Categories
ଆଜିର ଖବର ଜାତୀୟ ଖବର ବଜେଟ ୨୦୨୪

ମହିଳା କେନ୍ଦ୍ରୀତ ହୋଇପାରେ ଅନ୍ତରୀଣ ବଜେଟ୍ ୨୦୨୪: କୃଷକଙ୍କ ପାଇଁ ୬ ହଜାରରୁ ୧୨ ହଜାରକୁ ବୃଦ୍ଧି ହେବ ସମ୍ମାନନିଧି

ନୂଆଦିଲ୍ଲୀ: ଲୋକସଭା ନିର୍ବାଚନରେ ପ୍ରବେଶ କରିବା ପୂର୍ବରୁ ମୋଦି ସରକାର ମହିଳାଙ୍କ ପାଇଁ ଅନେକ ବଡ଼ ବଡ଼ ଯୋଜନା ଆଣିବାକୁ ପ୍ରସ୍ତୁତି ଚଳାଇଛନ୍ତି। ଫେବ୍ରୁଆରି ୧ରେ ଅନ୍ତରୀଣ ବଜେଟରେ ଅନେକ ଗୁରୁତ୍ୱପୂର୍ଣ୍ଣ ଘୋଷଣା ହୋଇପାରେ।

ବଜେଟରେ ମହିଳା କୃଷକଙ୍କ ପାଇଁ ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି ରାଶି ବାର୍ଷିକ ୬୦୦୦ ଟଙ୍କାରୁ ୧୨୦୦୦ ଟଙ୍କାକୁ ବୃଦ୍ଧି କରାଯାଇପାରିବ। ଏଥିସହ ଆର୍ଥିକ ଦୃଷ୍ଟିରୁ ବଞ୍ଚିତ ମହିଳାଙ୍କ ପାଇଁ ନଗଦ ଟ୍ରାନ୍ସଫର ଯୋଜନା ଆରମ୍ଭ କରିବାକୁ ଯୋଜନା ରହିଛି। ୨୧ ବର୍ଷରୁ ଅଧିକ ବୟସର ଯେଉଁ ମହିଳାମାନେ ସରକାରଙ୍କ କୌଣସି କଲ୍ୟାଣକାରୀ ଯୋଜନାର ଲାଭ ପାଉନାହାନ୍ତି ସେମାନଙ୍କ ପାଇଁ ମଧ୍ୟ କେନ୍ଦ୍ର ସରକାର ନଗଦ ହସ୍ତାନ୍ତର ଯୋଜନା ଆଣିବାକୁ ବିଚାର କରୁଛନ୍ତି।

ମନରେଗାରେ ମହିଳା ଶ୍ରମିକଙ୍କୁ ପ୍ରାଥମିକତା ଦିଆଯିବ। ବର୍ତ୍ତମାନ ମନରେଗାରେ ମହିଳାଙ୍କ ଭାଗ ୫୯.୨୬% ଥିବାବେଳେ ୨୦୨୦-୨୧ରେ ଏହା ୫୩.୧୯% ଥିଲା। ମହିଳା କୃଷକଙ୍କ ପରିମାଣ ଦ୍ୱିଗୁଣିତ ହେଲେ ସରକାରଙ୍କ ଉପରେ ୧୨୦ କୋଟି ଟଙ୍କାର ଅତିରିକ୍ତ ବୋଝ ପଡ଼ିବ।

ଏହି ଯୋଜନା ଅଧୀନରେ ମୋଦି ସରକାର ଏପର୍ଯ୍ୟନ୍ତ ୧୫ଟି କିସ୍ତିରେ ୨.୮ ଲକ୍ଷ କୋଟିରୁ ଅଧିକ ଟଙ୍କା ଚାଷୀଙ୍କ ଆକାଉଣ୍ଟକୁ ପଠାଇଛନ୍ତି। ଭାରତରେ ପ୍ରାୟ ୨୬ କୋଟି କୃଷକ ଅଛନ୍ତି। ଦେଶରେ ଜମି ଥିବା କୃଷକମାନଙ୍କ ମଧ୍ୟରୁ ମାତ୍ର ୧୩% ହେଉଛନ୍ତି ମହିଳା।

ମହିଳା କେନ୍ଦ୍ରୀତ ଯୋଜନା ବଜେଟ୍ ୨.୨୩ ଲକ୍ଷ କୋଟି

କେନ୍ଦ୍ର ସରକାରଙ୍କ କଲ୍ୟାଣକାରୀ ଯୋଜନାରେ ମହିଳାଙ୍କ ଅଂଶଗ୍ରହଣ ବୃଦ୍ଧି ପାଇବାରେ ଲାଗିଛି। ଲିଙ୍ଗଗତ ବଜେଟରେ ବାର୍ଷିକ ୩୦% ବୃଦ୍ଧି ଲକ୍ଷ୍ୟ ନେଇ ମୋଦି ସରକାର କାମ କରୁଛନ୍ତି। ଏହା ଅଧୀନରେ ମୋଦି ସରକାର ୨୦୨୩-୨୪ ବଜେଟ ଆକଳନ (ବିଇ)ରେ ମୋଟ ଲିଙ୍ଗ ବଜେଟ ରାଶି (ମନ୍ତ୍ରାଳୟରେ ସମସ୍ତ ମହିଳା ସମ୍ବନ୍ଧୀୟ ଯୋଜନା ପାଇଁ ରାଶି) ଧୀରେ ଧୀରେ ୨.୨୩ ଲକ୍ଷ କୋଟି ଟଙ୍କାକୁ ବୃଦ୍ଧି କରିଛନ୍ତି, ଯାହା କି ୨୦୧୩-୧୪ରେ ୧ ଲକ୍ଷ କୋଟି ଟଙ୍କା ଥିଲା। ଅର୍ଥାତ୍ ୧୦ ବର୍ଷ ମଧ୍ୟରେ ଦୁଇଗୁଣରୁ ଅଧିକ ବୃଦ୍ଧି ଘଟିଛି। ଆର୍ଥିକ ବର୍ଷ ୨୦୦୬ରେ ଦେଶର ଲିଙ୍ଗଗତ ବଜେଟ ଥିଲା ୧୪,୩୭୯ କୋଟି ଟଙ୍କା।

ଦେଶରେ ପୁରୁଷଙ୍କ ତୁଳନାରେ ମହିଳା ଭୋଟରଙ୍କ ସଂଖ୍ୟା ଅଧିକ ବଢ଼ିବାରେ ଲାଗିଛି ଦେଶର ବେତନ ପ୍ରାପ୍ତ ମହିଳାମାନଙ୍କର ଅର୍ଥନୀତିରେ ବଡ଼ ଅବଦାନ ରହିଛି। ଏନ୍ଏସ୍ଏସ୍ ତଥ୍ୟ ଅନୁଯାୟୀ ଦେଶରେ ଏଭଳି ମହିଳାଙ୍କ ଅବଦାନ ୨୨.୭ ଲକ୍ଷ କୋଟି ଟଙ୍କା, ଯାହା କି ଦେଶର ଜିଡିପିର ପ୍ରାୟ ୭.୫ ପ୍ରତିଶତ। ମତଦାନ କ୍ଷେତ୍ରରେ ମଧ୍ୟ ମହିଳାଙ୍କ ଆଧିପତ୍ୟ ଦ୍ରୁତ ଗତିରେ ବୃଦ୍ଧି ପାଉଛି।

୨୦୧୪ରେ ଦେଶରେ ମତଦାନ ହାର ୧୩.୭ କୋଟି ବୃଦ୍ଧି ପାଇ ୫୫ କୋଟିରେ ପହଞ୍ଚିଛି। ଏମାନଙ୍କ ମଧ୍ୟରୁ ୨୬ ନିୟୁତ ମହିଳା ଥିଲେ। ଏହା ୧୯୬୨-୨୦୦୯ ମଧ୍ୟରେ ହାରାହାରି ମତଦାନ ତୁଳନାରେ ୫.୫ ଗୁଣ ଅଧିକ ଥିଲା।

