Tag: ପାରାଦୀପ

ନୂଆଦିଲ୍ଲୀ: ସିଆଇଏସଏଫ ଗ୍ରେଟ୍ ଇଣ୍ଡିଆନ କୋଷ୍ଟାଲ ସାଇକ୍ଲୋଥନ୍ କୈଥକୋଲାଠାରୁ ୧୨୫ କିଲୋମିଟର ରାସ୍ତା ଅତିକ୍ରମ କରିବା ପରେ ୨୦୨୫ ମାର୍ଚ୍ଚ ୧୧ ତାରିଖରେ ପାରାଦୀପରେ ପହଞ୍ଚିଥିଲା। ଉପକୂଳ ସୁରକ୍ଷା, ପରିବେଶ ସଂରକ୍ଷଣ ଏବଂ ଗୋଷ୍ଠୀ ନିୟୋଜନ ପାଇଁ ମିଳିତ ପ୍ରତିଶ୍ରୁତିକୁ ସୁଦୃଢ଼ କରିବା ସହ ସାଇକେଲ ଚାଳକମାନଙ୍କୁ ସ୍ଥାନୀୟ ଜନସାଧାରଣ ଉତ୍ସାହର ସହ ସ୍ୱାଗତ କରିଥିଲେ।

ମାର୍ଚ୍ଚ ୧୩ ତାରିଖରେ ପାରାଦୀପସ୍ଥିତ ସମୁଦ୍ର କୂଳ ସ୍ମାରକୀରେ ଏକ ଭବ୍ୟ ପତାକା ଉତ୍ତୋଳନ ସମାରୋହ ଅନୁଷ୍ଠିତ ହୋଇଥିଲା, ଯେଉଁଥିରେ ଡିଆଇଜି/ସିଆଇଏସ୍ଏଫ୍ ଏନଇଜେଡ୍-୩ (ଏମ୍) ଡ. ମହମ୍ମଦ ଶୈକ୍ ଅବଦୁଲ୍ଲା, ପାରାଦୀପ ପୋର୍ଟ ଅଥରିଟି (ପିପିଏ) ଅଧ୍ୟକ୍ଷ ପିଏଲ୍ ହରନାଥ, ପିପିଏର ଉପାଧ୍ୟକ୍ଷ ଶ୍ରୀ ନୀଳଭ୍ର ଦାସଗୁପ୍ତା, ଡିଆଇଜି/କୋଷ୍ଟଗାର୍ଡ ଶ୍ରୀ ସଞ୍ଜୟ ନେଗି, ପାରାଦୀପ ଡିଏସପି ଶ୍ରୀ ସ୍ମୃତି ରଞ୍ଜନ କର, ପ୍ରମୁଖ ଉପସ୍ଥିତ ଥିଲେ। ଏହି କାର୍ଯ୍ୟକ୍ରମରେ ପରମ ଜ୍ୟୋତି କଳା କ୍ଷେତ୍ର ପକ୍ଷରୁ ଓଡ଼ିଶୀ, ଭାରତ ନାଟ୍ୟମ୍ ଭଳି ଆକର୍ଷଣୀୟ ସାଂସ୍କୃତିକ ନୃତ୍ୟ ପରିବେଷଣ ଓ ସିଆଇଏସଏଫ୍ ଓ୍ଵାର୍ଡ ପକ୍ଷରୁ ଦେଶାତ୍ମବୋଧକ ଗୀତ ଓ ନୃତ୍ୟ ପରିବେଷଣ କରାଯାଇଥିଲା। ଡଗ୍ ସୋ’ , ଅଗ୍ନି ନିରାପତ୍ତା ପ୍ରଦର୍ଶନ ଏବଂ ସ୍ଥାନୀୟ ବ୍ୟାଣ୍ଡ /ସହ ଏକ ଭବ୍ୟ ପରେଡ୍ ଆଦି ଆକର୍ଷଣୀୟ ପ୍ରଦର୍ଶନ ଦର୍ଶକଙ୍କୁ ଆକର୍ଷିତ କରିଥିଲା। ମୁଖ୍ୟ ଆକର୍ଷଣ ଥିଲା ସାନ୍ଧକୁଦା, ବିଜୟଚନ୍ଦ୍ରପୁର ଓ ଭିତରାଗଡ଼ର ସମ୍ପ୍ରଦାୟର ଉତ୍ସାହଜନକ ଅଂଶଗ୍ରହଣ, ଯେଉଁଥିରେ ଉପକୂଳ ସୁରକ୍ଷା ଓ ବିପର୍ଯ୍ୟୟ ପ୍ରସ୍ତୁତି ଅଭିଯାନକୁ ସମର୍ଥନ ଜଣାଇଥିଲେ। ବାଟରେ ସାଇକେଲ ଚାଳକମାନେ କୁଜଙ୍ଗ, ଜଗତସିଂହପୁର, ନୂଆଗାଁ ଓ ଗୋପରେ ସ୍ଥାନୀୟ ଲୋକଙ୍କ ସହ ମିଶି ସାମୁଦ୍ରିକ ନିରାପତ୍ତା ସମ୍ପର୍କରେ ସଚେତନତା ସୃଷ୍ଟି କରିଥିଲେ।

ଏହା ପରେ ସାଇକ୍ଲୋଥନ ନିଜର ଯାତ୍ରା ଆରମ୍ଭ କରି କୋଣାର୍କରେ ପହଞ୍ଚିଥିଲା । କୋଣାର୍କରେ ପହଞ୍ଚିବା ପରେ ସାଇକେଲ ଚାଳକମାନଙ୍କୁ ଭବ୍ୟ ସ୍ୱାଗତ ସମ୍ବର୍ଦ୍ଧନା ଦିଆଯାଇଥିଲା, ଯାହା ସ୍ଥାନୀୟ ଲୋକଙ୍କ ପ୍ରଶଂସା ଓ ଉତ୍ସାହକୁ ପ୍ରତିଫଳିତ କରିଥିଲା । ଏହି କାର୍ଯ୍ୟକ୍ରମରେ ଓଡ଼ିଶାର ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା, ଏସବିଆଇ, ଓଡ଼ିଶା ସର୍କଲ, ଭୁବନେଶ୍ବରର ଜିଏମ୍ ଶ୍ରୀ କୌଶଲ, ଏଏଆଇର ଏପିଡି ପ୍ରସନ୍ନ ପ୍ରଧାନ, ପଦ୍ମଶ୍ରୀ ପୁରସ୍କାରପ୍ରାପ୍ତ ତଥା ପାରା ଅଲିମ୍ପିକ୍ସ ସ୍ୱର୍ଣ୍ଣ ପଦକ ବିଜେତା ପ୍ରମୋଦ ଭଗତ, ଜାତୀୟ ଭଲିବଲ୍ ଖେଳାଳି ଶ୍ରୀକାନ୍ତ ନାୟକ ପ୍ରମୁଖ ଉପସ୍ଥିତ ଥିଲେ। ମାର୍ଚ୍ଚ ୧୩ ତାରିଖ ସନ୍ଧ୍ୟାରେ ସ୍ୱାଗତ ନୃତ୍ୟ, ଦେଶାତ୍ମବୋଧକ ସଙ୍ଗୀତ, ଓଡ଼ିଶୀ ଓ ସମ୍ବଲପୁରୀ ଲୋକକଳା ପରିବେଷଣ ସହ ବୃତ୍ତିଗତ ଦଳମାନେ ଆକର୍ଷଣୀୟ ସାଂସ୍କୃତିକ ପରିବେଷଣ କରିଥିଲେ। ସ୍ଥାନୀୟ ସମୁଦାୟ, ସ୍ୱେଚ୍ଛାସେବୀ ସଂଗଠନ, ଏନସିସି କ୍ୟାଡେଟ୍ ଏବଂ ସ୍କୁଲ ପିଲାଙ୍କ ସକ୍ରିୟ ଅଂଶଗ୍ରହଣ ଏହି କାର୍ଯ୍ୟକ୍ରମର ଭବ୍ୟତାକୁ ଆହୁରି ବଢ଼ାଇଥିବା ବେଳେ ଜିଲ୍ଲା ଓ ପୁଲିସ ପ୍ରଶାସନ ପକ୍ଷରୁ ନିରବଚ୍ଛିନ୍ନ ବ୍ୟବସ୍ଥା ସୁନିଶ୍ଚିତ କରାଯାଇଛି।

କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ଦ୍ୱାରା ମାର୍ଚ୍ଚ ୭, ୨୦୨୫ରେ ଉଦଘାଟିତ ହୋଇଥିବା ସିଆଇଏସଏଫ କୋଷ୍ଟାଲ ସାଇକ୍ଲୋଥନର ଲକ୍ଷ୍ୟ ହେଉଛି ଉପକୂଳବର୍ତ୍ତୀ ସମୁଦାୟଙ୍କୁ ସଚେତନ କରିବା ଏବଂ ଭାରତର ସାମୁଦ୍ରିକ ଭିତ୍ତିଭୂମିର ସୁରକ୍ଷାରେ ସିଆଇଏସଏଫର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିବା। ଏହା ମାଧ୍ୟମରେ ପଶ୍ଚିମ ଓ ପୂର୍ବ ଉପକୂଳରେ ଦୁଇଟି ଟିମ୍ ଯାତ୍ରା କରି ୧୧ଟି ରାଜ୍ୟ ପରିକ୍ରମା କରି ଗୁରୁତ୍ୱପୂର୍ଣ୍ଣ ଉପକୂଳ କେନ୍ଦ୍ର ଓ ଶିଳ୍ପାଞ୍ଚଳକୁ ଅନ୍ତର୍ଭୁକ୍ତ କରୁଛନ୍ତି। ଏହି ରାଲିରେ ସାଧାରଣ ଜନତାଙ୍କ ଯୋଗଦାନକୁ ପ୍ରେତ୍ସାହିତ କରାଯାଉଛି। ଏ ସଂପର୍କରେ ଅଧିକ ବିବରଣୀ ଓ ସୂଚନା ଓ ଅଂଶଗ୍ରହଣ ସୁଯୋଗ ପାଇଁ ସେମାନେ www.cisfcyclothon.com ଦେଖିପାରିବେ । ଏହି ଦଳ ଓଡ଼ିଶା ଦେଇ ଆଗକୁ ବଢ଼ୁଥିବା ବେଳେ ସେମାନଙ୍କ ବାର୍ତ୍ତା ସ୍ପଷ୍ଟ ରହିଛି: ‘ସୁରକ୍ଷିତ ଉପକୂଳ, ସମୃଦ୍ଧ ଭାରତ”।

