Tag: ନରେନ୍ଦ୍ର ମୋଦୀ

ଭୁବନେଶ୍ୱର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ମହାରାଷ୍ଟ୍ରର ୱାସିମଠାରେ ପିଏମ କିଷାନ ସମ୍ମାନନିଧିର ୧୮ତମ କିସ୍ତି ପ୍ରଦାନ କରିଛନ୍ତି। ଏହି କାର୍ଯ୍ୟକ୍ରମରେ ଦେଶର ୯କୋଟି ୪୦ ଲକ୍ଷ କୃଷକଙ୍କୁ ୨୦ହଜାର କୋଟି ଟଙ୍କାରୁ ଅଧିକ ଅର୍ଥ ହସ୍ତାନ୍ତର କରାଯାଇଛି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ଅବସରରେ କହିଛନ୍ତି ଯେ ଡବଲ ଇଞ୍ଜିନ ସରକାର ଚାଲିଥିବା ରାଜ୍ୟର କୃଷକ ମାନେ ଡବଲ ଫାଇଦା ପାଉଛନ୍ତି। ଆମ ସରକାରରେ ସବୁ ନିର୍ଣ୍ଣୟ ଓ ନୀତି ବିକଶିତ ଭାରତ ଗଠନକୁ ଆଖି ଆଗରେ ରଖି ଗ୍ରହଣ କରାଯାଉଛି। ଆମର ଏହି ନୀତି ଓ ନିର୍ଣ୍ଣୟ ସମାଜର ବଞ୍ଚିତ ଶ୍ରେଣୀକୁ ଆଗକୁ ବଢିବା ପାଇଁ ସାହାଯ୍ୟ କରୁଛି।

ଏହି ଅବସରରେ ଭୁବନେଶ୍ବରରେ ଆୟୋଜିତ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ କହିଥିଲେ ଯେ ପିଏମ କିଷାନର ୧୮ତମ କିସ୍ତି ପ୍ରଦାନ ଉତ୍ସବକୁ ସାରା ଦେଶ ପିଏମ କିଷାନ ଉତ୍ସବ ଦିବସ ରୂପେ ପାଳନ କରୁଛି। ଏହି ଯୋଜନା ମାଧ୍ୟମରେ ବର୍ଷକୁ ତିନୋଟି କିସ୍ତିରେ ୬ ହଜାର ଟଙ୍କାର ସହାୟତା ପ୍ରଦାନ କରାଯାଉଛି। କୃଷକଙ୍କ ବିକାଶ ଓ ଦାରିଦ୍ର୍ୟ ହ୍ରାସ ପ୍ରକ୍ରିୟାକୁ  ତ୍ବରାନ୍ବିତ କରିବା ନିମନ୍ତେ କେନ୍ଦ୍ର ସରକାର ଏହି ଯୋଜନାର ଆରମ୍ଭ କରିଥିଲେ। ଆଜି ୧୮ତମ କିସ୍ତି ପ୍ରଦାନ ଜରିଆରେ ଓଡିଶାର ୩୧ ଲକ୍ଷ ୫୧ ହଜାର ୭୦୦ ଚାଷୀ ଉପକୃତ ହେଲେ। ପୂର୍ବରୁ ବରଗଡରୁ ଦିଆଯାଇଥିବା ୧୭ତମ କିସ୍ତିରେ ରାଜ୍ୟର ୨୯ଲକ୍ଷରୁ ଉର୍ଦ୍ଦ୍ବ ଚାଷୀ ଉପକୃତ ହୋଇଥିଲେ। ପିଏମ କିଷାନ ଯୋଜନା ସହିତ ରାଜ୍ୟ ସରକାର ରାଜ୍ୟରେ ସିଏମ କିଷାନ ଯୋଜନା ମଧ୍ୟ କାର୍ଯ୍ୟକାରୀ କରିଛନ୍ତି। ଯେଉଁଥିରେ କ୍ଷୁଦ୍ର ଏବଂ ନାମ ମାତ୍ର ଚାଷୀଙ୍କୁ ଦୁଇଟି କିସ୍ତିର ୪ହଜାର ଟଙ୍କା ପ୍ରଦାନ କରାଯାଉଛି। ଏହି ଅର୍ଥ ସିଧାସଳଖ ଚାଷୀଙ୍କ ବ୍ୟାଙ୍କ ଆକାଉଣ୍ଟକୁ ସୂଚନା ଓ ପ୍ରଯୁକ୍ତିବିଦ୍ୟାର ପ୍ରୟୋଗରେ ସଂପୂର୍ଣ୍ଣ ସ୍ବଚ୍ଛତାର ସହ ହସ୍ତାନ୍ତର କରାଯାଉଛି।

ମୁଖ୍ୟମନ୍ତ୍ରୀ ଆହୁରି ମଧ୍ୟ କହିଥିଲେ ପିଏମ କିଷାନ ଯୋଜନାରେ ସମସ୍ତ ଯୋଗ୍ୟ ଚାଷୀଙ୍କୁ ଅନ୍ତର୍ଭୁକ୍ତ କରିବା ଆମର ଲକ୍ଷ୍ୟ। ଏଥି ପାଇଁ ନୂଆଖାଇ ଠାରୁ ଆମେ ଏକ ଦୁଇ ମାସିଆ ସାଚୁରେସନ ଡ୍ରାଇଭ ପ୍ରୋଗ୍ରାମ ଆରମ୍ଭ କରିଛୁ। ପ୍ରତି ବ୍କକ ସ୍ତରରେ ଜନ ସେବା କେନ୍ଦ୍ର ସହାୟତାରେ ଚାଷୀ ଭାଇ ମାନେ ସେମାନଙ୍କ ନାମ ପଞ୍ଜିକରଣ ଓ ଅନ୍ୟାନ୍ୟ ଜରୁରୀ କାର୍ଯ୍ୟ ନିଶୁଳ୍କ ଭାବେ କରିପାରିବେ, ସିଏମ କିଷାନ ପାଇଁ ମଧ୍ୟ ଏଥିରେ ସୁବିଧା ଉପଲବ୍ଧ ରହିଛି। ରବି ଫସଲରେ ପିଏମ କିଷାନ ସହାୟତାକୁ ଫଳପ୍ରଦ ଭାବେ ବ୍ୟବହାର କରିବାକୁ ମୁଖ୍ୟମନ୍ତ୍ରୀ ସବୁ କୃଷକ ବନ୍ଧୁ ମାନଙ୍କୁ ଅନୁରୋଧ କରିଥିଲେ।

ଏହି ଅବସରରେ ମୁଖ୍ୟମନ୍ତ୍ରୀ ଘୋଷଣା କରିଥିଲେ ଯେ ପିଭିଟିଜି ବର୍ଗର କୃଷକ ଏବଂ ବନ ଅଧିକାର ଆଇନ ପଟ୍ଟା ଥିବା ଜନ ଜାତିଙ୍କୁ ଏହି ଯୋଜନାରେ ଅନ୍ତର୍ଭୁକ୍ତ କରିବା ପାଇଁ ସ୍ବତନ୍ତ୍ର କାର୍ଯ୍ୟକ୍ରମ ପ୍ରସ୍ତୁତ ହେବାକୁ ଯାଉଛି। ସେମାନେ ମଧ୍ୟ ଏହି ଯୋଜନାର ଲାଭ ଓ ସୁବିଧା ପାଇବେ।

କୃଷକ ମାନେ ଦେଶର ଅନ୍ନ ଦାତା। ଆମ ଅର୍ଥ ନୀତିର ମେରୁଦଣ୍ଡ। ସେମାନଙ୍କ ମଙ୍ଗଳ କରିବା ସରକାରଙ୍କ ପ୍ରାଥମିକ ଦାୟିତ୍ବ ଏବଂ କୃଷକ ମାନଙ୍କ କଲ୍ୟାଣ ପାଇଁ ଆମ ସରକାର ଦାୟିତ୍ବ ନେବା ପରେ ପ୍ରଥମେ ସମୃଦ୍ଧ କୃଷି ନୀତି ଆଧାରରେ ଧାନର କ୍ରୟ ମୂଲ୍ୟ ୩୧୦୦ଟଙ୍କାକୁ ବୃଦ୍ଧି କରିବା ପାଇଁ ସ୍ଥିର କରିଛନ୍ତି। ରାଜ୍ୟରେ ଥିବା ମଣ୍ଡି ଗୁଡିକୁ ସୁଦୃଢ କରାଯାଉଛି। କଟନି ଛଟନିକୁ ସଂପୂର୍ଣ୍ଣ ବନ୍ଦ କରିବା ପାଇଁ ପଦକ୍ଷେପ ନିଆଯାଇଛି। ଜୈବିକ କୃଷି ଓ ପ୍ରାକୃତିକ କୃଷିର ପ୍ରୋତ୍ସାହନ ପାଇଁ ଓଡିଶା ବଳଭଦ୍ର ଜୈବିକ ଚାଷ ମିଶନ କାର୍ଯ୍ୟକ୍ରମ  ଆରମ୍ଭ କରାଯିବ । ମିଲେଟ୍ ଉତ୍ପାଦନ କ୍ଷେତ୍ରରେ ଅଭିବୃଦ୍ଧି ପାଇଁ ଶ୍ରୀ ଅନ୍ନ ଯୋଜନା ମଧ୍ୟ କାର୍ଯ୍ୟକାରୀ ହେଉଛି । ରାଜ୍ୟରେ ୫୮ଟି ସବଡିଭିଜନରେ ଗୋଟିଏ ଲେଖାଏଁ ଶୀତଳଭଣ୍ଡାର ସ୍ଥାପନ କରାଯିବ ବୋଲି ସେ କହିଥିଲେ।

ଦଶହରା ଉପଲକ୍ଷେ ମାନନୀୟ ପ୍ରଧାନମନ୍ତ୍ରୀଙ୍କ ଦ୍ବାରା ରାଜ୍ୟର କୃଷକମାନଙ୍କୁ ଏହି ଭେଟି ପ୍ରଦାନ କରାଯାଇଥିବାରୁ ମୁଖ୍ୟମନ୍ତ୍ରୀ ପ୍ରଧାନମନ୍ତ୍ରୀଙ୍କୁ ଓଡିଶାର ଚାଷୀ ଭାଇ ମାନଙ୍କ ତରଫରୁ ଧନ୍ୟବାଦ ଅର୍ପଣ କରିଥିଲେ।

ଏହି କାର୍ଯ୍ୟକ୍ରମରେ ଅନ୍ୟତମ ଅତିଥି ଭାବେ ଯୋଡି ହୋଇ ଉପମୁଖ୍ୟମନ୍ତ୍ରୀ ତଥା କୃଷି ଓ କୃଷକ ସଶକ୍ତି କରଣ ମନ୍ତ୍ରୀ ଶ୍ରୀ କନକ ବର୍ଦ୍ଧନ ସିଂହ ଦେଓ କହିଥିଲେ ପିଏମ କିଷାନର ଏହି ସହାୟତା ରାଶି କୃଷକ ମାନଙ୍କୁ ରବି ଫସଲ ସହିତ ଅନ୍ୟାନ୍ୟ କୃଷି ସାମଗ୍ରୀ କିଣିବାରେ ସହାୟକ ହେବ। ଚାଷୀ ମାନଙ୍କୁ ଏଦିଗରେ ସହାୟତା ପ୍ରଦାନ ପାଇଁ ରାଜ୍ୟର ୫୮ଟି ସବଡିଭିଜନରେ LED ମାଧ୍ୟମରେ ଆମେ ସଚେତନ କରୁଛୁ ଏବଂ ସେମାନେ ମଧ୍ୟ ଟୋଲ ଫ୍ରି ନମ୍ବରକୁ କଲ କରି ସେମାନଙ୍କ ସମସ୍ୟା ଦୂର କରିପାରିବେ। ଏହି ଅବସରରେ ସେ ଜୈବିକ କୃଷିକୁ ଆପଣେଇବା ପାଇଁ ରାଜ୍ୟର କୃଷକ ମାନଙ୍କୁ ପରାମର୍ଶ ଦେଇଥିଲେ।

ଅନ୍ୟତମ ଅତିଥି ଭାବେ ରାଜସ୍ବ ଏବଂ ବିପର୍ଯ୍ୟୟ ପରିଚାଳନା ମନ୍ତ୍ରୀ ଶ୍ରୀ ସୁରେଶ ପୂଜାରୀ କହିଥିଲେ ପିଏମ କିଷାନର ଏହି ସହାୟତା ରାଶି କୃଷକ ମାନଙ୍କୁ ଅମଳ ସହିତ ପରବର୍ତ୍ତୀ ଚାଷକାର୍ଯ୍ୟ ପାଇଁ ସାହାଯ୍ୟ କରିବ। ପିଏମ କିଷାନର ପୂର୍ବ କିସ୍ତିରେ ରାଜ୍ୟର ୨୯ ଲକ୍ଷ ୭୩ ହଜାର ଚାଷୀ ସହାୟତା ରାଶି ପାଇଥିଲେ କିନ୍ତୁ ଚଳିତ ୧୮ତମ କିସ୍ତିରେ ୩୧ ଲକ୍ଷ ୫୧ ହଜାର ୭୦୦ ଚାଷୀ ସହାୟତା ପାଉଛନ୍ତି। ଆଗକୁ ଆହୁରି ମଧ୍ୟ ନୂତନ ଚାଷୀ ଯୋଡିହେବେ। ଚାଷୀ ମାନଙ୍କୁ ସମ୍ମାନ ଦେବା ଓ ସେମାନଙ୍କ ଅମଳ ବୃଦ୍ଧି ପାଇଁ ପଦକ୍ଷେପ ନେବା ପାଇଁ ଆମ ସରକାର ସଂପୂର୍ଣ୍ଣ ପ୍ରତିଶ୍ରୁତି ବଦ୍ଧ।