୨୦୧୯ରେ ଦେଶରେ ୬୨ କୋଟି ଭୋଟ୍ ପଡ଼ିଥିଲା। ସେମାନଙ୍କ ମଧ୍ୟରୁ ୩୦୦ ନିୟୁତ ମହିଳା ଥିଲେ। ପୁରୁଷଙ୍କ ତୁଳନାରେ ମହିଳା ଭୋଟରଙ୍କ ସଂଖ୍ୟା ୫ ପ୍ରତିଶତ ବୃଦ୍ଧି ପାଇଛି। ୨୦୨୨ ଓ ୨୩ରେ ହୋଇଥିବା ବିଧାନସଭା ନିର୍ବାଚନରେ ମହିଳା ଭୋଟରଙ୍କ ସଂଖ୍ୟା ମଧ୍ୟ ୫ ପ୍ରତିଶତରୁ ଅଧିକ ବୃଦ୍ଧି ପାଇଛି।

ଗତ ୨୩ଟି ବିଧାନସଭା ନିର୍ବାଚନ ମଧ୍ୟରୁ ୧୭ଟିରେ ମହିଳାମାନେ ପୁରୁଷଙ୍କ ତୁଳନାରେ ଅଧିକ ଭୋଟ ଦେଇଛନ୍ତି। ୨୦୨୪ରେ ୭୦ ପ୍ରତିଶତରୁ ଅଧିକ ମତଦାନ ହୋଇପାରେ ବୋଲି ଆକଳନ କରାଯାଇଛି। ମତଦାନରେ ମହିଳାମାନେ ପୁରୁଷଙ୍କୁ ପଛରେ ପକାଇ ପାରିବେ।

ସି ଭୋଟର ଅନୁଯାୟୀ, ମଧ୍ୟପ୍ରଦେଶ ନିର୍ବାଚନରେ ମହିଳାଙ୍କ ପାଇଁ ଆରମ୍ଭ ହୋଇଥିବା କ୍ୟାସ୍ ଟ୍ରାନ୍ସଫର ଯୋଜନାରେ ବିଜେପିକୁ ଫାଇଦା ମିଳିଥିଲା। ବିଜେପି କୁ ୫୧% ମହିଳା ଭୋଟ ମିଳିଥିଲା। ସେହିପରି କଂଗ୍ରେସକୁ ୪୬.୨% ଭୋଟ ମିଳିଛି।

ମହିଳା ଭୋଟରଙ୍କୁ ଆକୃଷ୍ଟ କରିବା ପାଇଁ କେନ୍ଦ୍ର ସରକାର ୧ ଲକ୍ଷ କୋଟିପତି ଦିଦିଙ୍କୁ ଗଢ଼ିତୋଳିବା ପାଇଁ ଯୋଜନା ଆରମ୍ଭ କରିଛନ୍ତି। ସଂସଦରେ ୩୩% ସଂରକ୍ଷଣ ବିଲ ପାରିତ ହୋଇଛି, ଯାହା ୨୦୨୯ରେ ଲାଗୁ ହେବ। ଶସ୍ତା ଗୃହ ଋଣ ଆଣିବା ଉପରେ ମଧ୍ୟ ବିଚାର କରାଯାଉଛି।

ମହିଳାଙ୍କୁ ଟିକେଟ ଦେବାରେ କଷ୍ଟ ହେଉଛି

୧୦ ବର୍ଷରେ ସିଧାସଳଖ ଆକାଉଣ୍ଟକୁ ୧୬.୮ ଲକ୍ଷ କୋଟି ଟଙ୍କା ପଠାଯାଇଥିଲେ ମଧ୍ୟ ମହିଳାଙ୍କୁ ଟିକେଟ ଦେବାରେ ଅସୁବିଧା ଦେଖାଦେଇଥିଲା। ଗତବର୍ଷ ଶେଷ ଆଡ଼କୁ ୫ଟି ରାଜ୍ୟରେ ନିର୍ବାଚନ ହୋଇଥିଲା। ଏଥିରେ ବିଜେପି ଓ କଂଗ୍ରେସ ମହିଳା ଭୋଟରଙ୍କ ପାଇଁ ସମସ୍ତ ଯୋଜନା କାର୍ଯ୍ୟକାରୀ କରିବାକୁ ଆଲୋଚନା କରିଥିଲେ। କିନ୍ତୁ ଏହି ଦଳଗୁଡ଼ିକ ମାତ୍ର ୧୦-୧୫% ମହିଳା ଙ୍କୁ ପ୍ରାର୍ଥୀ କରିଥିଲେ।

୨୦୧୩ ପରେ କେନ୍ଦ୍ର ସରକାର ସିଧାସଳଖ ବ୍ୟାଙ୍କ ଆକାଉଣ୍ଟକୁ ୧୬.୮ ଲକ୍ଷ କୋଟି ଟଙ୍କା ପଠାଇଛନ୍ତି। ସେଥିମଧ୍ୟରୁ ୨୦୨୦-୨୧ରେ ୩୩ ପ୍ରତିଶତ ଟଙ୍କା ପଠାଯାଇଛି। ପ୍ରାୟ ୩୧୯ଟି ଯୋଜନାରେ ହିତାଧିକାରୀଙ୍କ ଆକାଉଣ୍ଟକୁ ସମାନ ଟଙ୍କା ଟ୍ରାନ୍ସଫର କରାଯାଇଛି। ରିପୋର୍ଟ ଅନୁଯାୟୀ, ଏହି ସମୟ ମଧ୍ୟରେ ପ୍ରାୟ ୭୦ କୋଟି ଲୋକ ପ୍ରତ୍ୟକ୍ଷ ନଗଦ ହସ୍ତାନ୍ତର ଯୋଜନାରେ ଉପକୃତ ହୋଇଛନ୍ତି।

Categories
ଆଜିର ଖବର ଜାତୀୟ ଖବର

ଶ୍ରମିକଙ୍କ ପାଇଁ ବରଦାନ ପାଲଟିଛି ମନରେଗା ଓ ଏକ ରାଷ୍ଟ୍ର ଏକ ରାସନ କାର୍ଡ ଯୋଜନା

ଭୁବନେଶ୍ୱର: ମହାତ୍ମା ଗାନ୍ଧୀ ନିଶ୍ଚିତ କର୍ମ ନିଯୁକ୍ତି ଯୋଜନା (ମନରେଗା) ଜରିଆରେ ସାଧାରଣ ଶ୍ରମିକଙ୍କୁ ରୋଜଗାର ଗ୍ୟାରେଣ୍ଟି ଦେଉଛନ୍ତି ମୋଦୀ ସରକାର। ଅନ୍ୟପଟେ ଏକ ରାଷ୍ଟ୍ର ଏକ ରାସନ କାର୍ଡ ଜରିଆରେ ପ୍ରବାସୀ ଶ୍ରମିକ ଦେଶର ଯେକୌଣସି ସ୍ଥାନରେ ରାସନ ପାଇପାରୁଛନ୍ତି। ମୋଦୀ ସରକାରଙ୍କ ଏ ଦୁଇଟି ଯୋଜନା ଶ୍ରମିକଙ୍କ ପାଇଁ ବରଦାନ ପାଲଟିବା ସହିତ ସେମାନଙ୍କ ସାମଗ୍ରିକ କଲ୍ୟାଣ ସୁନିଶ୍ଚିତ କରୁଛି।

