ମୁମ୍ବାଇ: ଆୟରଲ୍ୟାଣ୍ଡ ଓ ଇଂଲଣ୍ଡ ଗସ୍ତରେ ଭାରତୀୟ ଦଳର ନିରାଶାଜନକ ପ୍ରଦର୍ଶନ ପରେ ବିସିସିଆଇ (BCCI) ପକ୍ଷରୁ ଏକ ଗୁରୁତ୍ବପୂର୍ଣ୍ଣ ସମୀକ୍ଷା ବୈଠକ ଡକାଯାଇଛି। ମୁମ୍ବାଇସ୍ଥିତ ବୋର୍ଡ ମୁଖ୍ୟାଳୟରେ ଅନୁଷ୍ଠିତ ହେବାକୁ ଥିବା ଏହି ବୈଠକରେ ମୁଖ୍ୟ କୋଚ୍ ଗୌତମ ଗମ୍ଭୀର, ମୁଖ୍ୟ ଚୟନକର୍ତ୍ତା ଅଜିତ ଅଗରକର ଏବଂ ସେଣ୍ଟର ଅଫ୍ ଏକ୍ସଲେନ୍ସର ମୁଖ୍ୟ ଭି.ଭି.ଏସ. ଲକ୍ଷ୍ମଣ ସାମିଲ ହେବେ।
ଏହି ବୈଠକରେ ବିଦେଶ ଗସ୍ତରେ ଟିମ୍ର ବିଫଳତାର ସମୀକ୍ଷା କରାଯିବା ସହ ୨୦୨୭ ଦିନିକିଆ ବିଶ୍ବକପ୍କୁ ଦୃଷ୍ଟିରେ ରଖି ଆଗାମୀ ରଣନୀତି ପ୍ରସ୍ତୁତ କରାଯିବ। ଖେଳାଳିମାନଙ୍କ ଆଘାତ ସମସ୍ୟା, ଆଇପିଏଲ୍ (IPL)ର ୱାର୍କଲୋଡ୍ ଏବଂ ଏହାର ଫିଟନେସ୍ ଉପରେ ପଡ଼ୁଥିବା ପ୍ରଭାବ ନେଇ ଗମ୍ଭୀର ଆଲୋଚନା ହେବ। ଟିମ୍ ମ୍ୟାନେଜମେଣ୍ଟ, ସିଏଓ ଏବଂ ଚୟନ କମିଟି ମଧ୍ୟରେ ସଠିକ୍ ଯୋଗାଯୋଗ ହୋଇପାରୁ ନଥିବା ନେଇ ପ୍ରଶ୍ନ ଉଠିଛି। ଫାଷ୍ଟ ବୋଲର ଯଶପ୍ରୀତ ବୁମରା ସମ୍ପୂର୍ଣ୍ଣ ଫିଟ୍ ନଥିବା ସୂଚନା ସଠିକ୍ ସମୟରେ ଚୟନ କମିଟି ପାଖରେ ପହଞ୍ଚି ନଥିଲା। ଏହା ବ୍ୟତୀତ ୱାଶିଂଟନ୍ ସୁନ୍ଦରଙ୍କ ଆଘାତ ଏବଂ ସାଇ ସୁଦର୍ଶନଙ୍କ ରିକଭରୀରେ ବିଳମ୍ବ ନେଇ ମଧ୍ୟ ସମୀକ୍ଷା କରାଯିବ। ୨୦୨୭ ବିଶ୍ବକପ୍ ପାଇଁ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କୁ ଟିମ୍ରେ ରଖିବାକୁ ଚୟନ କମିଟି ଚାହୁଁଛି। ତେବେ ବର୍ତ୍ତମାନ ସେ ଦିନିକିଆରେ ୫ରୁ ୬ ଓଭରରୁ ଅଧିକ ବୋଲିଂ କରିପାରୁ ନାହାନ୍ତି। ତାଙ୍କ ଫିଟନେସ୍କୁ ଦୀର୍ଘସୂତ୍ରୀ କରିବା ପାଇଁ ସ୍ବତନ୍ତ୍ର ଯୋଜନା ପ୍ରସ୍ତୁତ ହେବ। ନ୍ୟୁଜିଲାଣ୍ଡ ଗସ୍ତ ପୂର୍ବରୁ ଫାଷ୍ଟ ବୋଲରଙ୍କ ପୁଲ୍କୁ ଫିଟ୍ ରଖିବା ଏବଂ ଆଘାତ ସମସ୍ୟା ହ୍ରାସ କରିବାର ଉପାୟ ଖୋଜାଯିବ।
ଗତ ଜୁନ୍ ମାସରେ ଆୟରଲ୍ୟାଣ୍ଡ ବିପକ୍ଷ ୨ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ରେ ଭାରତ ୦-୨ରେ ପରାଜିତ ହୋଇଥିଲା। ଟି-୨୦ ବିଶ୍ବକପ୍ ବିଜୟ ପରେ ଏହା ଭାରତର ପ୍ରଥମ ଟି-୨୦ ସିରିଜ୍ ପରାଜୟ ଥିଲା। ଏହାପରେ ଇଂଲଣ୍ଡ ଗସ୍ତରେ ୫ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍କୁ ଭାରତ ୦-୪ରେ ହରାଇଥିଲା । ଦିନିକିଆ ସିରିଜ୍ରେ ମଧ୍ୟ ପ୍ରଥମ ମ୍ୟାଚ୍ ଜିତିବା ସତ୍ତ୍ବେ ଭାରତ ୧-୨ରେ ସିରିଜ୍ ହାତଛଡ଼ା କରିଥିଲା। ଏହି ନିରାଶାଜନକ ଫଳାଫଳ ପରେ ବିସିସିଆଇ ସମ୍ପାଦକ ଦେବଜିତ୍ ସାଇକିଆ କହିଥିଲେ ଯେ, ଟିମ୍ର ପ୍ରଦର୍ଶନର ଆନୁଷ୍ଠାନିକ ସମୀକ୍ଷା କରାଯିବ।