ଅହମ୍ମଦାବାଦ: ଆସନ୍ତାକାଲିଠାରୁ ଭାରତ-ଇଂଲଣ୍ଡ ମଧ୍ୟରେ ୫ ମ୍ୟାଚ ବିଶିଷ୍ଟ ଟି-ଟ୍ୱେଣ୍ଟିର ପ୍ରଥମ ମ୍ୟାଚ ଖେଳାଯିବ। ଟି-ଟ୍ୱେଣ୍ଟିର ସମସ୍ତ ମ୍ୟାଚ ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଖେଳାଯିବ। ଇଂଲଣ୍ଡ ଦଳ ଟି-ଟ୍ୱେଣ୍ଟି ଆଇସିସି ତାଲିକାରେ ଶ୍ରେଷ୍ଠରେ ରହିଛି। ସେଥିପାଇଁ ଇଂଲଣ୍ଡ ବିରୋଧରେ ଶ୍ରେଷ୍ଠ ଦଳକୁ ନେଇ ଭାରତ ପଡିଆକୁ ଓହ୍ଳାଇବ।
ଟି-ଟ୍ୱେଣ୍ଟି ବିଶ୍ଵକପକୁ ଧ୍ୟାନରେ ରଖି ଭାରତୀୟ ଦଳ ପାଇଁ ଏହି ସିରିଜ ଗୁରୁତ୍ୱପୂର୍ଣ୍ଣ ଅଟେ। ପ୍ରଥମ ତିନୋଟି ମ୍ୟାଚ ପାଇଁ ମଜବୁତ ଟିମକୁ ନେଇ ଖେଳିବା ଲକ୍ଷ୍ୟରେ ରହିଛି ଭାରତ। ଟେଷ୍ଟ ସିରିଜରେ ଭଲ ପ୍ରଦର୍ଶନ କରିଥିବା ରିଷଭ ପନ୍ତଙ୍କ ଟି-ଟ୍ୱେଣ୍ଟିରେ ଖେଳିବା ସମ୍ଭାବନା ଅଧିକ ରହିଛି। ପନ୍ତ ଖେଳିଲେ ଅଷ୍ଟ୍ରେଲିଆ ସିରିଜରେ ୱିକେଟ କିପିଂ କରୁଥିବା କେଏଲ ରାହୁଲଙ୍କୁ ବ୍ୟାଟ୍ସମ୍ୟାନ ରୂପେ ଖେଳା ଯାଇପାରେ।
ପ୍ରାରମ୍ଭିକ ଯୋଡି ଭାବେ ରୋହିତ ଶର୍ମାଙ୍କ ସହ ଶିଖର ଧବନ ଖେଳିପାରନ୍ତି। ତୃତୀୟ ନମ୍ବରରେ ଅଧିନାୟକ ବିରାଟ କୋହଲୀ, ଚତୁର୍ଥରେ କେଏଲ ରାହୁଲ, ପଞ୍ଚମରେ ରିଷଭ ପନ୍ତ, ଷଷ୍ଠ ଏବଂ ସପ୍ତମ ନମ୍ବର ପାଇଁ ଅଲରାଉଣ୍ଡରଙ୍କୁ ଟିମରେ ସାମିଲ କରାଯାଇପାରେ। ଷଷ୍ଠ ସ୍ଥାନରେ ହାର୍ଦିକ ପାଣ୍ଡ୍ୟା ଏବଂ ସପ୍ତମ ସ୍ଥାନରେ ୱାସିଙ୍ଗଟନ ସୁନ୍ଦରଙ୍କୁ ଜାଗା ମିଳିପାରେ।
ଏହାପରେ ବୋଲରଙ୍କ ନମ୍ବର ଆସିବ। ଅଭିଜ୍ଞ ଭୁବନେଶ୍ଵର କୁମାରଙ୍କୁ ଏକ ବର୍ଷ ପରେ ଦଳରେ ସାମିଲ ହେବେ। ଜସପ୍ରୀତ ବୁମରାଙ୍କ ଅନୁପସ୍ଥିତିରେ ବୋଲିଂ ଭାର ଭୁବନେଶ୍ବରଙ୍କ କାନ୍ଧ ଉପରେ ରହିବ। ଭୁବନେଶ୍ବରଙ୍କ ସାଥିରେ ଶାର୍ଦ୍ଦୁଳ ଠାକୁର ଏବଂ ଦୀପକ ଚହର ବୋଲିଂ ବିଭାଗ ସମ୍ଭାଳି ପାରନ୍ତି। ସେହିପରି ସ୍ପିନର ଭାବେ ୟୁଜବେନ୍ଦ୍ର ଚହଲ ଖେଳିପାରନ୍ତି।