ବର୍ତ୍ତମାନ ଓଡ଼ିଶାରେ ଜାରି ରହିଥିବା ବିକଶିତ ଭାରତ ସଂକଳ୍ପ ଯାତ୍ରା ଅବସରରେ ନିଜର ଅନୁଭୂତି ପ୍ରକାଶ କରି ଶ୍ରମିକ ବର୍ଗର ଲୋକମାନେ ମନରେଗା ଓ ଏକ ରାଷ୍ଟ୍ର ଏକ ରାସନ କାର୍ଡ ଯୋଜନାକୁ ପ୍ରଶଂସା କରିବା ସହିତ ଏହି ଦୁଇଟି ଯୋଜନାର ସୁଫଳ ପାଇଥିବାରୁ କେନ୍ଦ୍ର ସରକାରଙ୍କୁ କୃତଜ୍ଞତା ପ୍ରକାଶ କରିଛନ୍ତି। ନିକଟରେ ମାଲକାନଗିରି ଜିଲ୍ଲା ଚିତ୍ରକୋଣ୍ଡା ବ୍ଲକ୍‌ ଧୁଲିପୁଟ ପଞ୍ଚାୟତରେ ବିକଶିତ ଭାରତ ସଂକଳ୍ପ ଯାତ୍ରା ପହଞ୍ଚିବା ଅବସରରେ ସ୍ଥାନୀୟ ଶ୍ରମିକମାନେ ଏଥିରେ ସାମିଲ ହୋଇ ମୋଦୀ ସରକାରଙ୍କୁ ଧନ୍ୟବାଦ ଜଣାଇଥିବା ଦେଖିବାକୁ ମିଳିଥିଲା।

ମହାତ୍ମା ଗାନ୍ଧୀ ନିଶ୍ଚିତ କର୍ମନିଯୁକ୍ତି ଯୋଜନା ଜରିଆରେ ଗ୍ରାମାଞ୍ଚଳରେ ଶ୍ରମିକମାନଙ୍କୁ ବର୍ଷକୁ ଅତିକମ୍‌ରେ ୧୦୦ ଦିନର ନିଶ୍ଚିତ ରୋଜଗାର ମିଳିପାରୁଛି । ଗତ ଏପ୍ରିଲ ମାସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ କେନ୍ଦ୍ର ସରକାର ମନରେଗା ଶ୍ରମିକମାନଙ୍କର ଦୈନିକ ମଜୁରି ବୃଦ୍ଧି କରିଥିଲେ ।  ଭାରତ ସରକାରଙ୍କ ଗ୍ରାମୀଣ ବିକାଶ ମନ୍ତ୍ରଣାଳୟ ଏକ ଚାହିଦା ଆଧାରିତ ରୋଜଗାର କାର୍ଯ୍ୟକ୍ରମ ଭାବେ ମନରେଗା ଯୋଜନାକୁ କାର୍ଯ୍ୟକାରୀ କରୁଛି । ଏହି ଯୋଜନା ପାଇଁ ରାଜ୍ୟ ଓ କେନ୍ଦ୍ରଶାସିତ ପ୍ରଦେଶଗୁଡ଼ିକୁ କେନ୍ଦ୍ର ସରକାର କ୍ରମାଗତ ଭାବେ ପାଣ୍ଠି ଯୋଗାଇ ଦେଉଛନ୍ତି ଏବଂ କାମର ଚାହିଦା ଅନୁସାରେ ପାଣ୍ଠି ଯୋଗାଇ ଦିଆଯାଉଛି । କେବଳ ସେତିକି ନୁହେଁ ଠିକ୍‌ ସମୟରେ ଶ୍ରମିକଙ୍କୁ ମଜୁରି ପ୍ରଦାନ ସୁନିଶ୍ଚିତ କରାଯାଇଛି। ଚଳିତ ଆର୍ଥିକ ବର୍ଷରେ ୯୯.୧୨ ପ୍ରତିଶତ ମଜୁରି ପଇଠ ଆଦେଶ ୧୫ ଦିନ ମଧ୍ୟରେ ଜାରି କରାଯାଇଛି। ଜବକାର୍ଡଧାରୀ ମନରେଗା ଶ୍ରମିକଙ୍କୁ ଆଧାର ଆଧାରିତ ଅର୍ଥ ପଇଠ ବ୍ୟବସ୍ଥା ଜରିଆରେ ସେମାନଙ୍କ ବ୍ୟାଙ୍କ ଏକାଉଣ୍ଟରେ ସିଧାସଳଖ ଟଙ୍କା ଜମା କରାଯାଉଛି। ଏହାଦ୍ୱାରା ଶ୍ରମିକ ବର୍ଗଙ୍କ ଆର୍ଥିକ ସଶକ୍ତିକରଣ, ସମ୍ମାନ ଓ ସୁରକ୍ଷା ସୁନିଶ୍ଚିତ ହେଉଛି ।

ଅନ୍ୟପକ୍ଷରେ ଅଗଷ୍ଟ ୨୦୧୯ରେ ୪ଟି ରାଜ୍ୟରେ ଆରମ୍ଭ ହୋଇଥିବା ଏକ ରାଷ୍ଟ୍ର ଏକ ରାସନ କାର୍ଡ ଯୋଜନା ଏବେ ସାରା ଦେଶର ୩୬ଟି ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶରେ ଲାଗୁ ହୋଇଛି । ଏହା ଜରିଆରେ ପ୍ରାୟ ୧୦୦ ପ୍ରତିଶତ ବା ପ୍ରାୟ ୮୦ କୋଟି ଖାଦ୍ୟ ସୁରକ୍ଷା ଯୋଜନାର ହିତାଧିକାରୀଙ୍କ ରାସନ କାର୍ଡ ପୋର୍ଟେବଲିଟୀ ହୋଇପାରିଛି । ଫଳରେ ଶ୍ରମିକମାନେ ଦେଶର ଯେକୌଣସି ସ୍ଥାନରେ ନିଜର ରାସନ କାର୍ଡ ଦେଖାଇ ମାଗଣା ଖାଦ୍ୟଶସ୍ୟ ପାଇପାରୁଛନ୍ତି। ଆରମ୍ଭ ହେବା ପରଠାରୁ ବର୍ତ୍ତମାନ ସୁଦ୍ଧା ଏକ ରାଷ୍ଟ୍ର ଏକ ରାସନ କାର୍ଡ ଯୋଜନାରେ ୧୨୫ କୋଟି ପୋର୍ଟେବଲିଟୀ କାରବାର ମାଧ୍ୟମରେ ୨୪୧ ଲକ୍ଷ ମେଟ୍ରିକ୍‌ ଟନ୍‌ ଖାଦ୍ୟଶସ୍ୟ ବିତରଣ କରାଯାଇଛି, ଯେଉଁଥିରେ ରାଜ୍ୟ ଭିତରେ ଓ ରାଜ୍ୟ ବାହାରେ ହୋଇଥିବା କାରବାର ସାମିଲ ରହିଛି।

Categories
ଆଞ୍ଚଳିକ

ବାଣପୁର ଓ ଚିଲିକା ବ୍ଲକର ମନରେଗା ଏବଂ ସ୍ୱଚ୍ଛ ଭାରତ ମିଶନ ଯୋଜନାର ସମୀକ୍ଷା ବୈଠକ ଅନୁଷ୍ଠିତ

ସୀତାରାମ ଅଗ୍ରୱାଲ

ଚିଲିକା: ଆଜି ପୂର୍ବାହ୍ନରେ ଖୋର୍ଦ୍ଧା ଜିଲ୍ଲା ଚିଲିକା ବ୍ଲକ ସମ୍ମିଳନୀ କକ୍ଷରେ ବାଣପୁର ଓ ଚିଲିକା ବ୍ଲକର ମନରେଗା ଏବଂ ସ୍ୱଚ୍ଛ ଭାରତ ମିଶନ ଯୋଜନା ଅନ୍ତର୍ଗତ କ୍ଲଷ୍ଟର ସ୍ତରୀୟ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ଉକ୍ତ ବୈଠକଟି ମୁଖ୍ୟ ଉନ୍ନୟନ ଅଧିକାରୀ ତଥା ଖୋର୍ଦ୍ଧା ଜିଲ୍ଲା ପରିଷଦ ନିର୍ବାହୀ ଅଧିକାରୀ ଦିଗନ୍ତ ରାଉତରାୟଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିଲା।

