ନୂଆଦିଲ୍ଲୀ: ଦ୍ରୋଣାଚାର୍ଯ୍ୟ ପୁରସ୍କାର ବିଜେତା ତଥା ଲୋକପ୍ରିୟ କୁସ୍ତି ଯୋଦ୍ଧା ମହାବୀର ଫୋଗାଟ୍ଙ୍କ ତୃତୀୟ କନ୍ୟା ତଥା ଦଙ୍ଗଲ୍ ଗାର୍ଲ ଗୀତା ଓ ବବିତାଙ୍କ ସାନ ଭଉଣୀ ସଙ୍ଗୀତା ଫୋଗାଟ୍ ବିବାହ ବନ୍ଧନରେ ଆବଦ୍ଧ ହୋଇଛନ୍ତି । ସଙ୍ଗୀତା ବୁଧବାର ଦିନ ଅନ୍ତର୍ରାଷ୍ଟ୍ରୀୟ କୁସ୍ତି ତାରକା ବଜରଙ୍ଗ ପୁନିଆଙ୍କୁ ବିବାହ କରିଛନ୍ତି । ସାତ ଥରେ ନୁହେଁ ଆଠ ଥରେ ଫେରା ନେଇ ଦୁହେ ଜୀବନସାଥୀ ପାଲଟିଛନ୍ତି । ସାଧାରଣତଃ ବିବାହରେ ସାତୋଟି ଫେରା ବା ପ୍ରଦକ୍ଷଣ ନିଆଯାଇଥାଏ । କିନ୍ତୁ ଫୋଗୋଟ୍ ଭଉଣୀମାନେ ବିବାହରେ ଆଠୋଟି ଫେରା ନେଇଛନ୍ତି । ବେଟି ବଚାଓ ଓ ବେଟି ପଢାଓ ପାଇଁ ଅଷ୍ଟମ ଫେରା ନେଇଛନ୍ତି ସଙ୍ଗୀତା । ବିବାହରେ ମୋଟ୍ 31 ଜଣ ବରଯାତ୍ରୀ ସାମିଲ୍ ହୋଇଥିଲେ । ବାହାଘରରେ ପରିବାରର ଅତି ନିକଟ ସମ୍ପର୍କୀୟ ସାମିଲ୍ ରହିଥିଲେ ।
ବିବାହ ପୂର୍ବରୁ ସଙ୍ଗୀତା ତାଙ୍କ ବିବାହ ପୂର୍ବ ଉତ୍ସବର ଫଟୋ ଇନଷ୍ଟାଗ୍ରାମରେ ସେୟାର କରିଥିଲେ । ସେଥିରେ ତାଙ୍କ ଦୁଇ ଭଉଣୀ ଗୀତା ଓ ବବିତା ତାଙ୍କୁ ହଳଦୀ ମାରି ଦେଉଥିବାର ଦେଖାଯାଇଥିଲା । ତିନି ଦିନ ଧରି ଚାଲିଥିବା ତାଙ୍କ ମେହେନ୍ଦୀ ଉତ୍ସବରେ ପରିବାର ଘନିଷ୍ଠ ସଦସ୍ୟ ହିଁ ଯୋଗ ଦେଇଥିଲେ ।
ସଂଗୀତା ସବୁଜ ରଙ୍ଗର ଲେହେଙ୍ଗା ସହ ଫୁଲର ଜୁଏଲାରୀ ପିନ୍ଧି ବେଶ୍ ସୁନ୍ଦର ଦିଶୁଥିଲେ । ଏହା ପୂର୍ବରୁ ଗତ ବର୍ଷ ଡିସେମ୍ବର 1 ତାରିଖରେ ବିବେକଙ୍କୁ ବିବାହ କରିଥିବା ବବିତା ଖୁବ ଶୀଘ୍ର ସେମାନଙ୍କ ପ୍ରଥମ ସନ୍ତାନକୁ ଜନ୍ମ ଦେବେ ବୋଲି ଘୋଷଣା କରି ସାରିଛନ୍ତି । (ଏଜେନ୍ସି)