କାର୍ଯ୍ୟକ୍ରମରେ ବହୁ କୃଷକ ଭାଇ ଭଉଣୀ ଉପସ୍ଥିତ ଥିଲେ।

ଏହି କାର୍ଯ୍ୟକ୍ରମରେ କୃଷି ଓ କୃଷକ ସଶକ୍ତି କରଣ ବିଭାଗର ପ୍ରମୁଖ ଶାସନ ସଚିବ ଡ. ଅରବିନ୍ଦ ପାଢୀ  ସ୍ବାଗତ ଭାଷଣ ଦେଇଥିଲେ ଏବଂ ବିଭାଗୀୟ ନିର୍ଦ୍ଦେଶକ ଶ୍ରୀ ପ୍ରେମଚାନ୍ଦ ଚୌଧୁରୀ ଧନ୍ୟବାଦ ଅର୍ପଣ କରିଥିଲେ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ମହାରାଷ୍ଟ୍ର ଗସ୍ତ କରିଛନ୍ତି। ପୂର୍ବାହ୍ନ ପ୍ରାୟ ୧୧ଟା ୧୫ରେ ସେ ପୋହରାଦେବୀସ୍ଥିତ ଜଗଦମ୍ବା ମାତା ମନ୍ଦିରରେ ଦର୍ଶନ କରିବେ। ୱାଶିମରେ ସନ୍ଥ ସେବାଲାଲ ମହାରାଜ ଓ ସନ୍ଥ ରାମରାଓ ମହାରାଜଙ୍କ ସମାଧିସ୍ଥଳରେ ମଧ୍ୟ ସେ ଶ୍ରଦ୍ଧାଞ୍ଜଳି ଅର୍ପଣ କରିବେ। ଏହାପରେ ପୂର୍ବାହ୍ନ ପ୍ରାୟ ସାଢ଼େ ୧୧ଟାରେ ପ୍ରଧାନମନ୍ତ୍ରୀ ବଞ୍ଜାରା ସମ୍ପ୍ରଦାୟର ସମୃଦ୍ଧ ଐତିହ୍ୟକୁ ପାଳନ କରି ବଞ୍ଜାରା ବିରାସତ୍ ସଂଗ୍ରହାଳୟକୁ ଉଦଘାଟନ କରିବେ। ମଧ୍ୟାହ୍ନ ପ୍ରାୟ ୧୨ଟାରେ ସେ କୃଷି ଓ ପଶୁପାଳନ କ୍ଷେତ୍ର ସହ ଜଡ଼ିତ ପ୍ରାୟ ୨୩,୩୦୦ କୋଟି ଟଙ୍କାର ବିଭିନ୍ନ କାର୍ଯ୍ୟକ୍ରମର ଶୁଭାରମ୍ଭ କରିବେ। ଅପରାହ୍ନ ପ୍ରାୟ ୪ଟାରେ ପ୍ରଧାନମନ୍ତ୍ରୀ ଥାନେ ଠାରେ ୩୨,୮୦୦ କୋଟି ଟଙ୍କାରୁ ଅଧିକ ମୂଲ୍ୟର ବିଭିନ୍ନ ଉନ୍ନୟନ ମୂଳକ ପ୍ରକଳ୍ପର ଉଦଘାଟନ ଓ ଶିଳାନ୍ୟାସ କରିବେ । ଏହାପରେ ସନ୍ଧ୍ୟା ପ୍ରାୟ ୬ଟା ରେ ବିକେସି ମେଟ୍ରୋ ଷ୍ଟେସନରୁ ମୁମ୍ବାଇର ଆରେ ଜେଭିଏଲଆର ପର୍ଯ୍ୟନ୍ତ ଚାଲିବାକୁ ଥିବା ମେଟ୍ରୋ ଟ୍ରେନକୁ ସେ ପତାକା ଦେଖାଇ ଶୁଭାରମ୍ଭ କରିବେ । ସେ ବିକେସି ଏବଂ ସାନ୍ତାକ୍ରୁଜ୍ ଷ୍ଟେସନ ମଧ୍ୟରେ ମେଟ୍ରୋରେ ଯାତ୍ରା କରିବେ।

ୱାଶିମରେ ପ୍ରଧାନମନ୍ତ୍ରୀ

କୃଷକମାନଙ୍କୁ ସଶକ୍ତ କରିବା ପାଇଁ ତାଙ୍କର ପ୍ରତିବଦ୍ଧତା ଅନୁଯାୟୀ ପ୍ରଧାନମନ୍ତ୍ରୀ ପ୍ରାୟ ୯.୪ କୋଟି କୃଷକଙ୍କୁ ପାଖାପାଖି ୨୦,୦୦୦ କୋଟି ଟଙ୍କାର ପିଏମ-କିଷାନ ସମ୍ମାନ ନିଧିର ୧୮ତମ କିସ୍ତି ପ୍ରଦାନ କରିବେ । ୧୮ତମ କିସ୍ତି ଜାରି ହେବା ପରେ ପିଏମ-କିଷାନ ଯୋଜନା ଅଧୀନରେ କୃଷକମାନଙ୍କୁ ପ୍ରଦାନ କରାଯାଇଥିବା ମୋଟ ପାଣ୍ଠି ପ୍ରାୟ ୩.୪୫ ଲକ୍ଷ କୋଟି ଟଙ୍କା ହେବ। ଏହାବ୍ୟତୀତ ପ୍ରଧାନମନ୍ତ୍ରୀ ପ୍ରାୟ ୨,୦୦୦ କୋଟି ଟଙ୍କା ପ୍ରଦାନ କରୁଥିବା ନମୋ ସେତକାରୀ ମହାସମ୍ମାନ ନିଧି ଯୋଜନାର ପଞ୍ଚମ କିସ୍ତିର ଶୁଭାରମ୍ଭ କରିବେ ।

ପ୍ରଧାନମନ୍ତ୍ରୀ ୧୯୨୦ କୋଟି ଟଙ୍କାରୁ ଅଧିକ ମୂଲ୍ୟର କୃଷି ଭିତ୍ତିଭୂମି ପାଣ୍ଠି (ଏଆଇଏଫ୍) ଅଧୀନରେ ୭,୫୦୦ରୁ ଅଧିକ ପ୍ରକଳ୍ପକୁ ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିବେ। କଷ୍ଟମ୍ ହାୟରିଂ ସେଣ୍ଟର, ପ୍ରାଥମିକ ପ୍ରକ୍ରିୟାକରଣ ୟୁନିଟ୍, ଭଣ୍ଡାରଣ ଗୃହ, ସର୍ଟିଂ ଓ ଗ୍ରେଡିଂ ୟୁନିଟ୍, ଶୀତଳ ଭଣ୍ଡାର ପ୍ରକଳ୍ପ, ଅମଳ ପରବର୍ତ୍ତୀ ପରିଚାଳନା ପ୍ରକଳ୍ପ ଆଦି ପ୍ରମୁଖ ପ୍ରକଳ୍ପ ରହିଛି।

ପ୍ରାୟ ୧୩୦୦ କୋଟି ଟଙ୍କାର ମିଳିତ କାରବାର କରୁଥିବା ୯,୨୦୦ କୃଷକ ଉତ୍ପାଦକ ସଂଗଠନ (ଏଫପିଓ)କୁ ପ୍ରଧାନମନ୍ତ୍ରୀ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିବେ।

ଏହାବ୍ୟତୀତ ପ୍ରଧାନମନ୍ତ୍ରୀ ଗୃହପାଳିତ ପଶୁ ମାନଙ୍କ ପାଇଁ ୟୁନିଫାଇଡ୍ ଜିନୋମିକ୍ ଚିପ୍ ଏବଂ ସ୍ୱଦେଶୀ ସେକ୍ସ-ସର୍ଟେଡ୍ ସିମେନ୍ ଟେକ୍ନୋଲୋଜିର ଶୁଭାରମ୍ଭ କରିବେ । କୃଷକମାନଙ୍କୁ ସୁଲଭ ମୂଲ୍ୟରେ ସେକ୍ସ-ସର୍ଟେଡ୍ ସିମେନ୍ ଉପଲବ୍ଧତା ବୃଦ୍ଧି କରିବା ଏବଂ ଡୋଜ୍ ପିଛା ପ୍ରାୟ ୨୦୦ ଟଙ୍କା ଖର୍ଚ୍ଚ ହ୍ରାସ କରିବା ଏହି ପଦକ୍ଷେପର ଲକ୍ଷ୍ୟ । ଜେନୋଟାଇପିଂ ସେବା ସହିତ ଦେଶୀ ଗୋରୁମାନଙ୍କ ପାଇଁ ୟୁନିଫାଏଡ୍ ଜିନୋମିକ୍ ଚିପ୍, ଗୌଚିପ୍ ଏବଂ ମଇଁଷିମାନଙ୍କ ପାଇଁ ମହିଷଚିପ୍ ବିକଶିତ କରାଯାଇଛି। ଜେନୋମିକ ଚୟନ କାର୍ଯ୍ୟକାରୀ ହେବା ଦ୍ୱାରା ଉନ୍ନତ ମାନର ଗୃହପାଳିତ ପଶୁଙ୍କୁ କମ୍ ବୟସରେ ଚିହ୍ନଟ କରାଯାଇପାରିବ ।

ଏହାବ୍ୟତୀତ ପ୍ରଧାନମନ୍ତ୍ରୀ ମୁଖ୍ୟମନ୍ତ୍ରୀ ସୌର କୃଷି ବାହିନୀ ଯୋଜନା – ୨.୦ ଅଧୀନରେ ସମଗ୍ର ମହାରାଷ୍ଟ୍ରରେ ମୋଟ ୧୯ ମେଗାୱାଟ କ୍ଷମତା ବିଶିଷ୍ଟ ୫ଟି ସୌର ପାର୍କ କୁ ଲୋକାର୍ପଣ କରିବେ । ଏହି କାର୍ଯ୍ୟକ୍ରମରେ ସେ ମୁଖ୍ୟମନ୍ତ୍ରୀ ମାଝୀ ଲଡକି ବାହିନ ଯୋଜନାର ହିତାଧିକାରୀଙ୍କୁ ସମ୍ମାନିତ କରିବେ।

​ଥାନେରେ ପ୍ରଧାନମନ୍ତ୍ରୀ

ଏହି ଅଞ୍ଚଳରେ ସହରୀ ଗତିଶୀଳତାକୁ ପ୍ରୋତ୍ସାହିତ କରିବା ପାଇଁ ପ୍ରଧାନମନ୍ତ୍ରୀ ପ୍ରମୁଖ ମେଟ୍ରୋ ଏବଂ ସଡ଼କ ପ୍ରକଳ୍ପଗୁଡ଼ିକର ଉଦଘାଟନ ଏବଂ ଶିଳାନ୍ୟାସ କରିବେ । ପ୍ରଧାନମନ୍ତ୍ରୀ ପ୍ରାୟ ୧୪,୧୨୦ କୋଟି ଟଙ୍କା ମୂଲ୍ୟର ମୁମ୍ବାଇ ମେଟ୍ରୋ ଲାଇନର ବିକେସିରୁ ଆରେ ଜେଭିଏଲଆର ସେକ୍ସନକୁ ଉଦଘାଟନ କରିବେ । ଏହି ସେକ୍ସନରେ ୧୦ଟି ଷ୍ଟେସନ ରହିବ, ସେଥିମଧ୍ୟରୁ ୯ଟି ଅଣ୍ଡରଗ୍ରାଉଣ୍ଡ ରହିବ । ମୁମ୍ବାଇ ମେଟ୍ରୋ ଲାଇନ୍ – ୩ ହେଉଛି ଏକ ପ୍ରମୁଖ ସାର୍ବଜନୀନ ପରିବହନ ପ୍ରକଳ୍ପ ଯାହା   ମୁମ୍ବାଇ ସହର ମଧ୍ୟରେ ଯାତାୟତରେ ଉନ୍ନତି ଆଣିବ । ସମ୍ପୂର୍ଣ୍ଣ କାର୍ଯ୍ୟକ୍ଷମ ଲାଇନ୍ -୩ ଦୈନିକ ପ୍ରାୟ ୧୨ ଲକ୍ଷ ଯାତ୍ରୀଙ୍କୁ ସେବା ଯୋଗାଇବ ବୋଲି ଆଶା କରାଯାଉଛି।

ପାଖାପାଖି ୧୨,୨୦୦ କୋଟି ଟଙ୍କା ବ୍ୟୟରେ ନିର୍ମିତ ହେବାକୁ ଥିବା ଥାନେ ଇଣ୍ଟିଗ୍ରାଲ ରିଂ ମେଟ୍ରୋ ରେଳ ପ୍ରକଳ୍ପର ଶିଳାନ୍ୟାସ କରିବେ ପ୍ରଧାନମନ୍ତ୍ରୀ । ୨୦ଟି ଏଲିଭେଟେଡ୍ ଏବଂ ୨ଟି ଅଣ୍ଡରଗ୍ରାଉଣ୍ଡ ଷ୍ଟେସନ ସହିତ ଏହି ପ୍ରକଳ୍ପର ସମୁଦାୟ ଦୈର୍ଘ୍ୟ ୨୯ କିଲୋମିଟର। ମହାରାଷ୍ଟ୍ରର ଏକ ପ୍ରମୁଖ ଶିଳ୍ପ ଏବଂ ବାଣିଜ୍ୟିକ କେନ୍ଦ୍ର ଥାନେର ବଢୁଥିବା ପରିବହନ ଆବଶ୍ୟକତାକୁ ପୂରଣ କରିବା ପାଇଁ ଏହି ମହତ୍ୱାକାଂକ୍ଷୀ ଭିତ୍ତିଭୂମି ପ୍ରକଳ୍ପ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ।

