Tag: ସମ୍ବଲପୁର ଜିଲ୍ଲା

ରେଢାଖୋଲ (କନ୍ଦର୍ପ ବେହେରା): ସମ୍ବଲପୁର ଜିଲ୍ଲା ନାକଟିଦେଉଳ ବ୍ଲକ୍ ଡଇଁଚା ବାପୁଜୀ ସରକାରୀ ଉଚ୍ଚ ବିଦ୍ୟାଳୟରେ ନୂତନ ଭାବରେ ସରକାରୀ କଲେଜ ଖୋଲିବା ସହ ପ୍ରବେଶ ଉତ୍ସବ ଉଚ୍ଚ ମାଧ୍ୟମିକ ବିଦ୍ୟାଳୟର ଅଧ୍ୟକ୍ଷ କ୍ଷୀରୋଦ କୁମାର ପଣ୍ଡା ଙ୍କ ସଭାପତିତ୍ୱରେ ଅନୁଷ୍ଠିତ ହୋଇଯାଇଛି। ଏହି ପ୍ରବେଶ ଉତ୍ସବରେ ବ୍ଲକ୍ ଶିକ୍ଷା ଅଧିକାରୀ ବିଜୟ କୁମାର ପାତ୍ର ମୁଖ୍ୟ ଅତିଥି ଭାବରେ ଯୋଗ ଦେଇ ଡଇଁଚା ଭଳି ଏକ ଗ୍ରାମରେ ସରକାର ପ୍ରଥମ ଥର ପାଇଁ କଲେଜ ଖୋଲିବା ଏ ଅଂଚଳ ପାଇଁ ଖୁସିର ଖବର। ଗରୀବ ଶ୍ରେଣୀର ଛାତ୍ରଛାତ୍ରୀ ଏହି ସରକାରୀ କଲେଜରେ ପାଠ ପଢିବାର ସୁଯୋଗ ପାଇଥିବାରୁ ସରକାରଙ୍କୁ ଧନ୍ୟବାଦ ଦେଇଥିଲେ।

ଅନ୍ୟମାନଙ୍କ ମଧ୍ୟରେ ଘୋଷରାମାଳ ସମିତି ସଭ୍ୟ ତଥା ନାକଟିଦେଉଳ ବ୍ଲକ୍ ର ପୂର୍ବତନ ଅଧ୍ୟକ୍ଷ ସୁଦର୍ଶନ ସାହୁ , ଶିମିଳିପାଳ ସମିତି ସଭ୍ୟ ଜିତେନ୍ଦ୍ର କୁମାର ପ୍ରଧାନ ,ଡଇଁଚା ସରପଂଚ ସୌଦାମିନୀ ପ୍ରଧାନ , ଡଇଁଚା ସମିତି ସଭ୍ୟ ପ୍ରବୀଣ କୁମାର ପ୍ରଧାନ ,ଶିମିଳିପାଳ ସରପଂଚ ଶଶ୍ମିତା ପ୍ରଧାନ , ଘୋଷରାମାଳ ସରପଂଚ ପ୍ରେମଶିଳା ସ୍ୱାଇଁ , ଗୋଗୁଆ ସରପଂଚ ଧନେଶ୍ୱର ସାହୁ , ଗୋଗୁଆ ସମିତିସଭ୍ୟ ଅମୂଲ୍ୟ ପ୍ରଧାନ, ନାକଟିଦେଉଳ ଉଚ୍ଚ ମାଧ୍ୟମିକ ବିଦ୍ୟାଳୟର ଅଧ୍ୟକ୍ଷ ହେମାନନ୍ଦ ପ୍ରଧାନ ପ୍ରମୁଖ ଯୋଗ ଦେଇଥିଲେ। ଉଚ୍ଚ ମାଧ୍ୟମିକ ବିଦ୍ୟାଳୟର ଛାତ୍ର ଛାତ୍ରୀ ମାନଙ୍କ ଦ୍ୱାରା ସ୍ୱାଗତ ସଙ୍ଗୀତ ପରିବେଷଣ ସହ ବେଦମନ୍ତ୍ର ପାଠ କରାଯାଇଥିଲା।

ନୂତନ ଭାବରେ ଯୋଗଦେଇଥିବା ଅତିଥି ଅଧ୍ୟାପକ ଓ ଅଧ୍ୟାପିକା ମାନଙ୍କୁ ପୁଷ୍ପଗୁଚ୍ଛ ଦେଇ ସ୍ୱାଗତ କରିବା ସହ ନିଯୁକ୍ତି ପତ୍ର ପ୍ରଦାନ କରାଯାଇଥିଲା। ଶେଷରେ ଶିକ୍ଷକ ହଳଧର ସାହୁ ଧନ୍ୟବାଦ ଅର୍ପଣ କରିଥିଲେ।

