ରେଢ଼ାଖୋଲ (କନ୍ଦର୍ପ ବେହେରା): ସମ୍ବଲପୁର ଜିଲ୍ଲା ରେଢ଼ାଖୋଲ ବ୍ଲକ ତ୍ରିବଣପୁର ଗ୍ରାମରେ ଥିବା ସରକାରୀ ଉଚ୍ଚ ବିଦ୍ୟାଳୟର ମୁଖ୍ୟଫାଟକରେ ତାଲା ପକାଇଲେ ଜୈନିକ ବିକଳାଙ୍ଗଙ୍କ ପତ୍ନୀ।
ଖବରରୁ ପ୍ରକାଶ ଯେ, ଗ୍ରାମର ସୌଦାମିନୀ ବେହେରା ସ୍କୁଲରେ ଅସ୍ଥାୟୀ ରୂପରେ ମଧ୍ୟାହ୍ନ ଭୋଜନ ପାଚିକା ରୂପେ ତିନିମାସ ପୂର୍ବରୁ ରହି ଆଜିଯାଏ କାର୍ଯ୍ୟ ତୁଲାଇ ଆସୁଥିଲେ। ସରକାରଙ୍କ ନିର୍ଦ୍ଦେଶ ଅନୁଯାୟୀ ପୁନଃ ନିଯୁକ୍ତି ଦେଇ ତାଙ୍କୁ ହଟାଇ ନୁତନ ଦୁଇଜଣଙ୍କ ସମେତ ଜଣେ ଆଗରୁ ଥିବା ପୁରୁଣା ପାଚିକାଙ୍କୁ ନିଯୁକ୍ତି ଦେଇଛନ୍ତି। ସୌଦାମିନୀଙ୍କ ଦୁଇଟି ଝିଅ ଓ ସ୍ୱାମୀ ୯୦ ଶତକଡା ବିକଳାଙ୍ଗ ଥିବାବେଳେ ସବୁ ପରିବାର ନିର୍ଭରଶୀଳ ସୌଦାମିନୀଙ୍କ ଉପରେ।
ଏହାକୁ ନେଇ ସ୍କୁଲ ଫାଟକରେ ତାଲା ପକାଇ ସୌଦାମିନି ପ୍ରତିବାଦ କରିଥିଲେ। ଯା’ଫଳରେ ଛାତ୍ର ଛାତ୍ରୀ, ଶିକ୍ଷକ ଓ ଶିକ୍ଷୟତ୍ରୀ ଫାଟକ ବାହାରେ ଛିଡା ହୋଇ ରହିଥିଲେ। ଖବର ପାଇ ଘଟଣା ସ୍ଥଳକୁ ରେଢ଼ାଖୋଲ ବିଇଓ ପହଁଞ୍ଚି ଲୋକଙ୍କୁ ବୁଝାଇଥିଲେ। ଉତ୍ତେଜନା ଅଧିକ ଜଟିଳ ହେବାରୁ ରେଢ଼ାଖୋଲ ପୋଲିସ ପହଞ୍ଚିଥିଲେ।
ବିଇଓ ସୌଦାମିନୀଙ୍କୁ ବୁଝାଇବାପରେ ଅସ୍ଥାୟୀ ଭାବରେ ପାଚିକା ଭାବରେ ରହିବାକୁ ପ୍ରତିଶୃତି ଦେବା ପରେ ଫାଟକର ତାଲା ଖୋଲା ଯାଇଥିଲା। ଏଥିରେ ଗ୍ରାମବାସୀ ମଧ୍ୟ ସାମିଲ ହୋଇଥିଲେ।