Categories
ବିଶେଷ ଖବର

ସଂସଦର ବଜେଟ୍ ଅଧିବେଶନ ପୂର୍ବରୁ ପ୍ରଧାନମନ୍ତ୍ରୀଙ୍କ ଅଭିଭାଷଣ

ନୂଆଦିଲ୍ଲୀ: ୨୦୨୩ ବର୍ଷର ବଜେଟ୍ ଅଧିବେଶନ ଆଜିଠାରୁ ଆରମ୍ଭ ହେଉଛି। ଏହି ପ୍ରରିପ୍ରେକ୍ଷୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସଂସଦରେ ଅଭିଭାଷଣ ପ୍ରଦାନ କରଛନ୍ତି। ସେ କହିଛନ୍ତି ଯେ, ଆଜି ଏକ ଗୁରୁତ୍ୱପୂର୍ଣ୍ଣ ସମୟ ଅଟେ। ଭାରତର ବର୍ତ୍ତମାନର ରାଷ୍ଟ୍ରପତି ଆଜି ପ୍ରଥମ ଥର ସଂସଦର ମିଳିତ ଗୃହକୁ ସମ୍ବୋଧିତ କରିବାକୁ ଯାଉଛନ୍ତି। ରାଷ୍ଟ୍ରପତିଙ୍କ ଭାଷଣ ହେଉଛି ଭାରତର ସମ୍ବିଧାନର ଗୌରବ, ଭାରତର ସଂସଦୀୟ ବ୍ୟବସ୍ଥାର ଗୌରବ ଏବଂ ବିଶେଷ ଭାବରେ ଆଜି ମଧ୍ୟ ମହିଳାମାନଙ୍କୁ ସମ୍ମାନ ଦେବା ତଥା ଦୂର ଦୂରାନ୍ତର ଜଙ୍ଗଲରେ ବାସ କରୁଥିବା ଆମ ଦେଶର ମହାନ ଆଦିବାସୀ ପରମ୍ପରାକୁ ସମ୍ମାନ ଦେବା ପାଇଁ ଏକ ଉତ୍ସବ ଅଟେ। କେବଳ ସାଂସଦ ନୁହଁନ୍ତି ଆଜି ସମଗ୍ର ଭାରତ ପାଇଁ ଗୌରବର ମୁହୂର୍ତ୍ତ ଯେ ଭାରତର ବର୍ତ୍ତମାନର ରାଷ୍ଟ୍ରପତି ଆଜି ତାଙ୍କର ପ୍ରଥମ ଭାଷଣ ଦେଉଛନ୍ତି।

ଆମର ସଂସଦୀୟ କାର୍ଯ୍ୟରେ ଛଅ-ସାତ ଦଶନ୍ଧିରୁ ଯେଉଁ ପରମ୍ପରାଗୁଡ଼ିକ ବିକଶିତ ହୋଇଛି, ଦେଖାଯାଉଛି ଯେ ଯଦି କୌଣସି ନୂତନ ସାଂସଦ ଯିଏ କି ଗୃହରେ ପ୍ରଥମ ଥର ପାଇଁ ଛିଡ଼ା ହୁଅନ୍ତି, ତେବେ ସେ କୌଣସି ଦଳର ହୋଇ ଥାଆନ୍ତୁ ନା କାହିଁକି, ପ୍ରଥମ ଥର ପାଇଁ ଯେତେବେଳେ ସେ ତାଙ୍କର ବକ୍ତବ୍ୟ ରଖନ୍ତି, ସମଗ୍ର ଗୃହ ତାଙ୍କୁ ସମ୍ମାନ କରେ, ଏପରି ଭାବରେ ତାଙ୍କର ଆତ୍ମବିଶ୍ୱାସ ବଢିଯାଏ, ଏକ ସକରାତ୍ମକ ପରିବେଶ ସୃଷ୍ଟି ହୁଏ। ଏହା ଏକ ମହାନ ଏବଂ ଉତ୍ତମ ପରମ୍ପରା । ଆଜି ରାଷ୍ଟ୍ରପତିଙ୍କ ଭାଷଣ ମଧ୍ୟ ପ୍ରଥମ ଭାଷଣ ଅଟେ।

ସମସ୍ତ ସାଂସଦଙ୍କ ତରଫରୁ ଏହି ମୁହୂର୍ତ୍ତକୁ ଉତ୍ସାହ, ଉଦ୍ଦୀପନା ଏବଂ ଶକ୍ତିରେ ପରିପୂର୍ଣ୍ଣ କରିବା ଆମର ଦାୟିତ୍ୱ ଅଟେ। ମୋର ବିଶ୍ୱାସ ଯେ ଆମର ସମସ୍ତ ସାଂସଦ ଏହି ପରୀକ୍ଷାରେ ସଫଳାର ସହ ଉତ୍ତୀର୍ଣ୍ଣ ହେବେ । ଆମ ଦେଶର ଅର୍ଥମନ୍ତ୍ରୀ ମଧ୍ୟ ଜଣେ ମହିଳା, ସେ ଆସନ୍ତାକାଲି ଆଉ ଏକ ବଜେଟ୍ ନେଇ ଦେଶ ସାମ୍ନାକୁ ଆସୁଛନ୍ତି। ଆଜିର ବୈଶ୍ୱିକ ପରିସ୍ଥିତିରେ କେବଳ ଭାରତ ନୁହେଁ ସମଗ୍ର ବିଶ୍ୱର ଧ୍ୟାନ ଭାରତର ବଜେଟ୍ ଉପରେ ରହିଛି।

ବିଶ୍ୱ ଅର୍ଥନୀତିରେ ହଲଚଲ ସୃଷ୍ଟି ହୋଇଥିବାବେଳେ ଭାରତର ବଜେଟ୍ କେବଳ ଭାରତର ସାଧାରଣ ଲୋକଙ୍କର ଆଶା ଓ ସ୍ୱପ୍ନକୁ ପୂରଣ କରିବାକୁ ଚେଷ୍ଟା କରିବ ନାହିଁ, ବରଂ ବିଶ୍ୱ ଦେଖୁଥିବା ଆଶାର କିରଣକୁ ଅଧିକ ଉଜ୍ଜ୍ୱଳ ଦେଖାଇବା ଉଚିତ୍‍। ମୋର ସମ୍ପୂର୍ଣ୍ଣ ବିଶ୍ୱାସ ଅଛି ଯେ ର୍ନିମଳା ଜୀ ଏହି ଆଶା ପୂରଣ କରିବା ପାଇଁ ଯଥାସମ୍ଭବ ଉଦ୍ୟମ କରିବେ।

ଭାରତୀୟ ଜନତା ପାର୍ଟି ନେତୃତ୍ୱାଧୀନ ଏନଡିଏ ସରକାରଙ୍କର କେବଳ ଗୋଟିଏ ଉଦ୍ଦେଶ୍ୟ, ଗୋଟିଏ ଲକ୍ଷ୍ୟ ରହିଛି ଏବଂ ଆମର କାର୍ଯ୍ୟ ସଂସ୍କୃତିର କେନ୍ଦ୍ର ବିନ୍ଦୁରେ ଗୋଟିଏ ବିଚାର ହେଉଛି ‘ଭାରତ ପ୍ରଥମ, ନାଗରିକ ପ୍ରଥମ\’ ସବୁଠାରୁ ଆଗେ ଦେଶ, ସବୁଠାରୁ ଆଗେ ଦେଶବାସୀ। ସମାନ ଆବେଗକୁ ଆଗକୁ ନେଇ ବଜେଟ୍ ଅଧିବେଶନରେ ମଧ୍ୟ ବିତର୍କ ହେବ, ବିତର୍କ ହେବା ବି ଉଚିତ ଏବଂ ମୁଁ ନିଶ୍ଚିତ ଯେ ଆମର ସମସ୍ତ ବିରୋଧୀ ବନ୍ଧୁମାନେ ବହୁତ ପ୍ରସ୍ତୁତିର ସହିତ ଭଲଭାବେ ଅଧ୍ୟୟନ କରିବା ପରେ ଗୃହରେ ସେମାନଙ୍କର ମତ ଉପସ୍ଥାପନ କରିବେ।

ଦେଶର ନୀତି ର୍ନିଦ୍ଧାରଣରେ ଗୃହ ବହୁତ ଭଲ ଆଲୋଚନା କରିବ ଏବଂ ଅମୃତ ବାହାର କରିବ ଯାହା ଦେଶ ପାଇଁ ଉପଯୋଗୀ ହେବ। ମୁଁ ପୁଣି ଥରେ ତୁମ ସମସ୍ତଙ୍କୁ ସ୍ୱାଗତ କରୁଛି।

ମୁଁ ଆପଣଙ୍କୁ ଅନେକ ଅନେକ ଶୁଭେଚ୍ଛା ଜଣାଉଛି। ଧନ୍ୟବାଦ।

Categories
ଆଜିର ଖବର ଜାତୀୟ ଖବର

ଶ୍ରୀ ସ୍ୱାମୀନାରାୟଣ ଗୁରୁକୁଳ ରାଜକୋଟ ସଂସ୍ଥାନର ୭୫ ତମ ଅମୃତ ମହୋତ୍ସବରେ ପ୍ରଧାନମନ୍ତ୍ରୀଙ୍କ ଅଭିଭାଷଣ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି (୨୪-୧୨-୨୦୨୨) ଶ୍ରୀ ସ୍ୱାମୀ ନାରାୟଣ ଗୁରୁକୁଳ ରାଜକୋଟ ସଂସ୍ଥାନର ୭୫ତମ ଅମୃତ ମହୋତ୍ସବରେ ଆଭାସୀ ମାଧ୍ୟମରେ ତାଙ୍କର ଅଭିଭାଷଣ ପ୍ରଦାନ କରିଛନ୍ତି।

ସମବେତ ଜନତାଙ୍କୁ ଉଦବୋଧନ ଦେଇ ପ୍ରଧାନମନ୍ତ୍ରୀ ଶ୍ରୀ ସ୍ୱାମୀ ନାରାୟଣ ଗୁରୁକୁଳ ରାଜକୋଟ ସଂସ୍ଥାନ ସହ ରହିଥିବା ସମସ୍ତଙ୍କୁ ୭୫ ବର୍ଷ ସମାପନ ଅବସରରେ ଅଭିନନ୍ଦନ ଜଣାଇଛନ୍ତି। ସେ ମଧ୍ୟ ଏହି ଯାତ୍ରାରେ ଅଦ୍ଭୁତପୂର୍ବ ଉଦ୍ୟମ ପାଇଁ ଶାସ୍ତ୍ରୀଜୀ ମହାରାଜ ଶ୍ରୀ ଧର୍ମଜୀବାନନ୍ଦଜୀ ସ୍ୱାମୀଙ୍କ ପ୍ରଶଂସା କରିଛନ୍ତି। ଜଣେ ଭଗବାନ ଶ୍ରୀ ସ୍ୱାମୀ ନାରାୟଣଙ୍କ ନାମ ସ୍ମରଣ କରି ନବଚେତନାର ଅଭିଜ୍ଞତା ଅର୍ଜନ କରିପାରିବ ବୋଲି ପ୍ରଧାନମନ୍ତ୍ରୀ କହିଛନ୍ତି।

ଦେଶର ଅମୃତକାଳରେ ଏହି ଘଟଣା ଏକ ଅଦ୍ଭୁତ ସଂଯୋଗ ବୋଲଇ ପ୍ରଧାନମନ୍ତ୍ରୀ କହିଛନ୍ତି। ଇତିହାସରେ ଏହି ପ୍ରକାର ଅନେକ ସଂଯୋଗବଶତଃ ଭାରତୀୟ ପରମ୍ପରା ଅଧିକ ଶକ୍ତିଶାଳୀ ହୋଇଥିବା ସେ ପ୍ରକାଶ କରିଥିଲେ। ପ୍ରଧାନମନ୍ତ୍ରୀ ଏପରି ସଂଗମ କର୍ତ୍ତବ୍ୟ ଓ କଠିନ ପରିଶ୍ରମ, ସଂସ୍କୃତି ଓ ଉତ୍ସର୍ଗ, ଆଧ୍ୟାତ୍ମିକତା ଓ ଆଧୁନିକତା ଯୋଗୁ ସମ୍ଭବ ହୋଇଛି ବୋଲି କହିଥିଲେ। ଭାରତ ସ୍ୱାଧୀନ ହେବା ପରେ ପ୍ରାଚୀନ ଭାରତୀୟ ଶିକ୍ଷା ପଦ୍ଧତିର ପୁନରୁଦ୍ଧାର ଓ ଏହାର ଅବହେଳାକୁ ପ୍ରଧାନମନ୍ତ୍ରୀ ସମାଲୋଚନା କରିଥିଲେ। ଯେତେବେଳେ ପୂର୍ବ ସରକାରମାନେ ଏଥିରେ ବିଫଳ ହେଲେ। ଜାତୀୟ ଋଷି ଓ ଆଚାର୍ଯ୍ୟଗଣ ଏହାର ମଙ୍ଗ ଧରିଥିଲେ। “ସ୍ୱାମୀ ନାରାୟଣ ଗୁରୁକୁଳ ଏହି ‘ସୁଯୋଗ୍ୟ’ର ଏକ ଉଦାହରଣ” ବୋଲି ଶ୍ରୀ ମୋଦୀ କହିଥିଲେ। ସ୍ୱାଧୀନତା ସଂଗ୍ରାମ ଆଦର୍ଶର ମୁଳଦୂଆ ଉପରେ ପ୍ରତିଷ୍ଠାନ ବିକଶିତ ହୋଇଛି।

“ପ୍ରକୃତ ଜ୍ଞାନର ପ୍ରସାର ହେଉଛି ସବୁଠାରୁ ଗୁରୁତ୍ୱପୂରର୍ଣ୍ଣ କାର୍ଯ୍ୟ ଓ ଏହା ବିଶ୍ୱରେ ଭାରତୀୟ ଜ୍ଞାନ ଓ ଶିକ୍ଷାର ନିଷ୍ଠା ଭାବେ ରହି ଭାରତୀୟ ସଭ୍ୟତାର ମୁଳଦୂଆ ସ୍ଥାପନ କରିଛି” ବୋଲି ପ୍ରଧାନମନ୍ତ୍ରୀ କହିଥିଲେ। ଯଦିଓ ଗୁରୁକୁଳ ବିଦ୍ୟା ପ୍ରତିଷ୍ଠାନ ମାତ୍ର ସାତ ଜଣ ବିଦ୍ୟାର୍ଥୀଙ୍କୁ ନେଇ ରାଜକୋଟରେ ଆରମ୍ଭ ହୋଇଥିଲା ଆଜି ଏହାର ୪ଠଟି ଶାଖା ରହିଛି ଓ ସାରା ବିଶ୍ୱର ହଜାର ହଜାର ବିଦ୍ୟାର୍ଥୀ ଏଥିପ୍ରତି ଆକୃଷ୍ଟ ହେଉଥିବା ପ୍ରଧାନମନ୍ତ୍ରୀ ସୂଚନା ଦେଇଥିଲେ। ସେ ଆହୁରି କହିଥିଲେ ଯେ ଗତ ୭୫ ବର୍ଷ ମଧ୍ୟରେ ଗୁରୁକୁଳ ବିଦ୍ୟାର୍ଥୀମାନଙ୍କ ମନ ଓ ହୃଦୟର ବିକାଶ କରିଛି, ଯାହା ଫଳରେ ସାମଗ୍ରିକ ଉନ୍ନତି ସେମାନଙ୍କର ହୋଇପାରିବ। “ଇସ୍ରୋ ଓ ବାର୍କରେ ବୈଜ୍ଞାନିକ ଓ ଆଧ୍ୟାତ୍ମିକତା କ୍ଷେତ୍ରରେ ଉତ୍ସର୍ଗୀକୃତ ବିଦ୍ୟାର୍ଥୀ ଠାରୁ ଆରମ୍ଭ କରି ଗୁରୁକୁଳ ଦେଶର ପ୍ରତି କ୍ଷେତ୍ରକୁ ପରିପୁଷ୍ଟ କରିଛି” ବୋଲି ସେ କହିଥିଲେ। ପ୍ରଧାନମନ୍ତ୍ରୀ ଗୁରୁକୁଳ ଉପରେ ଆଲୋକପାତ କରି କହିଥିଲେ ଯେ ଯେଉଁଠାରେ ଜଣେ ଗରୀବ ବିଦ୍ୟାର୍ଥୀ ଠାରୁ ମାତ୍ର ଟଙ୍କାଏ ଫିସ୍ ନିଆଯାଏ ସେଠାରେ ତାକୁ ଶିକ୍ଷାପ୍ରାପ୍ତି ଅନେକ ସହଜ ହୋଇଥାଏ।

ଭାରତୀୟ ପରମ୍ପରାର ଜ୍ଞାନକୁ ସର୍ବୋଚ୍ଚ ଜୀବନ ଲକ୍ଷ୍ୟ ଭାବେ ବିବେଚନା କରାଯାଇଥିବା ନେଇ ପ୍ରଧାନମନ୍ତ୍ରୀ କହିଥିଲେ ଯେ ଯେତେବେଳେ ବିଶ୍ୱର ଅନ୍ୟାନ୍ୟ ଭାଗ ସେମାନଙ୍କ ଶାସକ ବଂଶକୁ ନେଇ ପରିଚିତ ହୋଇଥାନ୍ତି, ଭାରତୀୟ ପରିଚୟ ଏହାର ଗୁରୁକୁଳ ସହିତ ଥାଏ। “ଆମର ଗୁରୁକୁଳଗୁଡ଼ିକ ନିରପେକ୍ଷତା, ସମନତା, ଯତ୍ନ ଓ ସେବା ମନୋଭାବର ପ୍ରତିନିଧିତ୍ୱ ଶହ ଶହ ବର୍ଷ କରିଆସିଛନ୍ତି” ବୋଲି ସେ କହିଥିଲେ। ନାଳନ୍ଦା ଓ ତକ୍ଷଶିଳା ଭାରତୀୟ ପ୍ରାଚୀନ ଗୌରବ ସହ ସମତୁଲ ବୋଲି ସେ ସ୍ମରଣ କରାଇ ଦେଇଥିଲେ।

“ଆବିଷ୍କାର ଓ ଗବେଷଣା ଭାରତୀୟ ଜୀବନଧାରାର ଅବିଚ୍ଛେଦ୍ୟ ଅଙ୍ଗ । ଆତ୍ମ-ଆବିଷ୍କାରରୁ ପ୍ରଭୁସତ୍ତା, ଆୟୁର୍ବେଦରୁ ଆଧ୍ୟାତ୍ମ ସମାଜ ବିଜ୍ଞାନରୁ ସୌର ବିଜ୍ଞାନ, ଗଣିତରୁ ଧାତୁ ବିଜ୍ଞାନ ଓ ଶୂନ୍ୟରୁ ଅସୀମ, ଗବେଷଣା ଓ ନୂତନ ଉପସଂହାର ପ୍ରତ୍ୟେକ କ୍ଷେଥ୍ରରେ ଟଣାଯାଇଛି। ଭାରତ ତିମିରାଚ୍ଛନ୍ନ ଯୁଗରେ ମାନବତାକୁ ଦେଖାଇଥିବା ଆଲୋକବର୍ତ୍ତିକା ବିଶ୍ୱର ଆଧୁନିକ ବିଜ୍ଞାନ ପାଇଁ ବାଟ କଢ଼ାଇଥିଲା” ବୋଲି ସେ କହିଥିଲେ। ପ୍ରଧାନମନ୍ତ୍ରୀ ମଧ୍ୟ ଲିଙ୍ଗଗତ ସମାନତା ଓ ଭାରତୀୟ ଗୁରୁଗୁଳ ପଦ୍ଧତିର ସମ୍ବେଦନଶୀଳତା ଉପରେ ଆଲୋକପାତ କରିବା ସହ ‘କନ୍ୟା ଗୁରୁକୁଳ’ ଆରମ୍ଭ କରିଥିବାରୁ ସ୍ୱାମୀନାରାୟଣ ଗୁରୁକୁଳର ପ୍ରଶଂସା କରିଥିଲେ =।

