ଅହମ୍ମଦାବାଦ: ଗୁଜୁରାଟ ବିଧାନସଭା ନିର୍ବାଚନର ଦ୍ୱିତୀୟ ପର୍ଯ୍ୟାୟ ତଥା ଅନ୍ତିମ ପର୍ଯ୍ୟାୟ ପାଇଁ ମତଦାନ ଚାଲିଛି। ପ୍ରଧାନମନ୍ତ୍ରୀ ମୋଦୀ ସାବରମତି ବିଧାନସଭା ଆସନରେ ମଧ୍ୟ ଭୋଟ୍ ଦେଇଛନ୍ତି। ସକାଳ ୮ ଟାରୁ ଭୋଟରଙ୍କ ମଧ୍ୟରେ ଉତ୍ସାହ ଦେଖାଯାଉଛି। ମତଦାନ ବୁଥରେ ସକାଳ ଠାରୁ ଭୋଟରଙ୍କ ଲାମ୍ବା ଧାଡ଼ି ଲାଗିରହିଛି। ଆଜି ଦ୍ୱିତୀୟ ପର୍ଯ୍ୟାୟରେ ରାଜ୍ୟର ୧୪ ଟି ଜିଲ୍ଲାର ୯୩ ଟି ବିଧାନସଭା ଆସନରେ ଅପରାହ୍ନ ୫ ଟା ପର୍ଯ୍ୟନ୍ତ ଭୋଟ୍ ଜାରି ରହିବ।
ଏହାପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଭୋଟ୍ ଦେବାକୁ ଲୋକଙ୍କୁ ନିବେଦନ କରିଛନ୍ତି। ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ମୁଁ ଅନୁରୋଧ କରୁଛି ଯେ ସମସ୍ତ ଲୋକ, ବିଶେଷକରି ଯୁବ ଭୋଟର ଏବଂ ମହିଳା ଭୋଟରମାନେ ବହୁ ସଂଖ୍ୟାରେ ଭୋଟ୍ ଦେବାକୁ ଆସନ୍ତୁ। ଅମିତ ଶାହା ମଧ୍ୟ ଲୋକଙ୍କୁ ଭୋଟ୍ ବିଷୟରେ ଅବଗତ କରାଇ ଗୁଜୁରାଟରେ ଶାନ୍ତି ଏବଂ ସମୃଦ୍ଧି ପାଇଁ ସର୍ବାଧିକ ସଂଖ୍ୟାରେ ଭୋଟ୍ ଦେବାକୁ ନିବେଦନ କରିଛନ୍ତି।
ଦ୍ୱିତୀୟ ପର୍ଯ୍ୟାୟ ବିଷୟରେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଘର ସହର ସାବରମତି ଏବଂ ଗୃହମନ୍ତ୍ରୀ ଅମିତ ଶାହାଙ୍କ ସହର ଅହମ୍ମଦାବାଦରେ ମଧ୍ୟ ମତଦାନ ଚାଲିଛି। ଗୁଜୁରାଟ ନିର୍ବାଚନର ଦ୍ୱିତୀୟ ପର୍ଯ୍ୟାୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଭୋଟ୍ ଦେଇଛନ୍ତି। ଯେତେବେଳେ ପ୍ରଧାନମନ୍ତ୍ରୀ ମୋଦୀ ଅହମ୍ମଦାବାଦ ରାନିପସ୍ଥିତ ନିଶାନ ପବ୍ଲିକ ସ୍କୁଲରେ ପହଞ୍ଚିଲେ, ସେତେବେଳେ ତାଙ୍କୁ ଢୋଲ ବଜାଇ ସ୍ୱାଗତ କରାଯାଇଥିଲା। ପ୍ରଧାନମନ୍ତ୍ରୀଙ୍କୁ ଦେଖିବା ପାଇଁ ଲୋକମାନେ ସକାଳୁ ଏଠାରେ ଏକତ୍ରିତ ହୋଇଥିଲେ। ଗୁଜୁରାଟରେ ଗୃହମନ୍ତ୍ରୀ ଅମିତ ଶାହା ମଧ୍ୟ ଉପସ୍ଥିତ ଅଛନ୍ତି ଏବଂ ସେ ମଧ୍ୟ ଭୋଟ୍ ଦେଇଛନ୍ତି।
