ନୂଆଦିଲ୍ଲୀ : ଜାପାନରେ ଆୟୋଜିତ ହେବାକୁ ଥିବା ୨୦୨୬ ଏସିଆନ୍ ଗେମ୍ସରେ ଭାରତୀୟ ପୁରୁଷ ଓ ମହିଳା ହକି ଟିମ୍ ପୁଣିଥରେ ନିଜର ପାରମ୍ପରିକ ‘ନୀଳ ଜର୍ସି’ ପିନ୍ଧି ମୈଦାନକୁ ଓହ୍ଲାଇବେ। ନେଦରଲାଣ୍ଡ୍ସ ଓ ବେଲ୍ଜିୟମ୍ରେ ଖେଳାଯାଇଥିବା ହକି ବିଶ୍ୱକପ୍ ସମୟରେ ଭାରତୀୟ ଦଳର ମୁଖ୍ୟ ଜର୍ସି ନାରଙ୍ଗୀ/କେସରିଆ ଏବଂ ଧଳା ରଙ୍ଗକୁ ପରିବର୍ତ୍ତନ କରାଯାଇଥିଲା। ୧୯୨୮ ଅଲିମ୍ପିକ୍ସରୁ ଭାରତୀୟ ହକିର ପରିଚୟ ସାଜିଥିବା ନୀଳ ରଙ୍ଗକୁ ବଦଳାଯିବା ପରେ ଅନେକ ପୂର୍ବତନ ହକି ଖେଳାଳି ଓ କ୍ରୀଡ଼ାପ୍ରେମୀଙ୍କ ମଧ୍ୟରେ ତୀବ୍ର ଅସନ୍ତୋଷ ଏବଂ ବିବାଦ ଦେଖାଦେଇଥିଲା।
ସୂଚନା ଅନୁସାରେ, ଏହି ସମାଲୋଚନା ସତ୍ତ୍ୱେ ହକି ଇଣ୍ଡିଆର ଜଣେ ବରିଷ୍ଠ କର୍ମକର୍ତ୍ତା ନାରଙ୍ଗୀ ରଙ୍ଗକୁ ପ୍ରାଥମିକ ଜର୍ସି ଭାବେ ବଜାୟ ରଖିବାକୁ ଚାହୁଁଥିଲେ। ମାତ୍ର ସଭାପତି ଦିଲୀପ ତିର୍କୀଙ୍କ ହସ୍ତକ୍ଷେପ ପରେ ନୀଳ ରଙ୍ଗକୁ ପୁଣି ମୁଖ୍ୟ ପ୍ରାଥମିକତା ଦିଆଯାଇଛି। ଏହି ପ୍ରସଙ୍ଗରେ ଦିଲୀପ ତିର୍କୀ କହିଛନ୍ତି ଯେ, “ନାରଙ୍ଗୀ ଜର୍ସି ସ୍ଥାୟୀ ବୋଲି ଆମେ କେବେ କହିନଥିଲୁ। ଭାରତୀୟ ହକି ଟିମ୍ ପୂର୍ବପରି ନୀଳ ଜର୍ସି ପିନ୍ଧିବ।” ଅନ୍ୟପଟେ, ହକି ଇଣ୍ଡିଆ କୋଷାଧ୍ୟକ୍ଷ ଶେଖର ମନୋହରନ୍ ସ୍ପଷ୍ଟ କରିଛନ୍ତି ଯେ, “ଭାରତୀୟ ଅଲିମ୍ପିକ୍ ସଂଘ (ଆଇଓଏ) ଆମକୁ କିଟ୍ର ପ୍ରଥମ ପସନ୍ଦ ସମ୍ପର୍କରେ ପଚାରିଥିଲା। ଆମେ ନୀଳ ରଙ୍ଗକୁ ପ୍ରଥମ ପ୍ରାଥମିକତା ଏବଂ ନାରଙ୍ଗୀ ରଙ୍ଗକୁ ଦ୍ୱିତୀୟ ପ୍ରାଥମିକତା ଭାବେ ଚୟନ କରିଛୁ।”