Tag: ସରକାରୀ ସହାୟତା

ସୀତାରାମ ଅଗ୍ରୱାଲ

ବାଣପୁର: ମୋ ପୁଅକୁ ବଞ୍ଚାଇଦିଅ, ବାପ ପୁଅ ମିଶି ସବୁ ଋଣ ସୁଝିଦେବୁ, ଆମ ଉପରେ ଦୟା କରନ୍ତୁ। ଏ ଭଳି କରୁଣ ନିବେଦନ କରିଛନ୍ତି ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ଅନ୍ତର୍ଗତ ଅଲାଇଡିହ ଗ୍ରାମର ଜୀବନ ପଣ୍ଡା।

ଜୀବନ ପଣ୍ଡାଙ୍କ ଏକମାତ୍ର ପୁଅ ବରଦା ପ୍ରସାଦ ପଣ୍ଡା ହରିଆନାର କୌଣସି ଏକ ଘରୋଇ କମ୍ପାନୀରେ କାମ କରୁଥିଲେ। ଆଉ ବାପା ଜୀବନ ପଣ୍ଡା ବାଲୁଗାଁର ଏକ ମନ୍ଦିରରେ ପୂଜକ ଭାବେ କାର୍ଯ୍ୟ କରୁଥିଲେ। କରୋନା ପାଇଁ ବାପା ଜୀବନ ପଣ୍ଡା ନିଜର ଜୀବିକା ହରେଇ ବସିଲେ। ପୁଅର ରୋଜଗାରରେ ଘରଟି ଦୁଃଖସୁଖରେ ଚାଲିଥିଲା।

ତେବେ ଦିନେ ବରଦା ମାଆଙ୍କ ସହ ଫୋନରେ କଥା ହେଉଥିଲେ। ବରଦାଙ୍କ କଥାଗୁଡିକ ପରିଷ୍କାର ଉଚ୍ଚାରଣ ହୋଇପାରୁନଥିବାରୁ ମା’ ପଚାରିଥିଲେ, “ପୁଅ ତୋର କଥା ଏମିତି କଣ ଶୁଭୁଛି। ପୁଅ କହିଥିଲା, ”ବୋଉ ମୋର ଦାନ୍ତ ବିନ୍ଧା ହେଉଛି। ବରଦା ସେଠାରେ ଡାକ୍ତରଙ୍କୁ ଦେଖାଇ ଔଷଧ ଖାଉଥିଲେ। ହେଲେ ଭଲ ନହେବାରୁ ଘରକୁ ଫେରିଆସି ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ପରୀକ୍ଷା କରିଥିଲେ।

ରିପୋର୍ଟ ଆସିଲା ପରେ ଡାକ୍ତର ଯାହା କହିଲେ ତାଙ୍କ ପାଦତଳୁ ମାଟି ଖସିଗଲା। ବରଦାଙ୍କୁ ମୁଖକର୍କଟ ରୋଗ ହୋଇଥିବା ଜଣାପଡିଥିଲା। ୨୭ ବର୍ଷର ପୁଅ ମୁଖ କର୍କଟ ରୋଗରେ ପୀଡିତ। ଯାହା ଟଙ୍କା ଥିଲା ଚିକିତ୍ସାରେ ସବୁ ଶେଷ ହୋଇଗଲା। ବାପା ଜୀବନ ପଣ୍ଡା ନିଜର ଜୀବିକା ହରେଇ ଘରେ ବସିଛନ୍ତି। ପୁଅର ଚିକିତ୍ସା ତ ଦୂରର କଥା ଘରେ ଚୁଲି ମଧ୍ୟ ଜଳୁନି। ବରଦାଙ୍କ ଗୋଟିଏ ବୋଲି ଭଉଣୀ ବାହା ହୋଇ ଶାଶୁ ଘରେ ରହୁଛନ୍ତି। ପ୍ରଶାସନ ଏବଂ ବଦାନ୍ୟ ବ୍ୟକ୍ତିଙ୍କୁ ବରଦାଙ୍କ ପିତା, ମାତା ଓ ଦାଦା ସହାୟତା ନିମନ୍ତେ ଗଣମାଧ୍ୟମ ଜରିଆରେ ଗୁହାରି କରିଛନ୍ତି।

କିଛି ସାହାଯ୍ୟ କରି ବରଦାକୁ ବଞ୍ଚେଇଦେଲେ ବାପ ପୁଅ ମିଶି ସାହାଯ୍ୟ କରିଥିବା ବ୍ୟକ୍ତିଙ୍କ ଋଣ ଧିରେ ଧିରେ ପରିଶୋଧ କରିଦେବେ। ଏହା ଥିଲା ଜଣେ ବାପାର ଆକୁଳ ନିବେଦନ।

