Tag: ଅମିତ ଶାହ

ନୂଆଦିଲ୍ଲୀ: କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ ସୋମବାର ଛତିଶଗଡ଼ର ଜଗଦଲପୁରଠାରେ ନକ୍ସଲବାଦ ବିରୋଧରେ ଲଢ଼େଇ କରି ସହିଦ ହୋଇଥିବା ବୀରମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ସେ ସହିଦ ଯବାନଙ୍କ ପରିବାର ଏବଂ ନକ୍ସଲ ହିଂସାରେ ପୀଡ଼ିତଙ୍କ ପରିବାରକୁ ମଧ୍ୟ ଭେଟିଥିଲେ। ଏହି ଅବସରରେ ଛତିଶଗଡ଼ ମୁଖ୍ୟମନ୍ତ୍ରୀ ବିଷ୍ଣୁ ଦେଓ ସାଏ ଏବଂ ଉପମୁଖ୍ୟମନ୍ତ୍ରୀଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ।

କେନ୍ଦ୍ର ଗୃହମନ୍ତ୍ରୀ ଅମିତ ଶାହ ତାଙ୍କ ଅଭିଭାଷଣରେ ନକ୍ସଲବାଦ ବିରୋଧରେ ସାହସିକ ସଂଗ୍ରାମରେ ସର୍ବୋଚ୍ଚ ବଳିଦାନ ଦେଇଥିବା ୧୩୯୯ ସହିଦଙ୍କୁ ସମ୍ମାନ ଜଣାଇ ଏକ ସ୍ମାରକୀ ପ୍ରତିଷ୍ଠା କରିଥିବାରୁ ଛତିଶଗଡ଼ ସରକାରଙ୍କୁ ପ୍ରଶଂସା କରିଥିଲେ। ଏହି ସ୍ମାରକୀ କେବଳ ଏହି ବୀରମାନଙ୍କୁ ଶ୍ରଦ୍ଧାଞ୍ଜଳି ଦେବ ନାହିଁ ବରଂ ଭବିଷ୍ୟତ ପିଢ଼ିକୁ ମଧ୍ୟ ପ୍ରେରଣା ଯୋଗାଇବ ବୋଲି ସେ ଆଶା ବ୍ୟକ୍ତ କରିଛନ୍ତି।

ଶ୍ରୀ ଶାହ ଆଲୋକପାତ କରି କହିଥିଲେ ଯେ, ଗତ ବର୍ଷ ଗଠନ ପରଠାରୁ ବର୍ତ୍ତମାନର ଛତିଶଗଡ଼ ସରକାର ନକ୍ସଲବାଦର ମୂଳୋତ୍ପାଟନ ପାଇଁ ନିଜର ପ୍ରତିବଦ୍ଧତାରେ ଅଟଳ ରହିଛନ୍ତି। ନିରୀହ ଲୋକଙ୍କ ଜୀବନ ହାନିକୁ ରୋକିବା ପାଇଁ ଏହି ବିପଦକୁ ସମ୍ପୂର୍ଣ୍ଣ ଉଚ୍ଛେଦ କରାଯିବା ଆବଶ୍ୟକ ବୋଲି ସେ ଗୁରୁତ୍ୱାରୋପ କରିଥିଲେ। ଏହି ଲକ୍ଷ୍ୟ ହାସଲ ପାଇଁ ସରକାର ଏକ ବ୍ୟାପକ ତ୍ରିମୁଖୀ ରଣନୀତି ଆପଣାଉଛନ୍ତି ବୋଲି ସେ ଉଲ୍ଲେଖ କରିଛନ୍ତି। ପ୍ରଥମତଃ ହିଂସା ତ୍ୟାଗ କରି ସମାଜର ମୁଖ୍ୟ ସ୍ରୋତରେ ସାମିଲ ହେବାକୁ ଚାହୁଁଥିବା ଲୋକଙ୍କୁ ସ୍ୱାଗତ କରାଯାଉଛି। ଦ୍ବିତୀୟତଃ ଯେଉଁମାନେ ହିଂସାର ରାସ୍ତା ଛାଡିବାକୁ ଚାହୁଁନାହାନ୍ତି ସେମାନଙ୍କୁ ଧରିବା ପାଇଁ ପ୍ରୟାସ ଜୋରଦାର କରାଯାଉଛି । ଶେଷରେ, ଅନ୍ୟକୁ କ୍ଷତି ପହଞ୍ଚାଇବାକୁ ଚାହୁଁଥିବା ବ୍ୟକ୍ତିଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଗୃହମନ୍ତ୍ରୀ ଏ ଦିଗରେ ଉଲ୍ଲେଖନୀୟ ଅଗ୍ରଗତି ସମ୍ପର୍କରେ ସୂଚନା ଦେଇ କହିଛନ୍ତି ଯେ, ବର୍ଷକ ମଧ୍ୟରେ ୨୮୭ ନକ୍ସଲ ନ୍ୟୁଟ୍ରାଲାଇଜ ହୋଇଛନ୍ତି, ପାଖାପାଖି ୧୦୦୦ ଗିରଫ ହୋଇଛନ୍ତି ଏବଂ ଛତିଶଗଡ଼ରେ ୮୩୭ ଜଣ ଆତ୍ମସମର୍ପଣ କରିଛନ୍ତି। ଏହା ଅଞ୍ଚଳରେ ଶାନ୍ତି ଓ ନିରାପତ୍ତା ଫେରାଇ ଆଣିବା ପାଇଁ ସରକାରଙ୍କ ଅତୁଟ ସଂକଳ୍ପକୁ ଦର୍ଶାଉଛି।

କେନ୍ଦ୍ର ଗୃହମନ୍ତ୍ରୀ ଅମିତ ଶାହ କହିଛନ୍ତି ଯେ ଛତିଶଗଡ଼ରେ ନକ୍ସଲବାଦର ମୁକାବିଲା ରେ ଗତ ବର୍ଷର ସଫଳତା ଅଭୂତପୂର୍ବ। ସେ ଉଲ୍ଲେଖ କରିଛନ୍ତି ଯେ ପୂର୍ବରୁ କେବେ ବି ଗୋଟିଏ ବର୍ଷରେ ଏତେ ବିଶାଳ ଅଞ୍ଚଳ ନକ୍ସଲ ପ୍ରଭାବରୁ ମୁକ୍ତ ହୋଇନାହିଁ କିମ୍ବା ଏତେ ସଂଖ୍ୟକ ନକ୍ସଲଙ୍କୁ ନିପାତ, ଗିରଫ କିମ୍ବା ଆତ୍ମସମର୍ପଣ କରାଯାଇନାହିଁ। ଏହି ପ୍ରୟାସରେ ଏକ ଅତ୍ୟନ୍ତ ପ୍ରଭାବଶାଳୀ ଏବଂ ସୁସମନ୍ୱିତ ରଣନୀତି କାର୍ଯ୍ୟକାରୀ କରିଥିବାରୁ ଶ୍ରୀ ଶାହ ଛତିଶଗଡ଼ ସରକାରଙ୍କୁ ପ୍ରଶଂସା କରିଥିଲେ। ଛତିଶଗଡ଼ ପୋଲିସ ବାହିନୀର ପ୍ରଶଂସନୀୟ ଦଳଗତ କାର୍ଯ୍ୟକୁ ସେ ସ୍ୱୀକାର କରିଥିଲେ, ଯେଉଁମାନେ ଏକ ସ୍ପଷ୍ଟ ଏବଂ କେନ୍ଦ୍ରୀଭୂତ ଯୋଜନା ଦ୍ୱାରା ଏକ ଦୃଢ଼ ଅଭିଯାନ ଆରମ୍ଭ କରିଛନ୍ତି । ଭବିଷ୍ୟତକୁ ନେଇ ଆଶାବାଦୀ ହୋଇ ଶ୍ରୀ ଅମିତ ଶାହ ଆଶ୍ୱାସନା ଦେଇଛନ୍ତି ଯେ ୨୦୨୬ ମାର୍ଚ୍ଚ ୩୧ ପରେ ମା’ ଦାନ୍ତେଶ୍ୱରୀଙ୍କ ପବିତ୍ର ଭୂମିରେ ନକ୍ସଲବାଦ ନାଁରେ ଗୋଟିଏ ବୁନ୍ଦା ବି ରକ୍ତ ବହିବ ନାହିଁ।

କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଆଲୋକପାତ କରିଥିଲେ ଯେ ଛତିଶଗଡ଼ ସରକାର ପୂର୍ବରୁ ନକ୍ସଲ ପ୍ରଭାବିତ ଅଞ୍ଚଳରେ ବିକାଶକୁ ତ୍ୱରାନ୍ୱିତ କରିବା ପାଇଁ ପର୍ଯ୍ୟାୟକ୍ରମେ ଯୋଜନା ପ୍ରସ୍ତୁତ କରିଛନ୍ତି। ଏହି ଯୋଜନାରେ ଗ୍ରାମର କଲ୍ୟାଣ ଏବଂ ପ୍ରଭାବିତ ସମ୍ପ୍ରଦାୟର ଉନ୍ନତି ଉପରେ ଗୁରୁତ୍ୱ ଦିଆଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୃଢ଼ ସମର୍ଥନ ଏବଂ ସହଯୋଗରେ ଏହି ପଦକ୍ଷେପଗୁଡିକ କାର୍ଯ୍ୟକାରୀ ହେଉଛି ବୋଲି ଶ୍ରୀ ଶାହ ଗୁରୁତ୍ୱାରୋପ କରିଥିଲେ। ନକ୍ସଲ ପ୍ରଭାବିତ ଅଂଚଳରେ ୧୫ ହଜାର ଘର ନିର୍ମାଣ କୁ ପ୍ରଧାନମନ୍ତ୍ରୀ ମୋଦୀ ଅନୁମୋଦନ କରିଛନ୍ତି। ଏହାବ୍ୟତୀତ ନକ୍ସଲ ହିଂସାରେ କ୍ଷତିଗ୍ରସ୍ତ ପରିବାରକୁ ପ୍ରାଥମିକତା ସହାୟତା ସୁନିଶ୍ଚିତ କରିବା ସହ ପ୍ରତି ଗାଁରେ ଶତ ପ୍ରତିଶତ ସରକାରୀ କଲ୍ୟାଣକାରୀ ଯୋଜନା ହାସଲ ପାଇଁ ପ୍ରୟାସ ଚାଲିଛି।

ଶ୍ରୀ ଶାହ ଆହୁରି ମଧ୍ୟ କହିଛନ୍ତି ଯେ, ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ ନକ୍ସଲ ମୁକ୍ତ ଭାରତ ଅଭିଯାନକୁ ପ୍ରଭାବିତ ପରିବାରମାନଙ୍କଠାରୁ ଯଥେଷ୍ଟ ସମର୍ଥନ ମିଳୁଛି। କେନ୍ଦ୍ର ଗୃହ, ଆଦିବାସୀ ବ୍ୟାପାର ଏବଂ ଗ୍ରାମ୍ୟ ଉନ୍ନୟନ ମନ୍ତ୍ରଣାଳୟ ଏକାଠି ହୋଇ ଏହି ପରିବାରଗୁଡ଼ିକୁ ବ୍ୟାପକ ସହାୟତା ଯୋଗାଇଦେବା ପାଇଁ କାର୍ଯ୍ୟ କରୁଛନ୍ତି ବୋଲି ସେ ଆଶ୍ୱାସନା ଦେବା ସହ ସେମାନଙ୍କ ଥଇଥାନ ଓ ପ୍ରଗତି ପାଇଁ ସରକାରଙ୍କ ପ୍ରତିବଦ୍ଧତାକୁ ଦୋହରାଇଥିଲେ।

ନୂଆଦିଲ୍ଲୀ: କେନ୍ଦ୍ର ସ୍ୱରାଷ୍ଟ୍ର ଓ ସମବାୟ ମନ୍ତ୍ରୀ ଅମିତ ଶାହ ଆଜି ଛତିଶଗଡ଼ର ଜଗଦଲପୁର ଠାରେ ଅସ୍ତ୍ରଶସ୍ତ୍ର ଛାଡି ସମାଜର ମୁଖ୍ୟଧାରାରେ ଯୋଗ ଦେଇଥିବା ଛତିଶଗଡ଼, ମହାରାଷ୍ଟ୍ର, ଓଡ଼ିଶା, ଆନ୍ଧ୍ର ପ୍ରଦେଶ, ତେଲଙ୍ଗାନା ଏବଂ ଆସାମର ଲୋକଙ୍କୁ ଭେଟିଛନ୍ତି। ଏହି ଅବସରରେ ଛତିଶଗଡ଼ର ମୁଖ୍ୟମନ୍ତ୍ରୀ ବିଷ୍ଣୁଦେଓ ସାୟ ଏବଂ ଉପମୁଖ୍ୟମନ୍ତ୍ରୀ ବିଜୟ ଶର୍ମା ପ୍ରମୁଖ ଉପସ୍ଥିତ ଥିଲେ।

ଏହି ସାକ୍ଷାତ ପରେ ନିଜର ଅଭିଭାଷଣରେ ଶ୍ରୀ ଅମିତ ଶାହ କହିଥିଲେ ଯେ, ୨୦୧୯ରେ ଦେଶର ଯୁବକମାନେ କାଶ୍ମୀର, ଉତ୍ତର-ପୂର୍ବ ଏବଂ ନକ୍ସଲ ପ୍ରଭାବିତ ଅଞ୍ଚଳରେ ଅସ୍ତ୍ରଶସ୍ତ୍ର ଧରି ନିଜର ଜୀବନ ନଷ୍ଟ କରୁଥିଲେ, ହିଂସା କରୁଥିଲେ ଏବଂ ସମଗ୍ର ଅଞ୍ଚଳକୁ ବିକାଶଠାରୁ ଦୂରରେ ରଖିଥିଲେ। ସେ କହିଥିଲେ ଯେ ସେହି ସମୟରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ନିଷ୍ପତ୍ତି ନିଆଯାଇଥିଲା ଯେ ଯେଉଁମାନେ ଅସ୍ତ୍ରଶସ୍ତ୍ର ତ୍ୟାଗ କରି ସମାଜର ମୁଖ୍ୟଧାରାରେ ସାମିଲ ହେବାକୁ ଚାହୁଁଛନ୍ତି, ସେମାନଙ୍କୁ ଏହି ସୁଯୋଗ ଦିଆଯିବା ଉଚିତ। ଶ୍ରୀ ଶାହ କହିଥିଲେ ଯେ ୨୦୧୯ରୁ ୨୦୨୪ ମସିହା ମଧ୍ୟରେ କେବଳ ଉତ୍ତର-ପୂର୍ବାଞ୍ଚଳରେ ୯୦୦୦ରୁ ଅଧିକ ଲୋକ ସେମାନଙ୍କ ଅସ୍ତ୍ରତ୍ୟାଗ କରି ଆତ୍ମସମର୍ପଣ କରିଛନ୍ତି। ସେହିଭଳି, ଅନେକ ଯୁବକ ନକ୍ସଲ ପ୍ରଭାବିତ ଅଞ୍ଚଳରେ ଆତ୍ମସମର୍ପଣ କରିଛନ୍ତି ଏବଂ ବର୍ତ୍ତମାନ ଭାରତ ସରକାର ଏହିପରି ଲୋକଙ୍କ କଲ୍ୟାଣ ତଥା ନକ୍ସଲବାଦର ଶିକାର ହୋଇଥିବା ଲୋକଙ୍କ ପାଇଁ ଏକ ବ୍ୟାପକ ଯୋଜନା ପ୍ରସ୍ତୁତ କରୁଛନ୍ତି ବୋଲି ସେ କହିଥିଲେ। ଗୃହମନ୍ତ୍ରୀ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ ନକ୍ସଲ ପ୍ରଭାବିତ ଅଞ୍ଚଳରେ ୧୫,୦୦୦ ଆବାସ ନିର୍ମାଣକୁ ଅନୁମୋଦନ କରିଛନ୍ତି। ଏହା ସହିତ, ପ୍ରତ୍ୟେକ ପରିବାରକୁ ଗୋଟିଏ ଗାଈ କିମ୍ବା ମଇଁଷି ଯୋଗାଇ ଦେଇ ନକ୍ସଲ ପ୍ରଭାବିତ ଅଞ୍ଚଳରେ ଦୁଗ୍ଧ ସମବାୟ ସମିତି ମଧ୍ୟ ଆରମ୍ଭ କରାଯାଉଛି।

କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ କହିଥିଲେ ଯେ ଗତ ବର୍ଷ ଛତିଶଗଡ଼ରେ ସରକାର ଗଠନ ହେବା ପରେ, ଏକ ନକ୍ସଲମୁକ୍ତ ଛତିଶଗଡ଼ ପାଇଁ ସଂକଳ୍ପ ନିଆଯାଇଥିଲା। ସେ କହିଥିଲେ ଯେ ହିଂସା କୌଣସି ଉପାୟ ନୁହେଁ, ବରଂ ଯେଉଁମାନେ ଅସ୍ତ୍ରଶସ୍ତ୍ର ଉଠାଇଛନ୍ତି ସେମାନଙ୍କୁ ମୁଖ୍ୟଧାରାକୁ ଫେରାଇ ଆଣିବା। ସେ କହିଥିଲେ ଯେ ଛତିଶଗଡ଼ ସରକାର ସର୍ବଶ୍ରେଷ୍ଠ ଆତ୍ମସମର୍ପଣ ନୀତି ପ୍ରଣୟନ କରିଛନ୍ତି ଏବଂ ସାରା ଦେଶରେ ଏହାର ଅନୁକରଣ କରି ସମାଜରେ ଅସ୍ତ୍ର ତ୍ୟାଗ କରିଥିବା ଯୁବକମାନଙ୍କ ପୁନର୍ବାସ ପାଇଁ ପ୍ରୟାସ କରାଯିବ।

ଅମିତ ଶାହ ହିଂସାରେ ଲିପ୍ତ ଯୁବକଯୁବତୀମାନଙ୍କୁ ଅସ୍ତ୍ରଶସ୍ତ୍ର ଛାଡି ସମାଜର ମୁଖ୍ୟଧାରାରେ ଯୋଗଦେବାକୁ ନିବେଦନ କରିଥିଲେ। ବସ୍ତର ଅଲିମ୍ପିକ୍ସ ବିଷୟରେ ସେ କହିଥିଲେ ଯେ ବସ୍ତରର ପ୍ରତିଭାବାନ ପିଲାମାନେ ହେଉଛନ୍ତି ଭାରତର ଭବିଷ୍ୟତ। ସେ କହିଥିଲେ ଯେ ୨୦୨୫ରୁ ୨୦୩୬ ଅଲିମ୍ପିକ୍ସ ପର୍ଯ୍ୟନ୍ତ ବସ୍ତରର ପିଲାମାନଙ୍କୁ ପଦକ ଜିତିବାର ଯୋଗ୍ୟ କରିବାର ପ୍ରକ୍ରିୟା ଆରମ୍ଭ କରାଯିବା ଉଚିତ। ଶ୍ରୀ ଶାହ କହିଥିଲେ ଯେ ୨୦୩୬ ଅଲିମ୍ପିକ୍ସରେ ଯେତେବେଳେ ବସ୍ତରର ଜଣେ ଶିଶୁ ପଦକ ଜିତିବ, ସେତେବେଳେ ଏହା ନକ୍ସଲବାଦ ପ୍ରତି ଏକ ଦୃଢ଼ ଉତ୍ତର ହେବ ଏବଂ ସମଗ୍ର ବିଶ୍ୱ ପାଇଁ ଏକ ବାର୍ତ୍ତା ହେବ ଯେ ହିଂସା କୌଣସି ଉଚିତ୍‌ ମାର୍ଗ ନୁହେଁ, ବରଂ ବିକାଶ ହିଁ ସଠିକ ମାର୍ଗ।

କେନ୍ଦ୍ର ସ୍ୱରାଷ୍ଟ୍ର ଏବଂ ସମବାୟ ମନ୍ତ୍ରୀ କହିଥିଲେ ଯେ ବର୍ତ୍ତମାନ ବହୁତ କମ୍ ଅଞ୍ଚଳ ନକ୍ସଲବାଦ ଦ୍ୱାରା ପ୍ରଭାବିତ । ଯେଉଁମାନେ ହିଂସାରେ ଲିପ୍ତ ଅଛନ୍ତି ସେମାନେ ମଧ୍ୟ ଆମର ନିଜ ଲୋକ। ସେ କହିଥିଲେ ଯେ ରାଜ୍ୟର ନାଗରିକମାନେ ବିଦ୍ୟାଳୟ, ଔଷଧ କେନ୍ଦ୍ର, ଡାକ୍ତରଖାନା, ମାଗଣା ଖାଦ୍ୟଶସ୍ୟ, ବିଦ୍ୟୁତ, ଶୌଚାଳୟ, ଜଳ ଆବଶ୍ୟକ କରନ୍ତି ଏବଂ ଆପଣଙ୍କ ଗାଁଗୁଡ଼ିକୁ ଏହି ସମସ୍ତ ସୁବିଧା ପ୍ରଦାନ କରିବା ଛତିଶଗଡ଼ ସରକାରଙ୍କ ଦାୟିତ୍ୱ।

ଶ୍ରୀ ଶାହ କହିଥିଲେ ଯେ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ କେନ୍ଦ୍ର ସରକାରଙ୍କ ସମସ୍ତ କଲ୍ୟାଣକାରୀ ଯୋଜନାରେ ବସ୍ତରକୁ ସର୍ବୋଚ୍ଚ ପ୍ରାଥମିକତା ଦିଆଯାଉଛି। ସେ କହିଥିଲେ ଯେ ଯେଉଁ ଲୋକମାନେ ଅସ୍ତ୍ର ତ୍ୟାଗ କରି ସମାଜର ମୁଖ୍ୟଧାରାକୁ ଆସିଛନ୍ତି, ସେମାନେ ପ୍ରଧାନମନ୍ତ୍ରୀ ମୋଦୀ ଜୀଙ୍କୁ ବିଶ୍ୱାସ କରିଛନ୍ତି । ସେମାନଙ୍କ ବିଶ୍ୱାସ ଭାଙ୍ଗିବ ନାହିଁ ଏବଂ ଏଭଳି ଲୋକଙ୍କୁ ଦେଖି ଅନେକ ଯୁବବର୍ଗ ଅସ୍ତ୍ର ତ୍ୟାଗ କରି ବିକାଶ ଯାତ୍ରାରେ ସାମିଲ ହେବେ।

ନୂଆଦିଲ୍ଲୀ: କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ ଆଜି ଅହମ୍ମଦାବାଦଠାରେ ଗୁଜୁରାଟ ଲୋକସେବା ଟ୍ରଷ୍ଟ ଦ୍ୱାରା ଆୟୋଜିତ ‘ଲୋକ ସେବା ଉତ୍ସବ’ କାର୍ଯ୍ୟକ୍ରମରେ ଉଦ୍‌ବୋଧନ ଦେଇଥିଲେ।

ଅମିତ ଶାହ ତାଙ୍କ ଅଭିଭାଷଣରେ କହିଥିଲେ ଯେ ଆଜି ଗୁଜରାଟ ଲୋକସେବା ଟ୍ରଷ୍ଟ ୩୪ ବର୍ଷ ପୂରଣ କରିଛି ଏବଂ ଏହାର ୩୫ତମ ବର୍ଷରେ ପ୍ରବେଶ କରୁଛି। ସେ କହିଥିଲେ ଯେ ଯେଉଁ ସଂଗଠନ ୩୫ ବର୍ଷ ଧରି ଏକ ଉଦ୍ଦେଶ୍ୟରେ ନିରନ୍ତର ଭାବରେ କାର୍ଯ୍ୟ କରୁଛି ତାହା ପ୍ରଶଂସାର ଯୋଗ୍ୟ।

