Tag: ଅନ୍ନପୂର୍ଣ୍ଣା ଦେବୀ

ନୂଆଦିଲ୍ଲୀ: ପଞ୍ଚାୟତିରାଜ ମନ୍ତ୍ରଣାଳୟ ପକ୍ଷରୁ ପଞ୍ଚାୟତିରାଜ ଅନୁଷ୍ଠାନର ନିର୍ବାଚିତ ମହିଳା ପ୍ରତିନିଧି ମାନଙ୍କର ଏକ ଜାତୀୟ କର୍ମଶାଳା ଆୟୋଜନ କରାଯାଉଛି , ଯେଉଁଥିରେ ଆସନ୍ତା ମାର୍ଚ୍ଚ ୪ ତାରିଖରେ ନୂଆଦିଲ୍ଲୀସ୍ଥିତ ବିଜ୍ଞାନ ଭବନ ଠାରେ “ସଶକ୍ତ ପଞ୍ଚାୟତ- ନେତ୍ରୀ ଅଭିଯାନ” ର ଶୁଭାରମ୍ଭ କରାଯିବ। ଏହି ଅବସରରେ କେନ୍ଦ୍ର ପଞ୍ଚାୟତିରାଜ ମନ୍ତ୍ରୀ ରାଜୀବ ରଞ୍ଜନ ସିଂହ ଓରଫ ଲଲନ ସିଂହ, କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ଅନ୍ନପୂର୍ଣ୍ଣା ଦେବୀ, କେନ୍ଦ୍ର ପଞ୍ଚାୟତିରାଜ ରାଷ୍ଟ୍ରମନ୍ତ୍ରୀ ପ୍ରଫେସର ଏସ୍ ପି ସିଂହ ବାଘେଲ ଏବଂ କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ରାଷ୍ଟ୍ରମନ୍ତ୍ରୀ ଶ୍ରୀମତୀ ନିଖିଲ ଖଡ଼ସେ, ପଞ୍ଚାୟତିରାଜ ମନ୍ତ୍ରଣାଳୟର ସଚିବ ବିବେକ ଭରଦ୍ୱାଜ, ପଞ୍ଚାୟତିରାଜ ମନ୍ତ୍ରଣାଳୟର ଅତିରିକ୍ତ ଶାସନ ସଚିବ ସୁଶୀଲ କୁମାର ଲୋହାନୀଙ୍କ ସମେତ ବିଭିନ୍ନ ମନ୍ତ୍ରଣାଳୟ/ ବିଭାଗ, ଏସଆଇଆରଡି ଏବଂ ପିଆର ଏବଂ ୟୁଏନ୍ଏଫପିଏ, ଟିଆରଆଇଏଫ୍ ଭଳି ଅନ୍ତର୍ଜାତୀୟ ସଂଗଠନର ପ୍ରତିନିଧିମାନେ ମଧ୍ୟ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିବେ।

ସଶକ୍ତ ପଞ୍ଚାୟତ – ନେତ୍ରୀ ଅଭିଯାନ ଏକ ରଣନୈତିକ ପଦକ୍ଷେପ , ଯାହାର ଉଦ୍ଦେଶ୍ୟ ହେଉଛି ସମଗ୍ର ଦେଶରେ ପଞ୍ଚାୟତିରାଜ ଅନୁଷ୍ଠାନର ନିର୍ବାଚିତ ମହିଳା ପ୍ରତିନିଧିମାନଙ୍କ ପାଇଁ କ୍ଷମତା ବୃଦ୍ଧି ହସ୍ତକ୍ଷେପକୁ ସୁଦୃଢ଼ କରିବା। ଏଥିରେ ସେମାନଙ୍କ ନେତୃତ୍ୱ ଦକ୍ଷତାକୁ ସୁଦୃଢ଼ କରିବା, ନିଷ୍ପତ୍ତି ନେବାର କ୍ଷମତା ବୃଦ୍ଧି ଏବଂ ତୃଣମୂଳ ଶାସନରେ ସେମାନଙ୍କ ଭୂମିକାକୁ ସୁଦୃଢ଼ କରିବା ଉପରେ ଗୁରୁତ୍ୱ ଦିଆଯାଇଛି। ଗ୍ରାମୀଣ ସ୍ଥାନୀୟ ଶାସନରେ ମହିଳା ନିର୍ବାଚିତ ପ୍ରତିନିଧିଙ୍କ ଗୁରୁତ୍ୱପୂର୍ଣ୍ଣ ଭୂମିକାକୁ ସ୍ୱୀକାର କରି ପଞ୍ଚାୟତିରାଜ ମନ୍ତ୍ରଣାଳୟ ସେମାନଙ୍କ ନେତୃତ୍ୱ ବୃଦ୍ଧି କରିବା ଏବଂ ନିଷ୍ପତ୍ତି ନେବାରେ ସେମାନଙ୍କ ସକ୍ରିୟ ଅଂଶଗ୍ରହଣ ସୁନିଶ୍ଚିତ କରିବା ପାଇଁ ଏକ ରଣନୀତିକ ରୋଡମ୍ୟାପ୍ ପ୍ରସ୍ତୁତ କରିଛି। ଆନ୍ତର୍ଜାତିକ ମହିଳା ଦିବସ ପୂର୍ବରୁ ପ୍ରଥମ ଥର ପାଇଁ ପଞ୍ଚାୟତିରାଜ ଅନୁଷ୍ଠାନ (ପିଆରଆଇ)ର ତିନୋଟି ସ୍ତରରୁ ନିର୍ବାଚିତ ମହିଳା ପ୍ରତିନିଧିମାନେ ଏକ ଜାତୀୟ ମଞ୍ଚରେ ଏକାଠି ହୋଇ ଅର୍ଥପୂର୍ଣ୍ଣ ଓ କାର୍ଯ୍ୟଭିତ୍ତିକ ଆଲୋଚନା କରିବେ।

