Tag: ନରେନ୍ଦ୍ର ମୋଦୀ

ନରେନ୍ଦ୍ର ମୋଦୀ, ପ୍ରଧାନମନ୍ତ୍ରୀ

କିଛି ଦିନ ତଳେ ଆମେ ପ୍ରଫେସର ଏମ୍ ଏସ୍ ସ୍ୱାମୀନାଥନଙ୍କୁ ହରାଇଛୁ। କୃଷି ବିଜ୍ଞାନରେ ବିପ୍ଳବ ଆଣିଥିବା ଜଣେ ଦୂରଦର୍ଶୀଙ୍କୁ ଆମ ଦେଶ ହରାଇଛି। ଭାରତ ପାଇଁ ତାଙ୍କର ଅବଦାନ ସର୍ବଦା ସ୍ୱର୍ଣ୍ଣାକ୍ଷରରେ ଲିପିବଦ୍ଧ ହୋଇ ରହିବ। ପ୍ରଫେସର ଏମ୍ ଏସ୍ ସ୍ୱାମୀନାଥନ୍ ଭାରତକୁ ଭଲ ପାଉଥିଲେ। ସେ ଚାହୁଁଥିଲେ, ଆମ ଦେଶ ସମୃଦ୍ଧ ହେଉ, ବିଶେଷ କରି ଆମ କୃଷକମାନେ ମର୍ଯ୍ୟାଦାପୂର୍ଣ୍ଣ ଜୀବନ ଯାପନ କରନ୍ତୁ । ଶିକ୍ଷାଗତ ଦୃଷ୍ଟିରୁ ସେ ଯେକୌଣସି କ୍ୟାରିୟର ବାଛି ପାରିଥାନ୍ତେ, କିନ୍ତୁ ୧୯୪୩ ମସିହାର ବଙ୍ଗ ଦୁର୍ଭିକ୍ଷ ଦେଖି ସେ ଏତେ ପ୍ରଭାବିତ ହୋଇଥିଲେ ଯେ କୃଷି କ୍ଷେତ୍ରରେ ଅଧ୍ୟୟନ ପାଇଁ ପଣ କରିଥିଲେ।

ଖୁବ୍‌ କମ୍ ବୟସରେ, ସେ ଡକ୍ଟର ନର୍ମାନ ବୋର୍ଲାଗଙ୍କ ସଂସ୍ପର୍ଶରେ ଆସିଥିଲେ ଏବଂ ତାଙ୍କ କାର୍ଯ୍ୟକୁ ଅତି ବିସ୍ତୃତ ଭାବରେ ଅନୁସରଣ କରିଥିଲେ। ୧୯୫୦ ଦଶକରେ ସ୍ୱାମୀନାଥନଙ୍କୁ ଆମେରିକାରେ ଅଧ୍ୟାପକ ପଦବୀ ପାଇଁ ପ୍ରସ୍ତାବ ଦିଆଯାଇଥିଲା କିନ୍ତୁ ସେ ଭାରତରେ ଏବଂ ଭାରତ ପାଇଁ କାମ କରିବାକୁ ଚାହୁଁଥିବାରୁ ଏହାକୁ ପ୍ରତ୍ୟାଖ୍ୟାନ କରିଥିଲେ।

ମୁଁ ଚାହୁଁଛି ଯେ, ଆପଣମାନେ ସମସ୍ତେ ସେହି ଆହ୍ୱାନପୂର୍ଣ୍ଣ ପରିସ୍ଥିତି ବିଷୟରେ ଚିନ୍ତା କରନ୍ତୁ ଯେଉଁଥିରେ ପ୍ରଫେସର ସ୍ୱାମୀନାଥନ ଦୃଢ଼ ଭାବରେ ଠିଆ ହୋଇଥିଲେ ଏବଂ ଆମ ଦେଶକୁ ଆତ୍ମନିର୍ଭରଶୀଳତା ଓ ଆତ୍ମବିଶ୍ୱାସର ମାର୍ଗରେ ଆଗେଇ ନେଇଥିଲେ। ସ୍ୱାଧୀନତା ପରଠାରୁ ପ୍ରଥମ ଦୁଇ ଦଶନ୍ଧି ମଧ୍ୟରେ ଆମେ ଅନେକ ଆହ୍ୱାନର ସମ୍ମୁଖୀନ ହୋଇଥିଲୁ ଏବଂ ସେଥିମଧ୍ୟରୁ ଗୋଟିଏ ଥିଲା ଖାଦ୍ୟ ଅଭାବ। ୧୯୬୦ ଦଶକର ପ୍ରାରମ୍ଭରେ ଭାରତ ଦୁର୍ଭିକ୍ଷର ଅଶୁଭ ଛାୟା ସହ ସଂଘର୍ଷ କରୁଥିଲା ଏବଂ ସେତେବେଳେ ପ୍ରଫେସର ସ୍ୱାମୀନାଥନଙ୍କ ଅତୁଳନୀୟ ପ୍ରତିବଦ୍ଧତା ଓ ଦୂରଦୃଷ୍ଟି କୃଷି କ୍ଷେତ୍ରରେ ସମୃଦ୍ଧିର ଏକ ନୂଆ ଯୁଗ ଆରମ୍ଭ କରିଥିଲା। କୃଷି ଏବଂ ଗହମ ପ୍ରଜନନ ଭଳି ନିର୍ଦ୍ଦିଷ୍ଟ କ୍ଷେତ୍ରରେ ସେ ଅଗ୍ରଣୀ ଗବେଷଣା କାର୍ଯ୍ୟ କରିଥିଲେ। ଫଳରେ ଦେଶରେ ଗହମ ଉତ୍ପାଦନ ଯଥେଷ୍ଟ ବୃଦ୍ଧି ପାଇଲା ଏବଂ ଭାରତ ଖାଦ୍ୟ ଅଭାବୀ ଦେଶରୁ ଏକ ଆତ୍ମନିର୍ଭରଶୀଳ ରାଷ୍ଟ୍ରରେ ପରିଣତ ହୋଇଥିଲା। ଏହି ବିରାଟ ଉପଲବ୍ଧି ପାଇଁ ତାଙ୍କୁ ସମ୍ମାନର ସହ “ଭାରତୀୟ ସବୁଜ ବିପ୍ଳବର ଜନକ” ବୋଲି କୁହାଯାଏ।

ସବୁଜ ବିପ୍ଳବ ଭାରତର “କ୍ୟାନ୍ ଡୁ ସ୍ପିରିଟ୍” (କରିପାରିବାର ଇଚ୍ଛାଶକ୍ତି)ର ଏକ ଝଲକ ପ୍ରଦାନ କରିଥିଲା – ଯଦି ଆମ ଆଗରେ ୧୦୦ କୋଟି ଆହ୍ୱାନ ରହିଛି ତା’ହେଲେ ସେହି ଆହ୍ୱାନଗୁଡ଼ିକୁ ଅତିକ୍ରମ କରିବା ପାଇଁ ନବସୃଜନର ଜ୍ୟୋତି ସହିତ ଆମ ପାଖରେ ୧୦୦ କୋଟି ମସ୍ତିଷ୍କ ମଧ୍ୟ ଅଛି। ସବୁଜ ବିପ୍ଳବ ଆରମ୍ଭ ହେବାର ପାଞ୍ଚ ଦଶନ୍ଧି ପରେ ଭାରତୀୟ କୃଷି ଅଧିକ ଆଧୁନିକ ଓ ପ୍ରଗତିଶୀଳ ହୋଇପାରିଛି। କିନ୍ତୁ ପ୍ରଫେସର ସ୍ୱାମୀନାଥନ ଯେଉଁ ମୂଳଦୁଆ ପ୍ରତିଷ୍ଠା କରିଯାଇଛନ୍ତି, ତାହା କେବେ ବି ଭୁଲିହେବ ନାହିଁ।

ବର୍ଷ ବର୍ଷ ଧରି ସେ ଆଳୁ ଫସଲକୁ ପ୍ରଭାବିତ କରୁଥିବା ପରଜୀବୀଙ୍କ ମୁକାବିଲା ଦିଗରେ ଅଗ୍ରଣୀ ଗବେଷଣା କରିଥିଲେ। ତାଙ୍କର ଗବେଷଣା ମଧ୍ୟ ଆଳୁ ଫସଲକୁ ଥଣ୍ଡା ପାଗ ସହ୍ୟ କରିବାରେ ସକ୍ଷମ କରିଥିଲା। ଆଜି ସାରା ବିଶ୍ୱ ମିଲେଟ୍ ବା ଶ୍ରୀଅନ୍ନକୁ ‘ସୁପର ଫୁଡ୍’ ବୋଲି କହୁଛି, କିନ୍ତୁ ପ୍ରଫେସର ସ୍ୱାମୀନାଥନ୍ ୧୯୯୦ ମସିହାରୁ ମିଲେଟ୍‌ ଚାଷ ଓ ଏହାର ଉପଯୋଗ ଉପରେ ବିଶେଷ ଗୁରୁତ୍ୱ ଦେଇଥିଲେ।

ପ୍ରଫେସର ସ୍ୱାମୀନାଥନଙ୍କ ସହ ମୁଁ ବ୍ୟକ୍ତିଗତ ଭାବେ ଅନେକ ଥର ମିଶିଛି। ୨୦୦୧ରେ ମୁଁ ଗୁଜରାଟର ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିବା ପରେ ଆମ ସମ୍ପର୍କ ଆରମ୍ଭ ହୋଇଥିଲା। ସେହି ସମୟରେ ଗୁଜରାଟ ନିଜର କୃଷି ଦକ୍ଷତା ପାଇଁ ସେତେ ପରିଚିତ ନଥିଲା। କ୍ରମାଗତ ମରୁଡ଼ି, ବାତ୍ୟା ଓ ଭୂମିକମ୍ପ ଯୋଗୁଁ ରାଜ୍ୟର ବିକାଶ ଧାରା ପ୍ରଭାବିତ ହୋଇଥିଲା। ଆମେ ଆରମ୍ଭ କରିଥିବା ଅନେକ ଯୋଜନା ମଧ୍ୟରୁ ଗୋଟିଏ ଥିଲା ମୃତ୍ତିକା ସ୍ୱାସ୍ଥ୍ୟ କାର୍ଡ, ଯାହା ମାଟିକୁ ଭଲ ଭାବରେ ବୁଝିବାରେ ଏବଂ ଯଦି ସମସ୍ୟା ସୃଷ୍ଟି ହୁଏ ତେବେ ତାହାର ସମାଧାନ କରିବାରେ ଆମକୁ ସକ୍ଷମ କରିଥିଲା। ଏହି ଯୋଜନା ପରିପ୍ରେକ୍ଷୀରେ ମୁଁ ପ୍ରଫେସର ସ୍ୱାମୀନାଥନଙ୍କୁ ଭେଟିଥିଲି। ସେ ଏହି ଯୋଜନାକୁ ପ୍ରଶଂସା କରିବା ସହ ଏଥିପାଇଁ ନିଜର ମୂଲ୍ୟବାନ ମତାମତ ମଧ୍ୟ ପ୍ରଦାନ କରିଥିଲେ। ଏହି ଯୋଜନାକୁ ନେଇ ସନ୍ଦେହ ଥିବା ଲୋକଙ୍କୁ ବୁଝାଇବାରେ ତାଙ୍କର ସମର୍ଥନ ଯଥେଷ୍ଟ ଥିଲା ଯାହାକି ପରବର୍ତ୍ତୀ ସମୟରେ ଗୁଜରାଟରେ କୃଷିର ସଫଳତା ପାଇଁ କ୍ଷେତ୍ର ପ୍ରସ୍ତୁତ କଲା।

ମୋର ମୁଖ୍ୟମନ୍ତ୍ରୀ କାର୍ଯ୍ୟକାଳ ସମୟରେ ଏବଂ ଯେତେବେଳେ ମୁଁ ପ୍ରଧାନମନ୍ତ୍ରୀ ଭାବରେ ଦାୟିତ୍ୱ ନେଇଥିଲି ସେତେବେଳେ ମଧ୍ୟ ଆମର କଥାବାର୍ତ୍ତା ଜାରି ରହିଥିଲା। ମୁଁ ୨୦୧୬ରେ ଅନ୍ତର୍ଜାତୀୟ କୃଷି-ଜୈବ ବିବିଧତା କଂଗ୍ରେସରେ ତାଙ୍କୁ ଭେଟିଥିଲି ଏବଂ ପରବର୍ଷ ୨୦୧୭ରେ ମୁଁ ତାଙ୍କ ଦ୍ୱାରା ଲିଖିତ ଏକ ଦୁଇ ଭାଗ ବିଶିଷ୍ଟ ପୁସ୍ତକ ଶୃଙ୍ଖଳାକୁ ଉନ୍ମୋଚନ କରିଥିଲି।

