ନୂଆଦିଲ୍ଲୀ: ଏସିଆ କପ୍-୨୦୨୩ ରେ ବଡ ଖବର ଆସୁଛି। ସୂଚନା ଅନୁଯାୟୀ, ଏସିଆ କପ୍-୨୦୨୩ ପାକିସ୍ତାନରେ ଖେଳାଯିବ ନାହିଁ। ସଂଯୁକ୍ତ ଆରବ ଏମିରେଟ୍ସ (ୟୁଏଇ) କିମ୍ବା କତରରେ ଏସିଆ କପ୍ ଆୟୋଜିତ ହେବ। ଯଦିଓ ଏସିଆ କପ୍-୨୦୨୩ କେଉଁଠାରେ ଆୟୋଜିତ ହେବ ସେ ସମ୍ବନ୍ଧରେ କୌଣସି ସୂଚନା ଆନୁଷ୍ଠାନିକ ଭାବେ ପ୍ରକାଶ କରାଯାଇ ନାହିଁ, କିନ୍ତୁ ପାକିସ୍ତାନ ଏସିଆ କପ୍-୨୦୨୩ ଆୟୋଜନ କରିବ ନାହିଁ ଏହା ପ୍ରାୟ ନିଶ୍ଚିତ।
ବିସିସିଆଇ ଏବଂ ପାକିସ୍ତାନ କ୍ରିକେଟ୍ ବୋର୍ଡ ମୁହାଁମୁହିଁ?:
ବାସ୍ତବରେ ଭାରତ ଏବଂ ପାକିସ୍ତାନ ମଧ୍ୟରେ ତିକ୍ତତା ଜାରି ରହିଛି। ପାକିସ୍ତାନରେ କୌଣସି ଉପଯୁକ୍ତ ସୁରକ୍ଷା ବ୍ୟବସ୍ଥା ନାହିଁ ବୋଲି ବିସିସିଆଇ ଦୃଢୋକ୍ତି ପ୍ରକାଶ କରିଛି। ଏହି କାରଣରୁ ଭାରତୀୟ ଦଳ ଏସିଆ କପ୍ ଖେଳିବାକୁ ପାକିସ୍ତାନ ଯିବ ନାହିଁ। ଏଥି ସହିତ ପାକିସ୍ତାନ କ୍ରିକେଟ୍ ବୋର୍ଡ କହିଛି ଯେ, ଯଦି ଭାରତୀୟ କ୍ରିକେଟ୍ ଦଳ ଏସିଆ କପ୍ ଖେଳିବାକୁ ପାକିସ୍ତାନକୁ ଆସନ୍ତି ନାହିଁ, ତେବେ ଆମ ଦଳ ୨୦୨୩ ବିଶ୍ୱକପ୍ ଖେଳିବାକୁ ଭାରତ ଯିବ ନାହିଁ। ବର୍ତ୍ତମାନ ଏହି ପ୍ରସଙ୍ଗରେ ଦୁଇ ଦେଶ ମଧ୍ୟରେ ବିବାଦ ଲାଗି ରହିଛି।
ଆଇସିସି ବୈଠକରେ କ’ଣ ହେଲା?:
ବୁଧବାର ଦିନ ଆଇସିସି ବୈଠକ ଅନୁଷ୍ଠିତ ହୋଇଥିଲା। ଆଇସିସିର ଏହି ବୈଠକରେ ଭାରତ ଏବଂ ପାକିସ୍ତାନ ପ୍ରସଙ୍ଗ ଉପରେ ଆଲୋଚନା କରାଯାଇଥିଲା। ବାସ୍ତବରେ, ପୂର୍ବରୁ କଳ୍ପନାଜଳ୍ପନା କରାଯାଇଥିଲା ଯେ, ପାକିସ୍ତାନ କ୍ରିକେଟ୍ ଦଳ ୨୦୨୩ ବିଶ୍ୱକପ୍ ଖେଳିବାକୁ ଭାରତ ଯିବ ନାହିଁ, କିନ୍ତୁ ବାଂଲାଦେଶରେ ସେମାନଙ୍କ ବିପକ୍ଷରେ ଖେଳିପାରେ, କିନ୍ତୁ ଆଇସିସି ଏହି କଳ୍ପନାକୁ ପ୍ରତ୍ୟାଖ୍ୟାନ କରିଛି। ପିଟିଆଇ ଅନୁଯାୟୀ ଆଇସିସି ବୈଠକରେ ଏହି ପ୍ରସଙ୍ଗ ଉପରେ ମଧ୍ୟ ଆଲୋଚନା କରାଯାଇ ନାହିଁ। ଏହା ବ୍ୟତୀତ ବାଂଲାଦେଶରେ ବିଶ୍ୱକପ ଖେଳାଯିବା ଉଚିତ ବୋଲି ଆଇସିସି ମଧ୍ୟ ଦୂରରୁ ଭାବି ନାହିଁ। ତେବେ ପାକିସ୍ତାନ କ୍ରିକେଟ୍ ବୋର୍ଡ ପାଇଁ ଏହା ଏକ ବଡ ଝଟକା ବୋଲି ବିବେଚନା କରାଯାଉଛି।