ପ୍ରଧାନମନ୍ତ୍ରୀ ଛେଡା ନଗରରୁ ଥାନେର ଆନନ୍ଦ ନଗର ପର୍ଯ୍ୟନ୍ତ ପ୍ରାୟ ୩,୩୧୦ କୋଟି ଟଙ୍କା ମୂଲ୍ୟର ଏଲିଭେଟେଡ୍ ଇଷ୍ଟର୍ଣ୍ଣ ଫ୍ରିୱେ ଏକ୍ସଟେନସନର ଶିଳାନ୍ୟାସ କରିବେ । ଏହି ପ୍ରକଳ୍ପ ଦକ୍ଷିଣ ମୁମ୍ବାଇରୁ ଥାନେ କୁ ନିରବଚ୍ଛିନ୍ନ ସଂଯୋଗ ପ୍ରଦାନ କରିବ ।

ଏହାବ୍ୟତୀତ ପ୍ରଧାନମନ୍ତ୍ରୀ ପ୍ରାୟ ୨,୫୫୦ କୋଟି ଟଙ୍କା ବ୍ୟୟରେ ନଭି ମୁମ୍ବାଇ ଏୟାରପୋର୍ଟ ଇନଫ୍ଲୁଏନ୍ସ ନୋଟିଫାଏଡ୍ ଏରିଆ (ଏନଏଆଇଏନଏ) ପ୍ରକଳ୍ପର ପ୍ରଥମ ପର୍ଯ୍ୟାୟ ପ୍ରକଳ୍ପର ଶିଳାନ୍ୟାସ କରିବେ । ଏହି ପ୍ରକଳ୍ପରେ ମୁଖ୍ୟ ରାସ୍ତା, ବ୍ରିଜ, ଫ୍ଲାଏଓଭର, ଅଣ୍ଡରପାସ୍ ଏବଂ ସମନ୍ୱିତ ୟୁଟିଲିଟି ଭିତ୍ତିଭୂମି ନିର୍ମାଣ ଅନ୍ତର୍ଭୁକ୍ତ ।

ପ୍ରଧାନମନ୍ତ୍ରୀ ପାଖାପାଖି ୭୦୦ କୋଟି ଟଙ୍କା ବ୍ୟୟରେ ନିର୍ମିତ ହେବାକୁ ଥିବା ଥାନେ ମ୍ୟୁନିସିପାଲିଟି କର୍ପୋରେସନର ଶିଳାନ୍ୟାସ କରିବେ । ଥାନେ ମ୍ୟୁନିସିପାଲିଟି କର୍ପୋରେସନର ଆଧୁନିକ ପ୍ରଶାସନିକ କୋଠା ଥାନେର ଅଧିକାଂଶ ମ୍ୟୁନିସିପାଲିଟି କାର୍ଯ୍ୟାଳୟକୁ ଗୋଟିଏ ସ୍ଥାନରେ ରଖି ନାଗରିକମାନଙ୍କୁ ସୁବିଧା ପ୍ରଦାନ କରିବ ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ୍ ବୈଠକରେ ‘ଲେଟର ଅଫ୍ ଇଣ୍ଟେଣ୍ଟ’ ସ୍ୱାକ୍ଷରକୁ ଅନୁମୋଦନ ମିଳିଛି ଯାହା ଦ୍ୱାରା ଭାରତ ‘ଶକ୍ତି ଦକ୍ଷତା ହବ୍‍’ରେ ସାମିଲ ହୋଇପାରିବ।

ବିଶ୍ୱବ୍ୟାପୀ ସହଯୋଗ କୁ ପ୍ରୋତ୍ସାହିତ କରିବା ଏବଂ ଶକ୍ତି ଦକ୍ଷତାକୁ ପ୍ରୋତ୍ସାହିତ କରିବା ପାଇଁ ସମର୍ପିତ ଏକ ବିଶ୍ୱସ୍ତରୀୟ ପ୍ଲାଟଫର୍ମ ଅନ୍ତର୍ଜାତୀୟ ଶକ୍ତି ଦକ୍ଷତା ହବ୍ ରେ ଭାରତ ଯୋଗ ଦେବ । ଏହି ପଦକ୍ଷେପ ନିରନ୍ତର ବିକାଶ ପାଇଁ ଭାରତର ପ୍ରତିବଦ୍ଧତାକୁ ଦୃଢ଼ କରିବା ସହ ଗ୍ରୀନ୍ ହାଉସ୍ ଗ୍ୟାସ୍ ନିର୍ଗମନ ହ୍ରାସ କରିବାର ପ୍ରୟାସ ସହ ଯୋଡ଼ି ହୋଇଛି।

ଶକ୍ତି ଦକ୍ଷତା ସହଯୋଗ ପାଇଁ ଆନ୍ତର୍ଜାତିକ ଭାଗିଦାରୀ (ଆଇପିଇଇସି)ର ଉତ୍ତରାଧିକାରୀ ଭାବରେ ୨୦୨୦ରେ ସ୍ଥାପିତ ଏହି ହବ୍ ସରକାର, ଅନ୍ତର୍ଜାତୀୟ ସଂଗଠନ ଏବଂ ଘରୋଇ କ୍ଷେତ୍ରର ସଂସ୍ଥାଗୁଡ଼ିକୁ ଜ୍ଞାନ, ସର୍ବୋତ୍ତମ ଅଭ୍ୟାସ ଏବଂ ଅଭିନବ ସମାଧାନ ବାଣ୍ଟିବା ପାଇଁ ଏକାଠି କରିଛି। ହବ୍ ରେ ସାମିଲ ହେବା ଦ୍ୱାରା ଭାରତ ବିଶେଷଜ୍ଞ ଏବଂ ସମ୍ବଳର ଏକ ବିଶାଳ ନେଟୱାର୍କରେ ପ୍ରବେଶ କରିବ ଏବଂ ଘରୋଇ ଶକ୍ତି ଦକ୍ଷତା ପଦକ୍ଷେପକୁ ବୃଦ୍ଧି କରିବାରେ ସକ୍ଷମ ହେବ । ଜୁଲାଇ, ୨୦୨୪ ସୁଦ୍ଧା ୧୬ଟି ଦେଶ (ଆର୍ଜେଣ୍ଟିନା, ଅଷ୍ଟ୍ରେଲିଆ, ବ୍ରାଜିଲ, କାନାଡା, ଚୀନ୍‍, ଡେନମାର୍କ, ୟୁରୋପୀୟ କମିଶନ, ଫ୍ରାନ୍ସ, ଜର୍ମାନୀ, ଜାପାନ, କୋରିଆ, ଲକ୍ଜମବର୍ଗ, ରୁଷିଆ, ସାଉଦି ଆରବ, ଯୁକ୍ତରାଷ୍ଟ୍ର ଆମେରିକା ଏବଂ ବ୍ରିଟେନ) ହବ୍ ରେ ସାମିଲ ହୋଇଛନ୍ତି।

ହବ୍ ର ସଦସ୍ୟ ଭାବରେ, ଭାରତ ଅନ୍ୟ ସଦସ୍ୟ ରାଷ୍ଟ୍ରମାନଙ୍କ ସହ ସହଯୋଗ, ନିଜର ଦକ୍ଷତା ସେୟାର କରିବା ଏବଂ ଅନ୍ତର୍ଜାତୀୟ ଶ୍ରେଷ୍ଠ ଅଭ୍ୟାସରୁ ଶିଖିବାର ସୁଯୋଗରୁ ଉପକୃତ ହେବ । ଶକ୍ତି-ଦକ୍ଷ ଜ୍ଞାନକୌଶଳ ଏବଂ ଅଭ୍ୟାସକୁ ପ୍ରୋତ୍ସାହିତ କରି ଜଳବାୟୁ ପରିବର୍ତ୍ତନର ମୁକାବିଲା ପାଇଁ ବିଶ୍ୱସ୍ତରୀୟ ପ୍ରୟାସରେ ମଧ୍ୟ ଏହି ଦେଶ ଯୋଗଦାନ କରିବ ।

ବୈଧାନିକ ସଂସ୍ଥା ବ୍ୟୁରୋ ଅଫ୍ ଏନର୍ଜି ଏଫିସିଏନ୍ସି (ବିଇଇ)କୁ ଭାରତ ତରଫରୁ ହବ୍ ର କାର୍ଯ୍ୟକାରୀ ଏଜେନ୍ସି ଭାବେ ମନୋନୀତ କରାଯାଇଛି। ହବ୍ ର କାର୍ଯ୍ୟକଳାପରେ ଭାରତର ଅଂଶଗ୍ରହଣକୁ ସୁଗମ କରିବା ଏବଂ ଭାରତର ଅବଦାନକୁ ଏହାର ଜାତୀୟ ଶକ୍ତି ଦକ୍ଷତା ଲକ୍ଷ୍ୟ ସହିତ ଯୋଡ଼ିବା ସୁନିଶ୍ଚିତ କରିବାରେ ବିଇଇ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ।

ହବ୍ ରେ ସାମିଲ ହୋଇ ଭାରତ ଅଧିକ ସ୍ଥାୟୀ ଭବିଷ୍ୟତ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଉଛି। ଏହି ବୈଶ୍ୱିକ ପ୍ଲାଟଫର୍ମରେ ଦେଶର ଅଂଶଗ୍ରହଣ କାର୍ବନ ହ୍ରାସ ଅର୍ଥନୀତି ପରିବର୍ତ୍ତନକୁ ତ୍ୱରାନ୍ୱିତ କରିବା ଏବଂ ଶକ୍ତି ନିରାପତ୍ତା ରେ ଉନ୍ନତି ଆଣିବାରେ ସହାୟକ ହେବ ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ କେନ୍ଦ୍ର ମନ୍ତ୍ରିମଣ୍ଡଳ ୨୦୨୦-୨୧ରୁ ୨୦୨୫-୨୬ ପର୍ଯ୍ୟନ୍ତ ପ୍ରମୁଖ ବନ୍ଦ ଏବଂ ଡକ୍ ଲେବର ବୋର୍ଡର କର୍ମଚାରୀ/ଶ୍ରମିକମାନଙ୍କ ପାଇଁ ବର୍ତ୍ତମାନ ଥିବା ଉତ୍ପାଦକତା ସମ୍ପର୍କିତ ପୁରସ୍କାର (ପିଏଲଆର) ଯୋଜନାରେ ସଂଶୋଧନକୁ ମଂଜୁରୀ ଦେଇଛନ୍ତି।

୨୦୨୦-୨୧ରୁ ୨୦୨୫୨୦୨୬ ପର୍ଯ୍ୟନ୍ତ ଲାଗୁ ସଂଶୋଧିତ ପିଏଲଆର ଯୋଜନା ଦ୍ୱାରା ପ୍ରମୁଖ ବନ୍ଦର ପ୍ରାଧିକରଣ ଏବଂ ଡକ୍ ଲେବର ବୋର୍ଡର ପ୍ରାୟ ୨୦୭୦୪ ଜଣ କର୍ମଚାରୀ ଲାଭବାନ ହେବେ । ପୁରା ଅବଧି ପାଇଁ ଖର୍ଚ୍ଚର ବୋଝ ପ୍ରାୟ ୨୦୦ କୋଟି ଟଙ୍କା ହେବ।

ତଦନୁସାରେ ବନ୍ଦର, ଜାହାଜ ଚଳାଚଳ ଏବଂ ଜଳମାର୍ଗ ମନ୍ତ୍ରଣାଳୟ ୨୦୨୦-୨୧ରୁ ୨୦୨୫-୨୬ ପର୍ଯ୍ୟନ୍ତ ସମସ୍ତ ପ୍ରମୁଖ ବନ୍ଦରର  ପ୍ରାଧିକରଣ ଏବଂ ଡକ୍ ଲେବର ବୋର୍ଡର କର୍ମଚାରୀ/ଶ୍ରମିକମାନଙ୍କ ଉତ୍ପାଦକତା ସହ ସମ୍ପର୍କିତ ପୁରସ୍କାର (ପିଏଲଆର) ଯୋଜନାରେ ସଂଶୋଧନ କରିଛି। ଏଥିରେ ପିଏଲଆରର ଗଣନା ପାଇର୍ ଅଖିଳ ଭାରତୀୟ ପ୍ରଦର୍ଶନ ୱେଟେଜ୍ ବଦଳରେ ବନ୍ଦର ଭିତ୍ତିକ ପ୍ରଦର୍ଶନ ୱେଟେଜ୍ ବଢ଼ିଯାଇଛି। ବୋନସର ଗଣନା ପାଇଁ ଉତ୍ପାଦକତା ସହ ସମ୍ପର୍କିତ ପୁରସ୍କାର (ପିଏଲଆର) ଗଣନା ପ୍ରତି ମାସ ୭ ହଜାର ଟଙ୍କା ବେତନ ସୀମା ପର୍ଯ୍ୟନ୍ତ ଧାର୍ଯ୍ୟ କରାଯାଇଛି। ପିଏଲଆର ବାର୍ଷିକ ହାରରେ ବନ୍ଦର ଭିତ୍ତିକ ପ୍ରଦର୍ଶନର ୱେଟେଜକୁ ୫୦%ରୁ ୫୫% କୁ ବୃଦ୍ଧି କରି ପ୍ରଦାନ କରାଯିବ ଏବଂ ପରେ ତାହା ୬୦%କୁ ବୃଦ୍ଧି ହେବ। ଅଖିଳ ଭାରତୀୟ ବନ୍ଦର ପ୍ରଦର୍ଶନର ୱେଟେଜ୍ ୨୦୨୫-୨୬ ପର୍ଯ୍ୟନ୍ତ ୪୦% କୁ ହ୍ରାସ ପାଇବ। ଏହା ଅଖିଳ ଭାରତୀୟ ବନ୍ଦର ପ୍ରଦର୍ଶନ ଏବଂ ବନ୍ଦର ଭିତ୍ତିକ ପ୍ରଦର୍ଶନ ବର୍ତ୍ତମାନର ୫୦% ୱେଟେଜ୍‌କୁ ବଦଳ କରୁଛି। ଆଶା କରାଯାଉଛି ସଂଶୋଧିତ ବ୍ୟବସ୍ଥା ଯୋଗୁ ପ୍ରମୁଖ ବନ୍ଦର ଗୁଡ଼ିକ ମଧ୍ୟରେ ପ୍ରତିଦ୍ୱନ୍ଦ୍ୱିତା ସହ ଦକ୍ଷତା ମଧ୍ୟ ବୃଦ୍ଧି ପାଇବ।