ଭୁବନେଶ୍ଵର: ସିଆଇଏସ୍ଏଫ୍ ଗ୍ରେଟ୍ ଇଣ୍ଡିଆନ୍ କୋଷ୍ଟାଲ୍ ସାଇକ୍ଲୋଥନ୍ ଭାରତର ସମୁଦ୍ର କୂଳରେ ନିଜର ୬,୫୫୩ କିଲୋମିଟର ଯାତ୍ରାର ଏକ ଅଂଶ ସ୍ବରୂପ ୨୦୨୫ ମାର୍ଚ୍ଚ ୧୦ ତାରିଖରେ ଓଡ଼ିଶାର କୈଥକୋଲାରେ ପହଞ୍ଚିଥିଲା। ପ୍ରଥମେ ପଶ୍ଚିମବଙ୍ଗର ବଖାଲି ବେଳାଭୂମିରୁ ଆରମ୍ଭ ହୋଇଥିବା ଏହି ଅଭିଯାନକୁ ସ୍ଥାନୀୟ ଜନସାଧାରଣ ଓ ଅଧିକାରୀଙ୍କ ଦୃଢ଼ ସମର୍ଥନ ମିଳିଛି। ଉପକୂଳ ସୁରକ୍ଷା, ପରିବେଶ ସଚେତନତା ଏବଂ ସାମୂହିକ ଅଂଶଗ୍ରହଣକୁ ପ୍ରୋତ୍ସାହିତ କରିବା ଉଦ୍ଦେଶ୍ୟରେ ୮ ଜଣ ମହିଳାଙ୍କ ସମେତ ୫୦ ଜଣ ସାଇକେଲ ଚାଳକଙ୍କୁ ନେଇ ଗଠିତ ପୂର୍ବତଟ ଟିମ୍ ୪ଟି ରାଜ୍ୟରେ ୨,୭୭୮ କିଲୋମିଟର ଯାତ୍ରା କରୁଛି, ଯାହା ମାର୍ଚ୍ଚ ୩୧, ୨୦୨୫ରେ କନ୍ୟାକୁମାରୀରେ ଶେଷ ହେବ।

କୈଥକୋଲାରେ ପହଞ୍ଚିବା ପରେ ସାଇକେଲ ଚାଳକମାନଙ୍କୁ ସ୍ଥାନୀୟ ଗ୍ରାମବାସୀମାନେ ଜାତୀୟ ପତାକା ଦେଖାଇ ସ୍ୱାଗତ କରିଥିଲେ। ମାର୍ଚ୍ଚ ୧୧ ତାରିଖରେ ଏକ ସାଂସ୍କୃତିକ କାର୍ଯ୍ୟକ୍ରମରେ ସଙ୍ଗୀତ ଓ ନୃତ୍ୟ ପରିବେଷଣ ମାଧ୍ୟମରେ ଓଡ଼ିଶାର ସମୃଦ୍ଧ ସାଂସ୍କୃତିକ ଐତିହ୍ୟକୁ ପ୍ରଦର୍ଶିତ କରାଯାଇଥିଲା। ପରେ ଭଦ୍ରକ ଜିଲ୍ଲାପାଳ ଦିଲୀପ ରାଉତରାୟ, ଭଦ୍ରକ ଡିଏଫଓ ସୌଭାଗ୍ୟ କୁମାର ସାହୁ, ସିଆଇଏସଏଫ କମାଣ୍ଡାଣ୍ଟ ଅକ୍ଷତ ପଟେଲ ଓ ବାସୁଦେବପୁର ପୌରପାଳିକାର କାର୍ଯ୍ୟନିର୍ବାହୀ ଅଧିକାରୀ ସୁଧାଂଶୁ ସ୍ୱାଇଁଙ୍କ ଉପସ୍ଥିତିରେ ଏହି ଟିମ୍କୁ ଆନୁଷ୍ଠାନିକ ଭାବେ ପତାକା ଦେଖାଇ ଶୁଭାରମ୍ଭ କରାଯାଇଥିଲା।

ଜାଗୁଳା ଗ୍ରାମ ପଞ୍ଚାୟତର ଗ୍ରାମବାସୀ ଦେଶାତ୍ମବୋଧକ ବିଷୟବସ୍ତୁ ଉପରେ ଏକ ସାଂସ୍କୃତିକ କାର୍ଯ୍ୟକ୍ରମରେ ପରିବେଷଣ କରିଥିଲେ। ଏହି ଭବ୍ୟ ସମାରୋହରେ ପାଖାପାଖି ୨୦୦ ଗ୍ରାମବାସୀ ଯୋଗ ଦେଇଥିଲେ। ଏହି ଅବସରରେ ଭଦ୍ରକ ଜିଲ୍ଲାପାଳ ଉପକୂଳ ସୁରକ୍ଷା ଓ ବିପର୍ଯ୍ୟୟ ପ୍ରସ୍ତୁତିରେ ସିଆଇଏସ୍ଏଫର ପ୍ରୟାସକୁ ପ୍ରଶଂସା କରିବା ସହ ଉପକୂଳ ସତର୍କତା, ପରିବେଶ ସଂରକ୍ଷଣ ଏବଂ ଜାତୀୟ ସୁରକ୍ଷାରେ ସାମୂହିକ ଅଂଶଗ୍ରହଣ ଉପରେ ଆଲୋକପାତ କରିଥିଲେ।

ସାଇକେଲ ଚାଳକମାନେ ଏବେ ୧୨୫ କିଲୋମିଟର ଦୂରତା ଅତିକ୍ରମ କରି ପାରାଦୀପରେ ପହଞ୍ଚିଛନ୍ତି। ବାଟରେ ସେମାନେ ତାରାସ ଗାଁର ଲୋକମାନଙ୍କୁ ଭେଟି ଉପକୂଳ ସୁରକ୍ଷାରେ ସେମାନଙ୍କ ଭୂମିକା ବିଷୟରେ ସଚେତନତା ସୃଷ୍ଟି କରିଥିଲେ । ରାଜକନିକା ଗ୍ରାମରେ ଐତିହାସିକ ରାଜକନିକା ପ୍ରାସାଦରେ ସ୍କୁଲ ପିଲା ଓ ଗ୍ରାମବାସୀଙ୍କ ସହ ଆଲୋଚନା କରିବା ସହ ସାମୂହିକ ଆହ୍ୱାନ ସମ୍ପର୍କରେ ଆଲୋଚନା କରିଥିଲେ। ସେମାନେ ମାଲାପାଟଣା ଗ୍ରାମର ଯୁବକମାନଙ୍କ ସହ ଏକ ବନ୍ଧୁତ୍ୱପୂର୍ଣ୍ଣ ଭଲିବଲ୍ ମ୍ୟାଚରେ ଅଂଶଗ୍ରହଣ କରି ବିପର୍ଯ୍ୟୟ ପ୍ରସ୍ତୁତି ଏବଂ ମୁକାବିଲା ଉପରେ ଗୁରୁତ୍ୱ ଆରୋପ କରିଥିଲେ।

କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ଦ୍ୱାରା ମାର୍ଚ୍ଚ ୭, ୨୦୨୫ରେ ଉଦଘାଟିତ ହୋଇଥିବା ସିଆଇଏସଏଫ କୋଷ୍ଟାଲ ସାଇକ୍ଲୋଥନର ଲକ୍ଷ୍ୟ ହେଉଛି ଉପକୂଳବର୍ତ୍ତୀ ସମୁଦାୟଙ୍କୁ ସଚେତନ କରିବା ଏବଂ ଭାରତର ସାମୁଦ୍ରିକ ଭିତ୍ତିଭୂମିର ସୁରକ୍ଷାରେ ସିଆଇଏସଏଫର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିବା। ଏହା ମାଧ୍ୟମରେ ପଶ୍ଚିମ ଓ ପୂର୍ବ ଉପକୂଳରେ ଦୁଇଟି ଟିମ୍ ଯାତ୍ରା କରି ୧୧ଟି ରାଜ୍ୟ ପରିକ୍ରମା କରି ଗୁରୁତ୍ୱପୂର୍ଣ୍ଣ ଉପକୂଳ କେନ୍ଦ୍ର ଓ ଶିଳ୍ପାଞ୍ଚଳକୁ ଅନ୍ତର୍ଭୁକ୍ତ କରୁଛନ୍ତି। ଏହି ରାଲିରେ ସାଧାରଣ ଜନତାଙ୍କ ଯୋଗଦାନକୁ ପ୍ରେତ୍ସାହିତ କରାଯାଉଛି। ଏ ସଂପର୍କରେ ଅଧିକ ବିବରଣୀ ଓ ସୂଚନା ଓ ଅଂଶଗ୍ରହଣ ସୁଯୋଗ ପାଇଁ ସେମାନେ www.cisfcyclothon.com ଦେଖିପାରିବେ। ଏହି ଦଳ ଓଡ଼ିଶା ଦେଇ ଆଗକୁ ବଢ଼ୁଥିବା ବେଳେ ସେମାନଙ୍କ ବାର୍ତ୍ତା ସ୍ପଷ୍ଟ ରହିଛି: ‘ସୁରକ୍ଷିତ ଉପକୂଳ, ସମୃଦ୍ଧ ଭାରତ” ।

