ନୂଆଦିଲ୍ଲୀ: ଭାରତରେ ଟୀକାକରଣ ଅଭିଯାନ ଦ୍ରୁତଗତିରେ ଚାଲିଛି। ଏହି ସମୟରେ ୧୫ ବର୍ଷରୁ ୧୮ ବର୍ଷ ବୟସର ପିଲାମାନଙ୍କୁ କରୋନା ଟିକା ଦେବା ପାଇଁ ଘୋଷଣା କରାଯାଇଛି। ଏଥିପାଇଁ ଆଜିଠାରୁ ଟୀକାକରଣ ପାଇଁ କୋ-ୱିନ ପୋର୍ଟାଲରେ ପଞ୍ଜୀକରଣ ଆରମ୍ଭ ହୋଇଛି। ଡିସେମ୍ବର ୨୫ ତାରିଖ ୨୦୨୧ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୧୫-୧୮ ବର୍ଷ ବୟସ ବର୍ଗଙ୍କ ପାଇଁ ଟୀକାକରଣ ଆରମ୍ଭ କରିବାକୁ ଘୋଷଣା କରିଥିଲେ। ଜାନୁଆରୀ ୩ ତାରିଖରୁ ଟୀକାକରଣ ଆରମ୍ଭ ହେବ ବୋଲି ସେ କହିଥିଲେ।
ଏଥିସହିତ ସ୍ୱାସ୍ଥ୍ୟସେବା ଏବଂ ଫ୍ରଣ୍ଟଲାଇନ କର୍ମଚାରୀଙ୍କ ପାଇଁ ମଧ୍ୟ ଏକ ବଡ ଘୋଷଣା କରାଯାଇଥିଲା। ସ୍ୱାସ୍ଥ୍ୟକର୍ମୀ ଏବଂ ଫ୍ରଣ୍ଟଲାଇନ କର୍ମଚାରୀଙ୍କୁ ଟୀକାକରଣର ତୃତୀୟ ସତର୍କତା ଡୋଜ ଦିଆଯିବ ବୋଲୋ ପ୍ରଧାନମନ୍ତ୍ରୀ ଘୋଷଣା କରିଥିଲେ। ଏହା ଜାନୁଆରୀ ୧୦ ତାରିଖ ସୋମବାର ଠାରୁ ଆରମ୍ଭ ହେବ। ୧୫-୧୮ ବର୍ଷ ବୟସ ବର୍ଗଙ୍କ ପାଇଁ ‘କୋଭାକ୍ସିନ୍’ ଟୀକା ଦିଆଯିବ ବୋଲି ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳକୁ କେନ୍ଦ୍ର ସ୍ୱାସ୍ଥ୍ୟ ସଚିବ ସୂଚନା ଦେଇଛନ୍ତି।
କୋଭାକ୍ସିନର ଅତିରିକ୍ତ ମାତ୍ରା ସମସ୍ତ ରାଜ୍ୟକୁ ପଠାଯିବ। ଟିକା ନେବାବେଳେ କୋଭିଡ ପ୍ରୋଟୋକଲ ଅନୁସରଣ କରିବା ବାଧ୍ୟତାମୂଳକ। ଟୀକାକରଣ ପରେ ଆପଣଙ୍କୁ ଟୀକା କେନ୍ଦ୍ରରେ ଅଧ ଘଣ୍ଟା ରହିବାକୁ ପଡିବ। ଏହି ସମୟ ମଧ୍ୟରେ ସେମାନଙ୍କର ସ୍ୱାସ୍ଥ୍ୟ ଉପରେ ନଜର ରଖାଯିବ। ପ୍ରଥମ ଟୀକାକରଣର ମାତ୍ର ୨୮ ଦିନ ପରେ ପିଲାମାନେ ଟୀକାକରଣର ଦ୍ୱିତୀୟ ଡୋଜ ପାଇବେ। ଲୋକମାନେ ମୋବାଇଲ୍ କିମ୍ବା ଲାପଟପ୍ ରେ କୋ-ୱିନ ପୋର୍ଟାଲ ମାଧ୍ୟମରେ ଟୀକା ର ପ୍ରଥମ ଡୋଜ ବୁକ୍ କରିବାକୁ ସକ୍ଷମ ହେବେ। ଏଥିପାଇଁ, ଆପଣ ଆପଣଙ୍କର ମୋବାଇଲ୍ ନମ୍ବର ସହିତ ଏକ ଆକାଉଣ୍ଟ୍ ସୃଷ୍ଟି କରି ପଞ୍ଜୀକରଣ ପ୍ରକ୍ରିୟା ସମାପ୍ତ କରିପାରିବେ।