ଏହି ପିଏଲଆର ଯୋଜନା ଅଧିକ ଉତ୍ପାଦକତାକୁ ପ୍ରୋତ୍ସାହିତ କରିବା ସହ ଉତ୍ତମ ଔଦ୍ୟୋଗିକ ସମ୍ବନ୍ଧ ଓ ଅନୁକୂଳ କାର୍ଯ୍ୟ ବାତାବରଣକୁ ବଢ଼ାଇବ।

ଉତ୍ପାଦକତା ସହ ସମ୍ପର୍କିତ ପୁରସ୍କାର (ପିଏଲଆର) ପ୍ରମୁଖ ବନ୍ଦର ଟ୍ରଷ୍ଟ ଏବଂ ଡକ୍ ଲେବର ବୋର୍ଡର ଶ୍ରମିକ/କର୍ମଚାରୀମାନଙ୍କ ପାଇଁ ଏକ ବର୍ତ୍ତମାନର ଯୋଜନା। ଏହି ଅନୁସାରେ ପ୍ରମୁଖ ବନ୍ଦର ପ୍ରାଧିକରଣ ଟ୍ରଷ୍ଟ ଏବଂ ଶ୍ରମିକ ସଂଘ ଗୁଡ଼ିକ ମଧ୍ୟରେ ହୋଇଥିବା ବୁଝାମଣା ଅନୁସାରେ କର୍ମଚାରୀ/ଶ୍ରମିକମାନଙ୍କୁ ବାର୍ଷିକ ଆଧାର ଅନୁସାରେ ଆର୍ଥିକ ପୁରସ୍କାର ପ୍ରଦାନ କରାଯାଇଥାଏ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭାରତୀୟଙ୍କ ନମନୀୟତାକୁ ପ୍ରଶଂସା କରିଛନ୍ତି। ସେ ଆତ୍ମବିଶ୍ୱାସ ବ୍ୟକ୍ତ କରିଛନ୍ତି ଯେ ଲୋକଙ୍କ ସାହସ ଏବଂ ଭାବନା ଆମ ସମସ୍ତଙ୍କୁ ପ୍ରେରଣା ଯୋଗାଇବ।

ଏକ୍ସରେ ଇଣ୍ଡିଆ ମାଇନରିଟିଜ୍ ଫାଉଣ୍ଡେସନ୍ ଦ୍ୱାରା ଏକ ଭିଡିଓ ପୋଷ୍ଟ ଶେୟାର କରି ସେ କହିଛନ୍ତି;

“ଆମ ଲୋକଙ୍କ ନମନୀୟତା ପାଇଁ ଗର୍ବିତ। ସେମାନଙ୍କର ସାହସ ଏବଂ ଭାବନା ଆମ ସମସ୍ତଙ୍କୁ ପ୍ରେରଣା ଯୋଗାଇବ।”

ନୂଆଦିଲ୍ଲୀ: ରେଳ କର୍ମଚାରୀଙ୍କ ଉତ୍କୃଷ୍ଟ ପ୍ରଦର୍ଶନକୁ ସ୍ୱୀକୃତି ଦେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ୧୧,୭୨,୨୪୦ ରେଳ କର୍ମଚାରୀଙ୍କ ଲାଗି ୨୦୨୮.୫୭ କୋଟି ଟଙ୍କାର ୭୮ ଦିନର ଉତ୍ପାଦକତା ଆଧାରିତ ବୋନସ୍‌ (ପିଏଲବି) ପ୍ରଦାନକୁ ଅନୁମୋଦନ ଓ ଘୋଷଣା କରିଛି।

ରେଳ ଧାରଣା ରକ୍ଷଣାବେକ୍ଷଣକାରୀ, ଲୋକୋ ପାଇଲଟ୍, ଟ୍ରେନ୍ ମ୍ୟାନେଜର (ଗାର୍ଡ), ଷ୍ଟେସନ୍ ମାଷ୍ଟର, ସୁପରଭାଇଜର, ଟେକ୍ନିସିଆନ୍, ଟେକ୍ନିସିଆନ୍ ହେଲପର, ପଏଣ୍ଟମ୍ୟାନ୍, ମନ୍ତ୍ରଣାଳୟ ସ୍ତରୀୟ କର୍ମଚାରୀ ଏବଂ ଅନ୍ୟ ଗ୍ରୁପ୍ ଏକ୍ସସି କର୍ମଚାରୀଙ୍କ ଭଳି ରେଳ କର୍ମଚାରୀଙ୍କୁ ଏହି ରାଶି ପ୍ରଦାନ କରାଯିବ। ପିଏଲବିର ଦେୟ ରେଳବାଇର ପ୍ରଦର୍ଶନରେ ଉନ୍ନତି ଆଣିବା ଦିଗରେ କାର୍ଯ୍ୟ କରିବା ପାଇଁ ରେଳ କର୍ମଚାରୀମାନଙ୍କୁ ଉତ୍ସାହିତ କରିବା ନିମନ୍ତେ ଏକ ପ୍ରୋତ୍ସାହନ ଭାବରେ କାର୍ଯ୍ୟ କରିଥାଏ।

ଯୋଗ୍ୟ ରେଳ କର୍ମଚାରୀମାନଙ୍କୁ ପ୍ରତିବର୍ଷ ଦୁର୍ଗାପୂଜା/ ଦଶହରା ଛୁଟି ପୂର୍ବରୁ ପିଏଲବି ପ୍ରଦାନ କରାଯାଏ। ଚଳିତ ବର୍ଷ ମଧ୍ୟ ପ୍ରାୟ ୧୧.୭୨ ଲକ୍ଷ ଅଣଗେଜେଟେଡ୍ ରେଳ କର୍ମଚାରୀଙ୍କୁ ୭୮ ଦିନର ଦରମା ସହ ସମାନ ପିଏଲବି ରାଶି ପ୍ରଦାନ କରାଯାଉଛି।

ପ୍ରତି ଯୋଗ୍ୟ ରେଳ କର୍ମଚାରୀଙ୍କୁ ସର୍ବାଧିକ ୧୭,୯୫୧/- ଟଙ୍କା ପର୍ଯ୍ୟନ୍ତ ୭୮ ଦିନର ବେତନ ଦିଆଯିବ। ଉପରୋକ୍ତ ରାଶି ରେଳ କର୍ମଚାରୀ ଯଥା ରେଳ ଧାରଣା ରକ୍ଷଣାବେକ୍ଷଣକାରୀ, ଲୋକୋ ପାଇଲଟ୍, ଟ୍ରେନ୍ ମ୍ୟାନେଜର (ଗାର୍ଡ), ଷ୍ଟେସନ୍ ମାଷ୍ଟର, ସୁପରଭାଇଜର, ଟେକ୍ନିସିଆନ୍, ଟେକ୍ନିସିଆନ୍ ହେଲପର, ପଏଣ୍ଟମ୍ୟାନ୍, ମନ୍ତ୍ରଣାଳୟ ସ୍ତରୀୟ କର୍ମଚାରୀ ଏବଂ ଅନ୍ୟ ଗ୍ରୁପ୍ ‘ସି’ କର୍ମଚାରୀଙ୍କୁ ପ୍ରଦାନ କରାଯିବ।

୨୦୨୩-୨୦୨୪ ବର୍ଷରେ ରେଳବାଇର ପ୍ରଦର୍ଶନ ବହୁତ ଭଲ ଥିଲା। ରେଳବାଇ ୧୫୮୮ ନିୟୁତ ଟନ୍ ର ରେକର୍ଡ କାର୍ଗୋ ଲୋଡ୍ କରିଛି ଏବଂ ପାଖାପାଖି ୬.୭ ବିଲିୟନ ଯାତ୍ରୀ ପରିବହନ କରିଛି।

ଏହି ରେକର୍ଡ ପ୍ରଦର୍ଶନରେ ଅନେକ କାରଣ ଯୋଗଦାନ କରିଥିଲେ। ରେଳବାଇରେ ସରକାରଙ୍କ ଦ୍ୱାରା ରେକର୍ଡ କ୍ୟାପେକ୍ସ ପ୍ରୟୋଗ ଯୋଗୁଁ ଭିତ୍ତିଭୂମିରେ ଉନ୍ନତି, ପରିଚାଳନାରେ ଦକ୍ଷତା ଏବଂ ଉନ୍ନତ ଜ୍ଞାନକୌଶଳ ଇତ୍ୟାଦି ଅନ୍ତର୍ଭୁକ୍ତ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ଘରୋଇ ତୈଳବୀଜ ଉତ୍ପାଦନ ବୃଦ୍ଧି ଏବଂ ଖାଇବା ତେଲରେ ଆତ୍ମନିର୍ଭରଶୀଳତା (ଆତ୍ମନିର୍ଭର ଭାରତ) ହାସଲ କରିବା ଉଦ୍ଦେଶ୍ୟରେ ଏକ ଐତିହାସିକ ପଦକ୍ଷେପ ସ୍ୱରୂପ ଖାଇବା ତେଲ – ତୈଳବୀଜ ଉପରେ ଜାତୀୟ ମିଶନ (ଏନଏମଇଓ-ତୈଳବୀଜ) କୁ ଅନୁମୋଦନ କରାଯାଇଛି। ୨୦୨୪-୨୫ରୁ ୨୦୩୦-୩୧ ପର୍ଯ୍ୟନ୍ତ ୭ ବର୍ଷ ମଧ୍ୟରେ ୧୦,୧୦୩ କୋଟି ଟଙ୍କାର ଆର୍ଥିକ ବ୍ୟୟବରାଦ ସହ ଏହି ମିଶନ କାର୍ଯ୍ୟକାରୀ ହେବ।

ନୂତନ ଭାବେ ଅନୁମୋଦିତ ଏନଏମଇଓ-ତୈଳବୀଜ ମୁଖ୍ୟ ପ୍ରାଥମିକ ତୈଳବୀଜ ଫସଲ ଯଥା ରେପସିଡ୍-ସୋରିଷ, ଚିନାବାଦାମ, ସୋୟାବିନ୍, ସୂର୍ଯ୍ୟମୁଖୀ ଏବଂ ରାଶିର ଉତ୍ପାଦନ ବୃଦ୍ଧି କରିବା ସହିତ କପା ମଞ୍ଜି, କୁଣ୍ଡା ଏବଂ ଉଦ୍ଭିଦ ବାହିତ ତୈଳ ଭଳି ଦ୍ବିତୀୟ ଉତ୍ସରୁ ତୈଳ ସଂଗ୍ରହ ଏବଂ ଉତ୍ତୋଳନ ଦକ୍ଷତା ବୃଦ୍ଧି ଉପରେ ଧ୍ୟାନ ଦେବ। ଏହି ଅଭିଯାନରେ ପ୍ରାଥମିକ ତୈଳବୀଜ ଉତ୍ପାଦନ ୩୯ ନିୟୁତ ଟନ୍ (୨୦୨୨-୨୩)ରୁ ୨୦୩୦-୩୧ ସୁଦ୍ଧା ୬୯.୭ ନିୟୁତ ଟନକୁ ବୃଦ୍ଧି କରିବାକୁ ଲକ୍ଷ୍ୟ ରଖାଯାଇଛି। ଏନଏମଇଓ-ଓପି (ଅଏଲ ପାମ) ସହିତ ମିଶି ଏହି ମିଶନ ୨୦୩୦-୩୧ ସୁଦ୍ଧା ଘରୋଇ ଖାଇବା ତେଲ ଉତ୍ପାଦନକୁ ୨୫.୪୫ ନିୟୁତ ଟନକୁ ବୃଦ୍ଧି କରିବାକୁ ଲକ୍ଷ୍ୟ ରଖିଛି। ଅଧିକ ଉତ୍ପାଦନକାରୀ ଅଧିକ ତୈଳ ଯୁକ୍ତ ବିହନ ପ୍ରଜାତି ଗ୍ରହଣ କୁ ପ୍ରୋତ୍ସାହିତ କରିବା, ଧାନ ଫସଲ ଅଞ୍ଚଳରେ ଚାଷକୁ ବିସ୍ତାର କରିବା ଏବଂ ଆନ୍ତଃଫସଲକୁ ପ୍ରୋତ୍ସାହିତ କରିବା ଦ୍ୱାରା ଏହା ହାସଲ କରାଯିବ। ଏହି ମିଶନ ଜିନୋମ ଏଡିଟିଂ ଭଳି ଅତ୍ୟାଧୁନିକ ବୈଶ୍ୱିକ ଜ୍ଞାନକୌଶଳ ବ୍ୟବହାର କରି ଉଚ୍ଚ ଗୁଣବତ୍ତା ବିଶିଷ୍ଟ ବିହନର ସାମ୍ପ୍ରତିକ ବିକାଶକୁ ଉପଯୋଗ କରିବ।