ପ୍ରଧାନମନ୍ତ୍ରୀ ଶିକ୍ଷା ପଦ୍ଧତି ଓ ଶିକ୍ଷାନୁଷ୍ଠାନଗୁଡ଼ିକର ଭାରତରେ ଉଜ୍ଜ୍ୱଳ ଭବିଷ୍ୟତର ଭୂମିକା ଉପରେ ଗୁରୁତ୍ୱ ଆରୋପ କରିବା ସହ ସ୍ୱାଧୀନତାର ଅମୃତ କାଳରେ ଦେଶ ଶିକ୍ଷାର ଭିତ୍ତିଭୂମି ଓ ନୀତିକୁ ପ୍ରତ୍ୟେକ କ୍ଷେତ୍ରରେ ଖୁବ୍ ଦ୍ରୁତ ଗତିରେ ସୁଦୃଢ଼ କରିବାକୁ ଯାଉଛି ବୋଲି କହିଥିଲେ =। ଦେଶରେ ଆଇଆଇଟି, ଆଇଆଇଆଇଟିଏସ, ଆଇଆଇଏମଏସ ଓ ଏଆଇଏମଏସ ସଂଖ୍ୟା ଅନେକ ବୃଦ୍ଧି ପାଇଛି ଓ ୨୦୧୪ ମସିହା ପୂର୍ବାବସ୍ଥାକୁ ତୁଳନା କଲେ ଦେଶରେ ମେଡିକାଲ କଲେଜ ସଂଖ୍ୟା ଶତକଡ଼ା ୬୫ ଭାଗ ବୃଦ୍ଧି ପାଇଛି ବୋଲି ପ୍ରଧାନମନ୍ତ୍ରୀ କହିଥିଲେ। ସେ ଆହୁରି କହିଥିଲେ ଯେ ଦେଶର ନୂତନ ଶିକ୍ଷାନୀତି ଭବିଷ୍ୟତକୁ ଲକ୍ଷ୍ୟ ରଖି ପ୍ରସ୍ତୁତ ହୋଇଛି। ଏହାଫଳରେ ନୂତନ ପିଢ଼ି ଏକ ନବୀନ ପଦ୍ଧତିରେ ଶିକ୍ଷା ଗ୍ରହଣ କରିବେ ଓ ତାହା ସେମାନଙ୍କୁ ଦେଶର ଆଦର୍ଶ ନାଗରିକ ଭାବେ ଗଢ଼ିତୋଳିବା। ଆଗାମୀ ୨୫ ବର୍ଷରେ ମୁନିଋଷିମାନଙ୍କ ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ। “ଆଜି ଭାରତରେ ସଂକଳ୍ପ ନୂତନ ଓ ସେଗୁଡ଼ିକ ସାକାର କରିବା ପାଇଁ ଉଦ୍ୟମ ହେଉଛି। ଆଜି ଭାରତ ଡିଜିଟାଲ ଇଣ୍ଡିଆ, ଆତ୍ମନିର୍ଭର ଭାରତ, ଭୋକାଲ ଫର ଲୋକାଲ, ପ୍ରତ୍ୟେକ ଜିଲ୍ଲାରେ ୭୫ଟି ଅମୃତ ସରୋବର ଓ ଏକ ଭାରତ ଶ୍ରେଷ୍ଠ ଭାରତ ଲକ୍ଷ୍ୟ ନେଇ ଆଗେଇ ଚାଲିଛି।

ଏହିସବୁ ସାମାଜିକ ପରିବର୍ତ୍ତନ ଓ ସମାଜ ସଂସ୍କାର ପ୍ରକଳ୍ପରେ ସବକା ପ୍ରୟାସ ଦେଶର କୋଟି କୋଟି ଜନସାଧାରଣଙ୍କ ଜୀବନରେ ପରିବର୍ତ୍ତନ ଆଣିବ। ପ୍ରଧାନମନ୍ତ୍ରୀ ଗୁରୁକୁଳର ବିଦ୍ୟାର୍ଥୀମାନଙ୍କୁ ଉତ୍ତର ପୂର୍ବାଞ୍ଚଳକୁ ଅନୁନ୍ୟ ୧୫ ଦିନ ଗସ୍ତରେ ଯାଇ ସେଠାକାର ଅଧିବାସୀଙ୍କ ସହ ମିଶି ଦେଶକୁ ଆହୁରି ମଜବୁତ କରିବାକୁ ନିବେଦନ କରିଥିଲେ। ସେ ମଧ୍ୟ ବେଟୀ ବଚାଓ ଓ ପରିବେଶ ସୁରକ୍ଷା ଭଳି ବିଷୟର ଅବତାରଣା କରି ଏକ ଭାରତ ଶ୍ରେଷ୍ଠ ଭାରତକୁ ମଜବୁତ କରିବା ପାଇଁ ଆଗେଇ ଆସିବାକୁ ଆହ୍ୱାନ ଦେଇଥିଲେ। “ମୁଁ ନିଶ୍ଚିତ ଯେ ସ୍ୱାମୀ ନାରାୟଣ ଗୁରୁକୁଳ ବିଦ୍ୟା ପ୍ରତିଷଠାନମ ଭଳି ଅନୁଷ୍ଠାନ ଭାରତର ସଂକଳ୍ପ ଯାତ୍ରାକୁ ଅଧିକ ମଜବୁତ କରିବ” ବୋଲି କହି ସେ ତାଙ୍କର ଅଭିଭାଷଣ ସମାପ୍ତି ଘଟାଇଥିଲେ।

ପୃଷ୍ଠଭୂମୀ:

ସ୍ୱାମୀ ନାରାୟଣ ଗୁରୁକୁଳ ରାଜକୋଟ ସଂସ୍ଥାନ ୧୯୪୮ ମସିହାରେ ଗୁରୁଦେବ ଶାସ୍ତ୍ରୀଜୀ ମହାରାଜ ଧର୍ମାଜୀବାନନ୍ଦଜୀ ସ୍ୱାମୀଙ୍କ ଦ୍ୱାରା ରାଜକୋଟରେ ପ୍ରତିଷ୍ଠା କରାଯାଇଥିଲା। ଏହି ସଂସ୍ଥାନ ସମ୍ପ୍ରସାରିତ ହୋଇ ବର୍ତ୍ତମାନ ବିଶ୍ୱରେ ଏହାର ୪ଠଟି ଶାଖା ରଖିଛି। ଏହା ୨୫ ହଜାରରୁ ଊଦ୍ଧ୍ୱର୍ ବିଦ୍ୟାର୍ଥୀଙ୍କୁ ବିଦ୍ୟାଳୟ, ସ୍ନାତ୍ତକ ଓ ସ୍ନାତ୍ତକୋତ୍ତର ଶିକ୍ଷା ପ୍ରଦାନ କରିଆସୁଛି।

Categories
ବିଶେଷ ଖବର

ଶିଲଂ ଠାରେ ଉତ୍ତର ପୂର୍ବାଞ୍ଚଳ ପରିଷଦ ବୈଠକରେ ପ୍ରଧାନମନ୍ତ୍ରୀଙ୍କ ଅଭିଭାଷଣ

ଶିଲଂ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଶିଲଂ ଠାରେ ଉତ୍ତର ପୂର୍ବାଞ୍ଚଳ ପରିଷଦ (ଏନଇସି)ର ବୈଠକକୁ ସମ୍ବୋଧିତ କରିଛନ୍ତି। ଏହି ବୈଠକ ଉତ୍ତର ପୂର୍ବାଞ୍ଚଳ ପରିଷଦର ସୁବର୍ଣ୍ଣ ଜୟନ୍ତୀ ସମାରୋହର ପ୍ରତୀକ। ଏହି ପରିଷଦ ୧୯୭୨ରେ ବିଧିବଦ୍ଧ ଭାବେ ଉଦଘାଟିତ ହୋଇଥିଲା।

ଉତ୍ତର ପୂର୍ବାଞ୍ଚଳ ବିକାଶରେ ଏନଇସିର ଅବଦାନକୁ ପ୍ରଶଂସା କରି ପ୍ରଧାନମନ୍ତ୍ରୀ କହିଛନ୍ତି ଏନଇସିର ସୁବର୍ଣ୍ଣ ଜୟନ୍ତୀ ସମାରୋହ ଆଜାଦୀ କି ଅମୃତ ମହୋତ୍ସବ ସହିତ ଆୟୋଜିତ ହେଉଛି। ଅଞ୍ଚଳର ୮ ରାଜ୍ୟକୁ ଅଷ୍ଟ ଲକ୍ଷ୍ମୀ ଭାବେ ସେ ବିବେଚନା କରୁଥିବା କହିବା ସହ ଏହି ଅଞ୍ଚଳର ବିକାଶ ପାଇଁ ସରକାର ଶାନ୍ତି, ଶକ୍ତି, ପର୍ଯ୍ୟଟନ, ୫ଜି କନେକ୍ଟିଭିଟି, ସଂସ୍କୃତି, ପ୍ରାକୃତିକ କୃଷି, କ୍ରୀଡା ଦକ୍ଷତା ଭଳି ୮ଟି ମୂଳ ସ୍ତମ୍ଭ ଉପରେ କାମ କରିବା ଦରକାର ବୋଲି କହିଛନ୍ତି।

ଉତ୍ତର ପୂର୍ବାଞ୍ଚଳ ଦକ୍ଷିଣ ପୂର୍ବ ଏସିଆକୁ ଆମ ପ୍ରବେଶ ଦ୍ୱାର ଓ ସମଗ୍ର କ୍ଷେତ୍ର ପାଇଁ ଏହା ବିକାଶର କେନ୍ଦ୍ର ପାଲଟି ପାରିବ ବୋଲି ପ୍ରଧାନମନ୍ତ୍ରୀ କହିଛନ୍ତି । ଏହି ଅଞ୍ଚଳର ସମ୍ଭାବନାକୁ ସାକାର କରିବା ପାଇଁ ଭାରତୀୟ- ମିଆଁମାର- ଥାଇଲାଣ୍ଡ ତ୍ରିପକ୍ଷୀୟ ରାଜପଥ ଓ ଅଗରତାଲା- ଅଖୌରା ରେଳ ପ୍ରକଳ୍ପ ଭଳି କାମ ଚାଲିଥିବା ସେ କହିଛନ୍ତି। ସରକାର ‘ଲୁକ ଇଷ୍ଟ’ ନୀତିକୁ ‘ଆକ୍ଟ ଇଷ୍ଟ’ ନୀତିରେ ବଦଳାଇବା ଠାରୁ ଆଗେଇ ସାରିଛନ୍ତି ଓ ଏବେ ଏହା ‘ଆକ୍ଟ ଫାଷ୍ଟ ଫର ନର୍ଥଇଷ୍ଟ’ ନୀତିରେ ପରିଣତ ହୋଇସାରିଛି ବୋଲି ପ୍ରଧାନମନ୍ତ୍ରୀ କହିଛନ୍ତି। ଅଞ୍ଚଳରେ ଶାନ୍ତି ପ୍ରୟାସର ସଫଳତା ସମ୍ପର୍କରେ ଆଲୋକପାତ କରି ସେ କହିଛନ୍ତି ବହୁ ଶାନ୍ତି ରାଜିନାମା ସ୍ୱାକ୍ଷରିତ ହୋଇଛି, ଆନ୍ତଃ ରାଜ୍ୟ ସୀମା ରାଜିନାମା ହୋଇଛି ଓ ଆତଙ୍କବାଦ ଘଟଣା ବେଶ ହ୍ରାସ ପାଇଛି।

ନେଟ ଜିରୋ ପ୍ରତି ଭାରତର ପ୍ରତିବଦ୍ଧତା ସମ୍ପର୍କରେ ଆଲୋଚନା କରି ପ୍ରଧାନମନ୍ତ୍ରୀ କହିଛନ୍ତି ଉତ୍ତର ପୂର୍ବାଞ୍ଚଳ ଜଳବିଦ୍ୟୁତ ଶକ୍ତି କେନ୍ଦ୍ର ପାଲଟି ପାରିବ। ଏହାଦ୍ୱାରା ଅଞ୍ଚଳର ରାଜ୍ୟଗୁଡିକ ଅତିରିକ୍ତ ବିଦ୍ୟୁତ ପାଇବେ, ଶିଳ୍ପଦ୍ୟୋଗ ବିକାଶ ହେବ ଓ ବହୁ ସଂଖ୍ୟାରେ ନିଯୁକ୍ତି ସୃଷ୍ଟି ହେବ। ଅଞ୍ଚଳର ପର୍ଯ୍ୟଟନ କ୍ଷମତା ସମ୍ପର୍କରେ ଆଲୋଚନା କରି ସେ କହିଛନ୍ତି ଅଞ୍ଚଳର ପ୍ରକୃତି ଓ ସଂସ୍କୃତି ଦେଶବିଦେଶରୁ ପର୍ଯ୍ୟଟକଙ୍କୁ ଆକୃଷ୍ଟ କରୁଛି। ଏହି ଅଞ୍ଚଳରେ ପର୍ଯ୍ୟଟନ ସର୍କିଟ ଚିହ୍ନିତ ଓ ବିକଶିତ କରାଯାଉଛି। ବିଭିନ୍ନ ଅଞ୍ଚଳର ଲୋକଙ୍କୁ ଏକାଠି କରିବା ପାଇଁ ୧୦୦ଟି ବିଶ୍ୱବିଦ୍ୟାଳୟର ଛାତ୍ରଛାତ୍ରୀଙ୍କୁ ଉତ୍ତର ପୂର୍ବାଞ୍ଚଳ ପଠାଇବା ସମ୍ପର୍କରେ ସେ ଆଲୋଚନା କରିଛନ୍ତି। ଏହି ଛାତ୍ରଛାତ୍ରୀମାନେ ଅଞ୍ଚଳର ଦୂତ ସାଜିବେ।

ଅଞ୍ଚଳରେ କନେକ୍ଟିଭିଟି ବୃଦ୍ଧି ସମ୍ପର୍କରେ ଆଲୋଚନା କରି ପ୍ରଧାନମନ୍ତ୍ରୀ କହିଛନ୍ତି ଦଶନ୍ଧି ଦଶନ୍ଧି ଧରି ପଡି ରହିଥିବା ଅନେକ ପୋଲ ନିର୍ମାଣ ପ୍ରକଳ୍ପ ଶେଷ ହୋଇଛି। ବିଗତ ୮ ବର୍ଷରେ ଏହି ଅଞ୍ଚଳର ବିମାନ ବନ୍ଦର ସଂଖ୍ୟା ୯ରୁ ୧୬ରେ ପହଞ୍ଚିଛି ଓ ୨୦୧୪ ପୂର୍ବରୁ ପ୍ରାୟ ୯୦୦ ଥିବା ବିମାନ ଉଡାଣ ସଂଖ୍ୟା ଏବେ ବୃଦ୍ଧି ପାଇ ପ୍ରାୟ ୧୯୦୦ ହୋଇଛି। ଅନେକ ଉତ୍ତର ପୂର୍ବାଞ୍ଚଳ ରାଜ୍ୟ ପ୍ରଥମ ଥର ପାଇଁ ରେଳ ମାନଚିତ୍ରକୁ ଆସିଛନ୍ତି ଓ ଜଳମାର୍ଗ ବିସ୍ତାର ପାଇଁ ଉଦ୍ୟମ ଜାରି ରହିଛି। ଏହି ଅଞ୍ଚଳରେ ୨୦୧୪ ପରେ ଜାତୀୟ ରାଜପଥ ଦୈର୍ଘ୍ୟ ୫୦ ପ୍ରତିଶତ ବଢିଛି। ପିଏମ- ଡିଭାଇନ ଯୋଜନା ଶୁଭାରମ୍ଭ ଦ୍ୱାରା ଉତ୍ତର ପୂର୍ବାଞ୍ଚଳରେ ଭିତ୍ତିଭୂମି ପ୍ରକଳ୍ପ ତ୍ୱରାନ୍ୱିତ ହୋଇଛି। ଅପ୍ଟିକାଲ ଫାଇବର ନେଟୱର୍କ ବୃଦ୍ଧି କରି ଉତ୍ତର ପୂର୍ବାଞ୍ଚଳରେ ଡିଜିଟାଲ ସଂଯୋଗୀକରଣ ବୃଦ୍ଧି କରିବାକୁ ସରକାର ଉଦ୍ୟମ କରୁଛନ୍ତି ବୋଲି ସେ କହିଛନ୍ତି। ଆତ୍ମନିର୍ଭର ୫ଜି ଭିତ୍ତିଭୂମି ବିକାଶ ସମ୍ପର୍କରେ ଆଲୋଚନା କରି ସେ କହିଛନ୍ତି ୫ଜି ମାଧ୍ୟମରେ ଅଞ୍ଚଳରେ ଷ୍ଟାର୍ଟଅପ ଇକୋସିଷ୍ଟମ, ସେବା କ୍ଷେତ୍ର ଆଦି ବିକଶିତ ହୋଇପାରିବ। ସରକାର ଉତ୍ତର ପୂର୍ବାଞ୍ଚଳକୁ କେବଳ ଅର୍ଥନୈତିକ ବିକାଶ କେନ୍ଦ୍ର ଭାବେ ନୁହେଁ ବରଂ ସାଂସ୍କୃତିକ ବିକାଶ କେନ୍ଦ୍ର ଭାବେ ଗଢି ତୋଳିବାକୁ ପ୍ରତିବଦ୍ଧ ବୋଲି ସେ କହିଛନ୍ତି।

ଅଞ୍ଚଳର କୃଷି ଦକ୍ଷତା ସମ୍ପର୍କରେ ଆଲୋଚନା କରି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଛନ୍ତି ଯେ, ପ୍ରାକୃତିକ କୃଷି କ୍ଷେତ୍ରରେ ଉତ୍ତର ପୂର୍ବାଞ୍ଚଳ ପ୍ରମୁଖ ଭୂମିକା ଗ୍ରହଣ କରିପାରିବ। କୃଷି ଉଡାନ ମାଧ୍ୟମରେ ଅଞ୍ଚଳର ଚାଷୀମାନେ ସେମାନଙ୍କ ଉତ୍ପାଦଗୁଡିକୁ ଦେଶ ତଥା ବିଶ୍ୱର ବିଭିନ୍ନ ସ୍ଥାନକୁ ପଠାଇ ପାରିବେ। ଉତ୍ତର ପୂର୍ବାଞ୍ଚଳ ରାଜ୍ୟଗୁଡିକ ଖାଦ୍ୟ ତୈଳ ଉପରେ ଚାଲୁଥିବା ଜାତୀୟ ମିଶନ- ଅଏଲ ପାମରେ ଅଂଶଗ୍ରହଣ କରିବାକୁ ପ୍ରଧାନମନ୍ତ୍ରୀ ଆହ୍ୱାନ ଦେଇଛନ୍ତି। ଭୌଗୋଳିକ ଆହ୍ୱାନର ମୁକାବିଲା ସାଙ୍ଗକୁ ଉତ୍ପାଦ ବଜାରରେ ପହଞ୍ଚାଇବା ପାଇଁ ଡ୍ରୋନ କିପରି ଚାଷୀଙ୍କୁ ସାହାଯ୍ୟ କରିବ ସେ ସମ୍ପର୍କରେ ପ୍ରଧାନମନ୍ତ୍ରୀ ଆଲୋଚନା କରିଛନ୍ତି।

