ନୂଆଦିଲ୍ଲୀ: ରାମାୟଣ ଚରିତ୍ର ଉପରେ ଆଧାରିତ ଫିଲ୍ମ ‘ଆଦିପୁରୁଷ’ ରିଲିଜ ହେବା ପୂର୍ବରୁ ମଧ୍ୟ ଏହାକୁ ନେଇ ବିବାଦ ଲାଗି ରହିଛି। ଫିଲ୍ମର ଟିଜରରେ ପ୍ରଭୁ ରାମ, ଲକ୍ଷ୍ମଣ ଏବଂ ରାବଣଙ୍କ ଭଳି ଚରିତ୍ରର ସୁଟିଂକୁ ବିଶ୍ଵ ହିନ୍ଦୁ ପରିଷଦ ବିରୋଧ କରିଛି। ଫିଲ୍ମ ପ୍ରେକ୍ଷାଳୟରେ ପ୍ରଦର୍ଶିତ ହେବାକୁ ଦିଆଯିବ ନାହିଁ ବୋଲି ବିଶ୍ୱ ହିନ୍ଦୁ ପରିଷଦ ଚେତାବନୀ ଦେଇଛି।
ଉତ୍ତରପ୍ରଦେଶର ସମ୍ୱଲରେ ବିଶ୍ୱ ହିନ୍ଦୁ ପରିଷଦର ବିଭାଗ ପ୍ରଚାର ମୁଖ୍ୟ ଅଜୟ ଶର୍ମା ଆଜି ସାମ୍ବାଦିକମାନଙ୍କ ସହ ଆଲୋଚନା ବେଳେ ଅଭିଯୋଗ କରିଛନ୍ତି ଯେ, କେବଳ ପ୍ରଭୁ ରାମ ନୁହଁନ୍ତି, ରାବଣ ଏବଂ ଲକ୍ଷ୍ମଣଙ୍କୁ ‘ଆଦିପୁରୁଷ’ ଚଳଚ୍ଚିତ୍ରରେ ଭୁଲ ଚିତ୍ରଣ କରାଯାଇଛି। ସେ ଦାବି କରିଛନ୍ତି ଯେ, ଏହି ଚଳଚ୍ଚିତ୍ରରେ ରାବଣ ଯେଉଁଭଳି ଭାବରେ ଚିତ୍ରିତ ହୋଇଛି ତାହା ରାମାୟଣ ଏବଂ ଅନ୍ୟାନ୍ୟ ଆନୁସଙ୍ଗିକ ଶାସ୍ତ୍ର ସହିତ ମେଳ ଖାଉ ନାହିଁ। ଅଜୟ ଶର୍ମା କହିଛନ୍ତି ଯେ, ବିଶ୍ୱ ହିନ୍ଦୁ ପରିଷଦ ଏହି ସାଧୁସନ୍ଥଙ୍କ ନେତୃତ୍ୱରେ ପ୍ରେକ୍ଷାଳୟରେ ପ୍ରଦର୍ଶିତ ହେବାକୁ ଦେବ ନାହିଁ। ପରିଷଦ ଫିଲ୍ମ ବନ୍ଦ କରିବାକୁ ଚେଷ୍ଟା କରିବ।
ସମ୍ୱଲରେ ବିଶ୍ୱ ହିନ୍ଦୁ ପରିଷଦର ବିଭାଗର ପ୍ରଚାର ମୁଖ୍ୟ ଅଜୟ ଶର୍ମା ଫିଲ୍ମ ସେନ୍ସର ବୋର୍ଡକୁ ପ୍ରଶ୍ନ କରି ବୋର୍ଡ ଏକ ଅବାଧ ଓ ଦାୟିତ୍ଵହୀନ କାର୍ଯ୍ୟ କରୁଛି ବୋଲି ଅଭିଯୋଗ କରିଛନ୍ତି। ସେ କହିଛନ୍ତି ଯେ, ଯଦି ବୋର୍ଡ ଏହାର କର୍ତ୍ତବ୍ୟ ସମ୍ପାଦନ କରିପାରିବ ନାହିଁ, ତେବେ ସରକାର ଏହାକୁ ଭଙ୍ଗ କରନ୍ତୁ।