ଉନ୍ନତ ମାନର ବିହନ ଠିକ୍ ସମୟରେ ଉପଲବ୍ଧ କରାଇବା ପାଇଁ ଏହି ମିଶନ ବିହନ ପ୍ରମାଣୀକରଣ ସିଦ୍ଧତା ଏବଂ ସାମଗ୍ରିକ ଉଦ୍ଭାବାନ ବା ‘ସିଡ୍‌ ଅଥେଣ୍ଟିକେସନ ଟ୍ରେସେବିଲିଟି ଆଣ୍ଡ ହୋଲିଷ୍ଟିକ୍ ଇନଭେଣ୍ଟରି (ସାଥୀ)’ ପୋର୍ଟାଲ ମାଧ୍ୟମରେ ଏକ ଅନଲାଇନ୍ ୫ ବର୍ଷ ଧରି କାର୍ଯ୍ୟକାରୀ ହେବାକୁ ଥିବା ବିହନ ଯୋଜନା ଆରମ୍ଭ କରିବ। ଏହାଦ୍ୱାରା ସମବାୟ, କୃଷକ ଉତ୍ପାଦକ ସଂଗଠନ (ଏଫପିଓ) ଏବଂ ସରକାରୀ କିମ୍ବା ବେସରକାରୀ ବିହନ ନିଗମ ସମେତ ବିହନ ଉତ୍ପାଦନକାରୀ ଏଜେନ୍ସିମାନଙ୍କ ସହିତ ରାଜ୍ୟଗୁଡ଼ିକ ଆଗୁଆ ଚୁକ୍ତି ସ୍ଥାପନ କରିପାରିବେ। ବିହନ ଉତ୍ପାଦନ ଭିତ୍ତିଭୂମିରେ ଉନ୍ନତି ଆଣିବା ପାଇଁ ସରକାରୀ କ୍ଷେତ୍ରରେ ୬୫ଟି ନୂତନ ବିହନ କେନ୍ଦ୍ର ଏବଂ ୫୦ଟି ବିହନ ଷ୍ଟୋରେଜ୍ ୟୁନିଟ୍ ପ୍ରତିଷ୍ଠା କରାଯିବ।

ଏହାବ୍ୟତୀତ ବାର୍ଷିକ ୧୦ ଲକ୍ଷ ହେକ୍ଟରରୁ ଅଧିକ ଜମିକୁ ଅନ୍ତର୍ଭୁକ୍ତ କରି ୩୪୭ଟି ଅଭିନବ ଜିଲ୍ଲାରେ ୬୦୦ରୁ ଅଧିକ ମୂଲ୍ୟ ଶୃଙ୍ଖଳା ଶଙ୍କୁଳ ବିକଶିତ କରାଯିବ। ଏଫପିଓ, ସମବାୟ ଏବଂ ସରକାରୀ କିମ୍ବା ବେସରକାରୀ ସଂସ୍ଥା ଭଳି ମୂଲ୍ୟ ଶୃଙ୍ଖଳା ଅଂଶୀଦାରମାନେ ଏହି ଶଙ୍କୁଳଗୁଡିକ ପରିଚାଳନା କରିବେ। ଏହି ଶଙ୍କୁଳର ଚାଷୀମାନେ ଉନ୍ନତ ମାନର ବିହନ, ଉତ୍ତମ କୃଷି ପ୍ରଣାଳୀ (ଜିଏପି) ଉପରେ ପ୍ରଶିକ୍ଷଣ ଏବଂ ପାଣିପାଗ ଓ କୀଟ ପରିଚାଳନା ଉପରେ ପରାମର୍ଶ ସେବା ପାଇପାରିବେ।

ଧାନ ଓ ଆଳୁ ଫସଲ ଜମିକୁ ଆଧାର କରି, ଆନ୍ତଃଫସଲକୁ ପ୍ରୋତ୍ସାହନ ଦେବା ଏବଂ ଫସଲ ବିବିଧତାକୁ ପ୍ରୋତ୍ସାହନ ଦେଇ ତୈଳବୀଜ ଚାଷକୁ ଅତିରିକ୍ତ ୪୦ ଲକ୍ଷ ହେକ୍ଟର ବୃଦ୍ଧି କରିବାକୁ ଏହି ମିଶନ ଲକ୍ଷ୍ୟ ରଖିଛି।

କପାବୀଜ, କୁଣ୍ଡା, ମକା ତେଲ ଏବଂ ଟ୍ରି-ବର୍ଣ୍ଣ ଅଏଲ୍ (ଟିବିଓ) ଭଳି ଉତ୍ସରୁ ତୈଳ ସଂଗ୍ରହ ବୃଦ୍ଧି ପାଇଁ ଫସଲ ଅମଳ ପରବର୍ତ୍ତୀ ୟୁନିଟ୍ ପ୍ରତିଷ୍ଠା କିମ୍ବା ଉନ୍ନତିକରଣ ଲାଗି ଏଫପିଓ, ସମବାୟ ଏବଂ ଶିଳ୍ପ ସଂସ୍ଥାଗୁଡ଼ିକୁ ସହାୟତା ପ୍ରଦାନ କରାଯିବ।

ସୂଚନା, ଶିକ୍ଷା ଓ ଯୋଗାଯୋଗ (ଆଇଇସି) ଅଭିଯାନ ଜରିଆରେ ଖାଇବା ତେଲ ପାଇଁ ସୁପାରିସ କରାଯାଇଥିବା ଖାଦ୍ୟ ମାର୍ଗଦର୍ଶିକା ସମ୍ପର୍କରେ ଏହି ମିଶନ ସଚେତନତା ସୃଷ୍ଟି କରିବ ।

ଘରୋଇ ତୈଳବୀଜ ଉତ୍ପାଦନକୁ ଯଥେଷ୍ଟ ବୃଦ୍ଧି କରିବା, ଖାଇବା ତେଲରେ ଆତ୍ମନିର୍ଭରଶୀଳତା (ଆତ୍ମନିର୍ଭରଶୀଳତା)ର ଲକ୍ଷ୍ୟକୁ ଆଗକୁ ବଢ଼ାଇବା ଏବଂ ଏହା ମାଧ୍ୟମରେ ଆମଦାନୀ ନିର୍ଭରଶୀଳତା ହ୍ରାସ କରିବା ତଥା ମୂଲ୍ୟବାନ ବୈଦେଶିକ ମୁଦ୍ରା ସଞ୍ଚୟ ସହିତ କୃଷକଙ୍କ ଆୟ ବୃଦ୍ଧି କରିବା ଏହି ମିଶନର ଲକ୍ଷ୍ୟ । ଏହି ଅଭିଯାନ ଜରିଆରେ କମ୍ ଜଳ ବ୍ୟବହାର ଓ ମୃତ୍ତିକା ସ୍ୱାସ୍ଥ୍ୟରେ ଉନ୍ନତି ଆଣିବା ଏବଂ ଉର୍ବରତା ବୃଦ୍ଧି ପାଇଁ ଫସଲ ଅମଳ ହେଉନଥିବା ଅଞ୍ଚଳର ଉତ୍ପାଦନଶୀଳ ବ୍ୟବହାର ଆକାରରେ ମଧ୍ୟ ଗୁରୁତ୍ୱପୂର୍ଣ୍ଣ ପରିବେଶ ଲାଭ ମିଳିପାରିବ ।

ପୃଷ୍ଠଭୂମି

ଦେଶ ଖାଇବା ତେଲର ୫୭% ଘରୋଇ ଚାହିଦା ମେଣ୍ଟାଇବା ପାଇଁ ଆମଦାନୀ ଉପରେ ଅଧିକ ନିର୍ଭରଶୀଳ। ଏହି ନିର୍ଭରଶୀଳତାକୁ ଦୂର କରିବା ଏବଂ ଆତ୍ମନିର୍ଭରଶୀଳତାକୁ ପ୍ରୋତ୍ସାହିତ କରିବା ପାଇଁ ଭାରତ ସରକାର ୨୦୨୧ ରେ ଦେଶରେ ତାଳ ତେଲ ଚାଷକୁ ପ୍ରୋତ୍ସାହିତ କରିବା ପାଇଁ ୧୧,୦୪୦ କୋଟି ଟଙ୍କା ବ୍ୟୟରେ ଜାତୀୟ ଖାଦ୍ୟ ତୈଳ ମିଶନ – ଅଏଲ ପାମ (ଏନଏମଇଓ-ଓପି) ଆରମ୍ଭ କରିବା ସହିତ ଖାଇବା ତେଲର ଘରୋଇ ଉତ୍ପାଦନ ବୃଦ୍ଧି ଲାଗି ଅନେକ ପଦକ୍ଷେପ ଗ୍ରହଣ କରିଛନ୍ତି ।

ଏହାବ୍ୟତୀତ ତୈଳବୀଜ ଚାଷୀଙ୍କୁ ଲାଭଜନକ ମୂଲ୍ୟ ସୁନିଶ୍ଚିତ କରିବା ପାଇଁ ବାଧ୍ୟତାମୂଳକ ରୂପେ ଖାଇବା ତୈଳବୀଜ ପାଇଁ ସର୍ବନିମ୍ନ ସହାୟକ ମୂଲ୍ୟ (ଏମଏସପି) ଯଥେଷ୍ଟ ବୃଦ୍ଧି କରାଯାଇଛି। ପ୍ରଧାନମନ୍ତ୍ରୀ ଅନ୍ନଦାତା ଆୟ ସଂରକ୍ଷଣ ଅଭିଯାନ (ପିଏମ-ଆଶା) ଜାରି ରଖିବା ଦ୍ୱାରା ତୈଳବୀଜ ଚାଷୀମାନେ ମୂଲ୍ୟ ସହାୟକ ଯୋଜନା ଏବଂ ମୂଲ୍ୟ ଅଭାବ ପରିଶୋଧ ଯୋଜନା ମାଧ୍ୟମରେ ଏମଏସପି ପାଇପାରିବେ। ଏହାବ୍ୟତୀତ  ଘରୋଇ ଉତ୍ପାଦକମାନଙ୍କୁ ଶସ୍ତା ଆମଦାନୀ ସମସ୍ୟାରୁ ରକ୍ଷା କରିବା ଏବଂ ସ୍ଥାନୀୟ ଚାଷକୁ ପ୍ରୋତ୍ସାହିତ କରିବା ପାଇଁ ଖାଇବା ତେଲ ଉପରେ ୨୦% ଆମଦାନୀ ଶୁଳ୍କ ଲାଗୁ କରାଯାଇଛି।

**********

P.S.

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨ ଅକ୍ଟୋବର ୨୦୨୪ରେ ଝାଡ଼ଖଣ୍ଡ ଗସ୍ତରେ ଯିବେ। ସେ ଝାଡ଼ଖଣ୍ଡର ହଜାରୀବାଗରେ ଅପରାହ୍ଣ ୨ଟା ବେଳେ ୮୩,୩୦୦ କୋଟି ଟଙ୍କାର ବିଭିନ୍ନ ପ୍ରକଳ୍ପର ଶିଳାନ୍ୟାସ, ଉଦଘାଟନ ଏବଂ ଶୁଭାରମ୍ଭ କରିବେ। ଦେଶରେ ଜନଜାତି ସମ୍ପ୍ରଦାୟର ବିକାଶ ଦିଗରେ ପ୍ରତିବଦ୍ଧତା ସ୍ୱରୂପ ପ୍ରଧାନମନ୍ତ୍ରୀ ୭୯,୧୫୦ କୋଟି ଟଙ୍କାର ଧରତୀ ଆବା ଜନଜାତୀୟ ଗ୍ରାମ ଉତ୍କର୍ଷ ଅଭିଯାନର ଶୁଭାରମ୍ଭ କରିବେ। ଏହି ଅଭିଯାନ ୩୦ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ୫୪୯ ଜିଲ୍ଲା ଏବଂ ୨୭୪୦ ବ୍ଲକର ୬୩ ହଜାର ଗ୍ରାମରେ ଥିବା ୫ କୋଟିରୁ ଅଧିକ ଜନଜାତି ଲୋକଙ୍କୁ ଫାଇଦା ଦେବ। ଏହି ଅଭିଯାନରେ କେନ୍ଦ୍ର ସରକାରଙ୍କ ୧୭ଟି ମନ୍ତ୍ରଣାଳୟ ଓ ବିଭାଗ ଦ୍ୱାରା ସାମାଜିକ ମୌଳିକ ଢାଞ୍ଚା, ସ୍ୱାସ୍ଥ୍ୟ, ଶିକ୍ଷା, ଜୀବିକା ଅଦି କ୍ଷେତ୍ରରେ ଥିବା ଦୁର୍ବଳତା ଦୂର କରିବାକୁ ୨୫ଟି ଯୋଜନା କାର୍ଯ୍ୟକାରୀ କରିବେ।