କ୍ରୀଡା ପ୍ରତି ଅଞ୍ଚଳର ଅବଦାନ ସମ୍ପର୍କରେ ଆଲୋଚନା କରି ସେ କହିଛନ୍ତି ସରକାର ଉତ୍ତର ପୂର୍ବାଞ୍ଚଳରେ ଭାରତର ପ୍ରଥମ କ୍ରୀଡା ବିଶ୍ୱବିଦ୍ୟାଳୟ ବିକଶିତ କରି ଅଞ୍ଚଳର କ୍ରୀଡାବିତମାନଙ୍କୁ ସହାୟତା କରିବା ପାଇଁ ଉଦ୍ୟମରତ। ଅଞ୍ଚଳର ୮ଟି ରାଜ୍ୟରେ ୨୦୦ରୁ ଅଧିକ ଖେଲୋ ଇଣ୍ଡିଆ କେନ୍ଦ୍ର ଅନୁମୋଦିତ ହୋଇଛି ଓ ଏହି ଅଞ୍ଚଳର ବହୁ କ୍ରୀଡାବିତ ଟପ୍ସ ଯୋଜନାରେ ଲାଭାନ୍ୱିତ ହେଉଛନ୍ତି।

ପ୍ରଧାନମନ୍ତ୍ରୀ ଭାରତର ଜି-୨୦ ଅଧ୍ୟକ୍ଷତା ସମ୍ପର୍କରେ ଆଲୋଚନା କରିବା ସହ କହିଛନ୍ତି ଏହାର ବୈଠକରେ ଭାଗ ନେବାକୁ ସାରା ବିଶ୍ୱରୁ ଆସୁଥିବା ଲୋକେ ଉତ୍ତର ପୂର୍ବାଞ୍ଚଳ ଆସିବେ । ଅଞ୍ଚଳର ପ୍ରକୃତି, ସଂସ୍କୃତି ଓ ଦକ୍ଷତା ପ୍ରଦର୍ଶିତ କରିବାର ଏହା ପ୍ରକୃଷ୍ଟ ଅବସର।

Categories
ବିଶେଷ ଖବର

ସଂସଦର ଶୀତ ଅଧିବେଶନ ଆରମ୍ଭରେ ରାଜ୍ୟସଭାରେ ପ୍ରଧାନମନ୍ତ୍ରୀଙ୍କ ଅଭିଭାଷଣ

ନୂଆଦିଲ୍ଲୀ: ସଂସଦର ଶୀତ ଅଧିବେଶନ ଆରମ୍ଭରେ ଆଜି (୦୭-୧୨-୨୦୨୨) ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରାଜ୍ୟସଭାରେ ଉଦ୍ବୋଧନ ଦେବା ସହ ଉପରାଷ୍ଟ୍ରପତିଙ୍କୁ ସ୍ୱାଗତ କରିଛନ୍ତି।

ଦେଶରେ ସମସ୍ତ ନାଗରିକ ଓ ସଂସଦ ସଦସ୍ୟଙ୍କ ତରଫରୁ ପ୍ରଧାନମନ୍ତ୍ରୀ ଉପ ରାଷ୍ଟ୍ରପତି ତଥା ରାଜ୍ୟସଭା ଅଧ୍ୟକ୍ଷ ଜଗଦୀପ ଧନଖଡଙ୍କୁ ପ୍ରଥମେ ଅଭିନନ୍ଦନ ଜଣାଇ ତାଙ୍କ ଅଭିଭାଷଣ ଆରମ୍ଭ କରିଥିଲେ। ଉପରାଷ୍ଟ୍ରପତିଙ୍କ ସମ୍ମାନଜନକ ପଦବୀ ଉପରେ ଆଲୋକପାତ କରି ସେ କହିଲେ, ଏହି ପଦବୀ ଲକ୍ଷ ଲକ୍ଷ ଜନସାଧାରଣଙ୍କ ନିମନ୍ତେ ଏକ ପ୍ରେରଣା।

ରାଜ୍ୟସଭାର ଅଧ୍ୟକ୍ଷଙ୍କୁ ସମ୍ବୋଧନ କରି ପ୍ରଧାନମନ୍ତ୍ରୀ ଆଜିର ଦିବସରେ ସଶସ୍ତ୍ର ସେନା ପତାକା ଦିବସ ପଡୁଥିବାରୁ ସଦନର ସମସ୍ତ ସଦସ୍ୟଙ୍କ ପକ୍ଷରୁ ସଶସ୍ତ୍ର ସେନାକୁ ଅଭିବାଦନ ଜଣାଇଥିଲେ। ଉପରାଷ୍ଟ୍ରପତିଙ୍କ ଜନ୍ମସ୍ଥାନ ଝୁନଝୁନର ସ୍ମରଣ କରି ପ୍ରଧାନମନ୍ତ୍ରୀ ଝୁନଝୁନର ଅନେକ ପରିବାର ଦେଶ ସେବାରେ ଅଗ୍ରଣୀ ଭୂମିକା ନେଇଥିବା ପ୍ରକାଶ କରିଥିଲେ। ସେ ଉପରାଷ୍ଟ୍ରପତିଙ୍କ ଅନ୍ତରଙ୍ଗ ସମ୍ପର୍କ ଯବାନ ଓ କିଷାନମାନଙ୍କ ସହ ଥିବା ଉପରେ ଆଲୋକପାତ କରି କହିଥିଲେ ଯେ “ ଆମର ଉପରାଷ୍ଟ୍ରପତି ହେଉଛନ୍ତି ଜଣେ ଚାଷୀର ପୁଅ ଓ ସେ ସୈନିକ ବିଦ୍ୟାଳୟରେ ଅଧ୍ୟୟନ କରୁଥିଲେ, ସେଥିପାଇଁ ସେ ଉଭୟ ଯବାନ ଓ କିଷାନମାନଙ୍କ ଅନ୍ତରଙ୍ଗ ବନ୍ଧୁ।”

ରାଜ୍ୟସଭା ଦୁଇଟି ଅବିସ୍ମରଣୀୟ ଘଟଣା ସମୟରେ ଉପରାଷ୍ଟ୍ରପତିଙ୍କୁ ସ୍ୱାଗତ ଜଣାଉଛି ବୋଲି ପ୍ରଧାନମନ୍ତ୍ରୀ କହିଥିଲେ। ପ୍ରଧାନମନ୍ତ୍ରୀ କହିଥିଲେ ଯେ ଭାରତ ସ୍ୱାଧୀନତାର ଅମୃତ କାଳରେ ପ୍ରବେଶ କରିବା ସହ ଜି-୨୦ ଶିଖର ବୈଠକରେ ଅଧ୍ୟକ୍ଷତା କରିବାର ସୁଯୋଗ ପାଇଛି। ନବ ଭାରତର ବିକାଶ ଛଡା ଭାରତ ବିଶ୍ୱର ଗତି ନିର୍ଦ୍ଧାରଣ ଦିଗରେ ଏକ ପ୍ରମୁଖ ଭୂମିକା ଗ୍ରହଣ କରିବ। “ଆମ ଗଣତନ୍ତ୍ର, ଆମ ସଂସଦ ଓ ଆମ ସଂସଦୀୟ ପଦ୍ଧତିରେ ଏହି ଯାତ୍ରାର ଏକ ଗୁରୁତ୍ୱପୂର୍ଣ୍ଣ ଭୂମିକା ରହିଛି” ବୋଲି ସେ କହିଥିଲେ।

ରାଜ୍ୟସଭାର ଅଧ୍ୟକ୍ଷ ଭାବେ ଉପ ରାଷ୍ଟ୍ରପତି ପଦବୀର ମିଆଦ ଆଜଠାରୁ ଆନୁଷ୍ଠାନିକଭାବେ ଆରମ୍ଭ ହେଉଥିବା ବିଷୟ ଅବତାରଣା କରି ପ୍ରଧାନମନ୍ତ୍ରୀ ସଂସଦର ଉପର ସଦନ ଉପରେ ନ୍ୟସ୍ତ ଦାୟିତ୍ୱ ହେଉଛି ସାଧାରଣ ଜନତାଙ୍କ ସମସ୍ୟା ବୋଲି କହିଥିଲେ। “ ଏହି ସମୟରେ ଭାରତ ଏହି ଦାୟିତ୍ୱକୁ ହୃଦୟଙ୍ଗମ କରୁଛି ଓ ଏଥିପ୍ରତି ଅଙ୍ଗୀକାରବଦ୍ଧ” ବୋଲି ସେ କହିଥିଲେ।

ପ୍ରଧାନମନ୍ତ୍ରୀ ମଧ୍ୟ କହିଥିଲେ ଯେ ଭାରତର ସମ୍ମାନୀୟ ଆଦିବାସୀ ସମାଜ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଜରିଆରେ ଏହି ଗୁରତ୍ୱପୂର୍ଣ୍ଣ ସମୟରେ ଦେଶକୁ ମାର୍ଗଦର୍ଶନ ଦେଉଛି। ସେ ମଧ୍ୟ ପୂର୍ବତନ ରାଷ୍ଟ୍ରପତି ଶ୍ରୀ ରାମନାଥ କୋବିନ୍ଦ ଏକ ଅବହେଳିତ ଶ୍ରେଣୀରୁ ଆସି ମଧ୍ୟ ଏପରି ସର୍ବୋଚ୍ଚ ସ୍ଥାନରେ କିପରି ପହଂଚି ପାରିଥିଲେ, ତାହାର ଅବତାରଣା କରିଥିଲେ।
ସମ୍ମାନ ଓ ଭକ୍ତିର ସହ ଅଧ୍ୟକ୍ଷଙ୍କ ଆସନ ଆଡକୁ ଚାହିଁ ପ୍ରଧାନମନ୍ତ୍ରୀ କହିଥିଲେ ଯେ “ ସମ୍ପଦ ବଳରେ ଜଣେ ଯାହା ଚାହିଁବ ତାହା ହାସଲ କରିପାରିବ ନାହିଁ, ବରଂ ତାହା ଅଭ୍ୟାସ ଓ ଉପଲବ୍ଧି ଦ୍ୱାରା ଯେ ସମ୍ଭବ ଆପଣଙ୍କ ଜୀବନ ତାହା ପ୍ରମାଣ କରିଛି।” ରାଷ୍ଟ୍ରପତିଙ୍କ ସୁପ୍ରିମକୋର୍ଟର ତିନିଦଶନ୍ଧିର ଜଣେ ବରିଷ୍ଠ ଆଇନଜୀବୀ ଅଭିଜ୍ଞତାର ନଜିର ଦେଇ ପ୍ରଧାନମନ୍ତ୍ରୀ ଟିକେ ହାଲୁକା ଢଙ୍ଗରେ କହିଥିଲେ ଯେ ସେ ଗୃହରେ ଅଦାଲତରେ ଅନୁପସ୍ଥିତି ଅନୁଭବ କରିବେ ନାହିଁ କାରଣ ରାଜ୍ୟସଭାରେ ଅନେକ ସଦସ୍ୟ ଏପରି ଅଛନ୍ତି ଯେଉଁମାନେ ତାଙ୍କୁ ସୁପ୍ରିମକୋର୍ଟରେ ଦେଖୁଥିଲେ।

ସେ ପୁଣି କହିଥିଲେ ଯେ ‘ଆପଣ ବିଧାୟକରୁ ସଂସଦ ସଦସ୍ୟ, କେନ୍ଦ୍ର ମନ୍ତ୍ରୀ ଓ ରାଜ୍ୟପାଳ ଭୂମିକା ତୁଲାଇ ସାରିଛନ୍ତି।” ଏ ସମସ୍ତ ଭୂମିକାରେ ଗୋଟିଏ କଥା ଯାହା ସମାନ ଥିଲା, ତାହା ହେଉଛି ଦେଶର ବିକାଶ ଓ ଗଣତାନ୍ତ୍ରିକ ମୂଲ୍ୟବୋଧ ପ୍ରତି ନିଷ୍ଠା ବୋଲି ସେ କହିଥିଲେ। ଉପରାଷ୍ଟ୍ରପତି ଭାବେ ଉପରାଷ୍ଟ୍ରପତି ନିର୍ବାଚନରେ ପାଇଥିବା ଶତକଡା ୭୫ଭାଗ ଭୋଟ ତାଙ୍କ ପ୍ରତି ଅନ୍ୟମାନଙ୍କ ଆନୁଗତ୍ୟର ପ୍ରମାଣ ବୋଲି ଶ୍ରୀ ମୋଦି କହିଥିଲେ। “ନେତୃତ୍ୱର ପ୍ରକୃତ ସଂଜ୍ଞା ହେଉଛି ଅଗ୍ରଣୀ ଭୂମିକା ଓ ରାଜ୍ୟସଭା ପରିପ୍ରେକ୍ଷୀରେ ଏହା ଆହୁରି ଗୁରୁତ୍ୱପୂର୍ଣ୍ଣ ମନେ ହୁଏ। କାରଣ ଏକ ସ୍ୱଚ୍ଛ ଉପାୟରେ ଗଣତାନ୍ତ୍ରିକ ନିଷ୍ପତ୍ତିକୁ ଫଳପ୍ରଦ କରିବା ହେଉଛି ଗୃହର ଦାୟିତ୍ୱ।

ଗୃହର ମର୍ଯ୍ୟାଦା ବୃଦ୍ଧି ପାଇଁ ସଦସ୍ୟମାନଙ୍କ ଉପରେ ନ୍ୟସ୍ତ ଦାୟିତ୍ୱର ଅବତାରଣା କରି ପ୍ରଧାନମନ୍ତ୍ରୀ କହିଥିଲେ ଯେ ଗୃହ ଦେଶର ମହାନ୍ ଗଣତାନ୍ତ୍ରିକ ଐତିହ୍ୟର ରକ୍ଷାକର୍ତ୍ତା ଓ ଏହାର ଶକ୍ତି ଭାବେ ବିବେଚିତ ହୋଇଥାଏ। ଅନେକ ପୂର୍ବତନ ପ୍ରଧାନମନ୍ତ୍ରୀ ମଧ୍ୟ କେବେ କେମିତି ରାଜ୍ୟସଭା ସଦସ୍ୟଭାବେ କାର୍ଯ୍ୟ କରିବା ଉପରେ ସେ ଆଲୋକପାତ କରିଥିଲେ। ଉପରାଷ୍ଟ୍ରପତିଙ୍କ ମାର୍ଗଦର୍ଶନରେ ଏହି ଗୃହ ଏହାର ମର୍ଯ୍ୟାଦା ଓ ଗରିମା ଅତୁଟ ରଖିବ ବୋଲି ପ୍ରଧାନମନ୍ତ୍ରୀ ପ୍ରତିଶ୍ରୁତି ଦେଇଥିଲେ । “ଗୃହରେ ଗୁରୁତ୍ୱପୂର୍ଣ୍ଣ ଗଣତାନ୍ତ୍ରିକ ଆଲୋଚନା ଗଣତନ୍ତ୍ରର ଜନନୀଭାବେ ଆମର ଗର୍ବକୁ ଆହୁରି ଶକ୍ତିଶାଳୀ କରିବ” ବୋଲି ସେ କହିଥିଲେ।

ଅଭିଭାଷଣର ଉଦ୍ଯାପନରେ ପ୍ରଧାନମନ୍ତ୍ରୀ କିପରି ପୂର୍ବତନ ଉପରାଷ୍ଟ୍ରପତି ତଥା ଅଧ୍ୟକ୍ଷ ଗତ ଅଧିବେଶନରେ ତାଙ୍କର ପଦବିନ୍ୟାସ ଓ ମିତ୍ରାକ୍ଷର ସଦସ୍ୟମାନଙ୍କୁ ହସର ଖୋରାକ୍ ଯୋଗାଇଥିଲା ତାହାର ସ୍ମୃତିଚାରଣ କରିଥିଲେ। “ମୁଁ ନିଶ୍ଚିତ ଯେ ଆପଣ ପ୍ରତ୍ୟୁପନ୍ନମତିତା କେବେ ମଧ୍ୟ ଆପଣଙ୍କଠାରୁ ଖସିଯିବ ନାହିଁ ଓ ଆପଣ ଗୃହକୁ ତାହାର ସୁବିଧା ନେଇ ଚାଲିଥିବେ” ବୋଲି କହି ପ୍ରଧାନମନ୍ତ୍ରୀ ଅଭିଭାଷଣଣର ପରିସମାପ୍ତି ଘଟାଇଥିଲେ।

Categories
ବିଶେଷ ଖବର

ଭାରତର ସର୍ବୋଚ୍ଚ ନ୍ୟାୟାଳୟରେ ସମ୍ବିଧାନ ଦିବସ ଅବସରରେ ପ୍ରଧାନମନ୍ତ୍ରୀଙ୍କ ଅଭିଭାଷଣ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ (୨୬.୧୧.୨୦୨୨) ଭାରତର ସର୍ବୋଚ୍ଚ ନ୍ୟାୟାଳୟରେ ସମ୍ବିଧାନ ଦିବସ ସମାରୋହ ଉପଲକ୍ଷେ ଅଂଶଗ୍ରହଣ କରି ସମବେତ ଜନତାଙ୍କୁ ଉଦ୍‌ବୋଧନ ଦେଇଛନ୍ତି। ୧୯୪୯ ମସିହାରେ ସାମ୍ବିଧାନିକ ସଭା ଦ୍ୱାରା ଗୃହୀତ ଓ ଭାରତୀୟ ସମ୍ବିଧାନର ସ୍ମରଣାର୍ଥେ ୨୦୧୫ ମସିହାଠାରୁ ନଭେମ୍ବର ୨୬ ତାରିଖ ସମ୍ବିଧାନ ଦିବସ ଭାବେ ପାଳିତ ହୋଇ ଆସୁଛି।

ପ୍ରଧାନମନ୍ତ୍ରୀ ମଧ୍ୟ ଏହି ଅବସରରେ କେତେକ ନୂତନ ପଦକ୍ଷେପ ସ୍ୱରୂପ-ଇ-କୋର୍ଟ ପ୍ରକଳ୍ପ ଜରିଆରେ କେତେକ କାର୍ଯ୍ୟକ୍ରମ  ଉଦ୍‌ଘାଟନ କରିଛନ୍ତି ।  ସେଗୁଡିକ ମଧ୍ୟରେ ଭର୍ଚୁଆଲ ଜଷ୍ଟିସ କ୍ଲକ୍‌, ଜଷ୍ଟିସ ମୋବାଇଲ ଆପ୍‌୨.୦, ଡିଜିଟାଲ କୋର୍ଟ ଓ ଏସ୍ ୩ ଡବ୍ଲୁଏଏଏସ ୱେବସାଇଟ୍ ଅନ୍ତର୍ଭୁକ୍ତ।

ସମ୍ବିଧାନ ଦିବସର ଶୁଭେଚ୍ଛା ଜ୍ଞାପନ ସହ ପ୍ରଧାନମନ୍ତ୍ରୀ  ୧୯୪୯ ମସିହାରେ ଆଜିର ଦିନରେ ସ୍ୱାଧୀନ ଭାରତ କିପରି ନିଜ ଭବିଷ୍ୟତର ଭିତ୍ତିପ୍ରସ୍ତର ସ୍ଥାପନ କରିଥିଲା ତା’ର ସ୍ମୃତିଚାରଣ କରିଥିଲେ। ସ୍ୱାଧୀନତାର ଅମୃତ ମହୋତ୍ସବ କାଳରେ ସମ୍ବିଧାନ ଦିବସର ମହତ୍ୱ ସମ୍ପର୍କରେ ମଧ୍ୟ ପ୍ରଧାନମନ୍ତ୍ରୀ ଅବତାରଣା କରିଥିଲେ। ସେ ମଧ୍ୟ ବାବା ସାହେବ ଡକ୍ଟର ବି.ଆର ଆମ୍ବେଦକର ଓ ସାମ୍ବିଧାନିକ ସଭାର ନମସ୍ୟ ସଦସ୍ୟଙ୍କ ପ୍ରତି ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।

