ସୀତାରାମ ଅଗ୍ରୱାଲ
ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ବଉଳାବନ୍ଧ ଗ୍ରାମରେ ଏକ ଦୁଃଖଦ ଘଟଣା ଘଟିଯାଇଛି। ଜଣେ ନବ ବିବାହିତା ବଧୂଙ୍କ ସନ୍ଦେହ ଜନକ ମୃତ୍ୟୁ ହୋଇଥିବା ବେଳେ କାରଣ ଅସ୍ପଷ୍ଟ ରହିଛି।
ସୂଚନା ମୁତାବକ ଦୁଇ ବର୍ଷ ତଳେ ବାଣପୁର ଥାନା ବଉଳାବନ୍ଧ ଗ୍ରାମର ବାଦଲ ବେହେରା ସେହି ଗ୍ରାମର ପିଙ୍କି ବେହେରାଙ୍କୁ ବୈଦୀକ ରୀତିନିତିରେ ବିବାହ କରିଥିଲେ। ଗତ ଗଣେଷ ପୂଜା ଦିନ ପିଙ୍କିଙ୍କର ଏକ ପୁତ୍ର ସନ୍ତାନ ମଧ୍ୟ ଜନ୍ମଲାଭ କରିଥିଲା। ପିଙ୍କିଙ୍କର ସ୍ୱାମୀ ବାହାରେ ମୂଲ ମଜୁରୀ କରି ପରିବାର ପ୍ରତି ପୋଷଣ କରନ୍ତି।
ଗତ କାଲି ରାତିରେ ପିଙ୍କି ଖାଇ ପିଇ ନିଜ ପୁତ୍ର ସନ୍ତାନକୁ କୋଳରେ ଧରି ଶୋଇଥିଲେ। କୌଣସି କାରଣକୁ ନେଇ ହଠାତ୍ ପିଙ୍କି ଅସୁସ୍ଥ ହୋଇ ପଡିବାରୁ ପରିବାର ଲୋକେ ଗ୍ରାମବାସୀଙ୍କ ସହାୟତାରେ ତାଙ୍କୁ ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ।
ତେବେ ଡାକ୍ତର ପିଙ୍କିକୁ ସେଠାରେ ମୃତ ଘୋଷଣା କରିଥିଲେ। ତେବେ ଆତ୍ମୀୟଙ୍କ କଥାରେ କୌଣସି ତାଳ ମେଳ ରହୁନଥିବାରୁ କାର୍ଯ୍ୟରତ ଡାକ୍ତର ସନ୍ଦେହ ପ୍ରକାଶ କରିଥିଲେ। ଏବଂ ଏ ନେଇ ପୋଲିସ୍ କୁ ସୂଚନା ଦେଇଥିଲେ। ନାଚୁଣୀ ଫାଣ୍ଡି ଅଧିକାରୀ କେଶବ ବେହେରା ଖବର ପାଇ ଟାଙ୍ଗୀ ମେଡିକାଲରେ ପହଞ୍ଚିଥିବା ଜଣାପଡିଛି।
