Tag: ସାଧାରଣତନ୍ତ୍ର ଦିବସ

୭୬ତମ ସାଧାରଣତନ୍ତ୍ର ଦିବସ ପାଳନ କରାଯାଇଛି। ବିଶ୍ୱାସ ଓ ଭକ୍ତିର ଏହି ଅନନ୍ୟ ମେଳାରେ ସଙ୍ଗମରେ ବୁଡ ପକାଇବା ପାଇଁ ଶହ ଶହ ଶ୍ରଦ୍ଧାଳୁ ଏକତ୍ରିତ ହୋଇଥିଲେ। ତେବେ ସାଧାରଣତନ୍ତ୍ର ଦିବସ ଉପଲକ୍ଷେ ମହାକୁମ୍ଭ ଯାତ୍ରା ପଡିଆ ଓ ଆଖଡାରେ ଜାତୀୟତାବୋଧ  ଛାଇଯାଇଥିଲା। ସାଧୁ ସନ୍ଥଙ୍କ ଆଖଡା, ଶ୍ରଦ୍ଧାଳୁଙ୍କ କ୍ୟାମ୍ପ, ବିଭିନ୍ନ ସରକାରୀ ଅସ୍ଥାୟୀ ଶିବିରରେ ଜାତୀୟ ପତାକା ଉତୋଳନ ଉତ୍ସବ ପାଳିତ ହୋଇଥିଲା।

ସାଧାରଣତନ୍ତ୍ର ଦିବସରେ ମହାକୁମ୍ଭରେ ବରିଷ୍ଠମାନଙ୍କ ଯୋଗଦାନ ଏହାକୁ ଅଧିକ ଉଚ୍ଚକିତ କରିଥିଲା। ସ୍ୱତନ୍ତ୍ର କ୍ୟାମ୍ପ ଓ ବୃଦ୍ଧାଶ୍ରମରେ ବି ଅନୁରୂପ ଆୟୋଜନ କରାଯାଇଥିଲା। ସଙ୍ଗମରେ ବୁଡ ପକାଇ ଏହି ଅସ୍ଥାୟୀ ଶିବିରରେ ବରିଷ୍ଠ ନାଗରିକମାନେ ଆରାମ କରିବା ପାଇଁ ବ୍ୟବସ୍ଥା କରାଯାଇଥିଲା।

ମହାକୁମ୍ଭର ପଡିଥିବା ସାମାଜିକ ସଶକ୍ତିକରଣ କ୍ୟାମ୍ପରେ ଏକ ଅନନ୍ୟ କଥା ଦୃଷ୍ଟି ଗୋଚର ହୋଇଥିଲା। ମୀର୍ଜାପୁର ବୃଦ୍ଧାଶ୍ରମରୁ ଆସିଥିବା ୭୦ ବର୍ଷୀୟ ଜନୈକ ମୁନ୍ନି ଦେବୀ ପତାକା ଉତୋଳନ କରିଥିଲେ। ମହାକୁମ୍ଭ କେବଳ ବିଶ୍ୱାସ ଓ ଆସ୍ଥାର ପ୍ରତୀକ ନୁହେଁ ବରଂ ଏହା ସମାଜର ବିଭିନ୍ନବର୍ଗର ଲୋକଙ୍କ ଏକ ଅନନ୍ୟ ଉତ୍ସବ ବୋଲି ପ୍ରତୀତ ହୋଇଥିଲା। ମୁନ୍ନି ଦେବୀଙ୍କ ପରି ଜଣେ ବୟୋବୃଦ୍ଧ ମହିଳାଙ୍କ ଉପସ୍ଥିତି ଏହା ପ୍ରତିପାଦିତ କରିଥିଲା।

ବୃଦ୍ଧାଶ୍ରମରେ ରହୁଥିବା ଲୋକଙ୍କ ପାଇଁ ଉତରପ୍ରଦେଶ ସରକାରଙ୍କ ଦ୍ୱାରା ମହାକୁମ୍ଭରେ ଶହେ ଶଯ୍ୟା ବିଶିଷ୍ଟ ଏକ ଅସ୍ଥାୟୀ ଶିବିର ବି ଆୟୋଜନ କରାଯାଇଛି। ସଙ୍ଗମରେ ବୁଡ ପକାଇବା କିମ୍ବା ଯାତ୍ରା ବେଳେ କୌଣସି ସମସ୍ୟାରେ ପଡୁଥିବା ବୟୋବୃଦ୍ଧଙ୍କ ବିଶ୍ରାମ ପାଇଁ ଏହା ନିର୍ମାଣ କରାଯାଇଥିବା କୁହାଯାଇଛି। ତେବେ ଆଜିଯାଏ ସାରା ରାଜ୍ୟରୁ ପ୍ରାୟ ୪୫୦ ବୟୋବୃଦ୍ଧ ସଙ୍ଗମରେ ବୁଡ ପକାଇଥିବା ସୂଚନା ମିଳିଛି।

