Tag: କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ

ନୂଆଦିଲ୍ଲୀ: ଗୁଜରାଟର ଆନନ୍ଦ ଠାରେ ଜାତୀୟ ଦୁଗ୍ଧ ଉନ୍ନୟନ ବୋର୍ଡ (ଏନଡିଡିବି)ର ହୀରକ ଜୟନ୍ତୀ ପାଳନ ଅବସରରେ କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ ଆଜି ୩୦୦ କୋଟି ଟଙ୍କାର ଅନେକ କୃଷକ କଲ୍ୟାଣକାରୀ ଯୋଜନାର ଉଦଘାଟନ କରିଛନ୍ତି। ଏହି ଅବସରରେ କେନ୍ଦ୍ର ପଞ୍ଚାୟତିରାଜ, ମତ୍ସ୍ୟ, ପଶୁପାଳନ ଓ ଦୁଗ୍ଧ ଉତ୍ପାଦନ ମନ୍ତ୍ରୀ ରାଜୀବ ରଞ୍ଜନ ସିଂହଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ।

ଅମିତ ଶାହ ତାଙ୍କ ଅଭିଭାଷଣରେ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ନିକଟରେ ଆରମ୍ଭ ହୋଇଥିବା ଶ୍ୱେତ ବିପ୍ଳବ ୨.୦ ପାଇଁ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର (ଏସଓପି) ଜାରି କରାଯାଇଛି, ଯେଉଁଥିରେ ପ୍ରଧାନମନ୍ତ୍ରୀଙ୍କ ଦ୍ୱାରା ଦର୍ଶାଯାଇଥିବା ସମସ୍ତ ପ୍ରମୁଖ କୃଷକ ଅନୁକୂଳ ପଏଣ୍ଟକୁ ଅନ୍ତର୍ଭୁକ୍ତ କରାଯାଇଛି। ସେ ଉଲ୍ଲେଖ କରିଥିଲେ ଯେ ସମବାୟ କ୍ଷେତ୍ର ଏକ ଲକ୍ଷ ନୂତନ ଏବଂ ପୂର୍ବରୁ ରହିଥିବା  ଡାଏରୀଗୁଡିକୁ ସଶକ୍ତ କରିବ ଏବଂ ଦ୍ୱିତୀୟ ଶ୍ୱେତ ବିପ୍ଳବ ଦୁଗ୍ଧ ପାଇଁ ମାର୍ଗକୁ ବିସ୍ତାର କରିବ।

ଶ୍ରୀ ଶାହ କହିଥିଲେ ଯେ ତ୍ରିଭୁବନ ଦାସ ଜୀ ଜଣେ ଏଭଳି ବ୍ୟକ୍ତିତ୍ୱ ଥିଲେ ଯାହାଙ୍କର କଠିନ ପରିଶ୍ରମପୂର୍ଣ୍ଣ ଜୀବନ ସମ୍ପର୍କରେ ବର୍ଣ୍ଣନା କରିବା କଷ୍ଟକର। ନିଜର ବ୍ୟକ୍ତିଗତ ସ୍ୱାର୍ଥକୁ ବାଦ୍ ଦେଇ ତ୍ରିଭୁବନଦାସ ପଟେଲ ଦେଶର ଗରିବ କୃଷକଙ୍କ ସଶକ୍ତୀକରଣ ପାଇଁ ଏକ ନିଆରା ଦୃଷ୍ଟିକୋଣ ନେଇ କାର୍ଯ୍ୟ କରିଥିଲେ। ସେ ନିଜର ଖୁସିକୁ ତ୍ୟାଗ କରି ଦେଶର ଗରିବ କୃଷକ ମାନଙ୍କର ସଶକ୍ତୀକରଣ ପାଇଁ କାର୍ଯ୍ୟ କରିଥିଲେ। ଜୀବନ ସାରା ତ୍ରିଭୁବନଦାସ ଜୀ ବ୍ୟକ୍ତିଗତ ଲାଭରୁ ନିଜକୁ ଦୂରେଇ ରଖିଥିଲେ ଏବଂ ଦେଶର ପ୍ରତ୍ୟେକ କୃଷକଙ୍କୁ ସହଯୋଗର ପ୍ରକୃତ ଭାବନା ସହିତ ଯୋଡ଼ିବା ପାଇଁ ତାଙ୍କର ପ୍ରୟାସକୁ ସମର୍ପିତ କରିଥିଲେ ଏବଂ ଏହି ପ୍ରୟାସରେ ବଡ଼ ସଫଳତା ହାସଲ କରିଥିଲେ । ଶ୍ରୀ ଶାହ କହିଥିଲେ ଯେ ତ୍ରିଭୁବନ ଦାସଙ୍କ ଯୋଗୁଁ ଦେଶର ୫ କୋଟି ଗୋପାଳକ ଶାନ୍ତିରେ ଶୋଇଛନ୍ତି ଏବଂ ଆଜି ଦେଶର କୋଟି କୋଟି କୃଷକ, ବିଶେଷ କରି ମହିଳାମାନେ ସମୃଦ୍ଧ ହେଉଛନ୍ତି । ତ୍ରିଭୁବନ ଦାସ ଜୀ ଏକ କ୍ଷୁଦ୍ର ସମବାୟ ସମିତି ଗଠନ କରିଥିଲେ ଯାହା ଆଜି ଦେଶର ୨ କୋଟି କୃଷକଙ୍କୁ ସମବାୟ କ୍ଷେତ୍ର ସହିତ ଯୋଡ଼ି ହଜାର ହଜାର କୋଟି ଟଙ୍କାର ବ୍ୟବସାୟ କରୁଛି ।

କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ କହିଥିଲେ ଯେ ୧୯୬୪ ମସିହାରେ ପୂର୍ବତନ ପ୍ରଧାନମନ୍ତ୍ରୀ ଲାଲ ବାହାଦୁର ଶାସ୍ତ୍ରୀ ଅମୂଲ ଡାଏରୀ ପରିଦର୍ଶନ କରି ନିଷ୍ପତ୍ତି ନେଇଥିଲେ ଯେ କେବଳ ଗୁଜରାଟ ନୁହେଁ ସମଗ୍ର ଦେଶର ପଶୁସମ୍ପଦ ମାଲିକମାନେ ଏହି ସଫଳ ମଡେଲରୁ ଉପକୃତ ହେବା ଉଚିତ୍ । ଏହାପରେ ଶାସ୍ତ୍ରୀ ଜୀ ଏନଡିଡିବି ପ୍ରତିଷ୍ଠା କରିବାକୁ ନିଷ୍ପତ୍ତି ନେଇଥିଲେ । ୬୦ ବର୍ଷ ମଧ୍ୟରେ ଏନଡିଡିବି କେବଳ ସମବାୟ କ୍ଷେତ୍ର, କୃଷକ ଏବଂ ମା’ ଭଉଣୀମାନଙ୍କୁ ସଶକ୍ତ ଓ ସଂଗଠିତ କରିନାହିଁ, ବରଂ ସେମାନଙ୍କ ଅଧିକାର ବିଷୟରେ ସଚେତନତା ସୃଷ୍ଟି କରିବା ପାଇଁ ମଧ୍ୟ କାର୍ଯ୍ୟ କରିଛି ବୋଲି ସେ କହିଥିଲେ । ସମବାୟ ମାଧ୍ୟମରେ ପଶୁପାଳନ କରାଗଲେ ଏହା କେବଳ କୃଷକଙ୍କ ପାଇଁ ସମୃଦ୍ଧି ଆଣିନଥାଏ ବରଂ ଦେଶର ପୁଷ୍ଟିହୀନ ପିଲାଙ୍କ ସମସ୍ୟାର ମଧ୍ୟ ସମାଧାନ କରିଥାଏ ବୋଲି ସେ ଉଲ୍ଲେଖ କରିଥିଲେ । ଅମୂଲ ମାଧ୍ୟମରେ ଗଠିତ ଏହି ବିଶ୍ୱାସ କେବଳ ମହିଳାମାନଙ୍କୁ ସଶକ୍ତ କରିନାହିଁ ବରଂ ପିଲାମାନଙ୍କୁ ପୁଷ୍ଟି ଯୋଗାଇ ଶକ୍ତିଶାଳୀ ନାଗରିକ ସୃଷ୍ଟି କରିବା ପାଇଁ ଭିତ୍ତିପ୍ରସ୍ତର ସ୍ଥାପନ କରିଛି ।

