ନୂଆଦିଲ୍ଲୀ: ବେଙ୍ଗାଲୁରୁ ନ୍ୟାଶନାଲ କ୍ରିକେଟ ଆକାଡେମୀରେ ବିସିସିଆଇ ପକ୍ଷରୁ ଇଂଲଣ୍ଡ ବିପକ୍ଷ ଟି-୨୦ ଓ ଟି-୨୦ ବିଶ୍ୱକପ ପାଇଁ ୧୫ରୁ ୨୦ ଖେଳାଳିଙ୍କୁ ତାଲିମ ଦିଆଯାଉଛି। ଏହାସହିତ ଖେଳାଳିଙ୍କ ଫିଟନେଶ୍ ପରୀକ୍ଷା ମଧ୍ୟ କରାଯାଉଛି। ବେଙ୍ଗାଲୁରୁ ନ୍ୟାଶନାଲ କ୍ରିକେଟ ଆକାଡେମୀରେ ହୋଇଥିବା ଫିଟନେଶ୍ ପରୀକ୍ଷାରେ ୬ ଭାରତୀୟ କ୍ରିକେଟ ଖେଳାଳି ବିଫଳ ହୋଇଛନ୍ତି। ଏହି ଫିଟନେଶ ପରୀକ୍ଷାରେ ଓ୍ୱିକେଟ୍ କିପର ସଞ୍ଜୁ ସାମସନ, ଇଶାନ କିଶନ, ନୀତିଶ ରାଣା, ରାହୁଲ ତେଓ୍ୱାତିଆ, ସିଦ୍ଧାର୍ଥ କୌଲ ଓ ଜୟଦେବ ଉନାଦକତ ଫେଲ ହୋଇଛନ୍ତି। ତେବେ ଏମାନଙ୍କୁ ପୁଣି ଥରେ ନିଜକୁ ପ୍ରମାଣିତ କରିବାକୁ ସୁଯୋଗ ଦିଆଯିବ।
ସୂଚନା ଅନୁଯାୟୀ, ଯଦି ଦ୍ୱିତୀୟ ଥର ପାଇଁ ଏହି ଖେଳାଳିମାନେ ଫିଟନେଶ ପରୀକ୍ଷାରେ ଫେଲ୍ ହୁଅନ୍ତି, ତେବେ ଇଂଲଣ୍ଡ ବିପକ୍ଷ ଟି-୨୦ ସିରିଜରେ ଏମାନେ ମନୋନୀତ ହେବା ଅସମ୍ଭବ ହୋଇପଡ଼ିବ। ଫିଟନେଶ ପରୀକ୍ଷାରେ ପାସ କରିବାକୁ ହେଲେ ଓ୍ୱିକେଟ୍ କିପର ଓ ସ୍ପିନରଙ୍କ ପାଇଁ ୮ ମିନିଟ ୩୦ ସେକେଣ୍ଡରେ ୨କିମି ଦୌଡିବାକୁ ସମୟ ନିର୍ଦ୍ଧାରଣ କରାଯାଇଥିବା ବେଳେ ଦ୍ରୁତ ବୋଲରଙ୍କ ପାଇଁ ୨ କିମି ପୁରା କରିବାକୁ ୮ ମିନିଟ ୧୫ ସେକେଣ୍ଡର ସମୟ ସ୍ଥିର କରାଯାଇଛି।