ରେଢ଼ାଖୋଲ (କନ୍ଦର୍ପ ବେହେରା): ସମ୍ବଲପୁର ଜିଲ୍ଲା ରେଢ଼ାଖୋଲ ବନଖଣ୍ଡ ଚାରମାଳ ରେଞ୍ଜ ଗିରିଧିଖମଣ ଗ୍ରାମରୁ ଆଜି ଭୋରରୁ ୨୦୨ ବଣ୍ଡଲ କେନ୍ଦୁପତ୍ର ଜବତ କରିଛି ବନବିଭାଗ।

ସୂଚନାଯୋଗ୍ୟ ଯେ, ଚାରମାଳ ଅଞ୍ଚଳରୁ ଏକ ପିକ‌ଅପ ଭ୍ୟାନରେ ବେଆଇନ ଭାବରେ ପଶ୍ଚିମବଙ୍ଗ ରାଜ୍ୟକୁ ଚାଲାଣ ହେଉଥିବା ସମୟରେ ବନ ବିଭାଗ ଖବର ପାଇ ଏସି‌ଏଫ ଗଜେନ୍ଦ୍ର କୁମାର ଅନଦାଜାଙ୍କ ନେତୃତ୍ୱରେ ଏକ ଟିମ୍ ଚଢାଉ କରି ବେଆଇନ ଭାବେ ଚାଲାଣ ହେଉଥିବା ୨୦୨ ବଣ୍ଟଲ କେନ୍ଦୁପତ୍ର ସହ ଏକ ପିକ‌ଅପ ଭ୍ୟାନକୁ ଜବତ କରିଥିଲା।

ତେବେ ଚଢ଼ାଉ ସମୟରେ ମାଫିଆ ମାନେ ଫେରାର ହୋଇଯାଇଛନ୍ତି। ଏହି ଚଢ଼ାଉ ରେ ଏସିଏଫ ମୈତ୍ରୀ ମଞିତ ବିଶ୍ଵାଳ, ବଡ଼ମାଳ ରେଞ୍ଜ ଅଧିକାରୀ ପ୍ରଦୀପ ସେଠୀ, ଫରେଷ୍ଟର ବିଜୟ କୁମାର ବିଶ୍ବାଳ ଓ ଫରେଷ୍ଟ ଗାର୍ଡ ଅଜିତ କୁମାର ସାହୁ ସାମିଲ ହୋଇଥିଲେ।

କନ୍ଦର୍ପ ବେହେରା
ରେଢାଖୋଲ: ସମ୍ବଲପୁର ଜିଲ୍ଲା ରେଢ଼ାଖୋଲ ଉପଖଣ୍ଡ ଚାରମାଳ ଥାନା ଏନଏଚ୫୫ ରାଜରାସ୍ତାରେ ବଚ୍ଚା ବ୍ରିଜ୍ ନିକଟ ଏକ ହମ୍ପ୍ସ ପାରିହେବା ବେଳେ କଣ୍ଟେନର୍ କୁ ପଛରୁ ଧକ୍କା ଦେଲା ବାହାଘର ବରଯାତ୍ରୀ ବସ୍। ଘଟଣା ସ୍ଥଳରେ ୧୨ ଜଣ ଆହତ ହୋଇଥିବା ବେଳେ ୩ ଜଣ ଗୁରୁତର ହୋଇ ବୁର୍ଲା ସ୍ଥାନାନ୍ତର ହୋଇଥିବା ଜଣା ପଡିଛି।

ସୂଚନାଯୋଗ୍ୟ ଯେ, ଶିବ୍ ବାବା ନାମକ ଏକ ବସ୍ ଜୁଜୁମୁରାରୁ ବାହାଘର ମଉଳାଭାର ସହ ୪୦ଜଣ ବରଯାତ୍ରୀଙ୍କୁ ଧରି ବୌଦ୍ଧ ସହରକୁ ଯାଉଥିବା ବେଳେ ଚାରମାଳ ଏନ୍ ଏଚ୍ ୫୫ ନଂ ଜାତୀୟ ରାଜପଥର ବଚ୍ଚା ବ୍ରିଜ୍ ନିକଟରେ ହମ୍ପ୍ସ ପାରି ହେଉଥିବା ବେଳେ ଏକ କଣ୍ଟେନର୍ କୁ ପଛପଟୁ ଧକ୍କା ଦେଇଥିଲା। ଯା’ ଫଳରେ କିଛି ଲୋକ ଗୁରୁତର ହୋଇ ଆମ୍ବୁଲାନ୍ସ ଯୋଗେ ପ୍ରଥମେ ଚାରମାଳ ମେଡିକାଲକୁ ଅଣାଯାଇଥିବା ବେଳେ ୩ ଜଣଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବୁର୍ଲା ମେଡ଼ିକାଲ ସ୍ଥାନାନ୍ତର କରାଯାଇଥିବା ଜଣାପଡ଼ିଛି।