‘କୁରାଲ’ରେ କୃଷକମାନଙ୍କୁ ଏକ କେନ୍ଦ୍ରବିନ୍ଦୁ ଭାବରେ ବର୍ଣ୍ଣନା କରାଯାଇଛି ଯାହା ବିଶ୍ୱକୁ ଏକାଠି ରଖିଥାଏ। ଏହାର କାରଣ  ହେଉଛି କୃଷକମାନେ ହିଁ ସମସ୍ତଙ୍କୁ ବଞ୍ଚାଇ ରଖିଥାନ୍ତି। ପ୍ରଫେସର ସ୍ୱାମୀନାଥନ ଏହି ନୀତିକୁ ଭଲ ଭାବରେ ବୁଝିଥିଲେ। ଅନେକ ଲୋକ ତାଙ୍କୁ “କୃଷି ବୈଜ୍ଞାନିକ” ବୋଲି କୁହନ୍ତି। କିନ୍ତୁ ମୁଁ ସବୁବେଳେ ବିଶ୍ୱାସ କରିଆସିଛି ଯେ ତାଙ୍କ ବ୍ୟକ୍ତିତ୍ୱର ପରିସର ଏହାଠାରୁ ଆହୁରି ଅଧିକ ଥିଲା। ପ୍ରକୃତରେ ସେ “କିଷାନ ବୈଜ୍ଞାନିକ” – ଚାଷୀଙ୍କ ବୈଜ୍ଞାନିକ ଥିଲେ । ତାଙ୍କ ହୃଦୟ ଜଣେ ଚାଷୀଙ୍କ ଭଳି ଥିଲା। ତାଙ୍କ କୃତିର ସଫଳତା କେବଳ ଶିକ୍ଷାଗତ ଉତ୍କର୍ଷ ମଧ୍ୟରେ ସୀମିତ ନାହିଁ; ଏହା ପରୀକ୍ଷାଗାର ବାହାରେ, ଫାର୍ମ ଏବଂ ଚାଷ ଜମିରେ ପ୍ରଭାବ ବିସ୍ତାର କରିଛି। ତାଙ୍କର କାର୍ଯ୍ୟ ବୈଜ୍ଞାନିକ ଜ୍ଞାନ ଏବଂ ଏହାର ବ୍ୟବହାରିକ ପ୍ରୟୋଗ ମଧ୍ୟରେ ଥିବା ବ୍ୟବଧାନକୁ ହ୍ରାସ କରିପାରିଛି। ସେ ଦୀର୍ଘସ୍ଥାୟୀ କୃଷି ପାଇଁ ନିରନ୍ତର ସମର୍ଥନ କରୁଥିଲେ ଏବଂ ମାନବ ସମାଜର ଉନ୍ନତି ଓ ପରିବେଶର ସ୍ଥାୟିତ୍ୱ ମଧ୍ୟରେ ସୂକ୍ଷ୍ମ ସନ୍ତୁଳନ ଉପରେ ଗୁରୁତ୍ୱାରୋପ କରିଥିଲେ। ତାଙ୍କର ଆଉ ଗୋଟିଏ ଗୁଣ ବିଷୟରେ ମୁଁ ଏଠାରେ ଉଲ୍ଲେଖ କରିବାକୁ ଚାହୁଁଛି, କ୍ଷୁଦ୍ର ଚାଷୀମାନଙ୍କ ଜୀବନରେ ଉନ୍ନତି ଆଣିବା ଏବଂ ସେମାନେ ମଧ୍ୟ ଯେପରି ନୂଆ ଉଦ୍ଭାବନର ଫଳ ଉପଭୋଗ କରିପାରିବେ ତା’ଉପରେ ପ୍ରଫେସର ସ୍ୱାମୀନାଥନ ବିଶେଷ ଗୁରୁତ୍ୱ ଦେଉଥିଲେ । ମହିଳା ଚାଷୀଙ୍କ ଜୀବନରେ ଉନ୍ନତି ଆଣିବା ପାଇଁ ସେ ବିଶେଷ ଭାବରେ ଆଗ୍ରହୀ ଥିଲେ।

ପ୍ରଫେସର ଏମ୍ ଏସ୍ ସ୍ୱାମୀନାଥନଙ୍କ ବ୍ୟକ୍ତିତ୍ୱର ଆଉ ଏକ ଦିଗ ଅଛି ଯାହା ଉଲ୍ଲେଖନୀୟ – ସେ ନୂତନ ଉଦ୍ଭାବନ ଏବଂ ପ୍ରଶିକ୍ଷଣ କ୍ଷେତ୍ରରେ ଜଣେ ଆଦର୍ଶ ଭାବରେ ଠିଆ ହୋଇଛନ୍ତି । ୧୯୮୭ ମସିହାରେ ସେ ବିଶ୍ୱ ଖାଦ୍ୟ ପୁରସ୍କାର ପାଇଥିଲେ ଏବଂ ସେ ଥିଲେ ଏହି ସମ୍ମାନଜନକ ପୁରସ୍କାରର ପ୍ରଥମ ବିଜେତା। ପ୍ରଫେସର ସ୍ୱାମୀନାଥନ ଏହି ପୁରସ୍କାର ରାଶିକୁ ଏକ ଅଣଲାଭକାରୀ ଗବେଷଣା ଫାଉଣ୍ଡେସନ ପ୍ରତିଷ୍ଠା କରିବାରେ ବ୍ୟବହାର କରିଥିଲେ । ଆଜି ପର୍ଯ୍ୟନ୍ତ ଏହା ବିଭିନ୍ନ କ୍ଷେତ୍ରରେ ବ୍ୟାପକ କାର୍ଯ୍ୟ କରୁଛି । ସେ ଅଗଣିତ ବ୍ୟକ୍ତିତ୍ଵଙ୍କୁ ଅନୁପ୍ରାଣିତ କରିଛନ୍ତି ଏବଂ ସେମାନଙ୍କ ଭିତରେ ଅଧ୍ୟୟନ ଏବଂ ଉଦ୍ଭାବନ ପ୍ରତି ଆଗ୍ରହ ସୃଷ୍ଟି କରିଛନ୍ତି । ଦ୍ରୁତ ଗତିରେ ପରିବର୍ତ୍ତିତ ଦୁନିଆରେ ତାଙ୍କ ଜୀବନ ଆମକୁ ଜ୍ଞାନ, ମାର୍ଗଦର୍ଶନ ଏବଂ ଉଦ୍ଭାବନରେ ରହିଥିବା ଦୃଢ଼ ସାମର୍ଥ୍ୟ ବିଷୟରେ ସ୍ମରଣ କରାଇ ଦେଇଥାଏ। ସେ ଜଣେ ଅନୁଷ୍ଠାନ ନିର୍ମାତା ମଧ୍ୟ ଥିଲେ। ସେ ଏମିତି ଅନେକ ଅନୁଷ୍ଠାନ ନିର୍ମାଣ କରିଛନ୍ତି ଯେଉଁଠି ବ୍ୟାପକ ଗବେଷଣା କରାଯାଉଛି। ମାନିଲାସ୍ଥିତ ଅନ୍ତର୍ଜାତୀୟ ଧାନ ଗବେଷଣା ପ୍ରତିଷ୍ଠାନର ନିର୍ଦ୍ଦେଶକ ଭାବରେ ସେ ଦାୟିତ୍ୱ ନିର୍ବାହ କରିଥିଲେ। ତାଙ୍କର ପ୍ରୟାସ ଯୋଗୁ ୨୦୧୮ରେ ବାରଣାସୀରେ ଦକ୍ଷିଣ ଏସିଆ ଆଞ୍ଚଳିକ ଅନ୍ତର୍ଜାତୀୟ ଧାନ ଗବେଷଣା ପ୍ରତିଷ୍ଠାନ ଖୋଲାଯାଇଥିଲା ।

ଡକ୍ଟର ସ୍ୱାମୀନାଥନଙ୍କୁ ଶ୍ରଦ୍ଧାଞ୍ଜଳି ଦେବା ପାଇଁ ମୁଁ ପୁଣି ଥରେ ‘କୁରାଲ’ର ଉଦାହରଣ ଦେବି । ସେଥିରେ ଲେଖାଯାଇଛି, ‘‘କୌଣସି ଯୋଜନା ପ୍ରସ୍ତୁତ କରୁଥିବା ବ୍ୟକ୍ତିର ମନୋବଳ ଦୃଢ଼ ଥିଲେ, ସେ ଯାହା ପାଇବାକୁ ଚାହୁଁଛନ୍ତି ଏବଂ ଯେପରି ଉପାୟରେ ପାଇବାକୁ ଚାହୁଁଛନ୍ତି ତାହା ସେ ନିଶ୍ଚିତ ଭାବେ ପାଇବେ।’’ ଡକ୍ଟର ସ୍ୱାମୀନାଥନ ଏପରି ଜଣେ ବିଶିଷ୍ଟ ବ୍ୟକ୍ତି ଥିଲେ ଯିଏକି ନିଜ ଜୀବନର ଆଦ୍ୟଭାଗରେ କୃଷିକୁ ସୁଦୃଢ଼ କରିବାକୁ ଏବଂ କୃଷକଙ୍କ ସେବା କରିବାକୁ ନିଷ୍ପତ୍ତି ନେଇଥିଲେ। ସେ ଏହାକୁ ଅତ୍ୟନ୍ତ ଅଭିନବ ଢଙ୍ଗରେ ଏବଂ ଉତ୍ସାହର ସହ କରିଥିଲେ । ଡ. ସ୍ୱାମୀନାଥନଙ୍କ ଅବଦାନ ଆମକୁ କୃଷି ଉଦ୍ଭାବନ ଏବଂ ଦୀର୍ଘସ୍ଥାୟିତ୍ୱ ପଥରେ ଆଗକୁ ବଢ଼ିବା ସମୟରେ ଅନୁପ୍ରାଣିତ କରିବା ସହ ମାର୍ଗଦର୍ଶନ ଦେବା ଜାରି ରଖିଛି । ଚାଷୀଙ୍କ ହିତ ପାଇଁ କାମ କରିବା, ବୈଜ୍ଞାନିକ ଉଦ୍ଭାବନର ପରିଣାମକୁ ଆମର ବିସ୍ତାରିତ କୃଷି କ୍ଷେତ୍ର ପର୍ଯ୍ୟନ୍ତ ପହଞ୍ଚାଇବା ଏବଂ ଭବିଷ୍ୟତ ପିଢ଼ି ପାଇଁ ଅଭିବୃଦ୍ଧି, ଦୀର୍ଘସ୍ଥାୟିତ୍ୱ ଓ ସମୃଦ୍ଧିକୁ ପ୍ରୋତ୍ସାହନ ଦେବା ଲାଗି ତାଙ୍କର ପ୍ରିୟ ସିଦ୍ଧାନ୍ତ ପ୍ରତି ଆମେ ଆମର ପ୍ରତିବଦ୍ଧତାକୁ ଦୋହରାଇବା ଉଚିତ୍‌।

ଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁରୁବାର ଦିନ ମଧ୍ୟପ୍ରଦେଶର ଜବଲପୁର ଠାରେ ୧୨,୬୦୦ କୋଟି ଟଙ୍କାରୁ ଅଧିକ ମୂଲ୍ୟର ସଡ଼କ, ରେଳ, ଗ୍ୟାସ ପାଇପଲାଇନ୍, ଗୃହ ନିର୍ମାଣ ଏବଂ ବିଶୁଦ୍ଧ ପାନୀୟ ଜଳ ଭଳି ବିଭିନ୍ନ କ୍ଷେତ୍ର ସହିତ ସମ୍ପର୍କିତ ବିକାଶ ପ୍ରକଳ୍ପ ଗୁଡିକର ଶିଳାନ୍ୟାସ କରିଛନ୍ତି ଏବଂ ସେଗୁଡିକୁ ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିଛନ୍ତି । ରାଣୀ ଦୁର୍ଗାବତୀଙ୍କ ୫୦୦ତମ ଜନ୍ମବାର୍ଷିକୀ ପାଳନ ଅବସରରେ ଶ୍ରୀ ମୋଦୀ ଜବଲପୁର ଠାରେ ‘ବୀରାଙ୍ଗନା ରାଣୀ ଦୁର୍ଗାବତୀ ସ୍ମାରକ ଓ ଉଦ୍ୟାନ’ ପ୍ରକଳ୍ପର ଭୂମି ପୂଜନ କରିଥିଲେ ।

