ଭୁବନେଶ୍ୱର: ଅନ୍ତର୍ଜାତୀୟ ମହିଳା ଦିବସ ପରିପ୍ରେକ୍ଷୀରେ ରାଜ୍ୟ ସରକାରଙ୍କ ‘ସ୍ୱକଳ୍ପ’ କାର୍ଯ୍ୟକ୍ରମ ଅଧୀନରେ ଉଦ୍ୟୋଗୀ ପରାମର୍ଶ ଶିବିର ଆୟୋଜନ କରାଯାଇଛି। ସୋମବାର ଦିନ ଭୁବନେଶ୍ୱରସ୍ଥିତ ଗଙ୍ଗନଗର ଗୋଷ୍ଠୀ କେନ୍ଦ୍ରଠାରେ ଆୟୋଜିତ ଏହି କାର୍ଯ୍ୟକ୍ରମରେ ୧୦୦ରୁ ଅଧିକ ମହିଳା ଉଦ୍ୟୋଗୀ ଭାଗ ନେଇଥିଲେ। ଏହି କାର୍ଯ୍ୟକ୍ରମରେ ‘ସ୍ୱକଳ୍ପ’ ପକ୍ଷରୁ ସେମାନଙ୍କୁ ବ୍ୟବସାୟ ସ୍ଥାପନା ଲାଗି ଆବଶ୍ୟକ ସହାୟତା ପ୍ରଦାନ କରାଯାଇଥିଲା।
ପାଲାଡିୟମ ଇଣ୍ଡିଆ ଏବଂ ହମାରା ବଚପନ ଟ୍ରଷ୍ଟର ମିଳିତ ଆନୁକୂଲ୍ୟରେ ଏହି କାର୍ଯ୍ୟକ୍ରମ କରାଯାଇଥିଲା। ମହିଳା ଉଦ୍ୟୋଗୀଙ୍କୁ ସଶକ୍ତ କରିବା ଏବଂ ସେମାନଙ୍କ ବ୍ୟବସାୟକୁ ଆଗକୁ ନେବାରେ ଏହି କାର୍ଯ୍ୟକ୍ରମ ବେଶ୍ ସହାୟକ ହେବ।
ଏହି କାର୍ଯ୍ୟକ୍ରମରେ ଡିଏନ୍ ହୋମ୍ସର ନିର୍ଦ୍ଦେଶକ ରତ୍ନମାଳା ସ୍ୱାଇଁ ମୁଖ୍ୟ ଅତିଥି ଯୋଗ ଦେଇଥିଲେ। ସେ କହିଥିଲେ ଯେ, ‘‘ଆଗ ଭଳି ଆଉ ମହିଳାମାନେ ଘର ଭିତରେ ସୀମିତ ହୋଇ ରହି ନାହାନ୍ତି। ରାଜ୍ୟ ସରକାରଙ୍କ ବିଭିନ୍ନ ଯୋଜନା ଆଜି ସେମାନଙ୍କୁ ଉଦ୍ୟୋଗୀ କରିବା ପାଇଁ ବାଟ ଫିଟାଇ ପାରିଛି। ‘ସ୍ୱକଳ୍ପ’ ମାଧ୍ୟମରେ ଗାଁ ଗହଳିର ଅନେକ ମହିଳା ଆଜି ଏ ଦିଗରେ ଆଗକୁ ଆସିପାରିଛନ୍ତି।’’
ଏହି କାର୍ଯ୍ୟକ୍ରମରେ ‘ସ୍ୱକଳ୍ପ’ ଅଧୀନରେ ଉଦ୍ୟୋଗୀ ଦକ୍ଷତା ବିକାଶ ତାଲିମ ଶେଷ କରିଥିବା ଖୋର୍ଦ୍ଧା ଜିଲ୍ଲାର ମହିଳାମାନଙ୍କୁ ପ୍ରମାଣପତ୍ର ଦିଆଯାଇଥିଲା। ସେହିପରି ସଫଳ ମହିଳା ଉଦ୍ୟୋଗୀ ଭାବେ ଉଦାହରଣ ସୃଷ୍ଟି କରିଥିବା ପୁରୀ ଜିଲ୍ଲାର ସୁମିତ୍ରା ସାହୁ, ସସ୍ମିତା ସାହୁ ଏବଂ ମୀନତି ମୁଦୁଲିଙ୍କୁ ବ୍ୟାଙ୍କ ୠଣ ପାଇଁ ଅନୁମତିପତ୍ର ଦିଆଯାଇଥିଲା। ଏହି ଅବସରରେ ୪ ଜଣ ମହିଳା ଉଦ୍ୟୋଗୀ ସେମାନଙ୍କ ବ୍ୟବସାୟ ବିଷୟରେ ବିଶେଷଜ୍ଞଙ୍କ ଆଗରେ ବର୍ଣ୍ଣନା କରିଥିଲେ।