ପ୍ରଧାନମନ୍ତ୍ରୀ ଗତ ୭୦ବର୍ଷ ଧରି ଆଇନ ପ୍ରଣୟନ, କାର୍ଯ୍ୟପାଳିକା ଓ ନ୍ୟାୟପାଳିକା ପ୍ରତି ଅସଂଖ୍ୟ ବ୍ୟକ୍ତିଙ୍କ ଅବଦାନ ଉପରେ ଆଲୋକପାତ କରିଥିଲେ। ସେମାନେ ଭାରତୀୟ ସମ୍ବିଧାନର ସଂପ୍ରସାରଣ ଓ ବିକାଶ ଯାତ୍ରାରେ କିପରି ସାମିଲ ହୋଇଛନ୍ତି ସେମାନଙ୍କୁ ଏହି ସ୍ୱତନ୍ତ୍ର ଅବସରରେ ସମଗ୍ର ଦେଶ ପକ୍ଷରୁ ଧନ୍ୟବାଦ ଅର୍ପଣ କରିଥିଲେ।

ଭାରତୀୟ ଇତିହାସର କଳା ଦିବସ ବିଷୟରେ ସ୍ମରଣ କରି ପ୍ରଧାନମନ୍ତ୍ରୀ କହିଥିଲେ ଯେ ସମ୍ବିଧାନ ଦିବସ ଭଳି ସ୍ମରଣୀୟ ଘଟଣା ଦେଶ ପାଳନ କରୁଥିବାବେଳେ ନଭେମ୍ବର ୨୬ତାରିଖ ଦିନ ଭାରତ ମାନବତାର ଶତ୍ରୁମାନଙ୍କ ଦ୍ୱାରା ବିରାଟ ଆତଙ୍କବାଦୀ ଆକ୍ରମଣରେ ଶିକାର ହୋଇଥିଲା । ଜଘନ୍ୟ ମୁମ୍ବାଇ ଆତଙ୍କୀ ଆକ୍ରମଣ ଯୋଗୁଁ ଯେଉଁମାନେ ପ୍ରାଣ ହରାଇଥିଲେ ଶ୍ରୀ ମୋଦୀ ସେମାନଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ।

ପ୍ରଧାନମନ୍ତ୍ରୀ ମନେ ପକାଇ ଦେଇଥିଲେ ଯେ ବର୍ତ୍ତମାନର ବୈଶ୍ୱିକ ଦୃଶ୍ୟପଟରେ ଭାରତର କ୍ରମବର୍ଦ୍ଧିଷ୍ଣୁ ଅର୍ଥନୀତି ଓ ଆନ୍ତର୍ଜାତିକ ଛବି ଦୃଷ୍ଟିରୁ ସମଗ୍ର ବିଶ୍ୱର ଦୃଷ୍ଟି ଭାରତ ଉପରେ ରହିଛି। ସ୍ଥାୟିତ୍ୱ ନେଇ ସମସ୍ତ କଳ୍ପନା ଜଳ୍ପନାର ଅବସାନ ଘଟାଇ ଭାରତ ପୁରାଦମ୍‌ରେ ଆଗେଇ ଚାଲିବା ସହ ଏହାର ବିବିଧତାକୁ ନେଇ ଗର୍ବ କରୁଛି ବୋଲି ସେ କହିଥିଲେ। ସେ ଏହି ସଫଳତାର ଶ୍ରେୟ ସମ୍ବିଧାନକୁ ଦେଇଥିଲେ। ପ୍ରଧାନମନ୍ତ୍ରୀ ଆହୁରି ଏହି ଅବସରରେ ସମ୍ବିଧାନ ପ୍ରସ୍ତାବନାର ତିନୋଟି ଶବ୍ଦ ‘ୱି ଦ ପିପୁଲ’ର ଅବତାରଣା କରି କହିଥିଲେ ଯେ ଏହା ହେଉଛି ଏକ ଆହ୍ୱାନ, ଏକ ଆସ୍ଥା ଓ ଏକ ଶପଥ । ସମ୍ବିଧାନର ଏହି ଆତ୍ମା ହେଉଛି ଭାରତର ଆତ୍ମା ଓ ବିଶ୍ୱ ଗଣତନ୍ତ୍ରର ଜନନୀ। ଆଧୁନିକ ଯୁଗରେ ସମ୍ବିଧାନ ଦେଶର ସମସ୍ତ ସାଂସ୍କୃତିକ ଓ ନୈତିକ ଭାବାବେଗକୁ ଆଦରରେ ଗ୍ରହଣ କରିନେଇଛି।

ପ୍ରଧାନମନ୍ତ୍ରୀ ଖୁସି ପ୍ରକଟ କରି କହିଥିଲେ ଯେ ଗଣତନ୍ତ୍ରର ଜନନୀ ଭାବେ ଦେଶ ସମ୍ବିଧାନର ଆଦର୍ଶକୁ ମଜବୁତ କରିବା ସହ ଜନପ୍ରିୟ ନୀତି ଗରିବ ଓ ମହିଳାଙ୍କୁ ସଶକ୍ତ କରୁଛି। ଆଇନର ସରଳୀକରଣ ଯୋଗୁଁ ଏହା ସାଧାରଣ ନାଗରିକଙ୍କ ନିମନ୍ତେ ବୋଧଗମ୍ୟ ହେଉଛି ଓ ନ୍ୟାୟପାଳିକା ସମୟଭିତ୍ତିକ ନ୍ୟାୟ ପ୍ରଦାନ ପାଇଁ ଅନେକ ପଦକ୍ଷେପ ଗ୍ରହଣ କରୁଛି ବୋଲି ସେ କହିଥିଲେ।

କର୍ତ୍ତବ୍ୟ ନେଇ ତାଙ୍କର ସ୍ୱାଧୀନତା ଦିବସ ଅଭିଭାଷଣ ଉପରେ ଗୁରୁତ୍ୱ ଆରୋପ କରି ପ୍ରଧାନମନ୍ତ୍ରୀ ଏହା ସମ୍ବିଧାନର ଢାଞ୍ଚଗତ କାର୍ଯ୍ୟାନୁଷ୍ଠାନ ବୋଲି କହିଥିଲେ। ଅମୃତକାଳକୁ କର୍ତ୍ତବ୍ୟକାଳ ଭାବେ ଅଭିହିତ କରି ପ୍ରଧାନମନ୍ତ୍ରୀ ସ୍ୱାଧୀନତାର ଅମୃତକାଳରେ ଦେଶ ଯେତେବେଳେ ସ୍ୱାଧୀନତାର ୭୫ବର୍ଷ ସମ୍ପୂର୍ଣ୍ଣ କରିବାକୁ ଯାଉଛି ଓ ଆମେ ଆଗାମୀ ୨୫ବର୍ଷ ନିମନ୍ତେ ବିକାଶଯାତ୍ରା ପାଇଁ ସଜବାଜ ହେଉଛୁ କର୍ତ୍ତବ୍ୟର ମନ୍ତ୍ର ଦେଶ ପ୍ରଥମ ଓ ସବୁଠାରୁ ଆଗରେ ବୋଲି କହିଥିଲେ।

“ସ୍ୱାଧୀନତାର ଅମୃତ କାଳ ହେଉଛି ଦେଶ ପାଇଁ କର୍ତ୍ତବ୍ୟ ସମ୍ପାଦନର ସମୟ । ସେ ବ୍ୟକ୍ତି ହେଉ ବା ଅନୁଷ୍ଠାନ ଆମର ଦାୟିତ୍ୱ ହେଉଛି ଆମର ପ୍ରାଥମିକତା” ବୋଲି ପ୍ରଧାନମନ୍ତ୍ରୀ କହିଥିଲେ। ଜଣେ ନିଜର କର୍ତ୍ତବ୍ୟ ପଥ ଅନୁସରଣ କଲେ ଦେଶ ବିକାଶର ନୂତନ ଶିଖର ଛୁଇଁ ପାରିବ ବୋଲି ସେ କହିଥିଲେ।

ପ୍ରଧାନମନ୍ତ୍ରୀ ସୂଚନା ଦେଇ କହିଥିଲେ ଯେ  ଆଉ ସପ୍ତାହକ ମଧ୍ୟରେ ଭାରତ ଜି-୨୦ର ସଭାପତିତ୍ୱ କରିବାକୁ ଯାଉଛି। ସେ ଦୃଷ୍ଟିରୁ ଦେଶ ମର୍ଯ୍ୟାଦା ଓ ଖ୍ୟାତି ଏକ ଦଳ ଭାବେ ବିଶ୍ୱ ଦରବାରରେ ଆମକୁ ରଖିବାକୁ ପଡିବ। “ଏହା ଆମର ମିଳିତ ଦାୟିତ୍ୱ”। ଗଣତନ୍ତ୍ରର ଜନନୀ ଭାବେ ଭାରତର ପରିଚୟକୁ ଆହୁରି ଅଧିକ ମଜବୁତ କରିବାକୁ ପଡିବ।”

ଯୁବ କୈନ୍ଦ୍ରିକ ଉତ୍ସାହ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ଆମ ସମ୍ବିଧାନ ଏହାର ଖୋଲାପଣ, ଭବିଷ୍ୟତ ପାଇଁ ଉପଯୁକ୍ତ ଓ ଆଧୁନିକ ଦୃଷ୍ଟିଭଙ୍ଗୀ ଦ୍ୱାରା ପରିପୃଷ୍ଟ। ଭାରତର ଅଭିବୃଦ୍ଧିର କାହାଣୀରେ ଯୁବଶକ୍ତିର ଅବଦାନକୁ ସେ ଦୃଢଭାବେ ସ୍ୱୀକାର କରିଥିଲେ।

ଭାରତୀୟ ସମ୍ବିଧାନରେ ଥିବା ସମାନତା ଓ ସଶକ୍ତିକରଣ ବିଷୟକୁ ନେଇ ଦେଶର ଯୁବଗୋଷ୍ଠୀଙ୍କୁ ସଚେତନ କରିବା ଉପରେ ଗୁରୁତ୍ୱ ଆରୋପ କରି ପ୍ରଧାନମନ୍ତ୍ରୀ ସମ୍ବିଧାନର ଚିଠା ପ୍ରସ୍ତୁତ ବେଳକୁ ଦେଶ କିଭଳି ପରିସ୍ଥିତି ଥିଲା ତାହାର ସ୍ମୃତିଚାରଣ କରିଥିଲେ। ସାମ୍ବିଧାନିକ ସଭାରେ ଚାଲିଥିବା ଆଲୋଚନା ବିଷୟବସ୍ତୁ ଉପରେ ଆମର ଯୁବଗୋଷ୍ଠୀ  ଅବଗତ ହେବା ଉଚିତ’ ବୋଲି ସେ କହିଥିଲେ। ଏହା ସେମାନଙ୍କ ସମ୍ବିଧାନ ଜାଣିବା ନେଇ ଆଗ୍ରହ ସୃଷ୍ଟି କରିବ। ପ୍ରଧାନମନ୍ତ୍ରୀ ସମ୍ବିଧାନ ସଭାରେ ୧୫ଜଣ ମହିଳା ସଦସ୍ୟ ଥିବା ସମ୍ପର୍କରେ ସୂଚନା ଦେଇ ସମାଜର ଅବହେଳିତ ବର୍ଗରୁ ଦାକ୍ଷାୟେନୀ ଭେଲାୟୁଧନଙ୍କ ଭଳି ମହିଳା କିପରି ଏଥିରେ ସ୍ଥାନ ପାଇଥିଲେ ତା’ର ଉଦାହରଣ ଦେଇଥିଲେ। ଦକ୍ଷୋୟେନୀ ଭେଲାୟୁଧନଙ୍କ ଭଳି ମହିଳା ଅବଦନାକୁ ନେଇ ଖୁବ୍ କମ୍ ଆଲୋଚନା ହେଉଥିବାରୁ ଯୋଗୁସେ ତାହାର ସମାଲୋଚନା କରିବା ସହ  ସେ ଦଳିତ ଓ ଶ୍ରମିକମାନଙ୍କ ଗୁରୁତ୍ୱପୂର୍ଣ୍ଣ ବିଷୟ ନେଇ ସଭାରେ ଅନେକ ହସ୍ତକ୍ଷେପ କରିଥିବା କଥା କହିଥିଲେ। ପ୍ରଧାନମନ୍ତ୍ରୀ ଦୁର୍ଗାବାଈ ଦେଶମୁଖ, ହାମ୍‌ସା ମେହେଟ୍ଟା, ରାଜକୁମାରୀ ଅମ୍ରିତ କାଉର ଓ ଅନ୍ୟାନ୍ୟ ମହିଳା ଯେଉଁମାନେ ମହିଳାଙ୍କ ସମସ୍ୟା ନେଇ ଅନେକ ଅବଦାନ ଦେଇଯାଇଛନ୍ତି ସେମାନଙ୍କ ସମ୍ପର୍କରେ ମଧ୍ୟ କହିଥିଲେ। “ଆମର ଯୁବଗୋଷ୍ଠୀ ଯେତେବଳେ ଏସବୁ ବିଷୟ ଜାଣିବାକୁ ପାଇବେ, ସେମାନେ ନିଜ ପ୍ରଶ୍ନର ଉତ୍ତରମାନ ପାଇଯିବେ” ବୋଲ୍‌ ଶ୍ରୀ ମୋଦୀ କହିଥିଲେ। ଏହା ଦ୍ୱାରା ସେମାନଙ୍କ ଆନୁଗତ୍ୟ ସମ୍ବିଧାନ ପ୍ରତି ରହିବ ଓ ତାହା ଆମର ସାମ୍ବିଧାନ, ଗତଣନ୍ତ୍ର ଓ ଭବିଷ୍ୟତକୁ ମଧ୍ୟ ସୁଦୃଢ କରିବ।”ଶେଷରେ ପ୍ରଧାନମନ୍ତ୍ରୀ କହିଥିଲେ ଯେ “ସ୍ୱାଧୀନତାର ଅମୃତ କାଳରେ ଏହା ଦେଶର ଆବଶ୍ୟକତା। ମୁଁ ଆଶା କରେ ଯେ ଏହି ସମ୍ବିଧାନ ଦିବସ ଏ ଦିଗରେ ଆମର ସଂକଳ୍ପକୁ ଅଧିକ ଶକ୍ତି ପ୍ରଦାନ କରିବ।”

ପ୍ରଧାନ ବିଚାରପତି ଡକ୍ଟର ଡି.ୱାଇ ଚନ୍ଦ୍ରଚୂଡ, କେନ୍ଦ୍ର ଆଇନ ଓ ନ୍ୟାୟ  ମନ୍ତ୍ରୀ କିରଣ ରିଜିଜୁ, ସୁପ୍ରିମକୋର୍ଟ ବିଚାରପତି ଜଷ୍ଟିସ ସଞ୍ଜୟ କିଶନ କାଉଲ ଓ ଜଷ୍ଟିସ ଏସ. ଅବଦୁଲ ନଜୀର, କେନ୍ଦ୍ର ଆଇନ ଓ ନ୍ୟାୟ ରାଷ୍ଟ୍ରମନ୍ତ୍ରୀ ପ୍ରଫେସର ଏସ.ପି. ବାଘେଲ, ଭାରତର ଆଟର୍ଣ୍ଣି ଜେନେରୋଲ ଆର. ଭେଙ୍କଟରମଣ, ଭାରତର ସଲିସିଟର ଜେନେରାଲ ତୁଷାର ମେହେଟ୍ଟା ଏବଂ ସୁପ୍ରିମକୋର୍ଟର ବାର ଆସୋସିଏସନ ସଭାପତି ବିକାଶ ସିଂ ଏହି ଅବସରରେ ଅନ୍ୟମାନଙ୍କ ମଧ୍ୟରେ ଉପସ୍ଥିତ ଥିଲେ।

ପୃଷ୍ଠଭୂମି: ଏହି ପ୍ରକଳ୍ପ ମକଦ୍ଦମାରେ ସମ୍ପୃକ୍ତ ପକ୍ଷ, ଆଇନଜୀବୀ ଓ ନ୍ୟାୟପାଳିକାକୁ ସେବା ଯୋଗାଇବ। ପ୍ରଧାନମନ୍ତ୍ରୀଙ୍କ ଦ୍ୱାରା ନିଆଯାଇଥିବା ପଦକ୍ଷେପଗୁଡିକ ମଧ୍ୟରେ ଭର୍ଚୁଆଲ ଜଷ୍ଟିସ କ୍ଲକ, ଜଷ୍ଟିସ ମୋବାଇଲ ଆପ୍ ୨.୦, ଡିଜିଟାଲ କୋର୍ଟ ଏବଂ ଏସ୍ ୩ ଡବ୍ଲୁଏଏଏସ ୱେବସାଇଟ୍  ଅନ୍ତର୍ଭୁକ୍ତ।

ଭର୍ଚୁଆଲ ଜଷ୍ଟିସ କ୍ଲକ୍ ନ୍ୟାୟ ପ୍ରଦାନ ପଦ୍ଧତିରେ ପ୍ରମୁଖ ପରିସଂଖ୍ୟନ, ନ୍ୟାୟାଳୟ ସ୍ତରରେ ପ୍ରଦାନ କରିଥାଏ। ଏଥିରେ ସମ୍ପୂର୍ଣ୍ଣ ମକଦ୍ଦମା, ମାମଲା, ରଫାଦଫା, ଦିନ,ସପ୍ତାହ,ମାସ ଭିତ୍ତିରେ ବିଚାରାଧୀନ ମାମଲା ଇତ୍ୟାଦିର ତଥ୍ୟ ପ୍ରଦାନ କରିଥାଏ। ଜନସାଧାରଣଙ୍କୁ ଏହା ନ୍ୟାୟାଳୟର ସ୍ୱଚ୍ଛତା ଓ ଉତ୍ତରଦାୟିତ୍ୱ ଓ ମାମଲା ଫଏସଲାର ସବିଶେଷ ନେଇ ସୁଚାଇଥାଏ। ଜିଲ୍ଲା କୋର୍ଟର ୱେବସାଇଟ୍  ଜରିଆରେ ଜନସାଧାରଣ  ଭର୍ଚୁଆଲ ଜଷ୍ଟିସ କ୍ଲକରେ ପହଞ୍ଚିପାରିବେ।

ଜଷ୍ଟିସ ମୋବାଇଲ ଆପ୍ ୨.୦ ବିଚାର ବିଭାଗୀୟ ଅଧିକାରୀଙ୍କ ନିକଟରେ ଉପଲବ୍ଧ। ଏହା ଦ୍ୱାରା ସେମାନେ ନିଜ କୋର୍ଟରେ ମାମଲା ଫଇସଲା ତଥା ବିଚାରଧୀନ ବିଷୟରେ ଜାଣିବା ସହ ନିଜ ଅଧୀନରେ କାର୍ଯ୍ୟ କରୁଥିବା ଅନ୍ୟ ଜଜ୍‌ଙ୍କ ସମ୍ପର୍କରେ ମଧ୍ୟ ଜାଣିପାରିବେ। ଏହି ଆପ୍ ବର୍ତ୍ତମାନ ହାଇକୋର୍ଟ ଓ ସୁପ୍ରିମକୋର୍ଟ ଜଜ୍‌ମାନଙ୍କ ଠାରେ ମଧ୍ୟ ଉପଲବ୍ଧ ହେଉଛି। ଏହା ଦ୍ୱାରା ସେମାନେ ସମସ୍ତ ରାଜ୍ୟ ଓ ଜିଲ୍ଲାରେ ଥିବା ବିଚାରାଧୀନ ଓ ଫଏସଲା ମାମଲା ସମ୍ପର୍କରେ ଜାଣିପାରିବେ।