ଏହି ଅବସରରେ ବିଭିନ୍ନ ଆଖଡା, ସରକାରୀ ଓ ସାମାଜିକ ସଙ୍ଗଠନ କ୍ୟାମ୍ପରେ ଦେଶାତ୍ମବୋଧକ ସଙ୍ଗୀତ ଗାନ କରାଯାଇଥିଲା। ଏହାଛଡା ଏହି ଅବସରରେ ବି ଯୋଗ ଶିବିର ଆୟୋଜନ କରାଯାଇଥିଲା। ମହାକୁମ୍ଭରେ ଉଭୟ ମାନସିକ ଓ ଶାରୀରିକ ସୁସ୍ଥତା ପାଇଁ ଏହି ଯୋଗ ଶିବିର ଯଥେଷ୍ଟ ଉପାଦାନ ଯୋଗାଇଥିଲା।

ମହାକୁମ୍ଭରେ ସାଧାରଣତନ୍ତ୍ର ଦିବସ ପାଳନ କେବଳ ଜାତୀୟତାବୋଧ  ଉଦ୍ରେକ କରିନାହିଁ ବରଂ ସାମାଜର ସବୁବର୍ଗର ଲୋକଙ୍କୁ ଏକାଠି କରିବାରେ ଏହା ପ୍ରମୁଖ ସହାୟକ ହୋଇ ପାରିଛି। ଏହି କାର୍ଯ୍ୟକ୍ରମ କେବଳ ସାମ୍ୟତାର ବାର୍ତା ପ୍ରଚାର କରିନାହିଁ ବରଂ ବରିଷ୍ଠଙ୍କୁ ସମ୍ମାନ ଦେବା କ୍ଷେତ୍ରରେ ଏକ ଅନନ୍ୟ ଉତ୍ସବରେ ପରିଣତ ହୋଇପାରିଛି।

ପ୍ରୟାଗରାଜ: ଚଳିତବର୍ଷ ସାଧାରଣତନ୍ତ୍ର ଦିବସରେ ପ୍ରୟାଗରାଜ ମହାକୁମ୍ଭନଗରରେ ପଡିଥିବା ସୂଚନା ଓ ପ୍ରସାରଣ ମନ୍ତ୍ରଣାଳୟର ଡିଜିଟାଲ ପ୍ରଦର୍ଶନୀ ବୁଲି ଦେଖିଛନ୍ତି ଅନେକ ଦର୍ଶକ। ଏହି ପ୍ରଦର୍ଶନୀକୁ ଉଭୟ ଦର୍ଶକ ଓ ଶ୍ରଦ୍ଧାଳୁ ଭୂୟସୀ ପ୍ରଶଂସା କରିବା ସହ ଏହା ଅଧିକ ଶିକ୍ଷଣୀୟ ହୋଇ ପାରିଥିବା ପ୍ରତିକ୍ରିୟା ଦେଇଛନ୍ତି। ପ୍ରଦର୍ଶନୀର ସେଲଫି ପଏଂଟରେ ମହିଳା ଓ ଶିଶୁମାନେ ବିଭିନ୍ନ ସେଲଫି ନେଉଥିବା ଦେଖିବାକୁ ମିଳିଥିଲା। ପ୍ରଦର୍ଶନୀରେ ସ୍ଥାନିତ ହୋଇଥିବା ପ୍ରତୀକାତ୍ମକ ସମୁଦ୍ର ମନ୍ଥନ ପ୍ରତିକୃତିକୁ ପ୍ରଶଂସା କରି ଅନେକ ଦର୍ଶକ ଏହି ସ୍ଥାନରେ ସେଲଫି ଉଠାଇଥିବା ବି ଦେଖିବାକୁ ମିଳିଥିଲା।

