ନୂଆଦିଲ୍ଲୀ: ଭାରତୀୟ ବ୍ୟାଟ୍ସମ୍ୟାନ୍ ସୂର୍ଯ୍ୟକୁମାର ଯାଦବ ଚଳିତ ବର୍ଷ ଟି-୨୦ କ୍ରିକେଟରେ ସର୍ବାଧିକ ରନ୍ ସ୍କୋର କରିଛନ୍ତି। ଅଷ୍ଟ୍ରେଲିଆ ବିପକ୍ଷ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜର ଶେଷ ତଥା ନିର୍ଣ୍ଣାୟକ ମ୍ୟାଚରେ ୬୯ ରନ୍ର ଆକ୍ରମଣାତ୍ମକ ଇନିଂସ ତାଙ୍କୁ ଏହି ସ୍ଥାନକୁ ନେଇଛି। ଏଠାରେ ବିଶେଷ କଥା ହେଉଛି ସୁର୍ଯ୍ୟକୁମାର ଚଳିତ ବର୍ଷ ୧୮୦+ ଷ୍ଟ୍ରାଇକ୍ ରେଟରେ ରନ୍ ସ୍କୋର କରିଛନ୍ତି।
ଚଳିତ ବର୍ଷ ଟି-୨୦ ଇଣ୍ଟରନ୍ୟାସନାଲର ୨୦ ଟି ଇନିଂସରେ ସୁର୍ଯ୍ୟକୁମାର ଯାଦବ ୬୮୨ ରନ୍ ସଂଗ୍ରହ କରିଛନ୍ତି ଏବଂ ବ୍ୟାଟିଂ ହାର ୩୭.୮୮ ଏବଂ ଷ୍ଟ୍ରାଇକ୍ ରେଟ ୧୮୨.୮୪ ରହିଛି। ଏହି ସମୟ ମଧ୍ୟରେ ସେ ଏକ ଶତକ ଏବଂ ଚାରିଟି ଅର୍ଦ୍ଧଶତକ ହାସଲ କରିଛନ୍ତି। ସେ ମଧ୍ୟ ଚଳିତ ବର୍ଷ ଟି-୨୦ରେ ସର୍ବାଧିକ ଛକା ମାରିଛନ୍ତି। ଚଳିତ ବର୍ଷ ସେ ୪୨ ଟି ଛକା ମାରିଛନ୍ତି।
ଟପ୍ -୫ ଖେଳାଳି:
ସୂର୍ଯ୍ୟକୁମାର ଯାଦବଙ୍କ ପରେ ନେପାଳର ଦୀପେନ୍ଦ୍ର ସିଂ (୬୨୬) ଙ୍କ ନାମ ୨୦୨୨ ମସିହାରେ ସର୍ବାଧିକ ଟି-୨୦ ଆନ୍ତର୍ଜାତୀୟ ରନ୍ ରେ ଆସିଛି। ତୃତୀୟ ସ୍ଥାନରେ ଚେକ ଗଣରାଜ୍ୟର ସାବାଭୁନ୍ ଦାଭିଜୀ (୬୧୨) ଅଛନ୍ତି। ଯଦିଓ ଏହି ଉଭୟ ବ୍ୟାଟ୍ସମ୍ୟାନ୍ ଦୁର୍ବଳ ଦଳ ବିପକ୍ଷରେ ଖେଳିବାବେଳେ ଏତେ ରନ୍ ସ୍କୋର କରିଛନ୍ତି। ଏହି ତାଲିକାରେ ପାକିସ୍ତାନର ମହମ୍ମଦ ରିଜୱାନ୍ (୫୫୬) ଚତୁର୍ଥ ସ୍ଥାନରେ ଏବଂ ୱେଷ୍ଟଇଣ୍ଡିଜ୍ ର ନିକୋଲାସ୍ ପୁରାନ୍ (୫୫୩) ପଞ୍ଚମ ସ୍ଥାନରେ ଅଛନ୍ତି।
ଚଳିତ ବର୍ଷ ରୋହିତ ଶର୍ମା ଭାରତୀୟ ଦ୍ୱିତୀୟ ସର୍ବାଧିକ ଟି-୨୦ ରନ୍ ସ୍କୋରର୍:
ରୋହିତ ଶର୍ମା ଚଳିତ ବର୍ଷ ୨୦ ଟି ମ୍ୟାଚରେ ୪୯୭ ରନ୍ ସଂଗ୍ରହ କରିଛନ୍ତି। ତାଙ୍କର ବ୍ୟାଟିଂ ହାର ୨୭.୬୧ ଥିବା ବେଳେ ଷ୍ଟ୍ରାଇକ୍ ରେଟ ୧୪୭.୦୪ ରହିଛି। ସେ ସୂର୍ଯ୍ୟକୁମାରଙ୍କ ପରେ ୨୦୨୨ ମସିହାରେ ଭାରତର ଦ୍ୱିତୀୟ ସର୍ବାଧିକ ଟି-୨୦ ଆନ୍ତର୍ଜାତୀୟ ରନ୍ ସ୍କୋରର। ରୋହିତ ଶର୍ମାଙ୍କ ପରେ ଶ୍ରେୟସ୍ ଆୟର (୪୪୯), ହାର୍ଦ୍ଦିକ ପାଣ୍ଡ୍ୟା (୪୩୬) ଏବଂ ବିରାଟ କୋହଲି (୪୩୩) ଙ୍କ ନାମ ଏହି ତାଲିକାରେ ଆସିଛି।