ଏହି ଐତିହାସିକ କାର୍ଯ୍ୟକ୍ରମରେ ବିଭିନ୍ନ ପୃଷ୍ଠଭୂମିରୁ ଆସିଥିବା ୧୨୦୦ରୁ ଅଧିକ ପଞ୍ଚାୟତ ମହିଳା ନେତ୍ରୀ ଅଂଶଗ୍ରହଣ କରିବେ। ଏହି କାର୍ଯ୍ୟକ୍ରମର ଏକ ପ୍ରମୁଖ ଆକର୍ଷଣ ହେବ ବିଭିନ୍ନ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳର ପଂଚାୟତ ଗୁଡିକର ବିଶିଷ୍ଟ ମହିଳା ନେତ୍ରୀମାନଙ୍କୁ ସମ୍ବର୍ଦ୍ଧିତ କରିବା , ଯେଉଁମାନେ ଗ୍ରାମୀଣ ସ୍ଥାନୀୟ ସ୍ୱୟଂ ଶାସନରେ ଉଦାହରଣମୂଳକ କାର୍ଯ୍ୟ ପ୍ରଦର୍ଶନ କରିଛନ୍ତି। ଏହି କର୍ମଶାଳାରେ ମହିଳା ନିର୍ବାଚିତ ପ୍ରତିନିଧିମାନଙ୍କ ଦକ୍ଷତା ବୃଦ୍ଧି ପାଇଁ ନିର୍ଦ୍ଦିଷ୍ଟ ପ୍ରଶିକ୍ଷଣ ମଡ୍ୟୁଲ୍ ର ଶୁଭାରମ୍ଭ କରାଯିବା ସହ ପଞ୍ଚାୟତ ନିର୍ବାଚିତ ପ୍ରତିନିଧିମାନଙ୍କ ପାଇଁ ଲିଙ୍ଗଭିତ୍ତିକ ହିଂସା ଏବଂ ହାନିକାରକ ଅଭ୍ୟାସକୁ ଦୃଷ୍ଟିରେ ରଖି ପ୍ରସ୍ତୁତ ଆଇନ ଉପରେ ଏକ ପ୍ରାଥମିକ ତାଲିମ ମଡ୍ୟୁଲ୍ ର ଶୁଭାରମ୍ଭ କରାଯିବ।

ଜାତୀୟ କର୍ମଶାଳାରେ ସ୍ଥାନୀୟ ଶାସନରେ ମହିଳା ମାନଙ୍କର ଭାଗୀଦାରୀକୁ ସମ୍ବୋଧିତ କରୁଥିବା ଗୁରୁତ୍ୱପୂର୍ଣ୍ଣ ବିଷୟବସ୍ତୁ ଯଥା ” ପିଆରଆଇରେ ମହିଳାଙ୍କ ଭାଗୀଦାରୀ ଏବଂ ନେତୃତ୍ୱ : ସ୍ଥାନୀୟ ସ୍ୱୟଂ ଶାସନରେ ଗତିଶୀଳତା ପରିବର୍ତ୍ତନ ” ଉପରେ ସତର୍କତାର ସହ ପ୍ରସ୍ତୁତ ପ୍ୟାନେଲ ଆଲୋଚନା ହେବ, ଯେଉଁଥିରେ ମହିଳା ପ୍ରତିନିଧିତ୍ୱ କିପରି ଗ୍ରାମୀଣ ଶାସନ ଢାଞ୍ଚାକୁ ନୂତନ ରୂପ ଦେଉଛି ଏବଂ ” ମହିଳା ନେତୃତ୍ୱାଧୀନ ସ୍ଥାନୀୟ ଶାସନ: ଡବ୍ଲ୍ୟୁଇଆର ଦ୍ୱାରା କ୍ଷେତ୍ରୀୟ ହସ୍ତକ୍ଷେପ” ବିଷୟରେ ଅନୁଧ୍ୟାନ କରାଯିବ, ଯେଉଁଥିରେ  ସ୍ୱାସ୍ଥ୍ୟ ଓ ପୁଷ୍ଟି, ଶିକ୍ଷା, ମହିଳା ଓ ବାଳିକାଙ୍କ ସୁରକ୍ଷା, ଅର୍ଥନୈତିକ ସୁଯୋଗ ଏବଂ ଡିଜିଟାଲ ରୂପାନ୍ତର ଭଳି ଗୁରୁତ୍ୱପୂର୍ଣ୍ଣ କ୍ଷେତ୍ରକୁ ଅନ୍ତର୍ଭୁକ୍ତ କରାଯାଇଛି।