ଚାରମାଳ ପୋଲିସ୍ ଘଟଣା ସ୍ଥଳରେ ପହଂଚି ଏକ ମାମଲା ରୁଜୁ କରିଛି। ଟ୍ରକ୍ ଏଵଂ ବସକୁ ଜବତ କରିଛି।

ରେଢାଖୋଲ (କନ୍ଦର୍ପ ବେହେରା): ସମ୍ବଲପୁର ଜିଲ୍ଲା ନାକ୍ଟିଦେଉଳ ବ୍ଳକ ଘୋଷରାମାଳ ପଞ୍ଚାୟତ ଅନ୍ତର୍ଗତ ଧାତୁକିମାଲ ଗ୍ରାମ ନିକଟ ରାସ୍ତା କଡ଼ରୁ ଘୋଷରାମାଲ ପଞ୍ଚାୟତର ଜି‌ଆର‌ଏସଙ୍କ ମୃତ ଦେହ ଆଜି ସକାଳେ ଉଦ୍ଧାର କରାଯାଇଛି। ମୃତ ଜି‌ଆର‌ଏସ ଜଣଙ୍କ ହେଲେ ନାକଟିଦେଉଳ ଗ୍ରାମର ପ୍ରଦ୍ୟୁମ୍ନ ଦାଶ।

ପ୍ରକାଶ ଯେ, ନାକଟିଦେଉଳ ବ୍ଲକ୍ ଘୋଷରାମାଳ ପଂଚାୟତରର ଜିଆର୍ ଏସ୍ ପ୍ରଦ୍ୟୁମ୍ନ ଦାସ ସବୁଦିନ ପରି ଗତକାଲି ମଧ୍ୟ ଘୋଷରାମାଳ ଗ୍ରାମକୁ ଯାଇ ନିଜର ଫିଲଡ୍ କାମ କରିଥିଲେ। ନିର୍ମାଣଧିନ ପ୍ରଧାନମନ୍ତ୍ରୀ ଆବାସ ଘର ବୁଲିଦେଖିଥିଲେ। ଫଟୋ ମଧ୍ୟ ଉଠାଇଥିଲେ।

ସଂଧ୍ୟାରେ ପ୍ରଦ୍ୟୁମ୍ନ ଘରକୁ ନ ଫେରିବାରୁ ପରିବାର ତାଙ୍କ ମୋବାଇଲକୁ କଲ୍ କରିଥିଲେ ମଧ୍ୟ ତାଙ୍କ ଫୋନ୍ ଲାଗି ନ ଥିଲା। ପରିବାର ଲୋକେ ଘୋଷରାମାଳ ଆସି ବହୁ ସମୟ ଖୋଜା ଖୋଜି କରିବା ପରେ ଝାଟୁକିମାଳ ନିକଟସ୍ଥ ରାସ୍ତା କଡରୁ ମୃତଦେହ ପାଇଥିଲେ।

ପୋଲିସ୍ ଖବର ପାଇ ଘଟଣା ସ୍ଥଳରେ ପହଂଚିଥିଲା। ମୃତକଙ୍କ ମୁଣ୍ଡରେ ଏବଂ ଛାତିରେ କ୍ଷତ ଚିହ୍ନ ଥିବା ଦେଖିବାକୁ ମିଳିଛି। ଏହା ସୁପରିକଳ୍ପିତ ହତ୍ୟାକାଣ୍ଡ ବୋଲି ପରିବାର ଲୋକେ ଅଭିଯୋଗ କରିଛନ୍ତି। ପ୍ରଦ୍ୟୁମ୍ନ ବାଇକ୍ ରୁ ପଡି ଛାତିରେ ଆଘାତ ବାଜିଥିବାରୁ ମୃତ୍ୟୁ ହୋଇଥିବା ପୋଲିସ୍ କହିଛି।

ଆଜି ସମ୍ବଲପୁରରୁ ସାଇଣ୍ଟିଫିକ୍ ଟିମ୍ ଆସି ଅନୁସନ୍ଧାନ କରିଫେରି ଯାଇଛି। ଘଟଣା ସ୍ଥଳରେ ରେଢାଖୋଲ ଏସ୍ ଡି ପି ଓ ପ୍ରଶାନ୍ତ ମେହେର, ରେଢାଖୋଲ ଥାନାଅଧିକାରୀ ସମେତ ପୋଲିସ୍ ର ଅଧିକାରୀମାନେ ଉପସ୍ଥିତ ଥିଲେ।

