ନୂଆଦିଲ୍ଲୀ: ଗୁଜୁରାଟରେ ଆମ୍ ଆଦମୀ ପାର୍ଟିକୁ ଝଟକା ଲାଗିଛି। ସୁରଟ ମ୍ୟୁନିସିପାଲିଟି କର୍ପୋରେସନର ୫ ଜଣ କାଉନସିଲର ବିଜେପିରେ ଯୋଗ ଦେଇଛନ୍ତି। ସୁରଟ ମ୍ୟୁନିସିପାଲିଟି କର୍ପୋରେସନ ନିର୍ବାଚନରେ ଆପ ର ୨୭ କାଉନସିଲର ଜିତିଥିଲେ। ଆପ କାଉନସିଲର ଭିପୁଲ ମୌଲିଆ, ଭାବନାବେନ ସୋଲାଙ୍କି, ଜ୍ୟୋତିକାବେନ ଲାଠିଆ, ମନୀଷାବେନ କୁକଡିଆ ଏବଂ ରୁତା କାକାଡିଆ ଗୃହମନ୍ତ୍ରୀ ହର୍ଷ ସାଙ୍ଗଭି, ରାଜ୍ୟ ସାଧାରଣ ସମ୍ପାଦକ ପ୍ରଦୀପସିନ ଭାଘେଲ ଏବଂ ପ୍ରଶାନ୍ତ କୋରାଟଙ୍କ ଉପସ୍ଥିତିରେ ବିଜେପିରେ ଯୋଗ ଦେଇଛନ୍ତି।
୨୭ କାଉନସିଲର ନିର୍ବାଚନରେ ଜିତିବା ପରେ ଆମ୍ ଆଦମୀ ପାର୍ଟି ଗୁଜୁରାଟରେ ଏକ ପ୍ରତିଷ୍ଠା ସ୍ଥାପିତ କରିଥିଲା ବୋଲି ଦାବି କରିଥିଲା। ତେବେ ୨୦୨୨ ବିଧାନସଭା ନିର୍ବାଚନ ପୂର୍ବରୁ ବିଜେପିରେ ଏହି ଆପ ନେତା ଯୋଗ ଦେବା ଦଳ ପାଇଁ ବଡ କ୍ଷତି ବୋଲି କୁହାଯାଉଛି। କେବଳ ସୁରଟରେ ମ୍ୟୁନିସିପାଲିଟି ନିର୍ବାଚନରେ ଆପ ସଫଳତା ପାଇଥିଲା। ପରବର୍ତ୍ତୀ ଗାନ୍ଧିନଗର ମ୍ୟୁନିସିପାଲିଟି କର୍ପୋରେସନ୍ ନିର୍ବାଚନ ଏବଂ ନଗର ନିର୍ବାଚନରେ ଆପ ର କୌଣସି ବିଶେଷ ପ୍ରଭାବ ନଥିଲା।
ଗତ ଏକ ମାସ ମଧ୍ୟରେ ଜଣଙ୍କ ପରେ ଜଣେ ଆମ୍ ଆଦମୀ ପାର୍ଟିର ନେତା ବିଦାୟ ନେଇ ବିଜେପିରେ ଯୋଗ ଦେଇଛନ୍ତି। ବିଧାନସଭା ନିର୍ବାଚନ ପର୍ଯ୍ୟନ୍ତ ଆମ୍ ଆଦମୀ ପାର୍ଟି ନିଜକୁ ବଞ୍ଚାଇ ପାରିବ କି ନାହିଁ ପ୍ରଶ୍ନ ମଧ୍ୟ ଉଠିଛି।
ଅନ୍ୟପକ୍ଷରେ ବିଜେପି ନେତା ପ୍ରଦିପ ସିଂ ଭାଘେଲ କହିଛନ୍ତି ଯେ, ଦଳ ଏହାର ସଂଗଠନର ଶକ୍ତିରେ ଜିତିବ। ଯେଉଁମାନେ ଆସିବାକୁ ଚାହୁଁଛନ୍ତି ସେମାନଙ୍କୁ ସ୍ୱାଗତ କରାଯାଇଛି। ଆମର କାଉନସିଲରମାନେ ଆମର ଆଦର୍ଶ ଦ୍ୱାରା ପ୍ରଭାବିତ ହେବା ପରେ ଦଳରେ ଯୋଗ ଦେଇଛନ୍ତି। ତାହା ସ୍ୱାଗତଯୋଗ୍ୟ। ଯଦି ଅନ୍ୟମାନେ ମଧ୍ୟ ଯୋଗଦେବାକୁ ଚାହାଁନ୍ତି, ସେମାନେ ମଧ୍ୟ ଆସିପାରନ୍ତି।