ଏହି ଆଲୋଚନାରେ ଜଳସମ୍ପଦ , ନଦୀ ଉନ୍ନୟନ ଓ ଗଙ୍ଗା ପୁନରୁଦ୍ଧାର ବିଭାଗ ସଚିବ ଶ୍ରୀମତୀ ଦେବଶ୍ରୀ ମୁଖାର୍ଜୀ ଏବଂ ପଶୁପାଳନ ଓ ଦୁଗ୍ଧ ଉତ୍ପାଦନ ବିଭାଗ ସଚିବ ଶ୍ରୀମତୀ ଅଳକା ଉପାଧ୍ୟାୟଙ୍କ ପରି ବରିଷ୍ଠ ଅଧିକାରୀ ଅଧ୍ୟକ୍ଷତା କରିବା ସହିତ , ଏହି ଗୁରୁତ୍ୱପୂର୍ଣ୍ଣ ଆଲୋଚନାରେ ଉଚ୍ଚସ୍ତରୀୟ ଦକ୍ଷତା ଆଣିବେ। ୟୁଏନ୍ଏଫପିଏ ପକ୍ଷରୁ ଆୟୋଜିତ ମହିଳାଙ୍କ ସଫଳତା ଓ ନମନୀୟତାକୁ ନେଇ ଆୟୋଜିତ ସାଂସ୍କୃତିକ କାର୍ଯ୍ୟକ୍ରମ ଜାତୀୟ କର୍ମଶାଳାରେ ଏକ ଜୀବନ୍ତ ଦିଗ ଯୋଡ଼ିବ, ଯେଉଁଥିରେ ସମାଜ ପ୍ରତି ମହିଳାଙ୍କ ଅବଦାନକୁ ସମ୍ମାନିତ କରୁଥିବା ସମୃଦ୍ଧ ସାଂସ୍କୃତିକ ଐତିହ୍ୟକୁ ପ୍ରଦର୍ଶିତ କରାଯିବ।

ଏହି ଜାତୀୟ କର୍ମଶାଳା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୃଷ୍ଟିକୋଣ ସହିତ ଯୋଡ଼ି ହୋଇଛି, ଯାହା ସମ୍ପର୍କରେ ‘ମନ୍ କି ବାତ୍’ ର ୧୧୯ତମ ଏପିସୋଡ୍ ରେ ଆଲୋକପାତ କରାଯାଇଛି, ଯେଉଁଥିରେ ରାଷ୍ଟ୍ର ନିର୍ମାଣରେ ‘ନାରୀ ଶକ୍ତି’ର ଭୂମିକା ଉପରେ ଗୁରୁତ୍ୱାରୋପ କରାଯାଇଛି। ଦେଶରେ ମହିଳା ଓ ବାଳିକାମାନଙ୍କ ସମୃଦ୍ଧି ପାଇଁ ଅନୁକୂଳ ପରିବେଶ ସୁନିଶ୍ଚିତ କରି ସୁରକ୍ଷିତ, ସମାବେଶୀ, ଲିଙ୍ଗ ସମ୍ବେଦନଶୀଳ ଏବଂ ସାମାଜିକ ଭାବେ ନ୍ୟାୟସମ୍ପନ୍ନ ଗ୍ରାମ ପଞ୍ଚାୟତ ଗଠନ ଦିଗରେ ସରକାରଙ୍କ ସମର୍ପଣକୁ ଏହି ପଦକ୍ଷେପ ପ୍ରତିଫଳିତ କରୁଛି।

ନୂଆଦିଲ୍ଲୀ: କେନ୍ଦ୍ର ଗ୍ରାମ୍ୟ ଉନ୍ନୟନ ଏବଂ କୃଷି ଓ କୃଷକ କଲ୍ୟାଣ ମନ୍ତ୍ରୀ ଶିବରାଜ ସିଂ ଚୌହାନ ୨୫, ନଭେମ୍ବର ୨୦୨୪ରେ ନୂଆଦିଲ୍ଲୀର ସଂସଦ ମାର୍ଗସ୍ଥିତ ଆକାଶବାଣୀ ରଙ୍ଗଭବନ ଅଡିଟୋରିୟମରେ ଲିଙ୍ଗଭିତ୍ତିକ ହିଂସା ବିରୋଧରେ ଏକ ଜାତୀୟ ଅଭିଯାନ ‘ନଇ ଚେତନା- ପହଲ ବଦଲାଓ କୀ’ର ତୃତୀୟ ସଂସ୍କରଣକୁ  ଶୁଭାରମ୍ଭ କରିବେ। ଲିଙ୍ଗଭିତ୍ତିକ ହିଂସାକୁ ଦୂର କରିବା ପାଇଁ ସରକାରଙ୍କ ମିଳିତ ପ୍ରୟାସରେ କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ଶ୍ରୀମତୀ ଅନ୍ନପୂର୍ଣ୍ଣା ଦେବୀ ମଧ୍ୟ ଏହି କାର୍ଯ୍ୟକ୍ରମରେ ଯୋଗଦେବେ।

ଗ୍ରାମ୍ୟ ଉନ୍ନୟନ ମନ୍ତ୍ରଣାଳୟ ତତ୍ତ୍ୱାବଧାନରେ ଦୀନଦୟାଲ ଅନ୍ତ୍ୟୋଦୟ ଯୋଜନା- ଜାତୀୟ ଗ୍ରାମୀଣ ଜୀବିକା ମିଶନ (ଡିଏୱାଇ-ଏନଆରଏଲଏମ) ଦ୍ୱାରା ଆୟୋଜିତ ଏହି ଅଭିଯାନ ୨୩ ଡିସେମ୍ବର ୨୦୨୪ ପର୍ଯ୍ୟନ୍ତ ସମସ୍ତ ଭାରତୀୟ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳରେ ଚାଲିବ। ଡିଏୱାଇ-ଏନଆରଏଲଏମର ବ୍ୟାପକ ସ୍ୱୟଂ ସହାୟକ ଗୋଷ୍ଠୀ (ଏସଏଚଜି) ନେଟୱର୍କ ନେତୃତ୍ୱରେ ଏହି ପଦକ୍ଷେପ ଜନ ଆନ୍ଦୋଳନର ଭାବନାକୁ ପ୍ରତିଫଳିତ କରୁଛି।