ଏନଡିଡିବି ଗ୍ରାମୀଣ କ୍ଷେତ୍ର ଏବଂ ଦେଶର ବିକାଶକୁ ତ୍ୱରାନ୍ୱିତ କରିବା ସହ କୃଷିକୁ ଆତ୍ମନିର୍ଭରଶୀଳ କରିଛି ବୋଲି ଶ୍ରୀ ଅମିତ ଶାହ କହିଥିଲେ । ସେ ଆହୁରି ମଧ୍ୟ କହିଥିଲେ ଯେ ତ୍ରିଭୁବନ ଜୀ ଏନଡିଡିବିର ଭିତ୍ତିପ୍ରସ୍ତର ସ୍ଥାପନ କରିଥିଲେ , ଯାହା ଆଜି କେବଳ ଦେଶରେ ନୁହେଁ ବିଶ୍ୱରେ ଏକ ବହୁତ ବଡ ଅନୁଷ୍ଠାନରେ ପରିଣତ ହୋଇଛି । ୧୯୮୭ରେ ଏନଡିଡିବି ଏକ ସରକାରୀ ଅନୁଷ୍ଠାନରେ ପରିଣତ ହୋଇଥିଲା ଏବଂ ୧୯୭୦ ରୁ ୧୯୯୬ ପର୍ଯ୍ୟନ୍ତ ଏହା ଅପରେସନ ଫ୍ଲଡ୍ ପ୍ରୋଗ୍ରାମ୍ ବିକଶିତ ତଥା କାର୍ଯ୍ୟକାରୀ କରିଥିଲା, ଯାହା ଶ୍ୱେତ ବିପ୍ଳବର କାରଣ ହୋଇଥିଲା ବୋଲି ସେ ଉଲ୍ଳେଖ କରିଥିଲେ । ସେ କହିଛନ୍ତି ଯେ ଅମୂଲ ଆଜି ୬୦,୦୦୦ କୋଟି ଟଙ୍କାର ବାର୍ଷିକ ବ୍ୟବସାୟ କରୁଛି ଯାହା ପ୍ରାରମ୍ଭିକ ଭାବରେ ମହିଳାମାନଙ୍କର ଅତି ଅଳ୍ପ ଅଂଶଧନ ପୁଞ୍ଜିରେ ନିର୍ମିତ ହୋଇଥିଲା । ଶ୍ରୀ ଶାହ କହିଛନ୍ତି ଯେ ୧୯୬୪ ମସିହାରେ ଯେତେବେଳେ ଲାଲ ବାହାଦୁର ଶାସ୍ତ୍ରୀ ଜୀ ଏନଡିଡିବି ପ୍ରତିଷ୍ଠା କରିବାକୁ ନିଷ୍ପତ୍ତି ନେଇଥିଲେ, ସେତେବେଳେ କେହି ଜାଣି ନଥିଲେ ଯେ ଏହା ଦିନେ ଏକ ବିଶାଳ ବଟ ବୃକ୍ଷରେ ପରିଣତ ହେଉଥିବା ଏକ କ୍ଷୁଦ୍ର ମଞ୍ଜି ପରି ବଢିବ । ଏନଡିଡିବିର ଦୁଗ୍ଧ ବିକ୍ରି ଦୈନିକ ୪୨୭ ଲକ୍ଷ ଲିଟରରେ ପହଞ୍ଚିଥିବା ବେଳେ ଦୈନିକ ୫୮୯ ଲକ୍ଷ ଲିଟର ଦୁଗ୍ଧ କ୍ରୟ ହେଉଛି । ଏହାର ରାଜସ୍ୱ ୩୪୪ କୋଟି ଟଙ୍କାରୁ ୪୨୬ କୋଟି ଟଙ୍କାକୁ ବୃଦ୍ଧି ପାଇଛି ଏବଂ ଶୁଦ୍ଧ ଲାଭ ୫୦ କୋଟି ଟଙ୍କା ରହିଛି ।

କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ କହିଛନ୍ତି ଯେ ଏନଡିଡିବି ପନିପରିବା ପ୍ରକ୍ରିୟାକରଣ ଆରମ୍ଭ କରିଛି, ଆମର କୃଷକମାନଙ୍କ ଦ୍ୱାରା ଉତ୍ପାଦିତ ପନିପରିବାକୁ ସମଗ୍ର ବିଶ୍ୱରେ ପହଞ୍ଚାଇବାକୁ ସୁଯୋଗ ଦେଇଛି ଏବଂ ଏହାର ଲାଭ ସମବାୟ ମଡେଲ ଅଧୀନରେ ତୃଣମୂଳ ସ୍ତରରେ ବଣ୍ଟନ କରାଯିବ । ସେ କହିଥିଲେ ଯେ ଗୋବର୍ଦ୍ଧନ ଯୋଜନା ଆମ ଜମିର ସଂରକ୍ଷଣ ଏବଂ ଅଭିବୃଦ୍ଧି, ଅମଳ ବୃଦ୍ଧି, ଉନ୍ନତ କୃଷକ ସମୃଦ୍ଧି ଏବଂ ଏକ ସ୍ୱଚ୍ଛ ପରିବେଶ ସୃଷ୍ଟି କରିଛି । ଗୋବରରୁ ଗ୍ୟାସ ଓ ସାର ଉତ୍ପାଦନ ହେଉଛି ଏବଂ କାର୍ବନ କ୍ରେଡିଟ୍ ଦେୟ ଆମ ମା’ ଓ ଭଉଣୀଙ୍କ ପାଖରେ ପହଞ୍ଚୁଛି । ଶ୍ରୀ ଶାହ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଦୂରଦୃଷ୍ଟି ସମ୍ପନ୍ନ ନିଷ୍ପତ୍ତି  ନେଇ ଗୋବର୍ଦ୍ଧନ ଯୋଜନାକୁ ତୃଣମୂଳ ସ୍ତରରେ କାର୍ଯ୍ୟକାରୀ କରିଛନ୍ତି । ସେ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ ଏନଡିଡିବି ୧୦,୦୦୦ କୃଷକ ଉତ୍ପାଦକ ସଂଗଠନ (ଏଫପିଓ) ପଞ୍ଜିକରଣ କରିଛି ।

ଏନଡିଡିବିର ପଦକ୍ଷେପ ପରେ ଏବେ ମେକ୍ ଇନ୍ ଇଣ୍ଡିଆ କାର୍ଯ୍ୟକ୍ରମ ଅଧୀନରେ ଭାରତରେ ଦୁଗ୍ଧ କ୍ଷେତ୍ରର ସମସ୍ତ କାରଖାନା ନିର୍ମାଣ କରାଯିବ ବୋଲି ଶ୍ରୀ ଅମିତ ଶାହ କହିଥିଲେ । ଆଜି ୨୧୦ କୋଟି ଟଙ୍କା ବ୍ୟୟରେ ମଦର ଡାଏରୀ ଫଳ ଓ ପନିପରିବା ପ୍ରକ୍ରିୟାକରଣ ୟୁନିଟର ଶିଳାନ୍ୟାସ କରାଯାଇଛି । ଏହାବ୍ୟତୀତ ଉତ୍ତରାଖଣ୍ଡର ବଦ୍ରି ଘିଅ ଏବଂ ମଦର ଡାଏରୀର ଗିର ଘିଅ ବ୍ରାଣ୍ଡକୁ ମଧ୍ୟ ଆଜି ଉନ୍ମୋଚନ କରାଯାଇଛି । ସେ କହିଛନ୍ତି ଯେ ସମବାୟ ସାମଗ୍ରୀର ବ୍ରାଣ୍ଡିଂ କରିବା ଏବଂ କର୍ପୋରେଟ୍ ସାମଗ୍ରୀ ସହିତ ବଜାରରେ ପ୍ରତିଦ୍ୱନ୍ଦ୍ୱିତା କରିବା ପାଇଁ ପ୍ରସ୍ତୁତ କରିବା ହେଉଛି ସଫଳତାର ଚାବିକାଠି । ଆଜି ଆମର ଅମୂଲ ବ୍ରାଣ୍ଡ ବିଶ୍ୱସ୍ତରରେ ଶୀର୍ଷ ସ୍ଥାନ ଅଧିକାର କରିଛି, ଯାହା କି ଆମ ପାଇଁ ଏକ ଗୁରୁତ୍ୱପୂର୍ଣ୍ଣ ଉପଲବ୍ଧି । ଲଦାଖରେ ଆପ୍ରିକଟ, ହିମାଚଳରେ ସେଓ ଏବଂ ମେଘାଳୟରେ ସପୁରୀ ଚାଷ କରୁଥିବା କୃଷକମାନେ ଆଜି ଆରମ୍ଭ ହୋଇଥିବା ପଦକ୍ଷେପ ଦ୍ୱାରା ଉପକୃତ ହେବେ ବୋଲି ସେ ଉଲ୍ଲେଖ କରିଛନ୍ତି ।

କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ କହିଛନ୍ତି ଯେ ସମବାୟ ମନ୍ତ୍ରଣାଳୟ ତିନୋଟି ନୂତନ ଜାତୀୟ ସ୍ତରର ସମବାୟ ଅନୁଷ୍ଠାନ ପ୍ରତିଷ୍ଠା କରିଛି । ନେତୃତ୍ୱ ସ୍ତରରେ ଯେତେବେଳେ ପ୍ରକୃତରେ କୃଷକଙ୍କ ପାଇଁ ଚିନ୍ତା କରାଯାଏ, ସେତେବେଳେ ଏଭଳି ନୂଆ ପଦକ୍ଷେପ ନିଆଯାଇପାରିବ । ସେ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ସମବାୟ କ୍ଷେତ୍ରରେ ଅନେକ ପଦକ୍ଷେପ ଏବଂ ଯୋଜନା କାର୍ଯ୍ୟକାରୀ କରିଛନ୍ତି । ବର୍ତ୍ତମାନ ପ୍ରାୟ ୨୨ଟି ରାଜ୍ୟ ମହାସଂଘ ଓ ୨୩୧ଟି ଜିଲ୍ଲା ମହାସଂଘ ସମେତ ୨୮ଟି ମାର୍କେଟିଂ ଡାଏରୀ ଓ ୨୧ଟି ଦୁଗ୍ଧ ଉତ୍ପାଦନକାରୀ କମ୍ପାନୀ ଏହି କ୍ଷେତ୍ରରେ କାର୍ଯ୍ୟ କରୁଛନ୍ତି ।

ମୋଦୀ ସରକାର ୨ ଲକ୍ଷ ନୂତନ ପ୍ରାଥମିକ କୃଷି ଋଣ ସମିତି (ପ୍ୟାକ୍ସ) ପ୍ରତିଷ୍ଠା କରିବାକୁ ଯାଉଛନ୍ତି, ଯାହା ଆମର ସମବାୟ ଢାଞ୍ଚାକୁ ଯଥେଷ୍ଟ ସୁଦୃଢ଼ କରିବ ବୋଲି ସେ ମତ ଦେଇଥିଲେ । ସେ କହିଛନ୍ତି ଯେ ଏହି ପଦକ୍ଷେପ ସମବାୟ କ୍ଷେତ୍ରରେ ସମସ୍ତ ସଂସ୍ଥାର ଶକ୍ତି ବୃଦ୍ଧି କରିବ । ୨୩୧ ନିୟୁତ ଟନ୍ ଦୁଗ୍ଧ ଉତ୍ପାଦନ ସହ ଭାରତ ଯୁକ୍ତରାଷ୍ଟ୍ର ଆମେରିକାକୁ ପଛରେ ପକାଇ ବିଶ୍ୱରେ ଶୀର୍ଷ ସ୍ଥାନ ଅଧିକାର କରିଛି ବୋଲି ସେ ଆଲୋକପାତ କରିଥିଲେ । ଆମର ଦୁଗ୍ଧ ଉତ୍ପାଦନ ଅଭିବୃଦ୍ଧି ହାର ୬% ଥିବା ବେଳେ ବିଶ୍ୱ ଅଭିବୃଦ୍ଧି ହାର ମାତ୍ର ୨% ରହିଛି । ଆଜି ୮ କୋଟି ଗ୍ରାମୀଣ ପରିବାର ଦୈନିକ କ୍ଷୀର ଉତ୍ପାଦନ କରୁଥିବା ବେଳେ ସମବାୟ କ୍ଷେତ୍ର ସହ ମାତ୍ର ଦେଢ଼ କୋଟି ଲୋକ ଯୋଡ଼ି ହୋଇଛନ୍ତି । ଏହାର ଅର୍ଥ ବାକି ୬.୫ କୋଟି ପରିବାର ଉଚିତ ମୂଲ୍ୟ ପାଉନାହାନ୍ତି ଏବଂ ଶୋଷଣର ଶିକାର ହେଉଛନ୍ତି ବୋଲି ସେ ଗୁରୁତ୍ୱାରୋପ କରିଛନ୍ତି । ଭବିଷ୍ୟତରେ ଦୁଗ୍ଧ ଉତ୍ପାଦନରେ ନିୟୋଜିତ ସମସ୍ତ ୮ କୋଟି କୃଷକ ପରିବାର ଯେପରି କଠିନ ପରିଶ୍ରମ ପାଇଁ ପୂର୍ଣ୍ଣ କ୍ଷତିପୂରଣ ପାଇବେ ଏବଂ ସମବାୟ କ୍ଷେତ୍ର ସହ ଯୋଡ଼ି ହୋଇପାରିବେ ତାହା ସୁନିଶ୍ଚିତ କରିବା ସରକାରଙ୍କ ଲକ୍ଷ୍ୟ ହେବ ବୋଲି କେନ୍ଦ୍ର ସମବାୟ ମନ୍ତ୍ରୀ ଦୃଢ଼ୋକ୍ତି ପ୍ରକାଶ କରିଛନ୍ତି ।

କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ କହିଛନ୍ତି ଯେ ସମବାୟ ସମୃଦ୍ଧି ଅଭିଯାନର ଫଳସ୍ୱରୂପ, ଦେଶରେ କ୍ଷୀରର ଉପଲବ୍ଧତା ଯାହା ୧୯୭୦ ରେ ବ୍ୟକ୍ତି ପିଛା ୪୦ କିଲୋଗ୍ରାମ ଥିଲା, ୨୦୧୧ରେ ଏହା ୧୦୩ କିଲୋଗ୍ରାମକୁ ବୃଦ୍ଧି ପାଇଥିଲା ଏବଂ ୨୦୨୩ରେ ଏହା ବୃଦ୍ଧି ପାଇ ବ୍ୟକ୍ତି ପିଛା ୧୬୭ କିଲୋଗ୍ରାମରେ ପହଞ୍ଚିଛି । ସେ ଉଲ୍ଲେଖ କରିଛନ୍ତି ଯେ ଦେଶପିଛା ହାରାହାରି ଦୁଗ୍ଧ ଉପଲବ୍ଧତା ହେଉଛି ୧୧୭ କିଲୋଗ୍ରାମ୍ ।

ନୂଆଦିଲ୍ଲୀ: କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ ନୂଆଦିଲ୍ଲୀରେ ସରକାରୀ ଭାଷା ହୀରକ ଜୟନ୍ତୀ ସମାରୋହ ଏବଂ ଚତୁର୍ଥ ଅଖିଳ ଭାରତୀୟ ରାଜଭାଷା ସମ୍ମିଳନୀକୁ  ସମ୍ବୋଧିତ କରିଛନ୍ତି । ଏହି ଅବସରରେ ଗୃହ ମନ୍ତ୍ରୀ ସ୍ୱତନ୍ତ୍ର ଭାବେ ପ୍ରସ୍ତୁତ ‘ରାଜଭାଷା ଭାରତୀ’ ପତ୍ରିକାର ହୀରକ ଜୟନ୍ତୀ ସ୍ବତନ୍ତ୍ର ସଂସ୍କରଣ ଉନ୍ମୋଚନ କରିଥିଲେ। ଅମିତ ଶାହ ହୀରକ ଜୟନ୍ତୀ ଅବସରରେ ଏକ ସ୍ମାରକୀ ଡାକ ଟିକେଟ ଏବଂ ସ୍ମାରକୀ ମୁଦ୍ରା ଉନ୍ମୋଚନ କରିଥିଲେ। ଶ୍ରୀ ଶାହ ରାଜଭାଷା ଗୌରବ ଏବଂ ରାଜଭାଷା କୀର୍ତ୍ତି ପୁରସ୍କାର ମଧ୍ୟ ପ୍ରଦାନ କରିଥିଲେ। ଏହି ଅବସରରେ ଗୃହମନ୍ତ୍ରୀ ଭାରତୀୟ ଭାଷା ଅନୁଭାଗ (ଇଣ୍ଡିଆନ୍ ଲାଙ୍ଗୁଏଜ୍ ସେକ୍‌ସନ)ର ମଧ୍ୟ ଶୁଭାରମ୍ଭ କରିଥିଲେ।

ଅମିତ ଶାହ ତାଙ୍କ ଅଭିଭାଷଣରେ କହିଥିଲେ ଯେ ଗତ ୭୫ ବର୍ଷର ଯାତ୍ରା ହେଉଛି ହିନ୍ଦୀକୁ ସରକାରୀ ଭାଷା ଭାବରେ ଗ୍ରହଣ କରିବା ଏବଂ ଏହା ମାଧ୍ୟମରେ ଦେଶର ସମସ୍ତ ସ୍ଥାନୀୟ ଭାଷାକୁ ସଂଯୋଗ କରି ଆମର ପରମ୍ପରା, ସଂସ୍କୃତି, ଭାଷା, ସାହିତ୍ୟ, କଳା ଏବଂ ବ୍ୟାକରଣର ସଂରକ୍ଷଣ ତଥା ପ୍ରୋତ୍ସାହନ ଦେବା। ହିନ୍ଦୀର ୭୫ ବର୍ଷର ଯାତ୍ରା ଏବେ ଏହାର ଲକ୍ଷ୍ୟ ହାସଲର ଅନ୍ତିମ ପର୍ଯ୍ୟାୟରେ ପହଞ୍ଚିଛି ଏବଂ ଆଜି ହିନ୍ଦୀକୁ ଯୋଗାଯୋଗ, ଲୋକ, ପ୍ରଯୁକ୍ତି ବିଦ୍ୟାର ଭାଷା ଏବଂ ବର୍ତ୍ତମାନ ଏକ ଅନ୍ତର୍ଜାତୀୟ ଭାଷା ରେ ପରିଣତ କରିବାର ଦିନ ବୋଲି ସେ କହିଥିଲେ।

କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ, ଆଜି ଭାରତୀୟ ଭାଷା ବିଭାଗ ଉଦଘାଟିତ ହୋଇଛି। ସେ କହିଥିଲେ ଯେ ଆମେ ସମସ୍ତେ ଏକ ନୂତନ ଆରମ୍ଭର ସାକ୍ଷୀ ହୋଇଛୁ ଯାହା ଏକ ଛୋଟ ମଞ୍ଜି ବୁଣିବା ପରି ଏବଂ ଖୁବଶୀଘ୍ର ଏକ ବଡ ବର ଗଛ ପରି ବଢିବ। ଆଗାମୀ ବର୍ଷମାନଙ୍କରେ ଏହି ଭାରତୀୟ ଭାଷା ବିଭାଗ ଆମ ଭାଷାର ସୁରକ୍ଷା ପାଇଁ କେନ୍ଦ୍ର ରେ ପରିଣତ ହେବ ବୋଲି ସେ କହିଥିଲେ। ସେ କହିଥିଲେ ଯେ ଭାରତୀୟ ଭାଷା ବିଭାଗ ସରକାରୀ ଭାଷା ବିଭାଗର ଏକ ସପ୍ଲିମେଣ୍ଟାରୀ ବିଭାଗରେ ପରିଣତ ହେବ, କାରଣ ଆମେ ଆମର ସମସ୍ତ ସ୍ଥାନୀୟ ଭାଷାକୁ ସୁଦୃଢ଼ ନକରିବା ପର୍ଯ୍ୟନ୍ତ ଏବଂ ସରକାରୀ ଭାଷା ଏବଂ ଅନ୍ୟ ଭାରତୀୟ ଭାଷା ମଧ୍ୟରେ ଆଲୋଚନା ପ୍ରତିଷ୍ଠା ନ କରିବା ପର୍ଯ୍ୟନ୍ତ ସରକାରୀ ଭାଷାର ପ୍ରଚାର ପ୍ରସାର ହୋଇପାରିବ ନାହିଁ।

ଅମିତ ଶାହ କହିଥିଲେ ଯେ ହିନ୍ଦୀ ଏବଂ ସ୍ଥାନୀୟ ଭାଷା ମଧ୍ୟରେ କେବେ ବି ପ୍ରତିଯୋଗିତା ହୋଇପାରିବ ନାହିଁ କାରଣ ହିନ୍ଦୀ ସମସ୍ତ ସ୍ଥାନୀୟ ଭାଷାର ବନ୍ଧୁ ଅଟେ। ସେ କହିଥିଲେ ଯେ ହିନ୍ଦୀ ଏବଂ ସ୍ଥାନୀୟ ଭାଷା ପରସ୍ପରର ପରିପୂରକ ଏବଂ ସେଥିପାଇଁ ଭାରତୀୟ ଭାଷା ବିଭାଗ ମାଧ୍ୟମରେ ହିନ୍ଦୀ ଏବଂ ସମସ୍ତ ସ୍ଥାନୀୟ ଭାଷା ମଧ୍ୟରେ ବନ୍ଧୁତ୍ୱ ସୁଦୃଢ଼ ହେବ । ଯଦି କୌଣସି ଲେଖା, ଭାଷଣ କିମ୍ବା ଚିଠି ହିନ୍ଦୀରେ ଥାଏ ତେବେ ଭାରତୀୟ ଭାଷା ବିଭାଗ ଏହାକୁ ଦେଶର ସମସ୍ତ ଭାଷାରେ ଅନୁବାଦ କରିବ ବୋଲି ସେ କହିଛନ୍ତି। ସେହିଭଳି ଦେଶର ସମସ୍ତ ଭାଷାର ସାହିତ୍ୟ, ପ୍ରବନ୍ଧ ଓ ଭାଷଣକୁ ହିନ୍ଦୀରେ ଅନୁବାଦ କରାଯିବ, ଯାହା ସମୟର ଆବଶ୍ୟକତା।

ଯେଉଁମାନେ ସ୍ୱରାଜ, ସ୍ୱଧର୍ମ ଓ ସ୍ୱଭାଷାକୁ ଅନ୍ତର୍ଭୁକ୍ତ କରୁନାହାନ୍ତି ସେମାନେ ନିଜ ଭବିଷ୍ୟତ ପିଢ଼ିକୁ  ଦାସ ମାନସିକତାରୁ ମୁକ୍ତ କରିପାରିବେ ନାହିଁ ବୋଲି କେନ୍ଦ୍ର ଗୃହମନ୍ତ୍ରୀ କହିଛନ୍ତି। ସେ କହିଛନ୍ତି ଯେ ସ୍ୱରାଜର  ସଂଜ୍ଞାରେ ସ୍ୱଭାଶାକୁ  ଅନ୍ତର୍ଭୁକ୍ତ କରାଯାଇଛି । ଯେଉଁ ଦେଶ ଓ ଲୋକମାନେ ନିଜ ଭାଷାକୁ ସୁରକ୍ଷା ଦେଇପାରିବେ ନାହିଁ, ସେମାନେ ନିଜ ଇତିହାସ, ସାହିତ୍ୟ, ସଂସ୍କୃତିରୁ ବିଚ୍ଛିନ୍ନ ହୋଇ ଯାଆନ୍ତି ଏବଂ ସେମାନଙ୍କର ଭବିଷ୍ୟତ ପିଢ଼ି ଦାସ ମାନସିକତା ସହିତ ବଞ୍ଚୁଛନ୍ତି ବୋଲି ସେ କହିଥିଲେ। ସ୍ୱାଧୀନତାର ୭୫ ବର୍ଷ ପରେ ମଧ୍ୟ ଶିବାଜୀ ମହାରାଜଙ୍କ ସ୍ୱରାଜ, ସ୍ବଭାଷା ଓ ସ୍ୱଧର୍ମ ନୀତି ଉପରେ ଗୁରୁତ୍ୱ ଦେଇ କାର୍ଯ୍ୟ କରିବା ଅତ୍ୟନ୍ତ ଜରୁରୀ ବୋଲି ଶ୍ରୀ ଶାହା କହିଛନ୍ତି। ନୂଆ ଶିକ୍ଷାନୀତିରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ମାତୃଭାଷାରେ ପ୍ରାଥମିକ ଶିକ୍ଷା ଦେବା ଉପରେ ଗୁରୁତ୍ୱାରୋପ କରିଛନ୍ତି। ସେ କହିଥିଲେ ଯେ ଭାଷାଗତ ଅଭିବ୍ୟକ୍ତି, ଚିନ୍ତାଧାରା, ବୁଝାମଣା, ଯୁକ୍ତି, ବିଶ୍ଳେଷଣ ଏବଂ ନିଷ୍ପତ୍ତିରେ ପହଞ୍ଚିବା ପାଇଁ ପିଲାଙ୍କ ପାଇଁ ସବୁଠାରୁ ସହଜ ଭାଷା ହେଉଛି ତା’ର ମାତୃଭାଷା । ସେଥିପାଇଁ ପ୍ରଧାନମନ୍ତ୍ରୀ ମୋଦୀ ମାତୃଭାଷାରେ ଶିକ୍ଷା ଦେବା ଉପରେ ଗୁରୁତ୍ୱ ଦେଇଛନ୍ତି । ଗୃହମନ୍ତ୍ରୀ କହିଥିଲେ ଯେ ଆଜି ହେଉଛି ଭାରତର ସମସ୍ତ ଭାଷାକୁ ସୁଦୃଢ଼ କରିବା ଏବଂ ସରକାରୀ ଭାଷାକୁ ଦେଶର ସଂଯୋଗୀକରଣ ଭାଷାରେ ପରିଣତ କରିବାର ଦିନ ଯାହା ମାଧ୍ୟମରେ ଆମେ ଆମ ଦେଶର କାର୍ଯ୍ୟକୁ ନିଜ ଭାଷାରେ ସମ୍ପାଦନ କରିପାରିବା ।