କେନ୍ଦ୍ର ଗୃହମନ୍ତ୍ରୀ କହିଥିଲେ ଯେ ଜ୍ଞାନ କେବଳ କିଛି ଅକ୍ଷରରେ ଅନ୍ତର୍ଭୁକ୍ତ ଏବଂ ପ୍ରକୃତ ଜ୍ଞାନ ନିଜଠାରୁ ଅନ୍ୟକୁ ପ୍ରଦାନ କରିବା ଏବଂ ନିଜ ଆଗରେ ଅନ୍ୟର କଲ୍ୟାଣକୁ ପ୍ରାଥମିକତା ଦେବାରେ ହିଁ ରହିଛି। ଜନସେବା ଓ କଲ୍ୟାଣ କାର୍ଯ୍ୟରେ ନିୟୋଜିତ ବ୍ୟକ୍ତିମାନେ ବୁଝନ୍ତି ଯେ ଅନ୍ୟମାନଙ୍କ ପାଇଁ କାମ କରିବା ଦ୍ୱାରା ହିଁ ସବୁଠାରୁ ଅଧିକ ଆତ୍ମସନ୍ତୋଷ ମିଳିଥାଏ ବୋଲି ସେ କହିଛନ୍ତି। ଅନ୍ୟର ସେବା କରିବାର ପ୍ରବୃତ୍ତି ହିଁ ବ୍ୟକ୍ତିର ମନ, ଆତ୍ମା ଓ ବୁଦ୍ଧିକୁ ଶାନ୍ତି ଦେଇଥାଏ ବୋଲି ଶ୍ରୀ ଶାହ କହିଛନ୍ତି।

ଅମିତ ଶାହ କହିଥିଲେ ଯେ ଗତ ୩୪ ବର୍ଷ ମଧ୍ୟରେ ଲୋକସେବା ଟ୍ରଷ୍ଟ ଅସହାୟ ଛାତ୍ରଛାତ୍ରୀଙ୍କୁ ସାହାଯ୍ୟ କରିବା, ଭିନ୍ନକ୍ଷମଙ୍କୁ ସାହାଯ୍ୟ ଓ ସହାୟତା କରିବା, ରୋଗୀଙ୍କୁ ଚିକିତ୍ସା ସହାୟତା ଯୋଗାଇବା ଏବଂ ଲୋକଙ୍କୁ ସେମାନଙ୍କ ଘରେ ପହଞ୍ଚି ପ୍ରାୟ ସମସ୍ତ ସରକାରୀ ଯୋଜନା ସହିତ ଯୋଡ଼ିବା ଭଳି କାର୍ଯ୍ୟକ୍ରମ ମାଧ୍ୟମରେ ପାଞ୍ଚ ଲକ୍ଷରୁ ଅଧିକ ହିତାଧିକାରୀଙ୍କ ଜୀବନରେ ପରିବର୍ତ୍ତନ ଆଣିଛି।

କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ କହିଛନ୍ତି ଯେ ଭାରତୀୟ ସମ୍ବିଧାନ ପ୍ରଣୟନ ସମୟରେ ସମ୍ବିଧାନ ସଭାର ସଭାପତି ଡ. ରାଜେନ୍ଦ୍ର ପ୍ରସାଦ କହିଥିଲେ ଯେ ସମ୍ବିଧାନର ମୌଳିକ ଉଦ୍ଦେଶ୍ୟ ଏକ କଲ୍ୟାଣକାରୀ ରାଜ୍ୟ ପ୍ରତିଷ୍ଠା ହେବା ଉଚିତ୍। ଶ୍ରୀ ଶାହ ଗୁରୁତ୍ୱାରୋପ କରି କହିଥିଲେ ଯେ ସମ୍ବିଧାନ ଏକ ମୁଖ୍ୟ ଲକ୍ଷ୍ୟ ଧାର୍ଯ୍ୟ କରିଛି ଯେଉଁଠାରେ ପ୍ରତ୍ୟେକ ବ୍ୟକ୍ତିଙ୍କ କଲ୍ୟାଣ, ସାମଗ୍ରିକ ବିକାଶ ଏବଂ ପ୍ରତ୍ୟେକ ପରିବାର ପାଇଁ ସମ୍ମାନଜନକ ଜୀବନଧାରଣ ସୁନିଶ୍ଚିତ ହେବ।

ଅମିତ ଶାହ କହିଥିଲେ ଯେ ସ୍ୱାଧୀନତା ଠାରୁ ୨୦୧୪ ପର୍ଯ୍ୟନ୍ତ ପ୍ରତ୍ୟେକ ସରକାର ନିଜ କାର୍ଯ୍ୟକାଳ ମଧ୍ୟରେ ନିଜ ସାମର୍ଥ୍ୟ ଅନୁଯାୟୀ କାର୍ଯ୍ୟ କରିଛନ୍ତି। ତେବେ ଶ୍ରୀ ଶାହ କହିଛନ୍ତି ଯେ ୨୦୧୪ ପୂର୍ବରୁ କୌଣସି ସରକାର ନାଗରିକଙ୍କୁ ଦାରିଦ୍ର୍ୟମୁକ୍ତ କରିବା କଥା କହିନଥିଲେ। ସେ କହିଥିଲେ ଯେ ୨୦୧୪ରେ ଭାରତର ଜନସାଧାରଣ ନରେନ୍ଦ୍ର ମୋଦୀଙ୍କୁ ପ୍ରଧାନମନ୍ତ୍ରୀ ଭାବରେ ନିର୍ବାଚିତ କରିଥିଲେ ଏବଂ ମୋଦୀ ଜୀ ପ୍ରତିଶ୍ରୁତି ଦେଇଥିଲେ ଯେ ଦେଶର କୌଣସି ପରିବାର ଜୀବନ ପାଇଁ ଅତ୍ୟାବଶ୍ୟକ ମୌଳିକ ସୁବିଧାରୁ ବଞ୍ଚିତ ହେବେ ନାହିଁ । ସେ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ ପ୍ରତ୍ୟେକ ଘରେ ଶୌଚାଳୟ, ଗ୍ୟାସ ସଂଯୋଗ, ଗରିବଙ୍କ ପାଇଁ ବାସଗୃହ ଏବଂ ମାଗଣା ଖାଦ୍ୟଶସ୍ୟର ବ୍ୟବସ୍ଥା ସୁନିଶ୍ଚିତ କରିଛନ୍ତି। ଏହାବ୍ୟତୀତ ଦେଶର ଲକ୍ଷ ଲକ୍ଷ ଗରିବ ପରିବାର ପାଇଁ ଭାରତ ସରକାର ୫ ଲକ୍ଷ ଟଙ୍କା ପର୍ଯ୍ୟନ୍ତ ସ୍ୱାସ୍ଥ୍ୟ ସେବା ଖର୍ଚ୍ଚ ବହନ କରୁଛନ୍ତି।

ଗୁଜୁରାଟର ଲୋକପ୍ରିୟ ମୁଖ୍ୟମନ୍ତ୍ରୀ ଭାବରେ ଆରମ୍ଭ କରିଥିବା ଏବଂ ବର୍ତ୍ତମାନ ଦେଶର ପ୍ରଧାନମନ୍ତ୍ରୀ ଥିବା ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ୨୦୧୪ରୁ ୨୦୨୪ ମଧ୍ୟରେ ଆମ ସମ୍ବିଧାନର ନିର୍ମାତାମାନେ ପରିକଳ୍ପନା କରିଥିବା ଏକ କଲ୍ୟାଣକାରୀ ରାଷ୍ଟ୍ରର ସ୍ୱପ୍ନ ସାକାର ହୋଇଛି ବୋଲି କେନ୍ଦ୍ର ଗୃହମନ୍ତ୍ରୀ ଏବଂ ସମବାୟ ମନ୍ତ୍ରୀ କହିଛନ୍ତି। ସେ କହିଛନ୍ତି ଯେ ମୋଦୀ ଜୀ ସମଗ୍ର ଦେଶରେ ଲକ୍ଷ ଲକ୍ଷ ଲୋକଙ୍କ ପାଇଁ ମୌଳିକ ସୁବିଧାର ବ୍ୟବସ୍ଥା ସୁନିଶ୍ଚିତ କରିଛନ୍ତି । ଗରିବଙ୍କ କଲ୍ୟାଣ କୋଟି କୋଟି ଗରିବ ନାଗରିକଙ୍କ ପାଖରେ ନପହଞ୍ଚିବା ପର୍ଯ୍ୟନ୍ତ ଦେଶର ବିକାଶ ସମ୍ଭବ ନୁହେଁ ବୋଲି ଶ୍ରୀ ଶାହ ଗୁରୁତ୍ୱାରୋପ କରିଥିଲେ।

ଅମିତ ଶାହ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ ଗରିବ କଲ୍ୟାଣର  ମନ୍ତ୍ର ଚିହ୍ନଟ କରିଥିଲେ ଏବଂ ଏହାକୁ ସମାଜର ତୃଣମୂଳ ସ୍ତରରେ କାର୍ଯ୍ୟକାରୀ କରିଥିଲେ। ସେଥିପାଇଁ ଆଜି ଦେଶରେ ୨୫ କୋଟି ଲୋକ ଦାରିଦ୍ର୍ୟ ସୀମାରେଖା ଉପରକୁ ଉଠିଛନ୍ତି। କୌଣସି ସରକାର ଏକାକୀ ଏତେ ବଡ଼ ସଫଳତା ହାସଲ କରିପାରିବେ ନାହିଁ ବୋଲି ସେ କହିଛନ୍ତି। ଏହା ଅନେକ ଟ୍ରଷ୍ଟ, ବ୍ୟକ୍ତିବିଶେଷ ଏବଂ ସେବା ଭିତ୍ତିକ ଅନୁଷ୍ଠାନର ସାମୂହିକ ପ୍ରୟାସ ଦ୍ୱାରା ସମ୍ଭବ ହୋଇପାରିଛି।

କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ଗୁଜରାଟରେ ବିଭିନ୍ନ ପ୍ରକାର ଶିକ୍ଷାନୁଷ୍ଠାନ ଏବଂ ଗୁରୁକୁଳ କାର୍ଯ୍ୟ କରୁଛି। ସେ କହିଛନ୍ତି ଯେ ଗୁଜରାଟରେ ସାରା ଦେଶରେ ରାଜ୍ୟର ଜନସଂଖ୍ୟା ତୁଳନାରେ ଚାରିଟେବଲ୍ ଟ୍ରଷ୍ଟ ପରିଚାଳିତ ଡାକ୍ତରଖାନାରେ ବ୍ୟକ୍ତି ପିଛା ଡାକ୍ତରଖାନା ଶଯ୍ୟା ଅନୁପାତ ସର୍ବାଧିକ ରହିଛି। ଏହାବ୍ୟତୀତ ଜନସଂଖ୍ୟା ଅନୁପାତରେ ରକ୍ତଦାନ, ଚକ୍ଷୁଦାନ ଓ ଅଙ୍ଗଦାନ କ୍ଷେତ୍ରରେ ଗୁଜରାଟ ଦେଶରେ ଆଗରେ ରହିଛି। ଶ୍ରୀ ଶାହ କହିଥିଲେ ଯେ ଗୁଜରାଟର ମୌଳିକ ମୂଲ୍ୟବୋଧ ଏବଂ ନୀତି ମହାତ୍ମା ଗାନ୍ଧୀଙ୍କ ଶିକ୍ଷା ଏବଂ ନୀତିକୁ ସ୍ୱାଭାବିକ ଭାବରେ ପ୍ରତିଫଳିତ କରେ।

ନୂଆଦିଲ୍ଲୀ: କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ ଅମିତ ଶାହ ଆଜି ଉତ୍ତରାଖଣ୍ଡର ମସୁରୀସ୍ଥିତ ଲାଲ ବାହାଦୁର ଶାସ୍ତ୍ରୀ ଜାତୀୟ ପ୍ରଶାସିନକ ଏକାଡେମୀ (ଏଲବିଏସଏନଏଏ)ରେ ୯୯ତମ କମନ୍ ଫାଉଣ୍ଡେସନ୍ ପାଠ୍ୟକ୍ରମର ଉଦ୍‌ଯାପନୀ ସମାରୋହରେ ମୁଖ୍ୟ ଅତିଥି ଭାବେ ଯୋଗ ଦେଇଛନ୍ତି।

ଯୁବ ଅଧିକାରୀମାନଙ୍କୁ ଉଦବୋଧନ ଦେଇ ଗୃହମନ୍ତ୍ରୀ କହିଛନ୍ତି ଯେ, ଆଜି ଏକ ବିକଶିତ ଓ ଆତ୍ମନିର୍ଭରଶୀଳ ଭାରତ ଗଠନ କରୁଥିବା ସ୍ଥପତିଙ୍କ ଏକ ଗୋଷ୍ଠୀ ଏଠାରେ ଉପସ୍ଥିତ ଅଛନ୍ତି, ଯେଉଁମାନେ ଅଭ୍ୟାସ, ପରିଶ୍ରମ ଏବଂ ଶକ୍ତିରେ ପରିପୂର୍ଣ୍ଣ। ସେ କହିଥିଲେ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆମ ସମସ୍ତଙ୍କ ପାଇଁ ଏକ ଲକ୍ଷ୍ୟ ଧାର୍ଯ୍ୟ କରିଛନ୍ତି ଯେ, ୨୦୪୭ରେ ଯେତେବେଳେ ଦେଶ ସ୍ୱାଧୀନତାର ଶତବାର୍ଷିକୀ ପାଳନ କରିବ, ସେତେବେଳେ ଭାରତ ବିଶ୍ୱର ପ୍ରତ୍ୟେକ କ୍ଷେତ୍ରରେ ଅଗ୍ରଣୀ ହେବ। ବିକଶିତ ଓ ଆତ୍ମନିର୍ଭର ଭାରତ ଗଠନ ଦିଗରେ ଯୁବ ଅଧିକାରୀମାନେ ଆଗାମୀ ୨୫ ବର୍ଷ ମଧ୍ୟରେ କରିଥିବା କାର୍ଯ୍ୟ ଦେଶର ସ୍ୱାଧୀନତା ପାଇଁ ଲଢ଼ିଥିବା ମହାନ ନେତାଙ୍କ ସ୍ୱପ୍ନକୁ ସାକାର କରିବାରେ ସହାୟକ ହେବ ବୋଲି ଶ୍ରୀ ଶାହ ଉପସ୍ଥିତ ଅଧିକାରୀମାନଙ୍କୁ କହିଥିଲେ। ଦେଶର ୧୪୦ କୋଟି ନାଗରିକ ଏକାଠି ହୋଇ ଏହାକୁ ବାସ୍ତବ ରୂପ ଦେଲେ ହିଁ ଏହି ମିଶନ ସଫଳ ହେବ ବୋଲି ସେ କହିଛନ୍ତି।

କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ କହିଛନ୍ତି ଯେ ଆମକୁ ଏକ ଭାରତ ଗଠନ ପାଇଁ ମିଳିତ ଭାବେ କାର୍ଯ୍ୟ କରିବାକୁ ହେବ ଯେଉଁଠାରେ ପ୍ରତ୍ୟେକ ନାଗରିକ ଆତ୍ମସମ୍ମାନ ଏବଂ ସମସ୍ତ ଆବଶ୍ୟକ ସୁବିଧା ସହିତ ପରବର୍ତ୍ତୀ ପିଢ଼ିର ନେତୃତ୍ୱ ନେଇପାରିବେ। ଭାରତକୁ ସବୁ କ୍ଷେତ୍ରରେ ଏକ ନମ୍ବର କରିବା ଦ୍ୱାରା ବିକଶିତ ଭାରତର ସ୍ୱପ୍ନ ପୂରଣ ହେବ ନାହିଁ ବୋଲି ସେ କହିଥିଲେ। ଏହି ସ୍ୱପ୍ନ ସେତେବେଳେ ସାକାର ହେବ ଯେତେବେଳେ ୧୪୦ କୋଟି ଲୋକ ପୂର୍ଣ୍ଣ ଶକ୍ତି ଏବଂ ସମାନ ସୁଯୋଗ ସହିତ ଆଗକୁ ବଢ଼ିବେ।

ଅମିତ ଶାହା କହିଥିଲେ ଯେ, ପ୍ରଶାସନିକ ସେବାରେ ନିଜ ପରିବର୍ତ୍ତେ ଅନ୍ୟମାନଙ୍କ ପାଇଁ ଚିନ୍ତା କରିବା ଠାରୁ ବଡ଼ ମନ୍ତ୍ର ଆଉ କିଛି ନାହିଁ। ସାର୍ବଜନୀନ ଜୀବନରେ ପ୍ରବେଶ କରିବା ପରେ ଅଧିକାରୀମାନେ ଲୋକଙ୍କ ଜୀବନରେ ଉନ୍ନତି ଆଣିବା ଦିଗରେ ଧ୍ୟାନ ଦେବା ଉଚିତ ବୋଲି ସେ ଉଲ୍ଲେଖ କରିଛନ୍ତି। ଜିଲ୍ଲାପାଳ ଭାବରେ କାର୍ଯ୍ୟ କରିବା ସମୟରେ ଅଧିକାରୀମାନେ ଏଆଇ (ଆର୍ଟିଫିସିଆଲ ଇଣ୍ଟେଲିଜେନ୍ସ) ଏବଂ ଡାଟାର ସର୍ବାଧିକ ବ୍ୟବହାର କରିବା ଉଚିତ, ଯାହା ସେମାନଙ୍କ ନିଷ୍ପତ୍ତିକୁ ଅଧିକ ପ୍ରଭାବଶାଳୀ ଏବଂ ସଠିକ୍ କରିବ ବୋଲି ସେ ଗୁରୁତ୍ୱାରୋପ କରିଥିଲେ।

ସେ କହିଥିଲେ ଯେ ବିକାଶ ପରିସଂଖ୍ୟାନରୁ ନୁହେଁ ବରଂ ଫଳାଫଳରୁ ଆସିଥାଏ।ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ‘ସମ୍ପୂର୍ଣ୍ଣ ସରକାର ଆଭିମୁଖ୍ୟ’ ବିଷୟରେ ଉଲ୍ଲେଖ କରି ଶ୍ରୀ ଶାହ କହିଥିଲେ ଯେ କୌଣସି କାର୍ଯ୍ୟକଳାପ ଅଲଗା ହୋଇ ଫଳପ୍ରଦ ହୋଇପାରିବ ନାହିଁ ଏବଂ ଏହି ଆଭିମୁଖ୍ୟ ସହିତ କାର୍ଯ୍ୟ କରିବା ଦ୍ୱାରା ହିଁ ସଫଳତା ହାସଲ କରାଯାଇପାରିବ। ସେ ଆହୁରି ମଧ୍ୟ କହିଛନ୍ତି ଯେ ଆମକୁ ‘ସମ୍ପୂର୍ଣ୍ଣ ସରକାରୀ ଆଭିମୁଖ୍ୟ’ ସହିତ ସାମାଜିକ ସୌହାର୍ଦ୍ଦ୍ୟ ଦିଗରେ ମଧ୍ୟ କାର୍ଯ୍ୟ କରିବାକୁ ହେବ, କାରଣ ପ୍ରତ୍ୟେକ ବ୍ୟକ୍ତି ସମାନ ସୁଯୋଗ ନ ପାଇଲେ ଦେଶ ବିକାଶ ପଥରେ ଅଗ୍ରଗତି କରିପାରିବ ନାହିଁ।

କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ଏଠାରେ ଉପସ୍ଥିତ ଥିବା ମନୋନିତ ପ୍ରଶାସନିକ ସେବା ଅଧିକାରୀଙ୍କ ମଧ୍ୟରୁ ୩୮% ହେଉଛନ୍ତି ମହିଳା। ସେ କହିଛନ୍ତି ଯେ ଯେ ପର୍ଯ୍ୟନ୍ତ ଦେଶର ୫୦ ପ୍ରତିଶତ ଜନସଂଖ୍ୟା ନୀତି ସମ୍ବନ୍ଧୀୟ ନିଷ୍ପତ୍ତି ନେବାରେ ସାମିଲ ନ ହେବେ, ସେ ପର୍ଯ୍ୟନ୍ତ ପ୍ରଧାନମନ୍ତ୍ରୀ ମୋଦୀ ଦେଇଥିବା ‘ମହିଳା ନେତୃତ୍ୱାଧୀନ ବିକାଶ’ର ଧାରଣା ପୂରଣ ହେବ ନାହିଁ। ନୀତି ପ୍ରଣୟନ କରିବା ସରକାରଙ୍କ ଦାୟିତ୍ୱ ହୋଇଥିବା ବେଳେ ଏହାକୁ କାର୍ଯ୍ୟକାରୀ କରିବା ଅଧିକାରୀଙ୍କ ଦାୟିତ୍ୱ ବୋଲି ଶ୍ରୀ ଶାହ ଗୁରୁତ୍ୱାରୋପ କରିଥିଲେ। ସେ କହିଛନ୍ତି, କାର୍ଯ୍ୟକାରିତା ଭାବନା ବିନା ନୀତି କାର୍ଯ୍ୟକାରୀ କରିବା ସମ୍ଭବ ନୁହେଁ। ନୀତିଗୁଡ଼ିକ ଯେପରି ସଠିକ ଭାବରେ ଏବଂ ସମ୍ବେଦନଶୀଳତାର ସହ ସଠିକ୍ ଦିଗରେ କାର୍ଯ୍ୟକାରୀ ହୁଏ ତାହା ସୁନିଶ୍ଚିତ କରିବା ସେମାନଙ୍କ ଦାୟିତ୍ୱ ବୋଲି ସେ ଅଧିକାରୀମାନଙ୍କୁ ପରାମର୍ଶ ଦେଇଥିଲେ।

ଅମିତ ଶାହ କହିଛନ୍ତି ଯେ, ଅଧିକାରୀଙ୍କ କାମ ହେଉଛି ସରକାରଙ୍କୁ ପ୍ରତିକ୍ରିୟାଶୀଳ ନୁହେଁ, ବରଂ ସକ୍ରିୟ କରିବା। ବିକାଶ ଯେପରି ଶେଷ ଲୋକଙ୍କ ପାଖରେ ପହଞ୍ଚିବ ଏବଂ ପ୍ରତ୍ୟେକ ଘରେ ଶୌଚାଳୟ, ବିଜୁଳି ଓ ଅନ୍ୟାନ୍ୟ ଅତ୍ୟାବଶ୍ୟକ ସେବା ଉପଲବ୍ଧ ହେବ ତାହା ସୁନିଶ୍ଚିତ କରିବା ଅଧିକାରୀଙ୍କ ଦାୟିତ୍ୱ ବୋଲି ସେ ଗୁରୁତ୍ୱାରୋପ କରିଥିଲେ। ଶ୍ରୀ ଶାହ କହିଥିଲେ ଯେ, ଯେଉଁମାନେ ଶେଷ ନିଶ୍ୱାସ ପର୍ଯ୍ୟନ୍ତ ଛାତ୍ର ଭାବରେ ଶିଖିବାର ଭାବନା ବଜାୟ ରଖିବେ ସେମାନେ ହିଁ ପ୍ରକୃତରେ ପ୍ରଗତି ହାସଲ କରିପାରିବେ।

କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ କହିଛନ୍ତି ଯେ ଅନେକ ବିଶିଷ୍ଟ ଅର୍ଥନୀତିଜ୍ଞ ବିଶ୍ୱାସ କରୁଥିଲେ ଯେ ଜିଏସଟି ଭାରତରେ ସଫଳ ହେବ ନାହିଁ, କିନ୍ତୁ ଆଜି ଜିଏସଟି ଆମ ଦେଶର ଆର୍ଥିକ ଅଭିବୃଦ୍ଧିର ମୂଳଦୁଆ ପାଲଟିଛି। ଆଗାମୀ ଦିନରେ ମେକ୍ ଇନ୍ ଇଣ୍ଡିଆ ଦେଶ ପାଇଁ ଗର୍ବର ଉତ୍ସ ପାଲଟିବ, କାରଣ ଭାରତ ବିଶ୍ୱ ସ୍ତରୀୟ ଉତ୍ପାଦନ କ୍ଷେତ୍ର ସହ ଜଡ଼ିତ ଲୋକଙ୍କ ପାଇଁ ଏକ ହବ୍ ରେ ପରିଣତ ହୋଇଛି। ଶ୍ରୀ ଶାହ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ ଗତ ୧୦ ବର୍ଷ ମଧ୍ୟରେ ମୋଦୀ ସରକାର ଭାରତରେ ୨୫ କୋଟି ଲୋକଙ୍କୁ ଦାରିଦ୍ର୍ୟରୁ ମୁକ୍ତି ପ୍ରଦାନ କରିଛନ୍ତି।