ବିଚାରକମାନଙ୍କୁ ଡିଜିଟାଲ ଫର୍ମରେ କୋର୍ଟ ଅଭିଲେଖ ଉପଲବ୍ଧ ହେବା ପାଇଁ ଡିଜିଟାଲ କୋର୍ଟ ଏକ ମାଧ୍ୟମ। ଏହା କାଗ ବିହୀନ ଅଦାଲତ ପରିଚାଳନାକୁ ପ୍ରୋତ୍ସାହିତ କରିଥାଏ।

ଏସ୍ ୩ ଡବ୍ଲୁଏଏଏସ ୱେବସାଇଟ୍ ଜରିଆରେ ଜିଲ୍ଳା ବିଚାର ବିଭାଗୀ୍‌ୟ କୌଣସି ତଥ୍ୟ ବା ନିର୍ଦ୍ଦିଷ୍ଟ ସୂଚନା ପ୍ରକାଶ କରିହେବ। ଏହା ଏକ କ୍ଲାଉଡ ସେବା ଯାହା ସରକାରୀ ସଂସ୍ଥାକୁ ନିରାପଦ, ସୁଗମ୍ୟ ୱେବସାଇଟ୍ ସୃଷ୍ଟିରେ ସାହାଯ୍ୟ କରିଥାଏ। ଏହା ବହୁଭାଷୀ, ନାଗରିକ ଓ ଦିବ୍ୟାଙ୍ଗ ବନ୍ଧୁ ଭାବାପନ୍ନ ୱେବସାଇଟ୍।

Categories
ଜାତୀୟ ଖବର ବିଶେଷ ଖବର

ନୂଆଦିଲ୍ଲୀ ଠାରେ ଦୁର୍ନୀତି ନିବାରଣ ସଚେତନତା କାର୍ଯ୍ୟକ୍ରମରେ ପ୍ରଧାନମନ୍ତ୍ରୀଙ୍କ ଅଭିଭାଷଣ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀ ଠାରେ କେନ୍ଦ୍ରୀୟ ଦୁର୍ନୀତି ନିବାରଣ ଆୟୋଗ ପକ୍ଷରୁ ଆୟୋଜିତ ଦୁର୍ନୀତି ନିବାରଣ ସଚେତନତା ସପ୍ତାହ କାର୍ଯ୍ୟକ୍ରମରେ ଉଦବୋଧନ ଦେଇଛନ୍ତି। ଏହି ଅବସରରେ ସେ ଆୟୋଗର ଅଭିଯୋଗ ପରିଚାଳନା ପୋର୍ଟାଲ ମଧ୍ୟ ଆରମ୍ଭ କରିଛନ୍ତି।

ସମବେତ ଅତିଥିମାନଙ୍କୁ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଛନ୍ତି ଯେ ଦୁର୍ନୀତି ନିବାରଣ ସଚେତନତା ସପ୍ତାହ ସର୍ଦ୍ଦାର ପଟେଲଙ୍କ ଜନ୍ମ ଦିବସ ଠାରୁ ଆରମ୍ଭ ହୋଇଛି। “ସର୍ଦ୍ଦାର ପଟେଲଙ୍କ ସମଗ୍ର ଜୀବନ ସାଧୁତା, ସ୍ୱଚ୍ଛତା ଓ ଏହିସବୁ ଗୁଣକୁ ନେଇ ଜନସେବା ପଦ୍ଧତି ବିକାଶ କରିବା ନିମନ୍ତେ ଉଦ୍ଦିଷ୍ଟ ଥିଲା” ବୋଲି ସେ କହିଛନ୍ତି। ସଚେତନତା ଓ ସତର୍କତା ପାଇଁ ଚାଲିଥିବା ଅଭିଯାନ ଏହିସବୁ ନୀତିଗୁଡ଼ିକ ଉପରେ ପର୍ଯ୍ୟବସିତ। ଦୁର୍ନୀତି ନିବାରଣ ସଚେତନତା ସପ୍ତାହ ଅଭିଯାନ ଏକ ଦୁର୍ନୀତିମୁକ୍ତ ଭାରତ ଗଠନର ସ୍ୱପ୍ନ ଓ ଉତ୍ସାହକୁ ନେଇ କରାଯାଉଛି ଓ ଏହାର ଗୁରୁତ୍ୱ ପ୍ରତ୍ୟେକ ନାଗରିକ ଜୀବନରେ ରହିଛି ବୋଲି ପ୍ରଧାନମନ୍ତ୍ରୀ କହିଛନ୍ତି।

ପ୍ରଧାନମନ୍ତ୍ରୀ କହିଥିଲେ ଯେ ଏକ ଉନ୍ନତ ଭାରତ ନିମନ୍ତେ ଆସ୍ଥା ଓ ବିଶ୍ୱାସ ଖୁବ ତାତ୍ପର୍ଯ୍ୟପୂର୍ଣ୍ଣ। ସରକାରଙ୍କ ଉପରେ ଆସ୍ଥା ଜନସାଧାରଣଙ୍କ ଆତ୍ମ ବିଶ୍ୱାସ ବୃଦ୍ଧି କରିଥାଏ। ପୂର୍ବ ସରକାରଗଣ ଲୋକମାନଙ୍କ ଆସ୍ଥା ହରାଇବା ସହ ସେମାନଙ୍କୁ ବିଶ୍ୱାସରେ ମଧ୍ୟ ନ ନେଇଥିବାରୁ ପ୍ରଧାନମନ୍ତ୍ରୀ ଏହାର ସମାଲୋଚନା କରିଥିଲେ। ଦୀର୍ଘ ବର୍ଷ ଧରି ଚଳିଆସିଥିବା ଦାସତ୍ୱ ଦୁର୍ନୀତି, ଶୋଷଣ ଓ ସମ୍ପଦ ଉପରେ ଅଧିକାର ଇତ୍ୟାଦି ସ୍ୱାଧୀନତା ପରେ ମଧ୍ୟ ଦୁର୍ଭାଗ୍ୟଜନକ ଭାବେ ଅଧିକ ଶକ୍ତିଶାଳୀ ହେଲା। ଦାସତ୍ୱ ଅନୂନ୍ୟ ଚାରି ପିଢ଼ିକୁ ଘୋର କ୍ଷତି ପହଂଚାଇଥିଲା। “ଯୁଗ ଯୁଗ ଧରି ରହିଥିବା ଏଭଳି ଚଳଣିକୁ ଆମେ ସମ୍ପୂର୍ଣ୍ଣ ଭାବେ ସ୍ୱାଧୀନତାର ଅମୃତ କାଳରେ ପରିବର୍ତ୍ତନ କରିବା” ବୋଲି ପ୍ରଧାନମନ୍ତ୍ରୀ କହିଥିଲେ। ଦୁର୍ନୀତି ନେଇ ପ୍ରଧାନମନ୍ତ୍ରୀ ଲାଲକିଲ୍ଲାର ପ୍ରାଚୀର ଉପରୁ କରିଥିବା ଘୋଷଣାର ନଜିର ଦେଇ ଜନସାଧାରଣଙ୍କ ପ୍ରଗତି ଓ ଦୁର୍ନୀତିର ଦୁଇଟି ମୁଖ୍ୟ କାରଣ ସୁଖ ସ୍ୱାଚ୍ଛନ୍ଦ୍ୟର ଅଭାବ ଓ ସରକାରଙ୍କ ପକ୍ଷରୁ ଅନାବଶ୍ୟକ ଚାପ ବୋଲି କହିଥିଲେ। ଦୀର୍ଘ ଦିନ ଧରି ଏହି ସୁଖ ସୁବିଧାର ଅଭାବ ଜାଣିଶୁଣି ବଳବତ୍ତର ରଖାଯିବା ଯୋଗୁ ଅର୍ଥ ପାଇଁ ଏକ ଅସ୍ୱାସ୍ଥ୍ୟକର ପ୍ରତିଯୋଗିତା ହେବାରେ ଲାଗିଲା। ଏହି ଦୌଡ଼ ଦୁର୍ନୀତିର ବାତାବରଣକୁ ଅଧିକ ରୁଦ୍ଧିମନ୍ତ କଲା। ଅଭାବ କଷଣଜନିତ ଦୁର୍ନୀତି ଗରୀବ ଓ ମଧ୍ୟବିତ୍ତ ଶ୍ରେଣୀକୁ ସବୁଠାରୁ ଅଧିକ ପ୍ରଭାବିତ କଲା। “ଯଦି ଗରୀବ ଓ ମଧ୍ୟବତ୍ତି ଶ୍ରେଣୀ ମୌଳିକ ଆବଶ୍ୟକତା ପୂରଣ ଦିଗରେ ସମସ୍ତ ଶକ୍ତି ଲଗାଇବେ ତେବେ ଦେଶ କିପରି ପ୍ରଗତି କରିବ” ବୋଲି ପ୍ରଧାନମନ୍ତ୍ରୀ ପଚାରିଥିଲେ। “ସେଥିପାଇଁ ପ୍ରଧାନମନ୍ତ୍ରୀ କହିଥିଲେ ଯେ “ଆମେ ଏହି ଅଭାବ ଅସୁବିଧା ଦୂର କରିବା ପାଇଁ ଦୀର୍ଘ ଆଠ ବର୍ଷ ଧରି ଚେଷ୍ଟା କରୁଛୁ। ସରକାର ଯୋଗାଣ ଓ ଚାହିଦା ମଧ୍ୟରେ ଥିବା ବ୍ୟବଧାନକୁ ଦୂର କରିବାକୁ ଚେଷ୍ଟା କରୁଛନ୍ତି। ଏହାକୁ ହାସଲ କରିବା ପାଇଁ ଯେଉଁ ତିନିଟି ରାସ୍ତା ବଛାଯାଇଛି ସେଗୁଡ଼ିକ ହେଲା – ପ୍ରଯୁକ୍ତିବିଦ୍ୟାର ପ୍ରସାର, ମୌଳିକ ଆବଶ୍ୟକ ସମ୍ପୂର୍ଣ୍ଣ ସ୍ତରକୁ ଦେବା ଓ ଶେଷରେ ଆତ୍ମ ନିର୍ଦ୍ଧାରଣ ଅଭିମୁଖେ ଅଭିଯାନ।”

ପ୍ରଯୁକ୍ତିବିଦ୍ୟାର ଉପଯୋଗ ନେଇ ପ୍ରଧାନମନ୍ତ୍ରୀ କହିଥିଲେ ଯେ ସାଧାରଣ ବଣ୍ଟନ ବ୍ୟବସ୍ଥା (ପିଡିଏସ)କୁ ପ୍ରଯୁକ୍ତି ସହ ଯୋଡ଼ିଯିବା ଯୋଗୁ ଅଯୋଗ୍ୟ ହିତାଧିକାରୀଙ୍କ ପାଖକୁ ଯିବାରୁ ପ୍ରାୟ ଦୁଇ ଲକ୍ଷ କୋଟି ଟଙ୍କାରୁ ଅଧିକ ବଂଚାଯାଇପାରିଛି। ଏହାଛଡ଼ା ପ୍ରତ୍ୟକ୍ଷ ପୁଞ୍ଜି ହସ୍ତାନ୍ତର (ଡିବିଟି) ପଦ୍ଧତି ଯୋଗୁ ଏହି ଅର୍ଥ ପ୍ରକୃତ ହିତାଧିକାରୀଙ୍କ ପାଖକୁ ଯାଇଛି। ସେହିପରି ସ୍ୱଚ୍ଛ ଡିଜିଟାଲ ଦେଶ ଦେଶ ଓ ଜିଇଏମ ଜରିଆରେ ସ୍ୱଚ୍ଛ ସରକାରୀ ଆହରଣ ଅନେକ ପରିବର୍ତ୍ତନ ଆଣିପାରିଛି। ମୌଳିକ ସୁବିଧା ସମ୍ପୂର୍ଣ୍ଣ ପହଂଚାଇବା ନେଇ ପ୍ରଧାନମନ୍ତ୍ରୀ କହିଥିଲେ ଯେ ପ୍ରତ୍ୟେକ ଯୋଗ୍ୟ ହିତାଧିକାରୀ ସରକାରୀ ଯୋଜନାର ସମ୍ପୂର୍ଣ୍ଣ ଲାଭ ପାଇଲେ ସମାଜରେ ବାଛବିଚାର ଦୂର ହେବା ସହ ଦୁର୍ନୀତିର ପରିସର ମଧ୍ୟ ଲୋପ ପାଇଥାଏ। ସମ୍ପୂର୍ଣ୍ଣ ଯୋଜନା ସୁବିଧା ଉପରେ ଆଲୋକପାତ କରି ପ୍ରଧାନମନ୍ତ୍ରୀ ଜଳ ସଂଯୋଗ, ପକ୍କା ଘର, ବିଜୁଳି ଓ ଗ୍ୟାସ ପାଇପ ଉଦାହରଣ ଦେଇଥିଲେ।

ବିଦେଶୀ ସାମଗ୍ରୀ ଉପରେ ଅଧିକ ନିର୍ଭରଶୀଳ ମଧ୍ୟ ଦୁର୍ନୀତିର ଏକ କାରଣ ବୋଲି ପ୍ରଧାନମନ୍ତ୍ରୀ କହିଥିଲେ। ସେ ସରକାରଙ୍କ ପ୍ରତିରକ୍ଷା କ୍ଷେତ୍ରରେ ଆତ୍ମନିର୍ଭରଶୀଳତା ଉପରେ ଆଲୋକପାତ କରି କହିଥିଲେ, ଯେତେବେଳେ ଭାରତ ନିଜସ୍ୱ ପ୍ରତିରକ୍ଷା ଉପକରଣ, ଯେପରିକି ରାଇଫଲ ଠାରୁ ଆରମ୍ଭ କରି ଯୁଦ୍ଧ ଓ ପରିବହନ ବିମାନ ପର୍ଯ୍ୟନ୍ତ ନିର୍ମାଣ କରିବ ସେତେବେଳେ ଦୁର୍ନୀତି ସମ୍ଭାବନା ଆପେ ଆପେ ଦୂରେଇଯିବ।

ସିଭିସି ଏପରି ଏକ ସଂସ୍ଥା ତାହା ସମସ୍ତଙ୍କ ସ୍ୱଚ୍ଛତା ସୁନିଶ୍ଚିତ ନୀତିକୁ ପ୍ରୋତ୍ସାହିତ କରିଥାଏ ବୋଲି କହି ପ୍ରଧାନମନ୍ତ୍ରୀ ଗତଥର କହିଥିବା ‘ଦୁର୍ନୀତି ପ୍ରତିଷେଧକ’ ସିଭିସି କାର୍ଯ୍ୟକାରୀ କରିଥିବାରୁ ଏହାର ପ୍ରଶଂସା କରିଥିଲେ। ପ୍ରଧାନମନ୍ତ୍ରୀ ଦୁର୍ନୀତି ନିବାରଣ ସଂସ୍ଥାକୁ ସେମାନଙ୍କ ହିସାବକିତାବ ସମୀକ୍ଷା ଓ ନିରୀକ୍ଷଣର ଆଧୁନିକୀକରଣ ନେଇ ଚିନ୍ତା କରିବାକୁ ପରାମର୍ଶ ଦେଇଥିଲେ। “ସରକାର ଦୁର୍ନୀତି ନେଇ ଯେଉଁ ଆଭିମୁଖ୍ୟ ରଖିଛନ୍ତି, ତାହାସବୁ ବିଭାଗରେ ପ୍ରତିଫଳିତ ହେବା ଆବଶ୍ୟକ। ଉନ୍ନତ ଭାରତ ପାଇଁ ଆମକୁ ଶୂନ୍ୟ ସହନଶୀଳତା ଦୁର୍ନୀତିର ପ୍ରଶାସନିକ ବାତାବରଣ ସୃଷ୍ଟି କରିବାକୁ ପଡ଼ିବ” ବୋଲି ସେ କହିଥିଲେ। ପ୍ରଧାନମନ୍ତ୍ରୀ ଦୁର୍ନୀତି ସମ୍ପର୍କିତ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ସମ୍ପୂର୍ଣ୍ଣ କରିବା ପଦ୍ଧତି ଅନୁସରଣ କରିବା ଉପରେ ପରାମର୍ଶ ଦେଇଥିଲେ। ସେ ମଧ୍ୟ ଅପରାଧିକ ମାମଲାଗୁଡ଼ିକର ନିରବଚ୍ଛିନ୍ନ ଅନୁଧ୍ୟାନ ପାଇଁ ପ୍ରସ୍ତାବ ଦେବା ସହ ରାଙ୍କିଙ୍ଗ ଅନୁସାରେ ବିଭାଗୀୟ ଦୁର୍ନୀତି ମାମଲାଗୁଡ଼ିକର ତତନ୍ତ ଅଗ୍ରଗତି ନେଇ ମାସିକ ବା ତ୍ରେମାସିକ ଭିତ୍ତିରେ ପ୍ରକାଶ କରିବା ଉପରେ ଗୁରୁତ୍ୱଆରୋପ କରିଥିଲେ। ପ୍ରଯୁକ୍ତିଜ୍ଞାନ ଉପଯୋଗ କରି ଦୁର୍ନୀତି ମାମଲା ନିଷ୍ପାଦନ ଉପରେ କହିଥିଲେ। ଜନସାଧାରଣଙ୍କ ଆପତ୍ତି ଅଭିଯୋଗର ତଥ୍ୟର ଅନୁଶୀଳନ କଲେ ଆମେ ସମ୍ପୃକ୍ତ ବିଭାଗର ଦୁର୍ନୀତିର ମୂଳ କାରଣ ନିର୍ଦ୍ଧାରଣ କରିପାରିବା ବୋଲି ସେ କହିଥିଲେ।

