ନୂଆଦିଲ୍ଲୀ: ଭାରତର ତାରକା ଦ୍ରୁତ ବୋଲର ଜସପ୍ରୀତ ବୁମ୍ରାଙ୍କ ବିଷୟରେ ବଡ ଖବର ଆସୁଛି। ସୂଚନା ଅନୁଯାୟୀ, ଜସପ୍ରୀତ ବୁମ୍ରା ଆଇପିଏଲ୍ ୨୦୨୩ ରୁ ବାଦ ପଡିଛନ୍ତି। ଏହା ପୂର୍ବରୁ ଅନୁମାନ କରାଯାଉଥିଲା ଯେ, ଆଇପିଏଲ୍ ୨୦୨୩ ସହିତ ବୁମ୍ରା WTC ଫାଇନାଲ୍ ଏବଂ ଏସିଆ କପ୍-୨୦୨୩ କୁ ହରାଇ ପାରନ୍ତି। କାରଣ ତାଙ୍କ ଆଘାତ ଅଧିକ ଗୁରୁତର ହୋଇଛି, ଯେଉଁଥିପାଇଁ ସେ ସୁସ୍ଥ ହେବାକୁ ପ୍ରାୟ ୫ ରୁ ୬ ମାସ ସମୟ ନେଇପାରନ୍ତି। ଏଭଳି ପରିସ୍ଥିତିରେ ଆଇପିଏଲ ବ୍ୟତୀତ ଯଦି ଭାରତ ବିଶ୍ୱ ଟେଷ୍ଟ ଚାମ୍ପିଅନସିପ (ଡବ୍ଲୁଟିଏସି ଫାଇନାଲ) ର ଫାଇନାଲ ପାଇଁ ଯୋଗ୍ୟତା ଅର୍ଜନ କରେ, ତେବେ ବୁମରା ଦଳର ଅଂଶ ହୋଇପାରିବେ ନାହିଁ। ଏହା ସହିତ ଏସିଆ କପ୍-୨୦୨୩ ରେ ମଧ୍ୟ ସେ ବାଦ ପଡ଼ିପାରନ୍ତି।
ଉଲ୍ଲେଖଥାଉ କି, ଦଳର ଅଧିନାୟକ ରୋହିତ ଶର୍ମା ଏହା ସ୍ପଷ୍ଟ କରିସାରିଛନ୍ତି ଯେ, ତାଙ୍କ ଲକ୍ଷ୍ୟ ହେଉଛି ଦିନିକିଆ ବିଶ୍ୱକପ ୨୦୨୩। ତେଣୁ ବୁମ୍ରାଙ୍କ ବିଷୟରେ କୌଣସି ବିପଦ ନେବାକୁ ଭାରତୀୟ ପରିଚାଳନା ଦଳ ଚାହୁଁନାହିଁ। ହେଲେ ବୁମରା ଖେଳ ଦେଖିବାକୁ ପ୍ରଶଂସକମାନେ ମଧ୍ୟ ଦୀର୍ଘ ସମୟ ଧରି ଅପେକ୍ଷା କରିଥିଲେ। କିନ୍ତୁ ବର୍ତ୍ତମାନ ପ୍ରଶଂସକଙ୍କ ଅପେକ୍ଷା ଆହୁରି ଅଧିକ ସମୟ ହୋଇପାରେ।
ପ୍ରକାଶ ଯେ, ଜସପ୍ରୀତ ବୁମ୍ରା ୨୦୨୨ ମସିହାରେ ଇଂଲଣ୍ଡ ଗସ୍ତରେ ଖେଳିଥିଲେ। ଏହା ପରେ ପିଠିରେ ଆଘାତ ହେତୁ ସେ ଏସିଆ କପ୍ ଏବଂ ଟି-୨୦ ବିଶ୍ୱକପରେ ଖେଳିପାରିନଥିଲେ। ବିଶେଷକରି ଟି-୨୦ ବିଶ୍ୱକପ ପୂର୍ବରୁ ଯେତେବେଳେ ତାଙ୍କ ବିଶ୍ରାମ ଖବର ସାମ୍ନାକୁ ଆସିଲା, ପ୍ରଶଂସକଙ୍କ ସମେତ ଭାରତୀୟ ଦଳକୁ ମଧ୍ୟ ଏକ ବଡ଼ ଧକ୍କା ଦେଇଥିଲା। ବର୍ତ୍ତମାନ ସେ ଭ୍ରମଣକାରୀ ଅଷ୍ଟ୍ରେଲିଆ ଦଳ ବିପକ୍ଷରେ ଖେଳାଯାଉଥିବା ଟେଷ୍ଟ ସିରିଜରେ ମଧ୍ୟ ଖେଳିବାକୁ ସକ୍ଷମ ନୁହଁନ୍ତି।