ଇନ୍ଦୋର ଠାରେ ଲାଇଟ୍ ହାଉସ୍ ପ୍ରକଳ୍ପ ଅଧୀନରେ ନିର୍ମିତ ୧୦୦୦ରୁ ଅଧିକ ଗୃହର ଉଦ୍ଘାଟନ, ମାଣ୍ଡଲା, ଜବଲପୁର ଏବଂ ଡିଣ୍ଡୋରି ଜିଲ୍ଲାରେ ଏକାଧିକ ଜଳ ଜୀବନ ମିଶନ ପ୍ରକଳ୍ପର ଶିଳାନ୍ୟାସ ଏବଂ ସିଓନି ଜିଲ୍ଲାରେ ଜଳ ଜୀବନ ମିଶନ ପ୍ରକଳ୍ପର ଲୋକାର୍ପଣ, ମଧ୍ୟପ୍ରଦେଶରେ ସଡ଼କ ଭିତ୍ତିଭୂମିରେ ଉନ୍ନତି ପାଇଁ ୪୮୦୦ କୋଟି ଟଙ୍କାରୁ ଅଧିକ ମୂଲ୍ୟର ଏକାଧିକ ପ୍ରକଳ୍ପର ଶିଳାନ୍ୟାସ ଓ ଲୋକାର୍ପଣ , ୧୮୫୦ କୋଟିରୁ ଅଧିକ ଟଙ୍କାର ରେଳ ପ୍ରକଳ୍ପ, ବିଜୟପୁର – ଓରାଇୟାନ୍ – ଫୁଲପୁର ପାଇପଲାଇନ ପ୍ରକଳ୍ପ ଏବଂ ଜବଲପୁର ଠାରେ ଏକ ନୂତନ ବଟଲିଂ ପ୍ଲାଣ୍ଟର ଲୋକାର୍ପଣ ଏବଂ ମୁମ୍ବାଇ ନାଗପୁର ଝାରସୁଗୁଡ଼ା ପାଇପଲାଇନ ପ୍ରକଳ୍ପର ନାଗପୁର ଜବଲପୁର ସେକ୍ସନ (୩୧୭ କିଲୋମିଟର) ର ଶିଳାନ୍ୟାସ ଆଦି ଏହି ପ୍ରକଳ୍ପ ଗୁଡ଼ିକ ମଧ୍ୟରେ ଅନ୍ତର୍ଭୁକ୍ତ ।

ଏହି ଅବସରରେ ପ୍ରଦର୍ଶିତ ପ୍ରଦର୍ଶନୀକୁ ପ୍ରଧାନମନ୍ତ୍ରୀ ବୁଲି ଦେଖିବା ସହ ବୀରଙ୍ଗନା ରାଣୀ ଦୁର୍ଗାବତୀଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିଥିଲେ ।

ସମାବେଶକୁ ସମ୍ବୋଧିତ କରି , ପ୍ରଧାନମନ୍ତ୍ରୀ ମାଆ ନର୍ମଦାଙ୍କ ପୁଣ୍ୟଭୂମି ଆଗରେ ପ୍ରଣାମ କରି କହିଥିଲେ ଯେ ସେ ଜବଲପୁରକୁ ଏକ ସମ୍ପୂର୍ଣ୍ଣ ନୂଆ ରୂପରେ ଦେଖୁଛନ୍ତି କାରଣ ଏହି ସହର ଉତ୍ସାହ, ଆବେଗ ଏବଂ ଉଦ୍ଦୀପନାରେ ପରିପୂର୍ଣ୍ଣ ଯାହା ସହରର ଭାବନାକୁ ପ୍ରତିଫଳିତ କରୁଛି । ବୀରଙ୍ଗନା ରାଣୀ ଦୁର୍ଗାବତୀଙ୍କ ୫୦୦ତମ ଜୟନ୍ତୀକୁ ସମଗ୍ର ଦେଶ ଉତ୍ସାହ ଓ ଉଦ୍ଦୀପନାର ସହ ପାଳନ କରୁଛି ବୋଲି ପ୍ରଧାନମନ୍ତ୍ରୀ କହିଥିଲେ । ରାଣୀ ଦୁର୍ଗାବତୀ ଗୌରବ ଯାତ୍ରାର ସମାପନ ସମୟରେ ପ୍ରଧାନମନ୍ତ୍ରୀ ସୂଚିତ କରିଥିଲେ ଯେ ସେ ଜାତୀୟ ସ୍ତରରେ ତାଙ୍କ ଜୟନ୍ତୀ ପାଳନ କରିବାକୁ ଆହ୍ୱାନ ଦେଇଥିଲେ ଏବଂ ଆଜିର ସମାବେଶ ସେହି ଭାବନାର ପ୍ରତୀକ । “ଭାରତର ପୂର୍ବପୁରୁଷ ମାନଙ୍କୁ ଆମର ଋଣ ପରିଶୋଧ କରିବା ପାଇଁ ଆମେ ଏଠାରେ ଏକାଠି ହୋଇଛୁ” ବୋଲି ପ୍ରଧାନମନ୍ତ୍ରୀ କହିଥିଲେ । ବୀରଙ୍ଗନା ରାଣୀ ଦୁର୍ଗାବତୀ ସ୍ମାରକ ଓ ଉଦ୍ୟାନ ପ୍ରକଳ୍ପ ଯୋଜନା ବିଷୟରେ ପ୍ରଧାନମନ୍ତ୍ରୀ କହିଥିଲେ ଯେ, ଦେଶର ପ୍ରତ୍ୟେକ ମାଆ ଏବଂ ଯୁବକ ମାନେ ଏହି ସ୍ଥାନକୁ ଯିବାକୁ ଚାହିଁବେ ଏବଂ ଏହା ଏକ ତୀର୍ଥଯାତ୍ରାରେ ପରିଣତ ହେବ ବୋଲି ସେ ବିଶ୍ୱାସ ବ୍ୟକ୍ତ କରିଥିଲେ । ରାଣୀ ଦୁର୍ଗାବତୀଙ୍କ ଜୀବନ ଆମକୁ ଅନ୍ୟର ହିତ ପାଇଁ ବଞ୍ଚିବାକୁ ଶିଖାଏ ଏବଂ ମାତୃଭୂମି ପାଇଁ କିଛି କରିବାକୁ ପ୍ରେରଣା ଦେଇଥାଏ ବୋଲି ସେ ଆଲୋକପାତ କରିଥିଲେ । ରାଣୀ ଦୁର୍ଗାବତୀଙ୍କ ୫୦୦ତମ ଜୟନ୍ତୀ ଅବସରରେ ପ୍ରଧାନମନ୍ତ୍ରୀ ସମଗ୍ର ଆଦିବାସୀ ସମାଜ, ମଧ୍ୟପ୍ରଦେଶବାସୀ ଏବଂ ଦେଶର ୧୪୦ କୋଟି ନାଗରିକଙ୍କୁ ଶୁଭେଚ୍ଛା ଜଣାଇଛନ୍ତି ।

ଭାରତର ସ୍ୱାଧୀନତା ପରେ ଏହି ଭୂମିର ପୂର୍ବପୁରୁଷ ମାନଙ୍କୁ ଯେଉଁ ସମ୍ମାନ ଦିଆଯିବା କଥା ତାହା ଦିଆ ଯାଇନାହିଁ ବୋଲି ପ୍ରଧାନମନ୍ତ୍ରୀ ଦୁଃଖ ପ୍ରକାଶ କରିଥିଲେ ଏବଂ କହିଥିଲେ ଯେ ଭୂମିର ବୀରମାନଙ୍କୁ ଆମେ ଭୁଲି ଯାଇଥିଲେ ।

ପାଖାପାଖି ୧୨,୦୦୦ କୋଟି ଟଙ୍କାର ଆଜିର ଏହି ପ୍ରକଳ୍ପ ବିଷୟରେ ପ୍ରଧାନମନ୍ତ୍ରୀ କହିଥିଲେ ଯେ ଏହା କୃଷକ ଏବଂ ଯୁବକ ମାନଙ୍କ ସମେତ ଲକ୍ଷ ଲକ୍ଷ ଲୋକଙ୍କ ଜୀବନରେ ପରିବର୍ତ୍ତନ ଆଣିବ । “ଏହି ଅଞ୍ଚଳରେ ନୂତନ ଶିଳ୍ପ ପ୍ରତିଷ୍ଠା ହେବା ପରେ, ଯୁବକମାନେ ବର୍ତ୍ତମାନ ଏଠାରେ ନିଯୁକ୍ତି ପାଇବେ” ବୋଲି ସେ କହିଥିଲେ ।

ମାଆ ଓ ଭଉଣୀଙ୍କ ପାଇଁ ରୋଷେଇ ଘରେ ଧୂଆଁମୁକ୍ତ ପରିବେଶ ଯୋଗାଇବା ବର୍ତ୍ତମାନର ସରକାରଙ୍କ ସର୍ବୋଚ୍ଚ ପ୍ରାଥମିକତା ବୋଲି ପ୍ରଧାନମନ୍ତ୍ରୀ କହିଥିଲେ । ଏକ ଗବେଷଣା ଅଧ୍ୟୟନକୁ ଉଦାହରଣ ଦେଇ ପ୍ରଧାନମନ୍ତ୍ରୀ ସୂଚନା ଦେଇଛନ୍ତି ଯେ , ଧୂଆଁ ନିର୍ଗତ ଚୁଲା ୨୪ ଘଣ୍ଟାରେ ୪୦୦ ସିଗାରେଟ୍ ପିଇବା ସହ ସମାନ ଧୂଆଁ ଉତ୍ପାଦନ କରିଥାଏ । ମହିଳା ମାନଙ୍କ ପାଇଁ ସୁରକ୍ଷିତ ବାତାବରଣ ଯୋଗାଇବା ନିମନ୍ତେ ପୂର୍ବ ସରକାରଙ୍କ ତରଫରୁ କୌଣସି ପ୍ରୟାସ କରା ଯାଉନଥିବାରୁ ସେ ଦୁଃଖ ପ୍ରକାଶ କରିଛନ୍ତି ।

ଉଜ୍ଜ୍ୱଳା ଯୋଜନା ବିଷୟରେ କହିବା ବେଳେ ପ୍ରଧାନମନ୍ତ୍ରୀ ପୂର୍ବରୁ ଗ୍ୟାସ ସଂଯୋଗ ପାଇବାରେ ହୋଇଥିବା ଅସୁବିଧାକୁ ମନେ ପକାଇଥିଲେ । ଉଜ୍ଜ୍ୱଳା ହିତାଧିକାରୀ ମାନଙ୍କ ପାଇଁ ଗ୍ୟାସ ସିଲିଣ୍ଡର ୪୦୦ ଟଙ୍କା ଶସ୍ତା କରିବା ନିମନ୍ତେ ବର୍ତ୍ତମାନର ସରକାର ରକ୍ଷାବନ୍ଧନର ପର୍ବ ସମୟରେ ଗ୍ୟାସ ଦର ହ୍ରାସ କରିଥିବା ବିଷୟରେ ମଧ୍ୟ ସେ ଆଲୋକପାତ କରିଥିଲେ । ଆଗାମୀ ପାର୍ବଣ ଋତୁ ଆରମ୍ଭ ହେବା ସହିତ ଗ୍ୟାସ ସିଲିଣ୍ଡର ଦର ଆହୁରି ୧୦୦ ଟଙ୍କା ହ୍ରାସ କରିବାକୁ ସରକାରଙ୍କ ନିଷ୍ପତ୍ତି ସମ୍ପର୍କରେ ସେ ସୂଚନା ଦେଇଛନ୍ତି । “ଗତ କିଛି ସପ୍ତାହ ମଧ୍ୟରେ ଉଜ୍ଜ୍ୱଳା ହିତାଧିକାରୀ ମାନଙ୍କ ପାଇଁ ଗ୍ୟାସ ସିଲିଣ୍ଡରର ମୂଲ୍ୟ ୫୦୦ ଟଙ୍କା ହ୍ରାସ କରାଯାଇଛି” ବୋଲି ପ୍ରଧାନମନ୍ତ୍ରୀ କହିଥିଲେ ।