ଅମିତ ଶାହ କହିଥିଲେ ଯେ ଆମ ସ୍ୱାଧୀନତା ସଂଗ୍ରାମରେ ହିନ୍ଦୀର ବହୁତ ବଡ଼ ଅବଦାନ ରହିଛି । ସେ କହିଥିଲେ ଯେ ୧୮୫୭ ବିପ୍ଳବ ବିଫଳ ହେବା ପଛରେ ଏକ ମୁଖ୍ୟ କାରଣ ହେଉଛି ସଂଯୋଗକାରୀ ଭାଷାର ଅଭାବ । ସେ କହିଥିଲେ ଯେ ଆମ ଦେଶ ଏକ ଭୂ-ରାଜନୈତିକ ନୁହେଁ ବରଂ ଏକ ଭୂ-ସାଂସ୍କୃତିକ ଦେଶ ଏବଂ ଆମ ଦେଶକୁ ସଂଯୋଗ କରୁଥିବା ସେତୁ ହେଉଛି ସଂସ୍କୃତି । ସେ ଆହୁରି ମଧ୍ୟ କହିଛନ୍ତି ଯେ ଆମ ଦେଶର ଏକତା ସଂସ୍କୃତି ଉପରେ ନିର୍ମିତ, ଆମ ସଂସ୍କୃତି ସଂଯୁକ୍ତ ଏବଂ ଭାଷା ଉପରେ ନିର୍ମିତ ଏବଂ ଯେଉଁଦିନ ଆମେ ଆମର ଭାଷା ହରାଇବୁ, ଦେଶର ଏକତା ବଡ଼ ବିପଦରେ ପଡ଼ିବ।

ଭୀମ ରାଓ ଆମ୍ବେଦକର, ସି ରାଜଗୋପାଳଚାରୀ, ମହାତ୍ମା ଗାନ୍ଧୀ, ସର୍ଦ୍ଦାର ବଲ୍ଲଭଭାଇ ପଟେଲ, କେଏମ୍ ମୁନ୍ସି, ଲାଲା ଲାଜପତ ରାୟ, ନେତାଜୀ ସୁଭାଷ ଚନ୍ଦ୍ର ବୋଷ କିମ୍ବା ଆଚାର୍ଯ୍ୟ କ୍ରିପାଲାନି, ହିନ୍ଦୀକୁ ପ୍ରୋତ୍ସାହନ ଦେଉଥିବା ଆମର ଅଧିକାଂଶ ନେତା ଅଣହିନ୍ଦୀ ଭାଷୀ ଅଞ୍ଚଳରୁ ଆସିଛନ୍ତି ବୋଲି କେନ୍ଦ୍ର ଗୃହମନ୍ତ୍ରୀ କହିଛନ୍ତି। ସେ କହିଥିଲେ ଯେ ସମସ୍ତଙ୍କ ମାତୃଭାଷା ଅଲଗା ଅଲଗା କିନ୍ତୁ ସେମାନେ ବୁଝିଥିଲେ ଯେ ହିନ୍ଦୀ ଭାଷା ଦେଶକୁ ଏକଜୁଟ କରିବାର ଏକ ମାଧ୍ୟମ, ତେଣୁ ହିନ୍ଦୀକୁ ଜାତୀୟ ଏକତାର ପ୍ରତୀକ କରି ସେମାନେ ଏହାକୁ ଏକ ସରକାରୀ ଭାଷାର ରୂପ ଦେଇଛନ୍ତି ।

ଅମିତ ଶାହ କହିଛନ୍ତି ଯେ ଯଦି କେହି ଆମ ଭାଷାକୁ ବଞ୍ଚାଇ ପାରିବେ, ତେବେ ସେ କେବଳ ମା’। ପିଲାଙ୍କ ସହ କେବଳ ମାତୃଭାଷାରେ କଥା ହେବା ପାଇଁ ସେ ସମସ୍ତ ଅଭିଭାବକଙ୍କୁ ଅନୁରୋଧ କରିଛନ୍ତି। ସେ କହିଛନ୍ତି ଯେ ଯଦି ଆମେ ଏପରି କରିବୁ, ତେବେ ଆମ ଭାଷାକୁ କୌଣସି ଜିନିଷ ବିପଦରେ ପକାଇବ ନାହିଁ। ଶ୍ରୀ ଶାହା କହିଥିଲେ ଯେ ଆମ ଭାଷାଦୀର୍ଘ ଦିନ ଧରି ଦେଶ ଓ ବିଶ୍ୱର ସେବା ଜାରି ରଖିବ । ସେ କହିଥିଲେ ଯେ ଆଗାମୀ ସମୟ ସରକାରୀ ଭାଷା ଏବଂ ଅନ୍ୟ ଭାରତୀୟ ଭାଷାର ଅଟେ । ସେ କହିଛନ୍ତି ଯେ ବର୍ତ୍ତମାନ ଏହି ଦେଶକୁ କେହି କୌଣସି ପ୍ରକାର ଦାସତ୍ୱରେ ରଖିପାରିବେ ନାହିଁ ଏବଂ ଏହାକୁ କେବେ ବି ଭାଷାର ଦାସତ୍ୱରେ ରଖିପାରିବେ ନାହିଁ ।

କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ କହିଛନ୍ତି ଯେ ହିନ୍ଦୀକୁ ଆକର୍ଷଣୀୟ ଏବଂ ଗ୍ରହଣୀୟ କରିବା ଦିଗରେ ସରକାରୀ ଭାଷା ବିଭାଗ ଅନେକ କାର୍ଯ୍ୟ କରିଛି। ସେ କହିଥିଲେ ଯେ ହିନ୍ଦୀ ଅନ୍ୟ ଭାରତୀୟ ଭାଷାର ଶବ୍ଦକୁ ମିଶାଇ କେବେ ବି ଅନୁପଯୁକ୍ତ ହୋଇପାରିବ ନାହିଁ କାରଣ ହିନ୍ଦୀ ମା’ ଗଙ୍ଗା ପରି ଏବଂ ସର୍ବଦା ପବିତ୍ର ରହିବ । ଅନେକ ଶବ୍ଦ ହିନ୍ଦୀରେ ନୁହେଁ ବରଂ ଅନ୍ୟ ସ୍ଥାନୀୟ ଭାଷାରେ ଅଛି ଏବଂ ଆମେ ସେମାନଙ୍କୁ ଗ୍ରହଣ କରିଛୁ | ହିନ୍ଦୀ ଏହି ଶବ୍ଦଗୁଡ଼ିକୁ ଗ୍ରହଣ କରୁଥିବା ବେଳେ ହିନ୍ଦୀର ଅନେକ ଶବ୍ଦ କୁ ଆମର ସ୍ଥାନୀୟ ଭାଷା ମଧ୍ୟ ଗ୍ରହଣ କରିଥାଏ ବୋଲି ସେ କହିଛନ୍ତି। ଗୃହମନ୍ତ୍ରୀ କହିଛନ୍ତି ଯେ ଆମେ ଭାରତର ପ୍ରତ୍ୟେକ ଭାଷାର ଶବ୍ଦକୁ ଶବ୍ଦ ସିନ୍ଧୁ ଅଭିଧାନରେ ଅନ୍ତର୍ଭୁକ୍ତ କରିଛୁ । ହିନ୍ଦୀକୁ ଗ୍ରହଣୀୟ, ନମନୀୟ ଓ ବାର୍ତ୍ତାଳାପମୂଳକ କରିବା ଦରକାର ବୋଲି ସେ କହିଛନ୍ତି। ଆଗାମୀ ଲୋକସଭା ନିର୍ବାଚନ ପୂର୍ବରୁ ଶବ୍ଦ ସିନ୍ଧୁ  ଅଭିଧାନ ବିଶ୍ୱର ସର୍ବବୃହତ ଅଭିଧାନରେ ପରିଣତ ହେବ ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି।