ଅମିତ ଶାହ କହିଛନ୍ତି ଯେ ନରେନ୍ଦ୍ର ମୋଦୀ ସରକାର ଆଣିଥିବା ନୂତନ ଶିକ୍ଷା ନୀତି ଭାରତର ଯୁବକମାନଙ୍କୁ ବିଶ୍ୱର ଯୁବକମାନଙ୍କ ସହ ପ୍ରତିଦ୍ୱନ୍ଦ୍ୱିତା କରିବା ପାଇଁ ଏକ ମଞ୍ଚ ପ୍ରଦାନ କରିବ। ମାତୃଭାଷାରେ ପ୍ରାଥମିକ ଶିକ୍ଷା ସୁନିଶ୍ଚିତ କରିବା ଦ୍ୱାରା ପିଲାଙ୍କ ବୁଝିବା ଓ ଯୁକ୍ତି କରିବାର କ୍ଷମତା ବୃଦ୍ଧି ପାଇଥାଏ ବୋଲି ସେ ଉଲ୍ଲେଖ କରିଥିଲେ। ସେ କହିଛନ୍ତି ଯେ ଆପଣ ଯେକୌଣସି ଜିଲ୍ଲାକୁ ଯାଆନ୍ତୁ, ଏଆଇ ସହାୟତାରେ ଆଇସୋଲେଟେଡ୍ ଡାଟାକୁ ଏକାଠି କରିବାକୁ ଚେଷ୍ଟା କରିବା ଉଚିତ୍। ଆପଣଙ୍କର ଛୋଟ ଛୋଟ ପରୀକ୍ଷଣ ଦେଶକୁ ଆଗକୁ ନେବାରେ ଉପଯୋଗୀ ହେବ।

ସେ କହିଛନ୍ତି ଯେ, ଆପଣ ଯେକୌଣସି ଜିଲ୍ଲାକୁ ଯେଉଁଠି ବି ଯାଆନ୍ତୁ, ଏଆଇ ସହାୟତାରେ ଭିନ୍ନ ଭିନ୍ନ ତଥ୍ୟକୁ ଏକାଠି କରିବା ପାଇଁ କାମ କରିବା ଉଚିତ। ଆପଣଙ୍କର ଏହି ଛୋଟ ଛୋଟ ପରୀକ୍ଷଣ ଦେଶକୁ ଆଗକୁ ନେବାରେ ସହାୟକ ହେବ।

କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ଜମ୍ମୁ-କଶ୍ମୀରରେ ଆତଙ୍କବାଦ, ବାମପନ୍ଥୀ ଉଗ୍ରବାଦ (ଏଲଡବ୍ଲୁଇ), ଉତ୍ତରପୂର୍ବରେ ବିଦ୍ରୋହ ଏବଂ ନିଶା ଦ୍ରବ୍ୟ କାରବାର ଆମ ଦେଶ ପାଇଁ ଚାରୋଟି ପ୍ରମୁଖ ଆହ୍ୱାନ। ସେ କହିଛନ୍ତି ଯେ ମୋଦୀ ସରକାରଙ୍କ ଦୃଢ଼ ନୀତି ଯୋଗୁଁ ଗତ ୧୦ ବର୍ଷ ମଧ୍ୟରେ ଏହି ଚାରିଟି କ୍ଷେତ୍ରରେ ଉଲ୍ଲେଖନୀୟ ସଫଳତା ହାସଲ ହୋଇଛି। ୨୦୨୬ ମାର୍ଚ୍ଚ ୩୧ ସୁଦ୍ଧା ବାମପନ୍ଥୀ ଉଗ୍ରବାଦକୁ ସମ୍ପୂର୍ଣ୍ଣ ରୂପେ ଉଚ୍ଛେଦ କରାଯିବ ବୋଲି ସେ ଦୋହରାଇଛନ୍ତି।

ଅମିତ ଶାହ କହିଥିଲେ ଯେ ଯେପର୍ଯ୍ୟନ୍ତ ଆମେ ସ୍ୱାଧୀନ ଭାରତର ସ୍ୱାଧୀନ ନାଗରିକ ହେବାର ଆତ୍ମବିଶ୍ୱାସ ହାସଲ ନକରିବା ଏବଂ ଆମ ଇତିହାସ ଓ ପରମ୍ପରା ପାଇଁ ଗର୍ବ ଅନୁଭବ କରିବା ନାହିଁ, ସେପର୍ଯ୍ୟନ୍ତ ଆମେ ଭାରତକୁ ମହାନ କରିପାରିବା ନାହିଁ। ସେ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ “ବିକାଶ ବି, ଐତିହ ବି” (ଐତିହ୍ୟ ସହିତ ବିକାଶ) ନାମକ ଏକ ନୂତନ ସ୍ଲୋଗାନ ଦେଇଛନ୍ତି, ଯେଉଁଥିପାଇଁ ସମସ୍ତେ ଗର୍ବର ସହ ନିଜ ଖାଦ୍ୟ, ପୋଷାକ ଏବଂ ସଂସ୍କୃତିକୁ ଗ୍ରହଣ କରିବା ଏବଂ ଅନୁସରଣ କରିବା ଉଚିତ୍।

କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ କହିଛନ୍ତି ଯେ ମୋଦୀ ସରକାର ଇଂରେଜମାନଙ୍କ ଦ୍ୱାରା ପ୍ରଣୟନ କରାଯାଇଥିବା ୧୫୦ ବର୍ଷ ପୁରୁଣା ଆଇନକୁ ବଦଳାଇବା ପାଇଁ ତିନୋଟି ନୂତନ ଅପରାଧିକ ଆଇନ ପ୍ରଣୟନ କରିଛନ୍ତି। ଏହି ତିନୋଟି ନୂଆ ଆଇନ ସମଗ୍ର ଦେଶରେ ସମ୍ପୂର୍ଣ୍ଣ ରୂପେ କାର୍ଯ୍ୟକାରୀ ହେବା ପରେ ଦେଶର ଯେକୌଣସି ସ୍ଥାନରେ ଏଫଆଇଆର ପଞ୍ଜୀକୃତ ହେଉଥିବା ମାମଲାରେ ୩ ବର୍ଷ ମଧ୍ୟରେ ସୁପ୍ରିମକୋର୍ଟ ନ୍ୟାୟ ପ୍ରଦାନ କରିବେ। ଏହି ଆଇନଗୁଡ଼ିକରେ ଟେକ୍ନୋଲୋଜିର ବ୍ୟବହାର ଦ୍ୱାରା ଆସନ୍ତା ୧୦ ବର୍ଷ ମଧ୍ୟରେ ଦୋଷୀ ସାବ୍ୟସ୍ତ ହାର ୯୦% ରେ ପହଞ୍ଚିବ ଏବଂ ଆମର ନ୍ୟାୟ ବ୍ୟବସ୍ଥା ବିଶ୍ୱର ସବୁଠାରୁ ଆଧୁନିକ ହେବ ବୋଲି ଆଶା କରାଯାଉଛି ବୋଲି ସେ କହିଛନ୍ତି।

ଶ୍ରୀ ଅମିତ ଶାହ କହିଛନ୍ତି ଯେ ଚିନ୍ତା ପରିବର୍ତ୍ତେ ବିଚାର ବିମର୍ଶ ଓ ଆଲୋଚନା ଦ୍ୱାରା ଏବଂ ଦୁଃଖ ପରିବର୍ତ୍ତେ ବ୍ୟବସ୍ଥା ସୃଷ୍ଟି କରି ଯେ କୌଣସି ସମସ୍ୟାର ସମାଧାନ କରାଯାଇପାରିବ। ସେ କହିଥିଲେ ଯେ ଚିନ୍ତା ଆମର ଚିନ୍ତନ କରିବାର କ୍ଷମତାକୁ ହ୍ରାସ କରିଥାଏ, ସେଥିପାଇଁ ଯୋଗ ଏବଂ ଧ୍ୟାନକୁ ଦୈନନ୍ଦିନ କାର୍ଯ୍ୟରେ ସାମିଲ୍  କରିବା ଉଚିତ୍। କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ କହିଛନ୍ତି ଯେ ସମସ୍ୟାର ସମାଧାନ ପାଇଁ ଏକ ରୋଡମ୍ୟାପ୍ ପ୍ରସ୍ତୁତ କରିବା, ମାଇକ୍ରୋ ପ୍ଲାନିଂ କରିବା, ଏହାକୁ କାର୍ଯ୍ୟକାରୀ ତଥା ମଧ୍ୟବର୍ତ୍ତୀ ସମୀକ୍ଷା କରିବା ଏବଂ ନିରନ୍ତର ଫଲୋଅପ୍ ସୁନିଶ୍ଚିତ କରିବା ଜରୁରୀ।

ନୂଆଦିଲ୍ଲୀ: କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହାଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ କମିଟି ବିଭିନ୍ନ ରାଜ୍ୟ ପାଇଁ ବିପର୍ଯ୍ୟୟ ପ୍ରଶମନ ଏବଂ ଦକ୍ଷତା ବିକାଶ ପ୍ରକଳ୍ପ ପାଇଁ ୧୧୧୫.୬୭ କୋଟି ଟଙ୍କା ମଞ୍ଜୁର କରିଛି। ଅର୍ଥମନ୍ତ୍ରୀ, କୃଷି ମନ୍ତ୍ରୀ ଏବଂ ନୀତି ଆୟୋଗର ଉପାଧ୍ୟକ୍ଷଙ୍କୁ ନେଇ ଗଠିତ ଏହି କମିଟି ଜାତୀୟ ବିପର୍ଯ୍ୟୟ ପ୍ରଶମନ ପାଣ୍ଠି (ଏନଡିଏମଏଫ)ରୁ ପାଣ୍ଠି ଯୋଗାଣ ପାଇଁ ୧୫ଟି ରାଜ୍ୟରେ ଭୂସ୍ଖଳନ ବିପଦ ହ୍ରାସ କରିବା ଏବଂ ଜାତୀୟ ବିପର୍ଯ୍ୟୟ ମୁକାବିଲା ପାଣ୍ଠି (ଏନଡିଆରଏଫ)ର ମଧ୍ୟରୁ ପ୍ରସ୍ତୁତି ଏବଂ ଦକ୍ଷତା ବୃଦ୍ଧି ଅଧୀନରେ ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳରେ ବେସାମରିକ ପ୍ରତିରକ୍ଷା ସ୍ୱେଚ୍ଛାସେବୀମାନଙ୍କୁ ପ୍ରଶିକ୍ଷଣ ଏବଂ ଦକ୍ଷତା ବୃଦ୍ଧି ପାଇଁ ଅନ୍ୟ ଏକ ପ୍ରସ୍ତାବ ଉପରେ ବିଚାର କରିଥିଲା।

ଉଚ୍ଚସ୍ତରୀୟ କମିଟି ମୋଟ ୧୦ କୋଟି ଟଙ୍କା ବ୍ୟୟରେ ୧୫ଟି ରାଜ୍ୟ (ଅରୁଣାଚଳ ପ୍ରଦେଶ, ଆସାମ, ହିମାଚଳ ପ୍ରଦେଶ, ମଣିପୁର, ମେଘାଳୟ, ମିଜୋରାମ, ନାଗାଲାଣ୍ଡ, ସିକିମ, ତ୍ରିପୁରା, ଉତ୍ତରାଖଣ୍ଡ, କର୍ଣ୍ଣାଟକ, କେରଳ, ମହାରାଷ୍ଟ୍ର, ତାମିଲନାଡୁ, ପଶ୍ଚିମବଙ୍ଗ)ରେ ଜାତୀୟ ଭୂସ୍ଖଳନ ବିପଦ ପ୍ରଶମନ ପ୍ରକଳ୍ପକୁ ଅନୁମୋଦନ କରିଛି। ଏହି କମିଟି ଉତ୍ତରାଖଣ୍ଡ ପାଇଁ ୧୩୯ କୋଟି ଟଙ୍କା, ହିମାଚଳ ପ୍ରଦେଶ ପାଇଁ ୧୩୯ କୋଟି ଟଙ୍କା, ୮ଟି ଉତ୍ତର ପୂର୍ବ ରାଜ୍ୟ ପାଇଁ ୩୭୮ କୋଟି ଟଙ୍କା, ମହାରାଷ୍ଟ୍ର ପାଇଁ ୧୦୦ କୋଟି ଟଙ୍କା, କର୍ଣ୍ଣାଟକ ପାଇଁ ୭୨ କୋଟି ଟଙ୍କା, କେରଳ ପାଇଁ ୭୨ କୋଟି ଟଙ୍କା, ତାମିଲନାଡୁ ପାଇଁ ୫୦ କୋଟି ଟଙ୍କା ଏବଂ ପଶ୍ଚିମବଙ୍ଗ ପାଇଁ ୫୦ କୋଟି ଟଙ୍କା ମଞ୍ଜୁର କରିଛି।

ସମସ୍ତ ରାଜ୍ୟ/କେନ୍ଦ୍ରଶାସିତ ଅଞ୍ଚଳରେ ମୋଟ ୧୧୫.୬୭ କୋଟି ଟଙ୍କା ବ୍ୟୟ ଅଟକଳରେ ବେସାମରିକ ପ୍ରତିରକ୍ଷା ପ୍ରଶିକ୍ଷଣ ଏବଂ ଦକ୍ଷତା ବିକାଶ ପାଇଁ ଅନ୍ୟ ଏକ ପ୍ରକଳ୍ପକୁ ମଧ୍ୟ ଏଚଏଲସି ଅନୁମୋଦନ କରିଛି। ଏହା ପୂର୍ବରୁ କମିଟି ଏନଡିଏମ୍ଏଫ୍ ରୁ ମୋଟ ୧୫୦ କୋଟି ଟଙ୍କା ବ୍ୟୟ ଅଟକଳରେ ୭ଟି ସହରରେ ସହରାଞ୍ଚଳ ବନ୍ୟା ବିପଦ ପ୍ରଶମନ ପ୍ରକଳ୍ପ ଏବଂ ୪ଟି ରାଜ୍ୟରେ ଜିଏଲ୍ଓଏଫ୍ ବିପଦ ପରିଚାଳନାକୁ ଅନୁମୋଦନ କରିଥିଲା।

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ବିପର୍ଯ୍ୟୟ ପ୍ରଶମନକ୍ଷମ ଭାରତର ସ୍ୱପ୍ନକୁ ସାକାର କରିବା ପାଇଁ ଗୃହମନ୍ତ୍ରୀ ଶ୍ରୀ ଅମିତ ଶାହଙ୍କ ମାର୍ଗଦର୍ଶନରେ ଗୃହ ମନ୍ତ୍ରଣାଳୟ ଦେଶରେ ବିପର୍ଯ୍ୟୟର ପ୍ରଭାବଶାଳୀ ପରିଚାଳନା ସୁନିଶ୍ଚିତ କରିବା ପାଇଁ ଅନେକ ପଦକ୍ଷେପ ଗ୍ରହଣ କରିଛି । ଭାରତରେ ବିପର୍ଯ୍ୟୟ ବିପଦ ହ୍ରାସ ବ୍ୟବସ୍ଥାକୁ ସୁଦୃଢ଼ କରି ବିପର୍ଯ୍ୟୟ ସମୟରେ ବ୍ୟାପକ ଧନଜୀବନ ହାନିକୁ ରୋକିବା ପାଇଁ ଅନେକ ପଦକ୍ଷେପ ନିଆଯାଇଛି।

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଏବଂ କେନ୍ଦ୍ର ଗୃହମନ୍ତ୍ରୀ ଶ୍ରୀ ଅମିତ ଶାହାଙ୍କ ମାର୍ଗଦର୍ଶନରେ ଚଳିତ ବର୍ଷ ରାଜ୍ୟଗୁଡ଼ିକୁ ୨୧,୪୭୬ କୋଟି ରୁ ଅଧିକ ଟଙ୍କା ପ୍ରଦାନ କରାଯାଇଛି । ଏଥିରେ ୨୬ଟି ରାଜ୍ୟକୁ ରାଜ୍ୟ ବିପର୍ଯ୍ୟୟ ମୁକାବିଲା ପାଣ୍ଠି (ଏସଡିଆରଏଫ)ରୁ ୧୪,୮୭୮.୪୦ କୋଟି ଟଙ୍କା, ଜାତୀୟ ବିପର୍ଯ୍ୟୟ ପ୍ରଶମନ ପାଣ୍ଠି (ଏନଡିଆରଏଫ)ରୁ ୧୫ଟି ରାଜ୍ୟକୁ ୪,୬୩୭.୬୬ କୋଟି ଟଙ୍କା, ରାଜ୍ୟ ବିପର୍ଯ୍ୟୟ ପ୍ରଶମନ ପାଣ୍ଠି (ଏସଡିଏମଏଫ)ରୁ ୧୧ଟି ରାଜ୍ୟକୁ ୧,୩୮୫.୪୫ କୋଟି ଟଙ୍କା ଏବଂ ଜାତୀୟ ବିପର୍ଯ୍ୟୟ ପ୍ରଶମନ ପାଣ୍ଠି (ଏନଡିଏମଏଫ)ରୁ ୦୬ଟି ରାଜ୍ୟକୁ ୫୭୪.୯୩ କୋଟି ଟଙ୍କା ରହିଛି।

ନୂଆଦିଲ୍ଲୀ: କେନ୍ଦ୍ର ସ୍ୱରାଷ୍ଟ୍ର ଓ ସମବାୟ ମନ୍ତ୍ରୀ ଅମିତ ଶାହ ଆଜି ନୂଆଦିଲ୍ଲୀଠାରେ ଜାତୀୟ ସମବାୟ ବିକାଶ ନିଗମ (ଏନସିଡିସି)ର ୯୧ତମ ସାଧାରଣ ପରିଷଦ ବୈଠକକୁ ସମ୍ବୋଧିତ କରିଛନ୍ତି।

ନିଜ ସମ୍ବୋଧନରେ କେନ୍ଦ୍ର ସ୍ବରାଷ୍ଟ୍ର ଓ ସମବାୟ ମନ୍ତ୍ରୀ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ କେନ୍ଦ୍ର ସରକାର ସମବାୟ କ୍ଷେତ୍ର ଜରିଆରେ କୋଟି କୋଟି କୃଷକଙ୍କ ଜୀବନରେ ଉନ୍ନତି ଆଣିବା ଲାଗି ପ୍ରତିଶ୍ରୁତିବଦ୍ଧ। ସେ କହିଛନ୍ତି ଯେ ସମବାୟ ଆନ୍ଦୋଳନ ଜରିଆରେ ଦେଶର ନାଗରିକମାନଙ୍କ ଜୀବନରେ ସକାରାତ୍ମକ ପରିବର୍ତ୍ତନ ଆଣିବା ଲାଗି ସରକାର ସଂକଳ୍ପବଦ୍ଧ ଅଛନ୍ତି। ଶ୍ରୀ ଶାହ କହିଛନ୍ତି ଯେ ମୋଦୀ ସରକାର ସମବାୟ ମାଧ୍ୟମରେ ଦେଶକୁ ଆତ୍ମନିର୍ଭରଶୀଳ କରିବା ପାଇଁ କାର୍ଯ୍ୟ କରୁଛନ୍ତି ଏବଂ ଏହି ଦିଗରେ ଏନସିଡିସିର ଗୁରୁତ୍ୱପୂର୍ଣ୍ଣ ଭୂମିକା ରହିଛି।

ସମବାୟ ଆନ୍ଦୋଳନରେ ଏନସିଡିସିର ଯୋଗଦାନକୁ କେନ୍ଦ୍ର ସମବାୟ ମନ୍ତ୍ରୀ ପ୍ରଶଂସା କରିଛନ୍ତି ଏବଂ ଲକ୍ଷ ଲକ୍ଷ ସମବାୟ ସମିତିର ଜୀବନରେ ପରିବର୍ତ୍ତନ ଆଣିବାରେ ଏହାର ଉଲ୍ଲେଖନୀୟ ଭୂମିକା ଉପରେ ଗୁରୁତ୍ୱାରୋପ କରିଛନ୍ତି। ସେ କହିଛନ୍ତି ଯେ ଏନସିଡିସିର ସଫଳତା କେବଳ ଏହାର ଆବଣ୍ଟନ ୬୦ ହଜାର କୋଟି ଟଙ୍କା ଅତିକ୍ରମ କରିବା ଦ୍ୱାରା ପ୍ରତିଫଳିତ ହୋଇନାହିଁ, ବରଂ ଗ୍ରାମୀଣ ଅର୍ଥବ୍ୟବସ୍ଥା ଏବଂ ସମବାୟ କ୍ଷେତ୍ର ଉପରେ ସକାରାତ୍ମକ ପ୍ରଭାବ ପକାଇବାର କ୍ଷମତା ଦ୍ୱାରା ମଧ୍ୟ ପ୍ରତିପାଦିତ ହେଉଛି।

ଶ୍ୱେତ ବିପ୍ଳବ-2.0ର ଆବଶ୍ୟକତା ଉପରେ ଗୁରୁତ୍ୱାରୋପ କରି ଅମିତ ଶାହ କହିଛନ୍ତି ଯେ ଉତ୍ତର-ପୂର୍ବ ରାଜ୍ୟଗୁଡ଼ିକରେ ଦୁଗ୍ଧ ସମବାୟ ସମିତିକୁ ପ୍ରୋତ୍ସାହନ ଦେବା ଉପରେ ବିଶେଷ ଧ୍ୟାନ ଦିଆଯିବା ଉଚିତ। ଦୁଗ୍ଧ ଉତ୍ପାଦନ ସଂଘ ପ୍ରତିଷ୍ଠା ପାଇଁ ଏନଡିଡିବି ଏବଂ ଏନସିଡିସି ମଧ୍ୟରେ ସହଯୋଗର ଆବଶ୍ୟକତା ଉପରେ ସେ ଗୁରୁତ୍ୱାରୋପ କରିଥିଲେ। ଶ୍ରୀ ଶାହ କହିଛନ୍ତି ଯେ ଆର୍ଥିକ ସହାୟତା ପ୍ରଦାନ କରିବା ଲାଗି ଏହି ସଂଗଠନଗୁଡ଼ିକ ମିଳିତ ଭାବେ କାର୍ଯ୍ୟ କରିବା ଉଚିତ, ଯେଉଁଥିରେ ଦୁଗ୍ଧ ଉତ୍ପାଦନର ପ୍ରାରମ୍ଭିକ ପର୍ଯ୍ୟାୟକୁ ଏନଡିଡିବି ଦ୍ୱାରା ତଦାରଖ କରାଯିବା ଆବଶ୍ୟକ। ସେ କହିଛନ୍ତି ଯେ ଏହି ପଦକ୍ଷେପ କେବଳ ଶ୍ୱେତ ବିପ୍ଳବକୁ ଆଗେଇ ନେବ ନାହିଁ, ବରଂ ଆଦିବାସୀ ସମ୍ପ୍ରଦାୟ ଏବଂ ମହିଳାମାନଙ୍କୁ ସଶକ୍ତ କରିବାରେ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ।