ରାଜ୍ୟରେ ଗ୍ୟାସ ପାଇପଲାଇନ ବିଛାଇବା ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ କେନ୍ଦ୍ର ସରକାର ପାଇପଲାଇନ ମାଧ୍ୟମରେ ଶସ୍ତା ରନ୍ଧନ ଗ୍ୟାସ ଯୋଗାଣ ଦିଗରେ ବ୍ୟାପକ ପଦକ୍ଷେପ ନେଉଛନ୍ତି ।

ପୂର୍ବ ସରକାର ସମୟରେ ହୋଇଥିବା ଦୁର୍ନୀତି ଉପରେ ଆଲୋକପାତ କରି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ ଗରିବ ଲୋକମାନଙ୍କ ପାଇଁ ଉଦ୍ଦିଷ୍ଟ ପାଣ୍ଠି ଦୁର୍ନୀତିଗ୍ରସ୍ତଙ୍କ କୋଷ ପୂରଣ କରୁଛି । ୧୦ ବର୍ଷ ପୂର୍ବର ଶୀର୍ଷକ ଗୁଡ଼ିକୁ ଅନଲାଇନରେ ଯାଞ୍ଚ କରିବାକୁ ମଧ୍ୟ ସେ ପରାମର୍ଶ ଦେଇଥିଲେ, ଯେଉଁଥିରେ ବିଭିନ୍ନ ଦୁର୍ନୀତି ବିଷୟରେ ଖବର ଭରି ରହିଥିଲା ।

ପ୍ରଧାନମନ୍ତ୍ରୀ କହିଥିଲେ ଯେ ୨୦୧୪ ପରେ ବର୍ତ୍ତମାନର ସରକାର ଦୁର୍ନୀତିକୁ ଦୂର କରିବା ପାଇଁ ‘ସ୍ୱଚ୍ଛତା’ ଅଭିଯାନ ଚଳାଇଛନ୍ତି । ୧୧ କୋଟି ନକଲି ହିତାଧିକାରୀ ମାନଙ୍କୁ ଟେକ୍ନୋଲୋଜି ବ୍ୟବହାର କରି ସରକାରୀ ତାଲିକାରୁ ହଟାଇ ଦିଆଯାଇଛି ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରି କହିବା ସହିତ, “୨୦୧୪ ପରେ ଗରିବଙ୍କ ପାଇଁ ଥିବା ପାଣ୍ଠିକୁ ଯେପରି କେହି ଲୁଟିବେ ନାହିଁ ମୋଦି ତାହା ସୁନିଶ୍ଚିତ କରିଛନ୍ତି । ଜନ ଧନ, ଆଧାର ଓ ମୋବାଇଲ ଭଳି ତ୍ରିଶକ୍ତି ସୃଷ୍ଟିକୁ ସେ ଦୁର୍ନୀତି ବ୍ୟବସ୍ଥାର ଉଚ୍ଛେଦ ପାଇଁ ଶ୍ରେୟ ଦେଇଛନ୍ତି ।

ଆଜି ଏହି ତ୍ରିଶକ୍ତି ଯୋଗୁଁ ୨.୫ ଲକ୍ଷ କୋଟିରୁ ଅଧିକ ଟଙ୍କା ଭୁଲ ହାତକୁ ଯିବାରୁ ବଞ୍ଚିପାରିଛି ବୋଲି ପ୍ରଧାନମନ୍ତ୍ରୀ ଦୋହରାଇଛନ୍ତି । ମାତ୍ର ୫୦୦ ଟଙ୍କାରେ ଉଜ୍ଜଳା ସିଲିଣ୍ଡର ଯୋଗାଇବା ପାଇଁ କେନ୍ଦ୍ର ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି, କୋଟି କୋଟି ପରିବାରକୁ ମାଗଣା ରାସନ ଯୋଗାଇବା ପାଇଁ ୩ ଲକ୍ଷ କୋଟି ଟଙ୍କା, ଆୟୁଷ୍ମାନ ଯୋଜନା ଅଧୀନରେ ଦେଶର ପାଖାପାଖି ୫ କୋଟି ପରିବାରର ମାଗଣା ଚିକିତ୍ସା ପାଇଁ ୭୦ ହଜାର କୋଟି ଟଙ୍କା, ଚାଷୀଙ୍କୁ ଶସ୍ତା ୟୁରିଆ ଯୋଗାଣ କରିବା ପାଇଁ ୮ ଲକ୍ଷ କୋଟି ଟଙ୍କା ଖର୍ଚ୍ଚ କରାଯାଉଛି ।

ପିଏମ୍ କିଷାନ ସମ୍ମାନ ନିଧି ଅଧୀନରେ କ୍ଷୁଦ୍ର ଚାଷୀଙ୍କ ବ୍ୟାଙ୍କ ଆକାଉଣ୍ଟରେ ୨.୫ ଲକ୍ଷ କୋଟି ଟଙ୍କାରୁ ଅଧିକ ଜମା ଏବଂ ଗରିବ ପରିବାରକୁ ସ୍ଥାୟୀ ଘର ଯୋଗାଇବା ପାଇଁ ୪ ଲକ୍ଷ କୋଟି ଟଙ୍କା ଖର୍ଚ୍ଚ ହୋଇଛି । ଇନ୍ଦୋରର ଗରିବ ପରିବାରକୁ ଆଧୁନିକ ଜ୍ଞାନକୌଶଳରେ ନିର୍ମିତ ୧୦୦୦ ସ୍ଥାୟୀ ଘର ମିଳିଛି ବୋଲି ସେ ଉଲ୍ଲେଖ କରିଛନ୍ତି ।

ଏହା ମଧ୍ୟପ୍ରଦେଶ ପାଇଁ ଏକ ଗୁରୁତ୍ୱପୂର୍ଣ୍ଣ ସମୟ ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ବିକାଶ କ୍ଷେତ୍ରରେ କିଛି ବି ବାଧା ବିଗତ ଦୁଇ ଦଶନ୍ଧିର କଠିନ ପରିଶ୍ରମକୁ ନଷ୍ଟ କରିଦେବ । ୨୫ ବର୍ଷରୁ କମ୍ ବୟସର ଲୋକଙ୍କୁ ସମ୍ବୋଧନ କରି ପ୍ରଧାନମନ୍ତ୍ରୀ କହିଥିଲେ ଯେ ଆଗାମୀ ୨୫ ବର୍ଷ ମଧ୍ୟରେ ସେମାନଙ୍କ ପିଲାମାନେ ଯେପରି ବିକଶିତ ମଧ୍ୟପ୍ରଦେଶ ଦେଖିବା ପାଇଁ ବଡ଼ ହୁଅନ୍ତି ତାହା ସୁନିଶ୍ଚିତ କରିବା ସେମାନଙ୍କର ଦାୟିତ୍ୱ । ବର୍ତ୍ତମାନର ସରକାର ଗତ ବର୍ଷ ଗୁଡ଼ିକରେ କୃଷି ରପ୍ତାନିରେ ମଧ୍ୟପ୍ରଦେଶକୁ ଶୀର୍ଷରେ ପହଞ୍ଚାଇଛନ୍ତି ଏବଂ ଶିଳ୍ପ ବିକାଶରେ ରାଜ୍ୟ ଅଗ୍ରଣୀ ହେବା ଉପରେ ଗୁରୁତ୍ୱାରୋପ କରିଥିଲେ ।

ବର୍ଷ ବର୍ଷ ଧରି ପ୍ରତିରକ୍ଷା ଉତ୍ପାଦନ ରପ୍ତାନିରେ ଭାରତର ବହୁଗୁଣା ବୃଦ୍ଧି ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଏଥିରେ ଜବଲପୁରର ଏକ ବଡ଼ ଅବଦାନ ରହିଛି କାରଣ ସେ ପ୍ରତିରକ୍ଷା ସମ୍ବନ୍ଧୀୟ ସାମଗ୍ରୀ ଉତ୍ପାଦନ କରୁଥିବା ୪ଟି କାରଖାନାକୁ ସ୍ୱୀକାର କରିଛନ୍ତି ।

ସେ କହିଛନ୍ତି ଯେ କେନ୍ଦ୍ର ସରକାର ନିଜ ସେନାକୁ ‘ମେଡ୍ ଇନ୍ ଇଣ୍ଡିଆ’ ଅସ୍ତ୍ରଶସ୍ତ୍ର ଯୋଗାଇ ଦେଉଛନ୍ତି ଏବଂ ବିଶ୍ୱରେ ଭାରତର ପ୍ରତିରକ୍ଷା ସାମଗ୍ରୀର ଚାହିଦା ମଧ୍ୟ ବୃଦ୍ଧି ପାଉଛି । ଏଥିରୁ ମଧ୍ୟପ୍ରଦେଶ ମଧ୍ୟ ବହୁତ ଲାଭବାନ ହେବାକୁ ଯାଉଛି, ଏଠାରେ ହଜାର ହଜାର ନୂଆ ନିଯୁକ୍ତି ସୁଯୋଗ ସୃଷ୍ଟି ହେବାକୁ ଯାଉଛି ।

ଆଜି ଭାରତର ଆତ୍ମବିଶ୍ୱାସ ଏକ ନୂଆ ଶିଖରରେ ପହଞ୍ଚିଛି । ଖେଳ ପଡ଼ିଆ ଠାରୁ ଆରମ୍ଭ କରି କ୍ଷେତ ଓ ଖଳା ପର୍ଯ୍ୟନ୍ତ ଭାରତର ପତାକା ଉଡ଼ୁଛି ବୋଲି ପ୍ରଧାନମନ୍ତ୍ରୀ କହିଛନ୍ତି । ଚଳିତ ଏସୀୟ କ୍ରୀଡ଼ାରେ ଭାରତର ଚମତ୍କାର ପ୍ରଦର୍ଶନ ଉପରେ ଆଲୋକପାତ କରି ସେ କହିଛନ୍ତି ଯେ ଭାରତର ପ୍ରତ୍ୟେକ ଯୁବକ ଅନୁଭବ କରୁଛନ୍ତି ଯେ ଏହି ସମୟ ଭାରତର । ଯୁବପିଢ଼ିଙ୍କୁ ଯେତେବେଳେ ଏଭଳି ସୁଯୋଗ ମିଳିଥାଏ, ବିକଶିତ ଭାରତ ଗଠନ ପାଇଁ ସେମାନଙ୍କର ଉତ୍ସାହ ମଧ୍ୟ ବୃଦ୍ଧି ପାଇଥାଏ ବୋଲି ସେ କହିଥିଲେ । ଜି – ୨୦ ଭଳି ଏକ ଭବ୍ୟ ବିଶ୍ୱ କାର୍ଯ୍ୟକ୍ରମ ଆୟୋଜନ ଏବଂ ଭାରତର ଚନ୍ଦ୍ରାୟନର ସଫଳତାର ଉଦାହରଣ ଦେଇ ସେ କହିଥିଲେ ଯେ ସ୍ଥାନୀୟ ଜିନିଷ ବ୍ୟବହାର କରିବା ଅଭ୍ୟାସ ଏଭଳି ସଫଳତା ସହିତ ଦୂରଦୂରାନ୍ତରେ ପ୍ରତିଫଳିତ ହେବା ଆରମ୍ଭ କରେ । ଗାନ୍ଧୀ ଜୟନ୍ତୀ ଅବସରରେ ଦିଲ୍ଲୀର ଏକ ଷ୍ଟୋରରେ ୧.୫ କୋଟି ଟଙ୍କାରୁ ଅଧିକ ମୂଲ୍ୟର ଖଦି ଉତ୍ପାଦ ବିକ୍ରି ହୋଇଥିବା ପ୍ରଧାନମନ୍ତ୍ରୀ ସୂଚନା ଦେଇଥିଲେ । ସ୍ୱଦେଶୀ ଭାବନା, ଦେଶକୁ ଆଗକୁ ନେବାର ଭାବନା ଆଜି ସବୁଠି ବୃଦ୍ଧି ପାଉଛି ବୋଲି ଶ୍ରୀ ମୋଦୀ ଗୁରୁତ୍ୱାରୋପ କରିଥିଲେ ।