ଏହି ବୈଠକରେ ବାଣପୁର ଓ ଚିଲିକା ବ୍ଲକର ମନରେଗା ଓ ସ୍ୱଚ୍ଛ ଭାରତ ମିଶନ ପ୍ରକଳ୍ପର ଅଗ୍ରଗତି ବିଷୟରେ ଶ୍ରୀ ରାଉତରାୟ ସମୀକ୍ଷା କରିଥିଲେ। ଅନୁରୂପ ଭାବେ ୨୦୨୨-୨୩ ଆର୍ଥିକ ବର୍ଷରେ ମନରେଗା ଯୋଜନା ଅନ୍ତର୍ଗତ ଉଭୟ ବ୍ଲକରେ ୫ ଲକ୍ଷ ୭୫ ହଜାର ଗୋଟି ଶ୍ରମ ଦିବସ ସୃଷ୍ଟି ଲକ୍ଷ ହାସଲ କରିବା ସହ ଡିସେମ୍ବର ମାସ ଶେଷ ସୁଦ୍ଧା ଉଭୟ ବ୍ଲକର ସମସ୍ତ ଗ୍ରାମଗୁଡିକୁ ସ୍ୱଚ୍ଛ ଭାରତ ମିଶନ ଅନ୍ତର୍ଗତ ଓଡ଼ିଏଫ ପ୍ଲସ ଗ୍ରାମ ଘୋଷଣା କରିବା ପାଇଁ ବିଭାଗୀୟ ଅଧିକାରୀମାନଙ୍କୁ ଶ୍ରୀ ରାଉତରାୟ ନିର୍ଦ୍ଦେଶ ଦେଇଥିଲେ।

ଉକ୍ତ ବୈଠକରେ ଉଭୟ ବ୍ଲକର ବିଡ଼ିଓ, ଏଇଇ, ଜେଇ, ଏପିଓ, ଜିଆରଏସ, ପିଇଓ, ବିଆରସି ଏବଂ ଜିଲ୍ଲାସ୍ତରରୁ ଏମସି ଓ ସ୍ୱଚ୍ଛ ଭାରତ ମିଶନ ପରାମର୍ଶଦାତା ଉପସ୍ଥିତି ଥିଲେ।

Categories
ଜାତୀୟ ଖବର ବିଶେଷ ଖବର ରାଜ୍ୟ ଖବର

ମନରେଗା ଶ୍ରମିକ ମାନଙ୍କୁ ମୁଖ୍ୟମନ୍ତ୍ରୀଙ୍କ ସ୍ଵତନ୍ତ୍ର ସହାୟତା, ୩୨ ଲକ୍ଷ ଶ୍ରମିକ ପାଇଲେ ୩୫୨ କୋଟି ଟଙ୍କା

ଭୁବନେଶ୍ବର, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଭିଡିଓ କନଫରେନସିଙ୍ଗ ଜରିଆରେ ରାଜ୍ୟର ମହାତ୍ମା ଗାନ୍ଧୀ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା ବା ମନରେଗା ରେ ନିୟୋଜିତ ଶ୍ରମିକ ମାନଙ୍କୁ ମୁଖ୍ୟମନ୍ତ୍ରୀଙ୍କ ସ୍ଵତନ୍ତ୍ର କୋଭିଡ ସହାୟତା ପ୍ରଦାନ କରିଛନ୍ତି । ଏଥିରେ ଏପ୍ରିଲରୁ ଜୁନ ମାସ ପଯ୍ୟନ୍ତ ଏହି ତିନିମାସ ମଧ୍ୟରେ କାମ କରିଥିବା ଶ୍ରମିକ ମାନଙ୍କୁ ସେମାନଙ୍କର ପ୍ରତ୍ୟେକ ଦିନର ମଜୁରି ସହିତ ଆଉ ଅତିରିକ୍ତ ୫୦ ଟଙ୍କା ପ୍ରଦାନ କରାଗଲା। ଏହା ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟ ରେ ଜମା କରାଗଲା । ଏହାଦ୍ବାରା ପ୍ରତ୍ୟେକ ଶ୍ରମିକ ୪୫୦୦ ଟଙ୍କା ପର‌୍ୟ୍ୟନ୍ତ ଅତିରିକ୍ତ ମଜୁରି ପାଇଛନ୍ତି । ସମୁଦାୟ ୩୨ ଲକ୍ଷ ଶ୍ରମିକ ୩୫୨ କୋଟି ଟଙ୍କାର ସହାୟତା ପାଇଲେ ।

ଏହି ଅବସରରେ ଉଦବୋଧନ ଦେଇ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କହିଲେ ଯେ ଗରିବ ଲୋକଙ୍କ ପାଇଁ ମୋ ହୃଦୟରେ ସବୁବେଳେ ସ୍ଵତନ୍ତ୍ର ସ୍ଥାନ ରହିଛି । ଗରିବ ଲୋକଙ୍କ କାର‌୍ୟ୍ୟକ୍ରମ ମୋତେ ଅଧିକ ସନ୍ତୋଷ ଦେଇଥାଏ ବୋଲି ମୁଖ୍ୟ ମନ୍ତ୍ରୀ ମତବ୍ୟକ୍ତ କରିଥିଲେ ଏବଂ ଆଜିର ଏହି ସହାୟତା ସେମାନଙ୍କ ପରିବାରର ଆର୍ଥିକ ଅସୁବିଧା ଦୂର କରିବାରେ ସାହାଜଯ କରିବା ବୋଲି ଆଶା ପ୍ରକାଶ କରିଥିଲେ । ଗରିବ ଲୋକଙ୍କ ପାଇଁ ଏହିପରି ଉଦ୍ୟମ ଜାରି ରହିବ ବୋଲି ପ୍ରକାଶ କରି ମୁଖ୍ୟମନ୍ତ୍ରୀ ଜିଲ୍ଲା ସ୍ତରରେ ଅଧିକ ଶ୍ରମଦିବସ ସୃଷ୍ଟି କରି ଗରିବ ଲୋକଙ୍କ ରୋଜଗାର ଦେବା ପାଇଁ କାମ କରିବାକୁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦେଇଥିଲେ ।

ସୂଚନାଯୋଗ୍ୟ ଯେ ମୁଖ୍ୟମନ୍ତ୍ରୀ କୋଭିଡର ଦ୍ଵିତୀୟ ଲହରରେ ଗରିବ ଲୋକଙ୍କ ଅସୁବିଧା ଦୂର କରିବା ପାଇଁ ୧୬୯୦ କୋଟି ଟଙ୍କାର ସ୍ଵତନ୍ତ୍ର କୋଭିଡ ସହାୟତା ଘୋଷଣା କରିଛନ୍ତି । ଏଥିରେ ଶ୍ରମିକ ମାନଙ୍କ ପାଇଁ ମଧ୍ୟ ୩୫୨ କୋଟି ଟଙ୍କାର ସହାୟତା ରହିଛି । ଗଏଘଜଋଏଝ ରେ ଗତବର୍ଷ ୨୦ କୋଟି ଶ୍ରମ ଦିବସ ସୃଷ୍ଟି ହୋଇଥିବା ବେଳେ ଚଳିତ ବର୍ଷ ଏ ପର‌୍ୟ୍ୟନ୍ତ ୭ କୋଟି ଶ୍ରମ ଦିବସ ସୃଷ୍ଟି ହୋଇ ପାରିଛି ଏବଂ ବର୍ଷ ଶେଷ ସୁଧା ୨୫ କୋଟି ଶ୍ରମ ଦିବସ ସୃଷ୍ଟି ପାଇଁ ଲକ୍ଷ ରଖା ଯାଇଛି ।