ଅମିତ ଶାହ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ କେନ୍ଦ୍ର ସରକାର ଶିକ୍ଷା, ବୈଷୟିକ ଶିକ୍ଷା ଏବଂ ନ୍ୟାୟପାଳିକାରେ ହିନ୍ଦୀର ବ୍ୟବହାର ଦିଗରେ କାର୍ଯ୍ୟ କରୁଛନ୍ତି । ସେ କହିଛନ୍ତି ଯେ ହିନ୍ଦୀକୁ ସଂଘର୍ଷ ସହିତ ନୁହେଁ ବରଂ ସାହସିକ ସ୍ୱୀକୃତି ସହିତ ଆଗକୁ ନେବା ଉଚିତ୍ । ଶ୍ରୀ ଶାହ କହିଛନ୍ତି ଯେ ସୁପ୍ରିମ୍ କୋର୍ଟଙ୍କ ଅନେକ ରାୟ ଅନେକ ଭାରତୀୟ ଭାଷାରେ ଅନୁବାଦିତ ହୋଇଛି। ରାଜସ୍ଥାନ, ଉତ୍ତରପ୍ରଦେଶ, ମଧ୍ୟପ୍ରଦେଶ ଓ ଉତ୍ତରାଖଣ୍ଡ ଆଜି ଡାକ୍ତରୀ ଶିକ୍ଷାର ସମ୍ପୂର୍ଣ୍ଣ ପାଠ୍ୟକ୍ରମକୁ ହିନ୍ଦୀରେ ପ୍ରସ୍ତୁତ କରିଛନ୍ତି। ଭାରତର ପ୍ରାୟ ୧୩ ଟି ଭାଷାରେ ଇଞ୍ଜିନିୟରିଂ ପାଠ୍ୟକ୍ରମ ପ୍ରସ୍ତୁତ କରିବା ପାଇଁ କାର୍ଯ୍ୟ ଚାଲିଛି ଏବଂ ଆଗାମୀ ଦିନରେ ଗବେଷଣାର ଭାଷା ମଧ୍ୟ ନିଶ୍ଚିତ ଭାବେ ହିନ୍ଦୀ ହେବ ବୋଲି ସେ କହିଛନ୍ତି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ହିନ୍ଦୀର ଗ୍ରହଣୀୟତା ବୃଦ୍ଧି ପାଇଁ ଆମର ରୋଡ୍ ମ୍ୟାପ୍ ସଫଳତାର ସହ ଅଗ୍ରଗତି କରୁଛି ବୋଲି କେନ୍ଦ୍ର ଗୃହମନ୍ତ୍ରୀ କହିଛନ୍ତି। ବିଶ୍ୱର ସର୍ବବୃହତ ମଞ୍ଚରେ ଆତ୍ମବିଶ୍ୱାସ ଓ ଗର୍ବର ସହ ହିନ୍ଦୀରେ ଅଭିଭାଷଣ ଦେଇ ହିନ୍ଦୀର ଗ୍ରହଣୀୟତା ବଢ଼ାଇବା ପାଇଁ ପ୍ରଧାନମନ୍ତ୍ରୀ କାର୍ଯ୍ୟ କରିଛନ୍ତି ବୋଲି ସେ କହିଛନ୍ତି। ସେ କହିଛନ୍ତି ଯେ ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ଯେତେବେଳେ ଜାତିସଂଘ ସାଧାରଣ ସଭାକୁ ହିନ୍ଦୀରେ ସମ୍ବୋଧିତ କରିଥିଲେ, ସେତେବେଳେ ସମଗ୍ର ବିଶ୍ୱ ଆଶ୍ଚର୍ଯ୍ୟ ହୋଇଯାଇଥିଲା। ଶ୍ରୀ ଶାହା କହିଥିଲେ ଯେ ଆଜି ହିନ୍ଦୀ ଜାତିସଂଘର ଭାଷାରେ ପରିଣତ ହୋଇଛି ଏବଂ ୧୦ରୁ ଅଧିକ ଦେଶର ଦ୍ୱିତୀୟ ଭାଷା ରେ ପରିଣତ ହୋଇଛି । ହିନ୍ଦୀ ଏବେ ଅନ୍ତର୍ଜାତୀୟ ଭାଷା ହେବା ଦିଗରେ ଅଗ୍ରସର ହେଉଛି ବୋଲି ସେ କହିଛନ୍ତି।

ଅମିତ ଶାହ କହିଥିଲେ ଯେ ଭାରତର ଭାଷାଗୁଡ଼ିକ କେବଳ ହିନ୍ଦୀ ଏବଂ ଏହା ସହିତ ଅନ୍ୟ ସମସ୍ତ ଭାଷା ଦ୍ବାରା ସୁଦୃଢ଼ ହୋଇପାରିବ । ସେ କହିଥିଲେ ଯେ ଆଜି ଗୃହ ମନ୍ତ୍ରଣାଳୟ ଏବଂ ସମବାୟ ମନ୍ତ୍ରଣାଳୟରେ ଫାଇଲ୍ ଏବଂ ଚିଠିପତ୍ର ହିନ୍ଦୀରେ ଲେଖାଯାଉଛି। ସେ କହିଲେ ଯେ ଭାଷା ଏକ ଅଭିବ୍ୟକ୍ତି ଏବଂ ଯେତେବେଳେ ଏହା ନିଜ ଭାଷାରେ ଥାଏ ସେତେବେଳେ ଅଭିବ୍ୟକ୍ତି ସ୍ୱର ସୁଦୃଢ଼ କରିଥାଏ |

ନୂଆଦିଲ୍ଲୀ: କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ ଆଜି ନୂଆଦିଲ୍ଲୀରେ ଦୁଇ ଦିନିଆ ଜାତୀୟ ସୁରକ୍ଷା ରଣନୀତି ସମ୍ମିଳନୀ-୨୦୨୪କୁ ଉଦଘାଟନ କରିଛନ୍ତି।

ଉଦଘାଟନ ପୂର୍ବରୁ କେନ୍ଦ୍ର ଗୃହମନ୍ତ୍ରୀ ସହିଦ ସ୍ତମ୍ଭରେ ପୁଷ୍ପମାଲ୍ୟ ଅର୍ପଣ କରିବା ସହ କର୍ତ୍ତବ୍ୟ ରେ ସର୍ବୋଚ୍ଚ ବଳିଦାନ ଦେଇଥିବା ବୀର ସହିଦମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ବାର୍ଷିକ ଡିଜିଏସପି/ଆଇଜିଏସପି ସମ୍ମିଳନୀରେ ନିଆଯାଇଥିବା ନିଷ୍ପତ୍ତିକୁ କାର୍ଯ୍ୟକାରୀ କରିବା ପାଇଁ କେନ୍ଦ୍ର ଗୃହମନ୍ତ୍ରୀ ଆଜି ଏନସିଆରବି ଦ୍ୱାରା ବିକଶିତ ଡିଜିଏସପି/ଆଇଜିଏସପି ସମ୍ମିଳନୀ ସୁପାରିଶର ଡ୍ୟାସବୋର୍ଡ ଶୁଭାରମ୍ଭ କରିଛନ୍ତି।

ଦୁଇ ଦିନ ଧରି ଚାଲିବାକୁ ଥିବା ଏହି ସମ୍ମିଳନୀରେ ରାଜ୍ୟ, କେନ୍ଦ୍ରଶାସିତ ଅଞ୍ଚଳ, ସିଏପିଏଫ୍ ଏବଂ ସିପିଓର ଶୀର୍ଷ ପୁଲିସ ନେତୃତ୍ୱଙ୍କ ସହ ନୂତନ ଜାତୀୟ ନିରାପତ୍ତା ଆହ୍ୱାନର ସମାଧାନ ପାଇଁ ରୋଡ୍ ମ୍ୟାପ୍ ପ୍ରସ୍ତୁତ କରାଯିବ।

ଜାତୀୟ ସୁରକ୍ଷା ଚ୍ୟାଲେଞ୍ଜର ପରିଚାଳନା କରୁଥିବା ବରିଷ୍ଠ ପୋଲିସ ନେତୃତ୍ୱ, ଅତ୍ୟାଧୁନିକ ସ୍ତରରେ କାର୍ଯ୍ୟରତ ଯୁବ ପୋଲିସ ଅଧିକାରୀ ଏବଂ ବିଶେଷ କ୍ଷେତ୍ରର ବିଶେଷଜ୍ଞଙ୍କ ମଧ୍ୟରେ ଆଲୋଚନା ମାଧ୍ୟମରେ ପ୍ରମୁଖ ଜାତୀୟ ସୁରକ୍ଷା ଆହ୍ୱାନର ସମାଧାନ ଖୋଜିବା ଉଦ୍ଦେଶ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଡିଜିଏସପି /ଆଇଜିଏସପି ସମ୍ମିଳନୀରେ ଜାତୀୟ ସୁରକ୍ଷା ରଣନୀତି ସମ୍ମିଳନୀର ପରିକଳ୍ପନା କରିଥିଲେ। ଡିଜିଏସପି/ଆଇଜିଏସପି ସମ୍ମିଳନୀ -୨୦୨୦ ରେ ପ୍ରଧାନମନ୍ତ୍ରୀ ମୋଦୀ ବ୍ୟାପକ ଅଂଶଗ୍ରହଣ ପାଇଁ ହାଇବ୍ରିଡ୍ ମୋଡ୍ ରେ ସମ୍ମିଳନୀ ଆୟୋଜନ କରିବାକୁ ନିର୍ଦ୍ଦେଶ ଦେଇଥିଲେ।