କେନ୍ଦ୍ର ସ୍ୱରାଷ୍ଟ୍ର ଏବଂ ସମବାୟ ମନ୍ତ୍ରୀ ଅମିତ ଶାହ କହିଛନ୍ତି ଯେ ଗୋଟିଏ ଆପ୍ ଆଧାରିତ କ୍ୟାବ୍ ସମବାୟ ସମିତି ସେବା ପ୍ରତିଷ୍ଠା କରାଯିବା ଉଚିତ ଯାହାଦ୍ୱାରା ଏହାର ଲାଭ ସିଧାସଳଖ ଡ୍ରାଇଭରମାନଙ୍କ ନିକଟରେ ପହଞ୍ଚିପାରିବ। ସମବାୟଗୁଡ଼ିକୁ ସମନ୍ୱିତ କରିବାରେ ଜାତୀୟ ସମବାୟ ଡାଟାବେସର ମହତ୍ୱପୂର୍ଣ୍ଣ ଭୂମିକା ଉପରେ ମଧ୍ୟ ସେ ଗୁରୁତ୍ୱାରୋପ କରିଥିଲେ ଏବଂ ପ୍ରାଥମିକ କୃଷି ଋଣ ସମିତି (ପିଏସିଏସ୍) ଗୁଡ଼ିକୁ ସୁଦୃଢ଼ କରିବାର ଆବଶ୍ୟକତା ଉପରେ ଜୋର ଦେଇଥିଲେ । କେନ୍ଦ୍ର ସମବାୟ ମନ୍ତ୍ରୀ କହିଥିଲେ ଯେ ଏହି ପ୍ରୟାସଗୁଡ଼ିକୁ ଆଗକୁ ନେବାରେ ଏନସିଡିସି ଏବଂ ସମବାୟ ମନ୍ତ୍ରଣାଳୟ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ।

ଅମିତ ଶାହ ଚିନି କାରଖାନାଗୁଡ଼ିକର ଆର୍ଥିକ ସାମର୍ଥ୍ୟ ବୃଦ୍ଧି ଉଦ୍ଦେଶ୍ୟରେ ଏକ ବ୍ୟାପକ ପଞ୍ଚବାର୍ଷିକ ଯୋଜନା ପ୍ରସ୍ତୁତ କରିବା ଲାଗି ମଧ୍ୟ ପରାମର୍ଶ ଦେଇଥିଲେ, ଯାହାର ଲକ୍ଷ୍ୟ ହେଉଛି ଏଗୁଡ଼ିକର ପାଣ୍ଠିକୁ ୨୫ ହଜାର କୋଟି ଟଙ୍କାକୁ ବୃଦ୍ଧି କରିବା। ଏହି ପଦକ୍ଷେପ ଚିନି ଶିଳ୍ପର ଅଭିବୃଦ୍ଧି ଓ ସ୍ଥିରତା ବୃଦ୍ଧି କରିବ, ଉନ୍ନତ ଆର୍ଥିକ ସ୍ଥିରତା ସୁନିଶ୍ଚିତ କରିବ ଏବଂ ସ୍ଥାନୀୟ ଅଞ୍ଚଳର ଦୀର୍ଘକାଳୀନ ବିକାଶକୁ ସମର୍ଥନ କରିବ। ଓଡ଼ିଶା, ଆନ୍ଧ୍ର ପ୍ରଦେଶ ଏବଂ କେରଳ ଭଳି ଉପକୂଳବର୍ତ୍ତୀ ରାଜ୍ୟଗୁଡ଼ିକରେ ଗଭୀର ସମୁଦ୍ରରେ ଟ୍ରଲର ଚଳାଚଳ କରିବାର ସମ୍ଭାବନାକୁ ଅନ୍ୱେଷଣ କରିବାକୁ ମଧ୍ୟ ସେ କହିଥିଲେ।

କେନ୍ଦ୍ର ସ୍ୱରାଷ୍ଟ୍ର ଏବଂ ସମବାୟ ମନ୍ତ୍ରୀ କହିଥିଲେ ଯେ ସମବାୟ ମନ୍ତ୍ରଣାଳୟ ଏନସିଡିସିକୁ କାର୍ଯ୍ୟକାରୀ ସଂସ୍ଥା ଭାବେ ନେଇ ସମବାୟ ଇଣ୍ଟର୍ଣ୍ଣ ଯୋଜନାର ଶୁଭାରମ୍ଭ କରିଛି। ଏହି ଯୋଜନାର ଉଦ୍ଦେଶ୍ୟ ହେଉଛି ରାଜ୍ୟ ଏବଂ ଜିଲ୍ଲା ସମବାୟ ବ୍ୟାଙ୍କଗୁଡ଼ିକୁ କେନ୍ଦ୍ର ସରକାରଙ୍କ ଯୋଜନା ସହିତ ଯୋଡ଼ିବା ଏବଂ ପ୍ୟାକ୍ସଗୁଡ଼ିକୁ ସୁଦୃଢ଼ କରିବା। ସମବାୟ ଇଣ୍ଟର୍ଣ୍ଣ ଯୋଜନା ଅଂଶଗ୍ରହଣକାରୀମାନଙ୍କୁ ଅମୂଲ୍ୟ ବ୍ୟବହାରିକ ଅଭିଜ୍ଞତା ହାସଲ କରିବାରେ ସାହାଯ୍ୟ କରିବ। ଏଥିସହିତ ସମବାୟ ସମିତିର ନୀତିକୁ ଆଗକୁ ବଢାଇବା ଏବଂ ଗ୍ରାମୀଣ ସମାଜର ବିକାଶକୁ ସମର୍ଥନ କରିବା ପାଇଁ ସେମାନଙ୍କୁ ପ୍ରସ୍ତୁତ କରିବ। ଅମିତ ଶାହ ସାରା ଦେଶରେ ସମବାୟ କ୍ଷେତ୍ରକୁ ଆହୁରି ସୁଦୃଢ଼ କରିବା ଲାଗି ଏକ ସମବାୟ ବିଶ୍ୱବିଦ୍ୟାଳୟ ପ୍ରତିଷ୍ଠା କରିବା ଲାଗି ଆହ୍ୱାନ କରିଥିଲେ। ଏହାବ୍ୟତୀତ ସମବାୟ ପାଇଁ କ୍ଷମତା ନିର୍ମାଣ କାର୍ଯ୍ୟକ୍ରମର ଗୁରୁତ୍ୱ ଉପରେ ଜୋର ଦେଇଥିଲେ ଯାହା ‘ସମବାୟ ମାଧ୍ୟମରେ ସମୃଦ୍ଧି’ର ଲକ୍ଷ୍ୟକୁ ଆଗକୁ ବଢ଼ାଇବାରେ ସହାୟକ ହେବ।

ନୂଆଦିଲ୍ଲୀ: କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ ଗୁଜରାଟର ସାବରକାଣ୍ଠା ଜିଲ୍ଲାର ହିମ୍ମତନଗରଠାରେ ୮୦୦ ମେଟ୍ରିକ୍ ଟନ୍ ଉତ୍ପାଦନ କ୍ଷମତା ବିଶିଷ୍ଟ ଏକ ଅତ୍ୟାଧୁନିକ ଗୋଖାଦ୍ୟ ପ୍ଲାଣ୍ଟକୁ ଉଦଘାଟନ କରିଛନ୍ତି। ଏହି ଅବସରରେ ଗୁଜରାଟ ବିଧାନସଭାର ବାଚସ୍ପତି ଶଙ୍କର ଚୌଧୁରୀଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ।

ଅମିତ ଶାହ ତାଙ୍କ ଅଭିଭାଷଣରେ ଉଲ୍ଲେଖ କରିଥିଲେ ଯେ ଶାବର ଡାଏରୀ ପ୍ରତିଷ୍ଠା ଆକାରରେ ରୋପଣ କରାଯାଇଥିବା ବୀଜ ଏବେ ବଟବୃକ୍ଷରେ ପରିଣତ ହୋଇଛି, ଯାହା ସାଢେ ତିନି ଲକ୍ଷରୁ ଅଧିକ ପରିବାରକୁ ଜୀବିକା ପ୍ରଦାନ କରୁଛି। ଶ୍ରୀ ଶାହ କହିଛନ୍ତି ଯେ ସେ ଆଜି ପ୍ରାଣୀପାଳନ ସହ ଜଡିତ କିଛି ମହିଳାଙ୍କୁ ମଧ୍ୟ ଭେଟିଥିଲେ, ଯେଉଁମାନେ ତାଙ୍କୁ ଶାବର ଡାଏରୀ ଏବଂ ଏହାର ଦୁଗ୍ଧ ବ୍ୟବସାୟ ଯୋଗୁଁ ସେମାନେ ବର୍ତ୍ତମାନ ସମ୍ମାନର ସହ ବଞ୍ଚିବାରେ ସକ୍ଷମ ହୋଇଛନ୍ତି ବୋଲି କହିଛନ୍ତି।

ଦୁଗ୍ଧ ଉତ୍ପାଦନରେ ଉନ୍ନତ ପ୍ରଦର୍ଶନ କରିବା ପାଇଁ ଆଜି ସମ୍ମାନିତ ହୋଇଥିବା ସମବାୟ ସଂସ୍ଥାଗୁଡ଼ିକ ମଧ୍ୟରେ ଦୁଗ୍ଧ ବ୍ୟବସାୟରୁ ଏକ କୋଟିରୁ ଅଧିକ ଟଙ୍କାର ଚେକ୍ ହାସଲ କରିଥିବା ଦୁଇଟି ସମବାୟ ସଂସ୍ଥା ରହିଥିବା କେନ୍ଦ୍ର ସମବାୟ ମନ୍ତ୍ରୀ କହିଛନ୍ତି। ସମବାୟ ଦୁଗ୍ଧ ଆନ୍ଦୋଳନ କେବଳ ମହିଳାମାନଙ୍କୁ ସଶକ୍ତ କରିନାହିଁ ବରଂ ଗ୍ରାମାଞ୍ଚଳରେ ସମୃଦ୍ଧି ଆଣିଛି ଏବଂ ପୋଷଣ ପ୍ରଦାନ କରିଛି ବୋଲି ସେ ଉଲ୍ଲେଖ କରିଥିଲେ। ଏହି ସଫଳତା ଅମୁଲ ଦ୍ୱାରା ଆରମ୍ଭ ହୋଇଥିବା ଶ୍ୱେତ ବିପ୍ଳବର ପରିଣାମ ବୋଲି ଶ୍ରୀ ଶାହ ଗୁରୁତ୍ୱାରୋପ କରିଥିଲେ।

ଅମିତ ଶାହ କହିଥିଲେ ଯେ ସ୍ଥାନୀୟ ଗୃହପାଳିତ ପ୍ରାଣୀମାନଙ୍କୁ ପୁଷ୍ଟିଯୁକ୍ତ ଖାଦ୍ୟ ଯୋଗାଇବା ପାଇଁ ସାବରକାଣ୍ଠା ଡାଏରୀରେ ୨୧୦ କୋଟି ଟଙ୍କାର ଗୋଖାଦ୍ୟ କାରଖାନା ସ୍ଥାପନ କରାଯାଇଛି। ୧୯୭୬ ମସିହାରେ ପ୍ରତିଷ୍ଠା ହେବା ପରଠାରୁ ସାବରକାଣ୍ଠା ଡାଏରୀ ଏହି ଗୋଖାଦ୍ୟ ପ୍ଲାଣ୍ଟ ଉଦଘାଟନ ପର୍ଯ୍ୟନ୍ତ ୨୦୫୦ ମେଟ୍ରିକ୍ ଟନ୍ ଗୋଖାଦ୍ୟ ଉତ୍ପାଦନ କ୍ଷମତା ହାସଲ କରିପାରିଛି। ୧୯୭୦ ମସିହାରେ ଭାରତ ବର୍ଷକୁ ବ୍ୟକ୍ତି ପିଛା ମାତ୍ର ୪୦ କିଲୋଗ୍ରାମ କ୍ଷୀର ଉତ୍ପାଦନ କରୁଥିବା ବେଳେ ୨୦୨୩ରେ ଦେଶରେ ବର୍ଷକୁ ବ୍ୟକ୍ତି ପିଛା ୧୬୭ କିଲୋ ଗ୍ରାମ କ୍ଷୀର ଉତ୍ପାଦନ ହୋଇଥିଲା।

ଶ୍ରୀ ଶାହ ଗୁରୁତ୍ୱାରୋପ କରି କହିଥିଲେ ଯେ, ଏହାର ଅର୍ଥ ହେଉଛି ସମସ୍ତ ଦେଶ ମଧ୍ୟରେ ଭାରତର ମୁଣ୍ଡପିଛା ଦୁଗ୍ଧ ଉତ୍ପାଦନ ହାରାହାରୀ ସର୍ବାଧିକ ଏବଂ ସମବାୟ ଆନ୍ଦୋଳନ ଏହି ସଫଳତାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି।

ଆଗାମୀ ଦିନରେ ଏହା କୃଷକମାନଙ୍କ ପାଇଁ ସମୃଦ୍ଧିର କାରଣ ହେବା ସହ ଦେଶ ଓ ବିଶ୍ୱର ନାଗରିକମାନଙ୍କୁ କର୍କଟ, ମଧୁମେହ ଓ ଉଚ୍ଚ ରକ୍ତଚାପରୁ ମୁକ୍ତ କରିବା ପାଇଁ ଏହା ଏକ ମାଧ୍ୟମ ଭାବେ କାର୍ଯ୍ୟ କରିବ ବୋଲି କହିବା ସହିତ କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ କୃଷକମାନଙ୍କୁ ପ୍ରାକୃତିକ ଚାଷ କରିବାକୁ ନିବେଦନ କରିଛନ୍ତି। ଜୈବିକ କୃଷି ଅତ୍ୟନ୍ତ ସରଳ ଏବଂ ଏହା ସମାଜର ଉଭୟ ସ୍ୱାସ୍ଥ୍ୟ ଓ ଆୟରେ ଉନ୍ନତି ଆଣିବାରେ ବହୁତ ସହାୟକ ହୋଇପାରିବ ବୋଲି ସେ ଉଲ୍ଲେଖ କରିଥିଲେ। ଜୈବିକ କୃଷି କରୁଥିବା କୃଷକମାନେ ଯେପରି ସେମାନଙ୍କ ଉତ୍ପାଦର ଉତ୍ତମ ମୂଲ୍ୟ ପାଇପାରିବେ ତାହା ସୁନିଶ୍ଚିତ କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜାତୀୟ ସମବାୟ ଜୈବିକ ଲିମିଟେଡ୍ (ଏନସିଓଏଲ୍) ଏବଂ ଜାତୀୟ ସମବାୟ ରପ୍ତାନି ଲିମିଟେଡ୍ (ଏନସିଇଏଲ୍) ପ୍ରତିଷ୍ଠା କରିଛନ୍ତି, ଯାହା କୃଷକମାନଙ୍କ ଠାରୁ ଜୈବିକ ଚାଷ ମାଧ୍ୟମରେ ଉତ୍ପାଦିତ ସାମଗ୍ରୀ କ୍ରୟ କରିବ ଏବଂ ରପ୍ତାନି କରିବ।

ଜୈବିକ କୃଷିର ପ୍ରଥମ ବର୍ଷରେ ଅମଳ ସାମାନ୍ୟ କମ୍ ହୋଇପାରେ, କିନ୍ତୁ ଦ୍ୱିତୀୟ ଓ ତୃତୀୟ ବର୍ଷରେ ଲାଭ ମିଳିବ ବୋଲି ଅମିତ ଶାହ କହିଥିଲେ। ସେ ଉଲ୍ଲେଖ କରିଥିଲେ ଯେ ଜୈବିକ କୃଷି ଜିଆ ମାଧ୍ୟମରେ ମାଟିକୁ ସମୃଦ୍ଧ କରିଥାଏ ଏବଂ ଏଥିପାଇଁ କୀଟନାଶକର ଆବଶ୍ୟକତା ପଡିବ ନାହିଁ। ଗୁଜରାଟରେ ଏହି ପଦ୍ଧତିକୁ ବ୍ୟାପକ ଭାବେ ଗ୍ରହଣ କରାଯାଇଛି ଏବଂ ଦୁଗ୍ଧ କ୍ଷେତ୍ର ଏହାର କାର୍ଯ୍ୟକ୍ରମରେ ଜୈବିକ କୃଷି ଉପରେ ପ୍ରଶିକ୍ଷଣକୁ ଅନ୍ତର୍ଭୁକ୍ତ କରିବା ଉପରେ ସେ ଗୁରୁତ୍ୱାରୋପ କରିଥିଲେ।

କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ ଉଲ୍ଲେଖ କରିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବୃହତ ପ୍ରାଣୀସମ୍ପଦ ଥିବା ଲୋକଙ୍କ ପାଇଁ ଗୋବର୍ଦ୍ଧନ ଯୋଜନାର ଶୁଭାରମ୍ଭ କରିଛନ୍ତି। ଗୁଜରାଟର ଅନେକ ଡାଏରୀ ଗୋବର୍ଦ୍ଧନ ଯୋଜନାକୁ ସଫଳତାର ସହ କାର୍ଯ୍ୟକାରୀ କରିଛନ୍ତି। ଗୋବର୍ଦ୍ଧନ ଯୋଜନା ମାଧ୍ୟମରେ ଉତ୍ପାଦିତ ଖତ ମାଟିକୁ ସମୃଦ୍ଧ କରିଥାଏ ବୋଲି ସେ କହିଛନ୍ତି।

ସେ ଦର୍ଶାଇଥିଲେ ଯେ ଯେତେବେଳେ ଡାଏରୀରୁ ସମବାୟ ଆନ୍ଦୋଳନ ଆରମ୍ଭ ହୋଇଥିଲା, ସେତେବେଳେ କେହି ଭାବି ନଥିଲେ ଯେ ଅମୁଲ ୬୦,୦୦୦ କୋଟି ଟଙ୍କାର ଏକ ବିଶାଳ ନେଟୱର୍କରେ ପରିଣତ ହେବ। ସେ ଆହୁରି ମଧ୍ୟ କହିଛନ୍ତି ଯେ ଜୈବିକ କୃଷି ପଦ୍ଧତି ପ୍ରାରମ୍ଭରେ ବ୍ୟର୍ଥ ମନେ ହେଉଥିଲେ ମଧ୍ୟ ଶେଷରେ ଏହା ଭାରତୀୟ କୃଷକମାନଙ୍କ ପାଇଁ ୧୦ ଲକ୍ଷ କୋଟି ଟଙ୍କାର ବିଶ୍ୱ ବଜାର ଖୋଲିବ ଏବଂ ଦେଶରେ ସମୃଦ୍ଧି ଆଣିବ।

ଅମିତ ଶାହ ଆଜି ଗାନ୍ଧୀନଗରରେ ଫିଲା ଭିଷ୍ଟା-୨୦୨୪ ଡାକ ଟିକଟ ପ୍ରଦର୍ଶନୀକୁ ଉଦଘାଟନ କରିବା ସହ ଏକ ଗୁରୁତ୍ୱପୂର୍ଣ୍ଣ ସାଂସ୍କୃତିକ ଓ ଐତିହାସିକ ସ୍ଥଳ ଦାଣ୍ଡି କୁଟୀର ସଂଗ୍ରହାଳୟରେ ଦାଣ୍ଡି ଯାତ୍ରାର ମହାନ ନେତାମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି।

ଏହାବ୍ୟତୀତ କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ ସାନନ୍ଦରେ ଥିବା ଶେଲା ହ୍ରଦ ଏବଂ ପାର୍କକୁ ଉଦଘାଟନ କରିଛନ୍ତି।

ନୂଆଦିଲ୍ଲୀ: କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ ଅମିତ ଶାହଙ୍କ ଅଧ୍ୟକ୍ଷତାରେ ଉଚ୍ଚସ୍ତରୀୟ ସମିତି ‘‘ରାଜ୍ୟଗୁଡ଼ିକରେ ଅଗ୍ନିଶମ ସେବାର ବିସ୍ତାର ଓ ଆଧୁନିକୀକରଣ’’ ଯୋଜନା ଅଧୀନରେ ଛତିଶଗଡ଼, ଓଡ଼ିଶା ଏବଂ ପଶ୍ଚିମବଙ୍ଗ ପାଇଁ ୭୨୫.୬୨ କୋଟି ଟଙ୍କାର ତିନୋଟି ପ୍ରକଳ୍ପକୁ ମଞ୍ଜୁର କରିଛି। ଏହି ସମିତି ଛତିଶଗଡ଼ ପାଇଁ ୧୪୭.୭୬ କୋଟି ଟଙ୍କା, ଓଡ଼ିଶା ପାଇଁ ୨୦୧.୧୦ କୋଟି ଟଙ୍କା ଏବଂ ପଶ୍ଚିମବଙ୍ଗ ପାଇଁ ୩୭୬.୭୬ କୋଟି ଟଙ୍କା ମଞ୍ଜୁର କରିଛି । ଉଚ୍ଚସ୍ତରୀୟ ସମିତିରେ କେନ୍ଦ୍ର ଅର୍ଥ ମନ୍ତ୍ରୀ, କୃଷି ମନ୍ତ୍ରୀ ଏବଂ ନୀତି ଆୟୋଗର ଉପାଧ୍ୟକ୍ଷ ସଦସ୍ୟ ରୂପେ ସାମିଲ ହୋଇଥାନ୍ତି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିପର୍ଯ୍ୟୟ ପ୍ରଶମନକ୍ଷମ ଭାରତ ନିର୍ମାଣ ଲକ୍ଷ୍ୟକୁ ପୂରଣ କରିବା ଲାଗି ଗୃହ ମନ୍ତ୍ରୀ ଅମିତ ଶାହଙ୍କ ମାର୍ଗଦର୍ଶନରେ ଦେଶରେ ବିପର୍ଯ୍ୟୟର ପ୍ରଭାବୀ ପ୍ରଶମନ ସୁନିଶ୍ଚିତ କରିବା ଲାଗି ସ୍ୱରାଷ୍ଟ୍ର ମନ୍ତ୍ରଣାଳୟ ଅନେକ ପଦକ୍ଷେପ ଗ୍ରହଣ କରିଛି। ଭାରତରେ ବିପର୍ଯ୍ୟୟ ବିପତ୍ତି ହ୍ରାସ ପ୍ରଣାଳୀକୁ ମଜବୁତ କରି ବିପର୍ଯ୍ୟୟ ସମୟରେ ବ୍ୟାପକ ଧନଜୀବନ ହାନିକୁ ରୋକିବା ଲାଗି ଅନେକ ପଦକ୍ଷେପ ଗ୍ରହଣ କରାଯାଇଛି।