ମୁଖ୍ୟମନ୍ତ୍ରୀ କହିଥିଲେ ଯେ ଗତ ଏକ ବର୍ଷ ଧରି ଆମର କୋଭିଡ ଲଢେଇ ମଧ୍ୟରେ ଲକଡାଉନ ସଟଡାଉନ ଯୋଗୁଁ ଗରିବ ଲୋକଙ୍କ ରୋଜଗାର କମିଛି । ତେଣୁ ଲୋକଙ୍କ ଜୀବିକା ଉପରେ ଧ୍ୟାନ ଦେଇ ରାଜ୍ୟ ସରକାର ଚାଷୀ , ଶ୍ରମିକ , ଦୁଗ୍ଧ ଚାଷୀ , ଉଠା ଦୋକାନୀ ସମସ୍ତଙ୍କ ପାଇଁ ୧୬୯୦ କୋଟି ଟଙ୍କାର ପ୍ୟାକେଜ ଘୋଷଣା କରିଛନ୍ତି ବୋଲି ସେ କହିଥିଲେ । କରୋନାର ଦ୍ଵିତୀୟ ଲହର ସମ୍ପୁର୍ଣ୍ଣ ଶେଷ ହୋଇନାହିଁ ବୋଲି ଦୋହରାଇ ସେ ସମସ୍ତଙ୍କୁ ଟୀକା ନେବାକୁ ଓ କୋଭିଡ ନିୟମ ମାନିବାକୁ ଅନୁରୋଧ କରିଥିଲେ।

ଏହି ଅବସରରେ ପଞ୍ଚାଯତରାଜ ମନ୍ତ୍ରୀ ଶ୍ରୀ ପ୍ରତାପ ଜେନା ଗରିବ କୃଷକ ଶ୍ରମିକ ମାନଙ୍କ ପାଇଁ ରାଜ୍ୟ ସରକାରଙ୍କ ପକ୍ଷରୁ ନିଆଯାଇଥିବା ବିଭିନ୍ନ ପଦକ୍ଷେପ ସମ୍ପର୍କରେ ଆଲୋକପାତ କରିଥିଲେ । ମୁଖ୍ୟମନ୍ତ୍ରୀଙ୍କ ଏହି ପଦକ୍ଷେପ ଗ୍ରାମ୍ୟ ଅର୍ଥନୀତି କୁ ସୁଦୃଢ କରିବ ବୋଲି ସେ କହିଥିଲେ ।

ଏହି କାର‌୍ୟ୍ୟକ୍ରମରେ ଡାବୁଗାଁ ବିଧାୟକ ଶ୍ରୀ ମନୋହର ରନ୍ଧାରି, ନୂଆପଡା ବିଧାୟକ ଶ୍ରୀ ରାଜେନ୍ଦ୍ର ଢୋଲକିଆ ଏବଂ ରାଉରକେଲା ବିଧାୟକ ଶ୍ରୀ ସାରଦା ନାୟକ ପ୍ରମୁଖ ଯୋଗ ଦେଇ ବିଭିନ୍ନ ବିକାଶ ଓ ଜନ କଲ୍ୟାଣ କାର‌୍ୟ୍ୟକ୍ରମରେ ମୁଖ୍ୟମନ୍ତ୍ରୀଙ୍କ ଦୁରଦୃଷ୍ଟି ସମ୍ପନ୍ନ ନେତୃତ୍ବର ଉଚ୍ଚ ପ୍ରଶଂସା କରିଥିଲେ ।

ଏହି କାର‌୍ୟ୍ୟକ୍ରମରେ ରାଜ୍ୟର ୩୧୪ ଟି ବ୍ଲକର ଗଏଘଜଋଏଝ ଶ୍ରମିକ ମାନେ ଭିଡିଓ କନଫରେନସିଙ୍ଗ ଯୋଗେ ଯୋଡି ହୋଇଥିଲେ । ଗଞ୍ଜାମର ନିକି ଆମ୍ମା ଓ କୈଳାଶ ଗଉଡ , କୋରାପୁଟର ସୁରେଶ ବାଖିଆ, ତପନ କୁମାର ନାଗ , କଳାହାଣ୍ଡିର ସିତି ପୂଜାରୀ ଓ ଗଜ ମାଝି ଓ ମୟୂରଭଞ୍ଜରଶିବରାମ ସୋରେନ ଓ ସୁକାନ୍ତି ମୁର୍ମୁ ପ୍ରମୁଖ କେତେ ଜଣ ହିତାଧିକାରୀ ଏହି ସହାୟତା ପାଇଁ ମୁଖ୍ୟମନ୍ତ୍ରୀଙ୍କ ପ୍ରତି ସେମାନଙ୍କର କୃତଜ୍ଞତା ପ୍ରକାଶ କରିଥିଲେ। ଏହି ସହାୟତା କୋଭିଡ ସମୟରେ ସେମାନଙ୍କୁ ବିଶେଷ ସାହାଜ୍ୟ କରିବ ବୋଲି ମତ ଦେଇ ମୁଖ୍ୟମନ୍ତ୍ରୀଙ୍କ ପ୍ରତି କୃତଜ୍ଞତା ଜଣାଇଥିଲେ ।

ମୁଖ୍ୟମନ୍ତ୍ରୀଙ୍କ ସଚିବ(୫ଟି) ଭି . କେ. ପାଣ୍ଡିଆନ କାଯ୍ୟକ୍ରମ ସଞ୍ଚାଳନ କରିଥିଲେ ।
ଏହି କାଯ୍ୟକ୍ରମରେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର , ଉନ୍ନୟନ କମିଶନର , କୃଷି ଉତ୍ପାଦନ କମିଶନର, ବିଭିନ୍ନ ଜିଲ୍ଲାର ଜିଲ୍ଲାପାଳ ଏବଂ ବରିଷ୍ଠ ଅଧିକାରୀ ମାନେ ଉପସ୍ଥିତ ଥିଲେ।

Categories
ଆଜିର ଖବର ରାଜ୍ୟ ଖବର

ତିର୍ତ୍ତୋଲ ବ୍ଲକ୍ ମନରେଗା ମହାଦୁର୍ନୀତି ଘଟଣା: ଫସିଲେ ଜେଇ ଓ ଆସିଷ୍ଟାଣ୍ଟ ଇଂଜିନିୟର, ସରପଞ୍ଚଙ୍କୁ ଚେତାବନୀ

ରମେଶ ମହାନ୍ତି
ଜଗତସିଂହପୁର: ତିର୍ତ୍ତୋଲ ବ୍ଳକ ଅନ୍ତର୍ଗତ ଗୋପାଳପୁର ପଞ୍ଚାୟତରେ ୧୦ଟିରୁ ଅଧିକ ସ୍ଥାନରେ ୨୦ ଲକ୍ଷରୁ ଉର୍ଦ୍ଧ୍ଵ ଟଙ୍କାର ମନରେଗା ଯୋଜନାରେ ମହାଦୁର୍ନୀତି ହୋଇଥିବା ଅଭିଯୋଗ ହୋଇଥିଲା। ଜିଲ୍ଲା ପ୍ରଶାସନ ପକ୍ଷରୁ ତଦନ୍ତ କରାଯିବା ପରେ ୨୯.୧୧.୨୦୧୯ ତଦନ୍ତ ରିପୋର୍ଟରୁ ଦୁଇଟି କାର୍ଯ୍ୟରେ ୫ଲକ୍ଷ ୬୮ହଜାର ୧୭୯ଟଙ୍କାର ଅନିୟମିତତା ହୋଇଥିବା ଜଣାପଡିଥିଲା। ଏହି ଅର୍ଥକୁ ଉକ୍ତ ପଞ୍ଚାୟତର ସରପଞ୍ଚ, ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ଓ ଜି.ଆର୍.ଏସ୍. ଙ୍କୁ ସମପରିମାଣରେ ଏକମାସ ମଧ୍ୟରେ ଭରଣା କରିବା ପାଇଁ ନିର୍ଦ୍ଦେଶ ଦିଆଯାଇଥିବା ବେଳେ ଫନ୍ଦିଫିକର କରି ଖସି ଯାଇଥିଲେ ଜେଇ ଓ ଆସିଷ୍ଟାଣ୍ଟ ଇଂଜିନିୟର।