ଭୁବନେଶ୍ଵର: ନେଟୱର୍କ ପ୍ଲାନିଂ ଗ୍ରୁପ (ଏନପିଜି)ର ୮୫ତମ ବୈଠକରେ ପାଂଚଟି ପ୍ରକଳ୍ପ ଉପରେ ସମୀକ୍ଷା କରାଯାଇଛି। ଏହା ଭିତରୁ ଦୁଇଟି ରେଳବାଇ ଓ ତିନିଟି ରାଜପଥ ସମ୍ପର୍କିତ ପ୍ରକଳ୍ପ। ପିଏମ ଗତିଶକ୍ତି ଜାତୀୟ ମାଷ୍ଟର ପ୍ଲାନର ନିୟମାବଳୀ ଅନୁସାରେ ଏହି ପ୍ରକଳ୍ପ ସବୁକୁ ସମୀକ୍ଷା କରାଯାଇଛି। ବହୁମୁଖୀ ଭିତିଭୂମିର ପୂର୍ଣାଙ୍ଗ ବିକାଶ, ଅର୍ଥନୀତିକ ଓ ସାମାଜିକ ଯୋଗାଯୋଗ, ବିଭିନ୍ନ ପରିବହନ ମାଧ୍ୟମ, ପ୍ରକଳ୍ପ କାର୍ଯ୍ୟାନ୍ୱୟନ ପରି ବିଭିନ୍ନ କ୍ଷେତ୍ର ଉପରେ ଏହି ବୈଠକରେ ବିଚାର ବିମର୍ଶ କରାଯାଇଛି। ଏହି ପ୍ରକଳ୍ପ ସବୁ ଦେଶର ଆର୍ଥିକ ବିକାଶରେ ସହାୟକ ହେବ।

ଏସବୁ ପ୍ରକଳ୍ପ ସରିଲେ ଦେଶର ଭିତ୍ତିଭୂମି ବିକଶିତ ହେବା ସହ ବିଭିନ୍ନ ଆଂଚଳିକ କ୍ଷେତ୍ର ସହ ଯୋଗାଯୋଗ ସ୍ଥାପିତ ହୋଇପାରିବ। ସରକାରଙ୍କ ଦୃଷ୍ଟିକୋଣ ସହ ଯୋଗସୂତ୍ର ରକ୍ଷା କରି ବହୁମୁଖୀ ପରିବହନ କ୍ଷେତ୍ର ବିକଶିତ ହୋଇପାରିବ ବୋଲି କୁହାଯାଇଛି। ଶିଳ୍ପ ବିକାଶ ତଥା ଆଭ୍ୟନ୍ତରୀଣ ବାଣିଜ୍ୟ ବିଭାଗ (ଡିପିଆଇଆଇଟି) ର ଯୁଗ୍ମ ସଚିବ ଡ. ସୁରେନ୍ଦ୍ର ଅହିବାରଙ୍କ ଅଧ୍ୟକ୍ଷତାରେ ବୈଠକ ଅନୁଷ୍ଠିତ ହୋଇଥିଲା।

ରେଳ ମନ୍ତ୍ରଣାଳୟର ପ୍ରକଳ୍ପ

ଝାଡଖଣ୍ଡ ଓ ଓଡିଶାକୁ ଯୋଡୁଥିବା ଡାଙ୍ଗୋଆପୋଷି-ଜାରୋଲି ପ୍ରକଳ୍ପ କାମ ଚାଲିଛି। ବର୍ତ୍ତମାନ କରିଡର ସହ ସମାନ୍ତରାଳ ଭାବରେ ୮୫.୮୮ କିଲୋମିଟର ଲମ୍ବର ତୃତୀୟ ଓ ଚତୁର୍ଥ ରେଳ ଲାଇନ ବିକାଶ କରାଯାଉଛି। ଖଣି ଖାଦାନରେ ଭରପୁର କେନ୍ଦୁଝରରୁ ପାରାଦୀପକୁ ଲୁହାପଥର ପରିବହନ ସହ କୋଇଲା, ଜିପସମ ଓ ସାର ପରିବହନ କ୍ଷେତ୍ରରେ ବି ଏହି ରେଳଲାଇନ ଦ୍ୱାରା ବହୁତ ଉପକାର ସାଧିତ ହେବ। ପୂର୍ବ ଓ ଭାରତର ବିଭିନ୍ନ ଅଂଚଳକୁ ଲୁହାପଥର ପରିବହନ କରିବା କ୍ଷେତ୍ରରେ ବି ଏହି ରେଳଲାଇନ ସହାୟକ ହେବ।

ବୁରବାଲ-ଗୋଣ୍ଡା କାଚେରୀ ପ୍ରକଳ୍ପରେ ୫୫.୭୫ କିଲୋମିଟର ଲମ୍ବର ଚତୁର୍ଥ ରେଳଲାଇନ ବିକଶିତ କରାଯାଉଛି। ଏବେ ଏହି ରେଳପଥରେ ତୃତୀୟ ରେଳ ଲାଇନ କାମ ଚଲୁଅଛି। ଏହାଦ୍ୱାରା ଉତରପ୍ରଦେଶର ବାରାବାଙ୍କି, ବହରିଚ, ଗୋଣ୍ଡା ଜିଲ୍ଲାରେ ଯାତ୍ରୀ ତଥା ମାଲ ପରିବହନ କ୍ଷେତ୍ରରେ ବ୍ୟାପକ ପରିବର୍ତ୍ତନ ହେବ।

ସଡକ ପରିବହନ ଓ ରାଜପଥ ମନ୍ତ୍ରଣାଳୟ

ବାରାବାଙ୍କି- ବାହାରିଚ ପ୍ରକଳ୍ପ ଏନଏଚ-୯୨୭ କରିଡରର ୧୦୧.୫୪ କିଲୋମିଟର ବ୍ୟାପି ଚାରି ଥାକିଆ ଓ ଛଅ ଥାକିଆ କରାଯାଉଛି। ଲକ୍ଷନୌ, ଶ୍ରାବସ୍ତି ବିମାନବନ୍ଦର, ଏନଏଚ-୨୭, ଭାରତ-ନେପାଳ ବର୍ଡରକୁ ଏହା ସଂଯୋଗ କରିବ। ଏହା ଫଳରେ ଉତରପ୍ରଦେଶ ଓ ଉତର ଭାରତର ବିଭିନ୍ନ ଅଂଚଳକୁ ଯାତ୍ରୀମାନଙ୍କ ଗମନାଗମନ ସୁବିଧା ହୋଇପାରିବା ସହ ମାଲ ପରିବହନ କ୍ଷେତ୍ରରେ ବି ଅଭୂତପୂର୍ବ ପରିବର୍ତନ ଆସିବ।

କାନପୁର-କାବ୍ରାଇ ରାଜପଥର ଉନ୍ନତିକରଣ କରାଯାଇ ଚାରି ଲେନ ବିଶିଷ୍ଟ ୧୧୮. ୮ କିଲୋମିଟର ରାସ୍ତାକୁ ସମ୍ପ୍ରସାରିତ କରାଯାଉଛି। ଫଳରେ ଏନଏଚ-୩୫ରେ କାନପୁର ରିଂ ରୋଡ ସହ କାବ୍ରାଇକୁ ରାଜପଥ ସଂଯୋଗୀକରଣ ହେବ। ଏହାଛଡା ସାତଟି ରେଳ ଷ୍ଟେସନ, ତିନିଟି ବିମାନବନ୍ଦର ସହ କାନପୁର, ହାମିରପୁର, ମହୋବା ଜିଲ୍ଲାକୁ ଗମନାଗମନ କ୍ଷେତ୍ରରେ ଅଭୂତପୂର୍ବ ସଫଳତା ମିଳିବ।

ସିଙ୍ଘାନା-ଟିଟାନବାର ପ୍ରକଳ୍ପରେ ଚାରି ଲେନ ବିଶିଷ୍ଟ ୪୦.୭୨୫କିଲୋମିଟର ଲମ୍ବର ରାଜପଥକୁ ବିକଶିତ କରାଯାଉଛି। ଏହା ରାଜସ୍ଥାନର ଏନଏଚ-୩୧୧ ଜାତୀୟ ରାଜପଥ ଅଧୀନରେ ଆସୁଛି। ଶିକାର, ନାଗପୁର, ଯୋଧପୁର, ଦିଲ୍ଲୀ ପରି ଅଂଚଳକୁ ଯାତ୍ରୀମାନଙ୍କ ଗମନାଗମନ କ୍ଷେତ୍ରରେ ଏହା ସାହାଯ୍ୟ କରିବ। ରାଜସ୍ଥାନ, ହରିୟାଣା ଓ ଦିଲ୍ଲୀ ଅଂଚଳରେ ଯାତ୍ରୀ ତଥା ମାଲ ପରିବହନ କ୍ଷେତ୍ରରେ ଏହା ବିଶେଷ ସହାୟତ ହୋଇପାରିବ।

କୁଜଙ୍ଗ: ଆଜି ସନ୍ଧ୍ୟାରେ ଜଗତସିଂହପୁର ଜିଲ୍ଲାର ପାରାଦୀପ ସ୍ଥିତ ବାଲିଯାତ୍ରା ପଡ଼ିଆରେ କଳିଙ୍ଗ ବାଲିଯାତ୍ରା ୨୦୨୪ ଉଦଘାଟିତ ହୋଇଯାଇଛି। ଏହି ଅବସରରେ ମୁଖ୍ୟ ଅତିଥି ଭାବେ ଯୋଗଦେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଐତିହ୍ୟ ଓ ପରମ୍ପରାର ସ୍ମୃତିଚାରଣ ନିମନ୍ତେ ଜଗତସିଂହପୁର ଜିଲ୍ଲାର ଏହି ପ୍ରୟାସ କୁ ଅନେକ ପ୍ରଶଂସା କରିଥିଲେ। ପ୍ରାଚୀନ ଉତ୍କଳର ନୌ ବାଣିଜ୍ୟ ଏକ ଅନନ୍ୟ ପରିଚୟ ସୃଷ୍ଟି କରିପାରିଛି ଓ ଏଥିରେ ଜଗତସିଂହପୁର ଜିଲ୍ଲା ସର୍ବଦା ଆଗରେ ବୋଲି ସେ କହିଥିଲେ।

