ସୀତାରାମ ଅଗ୍ରୱାଲ
ବାଣପୁର: ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର ମାଟିର ସୁଯୋଗ୍ୟ ସନ୍ତାନ ଅଧ୍ୟାପକ ରଞ୍ଜନ କୁମାର ମହାପାତ୍ର ନିକଟରେ ଖୋର୍ଦ୍ଧା ଜ଼ିଲ୍ଲା ଯୁବ ରେଡକ୍ରସର ଜ଼ିଲ୍ଲା ସଂଯୋଜକ ଭାବେ ମନୋନୀତ ହୋଇଛନ୍ତି। ରଞ୍ଜନଙ୍କ ଜନ୍ମସ୍ଥାନ ବାଣପୁର ସ୍ଥିତ ଭୀମପୁର ଗ୍ରାମ ଅଟେ। ବର୍ତ୍ତମାନ ସେ ଟାଙ୍ଗୀ ସ୍ଥିତ ଦୂର୍ଗା ଚରଣ ଚିଲିକା ଉଚ୍ଚ ମାଧ୍ୟମିକ ବିଦ୍ୟାଳୟରେ ପ୍ରାଣୀ ବିଜ୍ଞାନ ବିଭାଗର ଅଧ୍ୟାପକ ଭାବେ କାର୍ଯ୍ୟରତ ଅଛନ୍ତି।
ସମଗ୍ର ଖୋର୍ଦ୍ଧା ଜିଲ୍ଲା ତଥା ଓଡ଼ିଶାରେ ରକ୍ତଦାନ କ୍ଷେତ୍ରରେ ଏକ ବୈପ୍ଲବିକ ପରିବର୍ତ୍ତନ ଆଣିବାକୁ ସକ୍ଷମ ହୋଇପାରିଛନ୍ତି ଏହି ଯୁବ ସ୍ଵେଚ୍ଛାସେବୀ। ‘ଦି ବ୍ଲଡ଼ ଡୋନର୍ସ ଓଡିଶା ‘ ନାମକ ଏକ ସାମାଜିକ ସଂଗଠନ ମାଧ୍ୟମରେ ରଞ୍ଜନ ସାରା ଓଡ଼ିଶାର କୋଣ ଅନୁକୋଣରେ ରକ୍ତଦାତାମାନଙ୍କୁ ପହଞ୍ଚାଉଛନ୍ତି ଏବଂ ନିଜେ ମଧ୍ୟ ରକ୍ତଦାନ କରୁଛନ୍ତି।
ଶ୍ରୀ ମହାପାତ୍ର ନିଜର ଉକ୍ତ ମହତ କାର୍ଯ୍ୟଲାଗି ଏହା ପୂର୍ବରୁ ଅନେକ ସଂସ୍ଥା ଦ୍ବାରା ଏକାଧିକ ଥର ପୁରସ୍କୃତ ହୋଇଛନ୍ତି। ତତସହିତ ଅନେକ ରକ୍ତଦାନ ଶିବିର ମଧ୍ୟ ଆୟୋଜନ କରିଛନ୍ତି। ଅନୁରୂପ ଭାବେ ନିଜ ଜନ୍ମମାଟି ଚିଲିକାରେ କିଛି ସ୍ଵେଚ୍ଛାସେବୀଙ୍କ ସହଭାଗିତାରେ ‘ବ୍ଲଡ଼ ଆର୍ମି ଚିଲିକା’ ନାମକ ସାମାଜିକ ସଂଗଠନ ମଧ୍ୟ ଗଠନ କରିଛନ୍ତି ଉକ୍ତ ଯୁବ ଅଧ୍ୟାପକ।
ତେବେ ରଞ୍ଜନଙ୍କ ଖୋର୍ଦ୍ଧା ଜ଼ିଲ୍ଲା ଯୁବ ରେଡକ୍ରସର ଜ଼ିଲ୍ଲା ସଂଯୋଜକ ଭାବେ ମନୋନୀତ ହେବା ବିଷୟ ସମଗ୍ର ଜିଲ୍ଲା ତଥା ଉକ୍ତ ଅନୁଷ୍ଠାନ ପାଇଁ ଗର୍ବ ଓ ଗୌରବର ବିଷୟ ଅଟେ। ତାଙ୍କର ଏହି ସଫଳତା ପାଇଁ ଜନ୍ମମାଟି ବାଣପୁର ତଥା ସାରା ଜିଲ୍ଲାରେ ଆନନ୍ଦର ଲହରି ଖେଳିଯାଇଛି।