସ୍ଥିତିରେ ମଧ୍ୟପ୍ରଦେଶକୁ ଟାଇଟଲ ଜିତିବା ପାଇଁ ମାତ୍ର ୧୦୮ ରନ୍ ସ୍କୋର ଆବଶ୍ୟକ ପଡୁଛି।
ମୁମ୍ବାଇର ସମସ୍ତ ୱିକେଟ ଆଉଟ ହେବା ମାତ୍ରେ ମଧ୍ୟାହ୍ନ ଭୋଜନ ଘୋଷଣା କରାଯାଇଥିଲା। ଦ୍ୱିତୀୟ ଇନିଂସରେ ମଧ୍ୟପ୍ରଦେଶ ପାଇଁ କୁମାର କାର୍ତ୍ତିକେୟ ସର୍ବାଧିକ ଚାରିଟି ୱିକେଟ୍ ନେଇଥିଲେ। ପ୍ରଥମ ଥର ପାଇଁ ରଣଜୀ ଟ୍ରଫି ଟାଇଟଲ ଜିତିବା ପାଇଁ ମଧ୍ୟପ୍ରଦେଶକୁ ମାତ୍ର ୧୦୮ ରନ୍ ସ୍କୋର କରିବାକୁ ପଡିବ।
ପଞ୍ଚମ ଦିନର ପ୍ରଥମ ସେଶନରେ ମୁମ୍ବାଇ ଆଠଟି ୱିକେଟ୍ ହରାଇଥିଲା। ଚତୁର୍ଥ ଦିନରେ ଭଲ ବ୍ୟାଟିଂ କରୁଥିବା ଅରମାନ ଜାଫର ଶେଷ ଦିନରେ ତାଙ୍କ ସ୍କୋରକୁ ଅଧିକ ବଢାଇଇ ପାରିନଥିଲେ। ସେ ୪୦ ବଲରେ ୩୭ ରନ୍ ସଂଗ୍ରହ କରିଥିଲେ। ଏହା ପରେ, ଉତ୍କୃଷ୍ଟ ଫର୍ମରେ ଥିବା ସରଫରାଜ ଦୃଢ ବ୍ୟାଟିଂ କରିଥିଲେ।
ତିନିଟି ଚୌକା ଓ ଗୋଟିଏ ଛକା ସହାୟତାରେ ସରଫରାଜ ୪୫ ରନର ଏକ ଇନିଂସ ଖେଳିଥିଲେ। ତେବେ ତାଙ୍କୁ ଆଉଟ କରାଯିବା ମାତ୍ରେ ମୁମ୍ବାଇର ଇନିଂସ ତାସ ପତି ପରି ଖସି ଯାଇଥିଲା। ଏହି ସମୟରେ ୟଶସ୍ଵୀ ଜୈସୱାଲ ୦୧, ଶାମ୍ସ ମୁଲାନି ୧୭, ତନୁଶ କୋଟିଆନ ୧୧ ଏବଂ ତୁଷାର ଦେଶପାଣ୍ଡେ ୦୭ ରନ କରି ଆଉଟ ହୋଇଥିଲେ। ତେବେ ସୁଭେଦ ପାର୍କର ୫୧ ରନ୍ ସଂଗ୍ରହ କରିଥିଲେ।
ଦ୍ୱିତୀୟ ଇନିଂସରେ କୁମାର କାର୍ତ୍ତିକେୟ ମଧ୍ୟପ୍ରଦେଶ ପାଇଁ ୯୮ ରନ୍ ଦେଇ ଚାରିଟି ୱିକେଟ୍ ନେଇଥିଲେ। ଏଥିସହିତ ଗୌରବ ଯାଦବ ଏବଂ ପାର୍ଥ ସାହନି ପ୍ରତ୍ୟେକ ଦୁଇଟି ଲେଖାଏଁ ୱିକେଟ୍ ନେଇଥିଲେ। ଇତିହାସ ସୃଷ୍ଟି କରିବାକୁ ମଧ୍ୟପ୍ରଦେଶକୁ ବର୍ତ୍ତମାନ ୧୦୮ ରନ୍ ସ୍କୋର କରିବାକୁ ପଡିବ।