କେନ୍ଦ୍ର ସରକାର ‘‘ରାଜ୍ୟଗୁଡ଼ିକରେ ଅଗ୍ନିଶମ ସେବାର ବିସ୍ତାର ଏବଂ ଆଧୁନିକୀକରଣ’’ ଯୋଜନା ଲାଗି ଏନଡିଆରଏଫ ଅଧୀନରେ ୫୦୦୦ କୋଟି ଟଙ୍କା ଆବଣ୍ଟନ କରିଛନ୍ତି। ଏଥିପୂର୍ବରୁ ୧୫ଟି ରାଜ୍ୟ ନିମନ୍ତେ ୨୫୪୨.୧୨ କୋଟି ଟଙ୍କାର ମୋଟ୍ ପରିବ୍ୟୟ ପ୍ରସ୍ତାବକୁ ମଞ୍ଜୁର କରାଯାଇସାରିଛି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱ ଏବଂ କେନ୍ଦ୍ର ଗୃହ ମନ୍ତ୍ରୀ ଶ୍ରୀ ଅମିତ ଶାହଙ୍କ ମାର୍ଗଦର୍ଶନରେ ଚଳିତ ବର୍ଷ ରାଜ୍ୟଗୁଡ଼ିକୁ ୨୧ ହଜାର ୨୬ କୋଟି ଟଙ୍କାର ଅର୍ଥରାଶି ପୂର୍ବରୁ ଆବଣ୍ଟନ କରାଯାଇ ସାରିଛି। ଏଥିରେ ରାଜ୍ୟ ବିପର୍ଯ୍ୟୟ ପ୍ରଶମନ ପାଣ୍ଠି (ଏସଡିଆରଏଫ)ରୁ ୨୬ଟି ରାଜ୍ୟକୁ ୧୪ ହଜାର ୮୭୮ କୋଟି ୪୦ ଲକ୍ଷ ଟଙ୍କା, ଜାତୀୟ ବିପର୍ଯ୍ୟୟ ପ୍ରଶମନ ପାଣ୍ଠି (ଏନଡିଆରଏଫ)ରୁ ୧୫ଟି ରାଜ୍ୟକୁ ୪,୬୩୭ କୋଟି ଟଙ୍କା, ରାଜ୍ୟ ବିପର୍ଯ୍ୟୟ ପରିଚାଳନା ପାଣ୍ଠି (ଏସଡିଏମଏଫ)ରୁ ୧୧ଟି ରାଜ୍ୟକୁ ୧୩୮୫ କୋଟି ୪୫ ଲକ୍ଷ ଟଙ୍କା ଏବଂ ଜାତୀୟ ବିପର୍ଯ୍ୟୟ ପରିଚାଳନା ପାଣ୍ଠି (ଏନଡିଏମଏଫ)ରୁ ତିନୋଟି ରାଜ୍ୟକୁ ୧୨୪ କୋଟି ୯୩ ଲକ୍ଷ ଟଙ୍କା ସାମିଲ ରହିଛି।

ନୂଆଦିଲ୍ଲୀ: ଜାତୀୟ ତଦନ୍ତକାରୀ ଏଜେନ୍ସି (ଏନ୍ଆଇଏ) ପକ୍ଷରୁ ଆୟୋଜିତ ଦୁଇଦିନିଆ ‘ଆତଙ୍କବାଦ ବିରୋଧୀ ସମ୍ମିଳନୀ-୨୦୨୪’ର ଉଦ୍ ଘାଟନୀ ଅଧିବେଶନରେ କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ ଅମିତ ଶାହ ଉଦବୋଧନ ଦେଇଛନ୍ତି। କେନ୍ଦ୍ର ଗୃହମନ୍ତ୍ରୀ ଏନଆଇଏର ନୀତି ଉନ୍ମୋଚନ କରିଥିଲେ, ୟୁଏପିଏ ତଦନ୍ତ ପାଇଁ ଏସଓପି ଜାରି କରିଥିଲେ ଏବଂ ଏନଆଇଏରୁ ୧୧ ଜଣ ପଦକ ବିଜେତାଙ୍କୁ ସମ୍ମାନିତ କରିଥିଲେ।

ଏହି ଅବସରରେ କେନ୍ଦ୍ର ଗୃହ ସଚିବ ଗୋବିନ୍ଦ ମୋହନ, ଗୁଇନ୍ଦା ବ୍ୟୁରୋ (ଆଇବି)ର ନିର୍ଦ୍ଦେଶକ ତପନ କୁମାର ଡେକା, ଉପଜାତୀୟ ସୁରକ୍ଷା ପରାମର୍ଶଦାତା ପଙ୍କଜ ସିଂହ ଏବଂ ଏନଆଇଏ ମହାନିର୍ଦ୍ଦେଶକ ସଦାନନ୍ଦ ବସନ୍ତ ଦାତେଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ। ଏହି ସମ୍ମିଳନୀରେ ରାଜ୍ୟ/କେନ୍ଦ୍ରଶାସିତ ଅଞ୍ଚଳର ବରିଷ୍ଠ ପୋଲିସ ଅଧିକାରୀ, ଆତଙ୍କବାଦ ମୁକାବିଲା ସମ୍ବନ୍ଧୀୟ ପ୍ରସଙ୍ଗରେ କାର୍ଯ୍ୟ କରୁଥିବା କେନ୍ଦ୍ରୀୟ ଏଜେନ୍ସି/ବିଭାଗର ଅଧିକାରୀ ଏବଂ ଆଇନ, ଫରେନସିକ୍, ପ୍ରଯୁକ୍ତି ବିଦ୍ୟା ଇତ୍ୟାଦି ସମ୍ବନ୍ଧୀୟ କ୍ଷେତ୍ରର ବିଶେଷଜ୍ଞମାନେ ଯୋଗ ଦେଉଛନ୍ତି।

ଏହି ସମ୍ମିଳନୀକୁ ସମ୍ବୋଧିତ କରି କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ଏନଆଇଏ କେବଳ ଏକ ତଦନ୍ତକାରୀ ଏଜେନ୍ସି ନୁହେଁ ଏବଂ ଏହାର ତତ୍ତ୍ୱାବଧାନରେ ସମଗ୍ର ଦେଶରେ ଆତଙ୍କବାଦ ବିରୋଧୀ କାର୍ଯ୍ୟକଳାପକୁ ସଂକଳିତ ଏବଂ ପ୍ରୋତ୍ସାହିତ କରାଯିବା ଉଚିତ ଏବଂ ତଦନ୍ତକାରୀ ଏଜେନ୍ସି ଯେପରି କୋର୍ଟରେ ଦୃଢ଼ ଭାବରେ ଠିଆ ହେବ ଏବଂ ଆତଙ୍କବାଦ ବିରୋଧୀ ବ୍ୟବସ୍ଥାକୁ ସୁଦୃଢ଼ କରାଯାଇପାରିବ ସେଥିପାଇଁ ପଦକ୍ଷେପ ନିଆଯିବା ଉଚିତ୍ ।

ଆଜି ୧୧ ଜଣ ପଦକ ବିଜେତାଙ୍କୁ ସମ୍ମାନିତ କରାଯାଇଛି ବୋଲି ଅମିତ ଶାହ କହିଛନ୍ତି। ସେ କହିଛନ୍ତି ଯେ ଭାରତର ସ୍ୱାଧୀନତାର ୭୫ ବର୍ଷ ମଧ୍ୟରେ ଦେଶର ସୁରକ୍ଷା ବଜାୟ ରଖିବା ପାଇଁ ଆଭ୍ୟନ୍ତରୀଣ ସୁରକ୍ଷା ଏବଂ ସୀମା ସୁରକ୍ଷା ପାଇଁ ୩୬,୪୬୮ ଜଣ ପୋଲିସ ସର୍ବୋଚ୍ଚ ବଳିଦାନ ଦେଇଛନ୍ତି।

କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ କହିଛନ୍ତି ଯେ ୨୦୧୪ରେ ନରେନ୍ଦ୍ର ମୋଦୀ ପ୍ରଧାନମନ୍ତ୍ରୀ ହେବାପରଠାରୁ ୧୦ ବର୍ଷ ମଧ୍ୟରେ ଭାରତ ସରକାର ଆତଙ୍କବାଦ ବିରୋଧରେ ଏକ ଠୋସ୍ ରଣନୀତି ସହିତ ଆଗେଇ ଚାଲିଛନ୍ତି। ଆତଙ୍କବାଦ ବିରୋଧରେ ଶୂନ୍ୟ ସହନଶୀଳତାର ମୋଦୀଜୀଙ୍କ ସ୍ଲୋଗାନକୁ କେବଳ ଭାରତ ନୁହେଁ ସମଗ୍ର ବିଶ୍ୱ ଗ୍ରହଣ କରିଛି ବୋଲି ସେ କହିଛନ୍ତି। ବିଗତ ୧୦ ବର୍ଷ ମଧ୍ୟରେ ଆତଙ୍କବାଦର ମୁକାବିଲା ପାଇଁ ଭାରତରେ ଏକ ଶକ୍ତିଶାଳୀ ‘ଇକୋସିଷ୍ଟମ୍’ ନିର୍ମାଣ କରାଯାଇଛି। ଶ୍ରୀ ଶାହ ଆହୁରି ମଧ୍ୟ କହିଛନ୍ତି ଯେ ଯଦିଓ ବହୁତ କିଛି କରିବାକୁ ବାକି ଅଛି, କିନ୍ତୁ ଯଦି ଆମେ ଗତ ୧୦ ବର୍ଷ ମଧ୍ୟରେ ହୋଇଥିବା କାର୍ଯ୍ୟର ସମୀକ୍ଷା କରିବୁ, ତେବେ ଏହା ସନ୍ତୋଷଜନକ ବୋଲି ବିବେଚନା କରାଯାଇପାରିବ । ଆତଙ୍କବାଦ, ଆତଙ୍କବାଦୀ ଏବଂ ସେମାନଙ୍କୁ ସମର୍ଥନ କରୁଥିବା ସମଗ୍ର ଇକୋସିଷ୍ଟମ ବିରୋଧରେ ଲଢ଼ିବା ପାଇଁ ଗୃହ ମନ୍ତ୍ରଣାଳୟ ଖୁବ୍ ଶୀଘ୍ର ଏକ ଜାତୀୟ ଆତଙ୍କବାଦ ନିରୋଧୀ ନୀତି ଏବଂ ରଣନୀତି ପ୍ରଣୟନ କରିବ ବୋଲି ଗୃହମନ୍ତ୍ରୀ ଘୋଷଣା କରିଛନ୍ତି।

ଅମିତ ଶାହ କହିଛନ୍ତି ଯେ ରାଜ୍ୟଗୁଡ଼ିକର ନିଜସ୍ୱ ଭୌଗୋଳିକ ଏବଂ ସାମ୍ବିଧାନିକ ସୀମା ଥିବା ବେଳେ ଆତଙ୍କବାଦ ଏବଂ ଆତଙ୍କବାଦୀଙ୍କର କୌଣସି ସୀମା ନାହିଁ। ସେ କହିଛନ୍ତି ଯେ ଆତଙ୍କବାଦୀମାନେ ଉଭୟ ଅନ୍ତର୍ଜାତୀୟ ଏବଂ ଆନ୍ତଃରାଜ୍ୟ ଷଡ଼ଯନ୍ତ୍ରରେ ଲିପ୍ତ ଅଛନ୍ତି ଏବଂ ସେମାନଙ୍କ ବିରୋଧରେ ଏକ ପ୍ରଭାବଶାଳୀ ରଣନୀତି ବିକଶିତ କରିବାକୁ ହେଲେ ଆମକୁ ଏଭଳି ସମ୍ମିଳନୀ ମାଧ୍ୟମରେ ଏକ ଦୃଢ଼ ବ୍ୟବସ୍ଥା ଗଠନ କରିବାକୁ ପଡ଼ିବ। ଏହା ଦ୍ୱାରା ଆତଙ୍କବାଦ, ନିଶାଦ୍ରବ୍ୟ ଏବଂ ହାୱାଲା ଅପରେସନ ଭଳି କାର୍ଯ୍ୟକଳାପକୁ ରୋକିବାରେ ସହାୟକ ହେବ, ଯାହା ଦେଶର ସୀମା ଏବଂ ଅର୍ଥନୀତି ପ୍ରତି ବିପଦ ସୃଷ୍ଟି କରିବ । ଏହି ସମ୍ମିଳନୀ କେବଳ ଆଲୋଚନା ପାଇଁ ଏକ ପ୍ଲାଟଫର୍ମ ଭାବରେ କାର୍ଯ୍ୟ କରିବ ନାହିଁ ବରଂ ଆତଙ୍କବାଦ ବିରୋଧରେ ଆମର ଲଢ଼େଇକୁ ସୁଦୃଢ଼ କରିବ ବୋଲି ସେ ବିଶ୍ୱାସ ବ୍ୟକ୍ତ କରିଛନ୍ତି। ସେ କହିଛନ୍ତି ଯେ ଏଭଳି ସମ୍ମିଳନୀର ପ୍ରକୃତ ଉପଯୋଗୀତା ହେଉଛି କାର୍ଯ୍ୟାନୁଷ୍ଠାନଯୋଗ୍ୟ ପଏଣ୍ଟକୁ ଥାନା ଓ ବିଟ୍ ସ୍ତରକୁ ନେବା। ବିଟ୍ ଅଫିସରଙ୍କଠାରୁ ଆରମ୍ଭ କରି ଏନଆଇଏ ମହାନିର୍ଦ୍ଦେଶକ ପର୍ଯ୍ୟନ୍ତ ସମଗ୍ର ବ୍ୟବସ୍ଥାକୁ ଆତଙ୍କବାଦ ଦ୍ୱାରା ସୃଷ୍ଟି ହେଉଥିବା ବିପଦ ବିଷୟରେ ସଫଳତାର ସହ ସଚେତନ କରାଯିବା ଉଚିତ୍ ।

କେନ୍ଦ୍ର ଗୃହମନ୍ତ୍ରୀ ଏବଂ ସମବାୟ ମନ୍ତ୍ରୀ କହିଛନ୍ତି ଯେ, ନରେନ୍ଦ୍ର ମୋଦୀ ପ୍ରଧାନମନ୍ତ୍ରୀ ହେବା ପରଠାରୁ ଆତଙ୍କବାଦର ମୁକାବିଲା ପାଇଁ ଭାରତ ଅନେକ ପଦକ୍ଷେପ ଗ୍ରହଣ କରିଛି ବୋଲି ବିଶ୍ୱ ସ୍ୱୀକାର କରିଛି । ଆତଙ୍କବାଦ ବିରୋଧରେ ଲଢ଼ିବା ଅର୍ଥ କେବଳ କିଛି ଷଡ଼ଯନ୍ତ୍ରର ପର୍ଦ୍ଦାଫାସ କରିବା ନୁହେଁ ବୋଲି ସେ ଉଲ୍ଲେଖ କରିଛନ୍ତି। ବରଂ ଏହାର ଅର୍ଥ ହେଉଛି ଆତଙ୍କବାଦ ବିରୋଧରେ ଲଢୁଥିବା ଏଜେନ୍ସିଗୁଡ଼ିକୁ ଆଇନଗତ ଭାବେ ସଶକ୍ତ କରିବା ଏବଂ ଏହା ବିରୋଧରେ ଆମର ଲଢ଼େଇକୁ ସୁଦୃଢ଼ କରିବା ପାଇଁ ଏକ ପରିବେଶ ସୃଷ୍ଟି କରିବା ।

ଅମିତ ଶାହ ଉଲ୍ଲେଖ କରିଥିଲେ ଯେ ଅଗଷ୍ଟ ୨, ୨୦୧୯ରେ ଏନଆଇଏ ଆଇନରେ ସଂଶୋଧନ କରାଯାଇଥିଲା, ଯେଉଁଥିରେ ନୂତନ ଅପରାଧ ଯୋଡାଯାଇଥିଲା ଏବଂ ଅତିରିକ୍ତ କ୍ଷେତ୍ରୀୟ ଅଧିକାର ପ୍ରଦାନ କରାଯାଇଥିଲା, ଯାହା ଏନଆଇଏକୁ ବିଦେଶରେ ମଧ୍ୟ ତଦନ୍ତ କରିବାକୁ ଅନୁମତି ଦେଇଥିଲା । ସେ ଉଲ୍ଲେଖ କରିଛନ୍ତି ଯେ ଅଗଷ୍ଟ ୧୪, ୨୦୧୯ରେ ୟୁଏପିଏରେ ସଂଶୋଧନ କରାଯାଇଥିଲା, ଯେଉଁଥିରେ କର୍ତ୍ତୃପକ୍ଷଙ୍କୁ ସମ୍ପତ୍ତି ଜବତ କରିବାର କ୍ଷମତା ଦିଆଯାଇଥିଲା ଏବଂ ବ୍ୟକ୍ତି ବିଶେଷ ଏବଂ ସଂଗଠନକୁ ଆତଙ୍କବାଦୀ ଘୋଷଣା କରାଯାଇଥିଲା। ସେ ଆହୁରି ମଧ୍ୟ କହିଛନ୍ତି ଯେ ଗୃହ ମନ୍ତ୍ରଣାଳୟ ବିକେନ୍ଦ୍ରୀକରଣ ପାଇଁ ସମନ୍ୱିତ ପ୍ରୟାସ କରିଛି, ବିଭିନ୍ନ ମନ୍ତ୍ରଣାଳୟ ନିଜସ୍ୱ ରଣନୀତି ବିକଶିତ କରିଛନ୍ତି ଏବଂ ଏମଏଚଏ ଏଥିପାଇଁ ଏକ ସଂସ୍ଥାଗତ ଢାଞ୍ଚା ସ୍ଥାପନ କରିଛି ।

ଗୃହମନ୍ତ୍ରୀ କହିଛନ୍ତି ଯେ ୨୦୨୦ ମସିହାରେ ଆତଙ୍କବାଦର ପାଣ୍ଠି ନିୟନ୍ତ୍ରଣ ପାଇଁ ଏକ ୨୫ ସୂତ୍ରୀ ସମନ୍ୱିତ ଯୋଜନା ପ୍ରସ୍ତୁତ କରାଯାଇଥିଲା, ଯେଉଁଥିରେ ଜିହାଦୀ ଆତଙ୍କବାଦଠାରୁ ଆରମ୍ଭ କରି ଉତ୍ତରପୂର୍ବ, ବାମପନ୍ଥୀ ଉଗ୍ରବାଦ, ନକଲି ମୁଦ୍ରାଠାରୁ ଆରମ୍ଭ କରି ନିଶାଦ୍ରବ୍ୟ ପର୍ଯ୍ୟନ୍ତ ଅନେକ ପଦକ୍ଷେପ ନିଆଯାଇଥିଲା । ଏଫସିଆରଏ ଠାରୁ ଆରମ୍ଭ କରି ବେଆଇନ ଅସ୍ତ୍ରଶସ୍ତ୍ର ଚୋରା ଚାଲାଣ ପର୍ଯ୍ୟନ୍ତ ବିଭିନ୍ନ ଏଜେନ୍ସି ମଧ୍ୟରେ ସମନ୍ୱୟ ରକ୍ଷା କରି ‘ଇକୋସିଷ୍ଟମ୍’କୁ ଭାଙ୍ଗିବା ପାଇଁ କାର୍ଯ୍ୟ କରାଯାଇଥିଲା ଏବଂ ଏହାର ବହୁତ ଭଲ ଫଳାଫଳ ମିଳିଛି। ମଲ୍ଟି ଏଜେନ୍ସି ସେଣ୍ଟର (ଏମ୍ଏସି)ର କାର୍ଯ୍ୟକାରିତାରେ ଉଲ୍ଲେଖନୀୟ ପରିବର୍ତ୍ତନ କରାଯାଇଛି। ଶ୍ରୀ ଶାହା ଉଲ୍ଲେଖ କରିଥିଲେ ଯେ ନ୍ୟାସନାଲ ମେମୋରୀ ବ୍ୟାଙ୍କ ପ୍ରତିଷ୍ଠା କରାଯାଇଛି ଏବଂ ଏହାକୁ ପ୍ରଭାବଶାଳୀ ଭାବରେ କାର୍ଯ୍ୟକାରୀ କରିବା ପାଇଁ ପଦକ୍ଷେପ ନିଆଯାଇଛି । ଗୁଇନ୍ଦା ସୂଚନା ଆଧାରରେ ଏକ କେନ୍ଦ୍ରୀୟ ଡାଟାବେସ୍ ମଧ୍ୟ ପ୍ରସ୍ତୁତ କରାଯାଇଥିଲା। ସେ ଆହୁରି ମଧ୍ୟ କହିଛନ୍ତି ଯେ ଅନେକ ଡାଟାବେସ୍ ବିକଶିତ କରାଯାଇଛି, ଯାହା ଆତଙ୍କବାଦର ମୂଳୋତ୍ପାଟନ ପ୍ରୟାସକୁ ଫାଇଦା ଦେଇପାରିବ।

କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ କହିଛନ୍ତି ଯେ ୧୫ରୁ ଅଧିକ ସଂଗଠନକୁ ଆତଙ୍କବାଦୀ ସଂଗଠନ ଏବଂ ବେଆଇନ ସଂଗଠନ ଭାବେ ଘୋଷଣା କରାଯାଇଛି ଏବଂ ନିକଟରେ ଆହୁରି ୭ଟି ସଂଗଠନକୁ ଆତଙ୍କବାଦୀ ସଂଗଠନ ଭାବେ ଘୋଷଣା କରାଯାଇଛି। ଶ୍ରୀ ଶାହା କହିଛନ୍ତି ଯେ ୨୦୧୪ ପରଠାରୁ ଦେଶରେ କୌଣସି ବଡ଼ ଆତଙ୍କବାଦୀ ଘଟଣା ଘଟିନାହିଁ। ଗତ ୧୦ ବର୍ଷ ମଧ୍ୟରେ ଆତଙ୍କବାଦୀ ଘଟଣାରେ ୭୦ ପ୍ରତିଶତ ହ୍ରାସ ଘଟିଛି ବୋଲି ସେ ଉଲ୍ଲେଖ କରିଛନ୍ତି।

ଅମିତ ଶାହ କହିଛନ୍ତି ଯେ ଗତ ପାଞ୍ଚ ବର୍ଷ ମଧ୍ୟରେ ଅନେକ ଡାଟାବେସ୍ କାର୍ଯ୍ୟକାରୀ ହୋଇଛି। ନାଟଗ୍ରିଡ୍‍ ହେଉଛି ଏକ କେନ୍ଦ୍ରୀଭୂତ ଡାଟା ଆକସେସ୍ ସମାଧାନ, ଏବଂ ଏହାକୁ ପ୍ରଭାବଶାଳୀ ଭାବରେ ବ୍ୟବହାର କରିବା ପାଇଁ ପୋଲିସ ଅଧୀକ୍ଷକ ସ୍ତର ପର୍ଯ୍ୟନ୍ତ ଅଧିକାରୀମାନଙ୍କ ମଧ୍ୟରେ ଏକ କାର୍ଯ୍ୟ ସଂସ୍କୃତି ବିକଶିତ କରିବାର ଆବଶ୍ୟକତା ରହିଛି । ସେ ଆହୁରି ମଧ୍ୟ କହିଛନ୍ତି ଯେ ଏନସିଓଆରଡି, ନିଦାନ ଏବଂ ମାନସ ଭଳି ପଦକ୍ଷେପକୁ ଏନଆଇଏ ଏଆଇ ସହିତ ବ୍ୟବହାର କରୁଛି। ଏହି ଡାଟାବେସ୍ କୁ ସବୁ ରାଜ୍ୟରେ ପୁଲିସ ବାହିନୀର ସମସ୍ତ ସ୍ତରରେ ବ୍ୟବହାର କରାଯିବା ଉପରେ ସେ ଗୁରୁତ୍ୱାରୋପ କରିଥିଲେ।

କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ଏନଆଇଏ ୟୁଏପିଏ ଅଧୀନରେ ମାମଲାର ତଦନ୍ତ କରିଛି ଏବଂ ପ୍ରାୟ ୯୫% ଦୋଷୀ ସାବ୍ୟସ୍ତ ହାର ହାସଲ କରିବାରେ ସଫଳ ହୋଇଛି । ସମସ୍ତ ଶକ୍ତି ଜ୍ଞାନକୌଶଳର ଉପଯୋଗ ନକଲେ ଆମେ ଆତଙ୍କବାଦକୁ ପ୍ରଭାବଶାଳୀ ଭାବେ ମୁକାବିଲା କରିପାରିବୁ ନାହିଁ ବୋଲି ଶ୍ରୀ ଶାହ ଗୁରୁତ୍ୱାରୋପ କରିଥିଲେ। ଆତଙ୍କବାଦ ଏକ ଅସୀମ ଓ ଅଦୃଶ୍ୟ ଶତ୍ରୁ ଏବଂ ଏହା ବିରୋଧରେ ଯୁଦ୍ଧ ଜିତିବାକୁ ହେଲେ ଆମକୁ ଆମର ଯୁବ ଅଧିକାରୀମାନଙ୍କୁ ଆବଶ୍ୟକ ବୈଷୟିକ ଉପକରଣ ରେ ସଜ୍ଜିତ କରିବାକୁ ପଡ଼ିବ ବୋଲି ସେ ଉଲ୍ଲେଖ କରିଥିଲେ।