ଏହି ଅଭିଯାନ “ସମଗ୍ର ସରକାରୀ” ଆଭିମୁଖ୍ୟର ଭାବନାରେ ଏକ ସହଯୋଗୀ ପ୍ରୟାସ ଏବଂ ଏଥିରେ ମହିଳା ଓ ଶିଶୁ ବିକାଶ ମନ୍ତ୍ରଣାଳୟ, ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ, ବିଦ୍ୟାଳୟ ଶିକ୍ଷା ଓ ସାକ୍ଷରତା ବିଭାଗ, ଗୃହ ମନ୍ତ୍ରଣାଳୟ, ପଞ୍ଚାୟତିରାଜ ମନ୍ତ୍ରଣାଳୟ, ସାମାଜିକ ନ୍ୟାୟ ଏବଂ ସଶକ୍ତୀକରଣ ମନ୍ତ୍ରଣାଳୟ, ଯୁବ ବ୍ୟାପାର ଏବଂ କ୍ରୀଡ଼ା ମନ୍ତ୍ରଣାଳୟ, ସୂଚନା ଓ ପ୍ରସାରଣ ମନ୍ତ୍ରଣାଳୟ ଏବଂ ନ୍ୟାୟ ବିଭାଗ ଭଳି ୯ଟି ମନ୍ତ୍ରଣାଳୟ/ବିଭାଗ ଅଂଶଗ୍ରହଣ କରିବେ।

ନଇ ଚେତନା ଅଭିଯାନର ଉଦ୍ଦେଶ୍ୟ ହେଉଛି ସଚେତନତା ବୃଦ୍ଧି କରିବା ଏବଂ ତୃଣମୂଳ ସ୍ତରୀୟ ପଦକ୍ଷେପ ମାଧ୍ୟମରେ ଲିଙ୍ଗ ଭିତ୍ତିକ ହିଂସା ବିରୋଧରେ ସଚେତନ କାର୍ଯ୍ୟାନୁଷ୍ଠାନ ଗ୍ରହଣ କରିବା। ଆରମ୍ଭରୁ ନଇ ଚେତନା ଦେଶବ୍ୟାପୀ ଲକ୍ଷ ଲକ୍ଷ ଲୋକଙ୍କୁ ଏକାଠି କରିଛି, ଲିଙ୍ଗଗତ ସମାନତା ଏବଂ ମହିଳା ସଶକ୍ତୀକରଣ ପାଇଁ ଏକ ଗୁରୁତ୍ୱପୂର୍ଣ୍ଣ ଆନ୍ଦୋଳନକୁ ପ୍ରୋତ୍ସାହିତ କରିଛି। ଏହାର ପ୍ରଥମ ସଂସ୍କରଣରେ ୩.୫ କୋଟି ଲୋକ ଯୋଗ ଦେଇଥିବା ବେଳେ ନଇ ଚେତନା ୨.୦ରେ ୩୧ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ୫.୫ କୋଟି ଅଂଶଗ୍ରହଣକାରୀ ସାମିଲ ହୋଇଥିଲେ। ଦ୍ବିତୀୟ ପର୍ଯ୍ୟାୟରେ ଦେଶବ୍ୟାପୀ ଲିଙ୍ଗଭିତ୍ତିକ ହିଂସା ଉପରେ ୯ ଲକ୍ଷରୁ ଅଧିକ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।

‘ନଇ ଚେତନା ୩.୦’ର ଉଦ୍ଦେଶ୍ୟ ଗୁଡ଼ିକ ହେଲା ସମସ୍ତ ପ୍ରକାର ଲିଙ୍ଗଭିତ୍ତିକ ହିଂସା ବିଷୟରେ ସଚେତନତା ସୃଷ୍ଟି କରିବା, ଜନସମାଜକୁ ମୁହଁ ଖୋଲିବା ଏବଂ କାର୍ଯ୍ୟାନୁଷ୍ଠାନ ଦାବି କରିବାକୁ ଉତ୍ସାହିତ କରିବା, ଠିକ୍ ସମୟରେ ସହାୟତା ପାଇଁ ସହାୟତା ବ୍ୟବସ୍ଥା ଉପଲବ୍ଧ କରାଇବା ଏବଂ ସ୍ଥାନୀୟ ଅନୁଷ୍ଠାନଗୁଡ଼ିକୁ ହିଂସା ବିରୁଦ୍ଧରେ ନିର୍ଣ୍ଣାୟକ ଭାବରେ କାର୍ଯ୍ୟ କରିବା ନିମନ୍ତେ ସଶକ୍ତ କରିବା। ଏହି ଅଭିଯାନର ବାର୍ତ୍ତା,”ଏକ ସାଥ, ଏକ ଆୱାଜ, ହିଂସା କେ ଖିଲାଫ” ସମଗ୍ର ସମାଜ ଏବଂ ସମଗ୍ର ସରକାରୀ ଆଭିମୁଖ୍ୟ ଗ୍ରହଣ କରି ସମନ୍ୱିତ ପ୍ରୟାସ ମାଧ୍ୟମରେ ସାମୂହିକ ପଦକ୍ଷେପ ନେବାର ଆହ୍ୱାନକୁ ପ୍ରତିଫଳିତ କରେ।

