Tag: ନାଚୁଣୀ ମହାବିଦ୍ୟାଳୟ

ନାଚୁଣୀ ( ସୀତାରାମ ଅଗ୍ରୱାଲ): ଆଜି ନାଚୁଣୀ କଲେଜରେ ଖୋର୍ଦ୍ଧା ଜିଲା ପୋଲିସ ପକ୍ଷରୁ ସାଇବର ଅପରାଧ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏଥିରେ ମୁଖ୍ୟ ଅତିଥି ଭାବେ ଜିଲ୍ଲା ଅତିରିକ୍ତ ଆରକ୍ଷୀ ଅଧିକ୍ଷକ ସୁରେନ୍ଦ୍ରନାଥ ମୁର୍ମୁ ଯୋଗ ଦେଇ ପ୍ରଦୀପ ପ୍ରଜ୍ବଳନ କରି କାର୍ଯ୍ୟକ୍ରମକୁ ଉଦ୍ଘାଟନ କରିଥିଲେ।

ଉକ୍ତ କାର୍ଯ୍ୟକ୍ରମରେ ସମ୍ନାନିତ ଅତିଥିଭାବେ ଡ଼ିଏସପି ଅନିଲ କୁମାର ମହାନ୍ତି, ମୁଖ୍ୟ ବକ୍ତାଭାବେ ବାଲୁଗାଁ ଏସଡ଼ିପିଓ ଶୁଭ୍ରାଂଶୁ ଶେଖର ମିଶ୍ର, ଆମନ୍ତ୍ରିତ ଅତିଥି ଭାବେ ନାଚୁଣୀ ଆଇଆଇସି ଚନ୍ଦ୍ରଶେଖର ଜେନା, ନାଚୁଣୀ କଲେଜ ଅଧ୍ୟକ୍ଷ ନାରାୟଣ ବଳିୟାରସିଂହ ଓ କଲେଜ ପରିଚାଳନା କମିଟି ସଭାପତି ଅରୁଣ କୁମାର ଦାସ ଯୋଗ ଦେଇଥିଲେ । ଅଧ୍ୟାପିକା ଲୀନା ନଦିଜା କାର୍ଯ୍ୟକ୍ରମ ସ°ଚାଳନରେ ସହଯୋଗ କରିଥିଲେ। କିଭଳି ଭାବରେ ସାଇବର ଅପରାଧରୁ ଦୁରେଇ ରହିବା, କୌଣସି ଅଜଣା ଫୋନ କଲ ଆସିଲେ ଓଟିପି ନଦେବା, ୟୁପିଆଇ ମାଧ୍ୟମରେ କାରବାର କଲେ ସମ୍ପୂର୍ଣ୍ଣ ସଚେତନ ରହିବା ସହ ବିଭିନ୍ନ ଦିଗକୁ ନେଇ ହେଉଥିବା ସାଇବର ଠକେଇରୁ ନିଜକୁ ସୁରକ୍ଷିତ ରହିବାକୁ ନେଇ ଉପସ୍ଥିତ ଅତିଥିମାନେ ନିଜ ନିଜର ବକ୍ତବ୍ୟ ରଖିଥିଲେ।

ଏହି ଅବସରରେ ସାଂସ୍କୃତିକ କାର୍ଯ୍ୟକ୍ରମ, କୁଇଜ ପ୍ରତିଯୋଗିତା, ଗୀତ ଓ ଡ୍ୟାନ୍ସ ପୋଗ୍ରାମର ଆୟୋଜନ କରାଯାଇଥିଲା। ଏଥିରେ ଯେଉଁ ଛାତ୍ରଛାତ୍ରୀମାନେ ଅଂଶ ଗ୍ରହଣ କରି ପ୍ରଥମ, ଦିତୀୟ ଓ ତୃତୀୟ ସ୍ଥାନ ପାଇ ଥିଲେ ସେମାନଙ୍କୁ ପୁରସ୍କାର ପ୍ରଦାନ କରାଯାଇଥିଲା।