ତ୍ରିବେଣୀ ରାସ୍ତାର ପରେଡ ଗ୍ରାଉଣ୍ଡରେ ଉଭୟ ଶ୍ରଦ୍ଧାଳୁ ଓ ସାଧାରଣ ଦର୍ଶକଙ୍କ ପାଇଁ ୧୩ ଜାନୁୟାରୀରୁ ୨୬ ଫେବୃୟାରୀ ପର୍ଯ୍ୟନ୍ତ ଚାଲିଥିବା ଏହି ମହାକୁମ୍ଭ ମେଳାକୁ କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରଣାଳୟ ପକ୍ଷରୁ ଆୟୋଜନ କରାଯାଇଛି। ଏହି ମେଳାରେ ଗତ ଦଶବର୍ଷ ଭିତରେ ସରକାର କରିଥିବା ବିଭିନ୍ନ ଯୋଜନା ଓ କାର୍ଯ୍ୟକ୍ରମ ସମ୍ପର୍କରେ ଅବତାରଣା କରାଯାଇଛି।

ସୂଚନା ଓ ପ୍ରସାରଣ ମନ୍ତ୍ରଣାଳୟ ପକ୍ଷରୁ ପଡିଥିବା ଜାତୀୟ ପ୍ରାକୃତିକ ବିପର୍ଯ୍ୟୟ ପରିଚାଳନା, ପ୍ରଧାନମନ୍ତ୍ରୀ ଇଂଟରନସିପ ଯୋଜନା, କେନ୍ଦ୍ର କୃଷି ଓ କୃଷକ କଲ୍ୟାଣ ସମ୍ପର୍କିତ ଡିଜିଟାଲ ପ୍ରଦର୍ଶନୀରୁ ବହୁ ଉପାଦେୟ ତଥ୍ୟ ଦର୍ଶକ ଜାଣିପାଉଥିବା ଦେଖିବାକୁ ମିଳିଛି।

ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା, ଡ୍ରୋନ ଦିଦି, ଲକ୍ଷପତି ଦିଦି, ମୁଦ୍ରା ଯୋଜନା, ପ୍ରଧାନମନ୍ତ୍ରୀ ଫସଲ ବୀମା ଯୋଜନା, ଡିଜିଟାଲ ଇଣ୍ଡିଆ, ପ୍ରଧାନମନ୍ତ୍ରୀ ଆବାସ ଯୋଜନା, ବିଦ୍ୟାଞ୍ଜଳି, ଆତ୍ମନିର୍ଭର ଭାରତ, ସ୍କିଲ ଇଣ୍ଡିଆ, ଏକ ଭାରତ ଶ୍ରେଷ୍ଠ ଭାରତ, ପ୍ରଧାନମନ୍ତ୍ରୀ ଉଜ୍ୱଳା ଯୋଜନା, ହର ଘର ଜଲ ଯୋଜନା, ପ୍ରଧାନମନ୍ତ୍ରୀ କୌଶଲ ବିକାଶ ମିଶନ, ସ୍ୱଚ୍ଛ ଭାରତ ମିଶନ, ପ୍ରଧାନମନ୍ତ୍ରୀ ସ୍ୱନିଧି ଯୋଜନା, ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି, ମହିଳା ସଶକ୍ତିକରଣ ଯୋଜନା ଉପରେ ସାଧାରଣ ଜନତା ଏହି ଡିଜିଚାଲ ପ୍ରଦର୍ଶନୀ ମାଧ୍ୟମରେ ଅନେକ କଥା ଜାଣିବାକୁ ପାଇଛନ୍ତି।

ଭୁବନେଶ୍ଵର: ଭାଇବ୍ରେଣ୍ଟ ଭିଲେଜ କାର୍ଯ୍ୟକ୍ରମ ଅଧିନରେ ୭୬ତମ ସାଧାରଣତନ୍ତ୍ର ଦିବସ ପାଇଁ ଗ୍ରାମରୁ ନୂଆଦିଲ୍ଲୀକୁ ଆସିଥିବା ବିଶିଷ୍ଟ ଅତିଥିମାନଙ୍କୁ ଭେଟିଛନ୍ତି କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଅମିତ ଶାହା। ଏହି ଅବସରରେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଜେପି ନଡ୍ଡା, କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ, କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ ଜୁଏଲ ଓରାମ, କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ, କେନ୍ଦ୍ର ଗୃହ ସଚିବ ଗୋବିନ୍ଦ ମୋହନ, ସୀମା ପରିଚାଳନା ସଚିବ ଡ. ରାଜେନ୍ଦ୍ର କୁମାର, ଗୁଇନ୍ଦା ବ୍ୟୁରୋର ନିର୍ଦ୍ଦେଶକ ଏବଂ ଭାରତ-ତିବ୍ଦତ ସୀମା ପୋଲିସ (ଆଇଟିବିପି)ର ମହାନିର୍ଦ୍ଦେଶକ ପ୍ରମୁଖ ଉପସ୍ଥିତ ଥିଲେ।

କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଅମିତ ଶାହା ତାଙ୍କ ଅଭିଭାଷଣରେ କହିଥିଲେ ଯେ ଭାଇବ୍ରେଣ୍ଟ ଭିଲେଜ କାର୍ଯ୍ୟକ୍ରମ ଆଭିମୁଖ୍ୟ ଏବଂ ଦୃଷ୍ଟିକୋଣରେ ପରିବର୍ତ୍ତନର ଏକ ପ୍ରତୀକ । ଏହି କାର୍ଯ୍ୟକ୍ରମ ଭାଇବ୍ରେଣ୍ଟ ଭିଲେଜ ଏବଂ ଦିଲ୍ଲୀ ମଧ୍ୟରେ ଥିବା ହୃଦୟ ଦୂରତାକୁ ଦୂର କରିବାର ଏକ କାର୍ଯ୍ୟକ୍ରମ ଏବଂ ଦୁର୍ଗମ ଏବଂ ସୀମାବର୍ତ୍ତି ଗ୍ରାମର ଲୋକଙ୍କ ମନରେ ଏକ ଭାବନା ସୃଷ୍ଟି କରେ ଯେ ସେମାନେ ସମସ୍ତେ ଭାରତର ଏକ ଅଭିନ୍ନ ଅଂଶ ଏବଂ ସମଗ୍ର ଭାରତ ସେମାନଙ୍କୁ ଗୁରୁତ୍ବ ଦେଉଛି । ଦେଶର ପ୍ରଧାନମନ୍ତ୍ରୀ ଯେତେବେଳେ ଦେଶର ପ୍ରଥମ ଗାଁ ( ସୀମାନ୍ତ ଗାଁ) ରେ ରହୁଥିବା ପ୍ରତ୍ୟେକ ବ୍ୟକ୍ତିଙ୍କୁ ନିମନ୍ତ୍ରଣ ପଠାନ୍ତି ଏବଂ ଦେଶର ଜାତୀୟ ଉତ୍ସବରେ ନିମନ୍ତ୍ରଣ କରି ଏହାର ଆୟୋଜନ କରନ୍ତି, ସେତେବେଳେ ତାହା ସେମାନଙ୍କ ମନରେ ଆବେଗିକ ସଂପର୍କ ସ୍ଥାପନ କରେ ଓ ହୃଦୟର ଦୂରତା ଶେଷ ହୋଇଯାଏ । ଶ୍ରୀ ଶାହା କହିଛନ୍ତି ଯେ ଗତ ୪ ବର୍ଷ ଧରି ଜାତୀୟ ଉତ୍ସବରେ ବିଭିନ୍ନ ଗ୍ରାମର ପ୍ରତିନିଧିଙ୍କୁ ଏଠାକୁ ନିମନ୍ତ୍ରଣ କରାଯାଉଛି। ପ୍ରତିବର୍ଷ ଏଠାକୁ ଆସୁଥିବା ଲୋକମାନେ ଦେଶର ପ୍ରଧାନମନ୍ତ୍ରୀଙ୍କ ସ୍ୱତନ୍ତ୍ର ଅତିଥି ଭାବେ ସମ୍ମାନର ସହ ଜାତୀୟ ମହୋତ୍ସବରେ ଭାଗ ନେବାର ସୁଯୋଗ ପାଇଥାନ୍ତି। ଏହା ଦେଶର ସୀମାନ୍ତ ଗାଁମାନଙ୍କ ପ୍ରତି ପରିବର୍ତ୍ତିତ ମନୋଭାବର ପ୍ରତିଫଳନ ।