ଦୀର୍ଘଦିନ ବିତିଯାଇଥିଲେ ମଧ୍ୟ ସରପଞ୍ଚ, ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ଓ ଜି.ଆର୍.ଏସ୍.ଏହି ଅର୍ଥକୁ ଭରଣା ନକରି ଅର୍ଥ ଆଦାୟ ପାଇଁ ଜିଲ୍ଲା ପ୍ରଶାସନ ତରଫରୁ ଦିଆଯାଇଥିବା ନିର୍ଦ୍ଦେଶକୁ ଖାରଜ କରିବା ପାଇଁ ମାନ୍ୟବର ହାଇକୋର୍ଟଙ୍କ ଦ୍ଵାରସ୍ଥ ହୋଇଥିଲେ। ମାନ୍ୟବର ହାଇକୋର୍ଟ ରିଟ୍ ପିଟିସନ୍ କେସ୍ ନଂ ୯୨୮୯ ର ବିଚାର କରି ୮.୯.୨୦୨୦ ରିଖରେ ପଞ୍ଚାୟତିରାଜ ଓ ପାନୀୟଜଳ ବିଭାଗ ପ୍ରମୁଖ ସଚିବଙ୍କୁ ଏହି ରିଟ୍ ପିଟିସନର ତଦନ୍ତ ରିପୋର୍ଟ ଓ ଅର୍ଥ ଆଦାୟ ପାଇଁ ଜାରି କରାଯାଇଥିବା ନିର୍ଦ୍ଦେଶ ବିରୁଦ୍ଧରେ ଏକ ଅପିଲ୍ ଭାବେ ଗ୍ରହଣ କରି ୬ସପ୍ତାହ ମଧ୍ୟରେ ବିଚାର କରିବାକୁ ନିର୍ଦ୍ଦେଶ ଦେଇଥିଲେ।

ପରେ ପଞ୍ଚାୟତିରାଜ ଓ ପାନୀୟଜଳ ବିଭାଗ ପକ୍ଷରୁ ଶୁଣାଣି କରାଯାଇ ଉକ୍ତ ପଞ୍ଚାୟତର ସରପଞ୍ଚ ନିୟତି ସ୍ୱାଇଁ, ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ହିମାଂଶୁ ଭୂଷଣ ନାୟକ, ଜି.ଆର୍.ଏସ୍ ସୌମ୍ୟରଞ୍ଜନ ସ୍ୱାଇଁଙ୍କ ସହ ଜେଇ ସୁଜିତ ମହାପାତ୍ର ଓ ଆସିଷ୍ଟାଣ୍ଟ ଇଂଜିନିୟର ରାଜଦୀପ ହାଁସଦା ମଧ୍ୟ ସମପରିମାଣରେ ଦାୟୀ ହୋଇ ଥିବାରୁ ସେମାନେ ଉକ୍ତ ଟଙ୍କାକୁ ସମପରିମାଣରେ ଭରଣା କରିବା ପାଇଁ ଜିଲ୍ଲା ପ୍ରଶାସନ ଓ ପିଡି ଡିଆରଡିଏଙ୍କୁ ନିର୍ଦ୍ଦେଶ ଦିଆଯାଇଛି।

ଏଥିସହିତ ପିଟିସନକାରୀଙ୍କ ଅଭିଯୋଗର କୌଣସି ଯଥାର୍ଥତା ନାହିଁ କୁହାଯିବା ସହ ଏହି ରିଟ୍ ପିଟିସନକୁ ଖାରଜ କରାଯାଇଥିଲା। ଏନେଇ ସରପଞ୍ଚଙ୍କୁ ଚେତାବନୀ ଦିଆଯିବା ସହ ସରକାରୀ ଅଧିକାରୀଙ୍କ ବିରୁଦ୍ଧରେ ବିଭାଗୀୟ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ କୁହାଯାଇଛି। ଏସମ୍ପର୍କରେ ଜିଲ୍ଲାପାଳ, ପିଡି ଡିଆରଡିଏ, ପିଟିସନକାରୀ ଓ ଆଡଭୋକେଟ ଜେନେରାଲଙ୍କୁ ଚିଠି ଯୋଗେ ଅବଗତ କରାଯାଇଛି।

Categories
ଆଜିର ଖବର ଆଞ୍ଚଳିକ ରାଜ୍ୟ ଖବର

ମନରେଗା କାର୍ଯ୍ୟରେ ମହା ଦୁର୍ନୀତି: ଚିଲିକା ବ୍ଲକରେ ୭୬ ହଜାରରୁ ଉର୍ଦ୍ଧ୍ଵ ଟଙ୍କା ଚଳୁ କରିଦେଲେ ସରକାରୀ ଅଧିକାରୀ

ସୀତାରାମ ଅଗ୍ରୱାଲ

ଚିଲିକା: ବିଶ୍ବରେ କରୋନା ଭୂତାଣୁ ୧୨ ଲକ୍ଷରୁ ଉର୍ଦ୍ଧ୍ଵ ଲୋକଙ୍କ ଜୀବନ ନେଇସାରିଥିବା ବେଳେ ଆମ ରାଜ୍ୟରୁ ୧ ହଜାର ୩୫୨ଜଣଙ୍କ  ଜୀବନ ଚାଲିଗଲାଣି। ବର୍ତ୍ତମାନ କରୋନାଜନିତ ମୃତ୍ୟୁ ଠାରୁ ଖାଇବାକୁ ନପାଇ ଅନାହାରରେ କିମ୍ବା ଜୀବିକା ହରାଇ ଲକ୍ଷାଧିକ ଗରିବ ଲୋକଙ୍କ ଜୀବନ ଗଲାଣି। ଯଦିବା ଏହାର କୌଣସି ସରକାରୀ ହିସାବ ନାହିଁ, କିନ୍ତୁ ସରକାର ଏସବୁକୁ ଭଲ ଭାବରେ ଅନୁଭବ କରିପାରୁଛନ୍ତି।

ସେଥିପାଇଁ ଉଭୟ କେନ୍ଦ୍ର ଏବଂ ରାଜ୍ୟ ସରକାର ଏନେଇ ଚିନ୍ତା ପ୍ରକଟ କରି ଜୀବନ ଜୀବିକାକୁ ଗୁରୁତ୍ଵ ଦେଉଥିବା ବେଳେ ଏହାକୁ କେତେ ଜଣ ଭ୍ରଷ୍ଟ ନେତା ଓ ସରକାରୀ କର୍ମଚାରୀ ଅଣଦେଖା କରୁଛନ୍ତି। କଙ୍କଡାକୁ ଗୋଳିପାଣି ସୁବିଧା ପରି ଏମାନେ ଏହି ଦୁର୍ଦ୍ଦିନ ସମୟରେ ଗରିବ ନିଷ୍ପେସିତ ଲୋକଙ୍କୁ ଶୋଷଣ କରି ଚାଲିଛନ୍ତି।

ଏହି ମହାମାରୀ ସମୟରେ ଜୀବନ ଜୀବିକାକୁ ସୁରକ୍ଷିତ ରଖିବା ପାଇଁ ମନରେଗା ଯୋଜନା ଗରିବ ଲୋକଙ୍କ ପାଇଁ ଏକ ବଡ ଆଶା ଆଉ ଭରସା। କିନ୍ତୁ ଏଥିରେ ମଧ୍ୟ ଦୁର୍ନୀତି ଆରମ୍ଭ ହୋଇସାରିଛି। ବିନା କାର୍ଯ୍ୟରେ ବିଲ୍ ଉଠାଇ କେତେ ଜଣ ଅସାଧୁ ଲୋକ ନିଜ ପକେଟ ଗରମ କରୁଥିବା ଖବର ଏବେ ହସ୍ତଗତ ହୋଇଛି। ମନରେଗା କାର୍ଯ୍ୟକୁ ନେଇ ମହାଦୁର୍ନୀତି ହୋଇଥିବାର ସାଙ୍ଘାତିକ ଅଭିଯୋଗ ହୋଇଛି। ଏପରି ଏକ ଅଭିଯୋଗ ଖୋର୍ଦ୍ଧା ଜିଲ୍ଲା ଚିଲିକା ବ୍ଲକର ପରବଳ ଗ୍ରାମବାସୀଙ୍କ ଦ୍ଵାରା କରାଯାଇଛି।