ଦୁର୍ନୀତି ଉପରେ ନଜର ରଖିବା ପାଇଁ ଏହି କାର୍ଯ୍ୟରେ ସାଧାରଣ ନାଗରିକଙ୍କ ଅଂଶଗ୍ରହଣ ଉପରେ ସେ ଗୁରୁତ୍ୱାରୋପ କରିଥିଲେ। “ଦୁର୍ନୀତିଗ୍ରସ୍ତ ବ୍ୟକ୍ତି ଯେତେ ଶକ୍ତିଶାଳୀ ହେଉ ନା କାହିଁକି ସେମାନଙ୍କୁ କୌଣସିମତେ ବଂଚାଇବା ଉଚିତ ନୁହେଁ ଓ ଏହା ଆପଣଙ୍କ ଭଳି ସଂଗଠନର ଦାୟିତ୍ୱ। କୌଣସି ଦୁର୍ନୀତିଗ୍ରସ୍ତ ବ୍ୟକ୍ତି ରାଜନୈତିକ, ସାମାଜିକ ସମର୍ଥନ ପାଇବା ଅନୁଚିତ୍। ପ୍ରତ୍ୟେକ ଦୁର୍ନୀତିଗସ୍ତ ବ୍ୟକ୍ତି ସମାଜ ଆଗରେ ଉପସ୍ଥାପିତ ହେବା ଦରକାର ଓ ସେଥିପାଇଁ ଏକ ବାତାବରଣର ମଧ୍ୟ ଆବଶ୍ୟକତା ଅଛି ବୋଲି ସେ କହିଥିଲେ। ଏକ ବିଚଳିତ କରୁଥିବା ଭଳି ଧାରା ଉପରେ ଆଲୋକପାତ କରି ସେ କହିଥିଲେ ଯେ ଦୁର୍ନୀତି ପ୍ରମାଣିତ ହୋଇ କାରାବାସ ପରେ ମଧ୍ୟ ଦୁର୍ନୀତିଗ୍ରସ୍ତ ବ୍ୟକ୍ତି ଗୌରବମଣ୍ଡନ ହେବା ଦେଖାଯାଉଛି। ଏହା ଭାରତୀୟ ସମାଜ ପାଇଁ ଆଦୌ ଠିକ ନୁହଁ। ଆଜି ମଧ୍ୟ ଦୋଷୀ ସାବ୍ୟସ୍ତ କେତେକଙ୍କ ସପକ୍ଷରେ ଅନେକ ବ୍ୟକ୍ତି ଯୁକ୍ତି ବାଢୁଛନ୍ତି। ସମାଜ ପକ୍ଷରୁ ସେମାନଙ୍କ କର୍ତ୍ତବ୍ୟ ସମ୍ପର୍କରେ ସଚେତନ କରାଇବା ଆବଶ୍ୟକ। ଏସବୁ ବ୍ୟକ୍ତି ବିଶେଷଙ୍କ ପାଇଁ ଆପଣଙ୍କ ବିଭାଗ ଠିକଣା ପଦକ୍ଷେପ ଦେବାର ଆବଶ୍ୟକତା ରହିଛି।” ଦୁର୍ନୀତି ଓ ଦୁର୍ନୀତିଗ୍ରସ୍ତ ବ୍ୟକ୍ତିଙ୍କ ବିରୁଦ୍ଧରେ ପଦକ୍ଷେପ ଦେଇଥିବା ସିଭିସି ଭଳି ସଂଗଠନ କୌଣସିମତେ ରକ୍ଷଣାତ୍ମକ ନହେବା ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ। କୌଣସି ରାଜନୀତିକ ଅଭିସନ୍ଧି ରଖି କାର୍ଯ୍ୟ କରିବା ଉପରେ ସେ ଗୁରୁତ୍ୱାରୋପ କରିଥିଲେ। “ଯେଉଁମାନଙ୍କ ନ୍ୟସ୍ତ ସ୍ୱାର୍ଥ ଅଛି ସେମାନେ ସଂଗଠନର ବ୍ୟକ୍ତିମାନଙ୍କ କାର୍ଯ୍ୟରେ ପ୍ରତିବନ୍ଧକ ହେବା ପାଇଁ ଓ ସେମାନଙ୍କୁ ବଦନାମ କରିବାକୁ ଚେଷ୍ଟା କରିବେ” ବୋଲି କହି ଈଶ୍ୱରଙ୍କ ଭଳି ଜନତା ଜନାର୍ଦ୍ଦନ ପ୍ରକୃତ ତଥ୍ୟ ଜାଣନ୍ତି ଓ ଯେତେବେଳେ ସମୟ ଆସିବ ସେମାନେ ସତ୍ୟ ପଛରେ ଛିଡ଼ା ହେବେ” ବୋଲି ପ୍ରଧାନମନ୍ତ୍ରୀ କହିଥିଲେ। ପ୍ରଧାନମନ୍ତ୍ରୀ ପ୍ରତ୍ୟେକଙ୍କୁ ସତ୍ୟ ପଥରେ ଚାଲି ସେମାନଙ୍କ କର୍ତ୍ତବ୍ୟ ଉତ୍ସର୍ଗୀକୃତ ମନୋଭାବର ସହ  ତୁଲାଇବାକୁ ପରାମର୍ଶ ଦେଇଥିଲେ। “ତୁମେ ଯେତେବେଳେ ଦୋଷ ସିଦ୍ଧ କରି କାର୍ଯ୍ୟାନୁଷ୍ଠାନ ଗ୍ରହଣ କରିବ, ସମଗ୍ର ଦେଶ ତୁମ ପଛରେ ଠିଆ ହେବ” ବୋଲି କହିଥିଲେ।

ଶେଷରେ ପ୍ରଧାନମନ୍ତ୍ରୀ କହିଥିଲେ ଯେ ଦାୟିତ୍ୱ ବହୁତ ଅଧିକ ଓ ଆହ୍ୱାନଗୁଡ଼ିକର ମଧ୍ୟ ଅବସ୍ଥାନ୍ତର ଘଟୁଛି। “ମୁଁ ନିଶ୍ଚିତ ଯେ ଆପଣମାନେ ଅମୃତ କାଳରେ ଏକ ସ୍ୱଚ୍ଛ ଓ ପ୍ରତିଯୋଗିତାମୂଳକ ବାତାବରଣ ସୃଷ୍ଟି ଦିଗରେ ବିରାଟ ଭୂମିକା ତୁଲାଇବେ”। ସେ ଆହ୍ୱାନର ମୁକାବିଲା ନିମନ୍ତେ ସବୁବେଳେ ପ୍ରଗତିଶୀଳ ପଦ୍ଧତି ଅନୁସରଣ ଉପରେ ଗୁରୁତ୍ୱ ଆରୋପ କରିଥିଲେ। ପ୍ରଧାନମନ୍ତ୍ରୀ ଆୟୋଜିତ ପ୍ରବନ୍ଧ ପ୍ରତିଯୋଗିତାର ବିଜେତାମାନଙ୍କ ସହ କଥାବାର୍ତ୍ତା ହେବା ସହ ଭବିଷ୍ୟତରେ ତର୍କ ପ୍ରତିଯୋଗିତା ପାଇଁ ମଧ୍ୟ ପ୍ରସ୍ତାବ ଦେଇଥିଲେ। ଦୁର୍ନୀତି ବିରୁଦ୍ଧରେ ସମ୍ପ୍ରତି ପବିତ୍ର ପ୍ରତିଯୋଗିତାରେ ପାଞ୍ଚ ଜଣ ବିଜେତାଙ୍କ ମଧ୍ୟରେ ଚାରିଜଣ ବାଳିକା ଥିବା ନେଇ ପ୍ରଧାନମନ୍ତ୍ରୀ ଏହି ଯାତ୍ରାରେ ମିଳିମିଶି ସାମିଲ ହେବାକୁ ପରାମର୍ଶ ଦେଇଥିଲେ। “ପରିଚ୍ଛନ୍ନତାର ଗୁରୁତ୍ୱ ଅପରିଚ୍ଛନ୍ନତା ଦୂରୀକରଣରୁ ହିଁ କଳନା କରିହେବ” ବୋଲି ସେ କହିଥିଲେ। “ଯେଉଁମାନେ ଆଇନର ପରିଧି ମଧ୍ୟରେ କାର୍ଯ୍ୟ କରୁଛନ୍ତି ସେମାନଙ୍କ ପାଇଁ ପ୍ରଯୁକ୍ତିବିଦ୍ୟା ବେଶ ସହାୟକ ହେବ” ବୋଲି କହି ପ୍ରଧାନମନ୍ତ୍ରୀ ଦୁର୍ନୀତି ବିରୁଦ୍ଧରେ ସଂଗ୍ରାମ ପାଇଁ ଯଥା ସମ୍ଭବ ଅଧିକ ପ୍ରଯୁକ୍ତିବିଦ୍ୟାର ଆଶ୍ରୟ ଦେବାକୁ ପରାମର୍ଶ ଦେଇ ତାଙ୍କ ବକ୍ତବ୍ୟ ସମାପନ କରିଥିଲେ।

ପ୍ରଧାନ ସଚିବ ଡକ୍ଟର ପି କେ ମିଶ୍ର, ସଂସଦୀୟ ବ୍ୟାପାର ଓ କାର୍ମିକ ରାଷ୍ଟ୍ରମନ୍ତ୍ରୀ ଡକ୍ଟର ଜିତେନ୍ଦ୍ର ସିଂ, କ୍ୟାବିନେଟ ସଚିବ କେନ୍ଦ୍ର ଦୁର୍ନୀତି ନିବାରଣ ଆୟୁକ୍ତ ସୁରେଶ ଏନ ପଟେଲ ଓ ଦୁର୍ନୀତି ନିବାରଣ ଆୟୁକ୍ତ ଶ୍ରୀ ପି. କେ. ଶ୍ରୀବାସ୍ତବ ଓ ଶ୍ରୀ ଅରବିନ୍ଦ କୁମାର ଏହି ଅବସରରେ ଉପସ୍ଥିତ ଥିଲେ।

ପୃଷ୍ଠଭୂମି:

ଆରମ୍ଭ କରାଯାଇଥିବା ପୋର୍ଟାଲ ଅଭିଯୋଗ ସମ୍ପର୍କରେ ସବିଶେଷ ତଥ୍ୟ ସହ ଆମୂଳଚୂଳ ବିଷୟରେ ଜାଣିହେବ । ଏହା ଧାରାବାହିକ ସଚିତ୍ର ବୁକଲେଟ “ନୈତିକତା ଓ ଉତ୍ତମ ଆଚରଣ” ପ୍ରକାଶ କରିବ ।

ସିଭିସି ପକ୍ଷରୁ ପ୍ରତିବର୍ଷ ଦୁର୍ନୀତି ନିବାରଣ ସପ୍ତାହ ପାଳନ କରାଯାଇ ଏହାର ଭାଗିଦାରମାନେ ଜୀବନରେ ସଂହତି ନେଇ ସଚେତନ କରାଇଥାଆନ୍ତି । ଚଳିତ ବର୍ଷ ଏହା ଅକ୍ଟୋବର ୩୧ରୁ ନଭେମ୍ବର ୬ ତାରିଖ ମଧ୍ୟରେ ପାଳିତ ହେଉଛି । ଏଥର ବାର୍ତ୍ତା “ଏକ ଉନ୍ନତ ଦେଶ ପାଇଁ ଦୁର୍ନୀତିମୁକ୍ତ ଭାରତ” ରଖାଯାଇଛ । ଏହି ଅବସରରେ ଦୁର୍ନୀତି ସଚେତନତା ସପ୍ତାହ ବିଷୟବସ୍ତୁ ଉପରେ ଆଧାରିତ ତଥା ସିଭିସି ପକ୍ଷରୁ ଆୟୋଜିତ ସର୍ବଭାରତୀୟ ପ୍ରବନ୍ଧ ପ୍ରତିଯୋଗିତାର ପାଞ୍ଚଜଣ ବିଜୟୀ ଛାତ୍ରୀଙ୍କୁ ପ୍ରଧାନମନ୍ତ୍ରୀ ପୁରସ୍କୃତ କରିଥିଲେ ।

Categories
ବିଶେଷ ଖବର

ଇଶା ପାଉଣ୍ଡେସନ ପକ୍ଷରୁ “ମାଟି ବଞ୍ଚାଅ’ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀଙ୍କ ଅଭିଭାଷଣ

ନୂଆଦିଲ୍ଲୀ: ପ୍ରଥମରୁ ପ୍ରଧାନମନ୍ତ୍ରୀ ସମବେତ ଜନତାଙ୍କୁ ବିଶ୍ୱ ପରିବେଶ ଦିବସର ଶୁଭେଚ୍ଛା ଜଣାଇଥିଲେ। “ମାଟି ବଞ୍ଚାଅ” ଆନ୍ଦୋଳନ ପ୍ରଶଂସା କରି ପ୍ରଧାନମନ୍ତ୍ରୀ ଦେଶ ଯେତେବେଳେ ଆଜାଦୀ କା ଅମ୍ରିତ ମହୋତ୍ସବର ସଂକଳ୍ପ ନେଇଛି, ସେତେବେଳେ ଏଭଳି ଆନ୍ଦୋଳନ ସ୍ୱତନ୍ତ୍ର ଗୁରୁତ୍ୱ ବହନ କରେ ବୋଲି କହିଥିଲେ।

ଗତ ଆଠବର୍ଷ ମଧ୍ୟରେ ହୋଇଥିବା ମୁଖ୍ୟ କାର୍ଯ୍ୟକ୍ରମଗୁଡିକ ପରିବେଶ ସୁରକ୍ଷାକୁ ଆଖିଆଗରେ ରଖି ଆରମ୍ଭ କରାଯାଇଥିବାରୁ ସେ ସନ୍ତୋଷବ୍ୟକ୍ତ କରିଥିଲେ। ସ୍ୱଚ୍ଛଭାରତ ମିଶନ, ସମ୍ପଦ ନଷ୍ଟ କରୁଥିବା  ସମ୍ପର୍କୀତ କାର୍ଯ୍ୟକ୍ରମ, ଏକକ ପ୍ଳାଷ୍ଟିକ ବ୍ୟବହାର ହ୍ରାସ, ଗୋଟିଏ ସୂର୍ଯ୍ୟ ଗୋଟିଏ ପୃଥିବୀ ବା ଇଥାନଲ ମିଶ୍ରଣ ଭଳି କାର୍ଯ୍ୟକ୍ରମ ପରିବେଶ ସୁରକ୍ଷାର ଉଦାହରଣ ବୋଲି ସେ କହିଥିଲେ।

ପ୍ରଧାନମନ୍ତ୍ରୀ ଭାରତରେ ପରିବେଶ ସୁରକ୍ଷା ଉଦ୍ୟମ ବହୁମୁଖୀ ବୋଲି କହିଥିଲେ। ଭାରତର ଭୂମିକା ଜଳବାୟୁ ସୁରକ୍ଷା ଦିଗରେ ଖୁବ୍ ମାମୁଲି ହୋଇଥିବାରୁ ଭାରତ ଏଭଳି ଉଦ୍ୟମ କରୁଛି। ବୃହତ୍ ଆଧୁନିକ ଦେଶଗୁଡିକ ପୃଥିବୀର ଅମୂଲ୍ୟ ସମ୍ପଦ କେବଳ ଲୁଟ କରୁନାହାନ୍ତି ବରଂ ସର୍ବାଧିକ ଅଙ୍ଗାରକାମ୍ଳ ନିର୍ଗମନ ମଧ୍ୟ ସେମାନଙ୍କ ଦ୍ୱାରା ହିଁ ହେଉଛି। ପ୍ରଧାନମନ୍ତ୍ରୀ କହିଥିଲେ ଯେ ବିଶ୍ୱରେ ବ୍ୟକ୍ତି ପିଛା ବାର୍ଷିକ ହାରାହାରି ଅଙ୍ଗାରକାମ୍ଳ ନିର୍ଗମନ ଚାରିଟନ ହୋଇଥିବାବେଳେ ଭାରତରେ ବ୍ୟକ୍ତି ପିଛା ଏହା ୦.୫ଟନ୍। ଭାରତ ଦୀର୍ଘମିଆଦି ଭିତିରେ ଆନ୍ତର୍ଜାତିକ ଗୋଷ୍ଠୀ ସହ ମିଶି ପରିବେଶ ସୁରକ୍ଷା ପାଇଁ ବିପର୍ଯ୍ୟୟ ନମନୀୟ ଭିତ୍ତିଭୂମି, ଆନ୍ତର୍ଜାତିକ ସୌର ଚୁକ୍ତି ଇତ୍ୟାଦି କରିଛି। ୨୦୭୦ ସୁଦ୍ଧା ଭାରତର ଲକ୍ଷ୍ୟ ନେଟ ଜିରୋ ବୋଲି ପ୍ରଧାନମନ୍ତ୍ରୀ ତାଙ୍କ ଅଭିଭାଷଣରେ ଦୋହରାଇଥିଲେ।

ପ୍ରଧାନମନ୍ତ୍ରୀ କହିଥିଲେ ଯେ ମାଟିର ସୁରକ୍ଷା ପାଇଁ ଆମେ ପାଞ୍ଚଟି ଜିନିଷ ଉପରେ ଧ୍ୟାନ ଦେଉଛୁ। ପ୍ରଥମ ହେଲା ମାଟିକୁ କିପରି ରାସାୟନିକ ପ୍ରକ୍ରୀୟାରୁ ମୁକ୍ତ କରାହେବ। ଦ୍ୱିତୀୟ ହେଲା ମାଟିରେ ଥିବା ଜୈବିକ ପଦାର୍ଥ କିପରି ରକ୍ଷା କରାଯିବ ବା ବୈଷୟିକ ଦୃଷ୍ଟିର ଏହା ମାଟି ଜୈବିକ ବିଷୟ ବୋଲି କୁହାଯାଏ। ତୃତୀୟରରେ ମାଟିର ଆର୍ଦ୍ରତା ରକ୍ଷା ଓ ଏଥିରେ ଜଳୀୟ ଅଂଶ କିପରି ରହିବ ଏହା ଦେଖିବା। ଚତୁର୍ଥରେ ଭୂତଳ ଜଳ ହ୍ରାସ ଯୋଗୁଁ ମାଟିରୁ ହେଉଥିବା କ୍ଷତିକୁ ସୁଧାରିବା। ଏବଂ ପଞ୍ଚମରେ ଜଙ୍ଗଲ କ୍ଷୟ ଯୋଗୁଁ ନିରବଚ୍ଛିନ୍ନ ମୃତ୍ତିକା କ୍ଷୟ କିପରି ରୋକିବା।

ସେ କହିଥିଲେ ଯେ ମାଟି ସମସ୍ୟାର ସମାଧାନ ନିମନ୍ତେ କୃଷି କ୍ଷେତ୍ରରେ ମୁଖ୍ୟ କାର୍ଯ୍ୟ କରାଯାଉଛି । ଆଗରୁ ଆମ ଚାଷୀମାନେ ମାଟିର କିସମ, ଅଭାବ ଓ ସେଥିରେ ଥିବା ଜଳୀୟ ଅଂଶ ପରିମାଣ ନେଇ ଜାଣିପାରୁ ନ ଥିଲେ। ସେ ସମସ୍ୟାରୁ ମୁକ୍ତି ପାଇବା ଲାଗି ଏକ ବିଶାଳ ଅଭିଯାନ ଜରିଆରେ ଚାଷୀମାନଙ୍କୁ ମୃତ୍ତିକା ସ୍ୱାସ୍ଥ୍ୟ କାର୍ଡ ଦେଶରେ ଦେବା ପାଇଁ ସ୍ଥିର ହେଲା ବୋଲି ସେ କହିଥିଲେ।

ପ୍ରଧାନମନ୍ତ୍ରୀ କହିଥିଲେ ଯେ ସରକାର ଜନସାଧାରଣଙ୍କ ସହ ଜଳ ସଂରକ୍ଷଣ ବା କ୍ୟାଚ ଦି ରେନ ଅଭିଯାନ ଜରିଆରେ ଯୋଗାଯୋଗରେ ଅଛନ୍ତି। ଚଳିତବର୍ଷ ମାର୍ଚ୍ଚ ମାସରେ ହିଁ ଦେଶର ୧୩ଟି ବଡ ନଦୀରେ ଜଳ ସଂରକ୍ଷଣ କିପରି ହେବ ସେଥିପାଇଁ ଅଭିଯାନ ଆରମ୍ଭ ହୋଇଛି। ଏହି ଅଭିଯାନ ଅଧୀନରେ ନଦୀରେ ପ୍ରଦୂଷଣ ମାତ୍ରା ହ୍ରାସ ସହ କୂଳରେ ଗଛ ଲଗାଇବା ପାଇଁ କାର୍ଯ୍ୟ ଚାଲିଛି। ଆକଳନ ଅନୁସାରେ ଏହା ଦ୍ୱାରା ୭୪୦୦ ବର୍ଗ କିଲୋମିଟର ଜଙ୍ଗଲ ସୃଷ୍ଟି ସହ ଦେଶର ଜଙ୍ଗଲ ସୀମା ୨୦ହଜାର ବର୍ଗ କିଲୋମିଟର ବୃଦ୍ଧି ପାଇବ ଯାହାକି ଗତ ଆଠବର୍ଷ ମଧ୍ୟରେ ହାସଲ କରାଯାଇପାରିଛି।