ଅମିତ ଶାହ କହିଥିଲେ ଯେ ୨୦୧୪ରେ ଶ୍ରୀ ନରେନ୍ଦ୍ର ମୋଦୀ ପ୍ରଧାନମନ୍ତ୍ରୀ ହେବା ପରେ ଦେଶର ବିକାଶର ଏକ ସର୍ବାଙ୍ଗୀନ ଏବଂ ସମାବେଶୀ ଦୃଷ୍ଟିକୋଣ ସୃଷ୍ଟି ହୋଇଥିଲା, ଯାହା ଅଧୀନରେ ଦେଶର ପ୍ରତ୍ୟେକ ନାଗରିକ ଏବଂ ଅଞ୍ଚଳକୁ ସ୍ପର୍ଶ କରୁଥିବା ଉପାୟରେ ବିକାଶ କରାଯାଏ । ଏହାର ଏକ ଉଦାହରଣ ଦେଇ ସେ କହିଥିଲେ ଯେ ଲଦାଖରେ ସବୁଠାରୁ ବଡ଼ ସମସ୍ୟା ହେଉଛି ଶୀତଦିନେ ଡିଜେଲ ଜମାଟ ବାନ୍ଧିବା । ପ୍ରଧାନମନ୍ତ୍ରୀ ମୋଦୀଙ୍କ ନିର୍ଦ୍ଦେଶକ୍ରମେ ଭାରତ ସରକାରଙ୍କ ତୈଳ କମ୍ପାନିଗୁଡ଼ିକୁ ନନ୍ ଫ୍ରିଜିଙ୍ଗ ଡିଜେଲ ଉପରେ ଗବେଷଣା ଓ ବିକାଶ ପାଇଁ ବଜେଟ୍ ଦିଆଯାଇଥିଲା। ଆଜି ଲଦାଖରେ ନନ୍ ଫ୍ରିଜ ଡିଜେଲ ଉପଲବ୍ଧ ହୋଇଛି। ଏସବୁ ଅଞ୍ଚଳର ସମସ୍ୟା ପ୍ରତି କେହି ଧ୍ୟାନ ଦେଲେ ହିଁ ଏପରି ସମାଧାନ ସମ୍ଭବ ହେବ ବୋଲି ସେ କହିଛନ୍ତି। ଗୃହମନ୍ତ୍ରୀ କହିଛନ୍ତି ଯେ ୨୦୧୭ରେ ନିଷ୍ପତ୍ତି ନିଆଯାଇଥିଲା ଯେ ସେନା ସମେତ ସମସ୍ତ ସୁରକ୍ଷା ବାହିନୀ ସୀମାବର୍ତ୍ତୀ ଗ୍ରାମରୁ କ୍ଷୀର, ଅଣ୍ଡା, ମାଛ ଏବଂ ପନିପରିବା କିଣିବେ ଯାହା ନିଯୁକ୍ତି ସୁଯୋଗ ପ୍ରଦାନ କରିବ।

କେନ୍ଦ୍ର ଗୃହମନ୍ତ୍ରୀ କହିଥିଲେ ଯେ ଭାଇବ୍ରେଣ୍ଟ ଭିଲେଜ୍ କାର୍ଯ୍ୟକ୍ରମ ହେଉଛି ସାମଗ୍ରିକ ବିକାଶର ଏକ ବହୁମୁଖୀ ଏବଂ ବହୁକ୍ଷେତ୍ରୀୟ କାର୍ଯ୍ୟକ୍ରମ। ଗାଁର ଭିତ୍ତିଭୂମି, ସଂସ୍କୃତି, ପର୍ଯ୍ୟଟନ, ଜୀବନ ଓ ଅର୍ଥନୈତିକ ପ୍ରଗତି ଦେଶର ଅନ୍ୟାନ୍ୟ ଅଞ୍ଚଳ ଭଳି ଗତିଶୀଳ ହେବା ଦରକାର। ସର୍ବାଙ୍ଗୀନ ବିକାଶ ସହ ଆଗକୁ ବଢ଼ିଲେ କେବଳ ବର୍ତ୍ତମାନ ଉନ୍ନତ ହେବ ନାହିଁ ବରଂ ଆଗାମୀ ପିଢ଼ି ମଧ୍ୟ ଉତ୍ତମ ପରିବେଶରେ ବଞ୍ଚିପାରିବେ ବୋଲି ସେ କହିଛନ୍ତି।