ମିଳିଥିବା ତଥ୍ୟ ଅନୁସାରେ ଚିଲିକା ବ୍ଲକ ହରିପୁର ପଞ୍ଚାୟତ ପରବଳ ଗ୍ରାମ ଅଙ୍ଗନବାଡି କେନ୍ଦ୍ର ଠାରୁ ମା’ ଉତରାୟଣୀ ମନ୍ଦିର ପର୍ଯ୍ୟନ୍ତ ମନରେଗା କାର୍ଯ୍ୟ ଅନ୍ତର୍ଭୁକ୍ତ ଏକ ମୋରମ ରାସ୍ତା ନିର୍ମାଣ ପାଇଁ ୨୦୧୬-୧୭ ଆର୍ଥିକ ବର୍ଷରେ ଏକ ପ୍ରକଳ୍ପ ଅନୁମୋଦିତ ହୋଇଥିବାସ୍ଥଳେ ଦୁଇ ବର୍ଷ ଯାଏଁ କାର୍ଯ୍ୟ ଆରମ୍ବ ହୋଇନଥିଲା। ଫଳରେ

୨୦୧୯-୨୦ ଆର୍ଥିକ ବର୍ଷରେ ଉକ୍ତ ପ୍ରକଳ୍ପ କୁ ପୁନଶ୍ଚ ନବୀକରଣ କରାଯିବାପରେ ସରକାରଙ୍କ ତରଫରୁ ପ୍ରକଳ୍ପର ନିର୍ମାଣ ପାଇଁ ସଂପୂର୍ଣ୍ଣ ୨ ଲକ୍ଷ ଟଙ୍କାର ଅର୍ଥ ରାଶି ଅନୁମୋଦିତ ହୋଇଛି। ହେଲେ ଆଜି ତାରିଖ ସୁଦ୍ଧା ସମ୍ପୃକ୍ତ ଅଞ୍ଚଳରେ କୌଣସି କାର୍ଯ୍ୟ ନହୋଇ ଆଗୁଆ ୭୬ ହଜାରରୁ ଉର୍ଦ୍ଧ୍ଵ ଟଙ୍କାର ବିଲ୍ କରି ସମ୍ପୃକ୍ତ ପଞ୍ଚାୟତର ଜି.ଆର.ଏସ ଚଳୁ କରିଦେଇଥିବାର ସାଙ୍ଘାତିକ ଅଭିଯୋଗ ଆଣିଛନ୍ତି ପରବଳ ଗ୍ରାମବାସୀ।

ଅମପାଖେ ହସ୍ତଗତ ହୋଇଥିବା ତଥ୍ୟ ଅନୁଯାୟୀ ୱାର୍କ କୋଡ଼ ୨୪୨୩୦୫୫ରେ ଉକ୍ତ କାର୍ଯ୍ୟଟି ବର୍ତ୍ତମାନ ଚାଲୁଅଛି ବୋଲି ଦର୍ଶାଯାଇଛି ଏବଂ ଏହି ପ୍ରୋଜେକ୍ଟ ର କିଛି ଅଂଶ ତା ୮.୦୫.୨୦ ରିଖରୁ ତା ୧୪.୦୫.୨୦ ରିଖ ଏବଂ ତା ୧୫.୦୫.୨୦ ରିଖରୁ ତା ୨୧.୦୫.୨୦ ରିଖ ପର୍ଯ୍ୟନ୍ତ ଦୁଇଟି ପର୍ଯ୍ୟାୟରେ ଶେଷ ହୋଇଛି ବୋଲି ଦର୍ଶାଯାଇଛି। ତେବେ ମଷ୍ଟର ରୋଲ ନମ୍ବର ୮୬, ୮୭ ଏବଂ ୮୮ ରେ ଉକ୍ତ କାର୍ଯ୍ୟପାଇଁ ନିୟୋଜିତ କରାଯାଇଥିବା ୨୯ ଅଣକୁଶଳୀ ଶ୍ରମିକଙ୍କୁ ୨୦୩ ଦିନର ପାରିଶ୍ରମିକ ଭାବେ ଦିନକୁ ୨୦୭ ଟଙ୍କା ହିସାବରେ ୪୨ ହଜାର ୨୧ ଟଙ୍କା ଏବଂ ତା ୧୫.୦୫.୨୦ ରିଖରୁ ୨୧.୦୫.୨୦ ମଧ୍ୟରେ ମଧ୍ୟରେ ମଷ୍ଟର ରୋଲ ନମ୍ବର ୧୪୦, ୧୪୧, ୧୪୨ ରେ ସେହି କାର୍ଯ୍ୟରେ ନିୟୋଜିତ ହୋଇଥିବା ୨୪ ଜଣ ଅଣକୁଶଳୀ ଶ୍ରମିକ ଙ୍କୁ ୧୬୮ ଦିନର ପାରିଶ୍ରମିକ ଭାବେ ୩୪ ହଜାର ୭୭୬ ଟଙ୍କା ପ୍ରଦାନ କରାଯାଇଅଛି।

ତେବେ ତଥ୍ୟ ଅନୁଯାୟୀ ଆଜି ପର୍ଯ୍ୟନ୍ତ ଉକ୍ତ କାର୍ଯ୍ୟରେ ନିୟୋଜିତ ହୋଇଥିବା ଅଣକୁଶଳୀ ଶ୍ରମିକଙ୍କୁ ସର୍ବମୋଟ ୭୬ ହଜାର ୭୯୭ ଟଙ୍କା ପ୍ରଦାନ କରାଯାଇଅଛି। ତେବେ ଆଶ୍ଚର୍ଯ୍ୟର କଥା ମଷ୍ଟର ରୋଲ ଅନୁଯାୟୀ ସେହି କାର୍ଯ୍ୟରେ ନିୟୋଜିତ ହୋଇଥିବା ଲୋକଙ୍କୁ ପଚାରିବାରେ ସେମାନେ ସେହି କାର୍ଯ୍ୟ ବିଷୟରେ କିଛି ଜାଣିନଥିବାର ପ୍ରତିକ୍ରିୟା ରଖିଛନ୍ତି।

ତେବେ ଏଠାରେ ଏକ ବଡ଼ ପ୍ରଶ୍ନ ଯଦି ମଷ୍ଟର ରୋଲରେ ଦର୍ଶାଯାଇଥିବା ଅଣ କୁଶଳୀ ଶ୍ରମିକ ମାନେ ଉକ୍ତ କାର୍ଯ୍ୟ କରିନାହାନ୍ତି ତେବେ ମନରେଗା ଜବ କାର୍ଡକୁ ଟଙ୍କା ଆସିଲା କିପରି? ଦ୍ଵିତୀୟରେ ଯଦି ସମ୍ପୃକ୍ତ ଅଞ୍ଚଳରେ ଇଞ୍ଚିଟିଏ କାମ ଆଜି ପର୍ଯ୍ୟନ୍ତ ହୋଇନାହିଁ ଏପରିକି ଝୁଡ଼ିଟିଏ ମାଟି ମଧ୍ୟ ପଡ଼ିନାହିଁ ତେବେ କେଉଁ ଆଧାରରେ ବିଲ୍ ମଞ୍ଜୁର ହେଲା? ନିୟମ ଅନୁଯାୟୀ ବିଲ ମଞ୍ଜୁରୀ ପୂର୍ବରୁ ସମ୍ପୃକ୍ତ ପଞ୍ଚାୟତର କନିଷ୍ଠ ଯନ୍ତ୍ରୀ କାର୍ଯ୍ୟ ତଦାରଖ କରିବା କଥା ଏବଂ ବିଲ ପାସ ପୂର୍ବରୁ ଜେ.ଇ, ସରପଞ୍ଚ, ଜି.ଆର.ଏସ, ପି.ଇ.ଓ ଏବଂ ସ୍ୱୟଂ ବି.ଡ଼ି.ଓଙ୍କ ଦସ୍ତଖତ ରହିବା କଥା।