ଜନଜାତି ସମୁଦାୟର ଶିକ୍ଷାଗତ ଢାଞ୍ଚାରେ ବିକାଶ ଆଣିବାକୁ ପ୍ରଧାନମନ୍ତ୍ରୀ ୪୦ଟି ଏକଲବ୍ୟ ଆଦର୍ଶ ଆବାସିକ ସ୍କୁଲ (ଇଏମଆର)କୁ ଉଦଘାଟନ କରିବେ ଏବଂ ୨୮୦୦ କୋଟି ଟଙ୍କାରେ ହେବାକୂୁ ଥିବା ୨୫ଟି ସ୍କୁଲର ଶିଳାନ୍ୟାସ କରିବେ।

ପ୍ରଧାନମନ୍ତ୍ରୀ ଜନଜାତି ଆଦିବାସୀ ନ୍ୟାୟ ମହା ଅଭିଯାନ (ପିଏମ-ଜନମନ) ଅଧୀନରେ ୧୩୬୦ କୋଟି ଟଙ୍କାରୁ ଅଧିକ ମୂଲ୍ୟର ଅନେକ ଗୁଡ଼ିଏ ପ୍ରକଳ୍ପର ଉଦଘାଟନ ଏବଂ ଶିଳାନ୍ୟାସ କରିବେ। ଏହା ମଧ୍ୟରେ ରହିଛି ୧୩୮୦ କିଲୋମିଟରର ରାସ୍ତା, ୧୨୦ଟି ଅଙ୍ଗନବାଡ଼ି, ୨୫୦ଟି ବହୁମୁଖୀ କେନ୍ଦ୍ର ଏବଂ ୧୦ଟି ସ୍କୁଲ ଛାତ୍ରାବାସ। ଏଥିସହ ସେ ପିଏମ୍‌-ଜନମନ ଅଧୀନରେ ଅନେକ ଗୁଡ଼ିଏ ପ୍ରକଳ୍ପର ଶୁଭାରମ୍ଭ କରିବେ ଯାହାକି ବିକାଶର ମାଇଲଖୁଣ୍ଟ। ଏହା ମଧ୍ୟରେ ରହିଛି ୩ ହଜାର ଗ୍ରାମରେ ବିଶେଷ ଭାବେ କମ୍‌ଜୋର ଜନଜାତି ଗୋଷ୍ଠୀ (ପିଭିଟିଜି)ଙ୍କ ୭୫,୮୦୦ରୁ ଅଧିକ ଘରର ବିଦ୍ୟୁତୀକରଣ, ୨୭୫ଟି ମୋବାଇଲ ମେଡିକାଲ ୟୁନିଟର ଶୁଭାରମ୍ଭ, ୫୦୦ ଅଙ୍ଗନାବାଡ଼ି କେନ୍ଦ୍ରର ଉଦଘାଟନ, ୨୫୦ଟି ବନ ଧନ ବିକାଶ କେନ୍ଦ୍ରର ପ୍ରତିଷ୍ଠା ଏବ ୫୫୫୦ ପିଭିଟିଜି ଗ୍ରାମକୁ ‘ନଲସେ ଜଲ’ ଯୋଜନାରେ ଜଳଯୋଗାଣ ଯୋଜନା।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଭିଡିଓ କନଫରେନ୍ସିଂ ମାଧ୍ୟମରେ ମହାରାଷ୍ଟ୍ରରେ ୧୧,୨୦୦ କୋଟି ଟଙ୍କାରୁ ଅଧିକ ମୂଲ୍ୟର ବିଭିନ୍ନ ପ୍ରକଳ୍ପର ଶିଳାନ୍ୟାସ, ଉଦଘାଟନ ଏବଂ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିଛନ୍ତି।

ଏହି ଅବସରରେ ଉଦବୋଧନ ଦେଇ ପ୍ରଧାନମନ୍ତ୍ରୀ ଦୁଇ ଦିନ ତଳେ ଖରାପ ପାଗ କାରଣରୁ ପୁଣେରେ ତାଙ୍କର କାର୍ଯ୍ୟକ୍ରମ ବାତିଲ ହୋଇଥିବା କଥା ମନେ ପକାଇଥିଲେ ଏବଂ ଆଜିର ଭର୍ଚୁଆଲ୍ କାର୍ଯ୍ୟକ୍ରମ ପାଇଁ ଟେକ୍ନୋଲୋଜିକୁ ଶ୍ରେୟ ଦେଇ କହିଥିଲେ ଯେ ମହାନ ବ୍ୟକ୍ତିତ୍ୱଙ୍କ ଏହି ପ୍ରେରଣାଭୂମି ମହାରାଷ୍ଟ୍ରର ବିକାଶର ଏକ ନୂତନ ଅଧ୍ୟାୟ ଦେଖୁଛି। ଶ୍ରୀ ମୋଦୀ ଜିଲ୍ଲା କୋର୍ଟରୁ ସ୍ୱାରଗେଟକୁ ପୁଣେ ମେଟ୍ରୋ ସେକ୍ସନର ଉଦଘାଟନ ଏବଂ ଆଜି ପୁଣେ ମେଟ୍ରୋ ଫେଜ୍ -୧ ର ସ୍ୱାର୍ଗେଟ୍-କାଟ୍ରାଜ ସମ୍ପ୍ରସାରଣ ପାଇଁ ଶିଳାନ୍ୟାସ କରିବା ବିଷୟରେ ଉଲ୍ଲେଖ କରିଥିଲେ। ଭିଡେୱାଡାଠାରେ କ୍ରାନ୍ତିଜ୍ୟୋତି ସାବିତ୍ରୀବାଇ ଫୁଲେଙ୍କ ସ୍ମୃତିରେ ପ୍ରଥମ ବାଳିକା ବିଦ୍ୟାଳୟର ଶିଳାନ୍ୟାସ କରିବା ବିଷୟରେ ଉଲ୍ଲେଖ କରିବା ସହିତ ପୁଣେରେ ଜୀବନଶୈଳୀକୁ ସହଜ କରିବା ଦିଗରେ ଦ୍ରୁତ ଅଗ୍ରଗତି ରେ ସନ୍ତୋଷ ବ୍ୟକ୍ତ କରିଥିଲେ।

ସହରକୁ ସିଧାସଳଖ ବିମାନ ଯୋଗାଯୋଗ ସ୍ଥାପନ କରିବା ପାଇଁ ସୋଲାପୁର ବିମାନବନ୍ଦରର ଉଦଘାଟନ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ, “ଭଗବାନ ବିଠଲଙ୍କ ଭକ୍ତମାନେ ମଧ୍ୟ ଆଜି ଏକ ସ୍ୱତନ୍ତ୍ର ଉପହାର ପାଇଛନ୍ତି”। ବିଦ୍ୟମାନ ବିମାନବନ୍ଦରର ଉନ୍ନତିକରଣ କାର୍ଯ୍ୟ ଶେଷ ହେବା ପରେ ଟର୍ମିନାଲ କ୍ଷମତା ବୃଦ୍ଧି କରାଯାଇ ଯାତ୍ରୀଙ୍କ ପାଇଁ ନୂତନ ସେବା ଓ ସୁବିଧା ସୃଷ୍ଟି କରାଯାଇଛି, ଯାହା ଦ୍ୱାରା ଭଗବାନ ବିଠଲଙ୍କ ଭକ୍ତଙ୍କ ପାଇଁ ସୁବିଧା ବୃଦ୍ଧି ପାଇଛି ବୋଲି ସେ ସୂଚନା ଦେଇଛନ୍ତି। ଏହି ବିମାନବନ୍ଦର ବ୍ୟବସାୟ, ଶିଳ୍ପ ଏବଂ ପର୍ଯ୍ୟଟନକୁ ପ୍ରୋତ୍ସାହିତ କରିବ ବୋଲି ସେ କହିଛନ୍ତି ଏବଂ ଆଜିର ବିକାଶ ମୂଳକ ପ୍ରକଳ୍ପ ପାଇଁ ମହାରାଷ୍ଟ୍ରବାସୀଙ୍କୁ ଅଭିନନ୍ଦନ ଜଣାଇଛନ୍ତି।

ପୁଣେ ଭଳି ସହରକୁ ପ୍ରଗତି ଓ ନଗର ଉନ୍ନୟନର କେନ୍ଦ୍ରରେ ପରିଣତ କରିବାର ଆବଶ୍ୟକତା ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ କହିଥିଲେ, “ଆଜି ମହାରାଷ୍ଟ୍ରକୁ ନୂଆ ସଂକଳ୍ପ ସହିତ ବଡ଼ ଲକ୍ଷ୍ୟର ଆବଶ୍ୟକତା ରହିଛି। ପୁଣେର ପ୍ରଗତି ଏବଂ ବଢୁଥିବା ଜନସଂଖ୍ୟାର ଚାପ ବିଷୟରେ ଆଲୋଚନା କରି ପ୍ରଧାନମନ୍ତ୍ରୀ କହିଥିଲେ ଯେ ବିକାଶ ଏବଂ ଦକ୍ଷତା ବୃଦ୍ଧି ପାଇଁ ବର୍ତ୍ତମାନ ପଦକ୍ଷେପ ନେବାର ଆବଶ୍ୟକତା ରହିଛି। ଏହି ଲକ୍ଷ୍ୟ ହାସଲ କରିବା ପାଇଁ ବର୍ତ୍ତମାନର ରାଜ୍ୟ ସରକାର ପୁଣେର ସାର୍ବଜନୀନ ପରିବହନର ଆଧୁନିକୀକରଣ ଏବଂ ସହରର ସମ୍ପ୍ରସାରଣ ସହିତ ଯୋଗାଯୋଗକୁ ପ୍ରୋତ୍ସାହନ ଦେବାର ଆଭିମୁଖ୍ୟ ସହିତ କାର୍ଯ୍ୟ କରୁଛନ୍ତି ବୋଲି ପ୍ରଧାନମନ୍ତ୍ରୀ କହିଥିଲେ।

ପ୍ରଧାନମନ୍ତ୍ରୀ ସ୍ମରଣ କରିଥିଲେ ଯେ ପୁଣେ ମେଟ୍ରୋ ବିଷୟରେ ଆଲୋଚନା ୨୦୦୮ ରେ ଆରମ୍ଭ ହୋଇଥିଲା କିନ୍ତୁ ୨୦୧୬ ରେ ଏହାର ଶିଳାନ୍ୟାସ କରାଯାଇଥିଲା ଯେତେବେଳେ ତାଙ୍କ ସରକାର ତ୍ୱରିତ ନିଷ୍ପତ୍ତି ନେଇଥିଲେ। ଫଳରେ ଆଜି ପୁଣେ ମେଟ୍ରୋ ଦ୍ରୁତ ଗତିରେ ବୃଦ୍ଧି ପାଉଛି ଏବଂ ସମ୍ପ୍ରସାରଣ ହେଉଛି ବୋଲି ପ୍ରଧାନମନ୍ତ୍ରୀ କହିଥିଲେ। ଆଜିର ପ୍ରକଳ୍ପ ସମ୍ପର୍କରେ ଉଲ୍ଲେଖ କରି ଶ୍ରୀ ମୋଦୀ କହିଛନ୍ତି ଯେ ଗୋଟିଏ ପଟେ ପୁଣେ ମେଟ୍ରୋ ସେକ୍ସନ୍ ରେ ଜିଲ୍ଲା ଅଦାଲତର ସ୍ୱାର୍ଗେଟ୍ ପର୍ଯ୍ୟନ୍ତ ଉଦଘାଟିତ ହୋଇଥିବା ବେଳେ ଅନ୍ୟପଟେ ସ୍ୱର୍ଗେଟରୁ କାଟରାଜ ଲାଇନ୍ ପାଇଁ ଶିଳାନ୍ୟାସ କରାଯାଇଛି। ଚଳିତ ବର୍ଷ ମାର୍ଚ୍ଚ ମାସରେ ରୁବି ହଲ୍ କ୍ଲିନିକରୁ ରାମୱାଡି ପର୍ଯ୍ୟନ୍ତ ମେଟ୍ରୋ ସେବାର ଶୁଭାରମ୍ଭ କରିବା କଥା ସେ ମନେ ପକାଇଥିଲେ। ତ୍ୱରିତ ନିଷ୍ପତ୍ତି ନେବା ଏବଂ ପ୍ରତିବନ୍ଧକ ଦୂର କରିବା କାରଣରୁ ୨୦୧୬ ରୁ ବର୍ତ୍ତମାନ ପର୍ଯ୍ୟନ୍ତ ପୁଣେ ମେଟ୍ରୋର ସମ୍ପ୍ରସାରଣ ପାଇଁ କରାଯାଇଥିବା କାର୍ଯ୍ୟକୁ ପ୍ରଧାନମନ୍ତ୍ରୀ ପ୍ରଶଂସା କରିଥିଲେ । ସେ ଦର୍ଶାଇଛନ୍ତି ଯେ ବର୍ତ୍ତମାନର ସରକାର ପୁଣେରେ ମେଟ୍ରୋର ଏକ ଆଧୁନିକ ନେଟୱାର୍କ ପ୍ରସ୍ତୁତ କରିଥିବା ବେଳେ ପୂର୍ବ ସରକାର ୮ ବର୍ଷରେ ମାତ୍ର ଗୋଟିଏ ମେଟ୍ରୋ ସ୍ତମ୍ଭ ନିର୍ମାଣ କରିପାରିଥିଲେ।

