ନୂଆଦିଲ୍ଲୀ: ଭାରତୀୟ ଆଥ୍ଲେଟିକ୍ସ ଟିମ୍ର ନୂତନ ମୁଖ୍ୟ ଜାତୀୟ କୋଚ୍ ଭାବେ ନିଯୁକ୍ତ ହୋଇଛନ୍ତି ଅଭିଜ୍ଞ “ଥ୍ରୋଇଙ୍ଗ୍’ କୋଚ୍ ତଥା ଦ୍ରୋଣାଚାର୍ଯ୍ୟ ପୁରସ୍କାର ବିଜେତା ପରବୀର ସିଂହ। ଗତ ଛଅ ବର୍ଷ ଧରି ଏହି ପଦବୀରେ କାର୍ଯ୍ୟ କରିଆସୁଥିବା ପି. ରାଧାକୃଷ୍ଣନ୍ ନାୟରଙ୍କ ସ୍ଥାନ ସେ ଗ୍ରହଣ କରିଛନ୍ତି। ସେହିପରି ଆଥ୍ଲେଟିକ୍ସ ଫେଡେରେସନ୍ ଅଫ୍ ଇଣ୍ଡିଆ (ଏଏଫ୍ଆଇ) ପକ୍ଷରୁ ସ୍ପ୍ରିଣ୍ଟ୍ କୋଚ୍ ରାଜ ମୋହନଙ୍କୁ ଜୁନିୟର ମୁଖ୍ୟ କୋଚ୍ ଭାବରେ ଦାୟିତ୍ୱ ଦିଆଯାଇଛି। ଚଳିତ ବର୍ଷ “ଦ୍ରୋଣାଚାର୍ଯ୍ୟ ପୁରସ୍କାର’ ପାଇଥିବା ସିଂହ ନାୟରଙ୍କ ଠାରୁ ଦାୟିତ୍ୱ ଗ୍ରହଣ କରିଛନ୍ତି। ନାୟର ୨୦୨୦ ରୁ ୨୦୨୬ ପର୍ଯ୍ୟନ୍ତ ଏହି ପଦରେ ଥିବାବେଳେ ସିଂହ ୨୦୨୧ ମସିହାରୁ ଉପ-ମୁଖ୍ୟ କୋଚ୍ ଭାବରେ କାର୍ଯ୍ୟ କରିଆସୁଥିଲେ। ସ୍ପୋର୍ଟସ୍ ଅଥରିଟି ଅଫ୍ ଇଣ୍ଡିଆ (ସାଇ)ରେ ଆଥଲେଟିକ୍ସ କୋଚ୍ ଭାବରେ ତିନି ଦଶନ୍ଧିରୁ ଅଧିକ ଅଭିଜ୍ଞତା ଥିବା ସିଂହଙ୍କ ବିସ୍ତୃତ ଜ୍ଞାନ ଭାରତୀୟ ଆଥ୍ଲେଟ୍ମାନଙ୍କୁ ଆହୁରି ସଶକ୍ତ କରିବ। ଅନ୍ୟପକ୍ଷରେ ରାଜ ମୋହନ ୨୦୧୭ ମସିହାରୁ ଜାତୀୟ ୪୦୦ ମିଟର ଟିମ୍ର ଦାୟିତ୍ୱରେ ଅଛନ୍ତି। ଏହି ବରିଷ୍ଠ ଆଥ୍ଲେଟିକ୍ସ କୋଚ୍ ବର୍ତ୍ତମାନ କେରଳର ତିରୁଅନନ୍ତପୁରମ୍ସ୍ଥିତ ନାସ୍ନାଲ୍ ସେଣ୍ଟର୍ ଅଫ୍ ଏକ୍ସିଲେନ୍ସରେ କାର୍ଯ୍ୟରତ ଅଛନ୍ତି।