ମହିଳାଙ୍କ ନେତୃତ୍ୱାଧୀନ ବିକାଶ ଉପରେ ଗୁରୁତ୍ୱ ଦେଇ ପ୍ରଧାନମନ୍ତ୍ରୀଙ୍କ ବିକଶିତ ଭାରତ ସ୍ୱପ୍ନକୁ ସାକାର କରିବା ପାଇଁ ମହିଳା ଓ ଶିଶୁ ବିକାଶ ମନ୍ତ୍ରଣାଳୟ (ଏମଡବ୍ଲୁସିଡି) ୨୦୨୪ ଜୁନରୁ ଅଗଷ୍ଟ ମଧ୍ୟରେ ଅନେକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ହାସଲ କରିଛି।

ରଣନୈତିକ ପଦକ୍ଷେପ ଏବଂ ଅଭିନବ କାର୍ଯ୍ୟକ୍ରମ ମାଧ୍ୟମରେ ମନ୍ତ୍ରଣାଳୟ ମହିଳା ସଶକ୍ତୀକରଣ, ଶିଶୁ କଲ୍ୟାଣ ସୁନିଶ୍ଚିତ କରିବା ଏବଂ ସମସ୍ତଙ୍କ ପାଇଁ ସୁଯୋଗ ବୃଦ୍ଧି ପାଇଁ ଢାଞ୍ଚାକୁ ସୁଦୃଢ଼ କରିବା ଜାରି ରଖିଛି।

ସବୁଠାରୁ ଉଲ୍ଲେଖନୀୟ ସଫଳତା ହେଉଛି ୨୯ ଅଗଷ୍ଟ ୨୦୨୪ରେ ସି-ବକ୍ସ ଶୁଭାରମ୍ଭ ହେବା, ଯାହା ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ। ଏହି ଆଇଟି ପ୍ଲାଟଫର୍ମ କର୍ମକ୍ଷେତ୍ରରେ ଯୌନ ନିର୍ଯାତନା ଅଭିଯୋଗର ସମାଧାନ ପ୍ରକ୍ରିୟାକୁ ସରଳ କରିଥାଏ, ଯାହା ଦ୍ୱାରା ମହିଳାମାନେ ଅଭିଯୋଗ ଦାଖଲ କରିପାରିବେ ଏବଂ ଟ୍ରାକ୍ କରିପାରିବେ। ସମଗ୍ର ଦେଶରେ ସୁରକ୍ଷିତ କାର୍ଯ୍ୟ ପରିବେଶକୁ ପ୍ରୋତ୍ସାହିତ କରିବା ଦିଗରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ।

ପ୍ରାରମ୍ଭିକ ଶିଶୁଯତ୍ନ ଏବଂ ଶିକ୍ଷାର ଲକ୍ଷ୍ୟକୁ ଆଗକୁ ବଢ଼ାଇ ମନ୍ତ୍ରଣାଳୟ ୨୦୨୯ ସୁଦ୍ଧା ସମଗ୍ର ଭାରତରେ ଅଙ୍ଗନୱାଡି-କମ୍-କ୍ରେଚ୍ କେନ୍ଦ୍ର ପ୍ରତିଷ୍ଠା ଦିଗରେ କାର୍ଯ୍ୟ କରୁଛି, ଯାହା ଲକ୍ଷ ଲକ୍ଷ ପରିବାରକୁ ଉପକୃତ କରିବ । ଏହି କେନ୍ଦ୍ରଗୁଡିକ ସାମଗ୍ରିକ ଶିଶୁ ଯତ୍ନ ଏବଂ ଶିକ୍ଷା ସେବା ପ୍ରଦାନ କରିବ, ଶିଶୁ ବିକାଶର ମୂଳ ସ୍ତମ୍ଭ ଗୁଡ଼ିକୁ ଯଥେଷ୍ଟ ସୁଦୃଢ଼ କରିବ ଏବଂ ମହିଳାଙ୍କ ଶ୍ରମଶକ୍ତି ଅଂଶଗ୍ରହଣ ବୃଦ୍ଧି କରିବ ।

ଏହାବ୍ୟତୀତ ମନ୍ତ୍ରଣାଳୟ ୧୦,୦୦୦ ସକ୍ଷମ ଅଙ୍ଗନୱାଡିର ଉନ୍ନତିକରଣ, ଟେକ୍-ହୋମ୍ ରାସନ ବିତରଣ ଉପରେ ନଜର ରଖିବା ପାଇଁ ଏକ ଦୁଇ-ଫାକ୍ଟର ପ୍ରମାଣୀକରଣ ବ୍ୟବସ୍ଥା କାର୍ଯ୍ୟକାରୀ କରିବା ଏବଂ ଦେଶବ୍ୟାପୀ ପୋଷଣ ଫଳାଫଳରେ ଉନ୍ନତି ଆଣିବା ଉପରେ ଗୁରୁତ୍ୱ ଦେଉଛି । ଏହି ପରିପ୍ରେକ୍ଷୀରେ ମହିଳା ଓ କିଶୋରୀମାନଙ୍କ ମଧ୍ୟରେ ରକ୍ତହୀନତା ବିଷୟରେ ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ସେପ୍ଟେମ୍ବର ୧, ୨୦୨୪ରେ ସପ୍ତମ ରାଷ୍ଟ୍ରୀୟ ପୋଷଣ ମାସ ଆରମ୍ଭ ହୋଇଥିଲା। ଏହି ପଦକ୍ଷେପ ପରିପୂରକ ପୋଷଣ, ଅଭିବୃଦ୍ଧି, ବିକାଶ ଏବଂ ପ୍ରାରମ୍ଭିକ ଶୈଶବ ଯତ୍ନ ଏବଂ ଶିକ୍ଷା ବିଷୟରେ ସଚେତନତାକୁ ପ୍ରୋତ୍ସାହିତ କରେ।

