ଚେନ୍ନାଇ: ଚେନ୍ନାଇ ସୁପର୍ କିଙ୍ଗ୍ସ (ସିଏସ୍କେ)ର ମୁଖ୍ୟ କୋଚ୍ ଭାବେ ନିଯୁକ୍ତ ହୋଇଛନ୍ତି ପୂର୍ବତନ ଭାରତୀୟ ଫାଷ୍ଟ୍ ବୋଲର୍ ଜାହିର୍ ଖାନ୍। ଫ୍ରାଞ୍ଚାଇଜି ପକ୍ଷରୁ ଏହି ଗୁରୁତ୍ୱପୂର୍ଣ୍ଣ ଘୋଷଣା କରାଯାଇଛି। ସେ ଦୀର୍ଘ ୧୭ ବର୍ଷ ଧରି (୨୦୦୯-୨୦୨୬) ସିଏସ୍କେର ମୁଖ୍ୟ କୋଚ୍ ଦାୟିତ୍ୱ ତୁଲାଇଥିବା ଷ୍ଟିଫେନ୍ ଫ୍ଲେମିଂଙ୍କ ସ୍ଥାନ ନେବେ। ଆଇପିଏଲ୍ରେ ପ୍ରଥମ ଥର ପାଇଁ ଜାହିର୍ କୌଣସି ଫ୍ରାଞ୍ଚାଇଜିର ମୁଖ୍ୟ କୋଚ୍ ଦାୟିତ୍ୱ ଗ୍ରହଣ କରିଛନ୍ତି। ସେ ମୁମ୍ବାଇ ଇଣ୍ଡିଆନ୍ସରେ କ୍ରିକେଟ୍ ଅପରେସନ୍ସ ଡାଇରେକ୍ଟର ଓ ଗ୍ଲୋବାଲ୍ ଡେଭେଲପ୍ମେଣ୍ଟ୍ ପ୍ରମୁଖ ଭାବେ କାର୍ଯ୍ୟ କରିଥିଲେ। ୨୦୨୫ ଆଇପିଏଲ୍ରେ ସେ ଲକ୍ଷ୍ନୌ ସୁପର୍ ଜାଏଣ୍ଟ୍ସର ମେଣ୍ଟର୍ ଥିଲେ। ସେ ଆରସିବି, ମୁମ୍ବାଇ ଇଣ୍ଡିଆନ୍ସ ଓ ଦିଲ୍ଲୀ ଡେୟାର୍ଡେଭିଲ୍ସ ପକ୍ଷରୁ ମୋଟ ୧୦୦ଟି ଆଇପିଏଲ୍ ମ୍ୟାଚ୍ ଖେଳି ୭.୫୯ ଇକୋନୋମିରେ ୧୦୨ଟି ୱିକେଟ୍ ନେଇଛନ୍ତି।
ତାଙ୍କ ଇକୋନୋମି ରେଟ୍ ୭.୫୯ ରହିଛି। ୨୦୧୭ରେ ଦିଲ୍ଲୀ ଡେୟାର୍ଡେଭିଲ୍ସ ପକ୍ଷରୁ ଖେଳିବା ପରେ ସେ କ୍ରିକେଟ୍ର ସମସ୍ତ ଫର୍ମାଟ୍ରୁ ସନ୍ନ୍ୟାସ ନେଇଥିଲେ। ଭାରତ ପକ୍ଷରୁ ଜାହିର ୯୨ ଟେଷ୍ଟ୍, ୨୦୦ ଦିନିକିଆ ଏବଂ ୧୭ ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି। ସେ ୨୦୧୧ ଦିନିକିଆ ବିଶ୍ୱକପ୍ ବିଜେତା ଭାରତୀୟ ଟିମ୍ର ପ୍ରମୁଖ ବୋଲର୍ ଥିଲେ। ନିଯୁକ୍ତି ପରେ ଜାହିର ଖାନ୍ ସିଏସ୍କେର ଅଂଶବିଶେଷ ହେବା ସମ୍ମାନର ବିଷୟ ବୋଲି କହିଛନ୍ତି। ସେ କହିଛନ୍ତି, ଖେଳାଳି ଭାବେ ସେ ସିଏସ୍କେ ସାମ୍ନା କରିଛନ୍ତି ଏବଂ ଚେପକ୍ରେ ସୁପର୍ଫ୍ୟାନ୍ସ ପରିବେଶର ଅନୁଭବ କରିଛନ୍ତି। ସେ ଫ୍ରାଞ୍ଚାଇଜିର ପରମ୍ପରାର ଅଂଶବିଶେଷ ହୋଇଥିବାରୁ ଉତ୍ସାହିତ ଅଛନ୍ତି।