ପୋଲିସ୍ ଏହାର ତଦନ୍ତ କରୁଥିବା ବେଳେ କିଛି ବ୍ୟକ୍ତିଙ୍କୁ ପଚରା ଉଚୁରା କରିଛି। ଶବ ବ୍ୟବଚ୍ଛେଦ ରିପୋର୍ଟ ଆସିଲେ ମୃତ୍ୟୁର କାରଣ ଜଣା ପଡିବ ବୋଲି ପୋଲିସ୍ କହିଛି।

ରେଢାଖୋଲ (କନ୍ଦର୍ପ ବେହେରା): ଘରେ ଖେଳୁଥିବା ବେଳେ ପାଣି ଭର୍ତ୍ତି ଡେକଚିରେ ପଡି ୨ ବର୍ଷର ଶିଶୁ କନ୍ୟାର ମୃତ୍ୟୁ ହୋଇଥିବା ଜଣା ପଡିଛି।

ଖବରରୁ ପ୍ରକାଶ ଯେ, ସମ୍ବଲପୁର ଜିଲ୍ଲା ରେଢ଼ାଖୋଲ ସହରର ଦେହୁରୀ ସାହିର ବିବେକାନନ୍ଦ ବେଉରିଆଙ୍କ ୨ ବର୍ଷ ଶିଶୁ କନ୍ୟା ନିବେଦିତା ବେଉରା (୨ ବର୍ଷ ) ସକାଳ ୮ ଟାରେ ଘରେ ଖେଳୁଥିବା ସମୟରେ ଘରେ ଥିବା ଏକ ପାଣି ଭର୍ତ୍ତି ଡେକଚିରେ ପଡି ମୃତ୍ୟୁ ବରଣ କରିଥିବା ଜଣାପଡିଛି। ଛୁଆ ଘରେ ନଥିବାରୁ ପରିବାର ଲୋକେ ଖୋଜା ଖାଜି କରିଥିଲେ। ହେଲେ ଶେଷରେ ଘରେ ହିଁ ଏକ ପାଣି ଭର୍ତ୍ତି ଡେକଚିରେ ଛୁଆଟି ପଡ଼ିଥିଲା।

ତାକୁ ଉଦ୍ଧାର କରି ରେଢ଼ାଖୋଲ ଡାକ୍ତରଖାନାରେ ଭର୍ତ୍ତି କରିଥିଲେ ହେଲେ ଡାକ୍ତର ସେଠାରେ ମୃତ ଘୋଷଣା କରିଥିଲେ। ଏହାପରେ ପରିବାର ଲୋକଙ୍କ ମଧ୍ୟରେ ଖେଳିଯାଇଛି ଶୋକର ଛାୟା। ଖବର ପାଇ ପୋଲିସ ଡ଼ାକ୍ତରଖାନାରେ ପହଞ୍ଚି ଘଟଣାର ତଦନ୍ତ କରୁଥିବା ଜଣାପଡିଛି।

କନ୍ଦର୍ପ ବେହେରା
ରେଢ଼ାଖୋଲ: ସମ୍ବଲପୁର ଜିଲ୍ଲା ନାକଟିଦେଉଳ ଥାନା ଗଦାଧରପୁର ଗ୍ରାମରେ ବଜ୍ରପାତରେ ୪ ଗୋରୁ ମ୍ରୁତ୍ୟୁବରଣ କରିଥିବା ଜଣାପଡ଼ିଛି।

ଆଜି ଦିନ ୨ଟା ବେଳେ ବଜ୍ରପାତରେ ବାଟଗା ଗ୍ରା’ପ ଅନ୍ତର୍ଗତ ଗଦାଧରପୁର ବିଛଣ୍ଡ ଆଠଜଉଆଳୀଙ୍କର ୪ଟି ଗାଈବଳଦ ଙ୍କର ମୃତ୍ୟୁ ହୋଇଛି। ସେହିପରି ଜାମୁଜୋରୀ ପଂଚାୟତ ବାଗବର ନିକଟସ୍ଥ କୁହ୍ଲବସା ନୂତନ ବ୍ରିଜ୍ ନିକଟରେ ଗାଧୋଇବାକୁ ଯାଇ ଜଣେ ଯୁବକର ବଜ୍ରପାତରେ ମ୍ରୁତ୍ୟୁ ହୋଇଥିବା ଜଣାପଡ଼ିଛି।