ପ୍ରଧାନମନ୍ତ୍ରୀ ଆହୁରି କହିଥିଲେ ଯେ ଭାରତ ଆଜି ଅନୁସରଣ କରୁଥିବା ଜୈବ ବିବିଧତା ଓ ବନ୍ୟପ୍ରାଣୀ ନୀତି ଯୋଗୁଁ ବନ୍ୟପ୍ରାଣୀ ସଂଖ୍ୟାରେ ରେକର୍ଡ ପରିମାଣରେ ବୃଦ୍ଧି ଘଟିଛି। ଆଜି ସେ ବାଘ, ସିଂହ, କଲାରାପତରିଆ  ବା ହାତୀ ସମସ୍ତଙ୍କ ସଂଖ୍ୟା ଦେଶରେ ବୃଦ୍ଧି ପାଇଛି। ପ୍ରଧାନମନ୍ତ୍ରୀ କହିଥିଲେ ଯେ ଦେଶରେ ପ୍ରଥମ ଥର ପାଇଁ ସ୍ୱଚ୍ଛତା ଓ ଜାଳେଣିରେ ଆତ୍ମନିର୍ଭରଶୀଳତା ପାଇଁ ପଦକ୍ଷେପ ନିଆଯାଇଛି। ଚାଷୀମାନଙ୍କ ଆୟ ବୃଦ୍ଧି ପାଇଁ ମୃତ୍ତିକା ସ୍ୱାସ୍ଥ୍ୟ କାର୍ଯ୍ୟକ୍ରମକୁ ସଂଯୋଗ କରାଯାଇଛି। ସେ ଏହି ପରିପ୍ରେକ୍ଷୀରେ ଗୋବର୍ଦ୍ଧନ ଯୋଜନାର ଉଦାହରଣ ଦେଇଥିଲେ।

ପ୍ରଧାନମନ୍ତ୍ରୀ କହିଥିଲେ ଯେ ପ୍ରାକୃତିକ କୃଷିରେ ଆମର କେତେକ ବଡ ବଡ ସମସ୍ୟାର ସମାଧାନ ନିହିତ ରହିଛି। ସେ କହିଥିଲେ ଯେ ଚଳିତବର୍ଷ ବଜେଟରେ ପ୍ରାକୃତିକ କୃଷକୁ ପ୍ରୋତ୍ସାହନ ଦେବା ନିମନ୍ତେ ଗଙ୍ଗାନଦୀ କୂଳରେ ଥିବା ଗ୍ରାମଗୁଡିକୁ ବଛାଯାଇଛି ଯାହା ପ୍ରାକୃତିକ କୃଷିର ଏକ ବିସ୍ତୃତ ପଥ ସୃଷ୍ଟି କରିପାରିବ। ଏହା ଆମର ଚାଷ ଜମିଗୁଡିକୁ  ରାସାୟନିକ ପଦାର୍ଥରୁ ମୁକ୍ତ କରିବା ସହ ନମାନି ଗଙ୍ଗେ ପ୍ରକଳ୍ପ ମଧ୍ୟ ନୂତନ ଶକ୍ତି ପାଇବ। ଭାରତ ୨୦୩୦ ମସିହା ସୁଦ୍ଧା ୨୬ ନିୟୁତ ହେକ୍ଟର ଜମିର ପୁନରୁଦ୍ଧାର ଲକ୍ଷ୍ୟ ରଖିଛି ବୋଲି ସେ କହିଥିଲେ। ସେ ବିଏସଭିଆଇ ନୀତି ଓ ଏଲଇଡି ବଲ୍‌ବ ଅଭିଯାନ ସମ୍ପର୍କରେ ମଧ୍ୟ କହିଥିଲେ।

ପ୍ରଧାନମନ୍ତ୍ରୀ ପୁଣି କହିଥିଲେ ଯେ ଭାରତ ଆମର ଶକ୍ତି ଉତ୍ପାଦନ ସାମର୍ଥ୍ୟର ଶତକଡା ୪୦ଭାଗ ଅଣ ଜୀବାଶ୍ମ ଇନ୍ଧନ ଜରିଆରେ ପାଉଥିବାବେଳେ ଏଥିରେ ନଅବର୍ଷ ଆଗରେ ରହିଛି ।ସୌରଶକ୍ତି ସାମର୍ଥ୍ୟ ୧୮ଗୁଣ ବୃଦ୍ଧି ପାଇଛି ଓ ଉଦ୍‌ଯାନ ମିଶନ ଓ ଚକ୍ରୀୟ ଅର୍ଥନୀତି ସମ୍ପର୍କୀ ନୀତି ପରିବେଶ ସୁରକ୍ଷା ପ୍ରତି ଆମର ଅଙ୍ଗୀକାରବଦ୍ଧତାର ଉଦାହରଣ ବୋଲି ପ୍ରଧାନମନ୍ତ୍ରୀ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଭାରତ ଶତକଡା ୧୦ଭାଗ ଇଥାନଲ  ମିଶ୍ରଣ ଲକ୍ଷ୍ୟ ନିର୍ଦ୍ଧାରିତ ସମୟର ପାଞ୍ଚମାସ ଆଗରୁ ହାସଲ କରିଛି ।ଏହାର ବ୍ୟାପକତା ନେଇ ସୂଚନା ଦେଇ ପ୍ରଧାନମନ୍ତ୍ରୀ କହିଥିଲେ ଯେ ୨୦୧୪ ମସିହାରେ ଇଥାନଲ ମିଶ୍ରଣ ମାତ୍ର ୧. ୫ ପ୍ରତିଶତ ଥିଲା । ଏହି ଲକ୍ଷ୍ୟ ହାସଲ ଦ୍ୱାରା ତିନିଟି ସୁବିଧା ମିଳିବ ବୋଲି ସେ କହିଥିଲେ । ପ୍ରଥମ ଏହା ଦ୍ୱାରା ୨୭ଲକ୍ଷ ଟନ୍ ଅଙ୍ଗାରକାମ୍ଳ ଉଦ୍‌ଗୀରଣ ହ୍ରାସ ହେବ । ଦ୍ୱିତୀୟତଃ ଏହା ଦ୍ୱାରା ୪୧ହଜାର କୋଟି ବୈଦେଶିକ ମୁଦ୍ରା ସଞ୍ଚୟହେବ ଓ ତୃତୀୟରେ ଇଥାନଲ  ମିଶ୍ରଣ ଯୋଗୁଁ ଚାଷୀମାନେ ଗତ ଆଠବର୍ଷରେ ୪୦ହଜାର ୬ଶହ କୋଟି ଟଙ୍କାର ଲାଭ ପାଇଛନ୍ତି । ପ୍ରଧାନମନ୍ତ୍ରୀ ସେଥିପାଇଁ ଦେଶର ଜନସାଧାରଣ କୃଷକ ଓ ତେଲ କମ୍ପାନୀଗୁଡିକୁ ଧନ୍ୟବାଦ ଜଣାଇଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ପିଏମ୍ ଜାତୀୟ ଗତି ଶକ୍ତି ମାଷ୍ଟର ପ୍ଲାନ ଯୋଗୁଁ ଲଜିଷ୍ଟିକ୍ ଓ ପରିବହନ ପଦ୍ଧତି ଶକ୍ତିଶାଳୀ ହେବା ସହ ପ୍ରଦୂଷଣ ମଧ୍ୟ ହ୍ରାସ ପାଇବ । ୧୦୦ରୁ ଅଧିକ ଜଳପଥରେ ବହୁମୁଖୀ ସଂଯୋଗକରଣ ଯୋଗୁଁ ମଧ୍ୟ ପ୍ରଦୂଷଣ ହ୍ରାସ ପାଇବ । ପ୍ରଧାନମନ୍ତ୍ରୀ ଉପସ୍ଥିତ ଦର୍ଶକଙ୍କ ଧ୍ୟାନ ସବୁଜ କର୍ମସଂସ୍ଥାନ ଉପରକୁ ଆକର୍ଷିତ କରିଥିଲେ । ଭାରତର ପରିବେଶ ସଂରକ୍ଷଣ ଉନ୍ନତ ହୋଇଥିବାରୁ ବହୁ ପରିମାଣରେ ସବୁଜ କର୍ମସଂସ୍ଥାନ ବା ଗ୍ରୀନ ଜବ ପ୍ରତି ସୁଯୋଗ ସୃଷ୍ଟି ହେଉଛି ବୋଲି ସେ କହିଥିଲେ । ପରିବେଶ ଓ ମାଟି ସଂରକ୍ଷଣ ଉପରେ ଗୁରୁତ୍ୱ ଦେବା ସହ ସେ ପ୍ରତ୍ୟେକ ଜିଲ୍ଲାରେ ୭୫ଟି ଅମ୍ରିତ ସରୋବର ନିର୍ମାଣ ନେଇ ଜନସାଧାରଣଙ୍କୁ ଧ୍ୟାନ ଆକର୍ଷଣ କରିଥିଲେ ।

“ମାଟି ବଞ୍ଚାଅ ଆନ୍ଦୋଳନ’ ଏକ ବୈଶ୍ୱିକ ଆନ୍ଦୋଳନ ଓ ମାଟିର ସ୍ୱାସ୍ଥ୍ୟ ବିଲୟ ନେଇ ସଚେତନତା ବୃଦ୍ଧି ପାଇଁ ଉଦ୍ଦିଷ୍ଟ । ଏହି ଆନ୍ଦୋଳନ ମାର୍ଚ୍ଚ ୨୦୨୨ରେ ସଦ୍‌ଗୁରୁଙ୍କ ଦ୍ୱାରା ଆରମ୍ଭ ହୋଇଥିଲା । ସେ ୨୭ଟି ଦେଶ ମୋଟର ସାଇକେଲରେ ଭ୍ରମଣ କରି ସଚେତନତା ସୃଷ୍ଟି କରିଥିଲେ । ଏହି ୧୦୦ଦିନ ଯାତ୍ରାର ୭୫ଦିନ ଜୁନ ୫ତାରିଖରେ ସମ୍ପୂର୍ଣ୍ଣ ହେଉଛି । କାର୍ଯ୍ୟକ୍ରମରେ ପ୍ରଧାନମନ୍ତ୍ରୀଙ୍କ ଯୋଗଦାନ ମାଟିର ସ୍ୱାସ୍ଥ୍ୟ ବିକାଶରେ ଦେଶର ଅଙ୍ଗୀକାରବଦ୍ଧତାକୁ ଆହୁରି ଶକ୍ତି ଦେବ।

Categories
ବିଶେଷ ଖବର

ଟ୍ରାଇର ରୌପ୍ୟ ଜୟନ୍ତୀ ସମାରୋହ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀଙ୍କ ଅଭିଭାଷଣ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭାରତ ଦୂରସଞ୍ଚାର ନିୟନ୍ତ୍ରଣ କର୍ତ୍ତୃପକ୍ଷ (ଟ୍ରାଇ)ର ରୌପ୍ୟଜୟନ୍ତୀ ସମାରୋହ କାର୍ଯ୍ୟକ୍ରମରେ ଭିଡିଓ କନଫରେନ୍ସିଂ ଜରିଆରେ ନିଜର ଅଭିଭାଷଣ ପ୍ରଦାନ କରିଛନ୍ତି। ଏହି ଅବସରରେ ସେ ଏକ ଡାକ ଟିକଟ ମଧ୍ୟ ଉନ୍ମୋଚନ କରିଛନ୍ତି। କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ, ଦେବୁସିଂହ ଚୌହ୍ୱାନ ଓ ଏଲ ମୁରୁଗନଙ୍କ ସମେତ ଦୂର ସଞ୍ଚାର ଓ ପ୍ରସାରଣ କ୍ଷେତ୍ରର ଅନେକ ନେତୃବୃନ୍ଦ ଏହି ଅବସରରେ ଉପସ୍ଥିତ ଥିଲେ।

ସମବେତ ଜନତାକୁ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ସ୍ୱଦେଶୀ ନିର୍ମିତ ୫ଜି ଟେଷ୍ଟବେଡ ଯାହାକୁ ସେ ଜାତି ଉଦ୍ଦେଶ୍ୟରେ ଆଜି ଉତ୍ସର୍ଗ କରିଛନ୍ତି ତାହା ଦୂର ସଞ୍ଚାର କ୍ଷେତ୍ରରେ ଜଟିଳ ତଥା ଅତ୍ୟାଧୁନିକ ପ୍ରଯୁକ୍ତି କ୍ଷେତ୍ରର ବିକାଶରେ ବେଶ ସହାୟକ ହେବ। ଆଇଆଇଟି ସମେତ ଏହି ପ୍ରକଳ୍ପ ସହିତ ଯେଉଁମାନେ ସଂଶ୍ଳିଷ୍ଟ ଅଛନ୍ତି ସମସ୍ତଙ୍କୁ ସେ ଅଭିନନ୍ଦନ ଜଣାଇଥିଲେ। ଦେଶର ନିଜସ୍ୱ ୫ଜି ମାନ, ୫ ଜିଆର ଆକାରରେ ତିଆରି ହୋଇଛି ଓ ଏହା ଦେଶପାଇଁ ଏକ ଗର୍ବ। ଏହା ଦେଶର ଗ୍ରାମାଞ୍ଚଳକୁ ୫ଜି ପ୍ରଯୁକ୍ତିଜ୍ଞାନ ପ୍ରସାର ଦିଗରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ବୋଲି ସେ କହିଥିଲେ।

ପ୍ରଧାନମନ୍ତ୍ରୀ କହିଥିଲେ ଯେ ଏକବିଂଶ ଶତାବ୍ଦୀରେ ସଂଯୋଗକରଣ ଦେଶର ପ୍ରଗତିର ଗତିକୁ ନିର୍ଦ୍ଧାରଣ କରିବ। ସେ ଦୃଷ୍ଟିରୁ ପ୍ରତ୍ୟେକ ସ୍ତରରେ ସଂଯୋଗୀକରଣର ଆଧୁନିକୀକରଣ ଅପରିହାର୍ଯ୍ୟ। ୫ ଜି ପ୍ରଯୁକ୍ତିବିଦ୍ୟା ଦେଶର ପ୍ରଶାସନ, ଜୀବନ ଧାରଣମାନ ଓ ବ୍ୟବସାୟରେ ବିରାଟ ପରିବର୍ତ୍ତନ ଆଣିବ ବୋଲି ସେ କହିଥିଲେ। ଏହା ପ୍ରତ୍ୟେକ କ୍ଷେତ୍ର ଯେପରିକି କୃଷି, ସ୍ୱାସ୍ଥ୍ୟ, ଶିକ୍ଷା, ଭିତ୍ତିଭୂମି ଓ ଅନ୍ୟାନ୍ୟ ରଣନୀତିକ କ୍ଷେତ୍ର ଅଭିବୃଦ୍ଧିରେ ସହାୟକ ହେବ। ଏହା ଅନେକ କ୍ଷେତ୍ରରେ ସୁବିଧା ଆଣିବା ସହ ଅନେକ କାର୍ଯ୍ୟରେ ସୁଯୋଗ ସୃଷ୍ଟି କରିବ। ୫ଜିର ଦୃତ ଅଭିବୃଦ୍ଧି ନିମନ୍ତେ ଉଭୟ ସରକାର ଓ ଶିଳ୍ପାନୁଷ୍ଠାନ ଗୁଡିକର ଉଦ୍ୟମ ଲୋଡା ବୋଲି ସେ କହିଥିଲେ।

ଦୂରସଞ୍ଚାର କ୍ଷେତ୍ର କିପରି ଆତ୍ମନିର୍ଭରଶୀଳତା ଓ ସୁସ୍ଥ ପ୍ରତିଯୋଗୀତା କ୍ଷେତ୍ରରେ ସମାଜ ଓ ଆର୍ଥିକ ବିକାଶରେ ସହାୟକ ହୋଇଛି ସେ ତାହାର ଉଦାହରଣ ଦେଇଥିଲେ। ୨ଜିର ହତାଶା, ଦୁର୍ନୀତି ଓ ନୀତିଗତ ସ୍ଥାଣୁତା ଯୁଗରୁ ବାହାରି ଦେଶ ଦୃତ ଗତିରେ ୩ଜିରୁ ୪ଜି ଓ ବର୍ତ୍ତମାନ ୫ଜି ଓ ୬ଜି ଅଭିମୁଖେ ଆଗେଇ ଚାଲିଛି ବୋଲି କହିଥିଲେ।

ଗତ ଆଠ ବର୍ଷ ମଧ୍ୟରେ ପଞ୍ଚମିତ୍ର ଯଥା ପହୁଁଞ୍ଚ, ସଂସ୍କାର, ନିୟନ୍ତ୍ରଣ, ଜବାବଦେହୀ ଓ ବୈପ୍ଳବିକ ପଦକ୍ଷେପ ଜରିଆରେ ଦୂରସଞ୍ଚାର କ୍ଷେତ୍ରରେ ଏକ ନୂତନ ଶକ୍ତି ଜାଗ୍ରତ ହୋଇଛି। ସେ ଏଥିପାଇଁ ପ୍ରମୁଖ ଭୂମିକା ଗ୍ରହଣ କରିଥିବା ଟ୍ରାଇକୁ ଏହାର ଶ୍ରେୟ ଦେଇଥିଲେ। ପ୍ରଧାନମନ୍ତ୍ରୀ କହିଥିଲେ ଯେ ବତ୍ତର୍ମାନ ଦେଶ କୂପ ମଣ୍ଡୁକ ଭାବେ ନରହି ପୁରାପୁରି ସରକାରୀ ଧାରା ସହ ଆଗେଇ ଚାଲିଛି। ବର୍ତ୍ତମାନ ଆମେ ବିଶ୍ୱରେ ଦୂରସଞ୍ଚାର ସାନ୍ଧ୍ରତା ଓ ଇଣ୍ଟରନେଟ ବ୍ୟବହାର ଦିଗରେ ଖୁବ ଦୃତଗତିରେ କାୟା ବିସ୍ତାର କରି ଚାଲିଛୁ ବୋଲି ପ୍ରଧାନମନ୍ତ୍ରୀ କହିଥିଲେ।

ଦେଶର ଗରୀବରୁ ଗରୀବତମ ପରିବାର ନିକଟରେ ମୋବାଇଲ ଫୋନ ପହଞ୍ଚାଇବା ପାଇଁ ଦେଶରେ ହିଁ ମୋବାଇଲ ତିଆରି ଦିଗରେ ଗୁରୁତ୍ୱ ଆରୋପ କରାଯାଉଛି। ଫଳରେ ମୋବାଇଲ ନିର୍ମାଣକାରୀ ସଂସ୍ଥା ମାତ୍ର ଦୁଇରୁ ଏବେ ୨୦୦ରୁ ଅଧିକରେ ପହଞ୍ଚିଛି।

ପ୍ରଧାନମନ୍ତ୍ରୀ କହିଥିଲେ ଯେ ବର୍ତ୍ତମାନ ଭାରତର ପ୍ରତି ଗ୍ରାମକୁ ଅପ୍ଟିକାଲ ଫାଇବର ଯୋଗେ ଯୋଡା  ଯାଉଛି। ୨୦୧୪ ମସିହା ପୂର୍ବରୁ ଦେଶର ଶହେ ଗ୍ରାମ ପଞ୍ଚାୟତକୁ ମଧ୍ୟ ଅପ୍ଟିକାଲ ଫାଇବର ଜରିଆରେ ଯୋଡାଯାଇ ନଥିଲା। ଆଜି ଆମେ ଦେଶର ୧.୭୫ ଲକ୍ଷ ଗ୍ରାମ ପଞ୍ଚାୟତକୁ ବ୍ରଡବ୍ରାଣ୍ଡ ସଂଯୋଗ ଯୋଗାଯାଇଛି। ଏଥିପାଇଁ ଗ୍ରାମ ଗୁଡିକରେ ଶହ ଶହ ସରକାରୀ ସେବା ସହଜରେ ପହଞ୍ଚିପାରୁଛି।

