ଶ୍ରୀନଗର: ଦିନେ ଚଳଚ୍ଚିତ୍ର ସୁଟିଂ ପାଇଁ ଜମ୍ମୁ କାଶ୍ମୀର ସର୍ବୋତ୍ତମ ସ୍ଥାନ ଭାବରେ ପରିଗଣିତ ହୋଇଥିଲା, କିନ୍ତୁ ସେଠାରେ ସିନେମା ଦେଖିବା ବନ୍ଦ ହୋଇଯାଇଥିଲା। ଆତଙ୍କବାଦ ଛାୟାରେ ଏକ ଅସୁରକ୍ଷିତ ପରିବେଶ ମଧ୍ୟରେ କାଶ୍ମୀରର ଉପତ୍ୟକା ଚଳଚ୍ଚିତ୍ରଠାରୁ ଦୂରେଇ ଯାଇଥିଲା। ସିନେମା ହଲ୍ ବନ୍ଦ ରହିଥିଲା। କିନ୍ତୁ ବର୍ତ୍ତମାନ ପରିବେଶ ବଦଳି ଯାଇଛି। ପ୍ରାୟ ୩ ଦଶନ୍ଧି ପରେ, ବର୍ତ୍ତମାନ ପୁଣି ଥରେ ଉପତ୍ୟକାରେ ସିନେମା ଆରମ୍ଭ ହେବାକୁ ଯାଉଛି। ହଁ, ଆସନ୍ତା ମଙ୍ଗଳବାର ଠାରୁ ଅର୍ଥାତ୍ ସେପ୍ଟେମ୍ବର ୨୦ ତାରିଖରୁ କାଶ୍ମୀରର ପ୍ରଥମ ମଲ୍ଟିପ୍ଲେକ୍ସ ଲୋକମାନଙ୍କୁ ମନୋରଞ୍ଜନ କରିବା ଆରମ୍ଭ କରିବ। ୩୨ ବର୍ଷ ପରେ ଉପତ୍ୟକାରେ ରହୁଥିବା ଲୋକମାନେ ହିନ୍ଦୀ ଚଳଚ୍ଚିତ୍ର ଦେଖିପାରିବେ। ଏହା ବଲିଉଡର ପ୍ରସିଦ୍ଧ ଅଭିନେତା ଆମିର ଖାନଙ୍କ ଫିଲ୍ମ ‘ଲାଲ ସିଂ ଚଡ୍ଡା’ରୁ ଆରମ୍ଭ ହେବ।
କାଶ୍ମୀରରେ ରହୁଥିବା ବ୍ୟକ୍ତିମାନେ ନିଶ୍ଚିତ ଭାବରେ ଶ୍ରୀନଗରର ବ୍ରଡୱେ ସିନେମାକୁ ମନେ ରଖିବେ। ଏହି ସିନେମା ହଲକୁ ବର୍ତ୍ତମାନ ଏକ ମଲ୍ଟିପ୍ଲେକ୍ସରେ ପରିଣତ କରାଯାଇଛି। ୩୨ ବର୍ଷ ପରେ ପ୍ରଥମ ଚଳଚ୍ଚିତ୍ର ମଙ୍ଗଳବାର ଦିନ ଶ୍ରୀନଗରର ସୋନୱାର ଅଞ୍ଚଳରେ ଅବସ୍ଥିତ ଏହି ମଲ୍ଟିପ୍ଲେକ୍ସରେ ପ୍ରଦର୍ଶିତ ହେବ। ବ୍ରଡୱେ ସିନେମା ମାଲିକ ବିଜୟ ଧର ଗଣମାଧ୍ୟମକୁ କହିଛନ୍ତି ଯେ, ସିନେମା ତାଙ୍କ ରକ୍ତରେ ଅଛି। ତେଣୁ ବର୍ତ୍ତମାନ କାଶ୍ମୀରର ପରିବେଶ ବଦଳି ଯାଇଥିବାରୁ ସେ ଏହାକୁ ପୁଣି ଥରେ ଆରମ୍ଭ କରିବାକୁ ପଦକ୍ଷେପ ନେଇଛନ୍ତି। ମଙ୍ଗଳବାର ଦିନ କାଶ୍ମୀରର ପ୍ରଥମ ମଲ୍ଟିପ୍ଲେକ୍ସ ଉଦ୍ଘାଟିତ ହେବ।
ବ୍ରଡୱେ ସିନେମାର ଅପରେଟର ବିଜୟ ଧରଙ୍କ ଅନୁଯାୟୀ ସେ ଶ୍ରୀନଗରରେ ମଲ୍ଟିପ୍ଲେକ୍ସ ଆରମ୍ଭ କରିବାକୁ INOX ଗୋଷ୍ଠୀ ସହ କଥା ହୋଇଥିଲେ। ଏହା ପରେ ହିଁ ବ୍ରଡୱେ ସିନେମା ହଲକୁ ମଲ୍ଟିପ୍ଲେକ୍ସରେ ପରିଣତ କରିବାକୁ ନିଷ୍ପତ୍ତି ନିଆଗଲା