ମ୍ରୁତକ ଜଣଙ୍କ ହେଲେ ମୁନା ବସାତ୍ ଘର କଇଙ୍ଗ ବୋଲି ଜଣାପଡ଼ିଛି। ସେ ଜେସିବି ଅପରେଟର ଭାବରେ କାମ କରୁଥିବା ବେଳେ ଗାଧୋଉଥିବା ସମୟରେ ହିଁ ବଜ୍ରପାତ ହୋଇଥିଲା। ପାଣି ଭିତରେ ହିଁ ସେ ମ୍ରୁତ୍ୟୁବରଣ ହୋଇଥିବା ଜଣାପଡ଼ିଛି। ମ୍ରୁତକର ପରିବାରକୁ ସରକାରଙ୍କ ତରଫରୁ ଆର୍ଥିକ ସହାୟତା ପାଇଁ ଦାବୀ ହୋଇଛି।

ଭୁବନେଶ୍ଵର: କୋଲ୍‌ ଇଣ୍ଡିଆ ଲିମିଟେଡର ଏକ ପ୍ରମୁଖ ସହାୟକ କମ୍ପାନୀ ମହାନଦୀ କୋଲଫିଲ୍ଡସ୍ ଲିମିଟେଡ୍ (ଏମସିଏଲ୍‌), ଓଡିଶାର ସମ୍ବଲପୁର ଜିଲ୍ଲାର ୫୦ ଦିବ୍ୟାଙ୍ଗ ଲୋକଙ୍କୁ ଇ-ରିକ୍ସା ପ୍ରଦାନ କରିବ।  ସିଏସ୍ଆର୍ ପ୍ରୋଜେକ୍ଟ “ସକ୍ଷମ” ଅନ୍ତର୍ଗତ ଏହା ପ୍ରଦାନ କରାଯିବ।

ଏହି ପରିପ୍ରେକ୍ଷୀରେ ସମ୍ବଲପୁର ପ୍ରଶାସନ ସହିତ ଗତକାଲି ସ୍ୱାକ୍ଷରିତ ବୁଝାମଣାପତ୍ର (ଏମଓୟୁ) ଅନୁଯାୟୀ, ଏମସିଏଲ୍ ଜିଲ୍ଲା ସମ୍ବଲପୁରର ‘ଦିବ୍ୟାଙ୍ଗ’ ଲୋକଙ୍କୁ ୫୦ ଟି ଇ-ରିକ୍ସା କ୍ରୟ ପାଇଁ ଜିଲ୍ଲା ପ୍ରଶାସନ, ସମ୍ବଲପୁରକୁ ଆର୍ଥିକ ସହାୟତା ପ୍ରଦାନ କରିବ।

ଆର୍ଥିକ ଦୁର୍ବଳ ଦିବ୍ୟାଙ୍ଗଙ୍କ ପାଇଁ ନିରନ୍ତର ଆତ୍ମ-ନିଯୁକ୍ତି ସୁଯୋଗ ସୃଷ୍ଟି କରିବା ବ୍ୟତୀତ, ଏହି ସିଏସ୍ଆର୍ ପଦକ୍ଷେପ ବୈଦ୍ୟୁତିକ ପରିବହନକୁ ଉତ୍ସାହିତ କରି ସବୁଜ ଏବଂ ସ୍ୱଚ୍ଛ ପରିବେଶକୁ ମଧ୍ୟ ପ୍ରୋତ୍ସାହିତ କରିବ।

ଏହି ଏମଓୟୁକୁ ଏମସିଏଲ ପକ୍ଷରୁ ଜେନେରାଲ ମ୍ୟାନେଜର (ସିଏସଆର) ରଜନୀକାନ୍ତ ପାଣିଗ୍ରାହୀ ସ୍ୱାକ୍ଷର କରିଥିବାବେଳେ ଜିଲ୍ଲା ପ୍ରଶାସନ ପକ୍ଷରୁ ସମ୍ବଲପୁର ଜିଲ୍ଲା ସାମାଜିକ ସୁରକ୍ଷା ଅଧିକାରୀ ମଦନଜିତ ହୋତା ସ୍ୱାକ୍ଷର କରିଛନ୍ତି।