ଉକ୍ତ କାର୍ଯ୍ୟକ୍ରମରେ ସମାଜସେବୀ ଅଭିଜିତ ବିଶ୍ୱାଳ ଏବଂ ପ୍ରଦୁମ୍ନ ରଞ୍ଜନ ସୁଆର ସହଯୋଗ ପ୍ରଦାନ କରିଥିଲେ। ପରିଶେଷରେ ଅଧ୍ୟାପିକା ଡଃ ସୁଭଦ୍ରା ଭୋଳ ଧନ୍ୟବାଦ ଅର୍ପଣ କରିଥିଲେ। ଉପରୋକ୍ତ ଆୟୋଜକଙ୍କ ପକ୍ଷରୁ ନିକଟସ୍ଥ ହରିପୁର ର ଲକ୍ଷ୍ମୀଧର ସରକାରୀ ହାଇସ୍କୁଲ ରେ ପ୍ରଧାନ ଶିକ୍ଷୟିତ୍ରୀ ସୁବ୍ରତା ସାହୁଙ୍କ ସହଯୋଗ ରେ ମଧ୍ୟ ସାଇବର ସଚେତନତା କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏଥିରେ ସମସ୍ତ ଶିକ୍ଷକ,ଶିକ୍ଷୟିତ୍ରୀ ଓ ଛାତ୍ରଛାତ୍ରୀ ଯୋଗ ଦେଇଥିଲେ।

ସୀତାରାମ ଅଗ୍ରୱାଲ

ନାଚୁଣୀ: ଆଜିଠାରୁ ଖୋର୍ଦ୍ଧା ଜିଲ୍ଲା ନାଚୁଣୀ ମହାବିଦ୍ୟାଳୟରେ ଯୁକ୍ତ ଦୁଇ ଛାତ୍ରଛାତ୍ରୀଙ୍କୁ ମୋବାଇଲ ମନା। ଏ ନେଇ ମହାବିଦ୍ୟାଳୟ ଅଧ୍ୟକ୍ଷ ପ୍ରକୃତି ରଞ୍ଜନ ମିଶ୍ର ଦୁଇ ଦିନ ତଳେ ଏକ ବିଧିବଦ୍ଧ ବିଜ୍ଞପ୍ତି ପ୍ରକାଶ କରିଥିଲେ। ଅଧ୍ୟକ୍ଷଙ୍କୁ ଏ ବିଷୟରେ ପଚାରିବାରୁ କ୍ୟାମ୍ପସରେ ଶୈକ୍ଷିକ ବାତାବରଣ ବଜାୟ ରଖିବାକୁ ଏପରି ନିଷ୍ପତି ନିଆଯାଇଥିବା କହିଛନ୍ତି।

ତେବେ ଏହାକୁ ନେଇ ବର୍ତ୍ତମାନ ଯୁକ୍ତ ଦୁଇ ଛାତ୍ରଛାତ୍ରୀଙ୍କ ମଧ୍ୟରେ ଅସନ୍ତୋଷ ଦେଖାଯାଇଛି।  ଆଜି ଏ ନେଇ ମହାବିଦ୍ୟାଳୟର ବହୁ ଯୁକ୍ତ ଦୁଇ ଛାତ୍ରମାନେ ଉକ୍ତ ନିଷ୍ପତ୍ତିକୁ ବିରୋଧ କରିବା ସହ ନିଜର ଅସନ୍ତୋଷ ଜାହିର କରିଛନ୍ତି। ଅଧ୍ୟକ୍ଷଙ୍କୁ ଭେଟି ନିଷ୍ପତ୍ତି ବଦଳାଇବା ପାଇଁ ଦାବି କରିଛନ୍ତି।

ତେବେ ଉକ୍ତ ଘଟଣାକୁ ନେଇ ଆଉ ଏକ ଭିଡିଓ ସାମ୍ନାକୁ ଆସିଛି। ମହାବିଦ୍ୟାଳୟ ପରିସରରେ ଜନୈକ ଯୁକ୍ତ ଦୁଇ ଛାତ୍ର ଏକ ଭିଡ଼ିଓ ମାଧ୍ୟମରେ ଗଣମାଧ୍ୟମକୁ ଅନୁରୋଧ କରୁଥିବାର ଦେଖାଯାଇଛି।

ଛାତ୍ରଙ୍କ କହିବା କଥା ଯେହେତୁ କିଛି ଦିନ ତଳେ ମହାବିଦ୍ୟାଳୟରେ ମୌଳିକ ସୁବିଧା ଉପଲବ୍ଧ ନଥିବା ତଥା ବିପର୍ଯ୍ୟସ୍ତ ଅବସ୍ଥାରେ ଥିବା ପରିସ୍ରାଗାରର ଭିଡ଼ିଓ ସୋସିଆଲ ମିଡିଆରେ ଭାଇରଲ ହେଲା, ସେଥିନିମନ୍ତେ ମହାବିଦ୍ୟାଳୟର ଦୋଷ ଦୁର୍ବଳତା ଲୁଚାଇବା ଲାଗି ଅଧ୍ୟକ୍ଷ ଏପରି ନିଷ୍ପତ୍ତି ନେଇଛନ୍ତି।