ସେ ଷ୍ଟାର୍ଟଅପ୍ ଦୁନିଆରେ ସଫଳତା ହାସଲ କରିବାରେ ଭାରତର ଯୁବବର୍ଗଙ୍କ ଭୂମିକା ଉପରେ ମଧ୍ୟ ଆଲୋଚନା କରିଥିଲେ । ଅକ୍ଟୋବର ପହିଲାରେ ଦେଶ ଦ୍ୱାରା ଆରମ୍ଭ ହୋଇଥିବା ସ୍ୱଚ୍ଛତା ଅଭିଯାନ ସମ୍ପର୍କରେ ପ୍ରଧାନମନ୍ତ୍ରୀ ସୂଚନା ଦେଇଥିଲେ ଯେ ପାଖାପାଖି ୯ କୋଟି ନାଗରିକଙ୍କ ଅଂଶଗ୍ରହଣରେ ୯ ଲକ୍ଷରୁ ଅଧିକ ସ୍ଥାନରେ ସ୍ୱଚ୍ଛତା କାର୍ଯ୍ୟକ୍ରମ ଆୟୋଜନ କରାଯାଇଥିଲା । ସ୍ୱଚ୍ଛତା କ୍ଷେତ୍ରରେ ରାଜ୍ୟକୁ ଶୀର୍ଷରେ ପହଞ୍ଚାଇବା ପାଇଁ ସେ ମଧ୍ୟପ୍ରଦେଶବାସୀଙ୍କୁ ଶ୍ରେୟ ଦେଇଛନ୍ତି ।

ସମଗ୍ର ବିଶ୍ୱରେ ଦେଶର ସଫଳତାକୁ ନେଇ ଚର୍ଚ୍ଚା ଚାଲିଥିବା ବେଳେ କିଛି ରାଜନୈତିକ ଦଳର ଭାରତ ବିରୋଧୀ ଆଭିମୁଖ୍ୟ ବିରୋଧରେ ପ୍ରଧାନମନ୍ତ୍ରୀ ଚେତାବନୀ ଦେଇଛନ୍ତି । ସେ ଡିଜିଟାଲ ଇଣ୍ଡିଆ ଅଭିଯାନ ଏବଂ ଭାରତର କୋଭିଡ୍ ଟିକାକୁ ନେଇ ଏଭଳି ଦଳମାନେ ଉଠାଇଥିବା ପ୍ରଶ୍ନର ଉଦାହରଣ ଦେଇଥିଲେ । ଏଭଳି ରାଜନୈତିକ ଦଳ ଦେଶର ଶତ୍ରୁଙ୍କ କଥାକୁ ବିଶ୍ୱାସ କରନ୍ତି ଏବଂ ଭାରତୀୟ ସେନାକୁ ପ୍ରଶ୍ନ କରିବା ପର୍ଯ୍ୟନ୍ତ ଯାଆନ୍ତି ବୋଲି ସେ ଉଲ୍ଲେଖ କରିଛନ୍ତି । ଅମୃତ ମହୋତ୍ସବ ଉତ୍ସବ ପାଳନ ଏବଂ ଏହି ଉପାଦାନ ମାନଙ୍କ ଦ୍ୱାରା ଅମୃତ ସରୋବର ସୃଷ୍ଟିକୁ ନେଇ ହୋଇଥିବା ସମାଲୋଚନା ସମ୍ପର୍କରେ ମଧ୍ୟ ସେ ପ୍ରସଙ୍ଗ ଉତ୍ଥାପନ କରିଥିଲେ ।

ଶ୍ରୀ ମୋଦୀ ସ୍ୱାଧୀନତା ଠାରୁ ଆରମ୍ଭ କରି ସାଂସ୍କୃତିକ ଐତିହ୍ୟର ସମୃଦ୍ଧି ପର୍ଯ୍ୟନ୍ତ ଭାରତର ଆଦିବାସୀ ସମାଜର ଭୂମିକା ଉପରେ ଆଲୋକପାତ କରିଥିଲେ ଏବଂ ସ୍ୱାଧୀନତା ପର ଠାରୁ ଅନେକ ଦଶନ୍ଧି ଧରି ଶାସନ କରିଥିବା ଲୋକମାନେ ସେମାନଙ୍କୁ ଅବହେଳା କରିବା ଉପରେ ପ୍ରଶ୍ନ ଉଠାଇଥିଲେ । ଅଟଳଜୀଙ୍କ ସରକାର ହିଁ ଏକ ସ୍ୱତନ୍ତ୍ର ମନ୍ତ୍ରଣାଳୟ ଗଠନ କରି ଆଦିବାସୀ ସମାଜର କଲ୍ୟାଣ ପାଇଁ ବଜେଟ୍ ଆବଣ୍ଟନ କରିଥିଲେ । ଗତ ୯ ବର୍ଷ ମଧ୍ୟରେ ବଜେଟକୁ ଅନେକ ଗୁଣ ବୃଦ୍ଧି କରାଯାଇଛି ବୋଲି ଶ୍ରୀ ମୋଦୀ ସୂଚନା ଦେଇଛନ୍ତି । ସେ ଭାରତକୁ ପ୍ରଥମ ମହିଳା ଆଦିବାସୀ ରାଷ୍ଟ୍ରପତି ମିଳିବା ଏବଂ ଭଗବାନ ବିର୍ସା ମୁଣ୍ଡାଙ୍କ ଜୟନ୍ତୀକୁ ଜନଜାତୀୟ ଗୌରବ ଦିବସ ଭାବରେ ପାଳନ କରିବା ବିଷୟକୁ ମଧ୍ୟ ସ୍ପର୍ଶ କରିଥିଲେ । ଦେଶର ଅନ୍ୟତମ ଅତ୍ୟାଧୁନିକ ରେଳ ଷ୍ଟେସନର ନାମ ରାଣୀ କମଳାପତିଙ୍କ ନାମରେ ନାମିତ କରିବା, ପାତାଳପାଣି ଷ୍ଟେସନକୁ ଜନନାୟକ ତାନ୍ତିଆବିଲ ନାମରେ ନାମିତ କରିବା ଏବଂ ଗୋଣ୍ଡ ସମ୍ପ୍ରଦାୟର ପ୍ରେରଣା ପାଲଟିଥିବା ରାଣୀ ଦୁର୍ଗାବତୀଜୀଙ୍କ ନାମରେ ନିର୍ମିତ ହେଉଥିବା ଭବ୍ୟ ସ୍ମାରକୀର ଆଜିର ପ୍ରକଳ୍ପ ଉପରେ ଶ୍ରୀ ମୋଦୀ ଆଲୋକପାତ କରିଥିଲେ । ସମୃଦ୍ଧ ଗୋଣ୍ଡ ପରମ୍ପରା ବିଷୟରେ ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ସଂଗ୍ରହାଳୟରେ ଗୋଣ୍ଡ ସଂସ୍କୃତି, ଇତିହାସ ଏବଂ କଳା ପ୍ରଦର୍ଶନ କରାଯିବ ବୋଲି ସେ ସୂଚନା ଦେଇଥିଲେ । ପ୍ରଧାନମନ୍ତ୍ରୀ ମୋଦୀ ବିଶ୍ୱ ନେତାମାନଙ୍କୁ ଗୋଣ୍ଡ ପେଣ୍ଟିଂ ଉପହାର ଦେବା ବିଷୟରେ ମଧ୍ୟ ଉଲ୍ଲେଖ କରିଛନ୍ତି ।

ପ୍ରଧାନମନ୍ତ୍ରୀ ପୁନର୍ବାର କହିଥିଲେ ଯେ ବର୍ତ୍ତମାନର ସରକାର ହିଁ ଡକ୍ଟର ବାବା ସାହେବ ଆମ୍ବେଦକରଙ୍କ ସହ ଜଡ଼ିତ ସ୍ଥାନ ଗୁଡ଼ିକୁ ପଞ୍ଚତୀର୍ଥରେ ପରିଣତ କରିଛନ୍ତି । କିଛି ସପ୍ତାହ ତଳେ ସାଗରରେ ସନ୍ଥ ରବିଦାସଙ୍କ ସ୍ମାରକୀ ସ୍ଥଳର ଭୂମି ପୂଜନ କରିବା କଥା ମଧ୍ୟ ସେ ମନେ ପକାଇଥିଲେ । ଏହା ସାମାଜିକ ସଦ୍ଭାବ ଓ ଐତିହ୍ୟ ପ୍ରତି ସରକାରଙ୍କ ପ୍ରତିବଦ୍ଧତାକୁ ଦର୍ଶାଉଛି ବୋଲି ସେ ମତ ଦେଇଥିଲେ ।

ପରିବାରବାଦ ଓ ଦୁର୍ନୀତିକୁ ପ୍ରୋତ୍ସାହନ ଦେଉଥିବା ଦଳ ଆଦିବାସୀ ସମାଜର ସମ୍ବଳକୁ ଲୁଟି ନେଇଛନ୍ତି ବୋଲି ସେ କହିଛନ୍ତି । ପ୍ରଧାନମନ୍ତ୍ରୀ ସୂଚନା ଦେଇଥିଲେ ଯେ ୨୦୧୪ ପୂର୍ବରୁ ଏମଏସପି (ସର୍ବନିମ୍ନ ସହାୟକ ମୂଲ୍ୟ) କେବଳ ୮ – ୧୦ଟି ବନଜାତ ଦ୍ରବ୍ୟ ପାଇଁ ଦିଆଯାଉଥିବା ବେଳେ ଅବଶିଷ୍ଟ ଉତ୍ପାଦକୁ କମ୍ ମୂଲ୍ୟରେ ବିକ୍ରି କରାଯାଉଥିଲା । କିନ୍ତୁ ଆଜି ପ୍ରାୟ ୯୦ଟି ବନଜାତ ଦ୍ରବ୍ୟକୁ ଏମଏସପି ପରିସରଭୁକ୍ତ କରାଯାଇଛି ।

ଅତୀତରେ , ଆଦିବାସୀ ଓ କ୍ଷୁଦ୍ର କୃଷକ ମାନଙ୍କ ଦ୍ୱାରା ଉତ୍ପାଦିତ ହେଉଥିବା କୋଡୋ – କୁଟକି ଭଳି ମୋଟା ଶସ୍ୟକୁ ବିଶେଷ ଗୁରୁତ୍ୱ ଦିଆଯାଉନଥିଲା ବୋଲି ପ୍ରଧାନମନ୍ତ୍ରୀ କହିଥିଲେ । ଜି -୨୦ ଅତିଥିମାନଙ୍କ ପାଇଁ ଆପଣଙ୍କ କୋଡୋ – କୁଟକିରୁ ପ୍ରସ୍ତୁତ ହୋଇଥିବା ଖାଦ୍ୟ ବିଷୟରେ ସେ ଆଲୋକପାତ କରିଥିଲେ । ବର୍ତ୍ତମାନର ସରକାର ଶ୍ରୀଅନ୍ନ ରୂପରେ କୋଡୋ – କୁଟକିକୁ ଦେଶ ବିଦେଶର ବଜାରକୁ ପହଞ୍ଚାଇବାକୁ ଚାହୁଁଛନ୍ତି ।

“ଡବଲ ଇଞ୍ଜିନ ସରକାର ଗରିବ ଲୋକଙ୍କୁ ପ୍ରାଥମିକତା ଦେଉଛନ୍ତି ବୋଲି ପ୍ରଧାନମନ୍ତ୍ରୀ କହିଥିଲେ । ଗରିବ ଲୋକମାନଙ୍କ ସ୍ୱାସ୍ଥ୍ୟ ପାଇଁ ବିଶୁଦ୍ଧ ପାନୀୟ ଜଳ ଯୋଗାଣର ଗୁରୁତ୍ୱ ଉପରେ ଆଲୋକପାତ କରି ପ୍ରଧାନମନ୍ତ୍ରୀ ଆଜିର ପ୍ରକଳ୍ପ ଗୁଡିକ ବିଷୟରେ ଉଲ୍ଲେଖ କରିଥିଲେ ଯେଉଁଠାରେ ପ୍ରାୟ ୧୬୦୦ ଗ୍ରାମକୁ ଜଳ ଯୋଗାଣ ପାଇଁ ବ୍ୟବସ୍ଥା କରାଯାଇଛି ।

ନାରୀ ଶକ୍ତି ବନ୍ଦନ ଅଧିନିୟମ ମାଧ୍ୟମରେ ଲୋକସଭା ଓ ବିଧାନସଭାରେ ମହିଳା ମାନଙ୍କୁ ସେମାନଙ୍କ ଅଧିକାର ଦେବା ପ୍ରସଙ୍ଗକୁ ମଧ୍ୟ ସେ ସ୍ପର୍ଶ କରିଥିଲେ । ପ୍ରଧାନମନ୍ତ୍ରୀ ୧୩ ହଜାର କୋଟି ଟଙ୍କାର ପିଏମ୍ ବିଶ୍ୱକର୍ମା ଯୋଜନା ସମ୍ପର୍କରେ ମଧ୍ୟ ଆଲୋଚନା କରିଥିଲେ ।

