କନ୍ଦର୍ପ ବେହେରା
ରେଢାଖୋଲ: ଗ୍ରାମବିକାଶ ଦିଗରେ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ସେଇ ଟଙ୍କା ସଠିକ୍ ମାର୍ଗରେ ଖର୍ଚ୍ଚ ହେଇପାରୁନି। ସେମିତି ଏକ ପଂଚାୟତ ରହିଚି ଯାହାକି ଟଙ୍କା ସଠିକ୍ ଖର୍ଚ୍ଚ ନ ହୋଇ ଅସନ୍ତୋଷ ଦେଖା ଦେଇଛି। ଶେଷରେ ବାଧ୍ୟହୋଇ ପଂଚାୟତର ସଭ୍ୟ ତଥା ସମିତି ସଭ୍ୟମାନେ ଧାରଣାରେ ବସିବା ଭଳି ଘଟଣା ଘଟିଛି।
ସମ୍ବଲପୁର ଜିଲ୍ଲା ରେଢାଖୋଲ ବ୍ଲକ ଲୁହାପଙ୍କ ପଞ୍ଚାୟତ ଅଞ୍ଚଳର ଗ୍ରାମମାନଙ୍କୁ ଜଳ ଯୋଗାଣ ଦାବି ନେଇ ପଞ୍ଚାୟତର ସମିତି ସଭ୍ୟ ଓ କେତେକ ୱାର୍ଡ ସଭ୍ୟ ସଭ୍ୟା ଲୁହାପଙ୍କ ଗ୍ରାମ ପଞ୍ଚାୟତ କାର୍ଯ୍ୟାଳୟ ସମ୍ମୁଖରେ ଧାରଣାରେ କରିଛନ୍ତି। ଏ ସଂକ୍ରାନ୍ତରେ ଧାରଣାକାରୀମାନେ ପୂର୍ବରୁ ଲୁହାପଙ୍କ ପିଇଓ, ରେଢାଖୋଲ ବିଡ଼ିଓ, ଉପଜିଲ୍ଲାପାଳ ଓ ଥାନାରେ ଲିଖିତ ଅଭିଯୋଗ କରି ସରପଞ୍ଚଙ୍କର ମନୋମୁଖୀ କାର୍ଯ୍ୟ ସଂପର୍କରେ ଅଭିଯୋଗ କରିଥିଲେ। ଏହାର ଯଦି କୌଣସି ସମାଧାନ କରା ନ ଯାଏ ତା ହେଲେ ପଞ୍ଚାୟତ ସମ୍ମୁଖରେ ଅନଶନ କରା ଯିବ ବୋଲି ଚେତାବନୀ ମଧ୍ୟ ଦେଇଥିଲେ। ହେଲେ ଏହାର କୌଣସି ସମାଧାନ ନ ହେବାରୁ ମଙ୍ଗଳବାର ପଞ୍ଚାୟତର ସମିତି ସଭ୍ୟ ଓ କେତେକ ୱାର୍ଡ ସଭ୍ୟ ସଭ୍ୟାମାନେ ଧାରଣାରେ ବସିଥିଲେ।
ଖବର ପାଇ ରେଢାଖୋଲ ବ୍ଲକର ଜିପିଓ ପଞ୍ଚାନନ ବେହେରା ଓ ଲୁହାପଙ୍କ ପିଇଓ ଖଗେଶ୍ବର ପ୍ରଧାନ ପ୍ରମୁଖ ଅନଶନ କାରୀଙ୍କ ସହ ଆଲୋଚନା କରିଥିଲେ ମଧ୍ୟ ସମାଧାନ ହୋଇ ପାରି ନ ଥିଲା।