ଭୁବନେଶ୍ଵର: ଏକ ଭାରତ ଶ୍ରେଷ୍ଠ ଭାରତ ଅନ୍ତର୍ଗତ ଯୁବା ସଙ୍ଗମ କାର୍ଯ୍ୟକ୍ରମ ଅଧିନରେ ସିକ୍କିମରୁ ଆସିଥିବା ଯୁବକମାନେ ଏନଆଇଟି ରାଉରକେଲାରେ ରହୁଛନ୍ତି। ସେମାନେ ଆଜି ଓଡ଼ିଶା ଗସ୍ତର କାର୍ଯ୍ୟକ୍ରମର ଅଂଶ ଭାବେ ସମ୍ବଲପୁର ଜିଲ୍ଲା ପରିଦର୍ଶନ କରିଛନ୍ତି। ସିକ୍କିମର ବିଭିନ୍ନ ଜିଲ୍ଲାରୁ ଆସିଥିବା ୨୫ ଜଣ ଯୁବକ ଏବଂ ୭ ଏନଆଇଟି ସିକ୍କିମ୍‌ର ୪ କର୍ମଚାରୀ ଏବଂ ଜଣେ ପ୍ରଫେସର ଆଜି ସମ୍ବଲପୁରର ହୀରାକୁଦ ଡ୍ୟାମ୍ ଏବଂ ସମଲେଶ୍ୱରୀ ମନ୍ଦିର ପରିଦର୍ଶନ କରିଛନ୍ତି। ଡ୍ୟାମର ସୁପରିଟେଣ୍ଡେଣ୍ଟ ଇଞ୍ଜିନିୟର (ମେକାନିକାଲ୍‌) ପ୍ରିୟରଞ୍ଜନ ପଣ୍ଡା ସମସ୍ତ ଯୁବକଙ୍କୁ ଡ୍ୟାମର ର୍ନିମାଣ ଢାଞ୍ଚା ଏବଂ କାର୍ଯ୍ୟକାରିତା ବିଷୟରେ ବୁଝାଇଥିଲେ।

ଡ୍ୟାମର ଐତିହ୍ୟ ଏବଂ ଇତିହାସ ବିଷୟରେ ବର୍ଣ୍ଣନା କରି ସେ ଛାତ୍ରମାନଙ୍କୁ ଫାଉଣ୍ଡେସନ୍ ଏବଂ ଅପରେସନ୍ ଗ୍ୟାଲେରୀକୁ ନେଇଥିଲେ। ଏହା ପରେ ପିଲାମାନେ ସମଲେଶ୍ୱରୀ ମନ୍ଦିରରେ ମା ସମଲେଶ୍ୱରୀଙ୍କୁ ଦର୍ଶନ କରିଥିଲେ। ଏହା ପରେ ଏନଆଇଟି ରାଉରକେଲାର ଟିମ୍ ପିଲାମାନଙ୍କୁ ବିଜାମୁଣ୍ଡା ଗାଁର କାରିଗରମାନଙ୍କ ସହିତ ପରିଚିତ କରାଇଥିଲେ। ସେଠାକୁ ଯାଇ ସେମାନେ ବିଚିତ୍ରାପୁରୀ ଶାଢୀ ତିଆରି କରୁଥିବା କାରିଗରମାନଙ୍କୁ ଭେଟିଥିଲେ। ଗାଁର ପ୍ରତ୍ୟେକ ପରିବାର ଯେଉଁମାନେ କି ଶାଢୀ ବୁଣନ୍ତି ସେମାନେ ପିଲାମାନଙ୍କୁ ଶାଢୀ ବୁଣା ଶିଖାଇବାକୁ ଚେଷ୍ଟା କରିଥିଲେ।

ସିକ୍କିମର ଜଣେ ଯୁବକ ଜାସ୍ତୋ ଶେରପା ତାଙ୍କ ଅନୁଭୂତି ବିଷୟରେ କହିଛନ୍ତି, ଆଜି ଆମେ ଯୁବା ସଙ୍ଗମ କାର୍ଯ୍ୟକ୍ରମର ଏକ ଅଂଶ ଭାବରେ ହୀରାକୁଦ ଡ୍ୟାମ ପରିଦର୍ଶନ କରିଥିଲୁ । ମୋ ଦେଶର ଐତିହ୍ୟ ତଥା ପୃଥିବୀର ଦୀର୍ଘତମ ମାଟି ବନ୍ଧ ପରିଦର୍ଶନ କରି ମୁଁ ଅତ୍ୟନ୍ତ ଗର୍ବିତ ଅନୁଭବ କଲି। ଆମ ସମସ୍ତଙ୍କୁ ଡ୍ୟାମର ବିଭିନ୍ନ ଦିଗ ବିଷୟରେ ବୁଝା ଯାଇଥିଲା। ଆମକୁ ଫାଉଣ୍ଡେସନ ଗ୍ୟାଲେରୀ, ଅପରେସନ୍ ଗ୍ୟାଲେରୀ ଏବଂ ଡ୍ୟାମର ବିଭିନ୍ନ ଗୁରୁତ୍ୱପୂର୍ଣ୍ଣ ସ୍ଥାନ ପରିଦର୍ଶନ କରିବାର ସୌଭାଗ୍ୟ ମିଳିଥିଲା। ଏଠାକୁ ଆସି ମୋତେ ବହୁତ ଭଲ ଲାଗୁଛି । ମୁଁ ଏହି ଅଞ୍ଚଳର ସ୍ଥାନୀୟ ଲୋକଙ୍କୁ ମଧ୍ୟ ଭେଟିଛି। ମୁଁ ସେମାନଙ୍କୁ ସିକ୍କିମ ଆସିବାକୁ ନିମନ୍ତ୍ରଣ କରିଛି। ମୁଁ ଏଠାରେ ଅନେକ ସ୍ମୃତି ସଂଗ୍ରହ କରିଛି, ଯାହାକୁ ମୁଁ ସିକ୍କିମକୁ ନେଇ ଯିବି ଏବଂ ଓଡିଶାର ସଂସ୍କୃତି ଏବଂ ପରମ୍ପରା ବିଷୟରେ ସମସ୍ତଙ୍କୁ କହିବି।