ବକ୍ତବ୍ୟ ଶେଷ କରି ପ୍ରଧାନମନ୍ତ୍ରୀ ମଧ୍ୟପ୍ରଦେଶକୁ ବିକାଶ କ୍ଷେତ୍ରରେ ଶୀର୍ଷ ସ୍ଥାନରେ ପହଞ୍ଚାଇବା ପାଇଁ ମୋଦୀଙ୍କ ଗ୍ୟାରେଣ୍ଟି ସମ୍ପର୍କରେ ନାଗରିକ ମାନଙ୍କୁ ଆଶ୍ୱାସନା ଦେଇଥିଲେ । ମଧ୍ୟପ୍ରଦେଶର ମହାକୌଶଳ ମୋଦି ଓ ସରକାରଙ୍କ ଏହି ସଂକଳ୍ପକୁ ସୁଦୃଢ଼ କରିବ ବୋଲି ମୋର ବିଶ୍ୱାସ ରହିଛି ।

ଏହି ଅବସରରେ ଅନ୍ୟ ମାନଙ୍କ ମଧ୍ୟରେ ମଧ୍ୟପ୍ରଦେଶ ରାଜ୍ୟପାଳ ମଙ୍ଗୁଭାଇ ସି. ପଟେଲ ଏବଂ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ ଉପସ୍ଥିତ ଥିଲେ ।

ପୃଷ୍ଠଭୂମି

ରାଣୀ ଦୁର୍ଗାବତୀଙ୍କ ୫୦୦ତମ ଜୟନ୍ତୀକୁ ଭାରତ ସରକାରଙ୍କ ତରଫରୁ ଖୁବ ଧୁମଧାମରେ ପାଳନ କରାଯାଉଛି । ଜୁଲାଇ ୨୦୨୩ରେ ମଧ୍ୟପ୍ରଦେଶର ଶାହଡୋଲ ଗସ୍ତ ସମୟରେ ପ୍ରଧାନମନ୍ତ୍ରୀ ଏହି ଉତ୍ସବ ସମ୍ପର୍କରେ ଘୋଷଣା କରିଥିଲେ । ଲାଲକିଲ୍ଲା ପ୍ରାଚୀରରୁ ଦେଶବାସୀଙ୍କ ଉଦ୍ଦେଶ୍ୟରେ ଚଳିତ ବର୍ଷ ଐତିହାସିକ ସ୍ୱାଧୀନତା ଦିବସ ଅଭିଭାଷଣରେ ସେ ଏହି ଘୋଷଣାକୁ ଦୋହରାଇଥିଲେ । ଏହି ଉତ୍ସବକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀ ‘ବୀରଙ୍ଗନା ରାଣୀ ଦୁର୍ଗାବତୀ ସ୍ମାରକ ଓ ଉଦ୍ୟାନ’ ର ଭୂମି ପୂଜନ କରିଥିଲେ ।

ଜବଲପୁର ଠାରେ ପାଖାପାଖି ୧୦୦ କୋଟି ଟଙ୍କା ବ୍ୟୟରେ ନିର୍ମିତ ହେବାକୁ ଥିବା ‘ବୀରାଙ୍ଗନା ରାଣୀ ଦୁର୍ଗାବତୀ ସ୍ମାରକ ଓ ଉଦ୍ୟାନ’ ପ୍ରାୟ ୨୧ ଏକର ପରିମିତ ଅଞ୍ଚଳରେ ବ୍ୟାପିବ । ଏଥିରେ ରାଣୀ ଦୁର୍ଗାବତୀଙ୍କ ୫୨ ଫୁଟ ଉଚ୍ଚର ଏକ ଆକର୍ଷଣୀୟ କାଂସ୍ୟ ପ୍ରତିମୂର୍ତ୍ତି ପ୍ରଦର୍ଶିତ ହେବ । ଏଥିରେ ରାଣୀ ଦୁର୍ଗାବତୀଙ୍କ ବୀରତ୍ୱ ଓ ସାହସ ସମେତ ଗୋଣ୍ଡୱାନା ଅଞ୍ଚଳର ଇତିହାସ ଉପରେ ଆଲୋକପାତ କରୁଥିବା ଏକ ଭବ୍ୟ ସଂଗ୍ରହାଳୟ ରହିବ ।

ଏଥିରେ ଗୋଣ୍ଡ ଲୋକ ଏବଂ ଅନ୍ୟ ଆଦିବାସୀ ସମ୍ପ୍ରଦାୟର ଖାଦ୍ୟ, କଳା, ସଂସ୍କୃତି, ଜୀବନଶୈଳୀ ଇତ୍ୟାଦି ଉପରେ ଆଲୋକପାତ କରାଯିବ । ବୀରଙ୍ଗନା ରାଣୀ ଦୁର୍ଗାବତୀ ସ୍ମାରକ ଓ ଉଦ୍ୟାନ ପରିସରରେ ଔଷଧୀୟ ବୃକ୍ଷ ପାଇଁ ଏକ ବଗିଚା, କ୍ୟାକ୍ଟସ୍ ବଗିଚା ଏବଂ ରକ୍ ଗାର୍ଡେନ୍ ସମେତ ଏକାଧିକ ପାର୍କ ଓ ବଗିଚା ରହିବ । ଷୋଡଶ ଶତାବ୍ଦୀର ମଧ୍ୟଭାଗରେ ରାଣୀ ଦୁର୍ଗାବତୀ ଗୋଣ୍ଡୱାନାର ଶାସକ ରାଣୀ ଥିଲେ । ସେ ଜଣେ ସାହସୀ, ନିର୍ଭୀକ ଏବଂ ସାହସୀ ଯୋଦ୍ଧା ଭାବରେ ସ୍ମରଣୀୟ ଯିଏ ମୋଗଲମାନଙ୍କ ବିରୋଧରେ ସ୍ୱାଧୀନତା ପାଇଁ ଲଢ଼ିଥିଲେ ।

ମଧ୍ୟପ୍ରଦେଶର ଇନ୍ଦୋର ଠାରେ ଲାଇଟ୍ ହାଉସ୍ ପ୍ରକଳ୍ପର ଉଦ୍ଘାଟନ ସହ ‘ସମସ୍ତଙ୍କ ପାଇଁ ଗୃହ’ ଯୋଗାଇଦେବା ପାଇଁ ପ୍ରଧାନମନ୍ତ୍ରୀଙ୍କ ସ୍ୱପ୍ନ ମଜଭୁତ ହୋଇଥିଲା । ପ୍ରଧାନମନ୍ତ୍ରୀ ଆବାସ ଯୋଜନା – ସହରାଞ୍ଚଳ ଅଧୀନରେ ପ୍ରାୟ ୧୨୮ କୋଟି ଟଙ୍କା ବ୍ୟୟରେ ନିର୍ମିତ ଏହି ପ୍ରକଳ୍ପ ଦ୍ୱାରା ୧୦୦୦ ରୁ ଅଧିକ ହିତାଧିକାରୀ ପରିବାର ଉପକୃତ ହେବେ । ସମସ୍ତ ମୌଳିକ ସୁବିଧା ଥିବା କିନ୍ତୁ ନିର୍ମାଣ ସମୟ ଯଥେଷ୍ଟ କମ୍ ଥିବା ଗୁଣାତ୍ମକ ଗୃହ ନିର୍ମାଣ ପାଇଁ ଏହା ଅଭିନବ ଜ୍ଞାନ କୌଶଳ ‘ପ୍ରି – ଇଞ୍ଜିନିୟରିଂ ଷ୍ଟିଲ୍ ଷ୍ଟ୍ରକ୍ଚରାଲ୍ ସିଷ୍ଟମ୍ ସହିତ ପ୍ରି – ଫେବ୍ରିକେଟେଡ୍ ସାଣ୍ଡୱିଚ୍ ପ୍ୟାନେଲ୍ ସିଷ୍ଟମ୍’ ବ୍ୟବହାର କରେ ।

ବ୍ୟକ୍ତିଗତ ଘରୋଇ ନଳ ସଂଯୋଗ ମାଧ୍ୟମରେ ସୁରକ୍ଷିତ ଏବଂ ପର୍ଯ୍ୟାପ୍ତ ପାନୀୟ ଜଳ ଯୋଗାଇବା ପାଇଁ ପ୍ରଧାନମନ୍ତ୍ରୀଙ୍କ ସ୍ୱପ୍ନକୁ ସାକାର କରିବା ଦିଗରେ ଏକ ପଦକ୍ଷେପ ସ୍ୱରୂପ, ମାଣ୍ଡଲା, ଜବଲପୁର ଏବଂ ଡିଣ୍ଡୋରି ଜିଲ୍ଲାରେ ୨୩୫୦ କୋଟି ଟଙ୍କାରୁ ଅଧିକ ମୂଲ୍ୟର ଏକାଧିକ ଜଳ ଜୀବନ ମିଶନ ପ୍ରକଳ୍ପର ଶିଳାନ୍ୟାସ କରାଯାଇଥିଲା । ପ୍ରଧାନମନ୍ତ୍ରୀ ସିଓନୀ ଜିଲ୍ଲାରେ ୧୦୦ କୋଟିରୁ ଅଧିକ ଟଙ୍କାର ଜଳ ଜୀବନ ମିଶନ ପ୍ରକଳ୍ପକୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିଥିଲେ । ରାଜ୍ୟର ୪ଟି ଜିଲ୍ଲାରେ ଏହି ପ୍ରକଳ୍ପ ଦ୍ୱାରା ମଧ୍ୟପ୍ରଦେଶର ପ୍ରାୟ ୧୫୭୫ଟି ଗ୍ରାମ ଉପକୃତ ହେବେ ।
ପ୍ର

ଧାନମନ୍ତ୍ରୀ ମଧ୍ୟପ୍ରଦେଶରେ ସଡ଼କ ଭିତ୍ତିଭୂମିରେ ଉନ୍ନତି ଆଣିବା ପାଇଁ ୪୮୦୦ କୋଟି ଟଙ୍କାରୁ ଅଧିକ ମୂଲ୍ୟର ଏକାଧିକ ପ୍ରକଳ୍ପର ଶିଳାନ୍ୟାସ କରିଥିଲେ ଏବଂ ସେଗୁଡିକୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିଥିଲେ । ପ୍ରଧାନମନ୍ତ୍ରୀ ୩୪୬ ନମ୍ବର ଜାତୀୟ ରାଜପଥର ଝାରଖେଡା – ବେରାସିଆ – ଢୋଲଖେଡିକୁ ସଂଯୋଗ କରୁଥିବା ରାସ୍ତାର ଉନ୍ନତିକରଣ, ୫୪୩ ନମ୍ବର ଜାତୀୟ ରାଜପଥର ବାଲାଘାଟ – ଗୋଣ୍ଡିଆ ସେକ୍ସନର ୪ ଲେନ୍ ନିର୍ମାଣ; ରୁଢ଼ୀ ଓ ଦେଶଗାଁକୁ ସଂଯୋଗ କରୁଥିବା ଖଣ୍ଡୱା ବାଇପାସ୍ର ୪ ଲେନ୍ ; ୪୭ ନମ୍ବର ଜାତୀୟ ରାଜପଥର ଟେମାଗାଓଁରୁ ଚିଚୋଲି ସେକ୍ସନକୁ ଚାରି ଲେନ୍ କରିବା; ବୋରେଗାଓଁରୁ ଶାହପୁରକୁ ସଂଯୋଗ କରୁଥିବା ରାସ୍ତାକୁ ୪ ଲେନ୍ ; ଏବଂ ଶାହପୁରରୁ ମୁକ୍ତାଇନଗରକୁ ସଂଯୋଗ କରୁଥିବା ରାସ୍ତାକୁ ଚାରି ଲେନ୍ କରିବା ସମେତ ବିଭିନ୍ନ ପ୍ରକଳ୍ପର ଶିଳାନ୍ୟାସ କରିଥିଲେ । ପ୍ରଧାନମନ୍ତ୍ରୀ ୩୪୭ସି ଜାତୀୟ ରାଜପଥର ଖାଲଘାଟରୁ ସରୱରଧେୱାଲାକୁ ସଂଯୋଗ କରୁଥିବା ରାସ୍ତାର ଉନ୍ନତିକରଣକୁ ଦେଶ ଉଦ୍ଦେଶ୍ୟରେ ଉତ୍ସର୍ଗ କରିଥିଲେ ।