ମହାରାଷ୍ଟ୍ରର ପ୍ରଗତିକୁ ସୁନିଶ୍ଚିତ କରିବାରେ ବିକାଶ ଭିତ୍ତିକ ଶାସନର ଗୁରୁତ୍ୱ ଉପରେ ଶ୍ରୀ ମୋଦୀ ଗୁରୁତ୍ୱାରୋପ କରିଥିଲେ ଏବଂ ଏହି ନିରନ୍ତରତାରେ କୌଣସି ବାଧା ସୃଷ୍ଟି ହେଲେ ରାଜ୍ୟ ପାଇଁ ଯଥେଷ୍ଟ କ୍ଷତି ହୋଇଥାଏ ବୋଲି ଗୁରୁତ୍ୱାରୋପ କରିଥିଲେ। ସେ ମେଟ୍ରୋ ପଦକ୍ଷେପ ଠାରୁ ଆରମ୍ଭ କରି ମୁମ୍ବାଇ-ଅହମ୍ମଦାବାଦ ବୁଲେଟ୍ ଟ୍ରେନ୍ ଏବଂ କୃଷକମାନଙ୍କ ପାଇଁ ଗୁରୁତ୍ୱପୂର୍ଣ୍ଣ ଜଳସେଚନ ପ୍ରକଳ୍ପ ପର୍ଯ୍ୟନ୍ତ ବିଭିନ୍ନ ଅଟକି ରହିଥିବା ପ୍ରକଳ୍ପ ଉପରେ ଆଲୋକପାତ କରିଥିଲେ, ଯାହା ଡବଲ ଇଞ୍ଜିନ ସରକାର ଆସିବା ପୂର୍ବରୁ ବିଳମ୍ବିତ ହୋଇଥିଲା।

ପ୍ରଧାନମନ୍ତ୍ରୀ ତତ୍କାଳୀନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କ କାର୍ଯ୍ୟକାଳ ସମୟରେ ପରିକଳ୍ପିତ ଓରିକ୍ ସିଟିର ଏକ ଗୁରୁତ୍ୱପୂର୍ଣ୍ଣ ଉପାଦାନ ବିଡକିନ୍ ଶିଳ୍ପାଞ୍ଚଳ ବିଷୟରେ କହିଥିଲେ। ଦିଲ୍ଲୀ-ମୁମ୍ବାଇ ଶିଳ୍ପ କରିଡରରେ ଅବସ୍ଥିତ ଏହି ପ୍ରକଳ୍ପ ପ୍ରତିବନ୍ଧକର ସମ୍ମୁଖୀନ ହୋଇଥିଲା କିନ୍ତୁ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ନେତୃତ୍ୱାଧୀନ ଡବଲ ଇଞ୍ଜିନ ସରକାରଙ୍କ ନେତୃତ୍ୱରେ ଏହାକୁ ପୁନରୁଦ୍ଧାର କରାଯାଇଥିଲା। ଶ୍ରୀ ମୋଦୀ ବିଡକିନ ଇଣ୍ଡଷ୍ଟ୍ରିଆଲ୍ ନୋଡ୍ କୁ ଦେଶ ଉଦ୍ଦେଶ୍ୟରେ ସମର୍ପଣ କରିବାର ଘୋଷଣା କରିବା ସହ ଏହି କ୍ଷେତ୍ରରେ ଉଲ୍ଲେଖନୀୟ ପୁଞ୍ଜିନିବେଶ ଏବଂ ନିଯୁକ୍ତି ସୁଯୋଗ ଆଣିବାର ସମ୍ଭାବନା ଉପରେ ଆଲୋକପାତ କରିଥିଲେ। ୮,୦୦୦ ଏକର ଜମିରେ ବିଡକିନ୍ ଶିଳ୍ପାଞ୍ଚଳର ବିକାଶ ହେଲେ ମହାରାଷ୍ଟ୍ରକୁ ହଜାର ହଜାର କୋଟି ଟଙ୍କାର ପୁଞ୍ଜିନିବେଶ ଆସିବ ଏବଂ ହଜାର ହଜାର ଯୁବକଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହେବ ବୋଲି ପ୍ରଧାନମନ୍ତ୍ରୀ କହିଥିଲେ।

ପୁଞ୍ଜିନିବେଶ ମାଧ୍ୟମରେ ନିଯୁକ୍ତି ସୃଷ୍ଟି କରିବାର ମନ୍ତ୍ର ଆଜି ମହାରାଷ୍ଟ୍ରରେ ଯୁବକମାନଙ୍କର ଏକ ପ୍ରମୁଖ ଶକ୍ତି ପାଲଟିଛି ବୋଲି ସେ ଗୁରୁତ୍ୱାରୋପ କରିଥିଲେ। ଆଧୁନିକୀକରଣ ଦେଶର ମୂଳ ମୂଲ୍ୟବୋଧ ଉପରେ ଆଧାରିତ ହେବା ଉଚିତ ବୋଲି ଶ୍ରୀ ମୋଦୀ ଦୋହରାଇଥିଲେ ଏବଂ ଭାରତ ଏହାର ସମୃଦ୍ଧ ଐତିହ୍ୟକୁ ଆଗକୁ ବଢ଼ାଇବା ସହିତ ଆଧୁନିକୀକରଣ ଏବଂ ବିକାଶ କରିବ ବୋଲି ଗୁରୁତ୍ୱାରୋପ କରିଥିଲେ। ଉଭୟ ଭବିଷ୍ୟତରେ ପ୍ରସ୍ତୁତ ଭିତ୍ତିଭୂମି ଏବଂ ବିକାଶର ଲାଭ ପ୍ରତ୍ୟେକ ବର୍ଗରେ ପହଞ୍ଚିବା ମହାରାଷ୍ଟ୍ର ପାଇଁ ସମାନ ଭାବରେ ଗୁରୁତ୍ୱପୂର୍ଣ୍ଣ ବୋଲି ସେ କହିଥିଲେ ଏବଂ ଯେତେବେଳେ ସମାଜର ପ୍ରତ୍ୟେକ ବର୍ଗ ଦେଶର ବିକାଶରେ ଅଂଶଗ୍ରହଣ କରିବେ ସେତେବେଳେ ଏହା ବାସ୍ତବତାରେ ପରିଣତ ହୋଇପାରିବ ବୋଲି ସେ ଗୁରୁତ୍ୱାରୋପ କରିଥିଲେ।

ପ୍ରଧାନମନ୍ତ୍ରୀ ସାମାଜିକ ପରିବର୍ତ୍ତନରେ ମହିଳା ନେତୃତ୍ୱର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଗୁରୁତ୍ୱାରୋପ କରିଥିଲେ। ସେ ମହାରାଷ୍ଟ୍ରର ମହିଳା ସଶକ୍ତୀକରଣର ପରମ୍ପରା, ବିଶେଷକରି ସାବିତ୍ରୀବାଇ ଫୁଲେଙ୍କ ପ୍ରୟାସକୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ, ଯିଏ କି ପ୍ରଥମ ବାଳିକା ବିଦ୍ୟାଳୟ ଖୋଲି ମହିଳା ଶିକ୍ଷା ପାଇଁ ଆନ୍ଦୋଳନ ଆରମ୍ଭ କରିଥିଲେ। ପ୍ରଧାନମନ୍ତ୍ରୀ ସାବିତ୍ରୀବାଇ ଫୁଲେ ସ୍ମାରକୀର ଶିଳାନ୍ୟାସ କରିଥିଲେ, ଯେଉଁଥିରେ ଏକ ଦକ୍ଷତା ବିକାଶ କେନ୍ଦ୍ର, ଏକ ପାଠାଗାର ଏବଂ ଅନ୍ୟାନ୍ୟ ଅତ୍ୟାବଶ୍ୟକ ସୁବିଧା ଅନ୍ତର୍ଭୁକ୍ତ ହେବ। ଏହି ସ୍ମାରକୀ ସମାଜ ସଂସ୍କାର ଆନ୍ଦୋଳନପ୍ରତି ସ୍ଥାୟୀ ଶ୍ରଦ୍ଧାଞ୍ଜଳି ଭାବରେ କାର୍ଯ୍ୟ କରିବ ଏବଂ ଭବିଷ୍ୟତ ପିଢ଼ିକୁ ପ୍ରେରଣା ଯୋଗାଇବ ବୋଲି ଶ୍ରୀ ମୋଦୀ ବିଶ୍ୱାସ ବ୍ୟକ୍ତ କରିଥିଲେ।

ପ୍ରଧାନମନ୍ତ୍ରୀ ସ୍ୱାଧୀନତା ପୂର୍ବ ଭାରତରେ ବିଶେଷ କରି ଶିକ୍ଷା ପ୍ରାପ୍ତିରେ ମହିଳାମାନେ ସମ୍ମୁଖୀନ ହେଉଥିବା ବିରାଟ ଆହ୍ୱାନ ଉପରେ ଆଲୋକପାତ କରିଥିଲେ ଏବଂ ସାବିତ୍ରୀବାଇ ଫୁଲେଙ୍କ ପରି ଦୂରଦର୍ଶୀମାନଙ୍କ ପାଇଁ ଶିକ୍ଷାର ଦ୍ୱାର ଖୋଲିଥିବାରୁ ପ୍ରଶଂସା କରିଥିଲେ। ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ସ୍ୱାଧୀନତା ହାସଲ କରିବା ସତ୍ତ୍ୱେ ଦେଶ ଅତୀତର ମାନସିକତାକୁ ସମ୍ପୂର୍ଣ୍ଣ ରୂପେ ଛାଡିବା ପାଇଁ ସଂଘର୍ଷ କରିଥିଲା ଏବଂ ପୂର୍ବ ସରକାରମାନଙ୍କୁ ଦର୍ଶାଇଥିଲେ ଯେଉଁମାନେ ଅନେକ କ୍ଷେତ୍ରରେ ମହିଳାଙ୍କ ପ୍ରବେଶ ଉପରେ ପ୍ରତିବନ୍ଧକ ଲଗାଇଥିଲେ।

ସେ କହିଛନ୍ତି ଯେ ବିଦ୍ୟାଳୟରେ ଶୌଚାଳୟ ଭଳି ମୌଳିକ ଭିତ୍ତିଭୂମିର ଅଭାବ ଯୋଗୁଁ ଝିଅମାନେ ଡ୍ରପଆଉଟ୍ ହାର ଅଧିକ ରହିବେ। ଶ୍ରୀ ମୋଦୀ କହିଥିଲେ ଯେ ବର୍ତ୍ତମାନର ସରକାର ସୈନିକ ବିଦ୍ୟାଳୟରେ ମହିଳାଙ୍କ ନାମଲେଖା ଏବଂ ସଶସ୍ତ୍ର ବାହିନୀ ମଧ୍ୟରେ ଭୂମିକା ସମେତ ପୁରୁଣା ବ୍ୟବସ୍ଥାରେ ପରିବର୍ତ୍ତନ ଆଣିଛନ୍ତି ଏବଂ ଗର୍ଭବତୀ ମହିଳାଙ୍କୁ ସେମାନଙ୍କ କାର୍ଯ୍ୟ ଛାଡ଼ିବାକୁ ପଡୁଥିବା ପ୍ରସଙ୍ଗର ମଧ୍ୟ ସମାଧାନ କରିଛନ୍ତି। ପ୍ରଧାନମନ୍ତ୍ରୀ ସ୍ୱଚ୍ଛ ଭାରତ ଅଭିଯାନର ଗୁରୁତ୍ୱପୂର୍ଣ୍ଣ ପ୍ରଭାବ ବିଷୟରେ ଆଲୋକପାତ କରିଥିଲେ ଏବଂ କହିଥିଲେ ଯେ ଏହାର ସର୍ବାଧିକ ହିତାଧିକାରୀ ହେଉଛନ୍ତି ଝିଅ ଏବଂ ମହିଳା ଯେଉଁମାନେ ଖୋଲା ସ୍ଥାନରେ ମଳତ୍ୟାଗର ସମସ୍ୟାରୁ ମୁକ୍ତି ପାଇଛନ୍ତି।

ସେ ଏହା ମଧ୍ୟ ଉଲ୍ଲେଖ କରିଛନ୍ତି ଯେ ବିଦ୍ୟାଳୟ ପରିମଳରେ ଉନ୍ନତି ବାଳିକାମାନଙ୍କ ପାଇଁ ଡ୍ରପଆଉଟ୍ ହାର ହ୍ରାସ କରିଛି। ଶ୍ରୀ ମୋଦୀ  ମହିଳାଙ୍କ ସୁରକ୍ଷା ପାଇଁ କଠୋର ଆଇନ ଏବଂ ନାରୀ ଶକ୍ତି ବନ୍ଦନ ଅଧିନିୟମ ଉପରେ ଆଲୋକପାତ କରିଥିଲେ ଯାହା ଭାରତର ଗଣତାନ୍ତ୍ରିକ ପ୍ରକ୍ରିୟାରେ ମହିଳା ନେତୃତ୍ୱକୁ ସୁନିଶ୍ଚିତ କରେ। ସାବିତ୍ରୀବାଇ ଫୁଲେ ସ୍ମାରକୀ ଏହି ସଂକଳ୍ପ ଏବଂ ମହିଳା ସଶକ୍ତୀକରଣ ଅଭିଯାନକୁ ଆହୁରି ଶକ୍ତି ଯୋଗାଇବ ବୋଲି ବିଶ୍ୱାସ ବ୍ୟକ୍ତ କରି ଶ୍ରୀ ମୋଦୀ କହିଥିଲେ, “ଯେତେବେଳେ ପ୍ରତ୍ୟେକ କ୍ଷେତ୍ରର ଦ୍ୱାର ଆମ ଝିଅମାନଙ୍କ ପାଇଁ ଖୋଲିବ, ସେତେବେଳେ ହିଁ ଦେଶ ପାଇଁ ପ୍ରଗତିର ପ୍ରକୃତ ଦ୍ୱାର ଖୋଲିବ”।