ଅମିତ ଶାହ ତିନିଟି ନୂଆ ଅପରାଧିକ ଆଇନକୁ ଦେଶର ଅପରାଧିକ ନ୍ୟାୟ ବ୍ୟବସ୍ଥା ପାଇଁ ପରିବର୍ତନକାରୀ ବୋଲି ବର୍ଣ୍ଣନା କରିଥିଲେ। ସେ କହିଛନ୍ତି ଯେ ସମସ୍ତ ରାଜ୍ୟ ଏହି ଆଇନଗୁଡ଼ିକୁ ଅକ୍ଷରରେ କାର୍ଯ୍ୟକାରୀ କରିବାର ଆବଶ୍ୟକତା ରହିଛି। ଜେଲ, ଫରେନସିକ୍, ଅଦାଲତ, ପ୍ରସିକ୍ୟୁସନ ଏବଂ ପୋଲିସରେ ଏହି ଆଇନଗୁଡିକ ସମ୍ପୂର୍ଣ୍ଣ ରୂପେ କାର୍ଯ୍ୟକାରୀ ହେଲେ ଭାରତର ଅପରାଧିକ ନ୍ୟାୟ ବ୍ୟବସ୍ଥା ବିଶ୍ୱରେ ସବୁଠାରୁ ଆଧୁନିକ ହୋଇଯିବ ବୋଲି ଶ୍ରୀ ଶାହା କହିଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ ଏହି ନୂତନ ଆଇନ ପ୍ରଥମ ଥର ପାଇଁ ଆତଙ୍କବାଦର ଏକ ସ୍ପଷ୍ଟ ସଂଜ୍ଞା ପ୍ରଦାନ କରିଛି।

କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ଆତଙ୍କବାଦ ବିରୋଧରେ ଲଢ଼େଇଜିତିବା ପାଇଁ ଏକ ‘ସମ୍ପୂର୍ଣ୍ଣ ସରକାରୀ ଆଭିମୁଖ୍ୟ’ ଜରୁରୀ ଏବଂ ଆମକୁ ଏକ ସମନ୍ୱିତ, କାର୍ଯ୍ୟକ୍ଷମ ବ୍ୟବସ୍ଥା ସୃଷ୍ଟି କରିବାକୁ ପଡ଼ିବ। ଆତଙ୍କବାଦକୁ ଅର୍ଥ ଯୋଗାଣ ଏବଂ କ୍ରିପ୍ଟୋ ମୁଦ୍ରା ଭଳି ନୂତନ ବିପଦର ମୁକାବିଲା କରିବା ଉପରେ ସେ ଗୁରୁତ୍ୱାରୋପ କରିଥିଲେ; ରାଜ୍ୟସ୍ତରର ଥାନାଠାରୁ ଆରମ୍ଭ କରି ପୁଲିସ ମହାନିର୍ଦ୍ଦେଶକଙ୍କ କାର୍ଯ୍ୟାଳୟ ପର୍ଯ୍ୟନ୍ତ ଏକ ସମନ୍ୱିତ ଆଭିମୁଖ୍ୟ ଗ୍ରହଣ କରାଯିବା ଆବଶ୍ୟକ। ଶ୍ରୀ ଶାହା କହିଛନ୍ତି ଯେ ‘ଜାଣିବାର ଆବଶ୍ୟକତା’ ଆଭିମୁଖ୍ୟରୁ ‘ଡ୍ୟୁଟି ଟୁ ସେୟାର’ ଆଭିମୁଖ୍ୟକୁ ବଦଳିବାର ସମୟ ଆସିଛି।

ଆତଙ୍କବାଦ ବିରୋଧରେ ଲଢ଼େଇକୁ ସମସ୍ତ ରାଷ୍ଟ୍ର ନିଜର ବୋଲି ବିଚାର କରିବା ଉଚିତ ବୋଲି ଶ୍ରୀ ଅମିତ ଶାହ ଅନୁରୋଧ କରିଛନ୍ତି। ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଗୃହ ମନ୍ତ୍ରଣାଳୟ ଆତଙ୍କବାଦ ବିରୋଧରେ ଲଢ଼ିବା, ଫଳାଫଳ ପ୍ରଦାନ କରିବା ଏବଂ ଏହି ବିପଦକୁ ସଫଳତାର ସହ ମୂଳୋତ୍ପାଟନ କରିବା ପାଇଁ ଏକ ଦୃଢ଼ ସଂକଳ୍ପ ସହିତ ଏକ ଇକୋସିଷ୍ଟମ ସୃଷ୍ଟି କରିବ ବୋଲି ସେ କହିଥିଲେ।

ଦିଲ୍ଲୀ: କେନ୍ଦ୍ର ସ୍ୱରାଷ୍ଟ୍ର ଓ ସମବାୟ ମନ୍ତ୍ରୀ ଅମିତ ଶାହ ଆଜି ନୂଆଦିଲ୍ଲୀରେ ଆୟୋଜିତ ‘ଏକତା ଦୌଡ଼’କୁ ସବୁଜ ବତାକା ଦେଖାଇ ଶୁଭାରମ୍ଭ କରିଛନ୍ତି। ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ଜନ୍ମ ବାଷିକୀ ଅକ୍ଟୋବର ୩୧ ତାରିଖରେ ପାଳନ କରାଯାଉଥିବା ଜାତୀୟ ଏକତା ଦିବସର ଅଂଶ ଭାବେ ‘ଏକତା ଦୌଡ଼’ ଆୟୋଜନ କରାଯାଇଛି। କ୍ୟାବିନେଟ ମନ୍ତ୍ରୀ ମନୋହର ଲାଲ ଖଟ୍ଟର, ଡ. ମନସୁଖ୍ ମାଣ୍ଡଭିୟ, କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ ଏବଂ ଦିଲ୍ଲୀର ଲେଫ୍ଟନାଣ୍ଟ ଗଭର୍ଣ୍ଣର ବିନୟ କୁମାର ସକ୍ସେନାଙ୍କ ସମେତ ଅନେକ ଗଣ୍ୟମାନ୍ୟ ବ୍ୟକ୍ତି ଏହି ଅବସରରେ ଉପସ୍ଥିତ ଥିଲେ।

କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ତାଙ୍କ ଉଦବୋଧନରେ କହିଥିଲେ, ଦେଶବାସୀଙ୍କୁ ଦେଶର ଏକତା ଓ ଅଖଣ୍ଡତା ପାଇଁ ଉଦବୁଦ୍ଧ କରିବା ଲକ୍ଷ୍ୟରେ ମହାନ୍ ନେତା ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ସ୍ମୃତିରେ ୨୦୧୫ ମସିହାରେ ‘ଏକତା ଦୌଡ଼’ ଆୟୋଜନ କରିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଷ୍ପତ୍ତି ନେଇଥିଲେ। ସେହିଦିନରୁ ଆଜି ପର୍ଯ୍ୟନ୍ତ ସମଗ୍ର ଦେଶ ଏକତା ଦୌଡ଼ରୁ ଦେଶର ଏକତା ଓ ଅଖଣ୍ଡତା ପାଇଁ ସଂକଳ୍ପ ନେବା ସହ ନିଜକୁ ଭାରତ ମାତାର ସେବାରେ ସମର୍ପିତ ମଧ୍ୟ କରୁଛନ୍ତି। ଆଜି ‘ଏକତା ଦୌଡ଼’ ଦେଶର ଏକତା ପାଇଁ ସଂକଳ୍ପ ହେବା ସହ ବିକଶିତ ଭାରତର ସଂକଳ୍ପ ମଧ୍ୟ ହୋଇପାରିଛି। ପ୍ରଧାନମନ୍ତ୍ରୀ ମୋଦୀ ଦେଶବାସୀଙ୍କ ସମ୍ମୁଖରେ ୨୦୪୭ ମସିହା ସୁଦ୍ଧା ସମ୍ପୂର୍ଣ୍ଣ ବିକଶିତ ଭାରତ ନିର୍ମାଣର ସଂକଳ୍ପ ରଖିଛନ୍ତି, ଯାହାକି ପ୍ରତ୍ୟେକ କ୍ଷେତ୍ରରେ ସମଗ୍ର ବିଶ୍ୱରେ ଭାରତକୁ ସର୍ବପ୍ରଥମ ସାବ୍ୟସ୍ତ କରିବ।

ଅମିତ ଶାହ କହିଥିଲେ, ଆଜି ଭାରତ ଏକ ବିକଶିତ ଏବଂ ମଜବୁତ ରାଷ୍ଟ୍ର ଭାବେ ସମଗ୍ର ବିଶ୍ୱ ସମ୍ମୁଖରେ ଛିଡ଼ା ହୋଇଛି। ଯଦି ଆମେ ଇତିହାସକୁ ଫେରି ଅନାଇବା, ସ୍ୱାଧୀନତା ପରେ ବର୍ତ୍ତମାନର ଭାରତ ନିର୍ମାଣ ପାଇଁ ୫୫୦ରୁ ଅଧିକ ରାଜା ଶାସିତ ଅଞ୍ଚଳକୁ ଏକାଠି କରିବା କେବଳ ସର୍ଦ୍ଦାର ସାହେବଙ୍କ ଦୃଢ଼ ଇଚ୍ଛାଶକ୍ତି ଓ ତ୍ୱରିତ ନିର୍ଣ୍ଣୟ ଯୋଗୁ ସମ୍ଭବ ହୋଇ ପାରିଥିଲା। କେବଳ ସର୍ଦ୍ଦାର ପଟେଲଙ୍କ ଦୃଢ଼ ଇଚ୍ଛାଶକ୍ତି କାରଣରୁ ଆଜି ଭାରତ ଏକଜୁଟ ହୋଇ ବିଶ୍ୱ ସମ୍ମୁଖରେ ମଜୁବତ୍ ସହକାରେ ଛିଡ଼ା ହୋଇପାରିଛି। ଆଜି ଭାରତ ସମଗ୍ର ବିଶ୍ୱ ସମ୍ମୁଖରେ ପ୍ରତ୍ୟେକ କ୍ଷେତ୍ରରେ ଅଗ୍ରଣୀ ହୋଇ ଛିଡ଼ା ହେବା ରାସ୍ତାରେ ଅଛି ଏବଂ ଏହାର ମୂଳଭିତ୍ତି ସର୍ଦ୍ଦାର ପଟେଲ ହିଁ ପକାଇଥିଲେ।

କେନ୍ଦ୍ର ସ୍ୱରାଷ୍ଟ୍ର ଏବଂ ସହକାରୀତା ମନ୍ତ୍ରୀ କହିଥିଲେ, ଦୁର୍ଭାଗ୍ୟର କଥା ଯେ, ବର୍ଷ ବର୍ଷ ପର୍ଯ୍ୟନ୍ତ ସର୍ଦ୍ଦାର ପଟେଲଙ୍କୁ ସ୍ମୃତିକୁ ହଜାଇ ଦେବା କାମ କରାଯାଇଥିଲା ଏବଂ ତାଙ୍କୁ ଭାରତ ରତ୍ନ ଭଳି ଉଚିତ ସମ୍ମାନରୁ ମଧ୍ୟ ବଞ୍ଚିତ କରାଯାଇଥିଲା। ପ୍ରଧାନମନ୍ତ୍ରୀ ମୋଦୀ ଗୁଜରାଟର କେୱଡ଼ିଆରେ ବିଶ୍ୱର ସର୍ବୋଚ୍ଚ ପ୍ରତିମା ସ୍ଥାପନ କରି ସର୍ଦ୍ଦାର ପଟେଲଙ୍କ ସ୍ମୃତିକୁ ଉଜ୍ଜୀବିତ କରି ରଖିବାର କାମ କରିଛନ୍ତି। ପ୍ରତ୍ୟେକ କ୍ଷେତ୍ରରେ ସର୍ଦ୍ଦାର ପଟେଲଙ୍କ ଦୃଷ୍ଟିକୋଣ, ଚିନ୍ତାଧାରା ଓ ବାର୍ତ୍ତାକୁ ବାସ୍ତବ ରୂପ ଦେବାର କାମ କରିଛନ୍ତି ପ୍ରଧାନମନ୍ତ୍ରୀ ମୋଦୀ।

ଅମିତ ଶାହ କହିଥିଲେ, ସର୍ଦ୍ଦାର ପଟେଲଙ୍କ ମହାନ ଚିନ୍ତାଧାରା ନିଶ୍ଚିତ ଭାବେ ଦେଶର ଯୁବପିଢ଼ିଙ୍କ ପାଇଁ ଆଲୋକବର୍ତ୍ତିକା ସାଜିବ। ‘ଏକତା ଦୌଡ଼’ ମାଧ୍ୟମରେ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଭାରତର ଏକତାକୁ ମଜବୁତ କରିବା ସହ ୨୦୪୭ ମସିହା ସୁଦ୍ଧା ସମ୍ପୂର୍ଣ୍ଣ ବିକଶିତ ଭାରତ ଗଠନର ସ୍ୱପ୍ନକୁ ସାକାର କରିବାକୁ ସଂକଳ୍ପ ନେବାକୁ ଦେଶବାସୀଙ୍କୁ ଆହ୍ୱାନ ଦେଇଥିଲେ।

ନୂଆଦିଲ୍ଲୀ: କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ ଘୋଷଣା କରିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତ ସରକାର ସର୍ଦ୍ଦାର ପଟେଲଙ୍କ ୧୫୦ତମ ଜୟନ୍ତୀ ୨୦୨୪ ରୁ ୨୦୨୬ ପର୍ଯ୍ୟନ୍ତ ଦୁଇ ବର୍ଷ ଧରି ଦେଶବ୍ୟାପୀ ଉତ୍ସବ ପାଳନ କରିବେ।

ଏକ୍ସ ପ୍ଲାଟଫର୍ମରେ ଏକ ପୋଷ୍ଟରେ ଏହି ନିଷ୍ପତ୍ତି ସମ୍ପର୍କରେ ଘୋଷଣା କରି କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଉଲ୍ଲେଖ କରିଛନ୍ତି, ବିଶ୍ୱର ଅନ୍ୟତମ ଶକ୍ତିଶାଳୀ ଗଣତାନ୍ତ୍ରିକ ରାଷ୍ଟ୍ର ପ୍ରତିଷ୍ଠା ଏବଂ କାଶ୍ମୀରରୁ ଲାକ୍ଷାଦ୍ୱୀପ ପର୍ଯ୍ୟନ୍ତ ଭାରତକୁ ଏକାଠି କରିବାରେ ତାଙ୍କର ଗୁରୁତ୍ୱପୂର୍ଣ୍ଣ ଭୂମିକା ଅବିସ୍ମରଣୀୟ। ତାଙ୍କର ଉଲ୍ଲେଖନୀୟ ଅବଦାନକୁ ସମ୍ମାନ ଜଣାଇ ଭାରତ ସରକାର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ତାଙ୍କର ୧୫୦ତମ ଜୟନ୍ତୀ ୨୦୨୪ ରୁ ୨୦୨୬ ପର୍ଯ୍ୟନ୍ତ ଦୁଇ ବର୍ଷ ଧରି ଦେଶବ୍ୟାପୀ ଉତ୍ସବ ପାଳନ କରିବେ । ଏହି ଉତ୍ସବ ତାଙ୍କର ଉଲ୍ଲେଖନୀୟ ସଫଳତା ଏବଂ ସେ ପ୍ରଦର୍ଶିତ କରିଥିବା ଏକତାର ଭାବନାର ପ୍ରମାଣ ରୂପେ କାର୍ଯ୍ୟ କରିବ।

ନୂଆଦିଲ୍ଲୀ: ଗୁଜରାଟର ଆନନ୍ଦ ଠାରେ ଜାତୀୟ ଦୁଗ୍ଧ ଉନ୍ନୟନ ବୋର୍ଡ (ଏନଡିଡିବି)ର ହୀରକ ଜୟନ୍ତୀ ପାଳନ ଅବସରରେ କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ ଆଜି ୩୦୦ କୋଟି ଟଙ୍କାର ଅନେକ କୃଷକ କଲ୍ୟାଣକାରୀ ଯୋଜନାର ଉଦଘାଟନ କରିଛନ୍ତି। ଏହି ଅବସରରେ କେନ୍ଦ୍ର ପଞ୍ଚାୟତିରାଜ, ମତ୍ସ୍ୟ, ପଶୁପାଳନ ଓ ଦୁଗ୍ଧ ଉତ୍ପାଦନ ମନ୍ତ୍ରୀ ରାଜୀବ ରଞ୍ଜନ ସିଂହଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ।

ଅମିତ ଶାହ ତାଙ୍କ ଅଭିଭାଷଣରେ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ନିକଟରେ ଆରମ୍ଭ ହୋଇଥିବା ଶ୍ୱେତ ବିପ୍ଳବ ୨.୦ ପାଇଁ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର (ଏସଓପି) ଜାରି କରାଯାଇଛି, ଯେଉଁଥିରେ ପ୍ରଧାନମନ୍ତ୍ରୀଙ୍କ ଦ୍ୱାରା ଦର୍ଶାଯାଇଥିବା ସମସ୍ତ ପ୍ରମୁଖ କୃଷକ ଅନୁକୂଳ ପଏଣ୍ଟକୁ ଅନ୍ତର୍ଭୁକ୍ତ କରାଯାଇଛି। ସେ ଉଲ୍ଲେଖ କରିଥିଲେ ଯେ ସମବାୟ କ୍ଷେତ୍ର ଏକ ଲକ୍ଷ ନୂତନ ଏବଂ ପୂର୍ବରୁ ରହିଥିବା  ଡାଏରୀଗୁଡିକୁ ସଶକ୍ତ କରିବ ଏବଂ ଦ୍ୱିତୀୟ ଶ୍ୱେତ ବିପ୍ଳବ ଦୁଗ୍ଧ ପାଇଁ ମାର୍ଗକୁ ବିସ୍ତାର କରିବ।

ଶ୍ରୀ ଶାହ କହିଥିଲେ ଯେ ତ୍ରିଭୁବନ ଦାସ ଜୀ ଜଣେ ଏଭଳି ବ୍ୟକ୍ତିତ୍ୱ ଥିଲେ ଯାହାଙ୍କର କଠିନ ପରିଶ୍ରମପୂର୍ଣ୍ଣ ଜୀବନ ସମ୍ପର୍କରେ ବର୍ଣ୍ଣନା କରିବା କଷ୍ଟକର। ନିଜର ବ୍ୟକ୍ତିଗତ ସ୍ୱାର୍ଥକୁ ବାଦ୍ ଦେଇ ତ୍ରିଭୁବନଦାସ ପଟେଲ ଦେଶର ଗରିବ କୃଷକଙ୍କ ସଶକ୍ତୀକରଣ ପାଇଁ ଏକ ନିଆରା ଦୃଷ୍ଟିକୋଣ ନେଇ କାର୍ଯ୍ୟ କରିଥିଲେ। ସେ ନିଜର ଖୁସିକୁ ତ୍ୟାଗ କରି ଦେଶର ଗରିବ କୃଷକ ମାନଙ୍କର ସଶକ୍ତୀକରଣ ପାଇଁ କାର୍ଯ୍ୟ କରିଥିଲେ। ଜୀବନ ସାରା ତ୍ରିଭୁବନଦାସ ଜୀ ବ୍ୟକ୍ତିଗତ ଲାଭରୁ ନିଜକୁ ଦୂରେଇ ରଖିଥିଲେ ଏବଂ ଦେଶର ପ୍ରତ୍ୟେକ କୃଷକଙ୍କୁ ସହଯୋଗର ପ୍ରକୃତ ଭାବନା ସହିତ ଯୋଡ଼ିବା ପାଇଁ ତାଙ୍କର ପ୍ରୟାସକୁ ସମର୍ପିତ କରିଥିଲେ ଏବଂ ଏହି ପ୍ରୟାସରେ ବଡ଼ ସଫଳତା ହାସଲ କରିଥିଲେ । ଶ୍ରୀ ଶାହ କହିଥିଲେ ଯେ ତ୍ରିଭୁବନ ଦାସଙ୍କ ଯୋଗୁଁ ଦେଶର ୫ କୋଟି ଗୋପାଳକ ଶାନ୍ତିରେ ଶୋଇଛନ୍ତି ଏବଂ ଆଜି ଦେଶର କୋଟି କୋଟି କୃଷକ, ବିଶେଷ କରି ମହିଳାମାନେ ସମୃଦ୍ଧ ହେଉଛନ୍ତି । ତ୍ରିଭୁବନ ଦାସ ଜୀ ଏକ କ୍ଷୁଦ୍ର ସମବାୟ ସମିତି ଗଠନ କରିଥିଲେ ଯାହା ଆଜି ଦେଶର ୨ କୋଟି କୃଷକଙ୍କୁ ସମବାୟ କ୍ଷେତ୍ର ସହିତ ଯୋଡ଼ି ହଜାର ହଜାର କୋଟି ଟଙ୍କାର ବ୍ୟବସାୟ କରୁଛି ।

କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ କହିଥିଲେ ଯେ ୧୯୬୪ ମସିହାରେ ପୂର୍ବତନ ପ୍ରଧାନମନ୍ତ୍ରୀ ଲାଲ ବାହାଦୁର ଶାସ୍ତ୍ରୀ ଅମୂଲ ଡାଏରୀ ପରିଦର୍ଶନ କରି ନିଷ୍ପତ୍ତି ନେଇଥିଲେ ଯେ କେବଳ ଗୁଜରାଟ ନୁହେଁ ସମଗ୍ର ଦେଶର ପଶୁସମ୍ପଦ ମାଲିକମାନେ ଏହି ସଫଳ ମଡେଲରୁ ଉପକୃତ ହେବା ଉଚିତ୍ । ଏହାପରେ ଶାସ୍ତ୍ରୀ ଜୀ ଏନଡିଡିବି ପ୍ରତିଷ୍ଠା କରିବାକୁ ନିଷ୍ପତ୍ତି ନେଇଥିଲେ । ୬୦ ବର୍ଷ ମଧ୍ୟରେ ଏନଡିଡିବି କେବଳ ସମବାୟ କ୍ଷେତ୍ର, କୃଷକ ଏବଂ ମା’ ଭଉଣୀମାନଙ୍କୁ ସଶକ୍ତ ଓ ସଂଗଠିତ କରିନାହିଁ, ବରଂ ସେମାନଙ୍କ ଅଧିକାର ବିଷୟରେ ସଚେତନତା ସୃଷ୍ଟି କରିବା ପାଇଁ ମଧ୍ୟ କାର୍ଯ୍ୟ କରିଛି ବୋଲି ସେ କହିଥିଲେ । ସମବାୟ ମାଧ୍ୟମରେ ପଶୁପାଳନ କରାଗଲେ ଏହା କେବଳ କୃଷକଙ୍କ ପାଇଁ ସମୃଦ୍ଧି ଆଣିନଥାଏ ବରଂ ଦେଶର ପୁଷ୍ଟିହୀନ ପିଲାଙ୍କ ସମସ୍ୟାର ମଧ୍ୟ ସମାଧାନ କରିଥାଏ ବୋଲି ସେ ଉଲ୍ଲେଖ କରିଥିଲେ । ଅମୂଲ ମାଧ୍ୟମରେ ଗଠିତ ଏହି ବିଶ୍ୱାସ କେବଳ ମହିଳାମାନଙ୍କୁ ସଶକ୍ତ କରିନାହିଁ ବରଂ ପିଲାମାନଙ୍କୁ ପୁଷ୍ଟି ଯୋଗାଇ ଶକ୍ତିଶାଳୀ ନାଗରିକ ସୃଷ୍ଟି କରିବା ପାଇଁ ଭିତ୍ତିପ୍ରସ୍ତର ସ୍ଥାପନ କରିଛି ।