ଓଡ଼ିଶାର ଅପୂର୍ବ ସଂସ୍କୃତି ଓ ପରମ୍ପରା କୁ ଅନେକ ସାରସ୍ଵତ ସାଧକ ନିଜ ଲେଖନୀ ରେ ଅମର କରିଛନ୍ତି। ସେମାନଙ୍କ ମଧ୍ୟରୁ କବି ସମ୍ରାଟ ଉପେନ୍ଦ୍ର ଭଞ୍ଜ ଅନ୍ୟତମ ଯାହାଙ୍କ କାଳଜୟୀ ରଚନା ଆମର ସଂସ୍କୃତି କୁ ଉଜ୍ଜୀବିତ କରିଥାଏ ବୋଲି ସେ କହିଥିଲେ। ସମ୍ପ୍ରତି ସମୟରେ ଦୈନନ୍ଦିନ ଜୀବନରେ ବିଜ୍ଞାନ ର ପ୍ରୟୋଗ ନୌ ବାଣିଜ୍ୟ କୁ ଅପେକ୍ଷାକୃତ ସରଳ କରିଛି। ଆଜି ଆମେ ଏକ ନୂତନ ଯୁଗରେ ପ୍ରବେଶ କରୁଛୁ। ଆଧୁନିକ ଓଡ଼ିଶାର ରାଜନୈତିକ ଇତିହାସ ରେ ଜୁନ୍ ୧୨ ସ୍ୱର୍ଣାକ୍ଷର ରେ ଲିପିବଦ୍ଧ।

ଏହି ସରକାର ବିକାଶ ସହିତ ଓଡିଆ ସଂସ୍କୃତି ଓ ପରମ୍ପରାକୁ ସମ୍ମାନ ଦେଇ ରାଜ୍ୟବାସୀ ଙ୍କ କଲ୍ୟାଣ ପାଇଁ କାର୍ଯ୍ୟ କରିବାକୁ ବଦ୍ଧ ପରିକର। ଦୁର୍ନୀତି ନିବାରଣ ସହିତ ବିକାଶ ହେଉଛି ଆମର ସରକାର ଙ୍କ ମୂଳମନ୍ତ୍ର। ନାରୀ ସଶକ୍ତିକରଣ ଓ କୃଷକ ବିକାଶ ନିମନ୍ତେ ଯଥାକ୍ରମେ ସୁଭଦ୍ରା ଯୋଜନା ଓ ଧାନ କିଣା ବାବଦ କୁ ୩୧୦୦ ଟଙ୍କା ପ୍ରଦାନ ପାଇଁ ନିଷ୍ପତ୍ତି ଗ୍ରହଣ କରାଯାଇ କାର୍ଯ୍ୟକାରୀ କରଯାଇଛି। ପାରାଦ୍ଵୀପ ବନ୍ଦର ସହିତ ପାରାଦ୍ଵୀପ ର ସର୍ବାଙ୍ଗୀନ ଉନ୍ନତି ପାଇଁ ଆମ ସରକାର ସମସ୍ତ ପ୍ରକାର ସାହାଯ୍ୟ କରିବେ ବୋଲି କହିଥିଲେ ମୁଖ୍ୟମନ୍ତ୍ରୀ।୮ ଲେନ ରାସ୍ତା ନିର୍ମାଣ ହେବ ଯାହା ବଡ଼ବିଲ ରୁ ପାରାଦ୍ଵୀପ ସଂଯୋଗ କରିବ।

ନିଜ ଜିଲ୍ଲା କେନ୍ଦୁଝର ସହିତ ପାରାଦ୍ଵୀପ ର ସମ୍ପର୍କ କୁ ନିବିଡ଼ କରିବ। ସିଙ୍ଗାପୁର ର ପୁଞ୍ଜି ନିବେଶ ରେ ସି ବେସ ରେ କାମ କରାଯିବ। ପାରାଦ୍ଵୀପ ରେ ଦୁଇ ଲକ୍ଷ କୋଟି ଟଙ୍କାର ପୁଞ୍ଜି ନିବେଶ ସହ ରୋଜଗାର ର ପନ୍ଥା ଯୋଗାଇବ।ସ୍ଥାନୀୟ ବିଧାୟକ ତଥା ମନ୍ତ୍ରୀ ମୋ ସହ ଦେଶ ବିଦେଶ କୁ ଗସ୍ତ କରି ଉତ୍କର୍ଷ ଓଡ଼ିଶା ପାଇଁ ବିଦେଶ ରୁ ପୁଞ୍ଜି ନିବେଶ ପାଇଁ।

ଜଗତସିଂହପୁର ଜିଲ୍ଲା ଓଡିଶା ଶିଳ୍ପ ମାନଚିତ୍ର ରେ ସ୍ବତନ୍ତ୍ର ପରିଚୟ ସୃଷ୍ଟି କରିବ। ଓଡିଆ ଅସ୍ମିତା ସହ ଆଗାମୀ ଦିନରେ ସୁନାର ଓଡ଼ିଶା ଗଠନ ହେବା ବୋଲି ମୁଖ୍ୟମନ୍ତ୍ରୀ କହିଥିଲେ। ଜଗତସିଂହପୁରର ଧାନ, ପାନ, ମୀନ ବିଶ୍ବ ପ୍ରସିଦ୍ଧ। ପାରାଦ୍ଵୀପ କୁ ବାରମ୍ବାର ଆସିବାର ଇଚ୍ଛା ପ୍ରକଟ କରିଥିଲେ। ଆଗମୀ ଦିନରେ ଜିଲ୍ଲା ରେ ମେଡିକାଲ କଲେଜ ପ୍ରତିଷ୍ଠା କୁ ମଧ୍ୟ ଅନୁମୋଦନ କରି ଜିଲ୍ଲାବାସୀ ଙ୍କୁ ଖୁସି କରିଥିଲେ।ମୁଖ୍ୟ ବକ୍ତା ମାନ୍ୟବର ମନ୍ତ୍ରୀ ଶିଳ୍ପ, ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗ ଶ୍ରୀଯୁକ୍ତ ସମ୍ପଦ ଚନ୍ଦ୍ର ସ୍ବାଇଁ ଯୋଗ ଦେଇ ଓଡିଶା ର ଐତିହ୍ୟ ରେ ପାରାଦ୍ଵୀପ ର ଯୋଗଦାନ କୁ ମନେପକାଇ ଦେଇଥିଲେ।

ଆଗାମୀ ଦିନରେ ଶିଳ୍ପ ସମୃଦ୍ଧ ହୋଇଉଠିବ ପାରାଦ୍ଵୀପ। ମୁଖ୍ୟମନ୍ତ୍ରୀ ଙ୍କ ସହଯୋଗ ରେ ପାରାଦ୍ଵୀପ ତଥା ଜଗତସିଂହପୁର ଜିଲ୍ଲା ସମୃଦ୍ଧି ର ଶିଖର ରେ ପହଞ୍ଚିବ।ଏହି ଅବସରରେ ସମ୍ମାନିତ ଅତିଥି ଭାବେ ଯୋଗଦେଇ ଜଗତସିଂହପୁର ସାଂସଦ ଡ଼ା ବିଭୁ ପ୍ରସାଦ ତରାଇ ଓଡିଶା ଓ ଓଡ଼ିଆ ର ପରମ୍ପରା ସବୁବେଳେ ସ୍ୱତନ୍ତ୍ର ବୋଲି କହିଥିଲେ ଓଡିଶାର ପାଟଶାଢୀ, କାଠ ଖୋଦିତ କାରୁକାର୍ଯ୍ୟ ସବୁବେଳେ ପ୍ରଶଂସିତ। ଅନ୍ୟ ସମ୍ମାନୀତ ଅତିଥି ଭାବେ ଯୋଗଦେଇ ଜଗତସିଂହପୁର ବିଧାୟକ ଶ୍ରୀ ଅମରେନ୍ଦ୍ର ଦାସ କହିଲେ ଯେ, ଜଗତସିଂହପୁର ମାଟି ସବୁବେଳେ ଐତିହ୍ୟର ଗୁଣଗାନ କରିଥାଏ। ପାରାଦୀପ ରେ ଅନୁଷ୍ଠିତ ହେଇଥିବା କଳିଙ୍ଗ ବାଲିଯାତ୍ରା ବର୍ତ୍ତମାନ ଓଡିଶା ପ୍ରସିଦ୍ଧ।

ଏହି ବାଲିଯାତ୍ରା ଆମର ପୂର୍ବ ସାଧବ ପୁଅ ମାନଙ୍କ ର ମହାନ କିର୍ତ୍ତୀରାଜି କୁ ମନେ ପକାଇଥାଏ । ଏବେର ବାଲିଯାତ୍ରା କେବଳ ଏକ ଉତ୍ସବ ନୁହଁ ବରଂ ଏହା ଅର୍ଥନୈତିକ ଅଭିବୃଦ୍ଧି ର ସୋପାନ ବୋଲି ଶ୍ରୀ ଦାସ କହିଥିଲେ। ବାଲିକୁଦା ଏରସମା ବିଧାୟକ ଶ୍ରୀ ସାରଦା ପ୍ରସନ୍ନ ଜେନା ମଧ୍ଯ କଳିଙ୍ଗ ବାଲିଯାତ୍ରା କୁ ଏକ ଅନନ୍ୟ ପ୍ରୟାସ ଯାହା ଜିଲ୍ଲାର ବୈଦେଶିକ ବ୍ୟାପାର ଅର୍ଥନୀତି କୁ ସୁଦୃଢ଼ କରୁଛି ବୋଲି କହିଥିଲେ। ଓଡ଼ିଆ ମାନେ ଆଜି ବାହାର ଦେଶରେ ସୁନାମ ଅର୍ଜନ କରିଛନ୍ତି ଯାହା ସେ କୁଜଙ୍ଗ ନାମରେ ସିମେଣ୍ଟ କମ୍ପାନୀ କରିଛନ୍ତି। ଏହା ପ୍ରତିଟି ଓଡ଼ିଆ ଙ୍କ ପାଇଁ ଗର୍ବ ର ବିଷୟ।