ପ୍ରଧାନମନ୍ତ୍ରୀ ୧୮୫୦ କୋଟି ଟଙ୍କାରୁ ଅଧିକ ମୂଲ୍ୟର ରେଳ ପ୍ରକଳ୍ପକୁ ଦେଶ ଉଦ୍ଦେଶ୍ୟରେ ଉତ୍ସର୍ଗ କରିଥିଲେ । ଏଥିରେ କଟନି- ବିଜୟସୋତା (୧୦୨ କିଲୋମିଟର) ଏବଂ ମାରର୍ୱାସଗ୍ରାମ – ସିଙ୍ଗରୌଲି (୭୮.୫୦ କିଲୋମିଟର)କୁ ସଂଯୋଗ କରୁଥିବା ରେଳ ଲାଇନକୁ ଦୋହରୀକରଣ କରିବା ଅନ୍ତର୍ଭୁକ୍ତ । ଏହି ଦୁଇଟି ପ୍ରକଳ୍ପ କଟନୀ – ସିଙ୍ଗରୌଲି ସେକ୍ସନକୁ ସଂଯୋଗ କରୁଥିବା ରେଳ ଲାଇନକୁ ଦୋହରୀକରଣ ପ୍ରକଳ୍ପର ଏକ ଅଂଶ ଅଟେ । ଏହି ପ୍ରକଳ୍ପଗୁଡ଼ିକ ମଧ୍ୟପ୍ରଦେଶର ରେଳ ଭିତ୍ତିଭୂମିରେ ଉନ୍ନତି ଆଣିବ ଏବଂ ରାଜ୍ୟର ବାଣିଜ୍ୟ ଏବଂ ପର୍ଯ୍ୟଟନକୁ ଉପକୃତ କରିବ ।

ପ୍ରଧାନମନ୍ତ୍ରୀ ବିଜୟପୁର – ଓରାଇୟାନ – ଫୁଲପୁର ପାଇପଲାଇନ ପ୍ରକଳ୍ପକୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିଥିଲେ । ୧୭୫୦ କୋଟିରୁ ଅଧିକ ଟଙ୍କା ବ୍ୟୟରେ ୩୫୨ କିଲୋମିଟର ଲମ୍ବର ଏହି ପାଇପ୍ଲାଇନ୍ ନିର୍ମାଣ କରାଯାଇଛି । ପ୍ରଧାନମନ୍ତ୍ରୀ ମୁମ୍ବାଇ ନାଗପୁର ଝାରସୁଗୁଡା ପାଇପଲାଇନ ପ୍ରକଳ୍ପର ନାଗପୁର ଜବଲପୁର ସେକ୍ସନ (୩୧୭ କିଲୋମିଟର) ର ଶିଳାନ୍ୟାସ କରିଥିଲେ । ୧୧୦୦ କୋଟିରୁ ଅଧିକ ଟଙ୍କା ବ୍ୟୟରେ ଏହି ପ୍ରକଳ୍ପ ନିର୍ମାଣ ହେବ । ଗ୍ୟାସ୍ ପାଇପ୍ଲାଇନ୍ ପ୍ରକଳ୍ପ ଶିଳ୍ପ ଏବଂ ଗୃହରେ ସ୍ୱଚ୍ଛ ଏବଂ ସୁଲଭ ପ୍ରାକୃତିକ ଗ୍ୟାସ ଯୋଗାଇବ ଏବଂ ପରିବେଶରେ ନିର୍ଗମନ ହ୍ରାସ କରିବା ଦିଗରେ ଏକ ପଦକ୍ଷେପ ହେବ । ପ୍ରଧାନମନ୍ତ୍ରୀ ଜବଲପୁର ଠାରେ ଏକ ନୂତନ ବଟଲିଂ ପ୍ଲାଣ୍ଟକୁ ମଧ୍ୟ ଲୋକାର୍ପଣ କରିଥିଲେ ଯାହା ୧୪୭ କୋଟି ଟଙ୍କା ବ୍ୟୟରେ ନିର୍ମିତ ହୋଇଛି ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି (୦୫-୧୦-୨୦୨୩) ରାଜସ୍ଥାନର ଯୋଧପୁର ଗସ୍ତରେ ଯାଇ ସଡ଼କ, ରେଳ, ବିମାନ ଚଳାଚଳ, ସ୍ବାସ୍ଥ୍ୟ ଓ ଉଚ୍ଚଶିକ୍ଷା କ୍ଷେତ୍ରରେ ୫୦୦୦ କୋଟି ଟଙ୍କାରୁ ଅଧିକ ମୂଲ୍ୟର ବିଭିନ୍ନ ପ୍ରକଳ୍ପର ଶିଳାନ୍ୟାସ ଓ ଉଦଘାଟନ କରିଛନ୍ତି। ଏହି ପ୍ରକଳ୍ପଗୁଡ଼ିକ ମଧ୍ୟରେ ରହିଛି ଏମ୍ସ ଯୋଧପୁରରେ ୩୫୦ ଶଯ୍ୟାବିଶିଷ୍ଟ ଟ୍ରମା କେନ୍ଦ୍ର ଓ ସ୍ବତନ୍ତ୍ର ଯତ୍ନ ହସ୍ପିଟାଲ ବ୍ଲକର ଶିଳାନ୍ୟାସ, ପିଏମ-ଏନଏଚଆରଏମ ଅଧୀନରେ ସାତଟି ଜଟିଳ ଚିକିତ୍ସା ସେବା, ଏବଂ ଯୋଧପୁର ବିମାନବନ୍ଦରରେ ନୂତନ ରହଣୀ ସ୍ଥଳ ଭବନର ଶିଳାନ୍ୟାସ। ସେ ଆଇଆଇଟି ଯୋଧପୁର ପରିସର ଓ ରାଜସ୍ଥାନ କେନ୍ଦ୍ରୀୟ ବିଶ୍ବବିଦ୍ୟାଳୟର ଉନ୍ନତୀକରଣର ମଧ୍ୟ ଉଦଘାଟନ କରିଥିଲେ। ସେ ମଧ୍ୟ କେତେକ ସଡ଼କ ବିକାଶ ପ୍ରକଳ୍ପର ଶିଳାନ୍ୟାସ କରିବା ସହ ଦୁଇଟି ଅନ୍ୟ ରେଳ ପ୍ରକଳ୍ପର ଶିଳାନ୍ୟାସ କରିଥିଲେ। ସେଥିମଧ୍ୟରେ ଡେଗାନା-ରାଏକାବାଗ ୧୪୫ କିଲୋମିଟର ଦୀର୍ଘ ରେଳପଥ ଓ ୫୮ କିଲୋମିଟର ଦୀର୍ଘ ଡେଗାନା-କଚାମନ ସିଟି ରେଳପଥର ଦୋହରୀକରଣ ଅନ୍ତର୍ଭୁକ୍ତ। ଶ୍ରୀ ମୋଦୀ ମଧ୍ୟ ରାଜସ୍ଥାନର ଦୁଇଟି ଟ୍ରେନର ପତାକା ଦେଖାଇ ଯାତ୍ରାର ଶୁଭାରମ୍ଭ କରାଇଥିଲେ। ସେ ଦୁଇଟି ହେଲା ଜୈସଲମେରରୁ ଦିଲ୍ଲୀ ରୁନିଚା ଏକ୍ସପ୍ରେସ ଓ ମାରଓ୍ବାରରୁ ଖମ୍ବାଲୀ ଘାଟ ପର୍ଯ୍ୟନ୍ତ ଏକ ନୂତନ ଐତିହ୍ୟ ଟ୍ରେନ୍।

ବୀର ଦୁର୍ଗାଦାସଙ୍କ ଭୂମିକୁ ମଥାନତ କରି ଶ୍ରଦ୍ଧାଞ୍ଜଳି ଜଣାଇବା ସହ ପ୍ରଧାନମନ୍ତ୍ରୀ ସମବେତ ଜନତାଙ୍କୁ ସମ୍ବୋଧିତ କରିଥିଲେ। ଆଜିର ପ୍ରକଳ୍ପଗୁଡ଼ିକ ନେଇ ସରକାରଙ୍କ ନିରବଚ୍ଛିନ୍ନ ଉଦ୍ୟମ ଉପରେ ଏହାର ଫଳାଫଳ ନିର୍ଭର କରୁଥିବା ବେଳେ ସେ ଏଥିପାଇଁ ରାଜସ୍ଥାନର ଜନସାଧାରଣଙ୍କୁ ମଧ୍ୟ ଅଭିନନ୍ଦନ ଜଣାଇଥିଲେ।

ପ୍ରଧାନମନ୍ତ୍ରୀ କହିଥିଲେ ଯେ ରାଜସ୍ଥାନ ହେଉଛି ସେହି ରାଜ୍ୟ ଯେଉଁଠି ଦେଶର ଶୌର୍ଯ୍ୟ, ସମୃଦ୍ଧି ଓ ସଂସ୍କୃତିରେ ପ୍ରାଚୀନ ଭାରତର ଗୌବ ପରିଦୃଶ୍ୟମାନ। ସେ ମଧ୍ୟ ନିକଟରେ ଯୋଧପୁରରେ ବହୁ ପ୍ରଶଂସିତ ଜି-୨୦ ବୈଠକର ସ୍ମରଣ କରିଥିଲେ।

ଉଭୟ ସ୍ଥାନୀୟ ଓ ଆନ୍ତର୍ଜାତିକ ପର୍ଯ୍ୟଟକଙ୍କ ସୂର୍ଯ୍ୟନଗରୀ ଯୋଧପୁର ପ୍ରତି ଆକର୍ଷଣର ସେ ଅବତାରଣା କରିଥିଲେ। ରାଜସ୍ଥାନ ଭାରତର ଅତୀତ ଗୌରବର ପ୍ରତିନିଧିତ୍ବ କରିଥାଏ ଓ ଭାରତର ଭବିଷ୍ୟତ ମଧ୍ୟ ସେ ଯେପରି ପ୍ରତିନିଧିତ୍ବ କରିବ ତାହା ହିଁ ଗୁରୁତ୍ବପୂର୍ଣ୍ଣ। ଏହା ସେତେବେଳେ ହେବ ଯେତେବେଳେ ମେବାରରୁ ମାରଓ୍ବାଡ଼ ଏଠାରେ ନିର୍ମିତ ଆଧୁନିକ ଭିତ୍ତିଭୂମି ଓ ବିକାଶକୁ ଆଧାର କରି ରାଜସ୍ଥାନ ସଫଳତାର ନୂତନ ଶିଖରରେ ପହଂଚିବ ବୋଲି ପ୍ରଧାନମନ୍ତ୍ରୀ କହିଥିଲେ।

ବିକାନୀର ଓ ବାଡ଼ମେର ଦେଇ ଯାଉଥିବା ଜାମନଗର ଏକ୍ସପ୍ରେସର ହାଇଓ୍ବେ ଓ ଦିଲ୍ଲୀ-ମୁମ୍ବାଇ ଏକ୍ସପ୍ରେସ ହାଇଓ୍ବେ କରାଜସ୍ଥାନ ହାଇଟେକ ଭିତ୍ତିଭୂମିର ଉଦାହରଣ ବୋଲି ସେ କହିଥିଲେ।

ସେ କହିଥିଲେ ଯେ ଚଳିତ ବର୍ଷ ରାଜସ୍ଥାନ ନିମନ୍ତେ ୯୫୦୦ କୋଟି ଟଙ୍କାର ରେଳ ବଜେଟ ବ୍ୟୟ ବରାଦ ହୋଇଛି ଯାହା ପୂର୍ବତନ ସରକାରଙ୍କ ତୁଳନାରେ ହାରାହାରି ୧୪ ଗୁଣ ଅଧିକ। ସ୍ବାଧୀନତା ପରେ ୨୦୧୪ ପର୍ଯ୍ୟନ୍ତ ରାଜସ୍ଥାନରେ ପ୍ରାୟ ଛଅ ଶହ କିଲୋମିଟର ରେଳପଥ ବିଦ୍ୟୁତକରଣ ହୋଇଥିଲା। ମାତ୍ର ୨୦୧୪ ପରେ ମାତ୍ର ୯ ବର୍ଷ ମଧ୍ୟରେ ୩୭୦୦ କିଲୋମିଟର ରେଳପଥ ବିଦ୍ୟୁତକରଣ କାର୍ଯ୍ୟ ସମ୍ପନ୍ନ ହୋଇଛି। “ଏଣିକି ସେସବୁ ଟ୍ରାକରେ ଡିଜେଲ ଇଞ୍ଜିନ ପରିବର୍ତ୍ତେ ବିଦ୍ୟୁତଚାଳିତ ଟ୍ରେନ ଯାତ୍ରା କରିବ” ବୋଲି ସେ କହିଥିଲେ। ଏହା ରାଜ୍ୟର ବାୟୁମଣ୍ଡଳ ଓ ବାତାବରଣକୁ ସ୍ବଚ୍ଛ ରଖିବା ସହ ପ୍ରଦୂଷଣ ମଧ୍ୟ ହ୍ରାସ କରିବ। ଅମୃତ ଭାରତ ଷ୍ଟେସନ ଯୋଜନାରେ ରାଜସ୍ଥାନର ୮୦ରୁ ଅଧିକ ଷ୍ଟେସନର ପୁନର୍ବିନ୍ୟାସ କରାଯାଉଛି। ଗରୀବ ଲୋକ ଅଧିକରୁ ଅଧିକ ବ୍ୟବହାର କରୁଥିବା ରେଳ ଷ୍ଟେସନଗୁଡ଼ିକର ବିକାଶ ବିମାନବନ୍ଦର ବିକାଶ ଭଳି କରିବା ପାଇଁ ସରକାର ଅଙ୍ଗୀକାରବଦ୍ଧ। ଯୋଧପୁର ରେଳ ଷ୍ଟେସନର ପୁନର୍ବିକାଶ ପାଇଁ ଶିଳାନ୍ୟାସ କରାଯାଇଥବା ସେ ସୂଚନା ଦେଇଥିଲେ।