ଅଭିଭାଷଣ ଶେଷରେ ପ୍ରଧାନମନ୍ତ୍ରୀ ଦେଶକୁ ବିକାଶ ଦିଗରେ ମାର୍ଗଦର୍ଶନ କରିବାରେ ମହାରାଷ୍ଟ୍ରର ଗୁରୁତ୍ୱପୂର୍ଣ୍ଣ ଭୂମିକା ଉପରେ ତାଙ୍କର ବିଶ୍ୱାସକୁ ଦୋହରାଇଥିଲେ ଏବଂ କହିଥିଲେ, “ଆମେ ସମସ୍ତେ ମିଳିମିଶି ‘ବିକଶିତ ମହାରାଷ୍ଟ୍ର, ବିକଶିତ ଭାରତ’ର ଏହି ଲକ୍ଷ୍ୟ ହାସଲ କରିବୁ।

ମହାରାଷ୍ଟ୍ର ର ରାଜ୍ୟପାଳ ସିପି ରାଧାକ୍ରିଷ୍ଣନ, ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେ, ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ଏବଂ ଅଜିତ ପାୱାର ଏବଂ ଅନ୍ୟ ମାନ୍ୟଗଣ୍ୟ ବ୍ୟକ୍ତିମାନେ ଭର୍ଚୁଆଲ ଭାବରେ ଉପସ୍ଥିତ ଥିଲେ।

ପୃଷ୍ଠଭୂମି

ପ୍ରଧାନମନ୍ତ୍ରୀ ପୁଣେ ମେଟ୍ରୋ ସେକ୍ସନର ଜିଲ୍ଲା କୋର୍ଟରୁ ସ୍ୱାରଗେଟର ଉଦଘାଟନ କରିଥିଲେ ଯାହା ପୁଣେ ମେଟ୍ରୋ ରେଳ ପ୍ରକଳ୍ପ (ପ୍ରଥମ ପର୍ଯ୍ୟାୟ)କୁ ମଧ୍ୟ ସମ୍ପୂର୍ଣ୍ଣ କରିବ। ଜିଲ୍ଲା ଅଦାଲତରୁ ସ୍ୱର୍ଗେଟ୍ ମଧ୍ୟରେ ଭୂତଳ ସେକ୍ସନର ମୂଲ୍ୟ ପ୍ରାୟ ୧୮୧୦ କୋଟି ଟଙ୍କା। ଏହାବ୍ୟତୀତ ପ୍ରଧାନମନ୍ତ୍ରୀ ପାଖାପାଖି ୨୯୫୫ କୋଟି ଟଙ୍କା ବ୍ୟୟରେ ବିକଶିତ ହେବାକୁ ଥିବା ପୁଣେ ମେଟ୍ରୋ ଫେଜ୍ -୧ ର ସ୍ୱାର୍ଗେଟ୍-କାତରାଜ ସମ୍ପ୍ରସାରଣର ଶିଳାନ୍ୟାସ କରିଛନ୍ତି। ପ୍ରାୟ ୫.୪୬ କିଲୋମିଟରର ଏହି ଦକ୍ଷିଣ ସମ୍ପ୍ରସାରଣ ସମ୍ପୂର୍ଣ୍ଣ ଭୂତଳ ଅଟେ ଯେଉଁଥିରେ ମାର୍କେଟ ୟାର୍ଡ, ପଦ୍ମାବତୀ ଏବଂ କାଟରାଜ ନାମକ ତିନୋଟି ଷ୍ଟେସନ ରହିଛି।

ମହାରାଷ୍ଟ୍ରର ଛତ୍ରପତି ସମ୍ଭାଜୀନଗରଠାରୁ ୨୦ କିଲୋମିଟର ଦକ୍ଷିଣରେ ଅବସ୍ଥିତ ଭାରତ ସରକାରଙ୍କ ଜାତୀୟ ଶିଳ୍ପ କରିଡର ବିକାଶ କାର୍ଯ୍ୟକ୍ରମ ଅଧୀନରେ ୭,୮୫୫ ଏକର ପରିମିତ ଏକ ପରିବର୍ତ୍ତନକାରୀ ପ୍ରକଳ୍ପ ବିଡକିନ ଇଣ୍ଡଷ୍ଟ୍ରିଆଲ ଏରିଆକୁ ପ୍ରଧାନମନ୍ତ୍ରୀ ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିଥିଲେ। ଦିଲ୍ଲୀ ମୁମ୍ବାଇ ଶିଳ୍ପ କରିଡର ଅଧୀନରେ ବିକଶିତ ଏହି ପ୍ରକଳ୍ପ ମରାଠାୱାଡା ଅଞ୍ଚଳରେ ଏକ ଜୀବନ୍ତ ଅର୍ଥନୈତିକ କେନ୍ଦ୍ର ଭାବରେ ପ୍ରଚୁର ସମ୍ଭାବନା ରଖିଛି। କେନ୍ଦ୍ର ସରକାର ୩ ଟି ପର୍ଯ୍ୟାୟରେ ବିକାଶ ପାଇଁ ମୋଟ ୬୪୦୦ କୋଟି ଟଙ୍କାରୁ ଅଧିକ ବ୍ୟୟ ଅଟକଳ ବିଶିଷ୍ଟ ଏହି ପ୍ରକଳ୍ପକୁ ଅନୁମୋଦନ କରିଛନ୍ତି।

ପ୍ରଧାନମନ୍ତ୍ରୀ ସୋଲାପୁର ବିମାନବନ୍ଦରକୁ ମଧ୍ୟ ଉଦଘାଟନ କରିଥିଲେ ଯାହା ଯୋଗାଯୋଗରେ ଉଲ୍ଲେଖନୀୟ ଉନ୍ନତି ଆଣିବ ଏବଂ ସୋଲାପୁରକୁ ପର୍ଯ୍ୟଟକ, ବ୍ୟବସାୟୀ ଯାତ୍ରୀ ଏବଂ ନିବେଶକଙ୍କ ପାଇଁ ଅଧିକ ଉପଲବ୍ଧ କରିବ। ବାର୍ଷିକ ପ୍ରାୟ ୪.୧ ଲକ୍ଷ ଯାତ୍ରୀଙ୍କୁ ସେବା ଯୋଗାଇବା ପାଇଁ ସୋଲାପୁରର ବର୍ତ୍ତମାନର ଟର୍ମିନାଲ ବିଲ୍ଡିଂର ନବୀକରଣ କରାଯାଇଛି। ଏହାବ୍ୟତୀତ ପ୍ରଧାନମନ୍ତ୍ରୀ ଭିଡେୱାଡାଠାରେ କ୍ରାନ୍ତିଜ୍ୟୋତି ସାବିତ୍ରୀବାଇ ଫୁଲେଙ୍କ ପ୍ରଥମ ବାଳିକା ବିଦ୍ୟାଳୟର ଶିଳାନ୍ୟାସ କରିଥିଲେ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଏବଂ କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଅମିତ ଶାହଙ୍କ ମାର୍ଗଦର୍ଶନରେ ଗୃହ ମନ୍ତ୍ରଣାଳୟ ସ୍ୱଚ୍ଛ ଭାରତ ଅଭିଯାନ ପାଇଁ ପ୍ରତିଶ୍ରୁତିବଦ୍ଧ। ସ୍ୱଚ୍ଛ ଭାରତ ଅଭିଯାନ ଅଧୀନରେ ସ୍ୱଚ୍ଛତା ଏବଂ ଲୋକଙ୍କ ନିରନ୍ତର ସକ୍ରିୟ ଅଂଶଗ୍ରହଣ ସୁନିଶ୍ଚିତ କରିବା ପାଇଁ ଗୃହ ମନ୍ତ୍ରଣାଳୟ ଦ୍ୱାରା ଅନେକ ପ୍ରୟାସ କରାଯାଉଛି। ଏହି ପ୍ରୟାସର ଏକ ଅଂଶ ଭାବରେ ସୀମା ପରିଚାଳନା ସଚିବ ଶ୍ରୀ ରାଜେନ୍ଦ୍ର କୁମାର ନର୍ଥ ବ୍ଲକରେ ଗୃହ ମନ୍ତ୍ରଣାଳୟର ଅଧିକାରୀ ଓ କର୍ମଚାରୀମାନଙ୍କୁ ସ୍ୱଚ୍ଛତାର ଶପଥ ପାଠ କରାଇଥିଲେ।

ଗୃହ ମନ୍ତ୍ରଣାଳୟର ଅଧିକାରୀ ଓ କର୍ମଚାରୀମାନେ ନର୍ଥ ବ୍ଲକ ପରିସରରେ ସ୍ୱଚ୍ଛତା ପାଇଁ ଶ୍ରମଦାନ କରିଥିଲେ। ସ୍ୱଚ୍ଛ ଭାରତ ଅଭିଯାନ ଅଧୀନରେ ସ୍ୱଚ୍ଛତା ଏବଂ ଲୋକଙ୍କ ସକ୍ରିୟ ଅଂଶଗ୍ରହଣ ସୁନିଶ୍ଚିତ କରିବା ଦିଗରେ ଗୃହ ମନ୍ତ୍ରଣାଳୟ ଦ୍ୱାରା କରାଯାଉଥିବା ଅନେକ ପ୍ରୟାସ ମଧ୍ୟରୁ ଏହି କାର୍ଯ୍ୟକ୍ରମ ଅନ୍ୟତମ। ସ୍ୱଚ୍ଛତା ପ୍ରତିଶ୍ରୁତି ଆମ ଆଖପାଖକୁ ପରିଷ୍କାର ରଖିବା, ବର୍ଜ୍ୟବସ୍ତୁର ଦାୟିତ୍ୱପୂର୍ଣ୍ଣ ନିଷ୍କାସନକୁ ପ୍ରୋତ୍ସାହିତ କରିବା ଏବଂ ଦୈନନ୍ଦିନ ଜୀବନରେ ସ୍ଥାୟୀ ଅଭ୍ୟାସ ଗ୍ରହଣ କରିବା ଉପରେ ଗୁରୁତ୍ୱାରୋପ କରିଥିଲା।

​ଏହି ଅବସରରେ ସଚିବ (ସୀମା ପରିଚାଳନା) ଗୃହ ମନ୍ତ୍ରଣାଳୟର ସମସ୍ତ ଅଧିକାରୀ ଓ କର୍ମଚାରୀଙ୍କୁ ସେମାନଙ୍କ ବ୍ୟକ୍ତିଗତ ଏବଂ ବୃତ୍ତିଗତ ଜୀବନରେ ସ୍ୱଚ୍ଛ ଭାରତ ଅଭିଯାନ ଦିଗରେ ଯୋଗଦାନ ଜାରି ରଖିବାକୁ ଉତ୍ସାହିତ କରିଥିଲେ। ସେ କହିଥିଲେ ଯେ ଗୃହ ମନ୍ତ୍ରଣାଳୟ ଏକ ସ୍ୱଚ୍ଛ, ସବୁଜ ଭାରତର ଲକ୍ଷ୍ୟ ପ୍ରତି ପ୍ରତିଶ୍ରୁତିବଦ୍ଧ ଏବଂ ପରିବେଶ ସୁରକ୍ଷା ଦିଗରେ ସ୍ୱଚ୍ଛତା, ସ୍ଥାୟୀତା ଏବଂ ଦାୟିତ୍ୱକୁ ପ୍ରୋତ୍ସାହିତ କରୁଥିବା ପଦକ୍ଷେପରେ ସକ୍ରିୟ ଭାବରେ ସାମିଲ ହେବ।

ସ୍ୱଚ୍ଛ ଭାରତ ଅଭିଯାନ ପ୍ରତି ନିଜର ପ୍ରତିବଦ୍ଧତାକୁ ପ୍ରଦର୍ଶିତ କରି ଗୃହ ମନ୍ତ୍ରଣାଳୟର ବହୁ ସଂଖ୍ୟକ ଅଧିକାରୀ ଏବଂ କର୍ମଚାରୀ ସଫେଇ କାର୍ଯ୍ୟରେ ଅଂଶଗ୍ରହଣ କରିଥିଲେ ଏବଂ କାର୍ଯ୍ୟାଳୟ ପରିସରରେ ଥିବା ସାଧାରଣ ସ୍ଥାନକୁ ଆବର୍ଜନାମୁକ୍ତ କରିବା ସୁନିଶ୍ଚିତ କରିଥିଲେ। ଏହି ସାମୂହିକ ସ୍ୱଚ୍ଛତା ଅଭିଯାନ ପରିବେଶକୁ ସ୍ୱଚ୍ଛ ରଖିବାରେ ପ୍ରତ୍ୟେକ ବ୍ୟକ୍ତିର ଦାୟିତ୍ୱ ଦେଖାଇବାକୁ ପ୍ରୟାସ ଭାବରେ କାର୍ଯ୍ୟ କରେ।

ପରିବେଶ ସୁରକ୍ଷା ଓ ସବୁଜ ଭବିଷ୍ୟତ ପ୍ରତି ନିଜର ସମର୍ପଣ ଦେଖାଇ ଗୃହ ମନ୍ତ୍ରଣାଳୟର ବହୁ ସଂଖ୍ୟକ ଅଧିକାରୀ ଓ କର୍ମଚାରୀ ‘ଏକ ପେଡ୍ ମା କେ ନାମ’ ଅଭିଯାନ ଅଧୀନରେ ନର୍ଥ ବ୍ଲକରେ ଥିବା ପାର୍କରେ ବୃକ୍ଷରୋପଣ କରିଥିଲେ।