ସୀତାରାମ ଅଗ୍ରୱାଲ

ନାଚୁଣୀ: ମହାବିଦ୍ୟାଳୟରେ ମୌଳିକ ସୁବିଧା ପାଇଁ ଛାତ୍ରଛାତ୍ରୀମାନେ ଦାବିପତ୍ର ଦେଲେ ସେମାନଙ୍କୁ ଅଧ୍ୟକ୍ଷ ଟିସି ଦେବାର ଧମକ ଦେଉଥିବାର ଅଭିଯୋଗ ହେଉଛି। ଖୋର୍ଦ୍ଧା ଜିଲ୍ଲା ନାଚୁଣୀ ମହାବିଦ୍ୟାଳୟରୁ ଏପରି ଘଟଣା ସାମ୍ନାକୁ ଆସିଛି।

ସୂଚନା ମୁତାବକ ନାଚୁଣୀ ମହାବିଦ୍ୟାଳୟର ଯୁକ୍ତି ତିନି ପ୍ରଥମ ବର୍ଷର ଛାତ୍ର ଆଶାତୀତ ସାହୁ ଗତକାଲୀ ସାମାଜିକ ଗଣମାଧ୍ୟମରେ ଏକ ଭିଡ଼ିଓ ପୋଷ୍ଟ କରିଥିଲେ, ଯେଉଁଥିରେ କି ମହାବିଦ୍ୟାଳୟରେ ପରିସ୍ରାଗାର ବିପର୍ଯ୍ୟସ୍ତ ଅବସ୍ଥାରେ ଅଛି ଏବଂ ଏହାକୁ ତୁରନ୍ତ ସୁଧାରିବା ପାଇଁ ଏକ ଦାବିପତ୍ର ମହାବିଦ୍ୟାଳୟ ଅଧ୍ୟକ୍ଷ ପ୍ରକୃତି ରଞ୍ଜନ ମିଶ୍ରଙ୍କୁ ପ୍ରଦାନ କରୁଛନ୍ତି। ତେବେ ଅଧ୍ୟକ୍ଷ ଉକ୍ତ ଭିଡ଼ିଓରେ ପରିସ୍ରାଗାରକୁ ଏକାଧିକ ଥର ହଜାର ହଜାର ଟଙ୍କାରେ ମରାମତି କରାଯାଉଛି ଏବଂ ପୁଣି ମରାମତି କରାଯିବନି ବୋଲି ରୋକଠୋକ ମନା କରୁଥିବାର କହୁଛନ୍ତି। ଏହାପରେ ଛାତ୍ରଜଣଙ୍କ ଉକ୍ତ ଦାବିପତ୍ର ଗ୍ରହଣ କରିବା ସହ ଏହାର ଏକ ନକଲରେ ସ୍ଵାକ୍ଷର କରି ଦେବାପାଇଁ ଅଧ୍ୟକ୍ଷଙ୍କୁ ଅନୁରୋଧ କରୁଥିବା ବେଳେ ସେ ତାହାକୁ ଫେରାଇଦେଉଥିବାର ଭିଡିଓରେ ଦେଖାଯାଉଛି।

ଉକ୍ତ ଭିଡ଼ିଓ ବର୍ତ୍ତମାନ ସୋସିଆଲ ମିଡିଆରେ ଭାଇରଲ ହେଉଥିବା ବେଳେ ଅଧ୍ୟକ୍ଷଙ୍କ ଏପରି ବ୍ୟବହାରକୁ ସୋସିଆଲ ମିଡ଼ିଆ ୟୁଜର, ଅଭିଭାବକ ଓ ଛାତ୍ରଛାତ୍ରୀମାନେ ନାପସନ୍ଦ କରିଛନ୍ତି। ମହାବିଦ୍ୟାଳୟରେ ସମସ୍ତ ମୌଳିକ ସୁବିଧା ପାଇବା ଛାତ୍ରଛାତ୍ରୀଙ୍କ ହକ ଏବଂ ତାହାପାଇଁ ଦାବିପତ୍ର ଦେଉଥୁବା ବେଳେ ଅଧ୍ୟକ୍ଷଙ୍କ ରୋଷର ଶିକାର ହେବାକୁ ପଡୁଛି ଛାତ୍ରଙ୍କୁ।