ସଭାରେ ଯୋଗଦେଇ ତିର୍ତ୍ତୋଲ ବିଧାୟକ ଡ ରମାକାନ୍ତ ଭୋଇ ଜଗତସିଂହପୁର ଜିଲ୍ଲା କୁ ଏହିପରି ଉନ୍ନତି ପଥରେ ଆଗେଇ ନେବାକୁ ମୁଖ୍ୟମନ୍ତ୍ରୀ ଙ୍କୁ ଅନୁରୋଧ କରିଥିଲେ। ଯୁବପିଢୀ ଙ୍କୁ ଆହ୍ବାନ ଦେଇ କହିଥିଲେ ଯେ, ସମସ୍ତେ ଆଧୁନିକ ଜ୍ଞାନ କୌଶଳ ସହ ଆଗକୁ ବଢିବା ଉଚିତ। ଉପସ୍ଥିତ ଶିଳ୍ପ ମନ୍ତ୍ରୀ ସମ୍ପଦ ସ୍ୱାଇଁ ଙ୍କୁ ମୁଖ୍ୟମନ୍ତ୍ରୀ ଙ୍କ ସହଯୋଗରେ ଆମ ଜିଲ୍ଲା କୁ ଏକ ଶିଳ୍ପ ସମୃଦ୍ଧ ଜିଲ୍ଲା ରେ ପରିଣତ କରିବାକୁ ଅନୁରୋଧ କରିଥିଲେ।

ଏହି ସଭାରେ ଅଧ୍ଯକ୍ଷତା କରି ଜିଲ୍ଲାପାଳ ଶ୍ରୀଯୁକ୍ତ ଜେ ସୋନାଲ ଓଡିଶା ର ସାଧବ ପୁଅ ମାନଙ୍କ ନୌ ବାଣିଜ୍ୟ ଖୁବ୍‌ ସୁନାମଧନ୍ୟ ବୋଲି କହିଥିଲେ। କଳିଙ୍ଗ ବାଲିଯାତ୍ରା ବର୍ତ୍ତମାନ ରାଜ୍ୟରେ ଦ୍ଵିତୀୟ ସର୍ବବୃହତ୍ ବାଣିଜ୍ୟ ସ୍ଥଳ ହୋଇପାରିଛି ବୋଲି କହିଥିଲେ। ଏହି ଅବସରରେ ସେ ୧୦୦୦ ରୁ ଅଧିକ ଷ୍ଟଲ ହୋଇଛି ବୋଲି କହିଥିଲେ ଏବଂ ପ୍ରତ୍ୟେକ ଜିଲ୍ଲାବାସୀ ଙ୍କୁ ଏହାର ଭରପୂର ଆନନ୍ଦ ଉଠାଇବା ସହ ଅର୍ଥନୈତିକ ଅଭିବୃଦ୍ଧି ପାଇଁ ଭାଗୀଦାର ହେବାକୁ ପରାମର୍ଶ ଦେଇଥିଲେ। ଜିଲ୍ଲା ପରିଷଦ ସଭାପତି ମନୋଜ କୁମାର ଭୋଇ ଜଗତସିଂହପୁର ଜିଲ୍ଲା କୁ ସ୍ବାଭିମାନ ର ମାଟି ବୋଲି କହିଥିଲେ।

କଳିଙ୍ଗ ବାଲିଯାତ୍ରା ଇତିହାସର ମୂକସାକ୍ଷୀ ଓ ବର୍ତ୍ତମାନ ସମୟଆଗରେ ଏହାକୁ ଆହୁରି ଉନ୍ନ‌ତ କରିବାପାଇଁ ଶ୍ରୀ ଭୋଇ କରିଥିଲେ। ଅନ୍ୟ ସମ୍ମାନିତ ଅତିଥି ମାନଙ୍କ ମଧ୍ୟରେ ଡି ଆଇ ଜି ଚରଣ ସିଂ ମୀନା, ପାରାଦ୍ଵୀପ ର ଅତିରିକ୍ତ ଜିଲ୍ଲାପାଳ ନିରଞ୍ଜନ ବେହେରା, ପାରାଦୀପ ପୌର ପରିଷଦ ର ଅଧ୍ୟକ୍ଷ ବସନ୍ତ କୁମାର ବିଶ୍ୱାଳ, ପାରାଦ୍ଵୀପ ବନ୍ଦର କର୍ତ୍ତୃପକ୍ଷ ଅଧ୍ୟକ୍ଷ ପି ଏଲ ହରନାଧ ପ୍ରମୁଖ ଯୋଗଦେଇ କଳିଙ୍ଗ ବାଲିଯାତ୍ରା ର ସଫଳ ରୂପାୟନ କାମନା କରିଥିଲେ।

ଏହି ସଭାରେ ଅତିରିକ୍ତ ଜିଲ୍ଲାପାଳ ନିରଞ୍ଜନ ବେହେରା ଧନ୍ୟବାଦ ଅର୍ପଣ କରିଥିଲେ। ସଭାରେ ଅନ୍ୟମାନଙ୍କ ମଧ୍ୟରେ ସହରର ବୁଦ୍ଧିଜୀବୀ, ବିଭିନ୍ନ ରାଜ୍ୟ ତଥା ଜିଲ୍ଲାରୁ ଆସିଥିବା ବ୍ୟବସାୟୀ ଓ ଗଣମାଧ୍ୟମ ପ୍ରତିନିଧି ମାନେ ଉପସ୍ଥିତ ଥିଲେ।

ମୁଖ୍ୟମନ୍ତ୍ରୀ ତଥା ଅନ୍ୟ ଅତିଥି ମାନଙ୍କ ଦ୍ଵାରା ବାଲିଯାତ୍ରାର ସ୍ମରଣୀକା ଉନ୍ମୋଚିତ ହୋଇଥିଲା। ଏହି ବାଲିଯାତ୍ରା ଆସନ୍ତା ୨୧ ତାରିଖ ପର୍ଯ୍ୟନ୍ତ ଚାଲିବ। ଏଥିରେ ରାଜ୍ୟ ତଥା ରାଜ୍ୟ ବାହାରୁ ୧୦୦୦ ରୁ ଉର୍ଦ୍ଧ୍ବ ଷ୍ଟଲ ବିଭିନ୍ନ ପ୍ରକାର ହସ୍ତତନ୍ତ, ଟେରାକୋଟା ଆଦି ସାମଗ୍ରୀ ବିକ୍ରୀ କରାଯିବ। ଓରମାସ ପକ୍ଷରୁ ୧୪୦ ଟି ଷ୍ଟଲ ରହିଛି ବୋଲି ସୂଚନା ମିଳିଛି। ୮ ଦିନ ଧରି ରାଜ୍ୟ ତଥା ରାଜ୍ୟ ବାହାରର ସ୍ୱନାମଧନ୍ୟ କଳାକାର ମାନଙ୍କ ଦ୍ଵାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ।

ଭୁବନେଶ୍ୱର: ଜାତୀୟ ଜଳମାର୍ଗ-୫ ର ତାଲଚରରୁ ପାରାଦୀପ ଏବଂ ଧାମରା ଷ୍ଟ୍ରେଚ୍ ଆଗକୁ ବଢିବାକୁ ଯାଉଛି ଏବଂ ଖୁବ୍ ଶୀଘ୍ର ଏହା କାର୍ଯ୍ୟକାରୀ ହେବ ବୋଲି ବାଣିଜ୍ୟ ଓ ପରିବହନ ବିଭାଗର ପ୍ରମୁଖ ଶାସନ ସଚିବ ଉଷା ପାଢୀ କହିଛନ୍ତି।

ଉପକୁଳ ଏବଂ ଆଭ୍ୟନ୍ତରୀଣ ଜଳ ପରିବହନ ଉପରେ ଦୁଇ ଦିନିଆ ଆନ୍ତର୍ଜାତୀୟ ସମ୍ମିଳନୀ ଉଦଘାଟ କରି ଜଳ ପରିବହନ କ୍ଷେତ୍ରର ସବୁଜକରଣ ଉପରେ ବିଶେଷ ଧ୍ୟାନ ଦେଇ ମୁଖ୍ୟ ଅତିଥି ଶ୍ରୀମତୀ ପାଢ଼ୀ କହିଛନ୍ତି ଯେ ଆଇଆଇଟି, ଚେନ୍ନାଇ ସହଯୋଗରେ “ପରିବହନ, ବନ୍ଦର ଏବଂ ଜଳପଥ ମନ୍ତ୍ରଣାଳୟ ଏବଂ ଭାରତର ଆଭ୍ୟନ୍ତରୀଣ ଜଳପଥ ପ୍ରାଧିକରଣ ଜଳପଥରେ ଥିବା କ୍ରସ୍ ଷ୍ଟ୍ରକଚରର ବିସ୍ତୃତ ଡିଜାଇନ୍, ବ୍ୟୟବରାଦ ଏବଂ ଇଞ୍ଜିନିୟରିଂ ସହିତ ଡିଆରପିର ପ୍ରସ୍ତୁତି ଚୂଡାନ୍ତ ହୋଇଛି।

ଏହି ପ୍ରକଳ୍ପର କାର୍ଯ୍ୟକାରିତା ରାଜ୍ୟ ସରକାର, ପରିବହନ ମନ୍ତ୍ରଣାଳୟ ଏବଂ IWAI, କୋଲ ଇଣ୍ଡିଆ ଲିମିଟେଡ୍ ଏବଂ ପାରାଦୀପ ପୋର୍ଟ ଟ୍ରଷ୍ଟକୁ ନେଇ ଗଠିତ ଏସପିଭି ଅଧୀନରେ କରାଯିବ ବୋଲି ସେ କହିଛନ୍ତି।