ଏନଡିଡିବି ଗ୍ରାମୀଣ କ୍ଷେତ୍ର ଏବଂ ଦେଶର ବିକାଶକୁ ତ୍ୱରାନ୍ୱିତ କରିବା ସହ କୃଷିକୁ ଆତ୍ମନିର୍ଭରଶୀଳ କରିଛି ବୋଲି ଶ୍ରୀ ଅମିତ ଶାହ କହିଥିଲେ । ସେ ଆହୁରି ମଧ୍ୟ କହିଥିଲେ ଯେ ତ୍ରିଭୁବନ ଜୀ ଏନଡିଡିବିର ଭିତ୍ତିପ୍ରସ୍ତର ସ୍ଥାପନ କରିଥିଲେ , ଯାହା ଆଜି କେବଳ ଦେଶରେ ନୁହେଁ ବିଶ୍ୱରେ ଏକ ବହୁତ ବଡ ଅନୁଷ୍ଠାନରେ ପରିଣତ ହୋଇଛି । ୧୯୮୭ରେ ଏନଡିଡିବି ଏକ ସରକାରୀ ଅନୁଷ୍ଠାନରେ ପରିଣତ ହୋଇଥିଲା ଏବଂ ୧୯୭୦ ରୁ ୧୯୯୬ ପର୍ଯ୍ୟନ୍ତ ଏହା ଅପରେସନ ଫ୍ଲଡ୍ ପ୍ରୋଗ୍ରାମ୍ ବିକଶିତ ତଥା କାର୍ଯ୍ୟକାରୀ କରିଥିଲା, ଯାହା ଶ୍ୱେତ ବିପ୍ଳବର କାରଣ ହୋଇଥିଲା ବୋଲି ସେ ଉଲ୍ଳେଖ କରିଥିଲେ । ସେ କହିଛନ୍ତି ଯେ ଅମୂଲ ଆଜି ୬୦,୦୦୦ କୋଟି ଟଙ୍କାର ବାର୍ଷିକ ବ୍ୟବସାୟ କରୁଛି ଯାହା ପ୍ରାରମ୍ଭିକ ଭାବରେ ମହିଳାମାନଙ୍କର ଅତି ଅଳ୍ପ ଅଂଶଧନ ପୁଞ୍ଜିରେ ନିର୍ମିତ ହୋଇଥିଲା । ଶ୍ରୀ ଶାହ କହିଛନ୍ତି ଯେ ୧୯୬୪ ମସିହାରେ ଯେତେବେଳେ ଲାଲ ବାହାଦୁର ଶାସ୍ତ୍ରୀ ଜୀ ଏନଡିଡିବି ପ୍ରତିଷ୍ଠା କରିବାକୁ ନିଷ୍ପତ୍ତି ନେଇଥିଲେ, ସେତେବେଳେ କେହି ଜାଣି ନଥିଲେ ଯେ ଏହା ଦିନେ ଏକ ବିଶାଳ ବଟ ବୃକ୍ଷରେ ପରିଣତ ହେଉଥିବା ଏକ କ୍ଷୁଦ୍ର ମଞ୍ଜି ପରି ବଢିବ । ଏନଡିଡିବିର ଦୁଗ୍ଧ ବିକ୍ରି ଦୈନିକ ୪୨୭ ଲକ୍ଷ ଲିଟରରେ ପହଞ୍ଚିଥିବା ବେଳେ ଦୈନିକ ୫୮୯ ଲକ୍ଷ ଲିଟର ଦୁଗ୍ଧ କ୍ରୟ ହେଉଛି । ଏହାର ରାଜସ୍ୱ ୩୪୪ କୋଟି ଟଙ୍କାରୁ ୪୨୬ କୋଟି ଟଙ୍କାକୁ ବୃଦ୍ଧି ପାଇଛି ଏବଂ ଶୁଦ୍ଧ ଲାଭ ୫୦ କୋଟି ଟଙ୍କା ରହିଛି ।

କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ କହିଛନ୍ତି ଯେ ଏନଡିଡିବି ପନିପରିବା ପ୍ରକ୍ରିୟାକରଣ ଆରମ୍ଭ କରିଛି, ଆମର କୃଷକମାନଙ୍କ ଦ୍ୱାରା ଉତ୍ପାଦିତ ପନିପରିବାକୁ ସମଗ୍ର ବିଶ୍ୱରେ ପହଞ୍ଚାଇବାକୁ ସୁଯୋଗ ଦେଇଛି ଏବଂ ଏହାର ଲାଭ ସମବାୟ ମଡେଲ ଅଧୀନରେ ତୃଣମୂଳ ସ୍ତରରେ ବଣ୍ଟନ କରାଯିବ । ସେ କହିଥିଲେ ଯେ ଗୋବର୍ଦ୍ଧନ ଯୋଜନା ଆମ ଜମିର ସଂରକ୍ଷଣ ଏବଂ ଅଭିବୃଦ୍ଧି, ଅମଳ ବୃଦ୍ଧି, ଉନ୍ନତ କୃଷକ ସମୃଦ୍ଧି ଏବଂ ଏକ ସ୍ୱଚ୍ଛ ପରିବେଶ ସୃଷ୍ଟି କରିଛି । ଗୋବରରୁ ଗ୍ୟାସ ଓ ସାର ଉତ୍ପାଦନ ହେଉଛି ଏବଂ କାର୍ବନ କ୍ରେଡିଟ୍ ଦେୟ ଆମ ମା’ ଓ ଭଉଣୀଙ୍କ ପାଖରେ ପହଞ୍ଚୁଛି । ଶ୍ରୀ ଶାହ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଦୂରଦୃଷ୍ଟି ସମ୍ପନ୍ନ ନିଷ୍ପତ୍ତି  ନେଇ ଗୋବର୍ଦ୍ଧନ ଯୋଜନାକୁ ତୃଣମୂଳ ସ୍ତରରେ କାର୍ଯ୍ୟକାରୀ କରିଛନ୍ତି । ସେ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ ଏନଡିଡିବି ୧୦,୦୦୦ କୃଷକ ଉତ୍ପାଦକ ସଂଗଠନ (ଏଫପିଓ) ପଞ୍ଜିକରଣ କରିଛି ।

ଏନଡିଡିବିର ପଦକ୍ଷେପ ପରେ ଏବେ ମେକ୍ ଇନ୍ ଇଣ୍ଡିଆ କାର୍ଯ୍ୟକ୍ରମ ଅଧୀନରେ ଭାରତରେ ଦୁଗ୍ଧ କ୍ଷେତ୍ରର ସମସ୍ତ କାରଖାନା ନିର୍ମାଣ କରାଯିବ ବୋଲି ଶ୍ରୀ ଅମିତ ଶାହ କହିଥିଲେ । ଆଜି ୨୧୦ କୋଟି ଟଙ୍କା ବ୍ୟୟରେ ମଦର ଡାଏରୀ ଫଳ ଓ ପନିପରିବା ପ୍ରକ୍ରିୟାକରଣ ୟୁନିଟର ଶିଳାନ୍ୟାସ କରାଯାଇଛି । ଏହାବ୍ୟତୀତ ଉତ୍ତରାଖଣ୍ଡର ବଦ୍ରି ଘିଅ ଏବଂ ମଦର ଡାଏରୀର ଗିର ଘିଅ ବ୍ରାଣ୍ଡକୁ ମଧ୍ୟ ଆଜି ଉନ୍ମୋଚନ କରାଯାଇଛି । ସେ କହିଛନ୍ତି ଯେ ସମବାୟ ସାମଗ୍ରୀର ବ୍ରାଣ୍ଡିଂ କରିବା ଏବଂ କର୍ପୋରେଟ୍ ସାମଗ୍ରୀ ସହିତ ବଜାରରେ ପ୍ରତିଦ୍ୱନ୍ଦ୍ୱିତା କରିବା ପାଇଁ ପ୍ରସ୍ତୁତ କରିବା ହେଉଛି ସଫଳତାର ଚାବିକାଠି । ଆଜି ଆମର ଅମୂଲ ବ୍ରାଣ୍ଡ ବିଶ୍ୱସ୍ତରରେ ଶୀର୍ଷ ସ୍ଥାନ ଅଧିକାର କରିଛି, ଯାହା କି ଆମ ପାଇଁ ଏକ ଗୁରୁତ୍ୱପୂର୍ଣ୍ଣ ଉପଲବ୍ଧି । ଲଦାଖରେ ଆପ୍ରିକଟ, ହିମାଚଳରେ ସେଓ ଏବଂ ମେଘାଳୟରେ ସପୁରୀ ଚାଷ କରୁଥିବା କୃଷକମାନେ ଆଜି ଆରମ୍ଭ ହୋଇଥିବା ପଦକ୍ଷେପ ଦ୍ୱାରା ଉପକୃତ ହେବେ ବୋଲି ସେ ଉଲ୍ଲେଖ କରିଛନ୍ତି ।

କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ କହିଛନ୍ତି ଯେ ସମବାୟ ମନ୍ତ୍ରଣାଳୟ ତିନୋଟି ନୂତନ ଜାତୀୟ ସ୍ତରର ସମବାୟ ଅନୁଷ୍ଠାନ ପ୍ରତିଷ୍ଠା କରିଛି । ନେତୃତ୍ୱ ସ୍ତରରେ ଯେତେବେଳେ ପ୍ରକୃତରେ କୃଷକଙ୍କ ପାଇଁ ଚିନ୍ତା କରାଯାଏ, ସେତେବେଳେ ଏଭଳି ନୂଆ ପଦକ୍ଷେପ ନିଆଯାଇପାରିବ । ସେ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ସମବାୟ କ୍ଷେତ୍ରରେ ଅନେକ ପଦକ୍ଷେପ ଏବଂ ଯୋଜନା କାର୍ଯ୍ୟକାରୀ କରିଛନ୍ତି । ବର୍ତ୍ତମାନ ପ୍ରାୟ ୨୨ଟି ରାଜ୍ୟ ମହାସଂଘ ଓ ୨୩୧ଟି ଜିଲ୍ଲା ମହାସଂଘ ସମେତ ୨୮ଟି ମାର୍କେଟିଂ ଡାଏରୀ ଓ ୨୧ଟି ଦୁଗ୍ଧ ଉତ୍ପାଦନକାରୀ କମ୍ପାନୀ ଏହି କ୍ଷେତ୍ରରେ କାର୍ଯ୍ୟ କରୁଛନ୍ତି ।

ମୋଦୀ ସରକାର ୨ ଲକ୍ଷ ନୂତନ ପ୍ରାଥମିକ କୃଷି ଋଣ ସମିତି (ପ୍ୟାକ୍ସ) ପ୍ରତିଷ୍ଠା କରିବାକୁ ଯାଉଛନ୍ତି, ଯାହା ଆମର ସମବାୟ ଢାଞ୍ଚାକୁ ଯଥେଷ୍ଟ ସୁଦୃଢ଼ କରିବ ବୋଲି ସେ ମତ ଦେଇଥିଲେ । ସେ କହିଛନ୍ତି ଯେ ଏହି ପଦକ୍ଷେପ ସମବାୟ କ୍ଷେତ୍ରରେ ସମସ୍ତ ସଂସ୍ଥାର ଶକ୍ତି ବୃଦ୍ଧି କରିବ । ୨୩୧ ନିୟୁତ ଟନ୍ ଦୁଗ୍ଧ ଉତ୍ପାଦନ ସହ ଭାରତ ଯୁକ୍ତରାଷ୍ଟ୍ର ଆମେରିକାକୁ ପଛରେ ପକାଇ ବିଶ୍ୱରେ ଶୀର୍ଷ ସ୍ଥାନ ଅଧିକାର କରିଛି ବୋଲି ସେ ଆଲୋକପାତ କରିଥିଲେ । ଆମର ଦୁଗ୍ଧ ଉତ୍ପାଦନ ଅଭିବୃଦ୍ଧି ହାର ୬% ଥିବା ବେଳେ ବିଶ୍ୱ ଅଭିବୃଦ୍ଧି ହାର ମାତ୍ର ୨% ରହିଛି । ଆଜି ୮ କୋଟି ଗ୍ରାମୀଣ ପରିବାର ଦୈନିକ କ୍ଷୀର ଉତ୍ପାଦନ କରୁଥିବା ବେଳେ ସମବାୟ କ୍ଷେତ୍ର ସହ ମାତ୍ର ଦେଢ଼ କୋଟି ଲୋକ ଯୋଡ଼ି ହୋଇଛନ୍ତି । ଏହାର ଅର୍ଥ ବାକି ୬.୫ କୋଟି ପରିବାର ଉଚିତ ମୂଲ୍ୟ ପାଉନାହାନ୍ତି ଏବଂ ଶୋଷଣର ଶିକାର ହେଉଛନ୍ତି ବୋଲି ସେ ଗୁରୁତ୍ୱାରୋପ କରିଛନ୍ତି । ଭବିଷ୍ୟତରେ ଦୁଗ୍ଧ ଉତ୍ପାଦନରେ ନିୟୋଜିତ ସମସ୍ତ ୮ କୋଟି କୃଷକ ପରିବାର ଯେପରି କଠିନ ପରିଶ୍ରମ ପାଇଁ ପୂର୍ଣ୍ଣ କ୍ଷତିପୂରଣ ପାଇବେ ଏବଂ ସମବାୟ କ୍ଷେତ୍ର ସହ ଯୋଡ଼ି ହୋଇପାରିବେ ତାହା ସୁନିଶ୍ଚିତ କରିବା ସରକାରଙ୍କ ଲକ୍ଷ୍ୟ ହେବ ବୋଲି କେନ୍ଦ୍ର ସମବାୟ ମନ୍ତ୍ରୀ ଦୃଢ଼ୋକ୍ତି ପ୍ରକାଶ କରିଛନ୍ତି ।

କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ କହିଛନ୍ତି ଯେ ସମବାୟ ସମୃଦ୍ଧି ଅଭିଯାନର ଫଳସ୍ୱରୂପ, ଦେଶରେ କ୍ଷୀରର ଉପଲବ୍ଧତା ଯାହା ୧୯୭୦ ରେ ବ୍ୟକ୍ତି ପିଛା ୪୦ କିଲୋଗ୍ରାମ ଥିଲା, ୨୦୧୧ରେ ଏହା ୧୦୩ କିଲୋଗ୍ରାମକୁ ବୃଦ୍ଧି ପାଇଥିଲା ଏବଂ ୨୦୨୩ରେ ଏହା ବୃଦ୍ଧି ପାଇ ବ୍ୟକ୍ତି ପିଛା ୧୬୭ କିଲୋଗ୍ରାମରେ ପହଞ୍ଚିଛି । ସେ ଉଲ୍ଲେଖ କରିଛନ୍ତି ଯେ ଦେଶପିଛା ହାରାହାରି ଦୁଗ୍ଧ ଉପଲବ୍ଧତା ହେଉଛି ୧୧୭ କିଲୋଗ୍ରାମ୍ ।

ନୂଆଦିଲ୍ଲୀ: କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ ଅକ୍ଟୋବର ୭, ୨୦୨୪, ସେମାବାର ଦିନ ନୂଆଦିଲ୍ଲୀର ବିଜ୍ଞାନ ଭବନରେ ବାମପନ୍ଥୀ ଉଗ୍ରବାଦ ପ୍ରଭାବିତ ରାଜ୍ୟର ମୁଖ୍ୟମନ୍ତ୍ରୀମାନଙ୍କ ସହ ଏକ ସମୀକ୍ଷା ବୈଠକରେ ଅଧ୍ୟକ୍ଷତା କରିବେ। ବୈଠକରେ ଆନ୍ଧ୍ରପ୍ରଦେଶ, ବିହାର, ଛତିଶଗଡ଼, ଝାଡ଼ଖଣ୍ଡ, ତେଲଙ୍ଗାନା, ଓଡ଼ିଶା, ମହାରାଷ୍ଟ୍ର ଓ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଯୋଗଦେବେ। ଏହି ବୈଠକରେ ଏଲଡବ୍ଲୁଇ ପ୍ରଭାବିତ ରାଜ୍ୟଗୁଡ଼ିକୁ ବିକାଶ ସହାୟତା ଯୋଗାଇଦେବା ସହ ଜଡ଼ିତ ୫ ଜଣ କେନ୍ଦ୍ର ମନ୍ତ୍ରୀ ମଧ୍ୟ ଯୋଗଦେବେ। ଜାତୀୟ ସୁରକ୍ଷାର ଉପ ପରାମର୍ଶଦାତା ଏବଂ କେନ୍ଦ୍ର, ରାଜ୍ୟ ଏବଂ କେନ୍ଦ୍ରୀୟ ସଶସ୍ତ୍ର ପୁଲିସ ବାହିନୀ (ସିଏପିଏଫ୍)ର ବରିଷ୍ଠ ଅଧିକାରୀମାନେ ମଧ୍ୟ ଆଲୋଚନାରେ ଅଂଶଗ୍ରହଣ କରିବେ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଏବଂ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ମାର୍ଗଦର୍ଶନରେ କେନ୍ଦ୍ର ସରକାର ୨୦୨୬ ମାର୍ଚ୍ଚ ସୁଦ୍ଧା ବାମପନ୍ଥୀ ଉଗ୍ରବାଦ (ଏଲଡବ୍ଲୁଇ)ର ବିପଦକୁ ସମ୍ପୂର୍ଣ୍ଣ ରୂପେ ଉଚ୍ଛେଦ କରିବାକୁ ପ୍ରତିଶ୍ରୁତିବଦ୍ଧ। କେନ୍ଦ୍ର ସରକାର ନକ୍ସଲବାଦର ମୁକାବିଲା ପାଇଁ ଏଲଡବ୍ଲୁଇ ପ୍ରଭାବିତ ରାଜ୍ୟ ସରକାରଙ୍କୁ ସମସ୍ତ ସମ୍ଭବ ସହାୟତା ଯୋଗାଇ ଦେଉଛନ୍ତି।

କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ ଅମିତ ଶାହ ଶେଷ ଥର ପାଇଁ ୦୬ ଅକ୍ଟୋବର, ୨୦୨୩ରେ ଏଲଡବ୍ଲୁଇ ପ୍ରଭାବିତ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଏଲଡବ୍ଲୁଇ ସମୀକ୍ଷା ବୈଠକରେ ଅଧ୍ୟକ୍ଷତା କରିଥିଲେ । ସେହି ବୈଠକରେ କେନ୍ଦ୍ର ଗୃହମନ୍ତ୍ରୀ ଏଲଡବ୍ଲୁଇ ଉଚ୍ଛେଦ ସଂକ୍ରାନ୍ତରେ ବ୍ୟାପକ ନିର୍ଦ୍ଦେଶ ଦେଇଥିଲେ। ମୋଦୀ ସରକାରଙ୍କ ରଣନୀତି ଯୋଗୁଁ ଏଲଡବ୍ଲୁଇ ହିଂସା ୭୨ ପ୍ରତିଶତ ହ୍ରାସ ପାଇଥିବା ବେଳେ ୨୦୧୦ ତୁଳନାରେ ୨୦୨୩ରେ ମୃତ୍ୟୁ ସଂଖ୍ୟା ୮୬ ପ୍ରତିଶତ ହ୍ରାସ ପାଇଛି ଏବଂ ଏଲଡବ୍ଲୁଇ ଆଜି ନିଜର ଶେଷ ଲଢ଼େଇ ଲଢୁଛି। ସଶସ୍ତ୍ର ଏଲଡବ୍ଲୁଇ କ୍ୟାଡରଙ୍କୁ ନିପାତ କରିବାରେ ୨୦୨୪ ମସିହାରେ ସୁରକ୍ଷା ବାହିନୀକୁ ଅଭୂତପୂର୍ବ ସଫଳତା ମିଳିଛି। ଚଳିତ ବର୍ଷ ଏପର୍ଯ୍ୟନ୍ତ ୨୦୨ ଜଣ ଏଲଡବ୍ଲୁଇ କ୍ୟାଡରଙ୍କୁ ନିପାତ କରାଯାଇଛି, ୨୦୨୪ର ପ୍ରଥମ ୯ ମାସରେ ୭୨୩ ଜଣ ଏଲଡବ୍ଲୁଇ କ୍ୟାଡର ଆତ୍ମସମର୍ପଣ କରିଥିବା ବେଳେ ୮୧୨ ଜଣଙ୍କୁ ଗିରଫ କରାଯାଇଛି। ୨୦୨୪ରେ ଏଲଡବ୍ଲୁଇ ପ୍ରଭାବିତ ଜିଲ୍ଲା ସଂଖ୍ୟା ମାତ୍ର ୩୮କୁ ଖସି ଆସିଛି।

କେନ୍ଦ୍ର ସରକାର କ୍ଷତିଗ୍ରସ୍ତ ରାଜ୍ୟର ଦୁର୍ଗମ ଅଂଚଳରେ ଉନ୍ନୟନମୂଳକ ଯୋଜନା ପହଞ୍ଚାଇବା ପାଇଁ ସଡ଼କ ଏବଂ ମୋବାଇଲ ଯୋଗାଯୋଗକୁ ପ୍ରୋତ୍ସାହନ ଦେବା ସମେତ ଅନେକ ପଦକ୍ଷେପ ଗ୍ରହଣ କରିଛନ୍ତି। ଏଲଡବ୍ଲୁଇ ପ୍ରଭାବିତ ଅଂଚଳରେ ବର୍ତ୍ତମାନ ସୁଦ୍ଧା ୧୪୪୦୦ କିଲୋମିଟର ରାସ୍ତା ନିର୍ମାଣ କରାଯାଇଛି ଏବଂ ପାଖାପାଖି ୬୦୦୦ ମୋବାଇଲ ଟାୱାର ଲଗାଯାଇଛି।

ନୂଆଦିଲ୍ଲୀ: କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ ଅମିତ ଶାହ ଅହମ୍ମଦାବାଦ ମ୍ୟୁନିସିପାଲ କର୍ପୋରେସନ (ଏଏମସି)ର ବିଭିନ୍ନ ଉନ୍ନୟନମୂଳକ କାର୍ଯ୍ୟ ସମେତ ଗୁଜରାଟରେ ୯୧୯ କୋଟି ଟଙ୍କାର ପ୍ରକଳ୍ପର ଉଦଘାଟନ ଓ ଶିଳାନ୍ୟାସ କରିଛନ୍ତି। ଏହି ଅବସରରେ ଗୁଜରାଟର ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲ ଏବଂ ଅନ୍ୟାନ୍ୟ ମାନ୍ୟଗଣ୍ୟ ବ୍ୟକ୍ତି ମଧ୍ୟ ଉପସ୍ଥିତ ଥିଲେ।

ନବରାତ୍ରୀ ଶୁଭେଚ୍ଛା ସହିତ ତାଙ୍କ ଅଭିଭାଷଣ ଆରମ୍ଭ କରି ଅମିତ ଶାହ କହିଛନ୍ତି ଯେ ଆଜି ୯୧୯ କୋଟି ଟଙ୍କାର ଉନ୍ନୟନ ମୂଳକ ପ୍ରକଳ୍ପର ଉଦଘାଟନ ଓ ଶିଳାନ୍ୟାସ କରାଯାଇଛି, ଯେଉଁଥିରେ ସ୍ୱାସ୍ଥ୍ୟ, ଶିକ୍ଷା, ପାଠାଗାର, ପାର୍କ ଏବଂ ରାସ୍ତାକଡ଼ କ୍ଷୁଦ୍ର ବ୍ୟବସାୟୀଙ୍କ ସହିତ ଜଡ଼ିତ କାର୍ଯ୍ୟ ଅନ୍ତର୍ଭୁକ୍ତ। ସେଥିମଧ୍ୟରୁ ସବୁଠାରୁ ଗୁରୁତ୍ୱପୂର୍ଣ୍ଣ ହେଉଛି ମ୍ୟୁନିସିପାଲ ନଗର ପ୍ରାଥମିକ ଶିକ୍ଷା ସମିତି ଦ୍ୱାରା ଆଧୁନିକ ବିଦ୍ୟାଳୟ ନିର୍ମାଣ। ଶ୍ରୀ ଶାହ ଏଏମସିକୁ କୃତଜ୍ଞତା ଜ୍ଞାପନ କରି କହିଥିଲେ ଯେ ନିଗମର ପ୍ରୟାସ ଯୋଗୁଁ ତାଙ୍କ ସଂସଦୀୟ ନିର୍ବାଚନ ମଣ୍ଡଳୀର ସମସ୍ତ ପୌର ପ୍ରାଥମିକ ବିଦ୍ୟାଳୟ ସଫଳତାର ସହ ମଡେଲ ସ୍କୁଲରେ ପରିଣତ ହୋଇଛି।

କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ କହିଛନ୍ତି ଯେ ପ୍ରାଥମିକ ଶିକ୍ଷା ସମିତିର ପଦକ୍ଷେପରୁ ଯଦି ପିଲାମାନେ ଉପଯୁକ୍ତ ଭାବେ ଉପକୃତ ହୁଅନ୍ତି, ତେବେ ଭାରତର ଭବିଷ୍ୟତ ଉଜ୍ଜ୍ୱଳ ହେବାରେ କୌଣସି ସନ୍ଦେହ ନାହିଁ। ଗରିବ ପରିବାରର ପିଲାମାନେ ବିଜ୍ଞାନ, କଳା, ସଙ୍ଗୀତ ଆଦି ବିଷୟରେ ଆଗ୍ରହ ଦେଖାଉଥିବା ଦେଖିଲେ ଜୀବନରେ ଥିବା ସମସ୍ତ ନିରାଶା ଦୂର ହୋଇଯାଏ ଏବଂ ଭାରତର ଭବିଷ୍ୟତ ଉଜ୍ଜ୍ୱଳ ବୋଲି ଆମେ ଆତ୍ମବିଶ୍ୱାସର ସହ ଅନୁଭବ କରିଥାଉ।

ଅମିତ ଶାହ କହିଛନ୍ତି ଯେ ଆଜି ଗାନ୍ଧୀନଗର ଲୋକସଭା ନିର୍ବାଚନ ମଣ୍ଡଳୀରେ ପାଖାପାଖି ୪୭୨ କୋଟି ଟଙ୍କାର ଉନ୍ନୟନମୂଳକ ପ୍ରକଳ୍ପର ଉଦଘାଟନ ଓ ଶିଳାନ୍ୟାସ କରାଯାଇଛି। ଏହାବ୍ୟତୀତ ସାଂସଦ ହସମୁଖଭାଇ ପଟେଲଙ୍କ ଅହମ୍ମଦାବାଦ ପୂର୍ବ ଲୋକସଭା ନିର୍ବାଚନ ମଣ୍ଡଳୀ ଏବଂ ସାଂସଦ ଦିନେଶଭାଇ ମକୱାନାଙ୍କ ଅହମ୍ମଦାବାଦ ପଶ୍ଚିମ ଲୋକସଭା ନିର୍ବାଚନ ମଣ୍ଡଳୀରେ ପାଖାପାଖି ୪୪୬ କୋଟି ଟଙ୍କାର ଉନ୍ନୟନ ମୂଳକ ପ୍ରକଳ୍ପର ଉଦଘାଟନ ଓ ଶୁଭାରମ୍ଭ କରାଯାଇଛି। ଏହି ସମସ୍ତ ଉନ୍ନୟନ ମୂଳକ ପ୍ରକଳ୍ପ ଅହମ୍ମଦାବାଦ ସହରରବାସୀଙ୍କ ପାଇଁ ସୁବିଧା ବଢ଼ାଇବ ବୋଲି ସେ ଉଲ୍ଲେଖ କରିଛନ୍ତି।

ଶ୍ରୀ ଶାହ ଆହୁରି କହିଛନ୍ତି ଯେ ଗୁଜରାଟ ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲ ଗତ କିଛି ବର୍ଷ ମଧ୍ୟରେ ଅହମ୍ମଦାବାଦ ସହର, କାଲୋଲ ଏବଂ ସାନନ୍ଦ ତାଲୁକା, ଅହମ୍ମଦାବାଦ ସହରର କିଛି ଅଞ୍ଚଳ ଏବଂ ଗାନ୍ଧୀନଗର ଲୋକସଭା ନିର୍ବାଚନ ମଣ୍ଡଳୀରେ ୨୩,୯୫୧ କୋଟି ଟଙ୍କାର ପ୍ରକଳ୍ପକୁ ଅନୁମୋଦନ କରିଛନ୍ତି। ଏହାବ୍ୟତୀତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରାୟ ୧୪,୦୦୦ କୋଟି ଟଙ୍କାର ଉନ୍ନୟନ ମୂଳକ ପ୍ରକଳ୍ପର ଉଦଘାଟନ କରିଛନ୍ତି । ଗତ ୫ ବର୍ଷ ମଧ୍ୟରେ ମାତ୍ର ଗୋଟିଏ ଲୋକସଭା ନିର୍ବାଚନ ମଣ୍ଡଳୀରେ ମୋଟ ୩୭ ହଜାର କୋଟି ଟଙ୍କାର ଉନ୍ନୟନ ମୂଳକ ପ୍ରକଳ୍ପ କରାଯାଇଛି।

ଅହମ୍ମଦାବାଦର ୭ଟି ବିଧାନସଭା ନିର୍ବାଚନମଣ୍ଡଳୀରେ ଅନେକ ବିକାଶମୂଳକ ପଦକ୍ଷେପ ନିଆଯାଇଛି ବୋଲି କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ କହିଛନ୍ତି। ଏଥିରେ ଶିଶୁ ପୁଷ୍ଟି, ବ୍ୟାୟାମ ସୁବିଧା, କିଶୋରମାନଙ୍କ ପାଇଁ ଜ୍ଞାନ ବୃଦ୍ଧି ପାଇଁ ପାଠାଗାର, ଜଳ ସଂଗ୍ରହ ପୋଖରୀ, ବର୍ଷକୁ ୪ ନିୟୁତ ଚାରା ରୋପଣ, ରାସ୍ତା, ଓଭରବ୍ରିଜ୍, ଷ୍ଟ୍ରିଟ୍ ଲାଇଟ୍, ଡାକ୍ତରଖାନା, ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର ଓ ପ୍ରାଥମିକ ବିଦ୍ୟାଳୟ ନିର୍ମାଣ ଆଦି ରହିଛି।

ଅମିତ ଶାହ କହିଛନ୍ତି ଯେ ଅହମ୍ମଦାବାଦକୁ ସ୍ୱଚ୍ଛତା ଅଭିଯାନ ପ୍ରତିଯୋଗିତାରେ ଅଗ୍ରଣୀ ସ୍ଥାନକୁ ଆଣିବାକୁ ଏଏମସି ନିଷ୍ପତ୍ତି ନେଇଛି। ଆଗାମୀ ସ୍ୱଚ୍ଛତା ସର୍ଭେରେ ଅହମ୍ମଦାବାଦକୁ ଶୀର୍ଷକୁ ଆଣିବା ପାଇଁ ପ୍ରୟାସ କରାଯିବା ଉଚିତ ବୋଲି ସେ ଗୁରୁତ୍ୱାରୋପ କରିଥିଲେ। ଶ୍ରୀ ଶାହ ସ୍ୱୀକାର କରିଛନ୍ତି ଯେ ଏଥର ପ୍ରଥମ ସ୍ଥାନ ହାସଲ କରିବା ସମ୍ଭବ ନୁହେଁ, କିନ୍ତୁ ଆମେ ଏକ ନୂତନ ଆରମ୍ଭ କରିବା ଏବଂ ଅହମ୍ମଦାବାଦ ସୃଷ୍ଟି କରିବା ଦିଗରେ କାର୍ଯ୍ୟ କରିବାକୁ ଲକ୍ଷ୍ୟ ଧାର୍ଯ୍ୟ କରିବା ଉଚିତ ଯାହା ଆସନ୍ତା ବର୍ଷ ସୁଦ୍ଧା ଭାରତର ସମସ୍ତ ପୌର ନିଗମ ମଧ୍ୟରେ ସ୍ୱଚ୍ଛତା କ୍ଷେତ୍ରରେ ଶୀର୍ଷ ସ୍ଥାନରେ ପହଞ୍ଚିବ।

କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ମହାତ୍ମା ଗାନ୍ଧୀଙ୍କ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ହେଉଛନ୍ତି ଏକମାତ୍ର ଜାତୀୟ ନେତା ଯିଏ ସ୍ୱଚ୍ଛତା ଅଭିଯାନକୁ ଜନ ଆନ୍ଦୋଳନରେ ପରିଣତ କରିଛନ୍ତି। ଦେଶର ପ୍ରତ୍ୟେକ ଘରେ ଶୌଚାଳୟ ର ସୁବିଧା ରହିବା ଉଚିତ ବୋଲି ପ୍ରଧାନମନ୍ତ୍ରୀ ମୋଦୀ ସ୍ୱପ୍ନ ଦେଖିଥିଲେ। ସ୍ୱାଧୀନତାର ୭୦ ବର୍ଷ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ଅଭିଯାନ ଆରମ୍ଭ କରିଥିଲେ। ପ୍ରତ୍ୟେକ ଘରେ ବିଶୁଦ୍ଧ ପାନୀୟ ଜଳ ଉପଲବ୍ଧ ହେବା ଏବଂ ଆମ ଘର, ସମାଜ, ରାସ୍ତାଘାଟ, ସହର ଏବଂ ଗ୍ରାମଗୁଡିକ ଯେପରି ସ୍ୱଚ୍ଛ ରହିବ ତାହା ସୁନିଶ୍ଚିତ କରିବା ତାଙ୍କର ଲକ୍ଷ୍ୟ ଥିଲା, ଯାହା ନାଗରିକମାନଙ୍କ ମଧ୍ୟରେ ସ୍ୱଚ୍ଛତାର ସଂସ୍କୃତିକୁ ପ୍ରୋତ୍ସାହିତ କରିବ। କେନ୍ଦ୍ର ଗୃହମନ୍ତ୍ରୀ ଉଲ୍ଲେଖ କରିଛନ୍ତି ଯେ ନରେନ୍ଦ୍ର ମୋଦୀ ହେଉଛନ୍ତି ଏକମାତ୍ର ପ୍ରଧାନମନ୍ତ୍ରୀ ଯିଏ କି ଲାଲକିଲ୍ଲା ପ୍ରାଚୀରରୁ ଶୌଚାଳୟ ନିର୍ମାଣ ବିଷୟରେ କହିଛନ୍ତି।

ଅମିତ ଶାହା କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନାଗାଲାଣ୍ଡରୁ କେରଳ ଏବଂ ଉତ୍ତରପ୍ରଦେଶରୁ ଆସାମ ପର୍ଯ୍ୟନ୍ତ ସମଗ୍ର ଦେଶରେ ସ୍ୱଚ୍ଛତା ଅଭିଯାନ ଏବଂ ଏହାର ମୂଲ୍ୟବୋଧକୁ ପ୍ରୋତ୍ସାହିତ କରିବା ପାଇଁ କାର୍ଯ୍ୟ କରିଛନ୍ତି।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଏବଂ କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଅମିତ ଶାହଙ୍କ ମାର୍ଗଦର୍ଶନରେ ଗୃହ ମନ୍ତ୍ରଣାଳୟ ସ୍ୱଚ୍ଛ ଭାରତ ଅଭିଯାନ ପାଇଁ ପ୍ରତିଶ୍ରୁତିବଦ୍ଧ। ସ୍ୱଚ୍ଛ ଭାରତ ଅଭିଯାନ ଅଧୀନରେ ସ୍ୱଚ୍ଛତା ଏବଂ ଲୋକଙ୍କ ନିରନ୍ତର ସକ୍ରିୟ ଅଂଶଗ୍ରହଣ ସୁନିଶ୍ଚିତ କରିବା ପାଇଁ ଗୃହ ମନ୍ତ୍ରଣାଳୟ ଦ୍ୱାରା ଅନେକ ପ୍ରୟାସ କରାଯାଉଛି। ଏହି ପ୍ରୟାସର ଏକ ଅଂଶ ଭାବରେ ସୀମା ପରିଚାଳନା ସଚିବ ଶ୍ରୀ ରାଜେନ୍ଦ୍ର କୁମାର ନର୍ଥ ବ୍ଲକରେ ଗୃହ ମନ୍ତ୍ରଣାଳୟର ଅଧିକାରୀ ଓ କର୍ମଚାରୀମାନଙ୍କୁ ସ୍ୱଚ୍ଛତାର ଶପଥ ପାଠ କରାଇଥିଲେ।

ଗୃହ ମନ୍ତ୍ରଣାଳୟର ଅଧିକାରୀ ଓ କର୍ମଚାରୀମାନେ ନର୍ଥ ବ୍ଲକ ପରିସରରେ ସ୍ୱଚ୍ଛତା ପାଇଁ ଶ୍ରମଦାନ କରିଥିଲେ। ସ୍ୱଚ୍ଛ ଭାରତ ଅଭିଯାନ ଅଧୀନରେ ସ୍ୱଚ୍ଛତା ଏବଂ ଲୋକଙ୍କ ସକ୍ରିୟ ଅଂଶଗ୍ରହଣ ସୁନିଶ୍ଚିତ କରିବା ଦିଗରେ ଗୃହ ମନ୍ତ୍ରଣାଳୟ ଦ୍ୱାରା କରାଯାଉଥିବା ଅନେକ ପ୍ରୟାସ ମଧ୍ୟରୁ ଏହି କାର୍ଯ୍ୟକ୍ରମ ଅନ୍ୟତମ। ସ୍ୱଚ୍ଛତା ପ୍ରତିଶ୍ରୁତି ଆମ ଆଖପାଖକୁ ପରିଷ୍କାର ରଖିବା, ବର୍ଜ୍ୟବସ୍ତୁର ଦାୟିତ୍ୱପୂର୍ଣ୍ଣ ନିଷ୍କାସନକୁ ପ୍ରୋତ୍ସାହିତ କରିବା ଏବଂ ଦୈନନ୍ଦିନ ଜୀବନରେ ସ୍ଥାୟୀ ଅଭ୍ୟାସ ଗ୍ରହଣ କରିବା ଉପରେ ଗୁରୁତ୍ୱାରୋପ କରିଥିଲା।

​ଏହି ଅବସରରେ ସଚିବ (ସୀମା ପରିଚାଳନା) ଗୃହ ମନ୍ତ୍ରଣାଳୟର ସମସ୍ତ ଅଧିକାରୀ ଓ କର୍ମଚାରୀଙ୍କୁ ସେମାନଙ୍କ ବ୍ୟକ୍ତିଗତ ଏବଂ ବୃତ୍ତିଗତ ଜୀବନରେ ସ୍ୱଚ୍ଛ ଭାରତ ଅଭିଯାନ ଦିଗରେ ଯୋଗଦାନ ଜାରି ରଖିବାକୁ ଉତ୍ସାହିତ କରିଥିଲେ। ସେ କହିଥିଲେ ଯେ ଗୃହ ମନ୍ତ୍ରଣାଳୟ ଏକ ସ୍ୱଚ୍ଛ, ସବୁଜ ଭାରତର ଲକ୍ଷ୍ୟ ପ୍ରତି ପ୍ରତିଶ୍ରୁତିବଦ୍ଧ ଏବଂ ପରିବେଶ ସୁରକ୍ଷା ଦିଗରେ ସ୍ୱଚ୍ଛତା, ସ୍ଥାୟୀତା ଏବଂ ଦାୟିତ୍ୱକୁ ପ୍ରୋତ୍ସାହିତ କରୁଥିବା ପଦକ୍ଷେପରେ ସକ୍ରିୟ ଭାବରେ ସାମିଲ ହେବ।

ସ୍ୱଚ୍ଛ ଭାରତ ଅଭିଯାନ ପ୍ରତି ନିଜର ପ୍ରତିବଦ୍ଧତାକୁ ପ୍ରଦର୍ଶିତ କରି ଗୃହ ମନ୍ତ୍ରଣାଳୟର ବହୁ ସଂଖ୍ୟକ ଅଧିକାରୀ ଏବଂ କର୍ମଚାରୀ ସଫେଇ କାର୍ଯ୍ୟରେ ଅଂଶଗ୍ରହଣ କରିଥିଲେ ଏବଂ କାର୍ଯ୍ୟାଳୟ ପରିସରରେ ଥିବା ସାଧାରଣ ସ୍ଥାନକୁ ଆବର୍ଜନାମୁକ୍ତ କରିବା ସୁନିଶ୍ଚିତ କରିଥିଲେ। ଏହି ସାମୂହିକ ସ୍ୱଚ୍ଛତା ଅଭିଯାନ ପରିବେଶକୁ ସ୍ୱଚ୍ଛ ରଖିବାରେ ପ୍ରତ୍ୟେକ ବ୍ୟକ୍ତିର ଦାୟିତ୍ୱ ଦେଖାଇବାକୁ ପ୍ରୟାସ ଭାବରେ କାର୍ଯ୍ୟ କରେ।

ପରିବେଶ ସୁରକ୍ଷା ଓ ସବୁଜ ଭବିଷ୍ୟତ ପ୍ରତି ନିଜର ସମର୍ପଣ ଦେଖାଇ ଗୃହ ମନ୍ତ୍ରଣାଳୟର ବହୁ ସଂଖ୍ୟକ ଅଧିକାରୀ ଓ କର୍ମଚାରୀ ‘ଏକ ପେଡ୍ ମା କେ ନାମ’ ଅଭିଯାନ ଅଧୀନରେ ନର୍ଥ ବ୍ଲକରେ ଥିବା ପାର୍କରେ ବୃକ୍ଷରୋପଣ କରିଥିଲେ।

ନୂଆଦିଲ୍ଲୀ: କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ ନୂଆଦିଲ୍ଲୀସ୍ଥିତ ତାଙ୍କ ବାସଭବନରେ ଛତିଶଗଡ଼ର ନକ୍ସଲ ହିଂସାରେ ପୀଡ଼ିତଙ୍କ ସହ ଆଲୋଚନା କରିଛନ୍ତି। ବସ୍ତର ଶାନ୍ତି କମିଟି ତତ୍ତ୍ୱାବଧାନରେ ଛତିଶଗଡ଼ର ଏଲଡବ୍ଲୁଇ ପ୍ରଭାବିତ ଅଞ୍ଚଳର ନକ୍ସଲ ହିଂସାରେ ପ୍ରଭାବିତ ହୋଇଥିବା ୫୫ ଜଣଙ୍କୁ ଏଥିରେ ସାମିଲ କରାଯାଇଥିଲା।

ବସ୍ତର ଶାନ୍ତି କମିଟି ଛତିଶଗଡରେ ନକ୍ସଲ ପ୍ରଭାବିତ ଲୋକଙ୍କ ଦୁର୍ଦ୍ଦଶା ଉପରେ ଆଲୋକପାତ କରି ଏକ ଡକ୍ୟୁମେଣ୍ଟାରୀ ମଧ୍ୟ ପ୍ରଦର୍ଶିତ କରିଥିଲା। କିଛି ପୀଡ଼ିତ ନିଜ ଦୁଃଖ ଗୃହମନ୍ତ୍ରୀଙ୍କୁ ଜଣାଇଥିଲେ।

ନକ୍ସଲ ହିଂସାରେ ପୀଡ଼ିତ ଲୋକଙ୍କ ସହ କଥାବାର୍ତ୍ତା ବେଳେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ କେନ୍ଦ୍ର ସରକାର ୨୦୨୬ ମାର୍ଚ୍ଚ ସୁଦ୍ଧା ନକ୍ସଲବାଦକୁ ସମ୍ପୂର୍ଣ୍ଣ ରୂପେ ନିପାତ କରିବାକୁ ପ୍ରତିଶ୍ରୁତିବଦ୍ଧ। ମୋଦୀ ସରକାରଙ୍କ ନୀତି ଯୋଗୁଁ ବାମପନ୍ଥୀ ଉଗ୍ରବାଦ ଏବେ ଛତିଶଗଡ଼ର କିଛି ଜିଲ୍ଲାରେ ସୀମିତ ରହିଛି। ଶ୍ରୀ ଶାହ କହିଛନ୍ତି ଯେ ନକ୍ସଲବାଦ ଉଭୟ ମାନବିକତା ଏବଂ ଦେଶର ଆଭ୍ୟନ୍ତରୀଣ ସୁରକ୍ଷା ପାଇଁ ବିପଦ।

ଅମିତ ଶାହା ଆହୁରି କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତ ସରକାର ଏବଂ ଛତିଶଗଡ଼ ସରକାର ଆଗାମୀ ତିନି ମାସ ମଧ୍ୟରେ ଏଲଡବ୍ଲୁଇ ଦ୍ୱାରା ପ୍ରଭାବିତ ଲୋକଙ୍କ ସାମଗ୍ରିକ ବିକାଶ ପାଇଁ ଏକ ବ୍ୟାପକ ଯୋଜନା ଆଣିବେ। ଏହି ଯୋଜନା ମାଧ୍ୟମରେ ଛତିଶଗଡ଼ ସମେତ ସମଗ୍ର ଦେଶରେ ବାମପନ୍ଥୀ ଉଗ୍ରବାଦ ଦ୍ୱାରା ପ୍ରଭାବିତ ଲୋକମାନେ ସ୍ୱାସ୍ଥ୍ୟ ସେବା ସୁବିଧା, ରୋଜଗାର ସୁଯୋଗ ଏବଂ ଅନ୍ୟାନ୍ୟ କଲ୍ୟାଣକାରୀ ଯୋଜନାରୁ ଉପକୃତ ହେବେ ବୋଲି ସେ କହିଥିଲେ।

କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ବାମପନ୍ଥୀ ଉଗ୍ରବାଦ ପ୍ରଭାବିତ ଅଞ୍ଚଳରେ ବିକାଶମୂଳକ ଯୋଜନା ମାଧ୍ୟମରେ ମୋଦୀ ସରକାର ନକ୍ସଲଙ୍କୁ ଏକ ବାର୍ତ୍ତା ଦେଇଛନ୍ତି ଯେ ଯିଏ ବଞ୍ଚାଇଥାଏ ସିଏ ହତ୍ୟାକାରୀଙ୍କ ଠାରୁ ବଡ। କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ଯେଉଁମାନେ ନକ୍ସଲଙ୍କ ମାନବିକ ଅଧିକାରକୁ ସମର୍ଥନ କରୁଛନ୍ତି ସେମାନେ ନକ୍ସଲବାଦ ଯୋଗୁଁ କ୍ଷତିଗ୍ରସ୍ତ ହୋଇଥିବା ଲୋକଙ୍କ ମାନବିକ ଅଧିକାର ବିଷୟରେ ମଧ୍ୟ ବିଚାର କରିବା ଉଚିତ୍।

ହିଂସାର ମାର୍ଗ ଛାଡି ସମାଜର ମୁଖ୍ୟ ସ୍ରୋତରେ ସାମିଲ ହେବାକୁ ବାମପନ୍ଥୀ ଉଗ୍ରବାଦୀଙ୍କୁ ଗୃହମନ୍ତ୍ରୀ ନିବେଦନ କରିଛନ୍ତି। ୨୦୨୬ ମାର୍ଚ୍ଚ ସୁଦ୍ଧା ବାମପନ୍ଥୀ ଉଗ୍ରବାଦର ସମ୍ପୂର୍ଣ୍ଣ ଉଚ୍ଛେଦ ପରେ ବସ୍ତର ପୁଣି ଥରେ ସୁନ୍ଦର, ଶାନ୍ତିପୂର୍ଣ୍ଣ ଏବଂ ବିକଶିତ ହେବ ବୋଲି ସେ ବିଶ୍ୱାସ ବ୍ୟକ୍ତ କରିଥିଲେ।