ଭୁବନେଶ୍ଵର: ପୁରୀର ବ୍ଲୁ ଫ୍ଲାଗ ବିଚରେ ଆଗାମୀ ଡିସେମ୍ବର ୪ତାରିଖ ନୌସେନା ଦିବସ ପାଳନ ହେବ। ପ୍ରଥମ ଥର ପାଇଁ ଓଡ଼ିଶାରେ ନୌସେନାର ପରାକ୍ରମ ଓ ଯୁଦ୍ଧ କୌଶଳ ଦେଖିବାକୁ ମିଳିବ। ଏଥିପାଇଁ ନୌସେନାର ସମରସଜ୍ଜା ଚାଲିଛି। ନୌସେନାର ଯୁଦ୍ଧଜାହାଜ ପୁରୀ ସମୁଦ୍ର ଉପକୂଳରେ ପହଞ୍ଚିବା ଆରମ୍ଭ କରିଛି। ବୀରତ୍ୱ, ପରାକ୍ରମ, ଯୁଦ୍ଧକୌଶଳର ପ୍ରଦର୍ଶନ ପାଇଁ ପୁରୀ ବେଳାଭୂମିରେ ନୌସେନା ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି। ବ୍ଲୁ ଫ୍ଲାଗ ବେଳାଭୂମିରେ ଯୁଦ୍ଧ ଟ୍ୟାଙ୍କ, ମାର୍କୋସ କମାଣ୍ଡୋ ବାହିନୀ ବିଭିନ୍ନ ସାମରିକ ଉପକରଣ ନେଇ ସମରାଭ୍ୟାସ କରିଛି।
ନୌସେନା ଦିବସରେ ଏୟାର ଶୋ’ ମଧ୍ୟ ଆକର୍ଷଣ ସାଜିବ। ରାଷ୍ଟ୍ରପତିଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ନୌସେନାର ସାମରିକ କଳାକୌଶଳ ଓ ବୀରତ୍ୱର ପ୍ରଦର୍ଶନ ଦେଖିବେ। ଭାରତୀୟ ନୌସେନାର ସୈନିକଙ୍କ ଦ୍ୱାରା ଚିତାକର୍ଷକ ରାଇଫଲ ଶୋ, ପରେଡ଼ ମଧ୍ୟ ପ୍ରଦର୍ଶିତ ହେବ। ଏଥିପାଇଁ ମଧ୍ୟ ପ୍ରସ୍ତୁତି ଅଭ୍ୟାସ ଅନୁଷ୍ଠିତ ହୋଇଛି। ନୌସେନା ଦିବସ ଆୟୋଜନକୁ ନେଇ ସ୍ଥାନୀୟ ଲୋକେ ଓ ପର୍ଯ୍ୟଟକ ବେଶ୍ ଆନନ୍ଦ ପ୍ରକାଶ କରିଛନ୍ତି।
ଅନ୍ୟପକ୍ଷରେ ରାଷ୍ଟ୍ରପତିଙ୍କ ଆଗମନକୁ ନେଇ ସମସ୍ତ ବ୍ୟବସ୍ଥା କରାଯାଇଛି। ନୌସେନା ଦିବସ ନିମନ୍ତେ ଗୁରୁବାରଠାରୁ ପୁରୀ ସମୁଦ୍ରରେ ମାଛ ମାରିବା ଉପରେ କଟକଣା ଜାରି କରାଯାଇଛି। ପର୍ଯ୍ୟଟକମାନଙ୍କ ନିମନ୍ତେ ମଧ୍ୟ ବେଳାଭୂମିକୁ ଯିବା ଉପରେ କଟକଣା ଜାରି କରାଯାଇଛି।
ଅନ୍ୟପକ୍ଷରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଶ୍ରୀମନ୍ଦିରରେ ଶୃଙ୍ଖଳିତ ଦର୍ଶନ ବ୍ୟବସ୍ଥା ପାଇଁ ଶ୍ରୀମନ୍ଦିର କାର୍ଯ୍ୟାଳୟରେ ଛତିଶା ନିଯୋଗ ବୈଠକ ଅନୁଷ୍ଠିତ ହୋଇଛି। ଡିସେମ୍ବର ୪ ତାରିଖରେ ଶ୍ରୀମନ୍ଦିର ନୀତି ଶୃଙ୍ଖଳା ନେଇ ଆଲୋଚନା କରାଯାଇଛି। ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ, ପୁରୀ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ୱାଇଁ ରାଷ୍ଟ୍ରପତିଙ୍କ ଗସ୍ତ ପାଇଁ ପ୍ରସ୍ତୁତି ସମୀକ୍ଷା କରିଛନ୍ତି।