ଆଜିର ରେଳ ଓ ସଡ଼କ ପ୍ରକଳ୍ପ ରାଜ୍ୟର ବିକାଶ ଗତିକୁ ତ୍ବରାନ୍ବିତ କରିବ। ରେଳପଥର ଦୋହରୀକରଣ ଯୋଗୁ ରେଳ ଯାତ୍ରା ସମୟ ମଧ୍ୟ ହ୍ରାସ ପାଇବ। ଏହାଛଡ଼ା ଜୈସଲମେରରୁ ଦିଲ୍ଲୀ ସଂଯୋଗ କରୁଥିବା ରୁନିଚା ଏକ୍ସପ୍ରେସର ଯାତ୍ରାରମ୍ଭ, ମାରଓ୍ବାଡ଼ ଜଙ୍କସନରୁ ଖମ୍ବାଲୀ ଘାଟ ନୂତନ ଐତିହ୍ୟ ଟ୍ରେନର ଆଜି ଯାତ୍ରାରମ୍ଭ ହୋଇଥିବା ବେଳେ ଅଳ୍ପ କେଇଦିନ ଆଗରୁ ବନ୍ଦେ ଭାରତ ଏକ୍ସପ୍ରେସ ରାଜସ୍ଥାନରୁ ଯାତ୍ରା ଆରମ୍ଭ କରିବା ବିଷୟ ଶ୍ରୀ ମୋଦୀ ପ୍ରକାଶ କରିଥିଲେ। ସେ ଆଜି (୦୫-୧୦-୨୦୨୩) ତିନିଟି ସଡ଼କ ପ୍ରକଳ୍ପର ଶିଳାନ୍ୟାସ ସହ ଯୋଧପୁର ନୂତନ ରହଣିସ୍ଥଳ ଭବନର ଭିତ୍ତିପ୍ରସ୍ତର ସ୍ଥାପନ ବିଷୟ ପ୍ରକାଶ କରିଥିଲେ। ଆଜିର ପ୍ରକଳ୍ପଗୁଡ଼ିକ ଆଞ୍ଚଳିକ ଅର୍ଥନୀତିକୁ ମଜଭୁତ କରିବା ସହ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବ ଓ ରାଜ୍ୟର ପର୍ଯ୍ୟଟନ କ୍ଷେତ୍ରକୁ ମଧ୍ୟ ନୂତନ ଶକ୍ତି ଦେବ।

ଡାକ୍ତରୀ ଓ ଯାନ୍ତ୍ରିକ ଶିକ୍ଷା କ୍ଷେତ୍ରରେ ରାଜସ୍ଥାନର ଏକ ସ୍ବତନ୍ତ୍ର ସ୍ଥାନ କଥା ସ୍ମରଣ କରି ପ୍ରଧାନମନ୍ତ୍ରୀ କୋଟାର ଅବଦାନର ଅବତାରଣା କରିଥିଲେ ଓ ଶିକ୍ଷା ସହ ରାଜସ୍ଥାନ ମେଡିକାଲ ଓ ଇଞ୍ଜିନିୟରିଂର ମଧ୍ୟ ପେଣ୍ଠ ହେବ ବୋଲି କହିଥିଲେ। ସେଥିପାଇଁ ଟ୍ରମା, ଆପାତକାଳୀନ ଓ ସ୍ବତନ୍ତ୍ର ଯତ୍ନ ଚିକିତ୍ସା ସୁବିଧା ଏମ୍ସ ଯୋଧପୁର ଠାରେ ଖୋଲାଯାଇଛି ଓ ପ୍ରଧାନମନ୍ତ୍ରୀ ଆୟୁଷ୍ମାନ ଭାରତ ସ୍ବାସ୍ଥ୍ୟ ଭିତ୍ତିଭୂମି ମିଶନ (ପିଏମ- ଏବିଏଚଆଇଏମ) ଅଧୀନ ରାଜସ୍ଥାନର ବିଭିନ୍ନ ସାତଟି ସ୍ଥାନରେ ଜଟିଳ ଚିକିତ୍ସା ସେବା କେନ୍ଦ୍ରମାନ ବିକଶିତ ହେବ। କେବଳ ରାଜସ୍ଥାନରେ ନୁହେଁ, ସମଗ୍ର ଦେଶରେ ଯେପରି ଆଇଆଇଟି ଓ ଏମ୍ସ ଯୋଧପୁର ପ୍ରମୁଖ ପ୍ରତିଷ୍ଠାନ ହୋଇ ଗଢ଼ିଉଠୁ ମୁଁ ତାହା ଚାହେଁ ବୋଲି ପ୍ରଧାନମନ୍ତ୍ରୀ କହିଥିଲେ। ଏମ୍ସ ଓ ଆଇଆଇଟି ଯୋଧପୁର ଡାକ୍ତରୀ ଓ ପ୍ରଯୁକ୍ତିବିଦ୍ୟାରେ ନୂତନ ସମ୍ଭାବନା ସୃଷ୍ଟି ଦିଗରେ କାମ ଆରମ୍ଭ କରିସାରିଛନ୍ତି ଓ ହାଇଟେକ ଡାକ୍ତରୀ ପ୍ରଯୁକ୍ତିବିଦ୍ୟା ଯେପରିକି ରୋବଟିକ ଶଲ୍ୟ ଚିକିତ୍ସା ଭାରତକୁ ଗବେଷଣା କ୍ଷେତ୍ରରେ ନୂତନ ଶିଖରରେ ପହଂଚାଇବା ସହ ଚିକିତ୍ସା ବିଜ୍ଞାନ ପର୍ଯ୍ୟଟନର ସମ୍ଭାବନା ମଧ୍ୟ ବୃଦ୍ଧି କରିବ।

“ରାଜସ୍ଥାନ ହେଉଛି ପ୍ରକୃତି ଓ ପରିବେଶ ପ୍ରେମୀଙ୍କ ଭୂମି” ବୋଲି କହିବା ସହ ପ୍ରଧାନମନ୍ତ୍ରୀ ଗୁରୁ ଜମ୍ବେଶ୍ବର ଓ ବିଷ୍ଣୋୟୀଙ୍କ ଜୀବନଧାରା କିପରି ଶହ ଶହ ବର୍ଷ ଧରି ବିଶ୍ବରେ ଅନୁସରଣ କରାଯାଉଛି ତାହାର ଆଲୋକପାତ କରିଥିଲେ।”

ଐତିହ୍ୟକୁ ଉପଜୀବ୍ୟ କରି ଭାରତ ଆଜି ବିଶ୍ବକୁ ମାର୍ଗଦର୍ଶନ ଦେଉଛି ବୋଲି ପ୍ରଧାନମନ୍ତ୍ରୀ କହିଥିଲେ। ଭାରତକୁ ଏକ ବିକଶିତ ରାଷ୍ଟ୍ରରେ ପରିଣତ କରିବା ନେଇ ବିଶ୍ବାସ ପ୍ରକଟ କରି ରାଜସ୍ଥାନ ବିକାଶ ଲାଭ କଲେ ଭାରତର ବିକାଶ ହେବ ବୋଲି ପ୍ରଧାନମନ୍ତ୍ରୀ କହିଥିଲେ। ମିଳିମିଶି ଆମେ ରାଜସ୍ଥାନକୁ ବିକଶିତ କରି ସମୃଦ୍ଧ କରିବା ବୋଲି କହି ଶ୍ରୀ ମୋଦୀ ତାଙ୍କ ବକ୍ତବ୍ୟର ଅନ୍ତ ଘଟାଇଥିଲେ।

ରାଜସ୍ଥାନ ରାଜ୍ୟପାଳ କାଲରାଜ ମିଶ୍ର ଓ କେନ୍ଦ୍ର ମନ୍ତ୍ରୀ ଗଜେନ୍ଦ୍ର ସିଂ ଶିଖାଓ୍ବତ ଓ କୈଳାଶ ଚୌଧୁରୀ ମଧ୍ୟ ଅନ୍ୟମାନଙ୍କ ମଧ୍ୟରେ କାର୍ଯ୍ୟକ୍ରମରେ ଉପସ୍ଥିତ ଥିଲେ।

ପୃଷ୍ଠଭୂମି-

ପ୍ରଧାନମନ୍ତ୍ରୀ ୩୫୦ କୋଟି ଟଙ୍କା ବ୍ୟୟରେ ରାଜ୍ୟରେ ସ୍ବାସ୍ଥ୍ୟ ଭିତ୍ତିଭୂମିର ଶିଳାନ୍ୟାସ କରିଥିଲେ। ପ୍ରଧାନମନ୍ତ୍ରୀ ୪୮୦ କୋଟି ଟଙ୍କା ବ୍ୟୟରେ ନିର୍ମିତ ହେବାକୁ ଥିବା ଯୋଧପୁର ବିମାନବନ୍ଦରର ନୂତନ ରହଣିସ୍ଥଳ ଭବନର ଶିଳାନ୍ୟାସ କରିଥିଲେ। ୨୪ ହଜାର ବର୍ଗମିଟର ପରିମିତି ସ୍ଥାନରେ ନିର୍ମିତ ଏହି ଭବନରେ ଭିଡ଼ ସମୟରେ ୨୫୦୦ ଯାତ୍ରୀଙ୍କ ପ୍ରବେଶ ଓ ପ୍ରସ୍ଥାନ ହୋଇ ପାରିବ। ବାର୍ଷିକ ଏହା ୩୫ ଲକ୍ଷ ଯାତ୍ରୀ ସମାଗମ ଦାୟିତ୍ବ ତୁଲାଇ ପାରିବ। ୧୧୩୫ କୋଟି ଟଙ୍କାରୁ ଅଧିକ ବ୍ୟୟରେ ନିର୍ମିତ ଯୋଧପୁର ଆଇଆଇଟି କ୍ୟାମ୍ପସକୁ ପ୍ରଧାନମନ୍ତ୍ରୀ ଉଦଘାଟନ କରିଥିଲେ।

ଜୈସଲମେରରୁ ଦିଲ୍ଲୀ ଯାତ୍ରା କରୁଥିବା ରୁନିଚା ଏକ୍ସପ୍ରେସର ଶ୍ରୀ ମୋଦୀ ପତାକା ଦେଖାଇ ଯାତ୍ରାରମ୍ଭ କରାଇଥିଲେ। ଏହା ଯୋଧପୁର, ନେଘନା, କୁଚାମାନସିଟି, ଫୁଲେରା, ରିଙ୍ଗାସ, ଶ୍ରୀମାଧୋପୁର, ନୀମକାଥାନା, ନିର୍ନାଉଲ, ଅଟେଲୀ, ରେଓ୍ବାରୀ ଦେଇ ଦିଲ୍ଲୀ ସଂଯୋଗ କରିବ। ଯାତ୍ରାରମ୍ଭ କରାଇଥିବା ଅନ୍ୟ ନୂତନ ଐତିହ୍ୟ ଟ୍ରେନ ମାରଓ୍ବାର ଜଙ୍କସନରୁ ଖମ୍ବାଲୀ ଘାଟକୁ ସଂଯୋଗ କରିବ। ଏଥିସହ ନିଯୁକ୍ତି ଓ ପର୍ଯ୍ୟଟନ ପାଇଁ ମଧ୍ୟ ଅନୁକକୂଳ ପରିବେଶ ସୃଷ୍ଟି ହେବ।