ପ୍ରଧାନମନ୍ତ୍ରୀ କହିଥିଲେ ଯେ ବର୍ତ୍ତମାନ ଓ ଭବିଷ୍ୟତର ଆବଶ୍ୟକତା ପୂରଣ ନିମନ୍ତେ ଟ୍ରାଇ ଭଳି ନିୟନ୍ତ୍ରକଙ୍କ ନିମନ୍ତେ ସମ୍ପୂର୍ଣ୍ଣ ସରକାରୀ ସହାୟତା ଖୁବ ଗୁରୁତ୍ୱପୂର୍ଣ୍ଣ। ଆଜି ନିୟନ୍ତ୍ରଣ କେବଳ ଗୋଟିଏ କ୍ଷେତ୍ରର ପରିସୀମା ମଧ୍ୟରେ ଆବଦ୍ଧ ନୁହଁ। ପ୍ରଯୁକ୍ତି ଜ୍ଞାନ ବିଭିନ୍ନ କ୍ଷେତ୍ରକୁ ସଂଯୋଗ କରୁଛି । ସେଥିପାଇଁ ଆଜି ସମସ୍ତେ ସମ୍ମିଳିତ ନିୟନ୍ତ୍ରଣ ବା ସହଯୋଗ ଆବଶ୍ୟକ କରୁଛନ୍ତି। ସେଥିପାଇଁ ଆଜିର ଆବଶ୍ୟକତା ହେଉଛି ସମସ୍ତ ନିୟନ୍ତ୍ରଣକାରୀ ଏକାଠି ହୋଇ ଏକ ସାଧାରଣ ମଞ୍ଚ ଗଠନ କରି ଉନ୍ନତ ସହଯୋଗ ଦ୍ୱାରା ସମାଧାନର ପନ୍ଥା ବାହାର କରିବା ବୋଲି ପ୍ରଧାନମନ୍ତ୍ରୀ କହିଥିଲେ।

Categories
ଜାତୀୟ ଖବର ବିଶେଷ ଖବର

ଓଡ଼ିଶାର ଦିବ୍ୟାଙ୍ଗ ହିତାଧିକାରୀ ସୁରେଶ ଚନ୍ଦ୍ର ବେହେରାଙ୍କ ସହ ମତ ବିନିମୟ କଲେ ପ୍ରଧାନମନ୍ତ୍ରୀ ମୋଦୀ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଭିଡିଓ କନଫରେନ୍ସିଂ ମାଧ୍ୟମରେ ଜନ ଔଷଧି କେନ୍ଦ୍ରର ମାଲିକ ଏବଂ ହିତାଧିକାରୀମାନଙ୍କ ସହିତ କଥା ହୋଇଛନ୍ତି। ଜେନେରିକ ଔଷଧର ବ୍ୟବହାର ଏବଂ ଜନଔଷଧି ପରିଯୋଜନାର ଲାଭ ସମ୍ପର୍କରେ ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ମାର୍ଚ୍ଚ ପହିଲା ଠାରୁ ସାରା ଦେଶରେ ଜନ ଔଷଧି ସପ୍ତାହ ପାଳନ କରାଯାଉଛି। ଏହି କାର୍ଯ୍ୟକ୍ରମର ବିଷୟବସ୍ତୁ ‘‘ଜନ ଔଷଧି – ଜନ ଉପଯୋଗୀ’’ ରଖାଯାଇଛି। ଆଜିର କାର୍ଯ୍ୟକ୍ରମ ଅବସରରେ କେନ୍ଦ୍ର ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରୀ ଡକ୍ଟର ମନସୁଖ ମାଣ୍ଡଭ୍ୟ ଉପସ୍ଥିତ ଥିଲେ।

ପ୍ରଧାନମନ୍ତ୍ରୀ ପାଟନାର ଜନ ଔଷଧି କେନ୍ଦ୍ର ହିତାଧିକାରୀ ସୁଶ୍ରୀ ହିଲଦା ଏନ୍ଥୋନୀଙ୍କ ସହ କଥା ହୋଇଥିଲେ। ଜନ ଔଷଧି କେନ୍ଦ୍ରର ଔଷଧ ବିଷୟରେ ସେ କେମିତି ଜାଣିବାକୁ ପାଇଲେ ବୋଲି ପ୍ରଧାନମନ୍ତ୍ରୀ ତାଙ୍କୁ ପଚାରିଥିଲେ। ଔଷଧର ଗୁଣବତ୍ତା ସମ୍ପର୍କରେ ମଧ୍ୟ ସେ ଜାଣିବାକୁ ଚାହିଁଥିଲେ। ଜବାବରେ ହିତାଧିକାରୀ କହିଥିଲେ ଯେ, ପୂର୍ବରୁ ସେ ଔଷଧ ବାବଦକୁ ମାସିକ ୧୨୦୦ରୁ ୧୫୦୦ ଟଙ୍କା ଖର୍ଚ୍ଚ କରୁଥିଲେ, କିନ୍ତୁ ଏବେ ସେ ମାସିକ ମାତ୍ର ୨୫୦ ଟଙ୍କା ଖର୍ଚ୍ଚ କରି ସେହିସବୁ ଔଷଧ ପାଇପାରୁଛନ୍ତି। ଏଥିରୁ ତାଙ୍କୁ ବହୁତ ଲାଭ ହୋଇଛି । ସଞ୍ଚିତ ଅର୍ଥ ସେ ସମାଜ କଲ୍ୟାଣ କାର୍ଯ୍ୟରେ ବିନିଯୋଗ କରୁଥିବା କହିଥଲେ । ପ୍ରଧାନମନ୍ତ୍ରୀ ତାଙ୍କର ଏପରି ଭାବନାକୁ ପ୍ରଶଂସା କରିଥିଲେ ଏବଂ କହିଥିଲେ ଯେ ତାଙ୍କ ଭଳି ଲୋକଙ୍କ ପାଇଁ ଜନ ଔଷଧି କେନ୍ଦ୍ର ଉପରେ ଜନସାଧାରଣଙ୍କ ଭରସା ବୃଦ୍ଧି ପାଇବ। ସେ କହିଥିଲେ ଯେ, ଦେଶର ମଧ୍ୟବିତ୍ତ ଲୋକମାନେ ଏହି ଯୋଜନାର ଶ୍ରେଷ୍ଠ ସଦ୍‌ଭାବନା ଦୂତ ହୋଇପାରିବେ । ସମାଜର ଗରିବ, ନିମ୍ନ ମଧ୍ୟବିତ୍ତ ଏବଂ ମଧ୍ୟବିତ୍ତ ବର୍ଗଙ୍କ ଆର୍ଥିକ ପରିସ୍ଥିତି ଉପରେ ରୋଗ ପ୍ରଭାବ ବିଷୟରେ ମଧ୍ୟ ସେ ଆଲୋଚନା କରିଥିଲେ। ଜନ ଔଷଧି କେନ୍ଦ୍ରର ଲାଭ ବିଷୟରେ ସମାଜର ଶିକ୍ଷିତ ବର୍ଗ ଆଲୋଚନା କରିବା ଉଚିତ୍‌ ବୋଲି ପ୍ରଧାନମନ୍ତ୍ରୀ ପରାମର୍ଶ ଦେଇଥିଲେ।

ଭୁବନେଶ୍ୱରର ଦିବ୍ୟାଙ୍ଗ ହିତାଧିକାରୀ ସୁରେଶ ଚନ୍ଦ୍ର ବେହେରାଙ୍କ ସହିତ ପ୍ରଧାନମନ୍ତ୍ରୀ ଆଲୋଚନା କରିଥିଲେ। ଜନ ଔଷଧି ପରିଯୋଜନା ସମ୍ପର୍କରେ ତାଙ୍କର ଅଭିଜ୍ଞତା ବିଷୟରେ ପ୍ରଧାନମନ୍ତ୍ରୀ ଜାଣିବାକୁ ଚାହିଁଥିଲେ। ସେ ଚାହୁଁଥିବା ସବୁତକ ଔଷଧ ଜନ ଔଷଧି କେନ୍ଦ୍ରରେ ମିଳୁଛି କି ନାହିଁ ପ୍ରଧାନମନ୍ତ୍ରୀ ପଚାରିଥିଲେ। ଶ୍ରୀ ବେହେରା କହିଥିଲେ ଯେ, ତାଙ୍କର ଯେଉଁସବୁ ଔଷଧ ଦରକାର ସେସବୁ ସେ ଜନ ଔଷଧି କେନ୍ଦ୍ରରୁ ପାଇପାରୁଛନ୍ତି। ଫଳରେ ତାଙ୍କର ଔଷଧ ଖର୍ଚ୍ଚ ବାବଦକୁ ମାସିକ ୨ ହଜାରରୁ ୨୫ ଶହ ପର୍ଯ୍ୟନ୍ତ ଟଙ୍କା ସଞ୍ଚିତ ହୋଇପାରୁଛି, ସେ ନିଜ ମାତାପିତାଙ୍କ ପାଇଁ ମଧ୍ୟ ଏହି କେନ୍ଦ୍ରରୁ ଔଷଧ କିଣିଥାନ୍ତି। ପ୍ରଧାନମନ୍ତ୍ରୀ ତାଙ୍କ ପରିବାର ଲୋକଙ୍କ ଆରୋଗ୍ୟ ଓ କଲ୍ୟାଣ ପାଇଁ ପ୍ରଭୁ ଜଗନ୍ନାଥଙ୍କୁ ପ୍ରାର୍ଥନା କରିଥିଲେ। ଶ୍ରୀ ବେହେରା ଜଣେ ଦିବ୍ୟାଙ୍ଗ ହୋଇ ମଧ୍ୟ ସାହସର ସହ ସମସ୍ୟାର ମୁକାବିଲା କରୁଥିବାରୁ ପ୍ରଧାନମନ୍ତ୍ରୀ ତାଙ୍କୁ  ପ୍ରଶଂସା କରିଥିଲେ।

ପ୍ରଧାନମନ୍ତ୍ରୀ ଶ୍ରୀ ମୋଦୀ ମହୀଶୂରର ବବିତା ରାଓଙ୍କ ସହ କଥା ହୋଇଥିଲେ। ସାମାଜିକ ଗଣମାଧ୍ୟମ ଜରିଆରେ ଏହି ଯୋଜନାର ପ୍ରଚାରପ୍ରସାର କରିବା ଲାଗି ପ୍ରଧାନମନ୍ତ୍ରୀ ତାଙ୍କୁ ନିବେଦନ କରିଥିଲେ ଯାହାଫଳରେ ଅଧିକରୁ ଅଧିକ ଲୋକ ଏହାର ଲାଭ ପାଇପାରିବେ।

ସୁରଟର ଉର୍ବଶୀ ନୀରବ ପଟେଲ ପ୍ରଧାନମନ୍ତ୍ରୀଙ୍କ ସହ କଥା ହେବା ଅବସରରେ ତାଙ୍କ ଅଞ୍ଚଳରେ ଜନ ଔଷଧି କେନ୍ଦ୍ର ସମ୍ପର୍କରେ ପ୍ରଚାରପ୍ରସାର କରିବା ଲାଗି ସେ କରିଥିବା ପ୍ରୟାସ ସମ୍ପର୍କରେ ସୂଚନା ଦେଇଥିଲେ। ସେ କହିଥିଲେ ଯେ, ଜନ ଔଷଧି କେନ୍ଦ୍ରରେ ଅତି କମ ମୂଲ୍ୟରେ ସାନିଟାରୀ ପ୍ୟାଡ୍‌ ମିଳୁଛି, ଯାହାକୁ କିଣି ସେ ନିଜର ପ୍ରୟାସ ଜରିଆରେ ଅଧିକରୁ ଅଧିକ ଲୋକଙ୍କୁ ବାଣ୍ଟି ପାରୁଛନ୍ତି। ଜଣେ ରାଜନୈତିକ କର୍ମୀ ଭାବେ ତାଙ୍କର ସେବା ଭାବନାକୁ ପ୍ରଧାନମନ୍ତ୍ରୀ ପ୍ରଶଂସା କରିଥିଲେ। ସାଧାରଣ ଜୀବନରେ ସେବାର ଭୂମିକାକୁ ଏହା ବଢ଼ାଇବ ବୋଲି ପ୍ରଧାନମନ୍ତ୍ରୀ କହିଥିଲେ। ଏ ମହାମାରୀ ସମୟରେ ପ୍ରଧାନମନ୍ତ୍ରୀ ଆବାସ ଯୋଜନା ଏବଂ ମାଗଣା ରାସନା ଯୋଜନାର ହିତାଧିକାରୀମାନଙ୍କ ମଧ୍ୟରେ ସ୍ବଚ୍ଛତାକୁ ନେଇ ସଚେତନତା ବୃଦ୍ଧି କରିବା ଦିଗରେ ପ୍ରୟାସ କରାଯିବା ଆବଶ୍ୟକ ବୋଲି ପ୍ରଧାନମନ୍ତ୍ରୀ ପରାମର୍ଶ ଦେଇଥିଲେ।

ରାୟପୁରର ଶ୍ରୀ ଶୈଲେଶ ଖଣ୍ଡେଲୱାଲ ଜନ ଔଷଧି ପରିଯୋଜନା ସହ ଜଡ଼ିତ ନିଜର ଯାତ୍ରା ସମ୍ପର୍କରେ କଥା ହୋଇଥିଲେ। ସେ ପ୍ରଧାନମନ୍ତ୍ରୀଙ୍କୁ କହିଥିଲେ ଯେ, ଏଠାରେ କମ ମୂଲ୍ୟରେ ଔଷଧ ମିଳିପାରୁଛି ଏବଂ ଏହି ବାର୍ତ୍ତା ସେ ନିଜର ସବୁ ରୋଗୀଙ୍କ ନିକଟରେ ପହଞ୍ଚାଇଥିଲେ।  ଅନ୍ୟ ଡାକ୍ତରମାନେ ମଧ୍ୟ ଜନ ଔଷଧି କେନ୍ଦ୍ର ସମ୍ପର୍କରେ ଲୋକମାନଙ୍କ ମଧ୍ୟରେ ସଚେତନତା ସୃଷ୍ଟି କରିବା ଉଚିତ୍‌ ବୋଲି ପ୍ରଧାନମନ୍ତ୍ରୀ ଆହ୍ୱାନ କରିଥିଲେ।

ସମାରୋହକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ, ଜନ ଔଷଧି କେନ୍ଦ୍ର କେବଳ ଶରୀର ପାଇଁ ଔଷଧ କେନ୍ଦ୍ର ହୋଇ ରହିନାହିଁ, ବରଂ ଏହା ଜନସାଧାରଣଙ୍କ ମାନସିକ ଚାପ ଦୂର କରିବାର କେନ୍ଦ୍ରରେ ପରିଣତ ହୋଇଛି। ଲୋକମାନଙ୍କ ଅର୍ଥ ସଞ୍ଚୟ କରିବା ମାଧ୍ୟମରେ ଏହି କେନ୍ଦ୍ର ସେମାନଙ୍କ ପାଇଁ ଆଶ୍ୱସ୍ତି ଆଣି ଦେଇଛି। ଏହି ଯୋଜନାର ଲାଭ ସମାଜର ସବୁ ବର୍ଗ ଏବଂ ଦେଶର କୋଣ ଅନୁକୋଣରେ ପହଞ୍ଚି ପାରିଥିବାରୁ ପ୍ରଧାନମନ୍ତ୍ରୀ ସନ୍ତୋଷ ବ୍ୟକ୍ତ କରିଥିଲେ। ୨୧ କୋଟିରୁ ଅଧିକ ସାନିଟାରୀ ନାପକିନ୍‌ ବିକ୍ରି ହେବା ଏହା ଦର୍ଶାଉଛି ଯେ ଜନ ଔଷଧି କେନ୍ଦ୍ରଗୁଡ଼ିକ ସାରା ଦେଶରେ ମହିଳାମାନଙ୍କ ଜୀବନକୁ ସହଜ କରିଛି।

ପ୍ରଧାନମନ୍ତ୍ରୀ କହିଥିଲେ ଯେ ଏବେ ସୁଦ୍ଧା ସାରା ଦେଶରେ ୮ ହଜାର ୫୦୦ ଜନ ଔଷଧି କେନ୍ଦ୍ର ଖୋଲା ଯାଇ ସାରିଛି। ଏହା କେବଳ ଆଉ ଏକ ସରକାରୀ କେନ୍ଦ୍ର ନୁହେଁ ବରଂ ଜନସାଧାରଣଙ୍କ ସମସ୍ୟା ସମାଧାନ କରିବାର ସ୍ଥାନ ପାଲଟିଛି। ସେ କହିଥିଲେ ଯେ କର୍କଟ, ଯକ୍ଷ୍ମା, ମଧୁମେହ, ହୃଦରୋଗ ଭଳି ରୋଗର ଚିକିତ୍ସା ପାଇଁ ଆବଶ୍ୟକ ୮୦୦ରୁ ଅଧିକ ଔଷଧର ଦର ସରକାର ନିୟନ୍ତ୍ରଣ କରିଛନ୍ତି। ସରକାର ଷ୍ଟଣ୍ଟିଂ ଦର କମାଇବା ଲାଗି ପଦକ୍ଷେପ ନେଇଛନ୍ତି ଯାହାଫଳରେ ଆଣ୍ଠୁ ପ୍ରତିରୋପଣ ଖର୍ଚ୍ଚ ନିୟନ୍ତ୍ରଣରେ ରହିଛି। ନାଗରିକମାନଙ୍କ ପାଇଁ ସୁଲଭ ସ୍ୱାସ୍ଥ୍ୟସେବା ଯୋଗାଇ ଦେବା ନିମନ୍ତେ ଗ୍ରହଣ କରାଯାଇଥିବା ପଦକ୍ଷେପ ସମ୍ପର୍କରେ ସେ ତଥ୍ୟ ଦେଇଥିଲେ। ସେ ସୂଚନା ଦେଇଥିଲେ ଯେ, ଏବେ ସୁଦ୍ଧା ୫୦ କୋଟିରୁ ଅଧିକ ଲୋକଙ୍କୁ ଆୟୁଷ୍ମାନ ଭାରତ ଯୋଜନା ଅଧୀନକୁ ଅଣାଯାଇସାରିଛି। ୩ କୋଟିରୁ ଅଧିକ ଲୋକ ଏହି ଯୋଜନାର ଲାଭ ପାଇସାରିଛନ୍ତି। ଏହାଦ୍ୱାରା ଗରିବ ଓ ମଧ୍ୟବିତ୍ତ ଲୋକମାନଙ୍କର ୭୦ ହଜାର କୋଟି ଟଙ୍କାରୁ ଅଧିକ ଅର୍ଥ ସଞ୍ଚୟ ହୋଇପାରିଛି। ପ୍ରଧାନମନ୍ତ୍ରୀ ଜାତୀୟ ଡାଏଲିସିସ କାର୍ଯ୍ୟକ୍ରମ ଜରିଆରେ ୫୫୦ କୋଟି ଟଙ୍କା ସଞ୍ଚୟ ହୋଇପାରିଛି । ଆଣ୍ଠୁ ପ୍ରତିରୋପଣ ଏବଂ ଔଷଧ ଖର୍ଚ୍ଚ ନିୟନ୍ତ୍ରଣ କରିବା ଲାଗି ୧୩ ହଜାର କୋଟି ଟଙ୍କା ସଞ୍ଚୟ ହୋଇପାରିଛି।

ପ୍ରଧାନମନ୍ତ୍ରୀ ସୂଚନା ଦେଇଥିଲେ ଯେ କିଛି ସପ୍ତାହ ପୂର୍ବରୁ, ସରକାର ଆଉ ଏକ ନିଷ୍ପତ୍ତି ନେଇଛନ୍ତି, ଯାହାକି ଗରିବ ଓ ମଧ୍ୟବିତ୍ତ ପରିବାରର ପିଲାମାନଙ୍କୁ ଲାଭାନ୍ୱିତ କରିବ। ଘରୋଇ ମେଡ଼ିକାଲ କଲେଜର ଅଧା ସିଟ୍‌ରେ ସରକାରୀ ମେଡ଼ିକାଲ କଲେଜ ଭଳି ଖର୍ଚ୍ଚରେ ଶିକ୍ଷାଦାନ କରିବାକୁ ଆମେ ନିଷ୍ପତ୍ତି ନେଇଛୁ ବୋଲି ସେ ସୂଚନା ଦେଇଥିଲେ।