ସେମିନାରରେ, ଜାତୀୟ ଜଳମାର୍ଗ-୫ ର ବିକାଶ ସହିତ, ପୂର୍ବ ତଟ କେନାଲ ସିଷ୍ଟମର ପ୍ରାରମ୍ଭିକ ବିକାଶ ଏବଂ ଜାତୀୟ ଜଳମାର୍ଗ-୧ ସହିତ ଏହାର ସଂଯୋଗ, ରାଜ୍ୟରେ ସବୁଜ ପରିବହନ ମୋଡ୍ ଏବଂ ଅର୍ଥନୀତି ପାଇଁ ଆଭ୍ୟନ୍ତରୀଣ ନାଭିଗେସନ୍ ର ଲାଭ ପାଇବାକୁ ଗୁରୁତ୍ୱ ଦିଆଯାଇଥିଲା।

ନୌସେନା ସ୍ଥାପତ୍ୟ ଏବଂ ସାମୁଦ୍ରିକ ଇଞ୍ଜିନିୟର ବିଭାଗର ପୂର୍ବତନ ମୁଖ୍ୟ ପ୍ରଫେସର ଆର.ପି. ଗୋକରନ୍, ଆଇଆଇଟି ଖଡଗପୁର ପ୍ରଫେସର କେଶବ ଦେବ, ଭାରତୀୟ ସାମୁଦ୍ରିକ ବିଶ୍ୱବିଦ୍ୟାଳୟର ଅନ୍ୟ ଦୁଇଜଣ ବିଶିଷ୍ଟ ବ୍ୟକ୍ତି ଯେଉଁମାନେ ଏହି ସମ୍ମିଳନୀର ବିଷୟବସ୍ତୁ ଉପରେ ନିଜର ଦୃଷ୍ଟିକୋଣ ଉପସ୍ଥାପନ କରିଥିଲେ।

ଉତ୍କଳ ଚାମ୍ବର ଅଫ୍‍ କମର୍ସ ସଭାପତି ଡକ୍ଟର ପ୍ରବୋଧ କୁମାର ମହାନ୍ତି ତାଙ୍କ ସ୍ୱାଗତ ଭାଷଣରେ ଶିଳ୍ପ ଏବଂ ରାଜ୍ୟର ବିକାଶ ପାଇଁ ସେମିନାରର ମହତ୍ତ୍ ବର୍ଣ୍ଣନା କରିଥିଲେ। ପ୍ରଫେସର ସୁରେଶ ମିଶ୍ର ସଭାପତି ଫ୍ରୋଷ୍ଟ (ଫୋରମ୍ ଫର ନଦୀ ଏବଂ ମହାସାଗରୀୟ ଜ୍ଞାନିକ ଏବଂ ବୈଷୟିକ ବିଶେଷଜ୍ଞ) ଓଡିଶା ରାଜ୍ୟରେ ସାମୁଦ୍ରିକ ପରିବହନରେ ସବୁଜ ପ୍ରଯୁକ୍ତିର ଆବଶ୍ୟକତା ଉପରେ ପ୍ରତିନିଧୀଙ୍କୁ ସୂଚୀତ କରିଥିଲେ।

ବକ୍ତାମାନେ ନଦୀ ଓ ଉପକୂଳର ସୀମିତ ଜଳରେ ଜଳ ପରିବହନର ସ୍ଥାୟୀତ୍ୱ ଉପରେ ବିଚାର ଆଲୋଚନା କରିଥିଲେ, ବିଶେଷ କରି ଛୋଟ ଜାହାଜ ସହ ଜଡିତ ଏହି କ୍ଷେତ୍ରକୁ ସବୁଜ କରିବା ଉପରେ ବିଶେଷ ଗୁରୁତ୍ୱ ଦେଇଥିଲେ। ଗତ ୧୮ ଓ ୧୯ ରେ ଭୁବନେଶ୍ୱରରେ ଆୟୋଜିତ ହୋଇଥିବା ସମ୍ମିଳନୀ ୟୁସିସିଆଇଏଲ୍‍ ଏବଂ ଫ୍ରୋଷ୍ଟ ମିଳିତ ସହଯୋଗରେ ଅନୁଷ୍ଠିତ ହୋଇଥିଲା।

ଭୁବନେଶ୍ଵର: ପାରାଦୀପ ମତ୍ସ୍ୟ, ପଶୁପାଳନ ଓ ଦୁଗ୍ଧ ଉତ୍ପାଦନ ମନ୍ତ୍ରୀ ପୁରୁଷୋତ୍ତମ ରୂପାଲା ଆଜି ପାରାଦୀପଠାରେ ପାରାଦୀପ ମାଛଧରା ବନ୍ଦରର ଆଧୁନିକୀକରଣ ଓ ଉନ୍ନତିକରଣ ପ୍ରକଳ୍ପର ଉଦଘାଟନ ଓ ଶିଳାନ୍ୟାସ କରିଛନ୍ତି।

ସାଗରମାଳା ଯୋଜନା ଅଧୀନରେ ବନ୍ଦର, ଜାହାଜ ଚଳାଚଳ ଓ ଜଳପଥ ମନ୍ତ୍ରଣାଳୟ ସହଯୋଗରେ ପ୍ରଧାନମନ୍ତ୍ରୀ ମତ୍ସ୍ୟ ସମ୍ପଦ ଯୋଜନା (ପିଏମଏମଏସୱାଇ) ଅଧୀନରେ ଶତ ପ୍ରତିଶତ କେନ୍ଦ୍ରୀୟ ଆର୍ଥିକ ସହାୟତା ସହିତ ମୋଟ ୧୦୮.୯୧ କୋଟି ଟଙ୍କା ବ୍ୟୟରେ ପାରାଦୀପ ମାଛଧରା ବନ୍ଦରର ଆଧୁନିକୀକରଣ ଓ ଉନ୍ନତିକରଣ ପାଇଁ ପାରାଦୀପ ବନ୍ଦର କର୍ତ୍ତୃପକ୍ଷଙ୍କ ପ୍ରସ୍ତାବକୁ କେନ୍ଦ୍ର ସରକାର ଅନୁମୋଦନ କରିଛନ୍ତି ବୋଲି ଶ୍ରୀ ପୁରୁଷୋତ୍ତମ ରୁପାଲା ସୂଚନା ଦେଇଛନ୍ତି। ପାରାଦୀପ ବନ୍ଦର କର୍ତ୍ତୃପକ୍ଷ ଙ୍କ ଦ୍ୱାରା ଏହି ମାଛଧରା ବନ୍ଦର ପ୍ରକଳ୍ପ କୁ ୧୮ ମାସର ସମାପ୍ତି ଅବଧି ପରେ କାର୍ଯ୍ୟକାରୀ କରାଯିବ।

ବିଦ୍ୟମାନ ସୁବିଧାଗୁଡ଼ିକର ଉନ୍ନତିକରଣ, ନୂତନ, ଦକ୍ଷ ଏବଂ ଅତ୍ୟାବଶ୍ୟକ ଭିତ୍ତିଭୂମି ସୁବିଧା ପ୍ରଦାନ, ମତ୍ସ୍ୟ  ପ୍ରକ୍ରିୟାକୁ ଯାନ୍ତ୍ରିକ କରିବା ଏବଂ ଏକ ଦକ୍ଷ ପରିଚାଳନା ସଂସ୍ଥା ଦ୍ୱାରା ଉତ୍ତମ ପରିଚାଳନା ଅଭ୍ୟାସ ଦ୍ୱାରା ପାରାଦୀପ ମାଛଧରା ବନ୍ଦରର ଆଧୁନିକୀକରଣ ଏବଂ ଉନ୍ନତିକରଣ ଏହାର ପରିମଳ ସ୍ଥିତିରେ ଉନ୍ନତି ଆଣିବ ଏବଂ ବନ୍ଦରକୁ ସ୍ୱଚ୍ଛ, ପ୍ରଦୂଷଣ ମୁକ୍ତ ଏବଂ ସୌନ୍ଦର୍ଯ୍ୟପୂର୍ଣ୍ଣ ଭାବରେ ଆନନ୍ଦଦାୟକ କରିବ ବୋଲି କେନ୍ଦ୍ରମନ୍ତ୍ରୀ ଏଫ୍ଏଏଚଡି ସୂଚନା ପ୍ରଦାନ କରିଥିଲେ। ସେ କହିଥିଲେ ଯେ ମାଛଧରା ବନ୍ଦରର ଏହି ଆଧୁନିକୀକରଣ ହଜାର ହଜାର ମତ୍ସ୍ୟଜୀବୀ ଏବଂ ଆନୁଷଙ୍ଗିକ ଶ୍ରମିକଙ୍କ ଜୀବନରେ ଉନ୍ନତି ଆଣିବ ଯେଉଁମାନେ ଜୀବିକା ପାଇଁ ବନ୍ଦର ଉପରେ ନିର୍ଭର କରନ୍ତି। ଉପରୋକ୍ତ ପ୍ରକଳ୍ପ ଅଧୀନରେ ହୋଇଥିବା ଆଧୁନିକୀକରଣ ଏବଂ ମୂଲ୍ୟ ସଂଯୋଜନ କାର୍ଯ୍ୟକଳାପ ମଧ୍ୟ କୁଶଳୀ ଏବଂ ଅଣକୁଶଳୀ ପ୍ରକୃତିର ନୂତନ ନିଯୁକ୍ତି ସୁଯୋଗ ସୃଷ୍ଟି କରିବ।

