ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ସଦରଥାନା ଅନ୍ତର୍ଗତ ବାସୁଦେବ ନଗର ଷଷ୍ଠ ଲାଇନ୍ରେ ଜଣେ ନବବିବାହିତା ମହିଳାଙ୍କୁ ଶ୍ୱଶୁର ଘର ଲୋକେ ମିଶି ତଣ୍ଟି ଚିପି ହତ୍ୟା କରିଥିବା ନେଇ ଥାନାରେ ଅଭିଯୋଗ ହୋଇଛି। ମୃତ ମହିଳା ଜଣକ ହେଲେ ଲକ୍ଷ୍ମୀନାରାୟଣ ବିଷୋୟୀଙ୍କ ସ୍ତ୍ରୀ କୁନି ଜେନା।
ଘଟଣାରୁ ପ୍ରକାଶ ଯେ କୁନି ଗତ କିଛି ମାସ ହେଲା ଲକ୍ଷ୍ମୀନାରାୟଣଙ୍କୁ ବିବାହ କରିଥିବାବେଳେ ସେ ୩ ମାସର ଗର୍ଭବତୀ ଥିଲେ। କୌଣସି କାରଣକୁ ନେଇ ପରିବାର ଲୋକେ କୁନିକୁ ଭଲ ପାଉନଥିବାବେଳେ ବାରମ୍ବାର ଶାରୀରିକ ମାନସିକ ନିର୍ଯ୍ୟାତନା ମିଳୁଥିଲା। ଆଜି କୁନିଙ୍କ ବାପାଘର ଲୋକେ କୁନିର ମୃତ୍ୟୁ ହୋଇଛି ବୋଲି ଜାଣିବା ପରେ ହତ୍ୟା ସଂଦେହ କରି ସଦରଥାନାରେ ଅଭିଯୋଗ କରିଥିଲେ। ତାଙ୍କ ଝିଅକୁ ଶ୍ୱଶୁର ଘର ଲୋକେ ତଣ୍ଟିଚିପି ମାରିଥିବା ନେଇ ସେମାନେ କହିଥିଲେ।
ଅଭିଯୋଗ ପାଇବା ପରେ ମାଜିଷ୍ଟ୍ରେଟ ଏବଂ ସଦରଥାନା ଅଧିକାରୀଙ୍କ ଉପସ୍ଥିତିରେ ପଞ୍ଚନାମା କରାଯାଇ ମୃତଦେହକୁ ବ୍ୟବଚ୍ଛେଦ ପାଇ ପଠାଯାଇଛି। ଥାନା କେସ ନଂ ୩୧୯/୨୦ରେ ୪୯୮ (କ), ୩୦୨, ୩୦୪ (ବି), ୩୪୯, ୩୪ ଆଇପିସିରେ ମାମଲା ରୁଜୁ ହୋଇ ସ୍ୱାମୀ ଲକ୍ଷ୍ମୀନାରାୟଣ ସମେତ ଶ୍ୱଶୁର, ଶାଶୁ, ଦିଅରଙ୍କୁ ଥାନାରେ ଅଟକ ରଖାଯାଇ ଘଟଣାର ଅଧିକ ଅନୁସନ୍ଧାନ ଜାରି ରହିଛି।