ବଡକୂଳ: ଖୋର୍ଦ୍ଧା ଜିଲ୍ଲା ବାଲୁଗାଁ ନିକଟସ୍ଥ ବଡକୂଳରେ ଥିବା ଚିଲିକା ସରକାରୀ ଉଚ୍ଚ ବିଦ୍ୟାଳୟର କ୍ରୀଡା ଶିକ୍ଷକ ଶ୍ରୀଯୁକ୍ତ ବୈଷ୍ଣବ ନାୟକଙ୍କୁ ଅବସରକାଳୀନ ସମ୍ବର୍ଦ୍ଧନା ପ୍ରଦାନ କରାଯାଇଛି। ସ୍କୁଲର ଶିକ୍ଷକ ତଥା ଛାତ୍ରାଛାତ୍ରୀଙ୍କ ମିଳିତ ସହଯୋଗରେ ଏକ ସଭାର ଆୟୋଜନ କରାଯାଇଥିଲା। ଏଥିରେ ଶ୍ରୀଯୁକ୍ତ ନାୟକଙ୍କ କୃତିତ୍ବ ସଂପର୍କରେ ଅବଗତ କରାଯାଇଥିଲା।
ଶ୍ରୀଯୁକ୍ତ ନାୟକ ଏହି ସ୍କୁଲରେ ପ୍ରଥମ କ୍ରୀଡା ଶିକ୍ଷକଭାବେ ଯୋଗଦେଇ ଦୀର୍ଘ 35 ବର୍ଷ ଧରି କାର୍ଯ୍ୟ କରି ଆସିଥିଲେ। ସେ ସ୍କୁଲରେ କ୍ରୀଡାର ପ୍ରଚାର ପ୍ରସାର କରାଇବା ସହିତ ଜିଲ୍ଲା ସ୍ତରରେ ଛାତ୍ରଛାତ୍ରୀଙ୍କୁ ଖେଳାଳୀ କରାଇବାରେ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିଥିଲେ। ତାଙ୍କର କ୍ରୀଡା ଛାତ୍ରମାନେ ଆଜି ଜିଲ୍ଲା, ରାଜ୍ୟ, ଜାତୀୟ ତଥା ଆନ୍ତର୍ଜାତୀୟ ସ୍ତରର କ୍ରୀଡାରେ ବେଶ ସୁନାମ ଅର୍ଜନ କରିଛନ୍ତି।
ସେ ସରକାରୀ ଚାକିରୀରୁ ଅବସର ନେଇଥିଲେ ମଧ୍ୟ କ୍ରୀଡା ପ୍ରସାରରେ ବ୍ୟକ୍ତିଗତ ସ୍ତରରେ ନିଜକୁ ନିୟୋଜିତ ରଖିବେ ବୋଲି ସେ ଅବସର ବେଳେ ଘୋଷଣା କରିଛନ୍ତି।
