ଭୁବନେଶ୍ବର: ଖୁବ ଶିଘ୍ର ବଦଳିବ ଭୁବନେଶ୍ବର ସବୁଠାରୁ ପରିଚିତ ତଥା ପୁରୁଣା ଛକର ନାମ। ତାହା ହେଲା ମାଷ୍ଟର କ୍ୟାଣ୍ଟିନ ଛକ। ଏହାର ନାମ ପରିବର୍ତ୍ତନ କରିବା ପାଇଁ ଅଣ୍ଟା ଭିଡିଛି ଓଡିଆ ଭାଷା ସାହିତ୍ୟ ଓ ସଂସ୍କୃତି ବିଭାଗ। ଏ ନେଇ ସଂସ୍କୃତି ବିଭାଗ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗକୁ ଚିଠି ଲେଖିଛି।
ଏହି ଚିଠିରେ ଉଲ୍ଲେଖ କରାଯାଇଛି ଯେ, ମାଷ୍ଟର କ୍ୟାଣ୍ଟିନ ଛକର ନାମ ପରିବର୍ତ୍ତନ କରାଯାଉ। ଏହି ସ୍ଥାନର ନାମ ଓଡିଶାର ବରପୁତ୍ର, ଐତିହ୍ୟ କିମ୍ବା ସଂସ୍କୃତି ସହିତ ଜଡିତ ନାମ ଅନୁସାରେ କରାଯାଉ। ସେହି ଅନୁସାରେ ବିଭାଗ ତରଫରୁ କେତେକ ନାମ ପ୍ରସ୍ତାବ ମଧ୍ୟ ପ୍ରଦାନ କରାଯାଇଛି। ସେଗୁଡିକ ହେଲା କଳିଙ୍ଗ ଛକ, ଉତ୍କଳ ଛକ, ପାଇକ ଛକ, ଜୟୀ ରାଜଗୁରୁ ଛକ କିମ୍ବା ସହୀଦ ଲକ୍ଷ୍ମଣ ନାୟକ ଛକ ଭାବେ ନାମିତ କରାଯାଉ। ନଚେତ ବିଧାୟନସଭା ଛକ ଭାବେ ନାମିତ କରାଯାଉ ବୋଲି ବିଭାଗ କହିଛି।
ତେବେ ମାଷ୍ଟର କ୍ୟାଣ୍ଟିନ ଛକ ନାମ ପରିବର୍ତ୍ତନ ନେଇ ଦୀର୍ଘ ବର୍ଷ ଧରି ସଂଘର୍ଷ ଜାରୀ ରଖିଛନ୍ତି ସୁପ୍ରମ କୋର୍ଟ ଓକିଲ ରାଧାକାନ୍ତ ତ୍ରିପାଠୀ। ସେ ଏ ନେଇ ବିଭିନ୍ନ ସମୟରେ ମୁଖ୍ୟ ଶାସନ ସଚିବଙ୍କୁ ଚିଠି ଲେଖିଛନ୍ତି। ସେ କହିଛନ୍ତି ଯେ, ବର୍ତ୍ତମାନ ଯେଉଁ ନାମ ରହିଛି ତାହା ଓଡିଶାର କୌଣସି ଗୌରବମୟ ଇତିହାସକୁ ମନେ ପକାଉ ନାହିଁ। ସେଥିପାଇଁ ଓଡିଶା ଇତିହାସ କିମ୍ବା ଐତିହ୍ୟ ସହିତ ଜଡିତ ନାମ ଦିଆଯାଉ ବୋଲି ସେ ଦାବୀ କରିଛନ୍ତି।