ଫିଲ୍ମ ‘ଆଦିପୁରୁଷ’ର ଟିଜର ରିଲିଜ ହେବା ପରେ ଏହି ବିରୋଧ ଆରମ୍ଭ ହୋଇଛି। ରାଜନେତାଙ୍କଠାରୁ ଆରମ୍ଭ କରି ଚଳଚ୍ଚିତ୍ର କଳାକାର ପର୍ଯ୍ୟନ୍ତ ଏହାକୁ ସମାଲୋଚନା କରାଯାଇଛି। ଉତ୍ତରପ୍ରଦେଶ ଉପମୁଖ୍ୟମନ୍ତ୍ରୀ ବ୍ରଜେଶ ପାଠକ୍ ମଧ୍ୟ କହିଛନ୍ତି ଯେ, ଏହି ଚଳଚ୍ଚିତ୍ର ମାଧ୍ୟମରେ ହିନ୍ଦୁ ସମାଜର ଭାବନା ଉପରେ ଆକ୍ରମଣ କରାଯାଇଛି ଏବଂ ଏହାକୁ ଯେତେ ନିନ୍ଦା ନିନ୍ଦା କଲେ ତାହା କମ୍ ହେବ।
‘ଆଦିପୁରୁଷ’ ଜାନୁଆରୀ ୨୦୨୩ ରେ ମୁକ୍ତିଲାଭ କରିବ। ଏହି ଚଳଚ୍ଚିତ୍ରରେ ପ୍ରଭୁ ରାମଙ୍କ ଭୂମିକାରେ ଅଭିନେତା ପ୍ରଭାସ ନଜର ଆସିବେ। ସୀତା ଭାବରେ କ୍ରିତି ସାନନ୍ ଏବଂ ସୈଫ ଅଲି ଖାନ୍ ରାବଣ ଭାବରେ ଅଭିନୟ କରିବେ। ପ୍ରାୟ ୫୦୦ କୋଟି ଟଙ୍କା ବ୍ୟୟରେ ନିର୍ମିତ ଏହି ଚଳଚ୍ଚିତ୍ରର ନିର୍ଦ୍ଦେଶନା ଦେଇଛନ୍ତି ଓମ ରାଉତ। ଏହି ଚଳଚ୍ଚିତ୍ରର ୧.୪୬ ମିନିଟର ଟିଜର ରବିବାର ଦିନ ଅଯୋଧ୍ୟାରେ ଏକ କାର୍ଯ୍ୟକ୍ରମ ଆୟୋଜନ କରି ମୁକ୍ତିଲାଭ କରିଥିଲା। ସେବେଠାରୁ ବିବାଦ ବଢିବାରେ ଲାଗିଛି। ଏହି ଚଳଚ୍ଚିତ୍ରରେ ରାବଣ ଏବଂ ହନୁମାନଙ୍କ ରୂପକୁ ନେଇ ଏକ ବିଶେଷ ବିରୋଧ କରାଯାଇଛି।
ଫିଲ୍ମରେ ଲଙ୍କେଶ ରାବଣ ଭୂମିକାରେ ସୈଫ ଅଲି ଖାନଙ୍କ ଲୁକକୁ ଆଦୌ ପସନ୍ଦ କରାଯାଉ ନାହିଁ। ଅଜବ ହେୟାର ଷ୍ଟାଇଲ ଏବଂ ଲମ୍ବା ଦାଢି ସହିତ ରାବଣ ଚରିତ୍ରରେ ସୈଫଙ୍କୁ ଔରଙ୍ଗଜେବ ଏବଂ ଆଲାଉଦ୍ଦିନ ଖିଲଜୀଙ୍କ ସହ ତୁଳନା କରାଯାଉଛି। ଏଥିସହିତ, ହନୁମାନଙ୍କୁ ବିନା ନିଶରେ ଦାଢି ଲୁକରେ ଦେଖାଯାଉଛି, ଏହା ସୋସିଆଲ ମିଡିଆରେ ବହୁ ସମାଲୋଚନାର ଶିକାର ହେଉଛି। ସୋସିଆଲ ମିଡିଆରେ #BoycottAdipurush ଏବଂ #BanAdipurush ସହିତ ଉପଭୋକ୍ତାମାନେ ଏହି ଚଳଚ୍ଚିତ୍ର ବିରୋଧରେ ବିରୋଧ କରୁଛନ୍ତି।