ଅମିତ ଶାହ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଫେବୃଆରୀ ୧୫, ୨୦୨୩ରେ ଏହି କାର୍ଯ୍ୟକ୍ରମ ଘୋଷଣା କରିଥିଲେ ଏବଂ ଦେଶର ଉତ୍ତର ସୀମା କୁ ଲାଗିରହିଥିବା ୪୬ଟି ବ୍ଲକର ୬୬୨ଟି ଗାଁକୁ ଏଥିରେ ଅନ୍ତର୍ଭୁକ୍ତ କରାଯାଇଥିଲା । ଏହି ଯୋଜନା ପ୍ରଣୟନ ହେବା ପରେ କେନ୍ଦ୍ର ସରକାରଙ୍କ ୨୨ରୁ ଅଧିକ ମନ୍ତ୍ରୀ ୮ଟି ଜିଲ୍ଲା ଓ ୨୬ଟି ଗାଁ ଗସ୍ତ କରି ଭାଇବ୍ରେଣ୍ଟ ଭିଲେଜ୍ କାର୍ଯ୍ୟକ୍ରମ ର କାର୍ଯ୍ୟକାରିତାରେ ସ୍ଥାନୀୟ ଅସୁବିଧା ଓ ମୌଳିକ ସମସ୍ୟା ସମ୍ପର୍କରେ ଆଲୋକପାତ କରିଥିଲେ। ଏହାବ୍ୟତୀତ ୯୨ ଜଣ ବରିଷ୍ଠ ଅଧିକାରୀ ୨୫୯ଟି ଗାଁ ପରିଦର୍ଶନ କରିସାରିଛନ୍ତି ଓ ଏହିପ୍ରକାରେ ପ୍ରତ୍ୟେକ ଗାଁରେ ପହଞ୍ଚିବାକୁ ଉଦ୍ୟମ କରାଯାଇଛି ବୋଲି ସେ କହିଥିଲେ।

କେନ୍ଦ୍ର ଗୃହମନ୍ତ୍ରୀ କହିଥିଲେ ଯେ ଭାଇବ୍ରେଣ୍ଟ ଭିଲେଜ କାର୍ଯ୍ୟକ୍ରମ କାର୍ଯ୍ୟକାରୀ କରିବାରେ ୬୬୨ଟି ଗ୍ରାମ ସମ୍ମୁଖୀନ ହେଉଥିବା ସମସ୍ୟାଗୁଡ଼ିକର ସମୀକ୍ଷା କରାଯାଇଥିଲା ଓ ରିପୋର୍ଟକୁ  ଗୃହ ମନ୍ତ୍ରଣାଳୟକୁ ପଠାଯାଇଥିଲା। ଏହି ରିପୋର୍ଟ ଆଧାରରେ ୬୨୬ଟି ପ୍ରକଳ୍ପ ପ୍ରସ୍ତୁତ କରାଯାଇଥିଲା। ସେହିପରି ୯୦୧ଟି ନିଯୁକ୍ତି ସମ୍ବନ୍ଧୀୟ ପ୍ରକଳ୍ପ ଆରମ୍ଭ ହୋଇଛି। ଏହା ସହ କୃଷି, ଶିକ୍ଷା, ସ୍ୱାସ୍ଥ୍ୟ, ଶକ୍ତି, ସମବାୟ ଏବଂ ଖଦି ଓ ଗ୍ରାମୋଦ୍ୟୋଗ ଆଦି ପାଇଁ ୫୫୬ କୋଟି ଟଙ୍କାର ଯୋଜନା କରାଯାଇଛି।

ଶ୍ରୀ ଶାହା କହିଛନ୍ତି ଯେ ୨୪୦୦ କୋଟି ଟଙ୍କା ବ୍ୟୟରେ ୧୧୩ଟି ରାସ୍ତା ଓ ୮ଟି ଲୋ ସସ୍ପେନ୍ସନ୍ ବ୍ରିଜ୍ ନିର୍ମାଣ କରାଯାଇଛି ଏବଂ ଜୁନ୍ ୨୦୨୫ ସୁଦ୍ଧା ୩୬୨ଟି ଗାଁକୁ ୪ଜି ସଂଯୋଗ ମିଳିବ। ୬୬୨ଟି ଗାଁ ମଧ୍ୟରୁ ୪୭୪ଟି ଗାଁକୁ ଗ୍ରୀଡ୍ ଓ ୧୨୭ଟି ଗାଁକୁ ଅଫ୍ ଗ୍ରିଡ୍ ବିଦ୍ୟୁତୀକରଣ କରାଯାଇଥିବା ବେଳେ ୨୩୮ କୋଟି ଟଙ୍କା ବିନିଯୋଗରେ ୪୩ଟି ନୂଆ ବିଦ୍ୟୁତ୍ ପ୍ରକଳ୍ପ ନିର୍ମାଣ କରାଯାଇଛି। ୪୮ କୋଟି ଟଙ୍କା ବ୍ୟୟରେ ୧୦୨ଟି ପ୍ରକଳ୍ପରୁ ଭ୍ୟୁ ପଏଣ୍ଟ, ଦୁଃସାହସିକ ପର୍ଯ୍ୟଟନ, ପରିବେଶ ବିଜ୍ଞାନ ଓ ପର୍ଯ୍ୟଟନ କେନ୍ଦ୍ରର ବିକାଶ କରାଯାଇଛି ବୋଲି ଗୃହମନ୍ତ୍ରୀ କହିଛନ୍ତି। ପ୍ରଥମ ୬୬୨ଟି ଗାଁ ମଧ୍ୟରୁ ୫୭୦ଟି ଗାଁରେ ପୂର୍ବରୁ ବ୍ୟାଙ୍କ ନଥିବା ବେଳେ ମୋଦୀ ସରକାର ମଧ୍ୟ ଏଭଳି ଗାଁକୁ ବ୍ୟାଙ୍କ ସହ ଯୋଡ଼ିବା ପାଇଁ କାମ କରିଛନ୍ତି।