ଏ ବିଷୟ ନେଇ ହରିପୁର ଗ୍ରାମ ପଞ୍ଚାୟତ ଜି.ଆର.ଏସ ସନ୍ତୋଷ ଜେନାଙ୍କୁ ପଚାରିବାରୁ ଏହି ପ୍ରକଳ୍ପର ଅର୍ଥ ରାଶି ଅନ୍ୟ ଏକ ପ୍ରକଳ୍ପର କାର୍ଯ୍ୟ ପାଇଁ ବିନିଯୋଗ କରିଦେଇଥିବା କହିଛନ୍ତି। ହେଲେ ଚିଲିକା ବି.ଡ଼ି.ଓ ଙ୍କୁ ଏ ସମ୍ପର୍କରେ ଯୋଗାଯୋଗ କରିବାରୁ ସେ କୌଣସି ଉତ୍ତର ଦେଇନାହାନ୍ତି।

ମାନ୍ୟବର ମୁଖ୍ୟମନ୍ତ୍ରୀ ମୋ ସରକାର ଏବଂ ଫାଇଭ-ଟି କୁ ପ୍ରାଧାନ୍ୟ ଦେଉଥିବାବେଳେ ଏଠି ଖୋଦ ସରକାରୀ ବାବୁମାନେ ଲକ୍ଷ ଲକ୍ଷ ଟଙ୍କାର ଦୁର୍ନୀତି କରିବାକୁ ପଛାଉନାହାନ୍ତି। ତେବେ ଏପରି ଜଘନ୍ୟ ଅପରାଧ ପାଇଁ ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରି ଉକ୍ତ ଦୁର୍ନୀତିରେ ଜଡିତ ଥିବା ସମସ୍ତ ଅଧିକାରୀଙ୍କୁ ଆଇନ ଅନୁଯାୟୀ କଠୋର ଦଣ୍ଡଦେବାକୁ ଗ୍ରାମବାସୀମାନେ ଖୋର୍ଦ୍ଧା ଜିଲ୍ଲାପାଳଙ୍କୁ ନିବେଦନ କରିଛନ୍ତି।

Categories
ଆଜିର ଖବର ରାଜ୍ୟ ଖବର

ମନରେଗା କାର୍ଯ୍ୟରେ ଜଗତସିଂହପୁର ଜିଲ୍ଲା ୬ଷ୍ଠ ସ୍ଥାନରେ : ଲକଡାଉନ୍ ସମୟରେ ଜିଲ୍ଲାରେ ୨୦ହଜାର ଶ୍ରମିକ ମନରେଗା କାର୍ଯ୍ୟରେ ନିୟୋଜିତ

ରମେଶ ମହାନ୍ତି

ଜଗତସିଂହପୁର :ଜଗତସିଂହପୁର ଜିଲ୍ଲାରେ ଦୈନିକ ୨୦ହଜାର ଅଣକୁଶଳୀ ଶ୍ରମିକ ମହାତ୍ମା ଗାନ୍ଧୀ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନାରେ କାର୍ଯ୍ୟ କରୁଛନ୍ତି। ଦେଶବ୍ୟାପୀ କୋଭିଡ୍ ୧୯ ସଂକ୍ରମଣ ଯୋଗୁ ରାଜ୍ୟ ବାହାରେ କାମ କରୁଥିବା ଶ୍ରମିକ ମାନେ ଫେରି ଆସିଛନ୍ତି। ସେମାନଙ୍କୁ ମଧ୍ୟ କାର୍ଯ୍ୟଦେବା ପାଇଁ ସରକାରୀ ସ୍ତରରେ ନିଷ୍ପତ୍ତି ନିଆଯାଇଛି। ସରକାର ଧାର୍ଯ୍ୟ କରିଥିବା ଦୈନିକ କାର୍ଯ୍ୟ ଲକ୍ଷ୍ୟର ୮୫ ପ୍ରତିଶତ ଶ୍ରମିକ ନିଯୁକ୍ତି କରାଯାଇଛି। ବିଭିନ୍ନ ପ୍ରକାରର ଉନ୍ନୟନ ମୂଳକ ପ୍ରକଳ୍ପ ଯଥା – ପୋଖରୀ ଖନନ, ଅଙ୍ଗନୱାଡି କେନ୍ଦ୍ର ନିର୍ମାଣ, ମାଟିରାସ୍ତା ନିର୍ମାଣ, ଗ୍ରାମ ପୋଖରୀ ପୁନରୁଦ୍ଧାର, ରାସ୍ତା ପାର୍ଶ୍ୱ ବନୀକରଣ, ଜମି ସମତୁଲ ଏହିଭଳି ବିଭିନ୍ନ ପ୍ରକଳ୍ପରେ ପ୍ରତି ଗ୍ରାମପଞ୍ଚାୟତରେ ହାରାହାରି ୧୦୦ରୁ ଅଧିକ ଅଣକୁଶଳୀ ଶ୍ରମିକ କାର୍ଯ୍ୟ କରୁଛନ୍ତି। ୧୫୦୦ରୁ ଅଧିକ କାର୍ଯ୍ୟରେ ଲୋକମାନେ କାର୍ଯ୍ୟରତ।

ପ୍ରତି ଗ୍ରାମରେ ୪ଟି ଗୋଷ୍ଠୀ ଉନ୍ନୟନ ପ୍ରକଳ୍ପ ତଥା ୧୦ଗୋଟି ବ୍ୟକ୍ତିଗତ ପ୍ରକଳ୍ପ ହାତକୁ ନେବା ପାଇଁ ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର ସମସ୍ତ ବିଡିଓ ମାନଙ୍କୁ ନିର୍ଦ୍ଦେଶ ଦେଇଛନ୍ତି। ଜିଲ୍ଲାରେ ଅଧିକରୁ ଅଧିକ ଶ୍ରମିକ ମାନଙ୍କୁ ମନରେଗା ଯୋଜନା ସମ୍ପର୍କରେ ସଚେତନ କରାଇ ନିୟୋଜିତ କରିବାକୁ ବିଡିଓ ମାନଙ୍କୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି। ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ସରୋଜ କାନ୍ତ ମହାନ୍ତି ମନରେଗା ଯୋଜନାରେ ଅଧିକ ଶ୍ରମିକ ନିୟୋଜିତ ହେବା ଓ ଲୋକମାନେ ଠିକ୍ ସମୟରେ ସେମାନଙ୍କର ପାରିଶ୍ରମିକ ପାଇପାରିବେ ସେଥିପ୍ରତି ଯତ୍ନବାନ ହେବାକୁ ବିଡିଓ ମାନଙ୍କୁ ପରାମର୍ଶ ଦେଇଛନ୍ତି।

ଜୁନ୍ ମାସ ୧୫ପରେ ବନୀକରଣ କାର୍ଯ୍ୟକ୍ରମ ଯଥା ରାସ୍ତା ପାର୍ଶ୍ୱ ବନୀକରଣ, ମୋ ବଗିଚା କାର୍ଯ୍ୟକ୍ରମ, ସ୍କୁଲ୍ ହତା ବନୀକରଣ ଇତ୍ୟାଦି ହାତକୁ ନେବାକୁ ଲାଇନ୍ ଡିପାର୍ଟମେଣ୍ଟ ଅଫିସିଆଲ୍ ଓ ବିଡିଓ ମାନଙ୍କୁ ପରାମର୍ଶ ଦେଇଛନ୍ତି। ମନରେଗା କାର୍ଯ୍ୟରେ ଜୁନ୍ ୨ ତାରିଖ ସୁଦ୍ଧା ଜଗତସିଂହପୁର ଜିଲ୍ଲା ୬ଷ୍ଠ ସ୍ଥାନରେ ସଫଳତା ହାସଲ କରିଛି ବୋଲି ଜିଲ୍ଲାପାଳ ସୂଚନା ଦେଇଛନ୍ତି।