ଏହି ପରାମର୍ଶ ଶିବିରରେ ‘ସ୍ୱକଳ୍ପ’ ଅଧୀନରେ ତାଲିମ ନେଇ ବ୍ୟବସାୟ ସ୍ଥାପନ କରିଥିବା ପୁରୀ ଜିଲ୍ଲାର ୩ ଜଣ ମହିଳା ଉଦ୍ୟୋଗୀ ଭାଗ ନେଇଥିଲେ। ସେମାନେ ନିଜ ନିଜର ଉଦ୍ୟୋଗ ଯାତ୍ରା ବିଷୟରେ କହିଥିଲେ। ଏହି ଅବସରରେ ସେମାନଙ୍କୁ ବ୍ୟାଙ୍କ ୠଣ ପାଇଁ ଅନୁମତିପତ୍ର ଦିଆଯାଇଥିଲା।
କାର୍ଯ୍ୟକ୍ରମରେ ଭାରତୀୟ ଷ୍ଟେଟ ବ୍ୟାଙ୍କ, ୟୁକୋ ବ୍ୟାଙ୍କ ଏବଂ ଓଡ଼ିଶା ଗ୍ରାମ୍ୟ ବ୍ୟାଙ୍କର ଅଧିକାରୀମାନେ ଯୋଗ ଦେଇଥିଲେ। ଏହି ଅବସରରେ ମୁଦ୍ରା ଯୋଜନା ଅଧୀନରେ ୧୧ ଜଣ ମହିଳା ଉଦ୍ୟୋଗୀ ବ୍ୟାଙ୍କ ୠଣ ପାଇଁ ଆବେଦନ କରିଥିଲେ। ସେହିପରି ପ୍ରଧାନମନ୍ତ୍ରୀ ସ୍ୱନିଧି ଯୋଜନାରେ ମିଳୁଥିବା ସୁବିଧା ପାଇବା ପାଇଁ ୫ ଜଣ ପ୍ରାର୍ଥୀ ଆବେଦନ କରିଥିବା ବେଳେ ‘ସ୍ୱୟମ୍’ କାର୍ଯ୍ୟକ୍ରମ ଅଧୀନରେ ୧୧ ଜଣ ପ୍ରାର୍ଥୀ ଆବେଦନ କରିଥିଲେ। ତା’ଛଡ଼ା କେତେକ ମହିଳା ଉଦ୍ୟୋଗୀଙ୍କର ବ୍ୟାଙ୍କ ଆକାଉଣ୍ଟ ମଧ୍ୟ ଖୋଲାଯାଇଥିଲା।
ଏହି କାର୍ଯ୍ୟକ୍ରମରେ ମହିଳା ଉଦ୍ୟୋଗୀମାନେ ଉଦ୍ୟମ ଆଧାର ପଞ୍ଜୀକରଣ, ଏଫଏସଏସଏଆଇ ପଞ୍ଜୀକରଣ ଏବଂ ପ୍ୟାନ୍ କାର୍ଡ ଆବେଦନ ଆଦି ବିଷୟରେ ବିଶେଷ ଧାରଣା ପାଇଥିଲେ।
ସ୍ୱକଳ୍ପ ହେଉଛି ରାଜ୍ୟ ସରକାରଙ୍କର ଏକ ଅଭିନବ କାର୍ଯ୍ୟକ୍ରମ। ଏହା ଅଧୀନରେ ତାଲିମ ନେଇ ଉଦ୍ୟୋଗ ଯାତ୍ରା ଆରମ୍ଭ କରିଥିବା ପ୍ରମୁଖ ଉଦ୍ୟୋଗୀମାନେ ସେମାନଙ୍କ କାହାଣୀ ବର୍ଣ୍ଣନା କରିଥିଲେ।
‘‘ମହିଳା ଉଦ୍ୟୋଗୀମାନଙ୍କୁ ସଶକ୍ତ କରିବା ଲାଗି ଆମର ଯେଉଁ ପ୍ରତିବଦ୍ଧତା ରହିଛି ତାହାକୁ ସାକାର କରିବାରେ ପରାମର୍ଶ ଶିବିର ବିଶେଷ ଭୂମିକା ଗ୍ରହଣ କରୁଛି। ଏଭଳି କାର୍ଯ୍ୟକ୍ରମରେ ଉଦ୍ୟୋଗ ସ୍ଥାପନା ପର୍ଯ୍ୟାୟକୁ ଆସିଥିବା