ଫିଜିକାଲ ଓ ଭର୍ଚୁଆଲ ମୋଡକୁ ମିଶାଇ ହାଇବ୍ରିଡ୍ ଫର୍ମାଟରେ ଆୟୋଜିତ ହେଉଥିବା ଏହି ସମ୍ମିଳନୀରେ ସାରା ଦେଶରୁ ୭୫୦ରୁ ଅଧିକ ଅଧିକାରୀ ଅଂଶଗ୍ରହଣ କରୁଛନ୍ତି। ନିତ୍ୟାନନ୍ଦ ରାୟ ଏବଂ ବନ୍ଦି ସଞ୍ଜୟ କୁମାର, ଗୃହ ରାଷ୍ଟ୍ରମନ୍ତ୍ରୀ, କେନ୍ଦ୍ର ଗୃହ ସଚିବ ଗୋବିନ୍ଦ ମୋହନ, ଅତିରିକ୍ତ/ଉପ ଏନଏସଏ ଏବଂ ସିଏପିଏଫ ତଥା ସିପିଓର ମୁଖ୍ୟମାନେ ଦିଲ୍ଲୀରେ ସମ୍ମିଳନୀରେ ଯୋଗ ଦେଉଛନ୍ତି। ଭର୍ଚୁଆଲ୍ ମାଧ୍ୟମରେ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ଡିଜିଏସପି ତଥା ଅତ୍ୟାଧୁନିକ ସ୍ତରର ଯୁବ ପୁଲିସ ଅଧିକାରୀ ଏବଂ ସ୍ୱତନ୍ତ୍ର କ୍ଷେତ୍ରର ବିଶେଷଜ୍ଞମାନେ ସମ୍ପୃକ୍ତ ରାଜ୍ୟର ରାଜଧାନୀରୁ ଏହି ସମ୍ମିଳନୀରେ ଯୋଗ ଦେଇଥିଲେ।

ନୂଆଦିଲ୍ଲୀ: କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ ଅମିତ ଶାହା ନୂଆଦିଲ୍ଲୀ ଠାରେ ଆଦିବାସୀ ଯୁବ ବିନିମୟ କାର୍ଯ୍ୟକ୍ରମ (ଟିୱାଇଇପି) ଅଧୀନରେ ୨୦୦ ଆଦିବାସୀ ଯୁବକଙ୍କ ସହ ଆଲୋଚନା କରିଛନ୍ତି।

ଆଦିବାସୀ ଯୁବକମାନଙ୍କ ସହ ଆଲୋଚନା ବେଳେ କେନ୍ଦ୍ର ଗୃହମନ୍ତ୍ରୀ କହିଥିଲେ ଯେ ଆଜି ଆଦିବାସୀ ସମ୍ପ୍ରଦାୟର ଲୋକଙ୍କ ପାଇଁ ଅନେକ ସୁଯୋଗ ଉପଲବ୍ଧ ହେଉଛି। ସେ କହିଛନ୍ତି ଯେ, ଜଣେ ଆଦିବାସୀ ମହିଳା ଦ୍ରୌପଦୀ ମୁର୍ମୁ ଭାରତର ରାଷ୍ଟ୍ରପତି ହେବା ଗର୍ବର ବିଷୟ। ଦେଶର ସ୍ୱାଧୀନତା ସଂଗ୍ରାମରେ ସବୁକିଛି ବଳିଦାନ ଦେଇଥିବା ଆଦିବାସୀ ସ୍ୱାଧୀନତା ସଂଗ୍ରାମୀଙ୍କ ସ୍ମୃତିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୦୦ କୋଟି ଟଙ୍କା ବ୍ୟୟରେ ସାରା ଦେଶରେ ୧୦ଟି ଆଦିବାସୀ ସଂଗ୍ରହାଳୟ ନିର୍ମାଣ କରିବାକୁ ନିଷ୍ପତ୍ତି ନେଇଛନ୍ତି ବୋଲି ଶ୍ରୀ ଶାହା କହିଛନ୍ତି।

କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ କହିଛନ୍ତି ଯେ ବାମପନ୍ଥୀ ଉଗ୍ରବାଦୀ ଏବଂ ସେମାନଙ୍କ ବିଚାରଧାରା ଦେଶର ବିକାଶ ଓ ଉଜ୍ଜ୍ୱଳ ଭବିଷ୍ୟତ ବିରୋଧରେ। ବାମପନ୍ଥୀ ଉଗ୍ରବାଦ ପ୍ରଭାବିତ ଅଞ୍ଚଳରେ ଯେଉଁମାନେ ମୋବାଇଲ ଟାୱାର, ରାସ୍ତା ଓ ଅନ୍ୟାନ୍ୟ ଅତ୍ୟାବଶ୍ୟକ ସୁବିଧା ଚାହୁଁନାହାନ୍ତି, ସେମାନେ ଯୁବଗୋଷ୍ଠୀଙ୍କ ଉଜ୍ଜ୍ୱଳ ଭବିଷ୍ୟତ ରାସ୍ତାରେ ବାଧା ସୃଷ୍ଟି କରୁଛନ୍ତି । ଶ୍ରୀ ଶାହା କହିଛନ୍ତି ଯେ ହିଂସା ନିଯୁକ୍ତି ଦେଇପାରିବ ନାହିଁ ଏବଂ ବିକାଶ ଏବଂ ମୌଳିକ ଭିତ୍ତିଭୂମି ସୃଷ୍ଟି ପାଇଁ ସମାଜର ମୁଖ୍ୟ ସ୍ରୋତରେ ସାମିଲ ହେବା ଜରୁରୀ । ସେ ଆହୁରି ମଧ୍ୟ କହିଛନ୍ତି ଯେ ଦେଶରୁ ବାମପନ୍ଥୀ ଉଗ୍ରବାଦର ଚିନ୍ତାଧାରାକୁ ଉଚ୍ଛେଦ କରିବା ରେ ଆଦିବାସୀ ଯୁବକମାନେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବା ଉଚିତ୍। ଗୃହମନ୍ତ୍ରୀ କହିଛନ୍ତି ଯେ ଆଦିବାସୀ ଯୁବକମାନଙ୍କର ଦାୟିତ୍ୱ ହେଉଛି ନା ଭୁଲ ମାର୍ଗରେ ଚାଲିବା କିମ୍ବା ଅନ୍ୟମାନଙ୍କୁ ଏହା କରିବାକୁ ଅନୁମତି ଦେବା।

ଅମିତ ଶାହା କହିଥିଲେ ଯେ ଆଦିବାସୀ ଯୁବକମାନେ ସମସ୍ତଙ୍କୁ ଜଣାଇବା ଉଚିତ ଯେ ଆଜି ଦେଶ ପ୍ରତ୍ୟେକ କ୍ଷେତ୍ରରେ ଅଗ୍ରଗତି କରୁଛି ଏବଂ ପ୍ରତ୍ୟେକ କ୍ଷେତ୍ରରେ ଆଦିବାସୀଙ୍କ ପାଇଁ ପର୍ଯ୍ୟାପ୍ତ ସୁଯୋଗ ରହିଛି । ସେ କହିଥିଲେ ଯେ ଜନ୍ମସ୍ଥାନ ଗୁରୁତ୍ୱପୂର୍ଣ୍ଣ ନୁହେଁ, କିନ୍ତୁ ଜଣେ ବ୍ୟକ୍ତି ଜୀବନରେ କରିଥିବା କାର୍ଯ୍ୟ ଗୁରୁତ୍ୱପୂର୍ଣ୍ଣ । କଠିନ ପରିଶ୍ରମ ଦ୍ୱାରା ହିଁ ଧନ, ଜ୍ଞାନ ଓ ସମ୍ମାନ ହାସଲ କରାଯାଇପାରିବ ବୋଲି ସେ କହିଛନ୍ତି।

ଗୃହ ମନ୍ତ୍ରଣାଳୟ ଗତ ୧୫ ବର୍ଷ ଧରି ଆଦିବାସୀ ଯୁବ ବିନିମୟ କାର୍ଯ୍ୟକ୍ରମ (ଟିୱାଇଇପି) ଚଳାଇ ଆସୁଛି। ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରଣାଳୟ ଅଧୀନରେ ଥିବା ନେହେରୁ ଯୁବ କେନ୍ଦ୍ର ସଂଗଠନ (ଏନଓ୍ବାଇକେଏସ୍) ମାଧ୍ୟମରେ ଏହି କାର୍ଯ୍ୟକ୍ରମ ଚାଲିଛି। ଏହି କାର୍ଯ୍ୟକ୍ରମ ଅଧୀନରେ ବାମପନ୍ଥୀ ଉଗ୍ରବାଦ ଦ୍ୱାରା ସର୍ବାଧିକ ପ୍ରଭାବିତ ଆଭ୍ୟନ୍ତରୀଣ ଅଞ୍ଚଳର ଆଦିବାସୀ ସମ୍ପ୍ରଦାୟର ଯୁବକ ଯୁବତୀମାନଙ୍କୁ ଦେଶର ପ୍ରମୁଖ ସହର ଏବଂ ମହାନଗର ପରିଦର୍ଶନରେ ନିଆଯାଏ । ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ଗୁଡ଼ିକ ହେଲା:

କ. ବାମପନ୍ଥୀ ଉଗ୍ରବାଦ ଦ୍ୱାରା ପ୍ରଭାବିତ ଅଞ୍ଚଳରେ ଯୁବକମାନଙ୍କ ଆକାଂକ୍ଷାକୁ ପ୍ରୋତ୍ସାହିତ କରିବା ।

ଖ. ସିପିଆଇ ମାଓବାଦୀମାନେ ସରକାରଙ୍କ ବିରୋଧରେ ପ୍ରଚାର କରୁଥିବା ଅପପ୍ରଚାରକୁ ପ୍ରତିହତ କରିବା ।

ଗ. ଆଦିବାସୀ ଅଞ୍ଚଳର ଯୁବକମାନଙ୍କୁ ବିକାଶ କାର୍ଯ୍ୟ ଏବଂ ଶିଳ୍ପ ପ୍ରଗତି ବିଷୟରେ ଅବଗତ କରାଇବା ଏବଂ ଭାରତର ସମୃଦ୍ଧ ସାଂସ୍କୃତିକ ଐତିହ୍ୟ ବିଷୟରେ ସେମାନଙ୍କୁ ସଚେତନ କରିବା ।

ଘ. ଏହି ସବୁ କ୍ଷେତ୍ରରେ ଗଣତାନ୍ତ୍ରିକ ବ୍ୟବସ୍ଥା ଉପରେ ବିଶ୍ୱାସ ବୃଦ୍ଧି କରାଇବା ।

ଙ. ଆଦିବାସୀ ସମ୍ପ୍ରଦାୟର ଯୁବକମାନଙ୍କ ମଧ୍ୟରେ ପ୍ରମୁଖ ବିକାଶ ଓ କଲ୍ୟାଣକାରୀ ଯୋଜନା ସମ୍ପର୍କରେ ସଚେତନତା ସୃଷ୍ଟି କରିବା ।

ଚ. ଦେଶର ଅନ୍ୟାନ୍ୟ ସ୍ଥାନରେ ଆଦିବାସୀ ସମ୍ପ୍ରଦାୟର ଯୁବକ ଏବଂ ସେମାନଙ୍କ ସହଯୋଗୀ ଗୋଷ୍ଠୀ ମଧ୍ୟରେ ଏକ ଭାବପ୍ରବଣ ସମ୍ପର୍କ ସୃଷ୍ଟି କରିବା ।

ଆଦିବାସୀ ଯୁବ ବିନିମୟ କାର୍ଯ୍ୟକ୍ରମରେ ୨୦୦୬-୦୭ରୁ ୨୦୨୨-୨୩ ମଧ୍ୟରେ ଆଦିବାସୀ ସମ୍ପ୍ରଦାୟର ୨୫,୮୮୦ ଜଣ ଯୁବକ ଯୁବତୀ ଅଂଶଗ୍ରହଣ କରିଛନ୍ତି। ସେଥିମଧ୍ୟରୁ ୨୦୧୪-୧୫ରୁ ୨୦୨୨-୨୩ ପର୍ଯ୍ୟନ୍ତ ଗତ ୯ ବର୍ଷରେ ୨୦,୭୦୦ ଯୁବକ ଯୁବତୀ ଅଂଶଗ୍ରହଣ କରିଥିବା ବେଳେ ୨୦୧୯-୨୦ରୁ ୨୦୨୨-୨୩ ପର୍ଯ୍ୟନ୍ତ ଗତ ୪ ବର୍ଷରେ ୧୦,୨୦୦ ଜଣ ଯୁବକ ଯୁବତୀ ଅଂଶଗ୍ରହଣ କରିଛନ୍ତି। ଚଳିତ ବର୍ଷ ଟିୱାଇଇପିରେ ୫୦୦୦ ଯୁବକ ଯୁବତୀ ଭାଗ ନେଉଛନ୍ତି । ପୂର୍ବରୁ ପ୍ରତିବର୍ଷ ଏହି କାର୍ଯ୍ୟକ୍ରମରେ ୨୦୦୦ ପ୍ରତିଯୋଗୀ ଭାଗ ନେଉଥିବା ବେଳେ ୨୦୧୯ ଅଗଷ୍ଟରେ ଏହାକୁ ୪୦୦୦ ଓ ୨୦୨୨ରେ ୫୦୦୦କୁ ବୃଦ୍ଧି କରାଯାଇଥିଲା।

ଏହି କାର୍ଯ୍ୟକ୍ରମରେ ସାମ୍ବିଧାନିକ କର୍ତ୍ତୃପକ୍ଷ, ବରିଷ୍ଠ ସରକାରୀ ଅଧିକାରୀ, କ୍ରୀଡ଼ା, ଶିଳ୍ପ, କଳା ଇତ୍ୟାଦି କ୍ଷେତ୍ରରେ ଉଲ୍ଲେଖନୀୟ ସଫଳତା ହାସଲ କରିଥିବା ବ୍ୟକ୍ତି ଓ ଅନ୍ୟାନ୍ୟ ରୋଲ୍ ମଡେଲମାନଙ୍କୁ ଯୁବବର୍ଗଙ୍କ ସହ ଆଲୋଚନା ପାଇଁ ନିମନ୍ତ୍ରଣ କରାଯାଇଥାଏ। ଏହାବ୍ୟତୀତ ଶିଳ୍ପ ପ୍ରଦର୍ଶନୀ ଯାତ୍ରା, ଆଜାଦି କା ଅମୃତ ମହୋତ୍ସବ ଅଧୀନରେ କାର୍ଯ୍ୟକ୍ରମ, ଭାଷଣ ପ୍ରତିଯୋଗିତା, ଦକ୍ଷତା ବିକାଶ, କ୍ୟାରିୟର ମାର୍ଗଦର୍ଶନ, କ୍ରୀଡ଼ା କାର୍ଯ୍ୟକ୍ରମର ପ୍ରଦର୍ଶନ, ସୁରକ୍ଷା ବାହିନୀର ଶିବିର ପରିଦର୍ଶନ ଏବଂ ସାଂସ୍କୃତିକ କାର୍ଯ୍ୟକ୍ରମ ଇତ୍ୟାଦିର ଆୟୋଜନ କରାଯାଏ । ଏହାବ୍ୟତୀତ ଏହି ଯୁବକମାନେ ନିଜ ନିଜ ଗାଁକୁ ଫେରିବା ପରେ ଏକ କାର୍ଯ୍ୟକ୍ରମ ଆୟୋଜନ କରାଯାଏ, ଯେଉଁଥିରେ ସେମାନେ ନିଜ ଅଞ୍ଚଳର ଅନ୍ୟ ଯୁବକ ଯୁବତୀ ଓ ବାସିନ୍ଦାଙ୍କ ସହ ନିଜର ଅନୁଭୂତି ବାଣ୍ଟିଥାନ୍ତି ।

ଟିୱାଇଇପି ଅଧୀନରେ ଚଳିତ ବର୍ଷ ଯୁବବର୍ଗଙ୍କୁ ୨୫ଟି ଗ୍ରୁପ୍ ରେ ଦେଶର ପ୍ରମୁଖ ସହର ଓ ମହାନଗରକୁ ବୁଲିବାକୁ ନିଆଯାଉଛି। ପ୍ରତି ଗୋଷ୍ଠୀରେ ବାମପନ୍ଥୀ ଉଗ୍ରବାଦ ଦ୍ୱାରା ସର୍ବାଧିକ ପ୍ରଭାବିତ ଦୁର୍ଗମ ଅଞ୍ଚଳର ୨୦୦ ଯୁବକ ଓ ଯୁବତୀ ରହିବେ।

ଚଳିତ ବର୍ଷ ତିନୋଟି ଗୋଷ୍ଠୀ ଜାତୀୟ ରାଜଧାନୀ ନୂଆଦିଲ୍ଲୀ ଗସ୍ତ କରୁଛନ୍ତି। ଅକ୍ଟୋବର ୧୫ରୁ ୨୧ତାରିଖପର୍ଯ୍ୟନ୍ତ ପ୍ରଥମ ଗ୍ରୁପ୍ ଦିଲ୍ଲୀ ଗସ୍ତରେ ଆସୁଥିବା ବେଳେ ଏଥିରେ ଛତିଶଗଡ଼ର ବିଜାପୁର, ସୁକମା, ବସ୍ତର, ଦାନ୍ତେୱାଡା, କାଙ୍କେର, ନାରାୟଣପୁର ଓ ରାଜନନ୍ଦଗାଓଁରୁ ୧୪୦ ଜଣ ଏବଂ ମଧ୍ୟପ୍ରଦେଶର ବାଲାଘାଟରୁ ୬୦ ଜଣ ଅଂଶଗ୍ରହଣକାରୀ ରହିଛନ୍ତି।