ରାଞ୍ଚିରେ ଗଣମାଧ୍ୟମ ସହ ଆଲୋଚନା ସମୟରେ ମନ୍ତ୍ରଣାଳୟର ଅଗ୍ରଗତି ବିଷୟରେ ସୂଚନା ଦେଇ ମନ୍ତ୍ରୀ ଶ୍ରୀମତୀ ଅନ୍ନପୂର୍ଣ୍ଣା ଦେବୀ କହିଥିଲେ ଯେ ଏହି ଉପଲବ୍ଧି ଗୁଡ଼ିକ ଏକ ଭବିଷ୍ୟତ ଗଠନ ପାଇଁ ଆମର ଅତୁଟ ପ୍ରତିବଦ୍ଧତାକୁ ଦର୍ଶାଉଛି ଯେଉଁଠାରେ ମହିଳାମାନେ ଭାରତର ଅଭିବୃଦ୍ଧି କାହାଣୀକୁ ଆକାର ଦେବାରେ ନେତୃତ୍ୱ ନେବେ । ପ୍ରତ୍ୟେକ ପଦକ୍ଷେପ ସହିତ ଆମେ ମହିଳାମାନଙ୍କୁ ସଶକ୍ତ କରୁଛୁ, ପିଲାମାନଙ୍କୁ ପୋଷଣ କରୁଛୁ ଏବଂ ପ୍ରଧାନମନ୍ତ୍ରୀଙ୍କ ବିକଶିତ ଭାରତ ପରିକଳ୍ପନା ସହିତ ଏହି ମାର୍ଗ ସୃଷ୍ଟି କରୁଛୁ । ଭାରତର ପ୍ରତ୍ୟେକ ମହିଳା ଏବଂ ଶିଶୁଙ୍କୁ ଆଗକୁ ବଢିବାର ସୁଯୋଗ ମିଳିବା ସୁନିଶ୍ଚିତ କରିବା ପାଇଁ ଆମେ ଉତ୍ସର୍ଗୀକୃତ ।

ନୂତନ କର୍ମଜୀବୀ ମହିଳା ହଷ୍ଟେଲ ପ୍ରତିଷ୍ଠା, ଯୁବତୀମାନଙ୍କ ପାଇଁ ଦକ୍ଷତା ବିକାଶ ଯୋଜନା ଏବଂ ମହିଳା ସଶକ୍ତୀକରଣ ଉଦ୍ଦେଶ୍ୟରେ ଅନ୍ୟାନ୍ୟ ପଦକ୍ଷେପ ମାଧ୍ୟମରେ ମହିଳାଙ୍କ ଗତିଶୀଳତା ଏବଂ ଅର୍ଥନୈତିକ ସ୍ୱାଧୀନତା ବୃଦ୍ଧି କରିବାକୁ ମନ୍ତ୍ରଣାଳୟ ପ୍ରତିଶ୍ରୁତିବଦ୍ଧ। ମନ୍ତ୍ରଣାଳୟର ପ୍ରତ୍ୟେକ ସଫଳତା ପ୍ରଧାନମନ୍ତ୍ରୀଙ୍କ ମହିଳା ନେତୃତ୍ବାଧୀନ ପ୍ରଗତି ଏବଂ ବିକଶିତ ଭାରତ ପରିକଳ୍ପନାକୁ ସାକାର କରିବା ଦିଗରେ ସହାୟକ ହୋଇଥାଏ।

ନୂଆଦିଲ୍ଲୀ: ଆଜି ଗୁଜରାଟର ଗାନ୍ଧୀନଗରସ୍ଥିତ ମହାତ୍ମା ମନ୍ଦିରରୁ ସପ୍ତମ ରାଷ୍ଟ୍ରୀୟ ପୋଷଣ ମାସର ଶୁଭାରମ୍ଭ କରାଯାଇଛି। ସମଗ୍ର ଦେଶରେ ପୋଷଣ ସମ୍ବନ୍ଧୀୟ ସଚେତନତା ଏବଂ ସୁସ୍ଥତାକୁ ପ୍ରୋତ୍ସାହିତ କରିବା ଉପରେ ଆଧାରିତ ଏହି କାର୍ଯ୍ୟକ୍ରମରେ କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ଶ୍ରୀମତୀ ଅନ୍ନପୂର୍ଣ୍ଣା ଦେବୀ, ଗୁଜରାଟର ମୁଖ୍ୟମନ୍ତ୍ରୀ ଭୂପେନ୍ଦ୍ରଭାଇ ପଟେଲ, ଗୁଜରାଟ ସରକାରଙ୍କ ମହିଳା ଓ ଶିଶୁ ବିକାଶ ମନ୍ତ୍ରୀ ଶ୍ରୀମତୀ ଭାନୁବେନ ବାବରିଆ, ଭାରତ ସରକାର ଏବଂ ଗୁଜରାଟ ରାଜ୍ୟ ସରକାରଙ୍କ ବରିଷ୍ଠ ଅଧିକାରୀ ଏବଂ ଅନ୍ୟ ମାନ୍ୟଗଣ୍ୟ ବ୍ୟକ୍ତିମାନେ ଉପସ୍ଥିତ ଥିଲେ।