ପ୍ରାର୍ଥୀମାନଙ୍କୁ ଆବଶ୍ୟକ ସହାୟତା ପ୍ରଦାନ କରାଯାଉଛି। ଏଭଳି ସାମୂହିକ ଉଦ୍ୟମ ଫଳରେ ଅଧିକ ମହିଳା ଉଦ୍ୟୋଗ କ୍ଷେତ୍ରକୁ ଆସିବା ସହ ଏକ ପ୍ରଗତିଶୀଳ ସମାଜ ଗଠନ ହୋଇପାରିବ’’, ପରାମର୍ଶ ଶିବିର ଅବସରରେ ଏହା କହିଛନ୍ତି ପାଲାଡିୟମ ଇଣ୍ଡିଆର ନିର୍ଦ୍ଦେଶକ ସନ୍ଦୀପ ଲାଞ୍ଜେୱାର।
ଏହି କାର୍ଯ୍ୟକ୍ରମରେ ବିଶ୍ୱ ଦକ୍ଷତା କେନ୍ଦ୍ରର ଜେନେରାଲ ମ୍ୟାନେଜର ଜିତେନ୍ଦ୍ର ମୋହନ ସାହୁ, ହମାରା ବଚପନ ଟ୍ରଷ୍ଟର କାର୍ଯ୍ୟନିର୍ବାହୀ ନିର୍ଦ୍ଦେଶିକା ଅର୍ପିତା ପଟ୍ଟନାୟକ, ବିଶ୍ୱ ଦକ୍ଷତା କେନ୍ଦ୍ରର ଉପଦେଷ୍ଟା ଜେସଲିନ୍ ଲାଲମୁଆନାମି, ସ୍ବକଳ୍ପର ଟିମ୍ ଲିଡର ତଥା ପାଲାଡିୟମର ସହଯୋଗୀ ନିର୍ଦ୍ଦେଶକ ସୌମେନ୍ଦ୍ର ଚୌଧୁରୀ ପ୍ରମୁଖ ଯୋଗ ଦେଇଥିଲେ।
ଓଡ଼ିଶା ଦକ୍ଷତା ବିକାଶ ପ୍ରାଧୀକରଣ ଅଧୀନରେ ତଥା ବିଶ୍ୱ ଦକ୍ଷତା କେନ୍ଦ୍ର ଦ୍ୱାରା ‘ସ୍ୱକଳ୍ପ’ର ପରିଚାଳନା କରାଯାଉଛି। ସ୍ୱକଳ୍ପ କାର୍ଯ୍ୟକ୍ରମର ମୁଖ୍ୟ ସହଯୋଗୀ ସଂସ୍ଥା ପାଲାଡିୟମ କନସଲ୍ଟିଂ ତଥା ଏହାସହ ଥିବା ଅନ୍ୟତମ ସହଯୋଗୀ ସଂସ୍ଥା ହମାରା ବଚପନ ଟ୍ରଷ୍ଟ ‘ଉଦ୍ୟୋଗୀ ପରାମର୍ଶ ଶିବିର’ର ପରିଚାଳନା କରୁଛନ୍ତି।
‘ସ୍ୱକଳ୍ପ’ ଅଧୀନରେ ପର୍ଯ୍ୟାୟକ୍ରମେ ଓଡ଼ିଶାର ୧୦ ହଜାର ଯୁବକ ଯୁବତୀଙ୍କୁ ଆତ୍ମନିଯୁକ୍ତି ତଥା ଉଦ୍ୟୋଗୀ ଦକ୍ଷତା ବିକାଶ ଲାଗି ତାଲିମ ଦିଆଯାଉଛି। ସେମାନଙ୍କ ମଧ୍ୟରୁ ୧ ହଜାର ବ୍ୟକ୍ତି କିପରି ନିଜ ନିଜ ଅଞ୍ଚଳରେ ବିଭିନ୍ନ ପ୍ରକାର ବ୍ୟବସାୟ ପ୍ରତିଷ୍ଠା କରିପାରିବେ ସେଥିପାଇଁ ଲକ୍ଷ୍ୟ ରଖାଯାଇଛି। ଏହି କାର୍ଯ୍ୟକ୍ରମ ଅଧୀନରେ ବର୍ତ୍ତମାନ ସୁଦ୍ଧା ୨୭ଟି ଜିଲ୍ଲାରୁ ୮ ହଜାର ୮୦୦ ପ୍ରାର୍ଥୀ ପଞ୍ଜୀକରଣ କରିଛନ୍ତି। ସେମାନଙ୍କ ଭିତରେ ଅଛନ୍ତି ୬ ହଜାର ୩୦୦ ମହିଳା ପ୍ରାର୍ଥୀ।