ତେବେ ଏ ନେଇ ସମ୍ପୃକ୍ତ ଛାତ୍ର ଆଶାତୀତ ଙ୍କୁ ପଚାରିବାରୁ ସେ ଅଧ୍ୟକ୍ଷଙ୍କ ଉପରେ ସଙ୍ଗୀନ ଅଭିଯୋଗ ଆଣିଛନ୍ତି। ଦାବିପତ୍ର ଦେବା ପରେ ଅଧ୍ୟକ୍ଷ ତାଙ୍କୁ ଧମକ ଚମକ ଦେବା ସହ ଟିସି ଦେଇଦେବେ ବୋଲି ମଧ୍ୟ ଧମକ ଦେଇଥିବାର କହିଛନ୍ତି ଆଶାତୀତ।

ଅନୁରୂପ ଭାବେ ଉକ୍ତ ଦାବିପତ୍ରରେ ସ୍ଵାକ୍ଷର କରିଥିବା ଏକାଧିକ ଛାତ୍ରଙ୍କ ଅଭିଭାବକଙ୍କୁ ଅଧ୍ୟକ୍ଷ ଫୋନ କରି ସେମାନଙ୍କ ବିରୁଦ୍ଧରେ କହିବା ସହ ସୋମବାର ଦିନ କଲେଜ ଡକେଇଥିବାର କହିଛନ୍ତି ଆଶାତୀତ। ତେବେ ଏ ନେଇ ଅଧ୍ୟକ୍ଷ ପ୍ରକୃତି ରଞ୍ଜନ ମିଶ୍ରଙ୍କୁ ଯୋଗାଯୋଗ କରିବାରୁ ସେ ଦାବିପତ୍ର ଦେବାକୁ ଆସିଥିବା ଛାତ୍ର ଆଶାତୀତଙ୍କ ବ୍ୟବହାର ଭଲନଥିବା କହିବା ସହ କଲେଜ ର ଏକ ଛାତ୍ର ଗ୍ରୁପ ଅଛନ୍ତି ଯେଉଁମାନେ ପାଠ ନପଢି ଏପରି ଦିନ ସାରା କଲେଜରେ ବିଶୃଙ୍ଖଳା ସୃଷ୍ଟି କରୁଛନ୍ତି ବୋଲି କହିଥିଲେ।

ତତସହିତ ମହାବିଦ୍ୟାଳୟ ପକ୍ଷରୁ ସେ କୌଣସି ଛାତ୍ରଙ୍କ ଅଭିଭାବକଙ୍କୁ ଫୋନ କରିନଥିବାର ସଫେଇ ଦେଇଛନ୍ତି। ତେବେ ଦିନକୁ ଦିନ ନାଚୁଣୀ ମହାବିଦ୍ୟାଳୟରେ ଅଧ୍ୟକ୍ଷ ଏବଂ ଛାତ୍ରଛାତ୍ରୀଙ୍କ ମଧ୍ୟରେ ତିକ୍ତତା ବଢୁଥିବା ବେଳେ ଏହା ଆଗକୁ ବିସ୍ଫୋରଣ ରୂପ ନେଇପାରେ ବୋଲି ବାରି ହେଉଛି।

ଅପରପକ୍ଷରେ ଅଧ୍ୟକ୍ଷଙ୍କ ଏପରି ବ୍ୟବହାରକୁ ଛାତ୍ରଛାତ୍ରୀ ମାନେ ଦୃଢ଼ ନିନ୍ଦା କରିବା ସହ ଆଗାମୀ ଦିନରେ ଯଦି ଏହାର ସମାଧାନ କରାନଯାଏ ତେବେ ଛାତ୍ରଛାତ୍ରୀ ମାନେ ଅନଶନରେ ବସିବେ ବୋଲି ଚେତାବନୀ ଦେଇଛନ୍ତି। ତେବେ ଉକ୍ତ ଘଟଣାକୁ ଗୁରୁତର ସହ ନେଇ ଏହାର ସମାଧାନ ଦିଗରେ ଖୋର୍ଦ୍ଧା ଜିଲ୍ଲାପାଳ ପଦକ୍ଷେପ ନେବାପାଇଁ ସାଧରଣରେ ଦାବି ହେଉଛି।