ପ୍ରଫେସର ଦିବ୍ୟ କାନ୍ତ ସେଠ ଏବଂ ପ୍ରଫେସର ରମେଶ ମହାପାତ୍ର ଏନଆଇଟି ରାଉରକେଲା ପକ୍ଷରୁ ଆଜି ଗସ୍ତର ସଂଯୋଜକ ଥିଲେ। ମାର୍ଚ୍ଚ ୧ ରେ, ଏନଆଇଟି ରାଉରକେଲାର ପାଞ୍ଚଞ୍ଚଜଣ ସଂଯୋଜକଙ୍କ ସହ ଓଡ଼ିଶାର ଅନ୍ୟାନ୍ୟ ଜିଲ୍ଲାରୁ ମନୋନୀତ ୪୦ ପିଲାଙ୍କୁ ଯୁବା ସଙ୍ଗମ କାର୍ଯ୍ୟକ୍ରମ କାର୍ଯ୍ୟକ୍ରମରେ ସିକ୍କିମକୁ ନିଆଯିବ। ସେମାନଙ୍କର ଆଗାମୀ ୬ ଦିନର ଭ୍ରମଣରେ, ଓଡ଼ିଶାର ଛାତ୍ରମାନେ ସିକ୍କିମର ବିଭିନ୍ନ ଜିଲ୍ଲାରେ ଅବସ୍ଥିତ ଦର୍ଶନୀୟ ସ୍ଥାନ ବୁଲି ଦେଖିବେ।

କନ୍ଦର୍ପ ବେହେରା

ରେଢାଖୋଲ: ସମ୍ବଲପୁର ଜିଲ୍ଲା ନାକଟିଦେଉଳ ବ୍ଲକ୍ ପାଇକମାଳ ଗ୍ରାମ ନିକଟରେ ସରକାରୀ ଜମିରେ ବେଆଇନ୍ ଘର ନିର୍ମାଣ କରି ରହୁଥିବା ୩ ପରିବାରର ଘରକୁ ପ୍ରଶାସନ ଜେସିବି ମାଧ୍ୟମରେ ଭାଙ୍ଗିଦେଇଛି। ଯାହାକୁ ନେଇ ଆଜି ଅଂଚଳର ଆଦିବାସୀମାନେ ଡଇଁଚା ଆର୍ ଆଇ ଅଫିସ୍ ଘେରିବା ସହ ନାକଟିଦେଉଳ ତହସିଲଦାରଙ୍କୁ ଘେରିଥିଲେ। ଏପରିକି ତହସିଲଦାରଙ୍କୁ ୨ କିମି ବାଟ ଚଲାଇ ଚଲାଇ ନେଇଥିବା ଜଣା ପଡିଛି।

ନାକଟିଦେଉଳ ତହସିଲ୍‌ଦାର୍ ସୁକାନ୍ତ ନାଏକଙ୍କ ଠାରୁ ପ୍ରକାଶ ଯେ, ନାକଟିଦେଉଳ ତହସିଲ୍ ଅନ୍ତର୍ଗତ ଡଇଁଚା ଗ୍ରାମପଂଚାୟତର ପାଇକମାଳ ଗ୍ରାମ ନିକଟସ୍ଥ କେନ୍ଦୁଛକ ଠାରେ ଥିବା ପ୍ଲଟ୍ ନମ୍ବର ୪୨୯ (ପି) ଖାତାନଂ ୫୭ ରେ ଗ୍ରାମର ତାରସିଲା କିସ୍ପଟା. ଆମିତ୍ କିସ୍ପଟା ଓ ପ୍ରଦୀପ୍ କିସ୍ପଟା ବେଆଇନ୍ ଭାବରେ ଘର କରି ଏକ ବର୍ଷ ହେଲା ରହିଆସୁଥିଲେ। ସେମାନଙ୍କୁ ମଧ୍ୟ ପୂର୍ବରୁ ସେଠାରୁ ହଟିଯିବା ପାଇଁ ପ୍ରଶାସନ କହିଥିଲା। ଏପରିକି ନୋଟିସ୍ ମଧ୍ୟ ଦେବା ପାଇଁ ତହସିଲ୍ କର୍ମଚାରୀ ଆସିଥିବା ବେଳେ ଜବର ଦଖଲ କରିଥିବା ପରିବାର ନୋଟିସ୍ କୁ ଗ୍ରହଣ କରି ନ ଥିଲେ। ହେଲେ ସେଇ ବ୍ୟକ୍ତି ମାନେ ନ ହଟିବାରୁ ନାକଟିଦେଉଳ ତହସିଲ୍‌ଦାରଙ୍କ ନିର୍ଦ୍ଦେଶ କ୍ରମେ ପୋଲିସ୍ ପ୍ରଶାସନ, ଅତିରିକ୍ତ ତହସିଲ୍‌ଦାର୍, ତହସିଲ୍ ଅମିନ ଆଦି ସେଇ ଜବର ଦଖଲକାରୀଙ୍କ ଘରକୁ ଗତ ତା ୧୮/୧୧/୨୦୨୨ ରେ ଭାଙ୍ଗିଦେଇଥିଲେ।