ପୂର୍ବାହ୍ନ ୧୦ଟାରୁ ସାଢ଼େ ୧୧ଟା ପର୍ଯ୍ୟନ୍ତ ‘ଏକ ପେଡ଼ ମା କେ ନାମ’ ଅଭିଯାନ ଅଧୀନରେ ଦେଶବ୍ୟାପୀ ବୃକ୍ଷରୋପଣ ଅଭିଯାନରୁ କାର୍ଯ୍ୟକ୍ରମ ଆରମ୍ଭ ହୋଇଥିଲା।ଗୁଜରାଟ ଶିଶୁ ବିକାଶ ମନ୍ତ୍ରୀ ଏବଂ ବରିଷ୍ଠ ଅଧିକାରୀଙ୍କ ସହ ମିଶି କେନ୍ଦ୍ର ମନ୍ତ୍ରୀ ଗାନ୍ଧୀନଗରସ୍ଥିତ ଏକ ଅଙ୍ଗନବାଡ଼ି କେନ୍ଦ୍ରରେ ଏହି ଅଭିଯାନର ନେତୃତ୍ୱ ନେଇଥିଲେ ଏବଂ ପୁଷ୍ଟିସାଧନ ଓ ପରିବେଶ ସ୍ଥାୟୀତ୍ୱର ଗୁରୁତ୍ୱର ପ୍ରତୀକ ସ୍ୱରୂପ ଫଳ ଗଛ ରୋପଣ କରିଥିଲେ।

ମୁଖ୍ୟ କାର୍ଯ୍ୟକ୍ରମ ମହାତ୍ମା ମନ୍ଦିରରେ ଅନୁଷ୍ଠିତ ହୋଇଥିଲା। ମୁଖ୍ୟ ଅତିଥି ଭାବେ ଗୁଜରାଟ ମୁଖ୍ୟମନ୍ତ୍ରୀ ଦୀକ୍ଷାନ୍ତ ଭାଷଣ ଦେଇଥିଲେ। ଏହି ଅବସରରେ ଶ୍ରୀ ଭୂପେନ୍ଦ୍ରଭାଇ ପଟେଲ ଦେଶର ବିକାଶ ପାଇଁ ଦୃଢ଼ ଓ ସୁସ୍ଥ ମାନବ ସମ୍ବଳ ନିର୍ମାଣରେ ପୋଷଣର ଗୁରୁତ୍ୱ ଉପରେ ଗୁରୁତ୍ୱାରୋପ କରିଥିଲେ ।

କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ଶ୍ରୀମତୀ ଅନ୍ନପୂର୍ଣ୍ଣା ଦେବୀ ତାଙ୍କ ଅଭିଭାଷଣରେ ଶିଶୁ ଓ କିଶୋରଙ୍କ ଉନ୍ନତ ସ୍ୱାସ୍ଥ୍ୟ ସୁନିଶ୍ଚିତ କରିବା ଏବଂ ଜୀବନଚର୍ଯ୍ୟା ଆଭିମୁଖ୍ୟ ଉପରେ ଗୁରୁତ୍ୱ ଦେଇ ପୁଷ୍ଟିହୀନତାର ମୁକାବିଲା ଉପରେ ଗୁରୁତ୍ୱାରୋପ କରିଥିଲେ । ସୁଶାସନ, ସମନ୍ୱୟ, ଦକ୍ଷତା ବୃଦ୍ଧି, ଗୋଷ୍ଠୀ ଅଂଶଗ୍ରହଣ ଏବଂ ମାଲିକାନା ଭଳି ଚାରୋଟି ସ୍ତମ୍ଭ ଉପରେ ସେ ଗୁରୁତ୍ୱାରୋପ କରିଥିଲେ, ଯାହା ଉପରେ ପୋଷଣ ୨.୦ର ସଫଳତା ନିର୍ଭର କରେ ।

ଭାରତ ସରକାରଙ୍କ ମହିଳା ଓ ଶିଶୁ ବିକାଶ ମନ୍ତ୍ରଣାଳୟର ସଚିବ ଶ୍ରୀ ଅନୀଲ ମଲ୍ଲିକ ମଧ୍ୟ ଏହି ସଭାରେ ଉଦବୋଧନ ଦେଇ ଖାଦ୍ୟ ବିବିଧତାକୁ ପ୍ରୋତ୍ସାହିତ କରିବା ସହ ଦୈନନ୍ଦିନ ଖାଦ୍ୟରେ ସ୍ଥାନୀୟ ସ୍ତରରେ ଉତ୍ପାଦିତ ସୁସ୍ଥ ଖାଦ୍ୟକୁ ଅନ୍ତର୍ଭୁକ୍ତ କରିବାର ଗୁରୁତ୍ୱ ଉପରେ ବକ୍ତବ୍ୟ ରଖିଥିଲେ।