ଯଦି କୌଣସି ସେବା ଅନୁଷ୍ଠାନ ଓ କୌଣସି ବଦାନ ବ୍ୟକ୍ତି ବରଦାକୁ ସାହାଯ୍ୟ କରିବାକୁ ଚାହୁଁଛନ୍ତି, ତେବେ ଏହି ନମ୍ବରରେ (୯୦୯୦୨୩୩୨୮୪) ଯୋଗାଯୋଗ କରି ସାହାଯ୍ୟ କରିପାରିବେ।

ଉକ୍ତ ରୋଗୀଙ୍କୁ ପ୍ରଶାସନିକ ସହାୟତା ଯୋଗାଇଦେବା ଲାଗି ଖୋର୍ଦ୍ଧା ଜିଲ୍ଲାପାଳ ଏବଂ ସିଡ଼ିଏମଓ ଙ୍କୁ ମଧ୍ୟ ‘ସମୀକ୍ଷା’ ପକ୍ଷରୁ ଅନୁରୋଧ କରାଯାଉଛି।

ରମେଶ ମହାନ୍ତି
ଜଗତସିଂହପୁର: ଲଘୁଚାପଜନିତ ଲଗାଣବର୍ଷା ଯୋଗୁଁ ଜିଲ୍ଲାରେ ବହୁ କ୍ଷୟକ୍ଷତି ହୋଇଥିବା ବେଳେ ତିର୍ତ୍ତୋଲ ବ୍ଲକର ୨୯ ପଞ୍ଚାୟତରେ ମଧ୍ୟ ବ୍ୟାପକ ଫସଲ ହାନି ହେବାସହ କ୍ଷୟକ୍ଷତି ହୋଇଛି। ଏହି କ୍ଷତିଗ୍ରସ୍ତ ଲୋକମାନଙ୍କୁ ସରକାରୀ ସହାୟତା ଯୋଗାଇ ଦିଆଯିବା ଦାବିରେ ଆଜି ତିର୍ତ୍ତୋଲ ବ୍ଲକ କଂଗ୍ରେସ ସଭାପତି ନିହାର ରଂଜନ ନାୟକଙ୍କ ନେତୃତ୍ବରେ ଶତାଧିକ ଚାଷୀ ଜଗତସିଂହପୁର ଜିଲ୍ଲା କୃଷି ଅଧିକାରୀ, ତିର୍ତ୍ତୋଲ ତହସିଲଦାର, ତିର୍ତ୍ତୋଲ କୃଷି ଅଧିକାରୀ, ଜିଲ୍ଲାପାଳ, ଓଡ଼ିଆ ମୁଖ୍ୟକୃଷି ଅଧିକାରୀ ପ୍ରମୁଖଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି। ଶତାଧିକ ହେକ୍ଟର ଚାଷ ଜମିରୁ ବର୍ଷାଜଳ ନିଷ୍କାସନ ହୋଇପାରି ନଥିବାରୁ ବ୍ୟାପକ ଫସଲ ନଷ୍ଟ ହୋଇଛି।

ଏହି ବ୍ଲକର ଅଧିକାଶଂ ଲୋକ କୃଷି ଉପରେ ନିର୍ଭର କରିଥାନ୍ତି। ୠଣ ଓ ହାତ ଉଧାରୀ କରି ଚାଷକରି ଥିବା ଫସଲନଷ୍ଟ ଦେଖି ଚାଷୀ ଆଖିରେ ଲୁହ ଭରି ଯାଇଛି। ବର୍ଷକର ଆହାର ହରାଇଛି ଚାଷୀ। ପ୍ରଶାସନ ପକ୍ଷରୁ ଯଥାଶୀଘ୍ର ତଦନ୍ତ କରାଯାଇ କ୍ଷତିଗ୍ରସ୍ତ ଚାଷୀଙ୍କୁ ଚହ୍ନଟ କରାଯିବା ସହିତ ସେମାନଙ୍କୁ ସରକାରୀ ସହାୟତା ଯୋଗାଇ ଦେବା ସହ ଋଣଛାଡ୍ କରାଯିବାକୁ ତିର୍ତ୍ତୋଲ ବ୍ଲକ କଂଗ୍ରେସ ପକ୍ଷରୁ ଦାବୀ କରାଯାଇଛି।

ଏହି କାର୍ଯ୍ୟକ୍ରମରେ ଲଲାଟକେଶରୀ ମହାନ୍ତି, ଦେବାଶିଷ ଶର୍ମା, ସ୍ମୃତି ରଂଜନସ୍ୱାଇଁ, କୈଳାସ ପରିଡ଼ା, କୈଳାସ ଚନ୍ଦ୍ର ସାହୁ,ଅଜୟ ରାଉଳ, ବ୍ରଜବନ୍ଧୁ ମଲ୍ଲିକ, ନବିନ ନାୟକ, ତୋଫାନ ସ୍ୱାଇଁ, ଶରତ ଦାସ ପ୍ରମୁଖ ସାମିଲ ହୋଇଥିଲେ।