ପାରାଦୀପ ମାଛଧରା ବନ୍ଦରର ଆଧୁନିକୀକରଣ ଓ ଉନ୍ନତିକରଣ ପ୍ରକଳ୍ପରେ ଏକ ନୂତନ ନିଲାମ ହଲ୍, ନୂତନ ବାଣିଜ୍ୟିକ କମ୍ପ୍ଲେକ୍ସ, କ୍ବେ ପାଚେରିର ସମ୍ପ୍ରସାରଣ, ଉପକୂଳ ସୁରକ୍ଷା କାର୍ଯ୍ୟ, ବର୍ତ୍ତମାନର ନିଲାମ ହଲ୍ ର ନବୀକରଣ, ଗିଅର୍ ସେଡ୍, ମାଛ ପ୍ୟାକିଂ ସେଡ୍, ଆଇସ୍ କ୍ରସିଂ ହଲ୍, ପ୍ରାଥମିକ ଚିକିତ୍ସା କେନ୍ଦ୍ର, କମ୍ପାଉଣ୍ଡ ପାଚେରି ନିର୍ମାଣ, ବିଦ୍ୟୁତ୍ କାର୍ଯ୍ୟ, ଓଭରହେଡ୍ ପାଣି ଟାଙ୍କି ନିର୍ମାଣ କରାଯିବ ବୋଲି ଶ୍ରୀ ପୁରୁଷୋତ୍ତମ ରୂପାଲା ସୂଚନା ଦେଇଥିଲେ। ସୌର ଶକ୍ତି ପ୍ଲାଣ୍ଟ, ସୋଲାର ଲାଇଟ୍, ନେଭିଗେସନ୍ ଏଡ୍ / ରେଡିଓ ଯୋଗାଯୋଗ ଉପକରଣ, ଇଟିପି, ଅଗ୍ନିଶମ ଉପକରଣ, ମାର୍କେଟ୍ କମ୍ପ୍ଲେକ୍ସ ଏବଂ ରାସ୍ତା ନିର୍ମାଣ, ଅନ୍ୟାନ୍ୟ ଆନୁଷଙ୍ଗିକ ସୁବିଧା ଏବଂ ସେବା ସହିତ ଲ୍ୟାଣ୍ଡସ୍କେପିଂ ଇତ୍ୟାଦିର ମଧ୍ୟ ବ୍ୟବସ୍ଥା କରାଯିବ।

ପ୍ରାୟ ୪୩ ଏକର ପରିମିତ ପାରାଦୀପ ମାଛଧରା ବନ୍ଦର ଜଗତସିଂହପୁର ଜିଲ୍ଲାର ନଦୀ ମୁହାଣଠାରୁ ୨ କିଲୋମିଟର ଉପର ମୁଣ୍ଡରେ ମହାନଦୀର ଡାହାଣ ପାର୍ଶ୍ୱରେ ଅବସ୍ଥିତ ଓଡ଼ିଶାର ଅନ୍ୟତମ ବୃହତ୍ତମ ମାଛଧରା ବନ୍ଦର। ପ୍ରାରମ୍ଭିକ ପର୍ଯ୍ୟାୟରେ ୩୭୦ ଟି ୧୦ ମିଟର ଜାହାଜ, ୮୦ ଟି ୧୩ ମିଟର ଜାହାଜ ଏବଂ ୫୦ ସଂଖ୍ୟାରେ ୧୫ ମିଟର ଜାହାଜ ଏବଂ ପାରମ୍ପରିକ ୱାଯରକ୍ରାଫ୍ଟର ତଦାରଖ ପାଇଁ ବନ୍ଦର ନିର୍ମାଣ କରାଯାଇଥିଲା। ବର୍ତ୍ତମାନ ପ୍ରାୟ ୬୪୦ ଟି ୧୫ ମିଟର ଜାହାଜ ଏବଂ ୧୦୦ ଟି ୯ ମିଟର ଗିଲ ନେଟର (ଏଫଆରପି ଡଙ୍ଗା) ବନ୍ଦର ସୁବିଧା ବ୍ୟବହାର କରୁଛନ୍ତି।

ଜଗତସିଂହପୁର ଜିଲ୍ଲା ପାରାଦୀପ ମାଛଧରା ବନ୍ଦରରେ ଆଜି ସାଗର ପରିକ୍ରମା ଯାତ୍ରାର ଫେଜ୍-XI ଜାରି ରହିଛି। ସାଗର ପରିକ୍ରମା କାର୍ଯ୍ୟକ୍ରମରେ ପୁରୁଷୋତ୍ତମ ରୂପାଲା ପିଏମ୍ଏମ୍ଏସୱାଇ ଯୋଜନାରେ ହିତାଧିକାରୀଙ୍କୁ ଜିଏଆଇଏସ୍ ଚେକ୍, ବୋଟ୍ ଆଣ୍ଡ ନେଟ୍ ସବସିଡି ଏବଂ ଲୁଣିପାଣି ପୋଖରୀ ଉନ୍ନୟନ ସବସିଡି ପ୍ରଦାନ କରି ସମ୍ବର୍ଦ୍ଧିତ କରିଥିଲେ।

ଭୁବନେଶ୍ୱର: ଆଣ୍ଡାମାନ ଉପକୂଳରେ ସୃଷ୍ଟି ହୋଇଥିବା ଲଘୁଚାପ ଅବପାତର ରୂପ ନେଇଥିବା ବେଳେ ବୁଧବାର ପାରାଦୀପ ଠାରୁ ଦକ୍ଷିଣ -ପୂର୍ବ ପ୍ରାୟ ୬୫୦ କିଲୋମିଟର ଦୂରରେ କେନ୍ଦ୍ରୀଭୂତ ହୋଇଥିବା ବିଷୟରେ ଶିକ୍ଷା ଓ ଅନୁସନ୍ଧାନ (ସୋଆ) ପରିଚାଳିତ ପରିବେଶ ଓ ଜଳବାୟୁ କେନ୍ଦ୍ର (ସିଇସି) ପକ୍ଷରୁ ସୂଚନା ଦିଆଯାଇଛି।

ପ୍ରାରମ୍ଭିକ ତଥ୍ୟାନୁଯାୟୀ ଶୁକ୍ରବାର ଏହା ଉତର-ପଶ୍ଚିମ ଦିଗରେ ଆନ୍ଧ୍ର ପ୍ରଦେଶ ଉପକୂଳ ଆଡକୁ ଗତି କରିବାର ସମ୍ଭାବନା ଥିବାବେଳେ ପରବର୍ତ୍ତୀ କାଳରେ ଗଭୀର ଅବପାତର ରୂପ ନେଇ ପାରେ ବୋଲି ସିଇସି ପକ୍ଷରୁ ଜାରି ହୋଇଥିବା ବୁଲେଟିନ୍ କହିଛି।

ପରେ ଏହାର ଗତିପଥରେ ପରିବର୍ତନ ହେବା ସହ ଉତର କିମ୍ବା ଉତର-ପୂର୍ବ ଦିଗକୁ ଗତି କରି ଓଡ଼ିଶା ଉପକୂଳ ମୁହାଁ ହେବା ସହ ନଭେମ୍ବର ୧୭ରେ ଏକ ଘୂର୍ଣ୍ଣିଝଡରେ ପରିଣତ ହେବାର ସମ୍ଭାବନା ରହିଛି। ଏହାର ପ୍ରଭାବରେ ସମୁଦ୍ରରେ ପବନର ବେଗ ଘଂଟା ପ୍ରତି ୮୦ ରୁ ୯୦ କିଲୋମିଟର ପର୍ଯ୍ୟନ୍ତ ହୋଇପାରେ । ତେବେ ପୁରୀ, ଜଗତସିଂହପୁର ଏବଂ ଭଦ୍ରକ ଜିଲ୍ଲା ଉପକୂଳରେ ପବନର ବେଗ ଏହି ସମୟରେ ଘଂଟା ପ୍ରତି ୫୫ ରୁ ୭୦ କିଲୋମିଟର ରହିପାରେ ବୋଲି କୁହାଯାଇଛି।

ନଭେମ୍ବର ୧୮ତାରିଖ ସକାଳେ ବାଲେଶ୍ୱର ଉପକୂଳ ଠାରୁ କିଛି ଦୂରରେ ରହିବ ଯେଉଁ ସମୟରେ ପବନର ବେଗ ଘଂଟା ପ୍ରତି ୬୦ରୁ ୭୫ କିଲୋମିଟର ରହିବାର ସମ୍ଭାବନା ରହିଛି। ତେବେ ଏହି ସମୟରେ ଖୋର୍ଦ୍ଧା ଏବଂ କଟକ ଜିଲ୍ଲାରେ ପବନର ବେଗ କମ୍ ରହିବ।
ଏହାର ପ୍ରଭାବରେ ନଭେମ୍ବର ୧୫ ରାତିରୁ ଭୁବନେଶ୍ୱର ସମେତ ଉପକୂଳ ଓଡିଶାରେ ମଧ୍ୟମରୁ ଭାରି ବର୍ଷା ଜାରି ରହିବ। ତେବେ ନଭେମ୍ବର ୧୭ ତାରିଖରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି। କାରଣ ଏହି ସିଷ୍ଟମ ସାରାଦିନ ଭଦ୍ରକ ଉପକୂଳରେ ସ୍ଥ୍‌ିର ରହିବ । ନଭେମ୍ବର ୧୬ ଏବଂ ୧୭ ତାରିଖରେ ଭୁବନେଶ୍ୱରରେ ୪୦ ରୁ ୬୦ ମିଲିମିଟର ବର୍ଷା ହେବାର ସମ୍ଭାବନା ଥିବା ବେଳେ ଖୋର୍ଦ୍ଧାରେ ୩୦ ରୁ ୪୫ ମିମି ର ବର୍ଷା ହୋଇପାରେ।

ନଭେମ୍ବର ୧୬ ତାରିଖରୁ ବାଲେଶ୍ୱର, ଭଦ୍ରକ, ଯାଜପୁର , ଢେଙ୍କାନାଳ, ମୟୂରଭଞ୍ଜ ଏବଂ କେନ୍ଦୁଝର ଜିଲ୍ଲାରେ ୨୪ ଘଂଟା ଧରି ପ୍ରବଳ ବର୍ଷା ହେବାର ସମ୍ଭାବନା ରହିଛି।

