ନୂଆଦିଲ୍ଲୀ: ଛାତ୍ରଛାତ୍ରୀଙ୍କ ଉପରୁ ପରୀକ୍ଷାର ଚାପ ଦୂର କରିବା ଲାଗି ଏକ ଅଭିନବ ପ୍ରୟାସ ସ୍ବରୂପ ‘ପରୀକ୍ଷା ପେ ଚର୍ଚ୍ଚା’ କାର୍ଯ୍ୟକ୍ରମ ଆୟୋଜନ କରାଯିବା କ୍ରମରେ ଆଜି ସାରା ଦେଶର ୫୦୦ ଭିନ୍ନ ଭିନ୍ନ କେନ୍ଦ୍ରୀୟ ବିଦ୍ୟାଳୟରେ ଏକ ରାଷ୍ଟ୍ରବ୍ୟାପୀ ଚିତ୍ରକଳା ପ୍ରତିଯୋଗିତା ଆୟୋଜନ କରାଯିବ। ଆଜି ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଜୟନ୍ତୀ ପାଳନ କରାଯାଇଥାଏ। ଭାରତ ସରକାର ଏହି ଦିନକୁ ପରାକ୍ରମ ଦିବସ ଭାବେ ପାଳନ କରି ଆସୁଛନ୍ତି। ଛାତ୍ରଛାତ୍ରୀଙ୍କୁ ନେତାଜୀଙ୍କ ଜୀବନୀରେ ଅନୁପ୍ରାଣିତ କରିବା ଏବଂ ସେମାନଙ୍କ ମଧ୍ୟରେ ଦେଶପ୍ରେମ ଭାବନା ଜାଗ୍ରତ କରିବା ଉଦ୍ଦେଶ୍ୟରେ ଏପରି କାର୍ଯ୍ୟକ୍ରମର ପରିକଳ୍ପନା କରାଯାଇଛି।
ଛାତ୍ରଛାତ୍ରୀଙ୍କ ସୃଜନଶୀଳ ଅଭିବ୍ୟକ୍ତିଙ୍କୁ ପ୍ରୋତ୍ସାହିତ କରିବା ଲାଗି ଶିକ୍ଷା ମନ୍ତ୍ରଣାଳୟ ଦ୍ବାରା ଆସନ୍ତାକାଲି ଚିତ୍ରକଳା ପ୍ରତିଯୋଗିତା ସହିତ ସାରା ଦେଶର ବିଦ୍ୟାଳୟରେ ବିଭିନ୍ନ ପ୍ରକାର କାର୍ଯ୍ୟକଳାପ ଆୟୋଜନ କରାଯାଉଛି।
ଚିତ୍ରକଳା ପ୍ରତିଯୋଗିତାରେ ବିଭିନ୍ନ ସିବିଏସଇ ବିଦ୍ୟାଳୟର, ରାଜ୍ୟ ବୋର୍ଡ, ନବୋଦୟ ବିଦ୍ୟାଳୟ ଏବଂ କେନ୍ଦ୍ର ବିଦ୍ୟାଳୟର ଛାତ୍ରଛାତ୍ରୀ ସେମାନଙ୍କର ସୃଜନଶୀଳ ଅଭିବ୍ୟକ୍ତି ପ୍ରକାଶ କରିବେ ବୋଲି ଆଶା କରାଯାଉଛି। ପ୍ରତିଯୋଗିତାର ବିଷୟବସ୍ତୁ ‘ଏଗଜାମ ୱାରିଅର’ ପୁସ୍ତକ ଉପରେ ଆଧାରିତ ଯାହାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଲେଖିଛନ୍ତି।
ସାରା ଦେଶର ମୋଟ୍ ୫୦ ହଜାରରୁ ଅଧିକ ଛାତ୍ରଛାତ୍ରୀ ଏହି ଚିତ୍ରକଳା ପ୍ରତିଯୋଗିତାରେ ଭାଗ ନେବେ ବୋଲି ଆଶା କରାଯାଉଛି। ଯେଉଁ ନୋଡାଲ କେନ୍ଦ୍ରୀୟ ବିଦ୍ୟାଳୟରେ ପ୍ରତିଯୋଗିତା ଆୟୋଜନ କରାଯିବ ସେଠାରେ ବିଭିନ୍ନ ସ୍କୁଲର ୧୦୦ ଛାତ୍ରଛାତ୍ରୀ ଅଂଶଗ୍ରହଣ କରିବେ। ନିକଟସ୍ଥ ରାଜ୍ୟ ବୋର୍ଡ ଏବଂ ସିବିଏସଇ ସ୍କୁଲରୁ ୭୦ ଜଣ ଛାତ୍ରଛାତ୍ରୀ ଏହି ପ୍ରତିଯୋଗିତାରେ ଅଂଶଗ୍ରହଣ କରିବେ। ନବୋଦୟ ବିଦ୍ୟାଳୟର ୧୦ ଏବଂ ନୋଡାଲ କେନ୍ଦ୍ରୀୟ ବିଦ୍ୟାଳୟ ଏବଂ ଅନ୍ୟ କେନ୍ଦ୍ରୀୟ ବିଦ୍ୟାଳୟର ୨୦ ଛାତ୍ରଛାତ୍ରୀ ଏଥିରେ ଭାଗ ନେବେ।
ଶ୍ରେଷ୍ଠ ବିବେଚିତ ୫ ଜଣ ପ୍ରତିଯୋଗୀଙ୍କୁ ସ୍ବାଧୀନତା ସଂଗ୍ରାମୀ ଏବଂ ଜାତୀୟ ଗୁରୁତ୍ବ ବହନ କରୁଥିବା ବିଷୟ ଉପରେ ଏକ ବହି ସେଟ୍ ଦିଆଯିବା ସହିତ ଏକ ପ୍ରମାଣପତ୍ର ମିଳିବ। ଛାତ୍ରଛାତ୍ରୀ ଓ ଶିକ୍ଷକ ମହଲରେ ପ୍ରତିଯୋଗିତାକୁ ନେଇ ବିଶେଷ ଆଗ୍ରହ ଦେଖିବାକୁ ମିଳିଛି।