ଅମିତ ଶାହ କହିଥିଲେ ଯେ ମୋଦୀ ସରକାର ଭାଇବ୍ରେଣ୍ଟ ଭିଲେଜରେ ରହୁଥିବା ଲୋକଙ୍କ ଉତ୍ତମ ଜୀବନ ପାଇଁ ସମସ୍ତ ପ୍ରାଥମିକ ସୁବିଧା ଯୋଗାଇ ଦେବା ପାଇଁ କାର୍ଯ୍ୟ କରିଛନ୍ତି । ପ୍ରଧାନମନ୍ତ୍ରୀ ମୋଦିଙ୍କ ନେତୃତ୍ୱରେ ସରକାରୀ ଯୋଜନାଗୁଡ଼ିକୁ ବଟମ୍-ଟୁ-ଟପ୍ ଆଭିମୁଖ୍ୟ ସହିତ ଶତ ପ୍ରତିଶତ ସାଚୁରେସନ୍ ହାସଲ କରି ଭୌତିକ, ଡିଜିଟାଲ୍ ଏବଂ ହୃଦୟର ଦୂରତ୍ବକୁ ଯୋଡିବାକୁ  ପ୍ରୟାସ କରାଯାଇଛି। ଭାଇବ୍ରେଣ୍ଟ ଭିଲେଜର ଅତିଥିମାନଙ୍କୁ ଗୃହମନ୍ତ୍ରୀ କହିଥିଲେ ଯେ ସେମାନେ ନିଜ ଗାଁକୁ ଫେରି ବାର୍ତ୍ତା ଦିଅନ୍ତୁ ଯେ ପ୍ରଧାନମନ୍ତ୍ରୀ ମୋଦୀଜୀଙ୍କର ଭାଇବ୍ରେଣ୍ଟ ଭିଲେଜର ଲୋକଙ୍କ ପ୍ରତି ବହୁତ ଭଲ ପାଇବା ଅଛି।