ଏ ସଂପର୍କରେ ପୂର୍ବରୁ ଅଂଚଳବାସୀ ତହସିଲ୍‌ଦାର ନାକଟିଦେଉଳଙ୍କ ଠାରେ ମଧ୍ୟ ଅଭିଯୋଗ କରିଥିଲେ। କୌଣସି ପ୍ରକାର ଗଣ୍ଡଗୋଳ ନ ହେବା ପାଇଁ ପୋଲିସ୍ ମଧ୍ୟ ଉପସ୍ଥିତ ଥିଲା। ଯେଉଁମାନଙ୍କର ଘରକୁ ପ୍ରଶାସନ ଭାଙ୍ଗିଲା ସେଇ ଗ୍ରାମରେ ନିଜର ଘର ମଧ୍ୟ ରହିଛି। ପୂର୍ବରୁ ସେଇ ଜମିରେ ବନବିଭାଗ ଗଛ ରୋପଣ ମଧ୍ୟ କରିଥିଲା। ହେଲେ ସେ ଗଛଗୁଡିକ ନଷ୍ଟ କରି ଦିଆଯାଇଥିଲା। ସରକାରୀ ଜମିକୁ ଅକ୍ତିଆର କରିବା ପାଇଁ ସେଇ ବ୍ୟକ୍ତିମାନେ ସେଠାରେ ଅସ୍ଥାୟୀ ଘର କରି ରହୁଥିଲେ। ସେମାନେ ଆମକୁ ସେଇ ଯାଗା ବଦଳରେ ଅନ୍ୟ ଏକ ସ୍ଥାନରେ ଜାଗା ଦେବାକୁ ଅଡି ବସିଥିଲେ। ଆଦିବାସୀମାନେ ନ ବୁଝିବାରୁ ସେମାନଙ୍କୁ କିଛି ଯାଗା ଦିଆଯିବାକୁ ପ୍ରତିଶୃତି ଦେଇଥିଲେ। ଘଟଣା ସ୍ଥଳରେ ରେଢାଖୋଲ ଥାନାଧିକାରୀ, ଏସ୍‌ଡିପିଓ ତଥା ପୋଲିସ୍ କର୍ମଚାରୀମାନେ ଉପସ୍ଥିତ ଥିଲେ।

ଦୀର୍ଘ ୪ ଘଂଟାକାଳ ପ୍ରଶାସନ ନାକେଦମ୍ ହୋଇ ପଡିଥିଲା। ନାକଟିଦେଉଳ ବିଡିଓ ବିବେକାନନ୍ଦ ସାହୁଙ୍କ ଠାରୁ ପ୍ରକାଶ ଯେ, ତଣ୍ଡାବିରା ଛକ ନିକଟରେ ଥିବା ପ୍ରାୟ ଦଶ ଏକର ସରକାରୀ ଜମି ରହିଛି। ସରକାରଙ୍କ ନିୟମ ଅନୁଯାୟୀ ସେଇ ସଂରକ୍ଷିତ ଜମିକୁ ରଖାଯାଇଛି। ସେଇ ଜାଗାରେ କେହି ଘର କରି ରହିପାରିବେ ନାହିଁ ବୋଲି ବିଡିଓ ପ୍ରକାଶ କରିଛନ୍ତି। ପାଚେରୀ ନିର୍ମାଣ ପାଇଁ ମଧ୍ୟ ଟଙ୍କା ମଂଜୁର ହୋଇସାରିଥିବା ଜଣା ପଡିଛି। ସେଇ ଜମିକୁ ଆଦିବାସୀ ପରିବାର ଘର ତିଆରି କରି ରହିଲେ ଆଗକୁ ଏ ଅଂଚଳର ଲୋକମାନେ ଆନ୍ଦୋଳନ କରିବେ ବୋଲି ଜଣା ପଡିଛି।