କୁଜଙ୍ଗ: ପିପିଏଲରେ କାର୍ଯ୍ୟରତ ଠିକା ଶ୍ରମିକ ମାନଙ୍କ ମାସିକ ଦରମା ବୃଦ୍ଧି ନେଇ ପାରାଦୀପ ଫସଫେଟ୍ ମଜଦୂର ୟୁନିଅନ ଦିର୍ଘଦିନଧରି ଦାବି କରିଆସୁଥିଲା। ଏହି ୟୁନିୟନର ସ୍ୱର୍ଗତ ସଭାପତି ସର୍ବଭାରତୀୟ ଶ୍ରମିକ ନେତା ତଥା ହିନ୍ଦମଜଦୂର ସଭା ଡଡ଼ିଶା ରାଜ୍ୟ ସଭାପତି ସ୍ୱର୍ଗତ ରାଜେନ୍ଦ୍ର ପ୍ରସାସ ସିଂହ ତାଙ୍କ ଜୀବନ ଦଶରେ ଶ୍ରମିକ ମାନଙ୍କ କଲ୍ୟାଣ ନିମନ୍ତେ ଅନେକ ସ୍ମରଣଈୟ କାର୍ଯ୍ୟ କରିଥିଲେ।

ତାଙ୍କୁ ଅନୁକରଣ କରି ହିନ୍ଦ ମଜଦୂର ସଭା ଅନୁବନ୍ଧିତ, ପାରାଦୀପ ଫସଫେଟ ୟୁନିଅନ ମଧ୍ୟ ତାଙ୍କର ଅବର୍ତମାନରେ ଶ୍ରମିକ ମାନଙ୍କ ଦରମା ବୃଦ୍ଧି ସମେତ ଅନ୍ୟାନ୍ୟ ମୌଳିକ ଦାବିକୁ ନେଇ ସଙ୍ଗ୍ରାମ ଜାରି ରଖିଥିଲା। ଯାହା ଫଳରେ ପିପିଏଲ କର୍ତୃପକ୍ଷ ବାଧ୍ୟହୋଇ ଗତକାଲି ଆଲେଶଚନା କରିବା ପାଇଁ ଶ୍ରମିକ ସଭ୍‌ଘ ମାନଙ୍କରପ ପ୍ରତିନିଧି ମାନଙ୍କୁ ଡାକିଥିଲେ।

ଏନେଇ ବିଶଦ ଭାବେ ଆଲୋଚନା କରାଯିବାପରେ ଠିକା ଶ୍ରମିକ ମାନଙ୍କର ମାସିକ ଦରମାରେ ୮ ହଜାର ଟଙ୍କା ମାସିକ ବୃଦ୍ଧି କରିଛନ୍ତି। ଏହା ଫଳରେ କାର୍ଯ୍ୟରତ ୩୬୬ ଜଣ ଶ୍ରମିକ ଉପକୃତ ହେବା ସହିତ ପିଛିଲା ଭାବେ ଗତ ୨୦୨୧ ମସିହା ଅପ୍ରେଲ ମାସରୁ ପିଛିଲା ଭାବେ ପାଇବେ ବୋଲି ଚୁକ୍ତିପତ୍ର ସ୍ୱାକ୍ଷରିତ ହୋଇଛି। ଅନ୍ୟାନ୍ୟ ଦାବିସମୂହ ସମ୍ପର୍କରେ ଆସନ୍ତା ୧୫ ଦିନ ମଧ୍ୟରେ ପିପିଏଲ କର୍ତୃପକ୍ଷ ଓ ଶ୍ରମିକ ସଙ୍ଘ ମଧ୍ୟରେ ଆଲୋଚନା କରାଯାଇ ସମସ୍ୟାର ସମାଧାନ କରିବାପାଇଁ ନିଷ୍ପତି ଗ୍ରହଣ କରାଯାଇଥିବା ଏକ ପ୍ରେସ ବିଜ୍ଞପ୍ତି ଜରିଆରେ ପାରାଦୀପ ଫସଫେଟ ମଜଦୂର ୟୁନିଅନର ବରିଷ୍ଠ ଉପସଭାପତି ତଥା ହିନ୍ଦ ମଜଦୂର ସଭାର ରାଜ୍ୟ ସମ୍ପାଦକ ଓ ବିଜୁ ଶ୍ରମିକ ସାମୁଖ୍ୟର ରାଜ୍ୟ ଉପସଭାପତି ଆଇନଜିବୀ ଅମୃତ ଦାସ ଜଣାଇଛନ୍ତି।

ଶ୍ରମିକ ମାନଙ୍କର ଦରମା ବୃଦ୍ଧି ନେଇ ପାରାଦୀପ ଫସଫେଟ ମଜଦୂର ୟୁନିଅନର ସଭାପତି ପୂର୍ବତନ ବିଧାୟକ ଦେବାଶିଷ ସାମନ୍ତରାୟ, ଉପସଭାପତି ତଥା ପାରାଦୀପ ପୌରପାଳ ବସନ୍ତ ବିଶ୍ୱାଳଙ୍କ ଅବଦାନକୁ ଶ୍ରମିକ ସମାଜ ମନେରଖିବ। ପିପିଏଲ କର୍ତୃପକ୍ଷ ଶ୍ରମିକ ମାନଙ୍କର ଦରମା ବୃଦ୍ଧି କରିଥିବାରୁ ୟୁନିଅନ ପକ୍ଷରୁ ଧନ୍ୟବାଦ ଅର୍ପଣ କରାଯିବା ସହିତ ଏହା ଦିବଙ୍ଗତ ଶ୍ରମିକ ନେତା ରାଜେନ୍ଦ୍ର ପ୍ରସାଦ ସିଂହଙ୍କ ପ୍ରତି ଶ୍ରେଷ୍ଠ ଶ୍ରଦ୍ଧାଞ୍ଜଳୀ ବୋଲି କୁହାଯାଇଛି।

ଏହି ଚୂକ୍ତିପତ୍ର ସ୍ୱାକ୍ଷର ହେବା ସମୟରେ ଶ୍ରମିକ ନେତା ଅନନ୍ତ ଦାସ, ସାଧାରଣ ସମ୍ପାଦକ ପ୍ରଫୁଲ୍ଲ ଖଟୁଆ, ଯୁଗ୍ମ ସମ୍ପାଦକ ଅଜୟ ସ୍ୱାଇଁ, ପ୍ରତାପ ହଜାରୀ, ନୀଳକଣ୍ଠ ଦେ, ପ୍ରଫୁଲ୍ଲ ଦତ୍ତ, ଦୂର୍ଗଚରଣ ମଲ୍ଲିକ ଓ ପିପିଏଲ ପକ୍ଷରୁ ମାନବ ସମ୍ବଳ ଅଧିକାରୀ ଜଗନ୍ନାଥ ଖୁଂଟିଆ ପ୍ରମୁଖ ଉପସ୍ଥିତ ଥିଲେ।

ଭୁବନେଶ୍ବର: ପୂର୍ବତଟ ରେଳପଥର ମହାପ୍ରବନ୍ଧକ ରୂପ ନାରାୟଣ ସୁନକର ଆଜି ପାରାଦୀପ ଗସ୍ତରେ ଯାଇ କଟକ-ପାରାଦୀପ ରେଳ ମାର୍ଗରେ ବିଭିନ୍ନ ବିକାଶମୂଳକ କାର୍ଯ୍ୟ ନୀରିକ୍ଷଣ କରିଛନ୍ତି। ଏହି ସମୟରେ ଟ୍ରାଫିକ ସୁବିଧା ତଥା ବିନା କୌଣସି ପ୍ରତିବନ୍ଧକରେ ଟ୍ରେନ ଚଳାଚଳ ଏବଂ ରେଳବାଇର ବିଭିନ୍ନ ବିକାଶମୂଳକ କାର୍ଯ୍ୟକଳାପ ସମ୍ବନ୍ଧରେ ଆଲୋଚନା କରିଛନ୍ତି।

ଶ୍ରୀ ସୁନକର ମଧ୍ୟ ପାରାଦୀପ ଅଞ୍ଚଳରେ ରେଳବାଇର ବିକାଶମୂଳକ କାର୍ଯ୍ୟର ସମୀକ୍ଷା କରିଥିଲେ। ଏହି ସମୀକ୍ଷା ଓ ନୀରିକ୍ଷଣ କାର୍ଯ୍ୟକ୍ରମରେ ଖୋର୍ଦ୍ଧା ରୋଡ଼ ରେଳ ମଣ୍ଡଳର ମଣ୍ଡଳ ରେଳବାଇ ପ୍ରବନ୍ଧକ ରିଙ୍କେଶ ରାୟଙ୍କ ସହିତ ରେଳପଥର ପ୍ରମୁଖ ବିଭାଗୀୟ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ।

ଶ୍ରୀ ସୁନକର ରେଳବାଇର ବିଭିନ୍ନ ଷ୍ଟେକ ହୋଲ୍ଡର (ସହଭାଗୀ) ମାନଙ୍କର ଅଧିକାରୀଙ୍କ ସହ ବିଭିନ୍ନ ପ୍ରସଙ୍ଗରେ ଆଲୋଚନା କରିଥିଲେ ଏବଂ ପଣ୍ୟ ବୋଝେଇ ଓ ପଣ୍ୟ ବୋଝ ଉତାରିବା (ଅନଲୋଡିଂ) ପାଇଁ ବିଭିନ୍ନ ରେଳ ସାଇଡିଙ୍ଗ ପରିଦର୍ଶନ କରିଥିଲେ। ପରିବହନ ଏବଂ ଟ୍ରାଫିକ ସୁବିଧା କ୍ଷେତ୍ରରେ ସମସ୍ତ ପ୍ରକାର ସହାୟତା ଯୋଗାଇଦେବାକୁ ସେ ସହଭାଗୀ ମାନଙ୍କୁ ଆଶ୍ୱାସନା ଦେଇଛନ୍ତି ଏବଂ ପ୍ରକଳ୍ପ ଗୁଡିକର କାର୍ଯ୍ୟ ଶୀଘ୍ର ସମାପ୍ତ କରାଇବା ଓ ପରିବହନ ସୁବିଧା କରାଇ ଏହାର ବୃଦ୍ଧି ଘଟାଇବା ସହ ରାଜସ୍ୱ ବୃଦ୍ଧି ପାଇଁ ରେଳ ଅଧିକାରୀଙ୍କୁ ପରାମର୍ଶ ଦେଇଛନ୍ତି।