ନୂଆଦିଲ୍ଲୀ : ଭାରତ ଏବଂ ପାକିସ୍ତାନ ମଧ୍ୟରେ ଅନୁଷ୍ଠିତ 19 ବର୍ଷରୁ କମ୍ ବିଶ୍ବକପ୍ରେ ଭାରତ ସମ୍ମୁଖରେ 173 ରନ୍ର ବିଜୟ ଲକ୍ଷ୍ୟ ରହିଛି । ପାକିସ୍ତାନ ପକ୍ଷରୁ ଅଧିନାୟକ ରୋହେଲ ନାଜିର(62) ସର୍ବାଧିକ ସ୍କୋର କରିଥିବା ବେଳେ ଓପ୍ନର ହାଇଦର ଅଲୀ 56 ରନ୍ ସଂଗ୍ରହ କରିଥିଲେ । ଭାରତୀୟ ବୋଲରଙ୍କ ଜବରଦସ୍ତ ବୋଲିଂ ସମ୍ମୁଖରେ 8 ଜଣ ପାକ୍ ବ୍ୟାଟ୍ସମ୍ୟାନ୍ ଦୁଇ ଅଙ୍କରେ ପହଞ୍ଚି ପାରିନଥିଲେ । ଟସ୍ ଜିତି ପାକିସ୍ତାନ ପ୍ରଥମେ ବ୍ୟାଟିଂ କରିଥିବା ବେଳେ 9 ରନ୍ରେ ପ୍ରଥମ ଏବଂ 34 ରନ୍ରେ ଦ୍ବିତୀୟ ଓ୍ବିକେଟ ହରାଇଥିଲା । ଏହାପରେ ହାଇଦର ଅଲୀ(56) ଏବଂ ରୋହେଲଙ୍କ ମଧ୍ୟରେ 62 ରନ୍ର ଭାଗିଦାରୀ ହୋଇଥିଲା । ଏହି ଭାଗିଦାରୀ ପରେ ଅନ୍ୟ କୌଣସି ପାକ୍ ବ୍ୟାଟ୍ସମ୍ୟାନ୍ ଭାରତୀୟ ବୋଲରଙ୍କ ସମ୍ମୁଖୀନ ହୋଇନଥିଲେ । ତୃତୀୟ ସର୍ବାଧିକ ଭାବରେ ମହମ୍ମଦ ହାରିସ୍ 21 ରନ୍ ସଂଗ୍ରହ କରିଥିଲେ । ଭାରତ ପକ୍ଷରୁ ଦ୍ରୁତ ବୋଲର ସୁଶାନ୍ତ ମିଶ୍ରା ସର୍ବାଧିକ 3ଟି ଓ୍ବିକେଟ ଅକ୍ତିଆର କରିଥିଲେ । ଅନ୍ୟମାନଙ୍କ ମଧ୍ୟରେ କାର୍ତ୍ତିକ ତ୍ୟାଗୀ ଏବଂ ରବି ବିଷ୍ଣୋଇ ପ୍ରତ୍ୟେକ 2ଟି ଓ୍ବିକେଟ ଅକ୍ତିଆର କରିଥିଲେ । ଯଶସ୍ବୀ ଜୟସ୍ବାଲ ଏବଂ ଅଥର୍ବ ଆଙ୍କୋଲେକର ଗୋଟିଏ ଲେଖାଏଁ ଓ୍ବିକେଟ ଅକ୍ତିଆର କରିଥିବା ବେଳେ କାସିମ୍ ଆକ୍ରମ ରନ୍ଆଉଟ୍ ହୋଇଥିଲେ । (ଏଜେନ୍ସୀ)
