ଭୁବନେଶ୍ୱର: ଇଣ୍ଡିଆନ୍ ନ୍ୟାସନାଲ ଟ୍ରଷ୍ଟ ଫର୍ ଆର୍ଟ ଆଣ୍ଡ କଲ୍ଚରାଲ ହେରିଟେଜ (ଇନ୍ଟାକ୍) ଭୁବନେଶ୍ୱର ଶାଖା ପକ୍ଷରୁ ସ୍ଥାନୀୟ ଧଉଳି ଶାନ୍ତି ସ୍ତୁପ ପାଦଦେଶରେ ଥିବା ଧଉଳି ଗାର୍ଡେନଠାରେ ‘ମାତୃଭାଷାର ସ୍ଥିତି’ ସମ୍ପର୍କରେ ଏକ ସଚେତନତା କାର୍ଯ୍ୟକ୍ରମ ଆୟୋଜିତ ହୋଇଯାଇଛି। ଏଥିରେ ମୁଖ୍ୟ ଅତିଥି ଭାବରେ ବିଶିଷ୍ଟ ଭାଷାବିତ୍, ସମାଜ ବିଜ୍ଞାନୀ ଏବଂ ଲେଖକ ପଦ୍ମଶ୍ରୀ ଦେବୀପ୍ରସନ୍ନ ପଟ୍ଟନାୟକ ଯୋଗଦେଇ ସାମ୍ପ୍ରତିକ ସମୟରେ ମାତୃଭାଷାର ସ୍ଥିତି ସମ୍ପର୍କରେ ବ୍ୟାଖ୍ୟାନ ସହ ଏହି ବିଷୟ ଉପରେ ଆଲୋକପାତ କରିଥିଲେ ଏବଂ ଏ କ୍ଷେତ୍ରରେ ସ୍ୱୀକୃତି ଓ ଗବେଷଣାର ଗୁରୁତ୍ୱ ରହିଥିବା ଦୋହରାଇଥିଲେ।
ଏହି ଅବସରରେ ପ୍ରକାଶ କରି ଡ. ବସନ୍ତ କୁମାର ପଣ୍ଡା, ନିର୍ଦ୍ଦେଶକ, ସେନ୍ଟର୍ ଅଫ୍ ଏକ୍ସେଲେନ୍ସ ଫର୍ ଷ୍ଟଡିଜ ଇନ୍ କ୍ଲାସିକାଲ ଓଡ଼ିଆ, ସିଆଇଆଇଏଲ୍, ଶିକ୍ଷା ମନ୍ତ୍ରଣାଳୟ, ଭାରତ ସରକାର ସ୍ଥାନୀୟ ଭାଷା ସାହିତ୍ୟ ସମ୍ପର୍କରେ ସ୍ମୃତିଚାରଣ କରିବା ସହିତ ଓଡ଼ିଶା ତଥା ଦେଶର ବିଭିନ୍ନ ଭାଗରେ ପ୍ରଚଳିତ ମାତୃଭାଷାକୁ ସ୍ୱୀକୃତି, ଏହାର ସଂରକ୍ଷଣ ଏବଂ ଗବେଷଣା ଦିଗରେ ହାତକୁ ନିଆଯାଉଥିବା ବିଭିନ୍ନ କାର୍ଯ୍ୟକ୍ରମ ସମ୍ପର୍କରେ ଉଲ୍ଲେଖ କରିଥିଲେ। ଓଡ଼ିଶାରେ ବିଭିନ୍ନ ଆଦିମ ଅଧିବାସୀ ଓ ବିଭିନ୍ନ ଅଂଚଳର ଜନସାଧାରଣଙ୍କ ଦ୍ୱାରା ବ୍ୟବହାର କରାଯାଉଥିବା ଭିନ୍ନ ଭିନ୍ନ ଉପଭାଷାର ଉଦାହରଣ ଦେଇ ସେ ମାତୃଭାଷା ଏବଂ ଅଧ୍ୟୟନ ଅଥବା ଶିକ୍ଷାର ଭାଷା ମଧ୍ୟରେ ରହିଥିବା ପାର୍ଥକ୍ୟ ସମ୍ପର୍କରେ ବ୍ୟାଖ୍ୟା କରିଥିଲେ ।
ଏହି କାର୍ଯ୍ୟକ୍ରମରେ ଡ.ଗୌରହରି ଦାସ, ଡ.ବସନ୍ତ କୁମାର ପଣ୍ଡା ଏବଂ ଡ.ରତିକାନ୍ତ ମିଶ୍ରଙ୍କୁ ଇନ୍ଟାକ ଭୁବନେଶ୍ୱର ଶାଖାରେ ନୂତନ ସଦସ୍ୟ ଭାବରେ ଗ୍ରହଣ କରାଯାଇଥିଲା। କାର୍ଯ୍ୟକ୍ରମରେ ଅମିୟ ଭୂଷଣ ତ୍ରିପାଠୀ, ରାଜ୍ୟ ଆବାହକ, ଇନ୍ଟାକ, ଓଡ଼ିଶା ଅଧ୍ୟକ୍ଷତା କରିଥିଲେ ଏବଂ ଭୁବନେଶ୍ୱର ଶାଖା ଆବାହକ ବୈକୁଣ୍ଠ ପାଣିଗ୍ରାହୀ କାର୍ଯ୍ୟକ୍ରମକୁ ସଂଯୋଜନା କରିଥିଲେ।