ଗର୍ଭବତୀ ଓ ସ୍ତନ୍ୟପାନ କରାଉଥିବା ମା’ମାନଙ୍କ ପାଇଁ ପୋଷଣ ଝୁଡ଼ି ଯୋଗାଇ ଦିଆଯାଇଥିଲା ଏବଂ ଶିଶୁମାନଙ୍କ ପାଇଁ ଅନ୍ନପ୍ରାସନ କରାଯାଇଥିଲା। ବାହଲି ଡିକ୍ରି ଯୋଜନା, ବିଧବା ପେନସନ୍ ଯୋଜନା, ବିଧବା ପୁନର୍ବିବାହ ସହାୟତା ଯୋଜନା ଓ ମହିଳା ସ୍ୱାଲମ୍ବନ ଯୋଜନା ସମେତ ବିଭିନ୍ନ ଯୋଜନାର ହିତାଧିକାରୀଙ୍କୁ ବିଶିଷ୍ଟ ବ୍ୟକ୍ତିମାନେ ନିଜ ନିଜ ଯୋଜନାର ହକ୍‌ ପ୍ରଦାନ କରିଥିଲେ।

ବିଭିନ୍ନ ଗୁରୁତ୍ବପୂର୍ଣ୍ଣ ପଦକ୍ଷେପକୁ ଦର୍ଶାଉଥିବା ଏକ ପ୍ରଦର୍ଶନୀ ଯଥା : ପୋଷଣ ଟ୍ରାକର, ପୋଷଣ ଭି ପଢାଇ ଭି ଏବଂ ରାଜ୍ୟ ସରକାରଙ୍କ ଦ୍ୱାରା ନିଆଯାଇଥିବା ଅନ୍ୟାନ୍ୟ ପୋଷଣ ଓ ମହିଳା ସୁରକ୍ଷା ସମ୍ବନ୍ଧୀୟ ପଦକ୍ଷେପ ଯଥା ‘ଭଙ୍ଗୀ ପ୍ରସାରଣ’, ୧୮୧ ହେଲ୍ପଲାଇନ୍ ଇତ୍ୟାଦି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।

ସ୍ତନ୍ୟପାନ ଓ ପରିପୂରକ ଖାଦ୍ୟ ଭଳି ଗୁରୁତ୍ୱପୂର୍ଣ୍ଣ ବିଷୟବସ୍ତୁ ଉପରେ ବିଭିନ୍ନ ଆଞ୍ଚଳିକ ସାଂସ୍କୃତିକ ପ୍ରଦର୍ଶନୀ ଓ ନାଟକ ପୋଷଣର ଗୁରୁତ୍ୱ ଉପରେ ଅଧିକ ଆଲୋକପାତ କରିଥିଲା।

ସପ୍ତମ  ରାଷ୍ଟ୍ରୀୟ ପୋଷଣ ମାସ ୨୦୨୪ରେ ରକ୍ତହୀନତା, ଅଭିବୃଦ୍ଧି ନିରୀକ୍ଷଣ, ପରିପୂରକ ଖାଦ୍ୟ, ପୋଷଣ ଭି ପଢାଇ ଭି, ଉନ୍ନତ ଶାସନ ପାଇଁ ପ୍ରଯୁକ୍ତି ବିଦ୍ୟା ଏବଂ ଏକ ପେଡ୍ ମା କେ ନାମ ବିଷୟବସ୍ତୁ ଉପରେ ଗୁରୁତ୍ୱ ଦିଆଯିବ।

ପ୍ରଧାନମନ୍ତ୍ରୀଙ୍କ ‘ସୁପୋଷିତ ଭାରତ’ର ସ୍ୱପ୍ନକୁ ଆଗକୁ ନେବା ପାଇଁ କେନ୍ଦ୍ରମନ୍ତ୍ରୀ କହିଛନ୍ତି ଯେ ପୋଷଣ ମାସ ଏକ ଦେଶବ୍ୟାପୀ ପର୍ବ ପାଲଟିଛି ଏବଂ ଏହା ଜନ ଆନ୍ଦୋଳନର ରୂପ ନେଉଛି। ମହିଳା ଓ ଶିଶୁ ବିକାଶ ମନ୍ତ୍ରଣାଳୟ ଏହାର ମିଶନ ପୋଷଣ ୨.୦ ଜରିଆରେ ସାରା ଦେଶରେ ଶିଶୁ, କିଶୋରୀ, ଗର୍ଭବତୀ ମହିଳା ଏବଂ ସ୍ତନ୍ୟପାନ କରାଉଥିବା ମା’ମାନଙ୍କ ମଧ୍ୟରେ ପୁଷ୍ଟିହୀନତାର ମୁକାବିଲା କରିବାକୁ ପ୍ରତିଶ୍ରୁତିବଦ୍ଧ । ମାସେ ଧରି ଚାଲିବାକୁ ଥିବା ଏହି ଅଭିଯାନର ଉଦ୍ଦେଶ୍ୟ ହେଉଛି ସମଗ୍ର ଦେଶରେ ପୁଷ୍ଟିହୀନତାର ମୁକାବିଲା ଏବଂ ସାମଗ୍ରିକ ସୁସ୍ଥତାକୁ ପ୍ରୋତ୍ସାହିତ କରିବା ପାଇଁ ପ୍ରୟାସକୁ ଆହୁରି ତୀବ୍ର କରିବା।