ନୂଆଦିଲ୍ଲୀ: ଆସନ୍ତା ୨୬ ତାରିଖରେ ନୂଆଦିଲ୍ଲୀର କର୍ତ୍ତବ୍ୟପଥରେ ହେବାକୁ ଥିବା ସାଧାରଣତନ୍ତ୍ର ଦିବସ ପରେଡରେ ସ୍ୱତନ୍ତ୍ର ଅତିଥି ଭାବେ ଯୋଗ ଦେବା ପାଇଁ ପଂଚାୟତିରାଜ ମନ୍ତ୍ରଣାଳୟ ପକ୍ଷରୁ ୬୦୦ରୁ ଊର୍ଦ୍ଧ୍ୱ ପଂଚାୟତ ନେତାଙ୍କୁ ଆମନ୍ତ୍ରଣ କରାଯାଇଛି। ନିଜ ନିଜ ପଂଚାୟତରେ ବିଭିନ୍ନ ସରକାରୀ ଯୋଜନାକୁ ସଫଳ ରୂପାୟନ କରିବା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଏହି ସ୍ୱତନ୍ତ୍ର ଅତିଥିମାନଙ୍କୁ ମନୋନୀତ କରାଯାଇଛି। ହର ଘର ଜଲ ଯୋଜନା, ପ୍ରଧାନମନ୍ତ୍ରୀ ଆବାସ ଯୋଜନା, ମିଶନ ଇନ୍ଦ୍ରଧନୁଷ, ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା, ପ୍ରଧାନମନ୍ତ୍ରୀ ଉଜ୍ୱଳା ଯୋଜନା, ପ୍ରଧାନମନ୍ତ୍ରୀ ପୋଷଣ ଯୋଜନା, ପିଏମ ମୁଦ୍ରା ଯୋଜନା, ପିଏମ ବିଶ୍ୱକର୍ମା ଯୋଜନା, ପ୍ରଧାନମନ୍ତ୍ରୀ ମାତୃ ବନ୍ଦନା ଯୋଜନା, କିଷାନ କ୍ରେଡିଟ କାର୍ଡ ଯୋଜନା ପରି ବିଭିନ୍ନ ଯୋଜନାର ସୁଫଳ ଲୋକଙ୍କ ପାଖରେ ପହଂଚାଇ ସଫଳତା ପାଇଥିବା ନେତାଙ୍କୁ ଆମନ୍ତ୍ରଣ କରାଯାଇଛି। ସ୍ୱାସ୍ଥ୍ୟ, ଶିକ୍ଷା, ମହିଳା ଓ ଶିଶୁ ବିକାଶ, ଜଳ ଓ ପରିମଳ ପରି ବିଭିନ୍ନ କ୍ଷେତ୍ରରେ ନିଜ ନିଜ ଅଂଚଳରେ ଉଲ୍ଲେଖନୀୟ ଅବଦାନ ରହିଥିବା ବ୍ୟକ୍ତିତ୍ୱ ଏହି ଅବସରରେ ଆମନ୍ତ୍ରିତ ହୋଇଛନ୍ତି। ସାଧାରଣତନ୍ତ୍ର ଦିବସରେ ନିଜ ନିଜ ପରିବାର ସହ ଏହି ପଂଚାୟତ ନେତାମାନେ ପରେଡ ଦେଖିବାକୁ ସୁଯୋଗ ପାଇବେ ବୋଲି ସୂଚିତ କରାଯାଇଛି। କର୍ମ କ୍ଷେତ୍ରରୁ କର୍ତବ୍ୟପଥ ଆଡକୁ ଅଗ୍ରସର ହେବା ପାଇଁ ଏହା ଏକ ଆହ୍ୱାନ ବୋଲି କୁହାଯାଇଛି।

ନୂଆଦିଲ୍ଲୀର ଏୟାରପୋର୍ଟ ଅଥରିଟି ଅଫ ଇଣ୍ଡିଆ ଅଫିସର୍ସ ଇନଷ୍ଟିଚ୍ୟୁଟଠାରେ ୨୫ ଜାନୁୟାରୀରେ ଏହି ପଂଚାୟତ ନେତାମାନଙ୍କୁ ଭବ୍ୟ ସମ୍ବର୍ଦ୍ଧନା ଦିଆଯିବ। ଏହି ଅବସରରେ ଗ୍ରାମୋଦୟ ସଂସ୍କରଣ ମାଗାଜିନର ପଂଚଦଶ ସଂସ୍କରଣ ଉନ୍ମୋଚିତ ହେବା ସହ ନୋ ୟୁଅର କନଷ୍ଟିଚ୍ୟୁସନ କୁଇଜ ପ୍ରତିଯୋଗିତାର ବିଜେତାମାନଙ୍କୁ ପୁରସ୍କୃତ କରାଯିବ। ଗତବର୍ଷ ସମ୍ବିଧାନ ଦିବସ ଉପଲକ୍ଷେ ପଂଚାୟତିରାଜ ମନ୍ତ୍ରଣାଳୟ ପକ୍ଷରୁ ଏହି କୁଇଜ ପ୍ରତିଯୋଗିତା ହୋଇଥିଲା । କେନ୍ଦ୍ର ପଂଚାୟତିରାଜ ମନ୍ତ୍ରୀ ରାଜୀବ ରଂଜନ ସିଂ ଓରଫ ଲଲନ ସିଂ, ପଂଚାୟତିରାଜ ରାଷ୍ଟ୍ରମନ୍ତ୍ରୀ ପ୍ରଫେସର ଏସ.ପି.ସିଂ ବାଘେଲ, ପଂଚାୟତିରାଜ ସଚିବ ବିବେକ ଭରଦ୍ୱାଜ ପ୍ରମୁଖ ଏହି ଅବସରରେ ଉପସ୍ଥିତ ରହିବେ ବୋଲି କୁହାଯାଇଛି।